1. Jókitso David xi tʼatsʼe Jeobá.

ÁNNI kʼoabixónsíñá nga nangitokon je Jeobá. Je David i kitso: “Bʼainái je escudoli xi bʼasjentjaina, kʼoa je kjoanangitokonli ngʼa síkʼéjnana” (2 Sam. 22:36; Sal. 18:35). Kʼianga kiski David je én jebi, tsakui nichxin kui kisikjaʼaitsjen nichxin nga kicho je profeta Samuel ya ndʼiale nʼaile nga kichokásjai je xi rey koa̱n ya Israel. Ñato koanni je xtindsʼe̱ David, kʼoa jé xi ngisa maʼndí. Ninga kʼoalani, jé kiskoejin Jeobá nga rey koa̱n (1 Sam. 16:1, 10-13).

2. Jmé xi jchaa i̱ kjoaʼmiya jebi.

² Je David kʼoatisʼin kisikjaʼaitsjen tʼatsʼe Jeobá jokitso jngo xi kiski salmo: “Fajteen nga kotsenle ngʼajmi kao sonʼnde, kʼoa kjomitjeen je xi nangitokon. Ngʼa síkʼéjna je xi ma̱ tíjna kʼoa yaa síkʼéjnajinle chjota xi xángʼa tjínle” (Sal. 113:6-8). I̱ kjoaʼmiya jebi, kui jchaa josʼin tsakakó Jeobá je kjoanangitokon kʼoa jchañá jmeni xi bakóyaná. Xijekoa̱n, kui jchaa jme xi bakóyaná je choa̱le rey Saúl, profeta Daniel kao Jesús tʼatsʼe kjoanangitokon.

3. Jósʼin bekonná je Jeobá, kʼoa jmé xi bakó jebi.

³ Jngo koya josʼin bakó Jeobá nga nangitokon ma kui josʼin bekon je choʼndale i̱ Sonʼnde. Ali tsa tokuijin nga  ma bʼetsʼoalee, kʼoati miyole sʼin bekonná (Sal. 25:14). Koaan miyole koaan xi totʼatsʼe nga kisikasén je ʼNdíle nga kʼienntjainá. Kʼoa jebi kui bakóná nga nʼio tjínle kjoamatokon je Jeobá.

4. Jósʼin kisindaná je Jeobá, kʼoa ánni.

⁴ Ijngolasa choa̱ kataʼyaa josʼin bakó Jeobá je kjoanangitokon. Koanjin kʼoasʼin kisindaná nga toje kʼoakuitso jmeni xi sʼiaan. Tonga tsín kʼoakisʼin, tosaa tsjoáná kjoandái nga ñá chjoéjiaan jmeni xi sʼiaan. Kʼoasʼin kisindaná nga koa̱n chjénngilee jokjoan kʼoa nga ñá chjoéjiaan jmeni xi mená sʼiaan. Ningalani tsín mangósoán kao Jeobá, kui xi mele nga kao kjoatsjoacha si̱xálee kʼoa ʼyañá nga ndasʼin kuichomani tsa si̱tjosonlee (Deut. 10:12; Is. 48:17, 18). Bʼaiñá kjoanda nga nangitokon je Jeobá.

5. Jósʼin tsoyaná Jeobá nga nangitokon koaan (chótsenlai sén xi faʼaitʼa ya portada).

⁵ Kao kui bakóyaniná je Jeobá josʼin bekon chjota nga tjínnele nangitokon koaan. Ningalani je xi ngisasa nʼio chjine, nrʼoé jmeni xi tsole xi kjaʼaí. Tobʼelañá, kitsjoaʼnde nga je ʼNdíle tsakasenkao nga koannda ngayeje jmeni xi tjín (Prov. 8:27-30; Col. 1:15, 16). Kʼoa ningalani je Jeobá xi ngisasa tse nganʼio tjínle, tsjoáxále xi kjaʼaí. Tobʼelañá, jé Jesús kitsjoale xá nga je koatexoma kʼoa 144,000 mani chjota xi kʼoati tsjoále xá nga ya koatexomakao Jesús (Luc. 12:32). Je Jeobá kitsoyale Jesús josʼin sitjoson je xále nga koatexoma kʼoa nga Naʼmitítjon koa̱n (Heb. 5:8, 9). Kʼoati tsoyale je xi ya koatexomakao Jesús josʼin sitjoson je xále. Kʼoa nga jekui xá sʼin, alikui tije Jeobá  kʼoakuitso ʼndeʼndenile josʼin sitjoson xá xi kjinele. Nga̱ be nga kʼoasʼin sitjoson choʼndale josʼin mele (Apoc. 5:10).

6, 7. Jósʼin koa̱n skénngile Jeobá je xi xá kjinele.

⁶ Je Niná tsjoáxále xi kjaʼaí ningalani tsín machjénle nga ʼya xi koasenkao. Ngisaa machjén nga kʼoasʼiaan ñá. Tobʼelañá, jósʼin skénngile Jeobá je xi jko̱ tjíole yaniʼya kao je xi chjotajchínga sʼin tjío ya jinjtín. Koaan tsjoáxále xi kjaʼaí, tonga alikui koa̱n nga toje sikuinda ʼndeʼnde josʼin sitjoson xi ngikʼa je xá xi sʼe̱nele. Tsa kʼoasʼin, kuitjoson je xá, kʼoa kʼoasʼin kuitsoyanile xi kjaʼaí jme xá xi tjín, kʼoa ngisaa tsjoa sʼe̱ kon je xi xá tísʼenele (Is. 41:10). Jósasʼin skénngile Jeobá je xi xá kjinele.

⁷ Yaa Biblia tsoya nga kuenta sʼín Jeobá josʼin síkjaʼaitsjen ánkje (1 Rey. 22:19-22). Jósʼin koa̱n skénngile Jeobá je xi xijchá ma. Kʼianga tjen ndiaale, koaan skónangile je xtile jmé xi koa̱n sʼin tsa jme xá xi tjín. Koaan kʼoasʼin sixá tsa tjen ndiaale jme xi kuitso je xti.

8. Jósʼin tsakakóle kjoatsejta Jeobá je Abrahán kao Sara.

⁸ Je Jeobá kʼoati bakó kjoanangitokon kʼianga tsejta ma. Tobʼelañá, ngasin nganda nrʼoé kʼianga jme xi tso je choʼndale nga tsín majin sakʼoale tsa jmeni. Kinrʼoéle jme xi kitso je Abrahán nga tsín ndi̱to̱n koanjinle ánni nga sikjesonni je naxinandá Sodoma kao Gomorra (Gén. 18:22-33). Kʼoa kʼianga totsakijno je Sara, kʼianga kʼoatsakʼinle nga ʼndí sʼe̱le kʼianga jejchínga, ʼndele nga koa̱njtile Jeobá, tosaa tsakakóle kjoaxkóntokon (Gén. 18:10-14).

9. Jmé xi bakóyale je xi xijchá ma kao xi chjotajchínga sʼín tjío je choa̱le Jeobá.

⁹ Jmé xi bakóyano choa̱le Jeobá xi xijchá mao kao xi chjotajchínga sʼin tiyo. Jónʼiao kʼiatsa je xtino kʼoa tsa je ndsʼee ya jinjtín tsín sa̱sénle jmeni xi bʼendajion, a tokjoan nikixiyandaño. Axo nijinlao yaono ánni nga kʼoasʼin síkjaʼaitsjenni. Kʼianga je Jeobá kjenngile je xi xijchá ma nda batio je familiale, kʼoa nga kʼoati sʼín je xi xá kjinele ya jinjtín nda batio je ndsʼee. Je párrafo xi jekachotʼayá kui kaʼyaa jme xi bakóyaná nga nangitokon je Jeobá. Kʼoa ndʼaibi, kui chótʼayajiaan je choa̱ xi tsakatío choʼndale Jeobá nichxin kjoatse kʼoa tojo kui jchaa tʼatsʼe kjoanangitokon.

10. ʼYá tsʼe choa̱ síchjén je Jeobá nga bakóyaná.

¹⁰ Nga je Jeobá xi nʼio nda bakóyaná, nkjín choa̱ faʼaitʼa ya Biblia xi binyakaoná (Is. 30:20, 21). Koaan si̱kjaʼaitsjenjiaan josʼin kichomani nga tsakakó kjoanangitokon choʼndale Niná xi tsakatio nichxin kjoatse, kʼoa jmeni xi koanle xi tsín nangitokon koan (Sal. 37:37; 1 Cor. 10:11).

11. Jmé xi bakóyaná je choa̱le Saúl.

¹¹ Si̱kjaʼaitsjenla jmeni xi koanle je rey Saúl. Kʼianga sʼa ti nʼio nangitokon koan kʼoa kʼoasʼin kisikjaʼaitsjen nga tsín kuitjosonle je xá xi sʼe̱nele (1 Sam. 9:21; 10:20-22). Tonga kʼianga rey jekoan Saúl, ngʼakon koan kʼoa kui kʼoakisʼin jmeni xi tsín je tjínnele kʼoasʼin. Ñandia nga tsín tsejta koan kʼoa tsín kiskoyale je profeta Samuel. ʼNdele nga nangitokon koa̱n kʼoa je Jeobá sinʼiotʼa nga je koasenkao naxinandále, tosaa je tsakakále cho̱ Jeobá, ninga tsín je bakinle kʼoasʼin. Nga kʼoakisʼin, je Jeobá tsakʼasjengi kʼoa chaan tsakjáʼale xále (1 Sam. 13:8- 14). Choa̱ jebi kui bakóyaná nga tsín koa̱n kui kʼoasʼiaan jmeni xi tsín ñá bʼakaoná.

12. Jósʼin koa̱n chjénngiaa je choa̱le Daniel nga nangitokon koan.

¹² Je profeta Daniel nʼio nda choa̱ tsakʼéjnaná nga̱ tsín kʼoakisʼin jokisʼin je Saúl. Jokjitse tsakʼejna, nangitokon koan kʼoa jé Jeobá kisijéle nganʼio nga tsakándiaale. Tobʼelañá, kʼianga je kisichjén Niná nga kʼoakitsole Nabucodonosor josʼin tsoyanile je nijña xi tsakʼaile, je Daniel alikui yaole tsakʼasjengʼa, tosaa nangitokon koan kʼoa jé Jeobá tsakʼasjengʼa (Dan. 2:26-28). Jebi kui bakóyaná nga tjínnele je Jeobá chʼa̱sjengʼaa ngantsjai kʼiatsa jngo kjoanokjoaya kʼoee xi nda sa̱sénle je ndsʼee kʼoa tsa kʼiaje̱ nga masjainá je chjota xi ʼmiyalee je Énle Niná nga ʼmiyasoán. Nangitokon katamaa kʼoa kuenta sʼiaan nga tsín jme xi koa̱nná sʼiaan kʼiatsa tsín je Niná koasenkaoná (Filip. 4:13). Nga kʼoanʼia, kʼoati kui choa̱le Jesús mangíntjenngiaa. Kataʼyala, ánni kʼoabixónsíñá.

13. Jmé xi bakóyaná xi tʼatsʼe kjoanangitokon jmeni xi kitso Jesús tojosʼin faʼaitʼa ya Juan 5:19, 30.

¹³ Ningalani ʼNdíle Niná ma je Jesús jé Jeobá kisinʼiotʼa yaole ngantsjai (tʼexkiai Juan 5:19, 30). * Alikuikʼia tsakjáʼale xále Nʼaile. Ya Filipenses 2:6 kʼoatso “nda tsa mangóson kao Niná” je Jesús alikui koanmele nga jo Niná sʼin kʼoéjna. Koanjinle nga ngisa ngʼa tíjna je Nʼaile tikʼoajinni je kʼoa kisitjosonle.

14. Jókitso je Jesús nga kui kinijéle jmeni xi tsín je tjínle ʼnde kʼoakuitso.

¹⁴ Si̱kjaʼaitsjenla jokitso Jesús kʼianga je na̱le Santiago kao Juan kʼoakitsole tsa koa̱n nga jngo ngʼaskón jngo ngakixi koatiotʼale nga koatexoma. Je Jesús kʼoakitsole nga tojé Nʼaile xi tíjna ngʼajmi xi kuitsoni ʼyáni xi kui kjoanda tsjoále (Mat. 20:20-23). Kʼoasʼin tsakakóni nga toje Nʼaile xi tjínle ʼnde kʼoakuitso xi tʼatsʼe jebi. Nangitokon koan kʼoa tsín jaʼatone  jmeni xi kitsole Jeobá (Juan 12:49). Jósʼin koa̱n chjénngiaa choa̱le Jesús.

15, 16. Jósʼin koa̱n si̱tjosoán jmeni xi tso 1 Corintios 4:6.

¹⁵ Nangitokon maa joni Jesús kʼianga nitjosoán jmeni xi tso 1 Corintios 4:6: “Tsín ngisa tse sʼiansao jo tjín xi tjítʼa”. Tobʼelañá, kʼiatsa ʼya xi kjoafaʼaitsjen sijéná, alikui koa̱n nga ñá kʼoakʼuínlee jmeni xi sʼin kʼoa alikui koa̱n to kuenta kuinókjoaa tsa tikje nikjaʼaitsjenjinñá jmeni xi kuixoán. Tosa kʼoakʼuínlee nga kui kjoafaʼaitsjen xi faʼaitʼa Biblia katafitjenngi kʼoa jmeni xi tso je xo̱n xi bʼasje naxinandále Niná. Kʼoasʼin koakoñá nga nangitokon maa, kʼoa ʼyañá nga toje Jeobá xi ngisasa nda kjoafaʼaitsjen tsjoá tikʼoajinni ñá (Apoc. 15:3, 4).

¹⁶ Tojosʼin tiʼyaa, nga nangitokon maa jé Jeobá chʼasjengʼaa. Ndʼaibi kui jchaa nga kʼoati basenkaoná nga tsjoa satío tokoán kʼoa nga ndasʼin mangínkoaa xíngiaa kʼianga nangitokon maa.

17. Ánni nga tsjoa satíoni kon je chjota xi nangitokon.

¹⁷ Tsa nangitokon maa ngisajin tsjoa sa̱tío tokoán. Kʼianga majinná nga tsín toñá kʼoakoa̱nyejená, bʼaiñá kjoanda nga ʼya xi binyakaoná. Si̱kjaʼaitsjenla jokoan kʼianga te chjota xi tjíofiʼndojon yaole kisindaya Jesús. Tojngoo koanni xi kichonrʼoe ijngokʼa nga kitsjoale kjoanda nga kisindaya. Chjota jebi nangitokon koan kʼoa koanjinle nga tsín josʼin koa̱nndaya nga toje, kuinga kitsjoani kjoanda kʼoa tsakʼasjejeya Niná (Luc. 17:11-19).

18. Tojo tso Romanos 12:10, jósʼin biyoaa kao xi ngikʼa nga nangitokon maa.

¹⁸ Je chjota xi nangitokon nda fikao xi  ngikʼa kʼoa ngisaa sʼele miyo. Nga̱ kui ngisa fini jñani nda sʼín xi ngikʼa kʼoa manʼiotʼa xínkjín. Xi ijngosani, tsjoa satío kon nga nda síxále Jeobá xi ngikʼa kʼoa kʼoatsole nga nda tjíosʼín (tʼexkiai Romanos 12:10). *

19. Ánni nga chja̱ʼaxinnilee yaoná je kjoangʼakon.

¹⁹ Je chjota xi ngʼakon alikui kʼoatsole xi ngikʼa jñani nda sʼín tosaa kui xi mele nga je xokʼuínle. Jé xi ngikʼa síngósonkao yaole kʼoa ngisaa ngʼa bʼasje yaole. Alikui tsoyale xi kjaʼaí kʼoa tsín tsjoále xá, tojé kʼoasʼín ngayeje nga̱ kʼoasʼin síkjaʼaitsjen nga tokʼoasʼin nda kuitjo xá. Xi ijngosani, xinkon kʼoa toje mameyejele (Gál. 5:26). Alikui tongantsjai nga sʼele miyo. Tsakui kjoangʼakon tíbʼetʼaná, kʼoétsʼoalee Jeobá nga katabasenkaoná nga tsín ngʼakon katamaa (Rom. 12:2).

20. Ánni machjénni nga nangitokon koaan.

²⁰ Je Jeobá nʼio nda choa̱ bʼéjnaná nga nangitokon ma. Josʼin bekon choʼndale yaa ʼyañá nga nangitokon, kʼoa mená chjénngilee jokjoan Jeobá. Kʼoati mená chjénngilee je choʼndale Niná xi tsakatio nichxin kjoatse nga nangitokon koan, kʼoa je Jeobá chʼa̱sjengʼaa ngantsjai nichxin (Apoc. 4:11). Tsa kʼoasʼiaan, miyo kuitsoná Niná, nga̱ tsjoake xi nangitokon.