1. Vyuma muka ahanjikile Ndavichi kutalisa kukulinyisa chaYehova?

KUTALA chakutamo kwamba ngwetu Yehova apwa wakulinyisa tahi? Eyo, chakutamo vene. Lwola lumwe Ndavichi ambile ngwenyi: “Weji kunguhananga kepwe yove yaulwilo, kaha kulinyisa chove cheji kungunehelanga ulemu.” (Samwe. 2, 22:36; Samu 18:35) Halwola ahanjikile Ndavichi awa mazu, pamo apwile nakushinganyeka omu Samwele ejile nakumuwavisa mangana akapwe mwangana wavaIsalele. Numba tuhu Ndavichi ikiye apwile kanyike havana vaYese vamalunga 8, oloze Yehova amusakwile mangana akashise Mwangana Saulu.—Samwe. 1, 16:1, 10-13.

2. Vyuma muka natushimutwila muchihande chino?

² Mazu ahanjikile Ndavichi alitombola nawaze atwama hali Samu 113 haze vasoneka ngwavo: “Eji kunongamanga nakutala melu namavu, eji kukatulanga muka-kukalikiza . . . mangana amutwamise navatu vavalemu.” (Samu 113:6-8) Shikaho natuvangila kushimutwila vyakutalilaho vyakusolola omwo Yehova asolwelelemo kulinyisa. Kufumaho natushimutwila hamujimbu waMwangana Saulu, nakapolofweto Ndanyele, naYesu mangana tulinangule omwo chapwa kulinyisa.

3. Yehova asolola ngachilihi ngwenyi apwa wakulinyisa?

³ Yehova eji kusololanga ngwenyi apwa wakulinyisa hakutwitavila tumulemese nakupwa nawa tumasepa jenyi numba tuhu katwakupukako. (Samu 25:14) Yehova ahanyine Mwanenyi atusokole kushili mangana chipwenga chachashi kuli etu kutunga usepa naikiye. Chikupu vene Yehova atutetelelele nakutusolwela likoji.

4. Chuma muka atuhana Yehova, kaha mwomwo ika?

 ⁴ Yehova atutenga nalisesa lyakulisakwila vyakulinga. Echi chasolola nge apwa wakulinyisa, mwomwo nge asakile kachi katuhanyine lisesa kanako. Kaha nawa atutengele muchifwanyisa chenyi nakutuhana nawa uhashi wakulisakwila vyakulinga mukuyoya chetu. Asaka tulisakwile etu vavene kumuzachila mwomwo yakumuzanga nakutachikiza ngwetu nge natumwononoka, kaha natunganyala. (Lushi. 10:12; Isa. 48:17, 18) Chikupu vene twamusakwilila chikuma Yehova hajila kaneyi asolwelamo kulinyisa chenyi.

5. Yehova eji kutunangulanga ngachilihi tupwenga vakulinyisa? (Talenu muvwimbimbi wahalipapilo lyahelu.)

⁵ Yehova eji kutunangulanga tupwenga vakulinyisa. Numba tuhu apwa mutu wamangana chikuma, oloze eji kwitavila vishingayeka vyavatu navangelo. Chakutalilaho, azachilile hamwe naMwanenyi hakutenga vyuma. (Vishi. 8:27-30; Kolo. 1:15, 16) Kaha nawa numba tuhu atwama nangolo chikuma, kalikungila milimo yosena ukawenyiko. Chakutalilaho, atongwele Yesu mangana apwenga Mwangana waWangana wenyi. Mwakahana nawa ngolo kuli vaze 144,000 vaze navakayula naYesu. (Luka 12:32) Yehova anangwile Yesu apwenga Mwangana kaha nawa Kapilishitu Wakulitulaho. (Hepe. 5:8, 9) Eji kunangulanga nawa vaze navakayula naYesu. Afwelela ngwenyi navakazata kanawa, ngocho keshi kukavevwisanga chipekete hakuvanumangiza amone nge vali nakuzata kanawa nyi chiku.—Kuso. 5:10.

6-7. Chuma muka tunahase kulinangula kuli Setu wamwilu kutalisa kukuhanako vakwetu milimo?

⁶ Setu wamwilu Yehova uze kasakiwa mutu wakumukafwako eji kuhananga milimo, ngocho nayetu twatela kulinga mwomumwe. Enu vakulwane muvikungulwilo nayenu mitwe  yajitanga, mwatela kulondezeza Yehova hakuhanangako vakwenu milimo nakuhonanga kuvanumangiza mumone numba nge vali nakuzata kanawa nyi chiku. Kulondezezanga Yehova nachimikafwa mukumisenga washi milimo nakunangula nawa vakwenu nakuvalingisa vamone ngwavo vanatemo kuzata milimo namuvahana. (Isa. 41:10) Vishina vyeka muka vize tulama namitwe yajitanga vanahase kulinangula kuli Yehova?

⁷ Mbimbiliya yasolola ngwayo Yehova eji kwivwililanga vyuma veji kuhanjikanga vangelo. (Vamya. 1, 22:19-22) Enu visemi, munahase kulondezeza ngachilihi Yehova? Munahase kuhulisa mwivwenga vishinganyeka vyavaka-tanga yenu kutalisa kumulimo umwe unakusakiwa kuuzata. Kaha nge chinahase, esekenu kukavangiza vishinganyeka vyavo.

8. Uno Yehova atalililile ngachilihi Apalahama naSala chikoki?

⁸ Yehova eji kusololanga nawa kulinyisa chenyi hakutalilila vatu chikoki. Chakutalilaho, eji kutalililanga chikoki vangamba jenyi vaze veji kuhuhwasananga jishimbi jenyi mwomwo yakuhona kujivwishisa kanawa. Evwililile omu Apalahama apwile nakuhanjika vyuma alizakaminyine hakwivwa ngwavo navanongesa nganda yaSotome naNgomola. (Kupu. 18:22-33) Anukenu nawa omu Yehova atalilile chikoki Sala, pwevo lyaApalahama. Omu Sala vamulwezele ngwavo mwemita muushinakaji, ahombwanyishile lushiko kana nakuseha, oloze Yehova kapihililileko. (Kupu. 18:10-14) Yehova avumbikile chikuma Sala.

9. Chishina muka navalinangula visemi navakulwane muchikungulwilo kuli Yehova?

⁹ Enu visemi navakulwane muchikungulwilo, vyuma muka munalinangula kuli Yehova? Ngachilihi nge vana venu chipwe vandumbwenu muchikungulwilo navakana kukavangiza vyuma munajinyi kulinga? Uno mweji kulahilanga kuvolola tahi nyi mweji kufwilanga kutachikiza kanawa vyuma vanakanyina? Jitanga navikungulwilo vyeji kuzamanga chikuma kachi nge mitwe yajitanga navakulwane muvikungulwilo navalondezezanga Yehova. Tunashimutwila vishina tunalinangula kuli Yehova kutalisa kukupwa vakulinyisa. Tushimutwilenu jino havyuma natulinangula kuvatu vamwe vavuluka muMbimbiliya hachihande chakulinyisa.

10. Uno Yehova eji kutunangulanga ngachilihi kuzachisa mijimbu yamuMbimbiliya?

¹⁰ Yehova uze apwa ‘Muka-kutunangula Wamunene’ atuhana Mazu enyi muze mwatwama mijimbu yayivulu mangana atunangule. (Isa. 30:20, 21) Tweji kulinangulanga hakutanga nakushinganyeka hamijimbu yavatu vamuMbimbiliya vaze vapwile navilinga vyamwaza vyakufwana nge kulinyisa. Tweji kulinangulanga nawa hakutanga mijimbu yavyuma vyasolokele kuvatu vaze vahonenenga kupwa navilinga kana.—Samu 37:37; Koli. 1, 10:11.

11. Chishina muka natulinangula kumujimbu waSaulu?

¹¹ Achishinganyekenu hamujimbu waMwangana Saulu. Omu apwile kanyike, apwile wakulinyisa. Atachikijile hakuminyine ngolo jenyi, ngocho asakile kukana mulimo vamuhanyine. (Samwe. 1, 9:21; 10:20-22) Oloze omu alingile nayulu lyehi hakatando kakandende, aputukile kupwa namuchima wakazamuzamu. Likumbi limwe, omu apwile nakuvandamina kapolofweto Samwele, ahonene kusolola muchima wakutalilila chikoki. Mukutela kufwelela ngwenyi Yehova mwalwila vatu jenyi, Saulu alumbile wana numba tuhu kapwile nalisesa lyakulinga chuma kanako. Echi chalingishile Yehova ahone  kumwivwila uselewa, nakumufumisa halitanda. (Samwe. 1, 13:8-14) Mujimbu kana watunangula nge twatela kulihenda kumuchima wakazamuzamu.

12. Ndanyele asolwele ngachilihi muchima wakulinyisa?

¹² Numba tuhu Saulu alingile vyuma vyavipi, oloze kapolofweto Ndanyele alingile vyuma vyamwaza. Ndanyele apwile wakulinyisa mukuyoya chenyi chosena kaha nawa apendaminyinenga hali Yehova amutwaminyine. Chakutalilaho, omu Yehova amuzachishile mangana alumbunwine Nevukataneza chilota, Ndanyele kalitohwesele ngwenyi alingile chuma kana mungolo jenyiko. Oloze, atohwesele Yehova uze amuzachishile. (Ndanye. 2:26-28) Chishina muka natulinangulako? Kachi nge vandumbwetu navatusangejeka havihande vyamwaza tweji kuhanjikanga chipwe nge tuli nakufukila mumulimo wakwambulula, kaha twatela kutohwesanga Yehova. Twatela kwanukanga ngwetu katweshi kuhasa kulinga vyuma kana chakuzeneka kutukafwa kuli Yehovako. (Fwili. 4:13) Kachi nge natusolola muchima kana kaha tuli nakulondezeza Yesu. Mujila muka?

13. Uno mazu atwama hali Yowano 5:19, 30 aze ahanjikile Yesu nawatukafwa ngachilihi tupwenga vakulinyisa?

¹³ Numba tuhu Yesu apwile MwanaKalunga wakukupuka, oloze apendaminyinenga hali Yehova. (Tangenu Yowano 5:19, 30.) Kafwililile kutambula chihela atwama nacho Ise wamwiluko. Hali Wavaka-Fwilipi 2:6 vasonekaho ngwavo Yesu “kashinganyekele kutambula chihela, chize chakusaka ngwenyi eseke hamwe naKalungako.” Hakuwana nge Yesu apwile Mwana wakuliluula, atachikijile hakuminyine ngolo jenyi nakuvumbika nawa Ise.

14. Yesu alingile ngachilihi omu vamulwezele kulinga chuma chize katelelele kulingako?

¹⁴ Omu kambaji Yakova naYowano nanevo vejile kuli Yesu nakumulweza alinge chuma chize katelelele kulingako, Yesu ahanjikile hahaze vene ngwenyi Ise Yehova kaha ikiye eji kusakulanga owo mwakapwa kulivoko [lyaYesu] lyachilyo nalyeli lyachimoswe muWangana. (Mateu 20:20-23) Echi chasolwele nge Yesu atachikijile hakuminyine ngolo jenyi. Chikupu vene apwile wakulinyisa. Kaha nawa kalingilenga vyuma chakuzeneka kumwitavisa kuli Yehovako. (Yowa. 12:49) Uno tunahase kulondezeza ngachilihi Yesu?

15-16. Mujila muka tunahase kukavangijilamo mazu ahali Wavaka-Kolinde 1, 4:6?

 ¹⁵ Tweji kulondezezanga Yesu hakukavangiza mazu ahali Wavaka-Kolinde 1, 4:6, akwamba ngwavo: “Kanda kuhambakana havyuma vasonekako.” Shikaho nge vakwetu navatuhulisa vyuma vimwe, katwatela kuvashinjila valinge munayi vishinganyeka vyetu chipwe kulusuka kuvalweza vyakulingako. Oloze twatela kuvalweza vyuma yahanjika Mbimbiliya navize vasoneka mumikanda yetu. Kulinga ngocho nachisolola nge twatachikiza hakumina ngolo jetu, kahechi nachitukafwa tuvumbikenga ‘jishimbi jakwoloka’ jaYehova.—Kuso. 15:3, 4.

¹⁶ Kuli nawa vyuma vikwavo vyatela kutulingisa tupwenga vakulinyisa. Tushimutwilenu jino omwo kulinyisa chinahase kutulingisa tupwenga tuvakuwahilila nakutwama kanawa navakwetu.

17. Mwomwo ika vatu vakulinyisa vapwila vakuwahilila?

¹⁷ Nge natupwa vakulinyisa, kaha natupwanga vakuwahilila. Mujila muka? Kwanuka ngwetu katwejiva vyuma vyosenako, chinahase kutulingisa tusakwililenga vakwetu vaze navatukafwa. Chakutalilaho, achishinganyekenu vyuma vyasolokele omu Yesu okile vaze vaka-mbumba likumi. Umwe kaha ikiye akindulukile nakusakwilila Yesu, mwomwo atachikijile ngwenyi kapwile nangolo jakulyuka iveneko. Ou lunga apwile wakulinyisa ngocho asakwililile Yesu hakumukafwa, nakutohwesa nawa Kalunga.—Luka 17:11-19.

18. Uno kulinyisa cheji kutukafwanga ngachilihi tulivwasane navakwetu? (Wavaka-Loma 12:10)

¹⁸ Mutu wakulinyisa eji kulivwasananga navakwavo, kaha nawa atwama namasepa vamwenemwene. Mwomwo ika? Mwomwo avafwelela nakutachikiza nawa ngwenyi navakiko  vatwama navilinga vyamwaza. Mutu kana eji kwivwanga kuwaha nge vakwavo vali nakuzata kanawa mulimo vanavahane, ngocho eji kuvasangejekanga nakuvavumbika.—Tangenu Wavaka-Loma 12:10.

19. Mwomwo ika twatela kulihendela kukulivwimba?

¹⁹ Mutu wakulivwimba kasangejeka vakwavoko, mwomwo yakusaka ngwenyi vasangejekenga ikiye kaha. Mutu kana asaka kulyesekesa kuvakwavo kahechi cheji kumulingisanga apwenga namuchima wakulipecha. Mutu wakulivwimba kasaka kunangula vakwavo nakuvecha vazate milimoko mwomwo yakushinganyeka ngwenyi, “hakusaka milimo yitambuke kanawa, kuvanga nguyizate yami.” Mutu kana alimona kupwa wamulemu chikuma, kaha eji kwivwilanga vakwavo lwiso nge vanamuhambakana muvyuma vimwe. (Ngale. 5:26) Kakavulu mutu wangana katunga usepa wakukola navakwavoko. Kachi nge natumona ngwetu nayetu tunaputuka kulivwimba, kaha twatela kulomba chikuma Yehova ‘tulingise vishinganyeka vyetu kupwa vyavihya’ kuchina kulivwimba nachiyangilila chikuma mumuchima.—Loma 12:2.

20. Mwomwo ika twatela kupwa vakulinyisa?

²⁰ Twamusakwilila chikuma Yehova hakutuhana chakutalilaho chamwaza. Jila eji kuzachilangamo navangamba jenyi yasolola nge apwa wakulinyisa, ngocho atamo kumulondezeza. Kaha nawa twatela kulondezeza vatu vaze vasoneka muMbimbiliya vaze vapwile vakulinyisa hakutambuka naKalunga. Shikaho, tumutohwesenunga Yehova nakumuvumbikanga lwola lwosena. (Kuso. 4:11) Nge natulinganga ngocho kaha natutamo kutambuka naSetu wamwilu, uze azanga vatu vakulinyisa.