1. Yaˬhoˉvaˬ nyi ma nuˇ nehˬ jaˇ ve htaꞈ Daˍviˆ hk’aˬ hk’e k’oˆ ve le?

Yaˬhoˉvaˬ nyi ma nuˇ nehˬ jaˇ ve G’uiˬ sha hpehꞈ ve tehꞈ ngaˬ hui awˬ tehˬ k’oˆ g’a-aw laˇ? K’oˆ g’a ve yoˬ. Daˍviˆ k’oˆ ve, “G’uiˬ sha-oˬ, nawˬ ngaˬ htaꞈ haꞈ shaˉ leh ngaˬ htaꞈ ponˬ laˇ ve yoˬ. Nawˬ ngaˬ htaꞈ haꞈ shaˉ leh [‘nawˬ nyi ma nuˇ nehˬ ve pa taw’, MGS] ngaˬ htaꞈ uiˍ la piˇ ve yoˬ.” (2 Saˍmo-eˍlaˆ 22:36; Chiˇ mvuh ve 18:35) Daˍviˆ Liꞈ hpu chi teˇ tawn bvuhꞈ htaˇ, Saˍmo-eˍlaˆ Iˉsaˍreˍlaˆ chaw ve jawˇ mawˇ awˬ suhˉ leuˆ tuˬ Daˍviˆ ve aˉ hk’aw lo k’ai ve htaꞈ dawˇ mawˬ ve yoˬ. Daˍviˆ awˬ viˉ paˍ 7 g’aˇ cawˬ leh yawˇ awˬ leh paˍ teˇ g’aˇ hpehꞈ ve htawˇ, Sawˉluꞈ awˬ tan jawˇ mawˇ te tuˬ Daˍviˆ htaꞈ Yaˬhoˉvaˬ leuˆ yuˬ ve yoˬ.—1 Saˍmo-eˍlaˆ 16:1, 10-13.

2. Awˬ lawn chi ve hk’aw ngaˬ hui aˬ htoꞈ ma htaꞈ henˇ tuˬ le?

² Chiˇ mvuh ve liꞈ bvuhꞈ paˍ Yaˬhoˉvaˬ htaꞈ k’oˆ ve hk’a shuˍ Daˍviˆ kaꞈ k’oˆ ve yoˬ. “Yawˇ lehˬ mvuh jaˇ kuiˬ lo chehˇ taˍ leh, mvuhˇ naw ma leh miˬ guiˬ htaꞈ nyi chehˇ ve yoˬ. Yawˇ lehˬ, . . . haˍ ve g’awˇ ve chaw hui htaꞈ chiˇ taˆ piˇ leh, yawˇ hui htaꞈ jawˇ mawˇ yaˇ paˍ hui geh awˬ chawˇ te tcuh piˇ lawˬ ve yoˬ.” (Chiˇ mvuh ve 113:6-8) Yaˬhoˉvaˬ htaꞈ caˉ daꞈ ve nyi ma nuˇ nehˬ jaˇ ve a yeˇ uiˍ ve, ngaˬ hui htaꞈ aˬ htoꞈ ma maˍ laˇ ve awˬ lawn chi ve hk’aw teˇ geh henˇ tuˬ yoˬ. Sawˉluꞈ, Daˍyeˍlaˆ, leh Yeˍsuˆ nyi ma nuˇ nehˬ ve awˬ lawn ngaˬ hui htaꞈ hk’aˬ hk’e maˍ laˇ g’a ve kaꞈ teˇ geh henˇ tuˬ yoˬ.

3. Yaˬhoˉvaˬ ngaˬ hui htaꞈ hk’aˬ hk’e te laˇ ve le? Leh chi hk’aˬ hk’e hpeuꞈ maw laˇ ve le?

³ Yaˬhoˉvaˬ lehˬ, maˇ biˇ ve chaw yaˇ htaꞈ te piˇ ve awˬ hk’aˇ yawˇ nyi ma nuˇ nehˬ jaˇ ve tehꞈ hpeuꞈ maw laˇ ve yoˬ. Ngaˬ hui yawˇ htaꞈ oˉ k’oˍ  pui tcuh laˇ ve ceh maˇ heˆ. Ngaˬ hui yawˇ ve awˬ chawˇ hpehꞈ ve tehꞈ shawˍ laˇ ve yoˬ. (Chiˇ mvuh ve 25:14) Ngaˬ hui G’uiˬ sha ve awˬ chawˇ hpehꞈ g’a tuˬ, yawˇ ve Yaˇ paˍ ngaˬ hui ve venˇ baˇ awˬ pon htaiˍ hk’awꞈ tcuh laˇ ve yoˬ. Yaˬhoˉvaˬ lehˬ ha k’aˉ puiˉ jaˇ!

4. Yaˬhoˉvaˬ ngaˬ hui htaꞈ aˬ htoꞈ ma peꞈ laˇ ve le? Leh aˬ htoꞈ ma pa taw le?

⁴ Yaˬhoˉvaˬ nyi ma nuˇ nehˬ jaˇ ve hpeuꞈ maw laˇ ve teˇ ceuˬ lehˬ, yawˇ ngaˬ hui htaꞈ hpanˍ taˍ laˇ ve lehˬ teꞈ chiˉ maˇ leuˆ yuˬ tcuh laˇ kaꞈ g’a ve yoˬ. Yaꞈ hk’aˇ, ngaˬ hui yawˇ ve awˬ hoꞈ awˬ han hk’a shuˍ hpanˍ taˍ laˇ leh ngaˬ hui a shaꞈ teꞈ hk’aˇ hk’aˬ hk’e te tuˬ leuˆ yuˬ tcuh laˇ ve yoˬ. Ngaˬ hui awˬ hpfuhˇ maˇ cawˬ ve chaw yaˇ hpehꞈ ve htawˇ, ngaˬ hui leuˆ ve awˬ ceuˬ Yaˬhoˉvaˬ awˬ pon a yeˇ uiˍ jaˇ. Ngaˬ hui yawˇ htaꞈ ha ve pa taw, yawˇ ve kanˉ te tuˬ leuˆ yuˬ tcuh gaˇ ve yoˬ. Leh ngaˬ hui yawˇ ve hkawˇ na yuˬ ve lehˬ, hk’aˬ htaˆ kaꞈ ngaˬ hui awˬ pon awˬ bon cawˬ ve tehꞈ dawˇ tcuh gaˇ ve yoˬ. (Bon maˍ ve 10:12; Iˉsaˍyaˆ 48:17, 18) Yaˬhoˉvaˬ nyi ma nuˇ nehˬ jaˇ ve ngaˬ hui awˬ bon uiˍ jaˇ!

5. Ngaˬ hui nyi ma nuˇ nehˬ ve chaw hpehꞈ tuˬ Yaˬhoˉvaˬ hk’aˬ hk’e maˍ laˇ ve le? (Awˬ htaꞈ hpawˇ ve awˬ han htaꞈ nyi sheˍ.)

⁵ Yaˬhoˉvaˬ nyi ma nuˇ nehˬ jaˇ ve htaꞈ ngaˬ hui henˇ yuˬ g’a tuˬ yawˇ ngaˬ hui htaꞈ te laˇ ve awˬ hk’aˇ htaꞈ shiˍ g’a ve yoˬ. Yaˬhoˉvaˬ lehˬ mvuhˇ naw ma miˬ naˆ ma aꞈ kehˉ cuˇ yiˍ cawˬ jaˇ leh chaw teˇ g’aˇ kaꞈ yawˇ htaꞈ beˆ maˍ piˇ tuˬ maˇ loˍ. Yaꞈ hk’aˇ, yawˇ shu beˆ maˍ laˇ tuˬ ve htaꞈ kaꞈ haꞈ yuˬ ve yoˬ. Tawˇ pa haˉ te k’o, Yaˬhoˉvaˬ lehˬ Yeˍsuˆ htaꞈ awˬ nu ve awˬ ceuˬ kaꞈ hpanˍ tcuh ve yoˬ. (Tawˇ naˉ ve 8:27-30; Kawˇlawˇsehˇ 1:15, 16) Yaˬhoˉvaˬ lehˬ kanˇ paˆ uiˍ jaˇ mvuh jaˇ ve G’uiˬ sha hpehꞈ leh chaw teˇ g’aˇ kaꞈ yawˇ htaꞈ ga piˇ tuˬ maˇ loˍ ve htawˇ, awˬ nu ve chaw htaꞈ kaꞈ awˬ vuiˬ piˇ sheˍ ve yoˬ. Tawˇ pa haˉ te k’o, G’uiˬ sha Yeˍsuˆ htaꞈ yawˇ ve mvuhˇ miˬ hk’aw Jawˇ mawˇ te tcuh tuˬ leuˆ yuˬ ve yoˬ. Leh 144,000 g’aˇ kaꞈ Yeˍsuˆ geh teˇ geh uˉ peunˍ tuˬ leuˆ yuˬ ve yoˬ. (Luˉkaꞈ 12:32) Yaˬhoˉvaˬ lehˬ Yeˍsuˆ htaꞈ Jawˇ mawˇ leh paw hkuˇ lonˉ te tuˬ maˍ piˇ ve yoˬ. (Heˍbrehˇ 5:8, 9) Yeˍsuˆ geh teˇ geh uˉ peunˍ ve chaw htaꞈ kaꞈ awˬ vuiˬ te tuˬ Yaˬhoˉvaˬ maˍ piˇ  ve htawˇ, yawˇ hui kanˉ te ve teˇ ceuˬ le le htaꞈ yawˇ maˇ g’a uˉ peunˍ. Yaꞈ hk’aˇ, G’uiˬ sha ve a loˍ teˇ ceuˬ le le te biˇ g’a tuˬ tehꞈ yawˇ hui htaꞈ yonˍ g’a ve yoˬ.—Hpeuꞈ maˍ ve 5:10.

6-7. Yehˬ shehˍ hpaˇ, nyi haꞈ shaˉ paˍ leh awˬ pa aw e, Yaˬhoˉvaˬ ve awˬ lawn htaꞈ hk’aˬ hk’e te henˇ yuˬ g’a tuˬ le?

⁶ Mvuhˇ naw ma hk’oˆ ve ngaˬ hui ve Awˬ pa chaw teˇ g’aˇ kaꞈ yawˇ htaꞈ ga piˇ tuˬ maˇ loˍ ve htawˇ, shu htaꞈ awˬ vuiˬ piˇ sheˍ ve k’o, ngaˬ hui kaꞈ yawˇ hk’a shuˍ te cawˇ ve yoˬ. Nawˬ yehˬ shehˍ hpaˇ maˇ heˆ leh Hkriꞈ yaˇ awˬ moˍ hk’aw nyi haꞈ shaˉ paˍ hpehꞈ-aw laˇ? Awˬ nu ve chaw htaꞈ awˬ vuiˬ te tcuh tuˬ, yawˇ hui kanˉ te ve awˬ vuiˬ htaꞈ nawˬ maˇ g’a uˉ peunˍ cawˇ leh yawˇ hui htaꞈ choˬ te oˇ te maˇ g’a k’oˆ tuˬ, Yaˬhoˉvaˬ htaꞈ henˇ yuˬ sheˍ. Nawˬ Yaˬhoˉvaˬ htaꞈ henˇ yuˬ ve k’o, nawˬ ve kanˉ te peuˬ-oˬ htaˇ shu kaꞈ te g’a tuˬ maˍ piˇ leh yawˇ hui hk’a dehꞈ te g’a ve tehꞈ yonˍ g’a tuˬ kaꞈ ga piˇ ve yoˬ. (Iˉsaˍyaˆ 41:10) Kanˇ paˆ cawˬ ve chaw Yaˬhoˉvaˬ ve awˬ lawn htaꞈ hk’aˬ hk’e henˇ yuˬ g’a sheˍ ve le?

⁷ Yaˬhoˉvaˬ mvuhˇ naw ma tcuh yaˇ teˇ hpaˍ ve dawˇ hk’aˇ htaꞈ a yeˇ yuˬ ve tehꞈ Liꞈ hpu hk’aw hpeuꞈ maw laˇ ve yoˬ. (1 Jawˇ mawˇ 22:19-22) Awˬ pa awˬ e hpehꞈ ve chaw-oˬ, nawˬ Yaˬhoˉvaˬ htaꞈ hk’aˬ hk’e henˇ yuˬ g’a ve le? Nawˬ ve yaˇ hk’aˬ hk’e dawˇ ve htaꞈ na piˇ sheˍ. Cawˇ ve tehꞈ nawˬ dawˇ ve k’o, oˇ ve htaꞈ g’aꞈ te sheˍ.

8. Yaˬhoˉvaˬ lehˬ Aˍbraˍhanˍ leh Saˍraˇ htaꞈ hk’aˬ hk’e yeunˇ hkanˍ piˇ ve le?

⁸ Yaˬhoˉvaˬ nyi ma nuˇ nehˬ jaˇ ve tehꞈ hpeuꞈ maw laˇ ve awˬ nu ve teˇ ceuˬ lehˬ, yawˇ yeunˇ hkanˍ ve yoˬ. Yaˬhoˉvaˬ dawˇ cheˆ ve htaꞈ htawˇ dawˇ nawˬ dawˇ cawˬ ve yawˇ ve kanˉ te ve chaw htaꞈ kaꞈ yeunˇ hkanˍ piˇ ve yoˬ. Yaˬhoˉvaˬ Sawˉdonˍ leh Gawˇmawˇraꞈ venˇ htaꞈ te luˬ ve awˬ ceuˬ Aˍbraˍhanˍ maˇ cawˇ tehꞈ k’oˆ ve htawˇ, yawˇ yeunˇ hkanˍ leh na taˍ piˇ ve yoˬ. (Awˬ hkuiˉ puiˍ 18:22-33) Saˍraˇ mawˇ la htaˇ yaˇ cawˬ tuˬ yoˬ tehꞈ Yaˬhoˉvaˬ ka tiꞈ te piˇ ve htaꞈ yawˇ g’uiˬ ve htawˇ, Yaˬhoˉvaˬ Saˍraˇ htaꞈ yeunˇ hkanˍ piˇ ve yoˬ. Yaˬhoˉvaˬ Saˍraˇ htaꞈ maˇ beuꞈ leh nyi hk’aˇ maˇ suh ve tehꞈ maˇ hpeuꞈ maw piˇ.—Awˬ hkuiˉ puiˍ 18:10-14.

9. Awˬ pa awˬ e maˇ heˆ leh Hkriꞈ yaˇ awˬ moˍ hk’aw nyi haꞈ shaˉ paˍ Yaˬhoˉvaˬ ve awˬ lawn htaꞈ hk’aˬ hk’e te henˇ yuˬ g’a tuˬ le?

⁹ Awˬ pa awˬ e maˇ heˆ leh Hkriꞈ yaˇ awˬ moˍ hk’aw nyi haꞈ shaˉ paˍ hpehꞈ ve chaw-oˬ, Yaˬhoˉvaˬ htaꞈ nawˬ hk’aˬ hk’e henˇ yuˬ g’a tuˬ le? Yaˇ teˇ hpaˍ maˇ heˆ leh Hkriꞈ yaˇ awˬ moˍ hk’aw ve awˬ viˉ awˬ nyi nawˬ dawˇ cheˆ ve htaꞈ maˇ haꞈ yuˬ ve k’o, nawˬ hk’aˬ hk’e te tuˬ le? Nawˬ ve dawˇ hk’aˇ cawˇ ve maˇ heˆ leh yawˇ hui ve dawˇ hk’aˇ maˇ cawˬ ve tehꞈ nawˬ laꞈ haˉ k’oˆ piˇ tuˬ laˇ? Maˇ heˆ leh nawˬ yawˇ hui ve dawˇ hk’aˇ htaꞈ na g’a tuˬ coˇ caˇ-aw laˇ? Kanˇ paˆ cawˬ ve chaw coˇ caˇ leh Yaˬhoˉvaˬ ve awˬ lawn htaꞈ henˇ yuˬ ve k’o, yehˬ k’a hk’aw ve chaw maˇ heˆ leh Hkriꞈ yaˇ awˬ moˍ hk’aw ve awˬ viˉ awˬ nyi kaꞈ awˬ tehˬ awˬ na awˬ bon g’a tuˬ yoˬ. Chi teˇ hkui Yaˬhoˉvaˬ nyi ma nuˇ nehˬ jaˇ ve htaꞈ caˉ daꞈ ve ngaˬ hui laiˉ ceuˬ g’a henˇ-oˬ. Liꞈ hpu hk’aw nyi ma nuˇ nehˬ ve chaw teˇ hpaˍ ve awˬ lawn htaꞈ ngaˬ hui hk’aˬ hk’e henˇ yuˬ g’a ve le, teˇ geh henˇ tuˬ yoˬ.

10. Yaˬhoˉvaˬ awˬ nu ve chaw ve awˬ lawn yehˇ leh ngaˬ hui htaꞈ hk’aˬ hk’e maˍ laˇ ve le?

¹⁰ Yaˬhoˉvaˬ ‘ngaˬ hui htaꞈ maˍ laˇ tuˬ’ Liꞈ hpu hk’aw laiˉ lawn cawˬ tcuh laˇ ve yoˬ. (Iˉsaˍyaˆ 30:20, 21) G’uiˬ sha nyi hk’aˇ suh tuˬ te ve chaw ve te hk’aˇ dawˇ hk’aˇ teˇ hpaˍ leh nyi ma nuˇ nehˬ ve htaꞈ dawˇ nyi htaˇ, awˬ lawn chi ve ngaˬ hui henˇ yuˬ g’a ve yoˬ. Chi hk’oˆ kaꞈ, te hk’aˇ dawˇ hk’aˇ chi hk’e ve maˇ hpeuꞈ maw piˇ ve chaw ve awˬ lawn ngaˬ hui kaꞈ henˇ tuˬ yoˬ.—Chiˇ mvuh ve 37:37; 1 Kawˇrenˍhtuˆ 10:11.

11. Sawˉluꞈ ve maˇ daꞈ awˬ lawn ngaˬ hui htaꞈ hk’aˬ hk’e maˍ laˇ g’a ve le?

¹¹ Jawˇ mawˇ Sawˉluꞈ g’a hpuˇ ve awˬ lawn htaꞈ teˇ geh dawˇ nyi sheˍ. Awˉ lawˉ htaˇ yawˇ nyi ma nuˇ nehˬ jaˇ. Yawˇ hk’aˬ hk’e taw te g’a ve shiˍ leh yawˇ awˬ vuiˬ awˬ leuˉ k’awꞈ te g’a tuˬ maˇ yonˍ g’a. (1 Saˍmo-eˍlaˆ 9:21; 10:20-22) Yaꞈ hk’aˇ, Sawˉluꞈ jawˇ mawˇ hpehꞈ la htaˇ, yawˇ uiˍ muiˬ caˆ muiˬ ve chaw hpehꞈ leh a hkaw-anˬ maˇ g’a ve awˬ vuiˬ htaꞈ te ve yoˬ. Tawˇ pa haˉ te k’o, teˇ pawˆ htaˇ tcuh kaˍ paˍ Saˍmo-eˍlaˆ htaꞈ  yawˇ law maˇ g’aˇ ve yoˬ. Yaˬhoˉvaˬ yawˇ ve mvuhˇ miˬ yaˇ htaꞈ nyi haꞈ shaˉ laˇ tuˬ yoˬ tehꞈ Sawˉluꞈ nyi ma nuˇ nehˬ leh g’aˇ va cawˇ ve htawˇ, yawˇ tuˉ tanˇ tuˬ a hkaw-anˬ maˇ cawˬ ve htaꞈ tuˉ tanˇ ve yoˬ. Chi Yaˬhoˉvaˬ yawˇ htaꞈ nyi hk’aˇ maˇ suh leh jawˇ mawˇ maˇ k’awꞈ te tcuh-o. (1 Saˍmo-eˍlaˆ 13:8-14) Ngaˬ hui cuˇ yiˍ cawˬ ve chaw hpehꞈ gaˇ ve k’o, maˇ daꞈ ve awˬ lawn chi htaꞈ ngaˬ hui maˇ henˇ yuˬ cawˇ leh a hkaw-anˬ maˇ g’a ve htaꞈ maˇ te cawˇ.

12. Daˍyeˍlaˆ nyi ma nuˇ nehˬ ve tehꞈ hk’aˬ hk’e hpeuꞈ maw laˇ ve le?

¹² Tcuh kaˍ paˍ Daˍyeˍlaˆ daꞈ ve henˇ yuˬ tuˬ hpehꞈ ve yoˬ. Yawˇ Sawˉluꞈ htaꞈ maˇ shuˍ. Daˍyeˍlaˆ a shaꞈ teꞈ chehˇ ve teˇ co-e nyi ma nuˇ nehˬ leh Yaˬhoˉvaˬ ve kanˉ te ve yoˬ. Yawˇ Yaˬhoˉvaˬ beˆ maˍ laˇ tuˬ hk’aˬ htaˆ kaꞈ lawˬ ve yoˬ. Teˇ pawˆ htaˇ Neˍbuˍhkaˍneˍzaˍ ve zuhꞈ maˆ tcuhˉ kuiˬ hk’aˬ hk’e k’oˆ gaˇ ve, Yaˬhoˉvaˬ Daˍyeˍlaˆ htaꞈ cuˇ leh k’oˆ maˍ piˇ tcuh ve yoˬ. Daˍyeˍlaˆ yawˇ te g’a ve hk’a peu-eˬ lehˬ yawˇ cheuˬ ve tehꞈ maˇ k’oˆ. Yawˇ chi hk’e te g’a ve pa taw, Yaˬhoˉvaˬ htaꞈ chiˇ mvuh ve yoˬ. (Daˍyeˍlaˆ 2:26-28) Ngaˬ hui hk’aˬ hk’e henˇ yuˬ g’a ve le? Ngaˬ hui awˬ vuiˬ hk’a dehꞈ te g’a ve maˇ heˆ leh ngaˬ hui G’uiˬ sha ve kanˉ htaꞈ hk’a dehꞈ te g’a ve awˬ viˉ awˬ nyi dawˇ cawˇ htaˇ, ngaˬ hui Yaˬhoˉvaˬ htaꞈ g’a chiˇ mvuh cawˇ ve tehꞈ tawnˇ taˍ cawˇ ve yoˬ. Yaˬhoˉvaˬ maˇ ga laˇ ve k’o, awˬ ceuˬ chi ve teˇ hpaˍ htaꞈ te maˇ g’a taˬ tehꞈ nyi ma nuˇ nehˬ ve hk’aw haꞈ yuˬ cawˇ ve yoˬ. (Hpiˇliˇpiˆ 4:13) Ngaˬ hui chi hk’e te htaˇ, Yeˍsuˆ htaꞈ henˇ yuˬ chehˇ ve yoˬ.

13. Yoˇhanˬ liꞈ 5:19, 30 hk’aw Yeˍsuˆ k’oˆ taˍ ve tawˇ hkawˇ yawˇ nyi ma nuˇ nehˬ ve htaꞈ ngaˬ hui hk’aˬ hk’e g’a mawˬ ve le?

¹³ Yeˍsuˆ lehˬ G’uiˬ sha ve yaˇ biˇ jaˇ ve hpehꞈ ve htawˇ, yawˇ hk’aˬ htaˆ kaꞈ G’uiˬ sha htaꞈ g’aˇ va ve yoˬ. (Yoˇhanˬ 5:19, 30 g’aw sheˍ.) Yeˍsuˆ lehˬ yawˇ Awˬ pa ve kanˇ paˆ htaꞈ veh yuˬ tuˬ maˇ dawˇ nyi jaw. Hpiˇliˇpiˆ 2:6 hk’aw k’oˆ ve, “G’uiˬ sha hk’a shuˍ shuˍ hpehꞈ chehˇ ve teˇ ceuˬ htaꞈ g’aˇ hteꞈ vawˆ taˍ cawˇ ve yoˬ tehꞈ yawˇ maˇ dawˇ.” Yeˍsuˆ lehˬ G’uiˬ sha ve kanˇ paˆ awˬ hawˉ lo chehˇ leh, yawˇ hk’aˬ hk’e taw te g’a ve tehꞈ shiˍ ve pa taw Awˬ pa ve kanˇ paˆ htaꞈ hk’aˬ htaˆ kaꞈ haꞈ yuˬ chehˇ ve yoˬ.

14. Yeˍsuˆ te tuˬ a hkaw-anˬ maˇ g’a ve htaꞈ te laˇ tuˬ lawˬ htaˇ yawˇ hk’aˬ hk’e te ve le?

¹⁴ Awˬ laꞈ g’awˇ Yaˍkoˆ, Yoˇhanˬ leh yawˇ hui ve awˬ e Yeˍsuˆ geh yawˇ ve yaˇ daꞈ jaˇ ve awˬ vuiˬ g’a tuˬ ca lawˬ la htaˇ, Yeˍsuˆ piˇ tuˬ a hkaw-anˬ maˇ cawˬ ve tehꞈ hk’aˬ hk’e te ve teˇ geh nyi sheˍ. G’uiˬ sha ve mvuhˇ miˬ hk’aw Yeˍsuˆ Jawˇ mawˇ te htaˇ, a shu laꞈ sha paˉ muiˬ leh a shu laꞈ mehˍ paˉ muiˬ tuˬ, mvuhˇ naw ma hk’oˆ ve Awˬ pa Yaˬhoˉvaˬ teˇ g’aˇ ceh tiˉ dawˇ cheˆ tuˬ a hkaw-anˬ cawˬ ve tehꞈ Yeˍsuˆ htawˇ dawˇ nawˬ dawˇ maˇ cawˬ leh k’oˆ piˇ ve yoˬ. (Maꞈhtehˍ 20:20-23) Chi Yeˍsuˆ nyi ma nuˇ nehˬ jaˇ ve tehꞈ hpeuꞈ maw laˇ  ve yoˬ. Yawˇ hk’aˬ hk’e taw te g’a ve shiˍ leh Yaˬhoˉvaˬ te tcuh ve awˬ leuˉ yawˇ maˇ te. ( Yoˇhanˬ 12:49) Chi htaꞈ pa taw, Yeˍsuˆ ve awˬ lawn htaꞈ ngaˬ hui hk’aˬ hk’e henˇ yuˬ g’a ve le?

15-16. 1 Kawˇrenˍhtuˆ liꞈ 4:6 hk’aw beˆ maˍ laˇ taˍ ve htaꞈ ngaˬ hui hk’aˬ hk’e g’aꞈ te g’a tuˬ le?

¹⁵ Yeˍsuˆ nyi ma nuˇ nehˬ ve awˬ lawn htaꞈ ngaˬ hui henˇ yuˬ g’a ve yoˬ. Chi hk’e te g’a tuˬ 1 Kawˇrenˍhtuˆ liꞈ 4:6 hk’aw k’oˆ taˍ ve hk’e, “Liꞈ hpu hk’aw bvuhꞈ taˍ ve awˬ hk’aˇ suh ceh tiˉ” g’aꞈ te g’a ve yoˬ. Shu ngaˬ hui geh beˆ maˍ laˇ tuˬ ca lawˬ la htaˇ, ngaˬ hui laꞈ haˉ maˇ beˆ maˍ piˇ cawˇ ve maˇ heˆ leh beˆ maˍ piˇ htaˇ ngaˬ hui ve dawˇ hk’aˇ htaꞈ maˇ yehˇ cawˇ. Beˆ maˍ piˇ htaˇ Liꞈ hpu hk’aw ve awˬ liˇ awˬ hk’aˇ leh G’uiˬ sha ve kanˉ hk’aˇ hk’aw ve liꞈ k’oˆ teˇ hpaˍ ngaˬ hui yehˇ cawˇ ve yoˬ. Ngaˬ hui chi hk’e te htaˇ, ngaˬ hui hk’aˬ hk’e taw te g’a ve htaꞈ haꞈ yuˬ leh Yaˬhoˉvaˬ geh laˬ ve beˆ maˍ laˇ ve lehˬ, ngaˬ hui ve dawˇ hk’aˇ aꞈ kehˉ daꞈ jaˇ ve tehꞈ haꞈ yuˬ cawˇ ve yoˬ.—Hpeuꞈ maˍ ve 15:3, 4.

¹⁶ Yaˬhoˉvaˬ htaꞈ yawˆ yan ve awˬ hk’oˆ kaꞈ, ngaˬ hui nyi ma nuˇ nehˬ ve chaw hpehꞈ tuˬ awˬ nu ve awˬ hk’aˇ kaꞈ cawˬ sheˍ ve yoˬ. Nyi ma nuˇ nehˬ ve chaw hpehꞈ ve lehˬ ngaˬ hui ha lehˬ tuˬ te laˇ leh awˬ nu ve chaw geh hk’aˬ hk’e hawˍ daꞈ g’a ve kaꞈ chi teˇ hkui teˇ geh henˇ tuˬ yoˬ.

17. Nyi ma nuˇ nehˬ ve leh na yuˬ puiˉ ve chaw aˬ htoꞈ ma te ha lehˬ ve le?

¹⁷ Ngaˬ hui nyi ma nuˇ nehˬ ve chaw hpehꞈ ve k’o, ha lehˬ jaˇ tuˬ yoˬ. Aˬ htoꞈ ma pa taw le? Awˬ lawn k’o, nyi ma nuˇ nehˬ ve chaw lehˬ yawˇ hk’aˬ hk’e taw te g’a ve leh yawˇ te maˇ g’a ve laiˉ ceuˬ cawˬ ve tehꞈ shiˍ ve yoˬ. Yaꞈ hk’aˇ, shu ga piˇ htaˇ, ga piˇ ve htaꞈ yawˇ awˬ hpfuhˇ shiˍ leh chi yawˇ ha lehˬ jaˇ tuˬ te piˇ ve yoˬ. Tawˇ pa haˉ te k’o, Yeˍsuˆ hkiˬ tuꞈ paˍ 10 g’aˇ htaꞈ gu na-e piˇ ve awˬ lawn htaꞈ dawˇ nyi sheˍ. Gu na-e piˇ ve chaw teˇ g’aˇ ceh tiˉ Yeˍsuˆ htaꞈ awˬ bon uiˍ jaˇ k’oˆ piˇ la ve yoˬ. Chi yawˇ hk’aˇ yawˇ te maˇ g’a ve awˬ ceuˬ hpehꞈ ve yoˬ. Nyi ma nuˇ nehˬ ve hawˉ hk’aˆ chi teˇ g’aˇ gu na-e piˇ ve htaꞈ awˬ hpfuhˇ shiˍ  leh chi yawˇ G’uiˬ sha htaꞈ chiˇ mvuh tuˬ te piˇ ve yoˬ.—Luˉkaꞈ 17:11-19.

18. Roˉmaꞈ liꞈ 12:10 hk’aw k’oˆ taˍ ve hk’e, nyi ma nuˇ nehˬ ve chaw aˬ htoꞈ ma te shu geh hawˍ daꞈ g’a ve le?

¹⁸ Nyi ma nuˇ nehˬ ve chaw shu geh hk’a dehꞈ meuˆ daꞈ g’a ve yoˬ. Aˬ htoꞈ ma pa taw le? Nyi ma nuˇ nehˬ ve chaw lehˬ shu yawˇ aꞈ kehˉ daꞈ ve tehꞈ dawˇ ve pa taw, shu htaꞈ yonˍ g’a ve yoˬ. Chi hk’oˆ kaꞈ, awˬ nu ve chaw awˬ vuiˬ hk’a dehꞈ te g’a ve htaꞈ yawˇ hui mawˬ htaˇ, yawˇ hui kaꞈ ha lehˬ ve yoˬ. Yawˇ hui chaw oˇ ve teˇ g’aˇ htaꞈ chiˇ mvuh piˇ leh teˇ geh ha lehˬ ve yoˬ. Yaꞈ hk’aˇ, nyi ma nuˇ nehˬ ve chaw lehˬ awˬ nu ve chaw htaꞈ kaꞈ yawˆ yan puiˉ ve yoˬ.—Roˉmaꞈ 12:10 g’aw sheˍ.

19. Aˬ htoꞈ ma te ngaˬ hui uiˍ muiˬ caˆ muiˬ ve chaw maˇ hpehꞈ cawˇ ve le?

¹⁹ Uiˍ muiˬ caˆ muiˬ ve chaw lehˬ shu htaꞈ maˇ chiˇ mvuh gaˇ puiˉ. Shu yawˇ htaꞈ chiˇ mvuh laˇ tcuh gaˇ ve yoˬ. Yawˇ hui awˬ to shu htaꞈ tehˆ daꞈ leh enˍ daꞈ gaˇ puiˉ ve yoˬ. Shu htaꞈ maˍ piˇ leh awˬ vuiˬ te tcuh cawˇ ve htawˇ uiˍ muiˬ caˆ muiˬ ve chaw k’oˆ ve, “daꞈ ve te tawˆ la tcuh gaˇ ve k’o, ngaˬ g’a te ve yoˬ.” Uiˍ muiˬ caˆ muiˬ ve chaw yawˇ shu aꞈ kehˉ a yeˇ uiˍ ve tehꞈ dawˇ leh shu yawˇ aꞈ kehˉ daꞈ ve te g’a ve htaꞈ mawˬ htaˇ, yawˇ hkawehˉ ve yoˬ. (Gaˍlaˍtiˆ 5:26) Chi hk’e ve chaw lehˬ shu geh awˬ chawˇ chi maw maw te maˇ g’a. Ngaˬ hui uiˍ muiˬ caˆ muiˬ ve chaw hpehꞈ ve tehꞈ mawˬ htaˇ, ngaˬ hui ve dawˇ hk’aˇ pa g’a tuˬ leh maˇ daꞈ ve dawˇ hk’aˇ nyi ma hk’aw maˇ g’a cawˬ tcuh tuˬ, Yaˬhoˉvaˬ geh bon lawˬ cawˇ ve yoˬ.—Roˉmaꞈ 12:2.

20. Aˬ htoꞈ ma te ngaˬ hui nyi ma nuˇ nehˬ ve chaw hpehꞈ cawˇ ve le?

²⁰ Yaˬhoˉvaˬ ve daꞈ jaˇ ve awˬ lawn ngaˬ hui awˬ bon uiˍ jaˇ tehꞈ k’oˆ piˇ gaˇ ve yoˬ. Yaˬhoˉvaˬ yawˇ ve kanˉ te ve chaw htaꞈ nyi ma nuˇ nehˬ ve hk’aw te piˇ ve awˬ hk’aˇ ngaˬ hui mawˬ htaˇ, ngaˬ hui yawˇ htaꞈ henˇ yuˬ gaˇ ve yoˬ. Chi hk’oˆ kaꞈ, Liꞈ hpu hk’aw bvuhꞈ taˍ ve G’uiˬ sha ve kanˉ te ve nyi ma nuˇ nehˬ ve chaw htaꞈ kaꞈ ngaˬ hui henˇ yuˬ gaˇ ve yoˬ. Yawˇ hui daꞈ jaˇ ve awˬ vuiˬ g’a ve lehˬ G’uiˬ sha geh toˇ ve yoˬ. Ngaˬ hui G’uiˬ sha htaꞈ yawˆ yan leh yawˇ htaꞈ hk’aˬ htaˆ kaꞈ chiˇ mvuh sheˍ. (Hpeuꞈ maˍ ve 4:11) Ngaˬ hui chi hk’e te htaˇ, nyi ma nuˇ nehˬ ve chaw htaꞈ haꞈ ve mvuhˇ naw ma hk’oˆ ve Awˬ pa Yaˬhoˉvaˬ G’uiˬ sha geh ngaˬ hui kaꞈ toˇ g’a tuˬ yoˬ.