1. N’nga ndivyongo viivi vyapama vyaongile Davide va mwasa ovievi-a wa Yohova?

N’NGA pyoodeya ira i-yo nionge ira Yohova ngovievi-a? Ee. Onani vyalembile wamasalimo Davide alembile e-ni: “Nyo munondiva-a mafaramento aivulumucho thitho dhievi-a winyu unondisimba.” (2 Sam. 22:36; Salimo 18:35) Voonga madhu enala Davide venango athuulela ira namaro-edha Samueli ude nyumbani wa babee ira amasakule mwene waana Isiraeli. Davide ali mwana vaa-ima athanu naararu, vyangalive ee-no Yohova atosakula ira Davide avire limburo la Sauli.—1 Sam. 16:1, 10-13.

2. N’nga ninofuna nione n’ni va yofunjedha yeyi?

² Mwaimbarimbari Davide ana mathuulelo mambo-ive na namalemba Salimo 113, liye aongile ira: “Yohova unoorama noing’anechecha dhulu na ilambo yavathi, liye unovenyathi-a atu odhievi-a vatumbuluni thitho unokami-a atu osauwa vionanga kala atu apama.” (Salimo 113:6-8) Va yofunjedha yen’na ninoona vyongo vinango vioni-idhe Yohova va mwasa odhievi-a thitho ninodha funjedhela va ifwanafwani-o yeyi thitho ninodha funjedhela vang’ono va mwasa okala o-odhioneeliedha ifwanafwani-o ninga ya mwene Sauli, namaro-edha Danieli thitho Yesu.

3. N’nga Yohova unoniona a-vi, thitho i-yo ninavione a-vi vyevyi?

³ Ninooda funjedhelavo vinjinji naodanga ing’ana Yohova tundu unoairelana liye anamalabee o-olongomana. Yohova kanoaorumela ninga anamalabee baa-ini; liye unoniona ninga axamwalee. (Salimo 25:14) Vofuna dhowanave uxamwali-u na liye, Yohova utovelela mwanee ira adhanithathule vyodawa. Nditangaranga  dhilukulu thitho dhivelo Yohova vile vioni-idhe liye! Vyothene vyevyi vinooni-a ira liye ndi Nlungu odhievi-a.

4. N’nga Yohova univa-idhe n’ni thitho mwasiwa ngwan’ni?

⁴ Onani yongo inango va mwasa odhievi-a wa Yohova. Vokala Namapanducha, Yohova atokaana izo yofuna sakula va kadha mutu ingumi yaakaena liye. Mbwenye liye kairile vyevyo. Yohova utonipanducha mofwanafwani-a na liye utooni-a yosakula angalive ira i-yo nili akirikiti thitho kanina nguru vofwanafwani-a na liye. Mwasa oi liye kanafuna ira i-yo nimlambelenga mokanyi-edhiwa, mbwenye mwadhivelo thitho nozindiela upama ulivo ovwela liye. (Dotor. 10:12; Esaya 48:17, 18) Ndivyapama vinjinji lambela Nlungu odhievi-a!

5. N’nga Yohova unonifunji-a a-vi ira nikale odhievi-a? (Onani iruthiruthi ya kapa.)

⁵ Tundu unoirela Yohova atu anango vinooda nifunji-a ira i-yo thitho nikale odhievi-a. Kavali mutu mwinango ofwanafwani-ana ninga idhiwa wa Yohova. Angalive ee-no, liye uli okozeya oda rumela vyoonga vi-u. mwaifwanafwani-o, Yohova utorumeli-a ira mwanee amkami-e panducha vyongo vyothene. (Sang. 8:27-30; Akol. 1:15, 16) Angalive ira liye ngwanguru dhothene, Yohova unova-a ngari atu anango. Liye utomsakula Yesu ira akale Mwene wa Umwene thitho utova-a ngari atu okwakwana 144.000 ira tamaode tonga vambo-i na Yesu. (Luka 12:32) Vyaimbarimbari ira Yohova utomfunji-a Yesu ira akale Mwene thitho namavelela kuto. (Aeb. 5:8, 9) Liye thitho utofunji-a atu ale anafuna dhowa matonga vambo-i na Yesu. Mbwenye Yohova kanakalela ing’anechecha vinoira aliwa vofuna kwakwaneli-edha basalo. Liye unoaroromela ira aliwa anooda irana ifunelwee.—Apok. 5:10.

6-7. N’nga ndiifwanafwani-o iivi Yohova inova-a liye vogawela vyongo vinango?

⁶ Yohova ule a-anafwanelela kami-iwa na  mutu mwinango, liye unooda va-a vikundu atu anango, simbwasimbwa i-yo! Nyo muli muru wa banja venango unolaba ninga ndimuwa wavapingoni? Akala ndi-eno irani ninga Yohova muva-e mabasa anango atu enango, thitho kamuwesedhenga aing’anela vakadha yongo inaira aliwa volaba basalo. Vo-arela ifwanafwani-o ya Yohova nyo kamunodha kaana imwerumweru baa-ine mbwenye munodha ona basalo ira litomala mwapama thitho munooda kami-a atu enango voafunji-a vyongo vinango thitho aliwa tanodha uroromelani vinjinji. (Esaya 41:10) N’ga atu ale ana vizo anafwanelela funjedhela n’ni wa Yohova?

⁷ Bibilya linooni-a ira Yohova unooda vwechecha vile vinoonga angelo. (1 Mam. 22:19-22) Nyo ninga baba, munaode sazi-edha a-vi ifwanafwani-o ya Yohova? Vyakala vyoodeya fukani maonelo aa-iminyu va mwasa oirana vyongo mwapama. Akala vyoonga viwa pyapama irani mwemo ninga muongele aliwa.

8. N’nga Yohova alevele a-vi rima Abrahamu na Sara?

⁸ Yohova thitho unooni-a kala odhievi-a voira vyongo moleva rima. Mwaifwanafwani-o, Yohova unoleva rima akala anamalabee anoonga mwaulemu vile vya-anavwechecha aliwa na mwasa wa vyofuna vyee. Abrahamu kaavwechecha mwasa oira Yohova unofuna anonge Sodoma na Gomora liye atoonga vyongo vile vyakonda liye avwechecha, Yohova thitho atomvuruwana. (Maro. 18:22-33) Sara atotheya vyolanyedha vya Yohova, vyoira liye unodha kaana wise masiki ira liye angalive ndimuwa, mbwenye Yohova kaathakaleliwile venango mnyanyiwela. (Maro. 18:10-14) Malo mwaevyo, Yohova atomvwechecha Sara mwazelu.

9. N’nga anamabala venango andimuwa avapingoni anasazi-edhe a-vi ifwanafwani-o ya Yohova?

⁹ Nyo muli baba venango ndimuwa wavapingoni? N’nga munooda msazi-edha Yohova? Thuulelani vang’ono va mwasa wamakalelwinyu akala ira mwaninyu venango abali avapingoni anoonga vile vya-anavwechecha aliwa va mwasa wa vile visakunle nyo. N’nga nyo munoawakula hora imbo-ive yeniyo? Venango munoroma vwechehca vyongo vile vya-avwechechile aliwa mwapama? Akala ira nyo mutokaana izo thitho muli odhievi-a ninga Yohova banja linyu na pingo linooda ganyaleya. Vofiya vano, nitooda funjedha mule munaode i-yo sazi-edha Yohova kala odhievi-a. Va chineneeva, ninofuna nifunjedhele mule munakalele i-yo o-odhioneeli-edha vofunjedhela vifwanafwani-o vile vilembiwile Bibilyani.

10. N’nga Yohova unonifunji-a a-vi?

¹⁰ Yohova “Namafunji-a wi-u Nlukulu”, uto-iyachi ifwanafwani-o vinango Bibilyani ira i-yo niodenga funjedha. (Esaya 30:20, 21) Mwaaliwa, i-yo ninofwanyamo vyoonga vyaatu ale aoni-idhe makalelo oira Yohova unodhiveliwana a-dhioneeli-edha. Mbwenye Bibilya thitho linoonga vifwanafwani-o vyaatu ale aoni-idhe makalelo enala thitho na vyowakula viwa. Akala i-yo naodanga vwechecha vyoonga vyevi thitho vithuulelathuulela i-yo ninooda funjedhelavo vinjinji.—Salimo 37:37; 1 Akor. 10:11.

11. N’nga ninofunjedhavo n’ni va ifwanafwani-o yo-ofwanelela ya Sauli?

¹¹ Kathuulelani vyimmwireele Mwene Sauli. Voroma vene, liye ali zombwe o-odhioneli-edha. Liye atoidhiwa ira utokaana madile thitho anorucheya vinjinji ira awachele vizo vinango. (1 Sam. 9:21; 10:20-22) Mbwenye, vira wa hora Sauli atokala mutu odhigweli-a. Liye atoroma kumi-a kalelo leli mwavang’onovang’ono angali mwene va hora yoyeveela. Va hora inango, Sauli ato-iyachi kala mutu oleva rima malo oira amdedi-edhe namaro-edha Samueli. Thitho malo mokala o-odhioneeli-edha no roromela  Yohova noirana vyafuna atu, Sauli atoirana vyongo vyafwanelela liye a-irana liye atovelela sembe wa Yohova. N’nga vyo-erelavyee vyali viivi? Sauli atotatila ngari yokami-iwa na Yohova thitho aoneya kala o-ofwanelela kala mwene. (1 Sam. 13:8-14) Mwaimbarimbari ninofwanela funjedha va ifwanafwani-o yen’na ira na-aode iranga vyongo modhigweli-a ninga vyate Sauli.

12. N’nga Danieli aoni-idhe a-vi ira ndi o-odhioneeli-edha?

¹² Mutoona ifwanafwani-o yo-ofwanelela ya Sauli, kaonani ifwanafwani-o yapama ya namaro-edha Danieli. Vaingumi yee yothene, Danieli ali namalaba wa Nlungu odhievi-a thitho o-odhioneeli-edha, hora dhothene Danieli asakecha malangi-o a Yohova. Angadhowile mathapulela vyoro-a vya Nebukandinezara Danieli kaasakile ira awachelevo iliyothene. (Dan. 2:26-28) N’nga ninofunjedhavo n’ni? Akala ninosimbiwa vaikundu ya mwasa venango akala ninodhowa vasogolo guluni, ninofwanela va-a titimi-o lothene wa Yohova. Ninofwanelela kala o-odhioneli-edha thitho idhiwa ira kanaode iili yothene a-kala kami-iwa na Yohova. (Afil. 4:13) Nairanga ee-ni i-yo kaninosazi-edha ifwanafwani-o ya Danieli baasine, mbwenye thitho ifwanafani-o yapama ya Yesu kristu. Moi a-vi?

13. N’nga ndi yongo ivi inofunjedhavvo i-yo wa Yesu va lemba la Juwau 5:19, 30?

¹³ Angalive Mwana olongomana wa Nlungu, Yesu anoidhiwa ira unofuneela kami-iwa na Yohova. (Muleri Juwau 5:19, 30.) Liye kaathuulelecha vyovira limburo la Babee. Lemba la Afilipi 2:6 linoonga ira Yesu “kaathuulela vyovira limburo venango vokala saasawa na Nlungu.” Liye ninga Mwana ogonjela, Yesu atoidhiwa ira utokaana madile thitho anolemeza izo ya Babee.

14. N’nga vyamvepile aliwa Yesu yongo yoi liye kan’na izo yofuna irana vyevyo airile n’ni?

¹⁴ Munothuulela vyarumenlenga Yesu vale anamarumiwe Yokobo na Juwau na m’me vyamvepide aliwa ngari yoira Yesu kan’na izo yowava-a vyongo vyevi. Mo-othuulela fendo wiili, Yesu atoawandela mwaimbarimbari ira ndi Babanga wadhulu baasine ngunooda sakula ikundu ninga yeyi akala mutu unokala ikundu ya ono wamadyo venango wazwele va Umwene we. (Mat. 20:20-23) Yesu atoidhiwa ira utokaana madile liye thitho atoidhiwa unafuna  liye magomela. Yesu ali o-odhioneeli-edha. Liye kaaira vyongo mo-iyani-ana vile vyawachenle liye wa Yohova. (Juwau 12:49) N’nga i-yo ninasazi-e a-vi ifwanafwani-o yapamai?

15-16. N’nga ninathuulelenga a-vi malangi-o anafwanya i-yo va 1 Akoritiyo 4:6?

¹⁵ I-yo ninofwanela sazi-edhanga adhioneli-edhanga ninga Yesu vothuulela malangi-o a va 1 Akoritiyo 4:6, vanaonga ira: “Kamuire vyongo vyokwaranyi-a vile vilembiwile.” Voi ee-no, akala mutu unonivepa malangi-o kaninofwanela onga vile vinothuulela i-yo venango e-la limburo loroma va vyongo vile vili muruni mwi-u. Malo mwe ninooda mmwandela vyongo mutuo vyokumela Bibilyani venango vyokumela mabukuni mwi-u. Vamwasa wen’na, i-yo ninooda ona ira nitokaana madile. Adhioneelie-edha unonikami-a oda idhiwa ira vyolinyali vyo-ooneya vya Wanguru Dhothene hora dhothene ndi vyapama thitho kwaranyi-a malangi-o ale ana i-yo.—Apok. 15:3, 4.

¹⁶ I-yo nakala o-odhioneeli-edha ninova-a titimi-o Yohova. Mbwenye vatokala yongo inango yapama vooni-a kalelo leli. Dhoweni nione chineneeva munakalele i-yo odhievi-a thitho akala odhioneli-edha unooda nikami-a kala aimwerumweru thitho kala vauxamwali wapama naafwi-u enango.

17. Mwasiwa ngwan’ni mutu o-odhioneeli-edha na odhievi-a unokala aimwerumweru?

¹⁷ Nakala odhievi-a na o-odhioneeli-edha, ninokala aimwerumweru. Mwasiwa ngwan’ni? Mwasiwa ninokaana ithuulela rima yoira nitokaana madile thitho ninooda simba thitho kala aimwerumweru va vyongo vili vyothene vile vinowachela i-yo waatu enango. Mwaifwanafwani-o, munothuulela Yesu angaili-idhe atu kumi ale an’na vikutwe? Mwaaliwa awelile udha dha simba Yesu ali mutu mmbo-i vamwasa oira liye atommwili-a marenda ale ali oopi-a.  Liye kaode viili-a mwaekene a-kala mokami-iwa na Yesu! Dhievi-a na adhioneeli-edha wa lombwanuo utommwiri-a ira aode simba thitho mva-a titimi-o Nlungu na mwasa okami-iwa wee.—Luka 17:11-19.

18. N’nga atu odhievi-a na o-odhioneeli-edha ananikami-e a-vi ira nikaena axamwali apama? (Aroma 12:10)

¹⁸ Mutu odhievi-a na o-odhioneeli-edha utokaana ngari ilukulu yokaana afwee thitho fwanya afwee apama. Mwasiwa ngwan’ni? Mwasiwa atu ninga enala vinakala vyo-orucha ira kaode ona makalela aatu enango thitho roromela aliwa. Atu odhievi-a na o-odhioneeli-edha anokala aimwerumweru kaonanga atu enango kadhowanga vosoglo na vizo viva-iwile aliwa, katinobala akala ndi tundu wan’ni. Aliwa thitho katinokala orucheya voasimba venango voava-a titimi-o.—Muleri Aroma 12:10.

19. Mwasiwa ngwan’ni ninofwanela wana na makalelo odhigweli-a?

¹⁹ Mbwenye atu odhigweli-a mwaimbarimbari mbo-iyana. Atu ninga enala anoona ira vyovuta oda simba mutu mwinango, aliwa kanafuna ira kasimbiwenga. Aliwa thitho atokaana mathuulelo ooda vifwanafwani-angana atu enango thitho anodhi-a nemba wapikisano. Malo mofunji-a atu enango noava-a mabasa anango aliwa anothuulela ira “wafunanga ira yongo yapama irana weyo wekene.” Va mwasa mwinango ngoira, atu oira e-ni anoona ira vyongo vyothene ira viireye pama vinaireya waaliwa baa-ine. Malo mwa vyongo vyevyo, atu odhigweli-a va hora dhinjinji thitho ndi atu osilila thitho asanje. (Agal. 5:26) Aliwa movuteya anokaana uxamwali o-olimba. Mo-ooda vwechecha i-yo ninooda kaana kalelo lodhigweli-a, ninofwanela dhula rimi-u vepa Yohova ira aode nikami-a thitho nomali-a mathuulelo ninga enala. Voi ee-no, mbeu yodhigweli-a kinaoda kaana mirachi mirimani mwi-u.—Aroma 12:2.

20. Mwasiwa ngwan’ni ninofwanelela kala odhievi-a na o-odhioneli-edha?

²⁰ Nili osimba vinjinji voona ifwanafwani-o ya Yohova! Thitho ira liye ngodhievi-a va mwasa unoonela liye anamalabee i-yo thitho ninofuna nisazi-edhe. Thitho ninafuna nisazi-edhe vifwanafwani-o vinofwanyeya Bibilyani vyaatu o-odhioneli-edha awendile na Yohova. Nairana vyevyo, ninooda mva-a Yohova titimi-o na lemezo linofwanelela liye. (Apok. 4:11) Thitho ninooda wenda na Babi-u waudhivela unodhiveliwana atu odhievi-a na o-odhioneeli-edha.