1. Le i bika byānenene Davida pa kwityepeja kwa Yehova?

LELO bine tubwanya kunena’mba Yehova i mwityepeje? En-en. Davida wānenene amba: “Ubaumpe ngabo yobe ya lupandilo, . . . kadi kwityepeja kobe kubambaija.” (2 Sa. 22:36; Ñim. 18:35) Padi Davida wādi ulangulukila pa difuku dyāile mupolofeto Samwele ku njibo ya shandi mwanda wa kushinga māni muntu wādi wa kwikala mwenda mafuku bu mulopwe wa Isalela. Davida ye wādi nkasampe bininge ku bana bana-balume mwānda; inoko i aye wātongelwe na Yehova kupingakena Mulopwe Solo.​—1 Sa. 16:1, 10-13.

2. Le i bika byotusa kwisambila’po mu kino kishinte?

² Bine, Davida wēivwene na mwēivwanine mulembi wa mitōto wānenene padi Yehova amba: “Ubandamanga kutala diulu ne ntanda, ulangulanga mupēlulwe mu luvumbi. Uzunzulanga mulanda . . . mwanda wa kumushikatyija na ba bulēme.” (Ñim. 113:6-8) Mu kino kishinte, tusa kwisambila’mo dibajinji pa bufundiji bumo bwa mvubu butala pa kwityepeja na kubandaula muswelo wālombwele Yehova ino ngikadila. Kupwa tusa kwisambila pa ñeni yotubwanya kuboila kudi Mulopwe Solo, mupolofeto Danyele, ne kudi Yesu mu mwanda utala ngikadila ya butūkanye.

3. Le Yehova wikele netu namani, ne kino kilombola bika?

³ Yehova ulombolanga’mba i mwityepeje kupityila ku muswelo waikele na batōtyi bandi bampikwa kubwaninina. Ketabijangapo’tu enka butōtyi bwetu, ino witumwene ne bu balunda  nandi. (Ñim. 25:14) Pa kusaka tupwane nandi, Yehova wāletele wandi Mwana bu kitapwa pa mwanda wa bubi bwetu. Bine, luno i lusa lukatampe lwaētwivwanine!

4. Le Yehova i mwitupe bika, ne mwanda waka?

⁴ Twisambilei bidi pa kintu kikwabo kilombola’mba Yehova i mwityepeje. Byadi Umpangi, Yehova wādi ubwanya kwitupanga pampikwa bukomo bwa kwitongela bintu bya kulonga mu būmi. Inoko kālongelepo namino. Wētupangile mu kyelekejo kyandi ne kwitupa bwanapabo bwa kwitongela. Usakanga batwe bantu batyetyetyetye tumwingidile na mutyima onso mwanda tumusenswe kadi tuyukile amba kumukōkela kudi na kamweno. (Kup. 10:12; Isa. 48:17, 18) Bine, tufwijanga’ko pa kuno kwityepeja kwa Yehova!

5. Le Yehova witufundijanga namani twikale betyepeje (Tala kifwatulo pa kibalu.)

⁵ Yehova witufundijanga twikale betyepeje kupityila ku muswelo waikele netu. Yehova udi na tunangu kupita bantu bonso mūlu ne pano panshi. Nansha nankyo, witabijanga milangwe ya bakwabo. Kimfwa, Yehova wāitabije wandi Mwana amukwashe pa kupanga bintu byonso. (Nki. 8:27-30; Kol. 1:15, 16) Nansha Yehova byadi mwinē bukomo bonso, upanga bakwabo lupusa. Kimfwa, wātongele Yesu ekale Mulopwe wa Bulopwe bwandi, kadi ukapa bantu 144 000 bakabikala pamo na Yesu lupusa kampanda. (Luka 12:32) Na bubine, Yehova wāfundije Yesu mwa kwikadila bu Mulopwe ne bu Kitobo Mukatampe. (Bah. 5:8, 9) Kadi ufundijanga ne boba bakabikala na Yesu, ino i mwibape mwingilo wa kwingila pampikwa kukontolola kanda ne kanda ka mobengidila’o. Aye ukulupile amba bakalonga kiswa-mutyima kyandi.​—Kus. 5:10.

6-7. Le i ñeni’ka yotubwanya kuboila kudi Tata wetu wa mūlu mu mwanda utala kupa bakwetu mingilo?

⁶ Shi Tata wetu wa mūlu, mwine kasakilwapo kukwashibwa na muntu, upa bakwabo  lupusa, mwene batwe bo bene bafwaninwe kulonga namino! Kimfwa, le wi mutwe wa kisaka nansha mukulumpe mu kipwilo? Nabya londa kimfwa kya Yehova na kupa bakwenu mingilo ne kuleka kwibakontolola mu kanda ne kanda. Shi wiule Yehova, ukengila mwingilo, kufundija bakwenu ne kwibakwasha bekale na kikulupiji kikatampe. (Isa. 41:10) Le boba badi na lupusa kampanda babwanya kuboila ñeni’ka mikwabo kudi Yehova?

⁷ Bible ulombola’mba Yehova utele mutyima ne ku milangwe ya bandi bana bamwikeulu. (1 Ba. 22:19-22) A bambutwile, le i muswelo’ka omubwanya kwiula kimfwa kya Yehova? Shi i byendele’mo, ipangulai benu bana milangwe yabo pa mwa kwingidila mwingilo kampanda. Shi milangwe yabo i miyampe, londai’yo.

8. Le Yehova wātūkijije Abalahama ne Sala mutyima muswelo’ka?

⁸ Kwityepeja kwa Yehova kumwekelanga ne mu kitūkijetyima kyandi. Kimfwa, Yehova utūkijanga mutyima shi boba bamwingidila batatana na bulēme butyibi bwandi. Wātejeje Abalahama paādi ulangalanga pa mwanda wa butyibi bwa konakanya Sodoma ne Ngomola. (Ngo. 18:22-33) Kadi tuvulukei muswelo wāikele Yehova na Sala, mukaja Abalahama. Kāfityilwepo nansha kuloba kitatyi kyāsepele Sala pawāmulaile amba ukemitanga mu bununu. (Ngo. 18:10-14) Inoko, wālēmekele Sala.

9. Le bambutwile ne bakulumpe babwanya kuboila ñeni’ka ku kimfwa kya Yehova?

⁹ A Bambutwile ne bakulumpe, le i ñeni’ka yomubwanya kuboila ku kimfwa kya Yehova? Langulukilai pa byomuloñanga shi boba bomwendeja abatatana butyibi bwenu. Le mwibalemununanga kiponka na ponka’ni, nansha mwivwananga milangwe yabo? Bine, bisaka ne bipwilo bimwenanga’mo shi boba badi na lupusa beula Yehova. Twadi tubesambilanga pa ñeni yotubwanya kuboila ku kimfwa kya Yehova kya kwityepeja. Pano tutalei ñeni yotubwanya kuboila ku bimfwa bya butūkanye bya bantu batelelwe mu Kinenwa kya Leza.

10. Le i muswelo’ka wingidije Yehova kimfwa kya bakwetu mwanda wa kwitufundija?

¹⁰ Yehova byadi ‘Mufundiji wetu Mukatakata,’ i mwitupe bimfwa mu Kinenwa kyandi mwanda wa kwitufundija. (Isa. 30:20, 21) Tuboilanga’ko ñeni kitatyi kyotulangulukila pa nsekununi ya mu Bible ya bantu bālombwele ngikadila ya bwine Leza, kubadila’mo ne butūkanye. Kadi tuboilanga’ko ñeni kitatyi kyotulangulukila pa bintu byātene bantu bākomenwe kwikala na ino ngikadila milumbuluke.​—Ñim. 37:37; 1 Ko. 10:11.

11. Le i ñeni’ka yotubwanya kuboila ku kimfwa kibi kya Solo?

¹¹ Tulangulukilei pa byobya byāfikile Mulopwe Solo. Ku ngalwilo wādi nsongwalume mutūkanye. Wādi uyukile mikalo yandi ne kadi wādi wikaka kwitabija mingilo mivule. (1 Sa. 9:21; 10:20-22) Inoko, mu kitatyi kampanda Solo waikala na ditatu. Wālombwele ino ngikadila mibi kinondanonda na pawāikele ke mulopwe. Kyaba kimo, wābudilwe kitūkijetyima paādi wilaije mupolofeto Samwele. Pa kyaba kya kukulupila na butūkanye amba Yehova usa kulongela bantu bintu, Solo wālambula kitapwa kisōkwe nansha byakādipo na lupusa lwa kwikilambula. Ku mfulo, Yehova wāpela Solo, kadi mwenda mafuku bulopwe bwandi bwapwa. (1 Sa. 13:8-14) Tukekala ba tunangu shi tuboile ñeni ku kino kimfwa kya kudyumukila’po ne kuleka kulonga bintu na ditatu.

12. Le Danyele wālombwele butūkanye namani?

 ¹² Kwishila na kimfwa kibi kya Solo, twisambilei pa kimfwa kiyampe kya Mupolofeto Danyele. Mu būmi bwandi bonso, Danyele wādi nyeke mwingidi wa Leza mwityepeje, kadi mutūkanye, mwine wādi ulomba Yehova amuludike. Kimfwa, Yehova pawāmwingidije mwanda wa kushintulula kilotwa kya Nebukaneza, Danyele kētumbijepo pa kwikishintulula. Ino, wātumbije Yehova. (Dan. 2:26-28) Le i ñeni’ka yotuboila’ko? Shi banabetu basangalanga pobetwivwana tunena mīsambo, nansha shi tulupulanga bipa biyampe mu busapudi, tufwaninwe kutumbija Yehova pa byonso byotulonga. Tufwaninwe kwitabija na butūkanye amba ketubwanyapo kulonga bino bintu pampikwa bukwashi bwa Yehova. (Fid. 4:13) Shi tulonga namino, tukeula kimfwa kiyampe kya Yesu. Namani?

13. Le binenwa bya Yesu bidi mu Yoano 5:19, 30 bitufundija bika pa butūkanye?

¹³ Nansha Mwanā Leza byaādi mubwaninine, Yesu wādi ukulupile mudi Yehova. (Tanga Yoano 5:19, 30.) Kātompelepo nansha dimo kuyata Shandi wa mūlu lupusa. Bene Fidipai 2:6 witulombola’mba Yesu “kafwatakenyepo nansha dimo kusompola lupusa, ko kunena’mba, aye kwikala mu ludingo lumo na Leza.” Byaādi Mwana mukōkele, Yesu wādi uyukile mikalo yandi kadi wādi ulēmekele lupusa lwa Shandi.

14. Pobālombele Yesu alonge kintu kyakādipo na lupusa lwa kulonga, le wālongele’po namani?

¹⁴ Twisambilei pa muswelo wālondolwele Yesu kitatyi kyobāmufwenene kudi bandi bana ba bwanga, ba Yakoba ne Yoano pamo ne inabo kumulomba kyepelo kekyādipo kibwanya kupāna Yesu. Ne kwishisa kwine mpika, Yesu wānenene amba i enka Shandi wa mūlu ye ubwanya kutonga yewa wa kushikata ku lundyo nansha ku lunkuso lwa Yesu mu Bulopwe. (Mat. 20:20-23) Yesu wālombwele amba ulēmekele mikalo yandi. Wādi mutūkanye. Kālongelepo bintu kebyādipo bimusoñenye Yehova kulonga. (Yoa. 12:49) Le tubwanya kwiula kimfwa kiyampe kya Yesu namani?

15-16. Le i muswelo’ka otubwanya kwingidija madingi a mu Bible adi mu 1 Bene Kodinda 4:6?

¹⁵ Twiulanga kimfwa kya Yesu kya butūkanye shi twingidija madingi a mu Bible adi mu 1 Bene Kodinda 4:6. I betusoñanye’mo amba: “Kemwakitabukai byobya bilembelwe.” Nanshi shi abetulombe madingi,  ketufwaninwepo kuleta milangwe ya batwe bene nansha kunena kintu kibadikila kwitwiya mu ñeni. Inoko, tufwaninwe kuleta madingi a mu Bible ne mu mabuku etu esambila pa Bible. Mu uno muswelo, tukalombola’mba tuyukile mikalo yetu. Na butūkanye, tutumbijanga ‘mbila myoloke’ ya Mwinē Bukomo Bonso.​—Kus. 15:3, 4.

¹⁶ Kutentekela pa kutumbija Yehova, tudi na bubinga bukwabo bwendele’mo bwa kwikadila batūkanye. Kadi pano tusa kumona muswelo ubwanya kwityepeja ne butūkanye kwituletela nsangaji ne kwitukwasha twikale senene na bakwetu.

17. Mwanda waka bantu betyepeje ne batūkanye bekalanga na nsangaji?

¹⁷ Shi twi betyepeje ne batūkanye, tukekala na nsangaji mivule. Mwanda waka? Shi tuyukile biyampe mikalo yetu, tukafwija’ko ne kusangela bukwashi bo-bonso bwitukwasha bakwetu. Kimfwa, langulukila pa kitatyi kyābelwile Yesu bamakopo dikumi. Ino i umo’tu kete wājokele kufwija’ko Yesu pa kubelulwa misongo yandi isansa—misongo yakādipo ubwanya kwibelula aye mwine. Uno mwana-mulume mwityepeje kadi mutūkanye wāfwijije’ko pa bukwashi bobāmukweshe, kupwa wātumbija ne Leza.​—Luka 17:11-19.

18. Le kwityepeja ne butūkanye bitukwashanga namani twikale senene na bakwetu? (Bene Loma 12:10)

¹⁸ Bantu betyepeje kadi batūkanye baloñanga bukomo bwa kwikala senene na bakwabo, padi ne kwikala na balunda. Mwanda waka? Mwanda bayukile amba bakwabo nabo badi na ngikadila milumbuluke, kadi bebakulupile. Bantu betyepeje kadi batūkanye basangalanga shi bakwabo balonga bintu senene mu mwingilo onso obebapa, kadi bebafwijanga’ko ne kwibatendela.​—Tanga Bene Loma 12:10.

19. Mwanda waka ketufwaninwepo kwikala na mitatulo?

 ¹⁹ Inoko, bantu ba mitatulo kebafwijanga’kopo bakwabo, basakanga kutendelwa. Padi bedingakanyanga na bakwabo ne kukimba kwitāka. Pa kyaba kya kufundija bakwabo ne kwibapa mingilo, badi bwa abo banena’mba, “Shi usaka kintu kilongwe biyampe”—mu muswelo ukusangaja—“ufwaninwe kulonga’kyo abe mwine.” Muntu wa mitatulo wikalanga na kwisakila ne mukao. (Ngt. 5:26) Bano bantu kebavudilepo kupwana na bakwabo kipwano kya endaenda. Shi tubajingulula’mba tudi na mitatulo, tufwaninwe kulomba na kininga Yehova etukwashe ‘tushinte ñeni yetu,’ kutyina’mba ino ngikadila mibi yaketutādila bininge.​—Loma 12:2.

20. Mwanda waka tufwaninwe kwikala betyepeje ne batūkanye?

²⁰ Bine, tufwijanga’ko bininge pa kimfwa kya Yehova! Tumonanga kwityepeja kwandi mu muswelo waikele na bengidi bandi, kadi tusakanga kumwiula. Ne kadi tusakanga kwiula bimfwa biyampe bitanwa mu Bible bya bantu batūkanye bāikele na dyese dya kunanga na Leza. Nanshi tupei Yehova bulēme ne ntumbo yafwaninwe. (Kus. 4:11) Nabya tukabwanya kunanga na Tata wetu wa mūlu, mwine usenswe bantu betyepeje ne batūkanye.