1. Ndabiti wendekele bika ha kulikehesa kwa Yehova?

TWASA kwendeka ngwetu Yehova wapwa wa kulikehesa ndi? Eyo. Ndabiti wendekele ngwendi: “U muka-kunjinyunga na kunjamena, [kulikehesa] kwobe kunanjitsimanesa.” (2 Samwe 22:36; Myaso 18:35) Hamo Ndabiti mwendekele awa majwi, wanukile lije litangwa lyezile kapolofweto Samwele ku njubo ya ishe na kubwabesa uje wakupwile mwene wa Isalele. Ndabiti ikeye wapwile mwanike manene hakati ka bana ba kupwa 8, oloni Yehova wangwile ikeye mangana ainge Mwene Saulu.—1 Samwe 16:1, 10-13.

2. Bika bitusimutwiya muno mu cilongesa?

² Majwi a Ndabiti analitombola na majwi a muka-kwimba umo uje wendekele hali Yehova ngwendi akakulama na ‘kumona bije bili mwilu nebi bili hano hasi. Akatundisa tuhutu mu likungu na kwindula baka-kujeneka mu lito na kubapwisa hamo na bana ba bimyene.’ (Myaso 113:6-8) Muno mu cilongesa tusimutwiya mwamweselele Yehova ngwendi wapwa wa kulikehesa nomwo mutwasa kumutembwinina. Tusimutwiya lalo bitulilongesa kuli Mwene Saulu, kapolofweto Ndanyele na Yesu ha kulikehesa.

3. Yehova watumona bati, co oku kumwesa bika?

³ Yehova mwakamwena banu ba kujeneka kulumbunuka kumwesa ngwabo wapwa wa kulikehesa. Natutabesa tumulemese, co lalo watumona kupwa babusamba bendi. (Myaso 25:14) Twasa kupwa babusamba ba Yehova mwafwa wanene Munendi  mangana apwe ñombelo ya bubi bwetu. Yehova natuzibila manene ngozi na mema ku mbunge.

4. Bika byanatwana Yehova, co mwafwa bika?

⁴ Tusimutwiyeni ha byuma bikwabo bije bimwesa ngwabyo Yehova wapwa wa kulikehesa. Ha kupwa Ishamatanga, Yehova wasele kututanga kwa kujeneka kutwana nzili ya kulyangwila bya kulinga. Oloni kalingile ngoco. Watutangele mu cifwa cendi na kutwana nzili ya kulyangwila bya kulinga. Yehova ashaka ngwendi tumupangele kutundilila kwisi ya bimbunge byetu mwafwa twamuzema, co lalo twalimwena bubwa bukatundu mu kumwononoka. (Kwitu 10:12; Isaya 48:17, 18) Twabezika manene mwafwa Njambi yetu wapwa wa kulikehesa.

5. Yehova ali na kutulongesa bati kupwa ba kulikehesa? (Taleni cikupulo cili ha liputa lya kulibanga.)

⁵ Yehova ali na kutulongesa kupwa ba kulikehesa omwo ali na kupangela hamo netu. Wakala manene na mana kutubakana byuma byoshe. Oloni akatabesa bakwabo bamukwase. Cakumwenako, Yehova watabesele Munendi amukwase mu cipangi ca kutanga byuma byoshe. (Visi 8:27-30; Kolo 1:15, 16) Co lalo Yehova wapwa Muka-nzili Yoshe, oloni akanako bakwabo bipangi. Cakumwenako, nangula Yesu kupwa Mwene wa Bumwene bwendi, co akana nzili ya kupwamo ku banu ba kupwa 144,000 baje bakayula hamo na Yesu. (Luka 12:32) Yehova walongesele Yesu mwakupwila Mwene na Kapilistu Wakama. (Heve 5:8, 9) Ali na kulongesa lalo baje bakayula hamo na Yesu mwakupangela cipangi cabo, oloni kesi na kubaleka byuma byoshe bibanapande kulinga omwo bapanga cipangi coshe cabana. Nakulahela ngwendi balinga cizango cendi.—Kujo 5:10.

6-7. Bika bitulilongesa kuli Tate yetu wa mwilu ha kwanako bakwetu bipangi?

 ⁶ Nga Tate yetu wa mwilu uje asa kulinga byuma byoshe kwa kujeneka kumukwasa ana bakwabo bipangi, co netu tunapande kulinga ngoco. Cakumwenako, nga mwapwa mutwe wa naanga nambe mukulunu mu cikungulukilo, co tembwinineni Yehova ha kwanako bakweni bipangi na kukulahela ngweni bapanga mwamubwa bipangi bimunabana. Nga mutembwinina Yehova, co bipangi byenda mwamubwa, co lalo mulongesa bakweni bipangi na kubalingisa balizibe ngwabo nabo basa kulinga mwamubwa bipangi bimunabana. (Isaya 41:10) Byuma muka bikwabo bibasa kulilongesa kuli Yehova baje bali na moko?

⁷ Mbimbiliya imwesa ngwayo Yehova akatolilila ku biyongola bya tungelo. (1 Vimye 22:19-22) Bisemi, mwasa kutembwinina bati Yehova? Bisimbu bimo mwasa kwihula bana beni bamileke mumunasa kupangela cipangi cimo cimushaka kulinga. Co mwasa kukabangeya bibanamileke nga mumona ngweni binapande.

8. Yehova wamwesele bati ngwendi wapwa muka-kukwata mbunge kuli Abilahama na Sala?

⁸ Yehova akamwesa lalo ngwendi wapwa wa kulikehesa mwakakwata mbunge. Cakumwenako, Yehova akakwata mbunge nga bangamba bendi bamulomba mu kasingimiko ngwabo atengulule biyongola byendi. Yehova watolilile omwo Abilahama wendekele ngwendi kapandele kunyongesa binganda bya Sondoma na Ngomola. (Kusha 18:22-33) Tumoneni lalo byalingile Yehova kuli Sala munakazi wa Abilahama. Yehova kayalumukile omwo Sala wajolele mwamukulahesele ngwendi akemita mu bukulukazi bwendi. (Kusha 18:10-14) Oloni wamusingimikile.

9. Bika bibalilongesa bisemi na bakulunu kuli Yehova?

⁹ Bika bibalilongesa bisemi na bakulunu kuli Yehova? Mukalingi bati nga bana beni nambe bandolome na bandokazi bamo mu cikungulukilo kubalitombola na biyongola byeni? Kuma mukazambwila kubapaya ndi? Indi mukatolilila mangana muzibisise biyongola byabo? Bikungulukilo na binaanga bikawana manene bukwasi nga baje bali na moko batembwinina Yehova. Tunasimutwiya bitulilongesa kuli Yehova ha kulikehesa. Tusimutwiyeni lalo bitulilongesa ku banu babanendeka mu Mbimbiliya.

10. Yehova akatulongesa bati kupangesa myanja ya banu babanendeka mu Mbimbiliya?

¹⁰ Ha kupwa Mulongesi wetu Wakama, Yehova ali na kutulongesa kupangesa myanja ya banu bamo baje babanasoneka mu Lijwi lyendi. (Isaya 30:20, 21) Tukalilongesa mwakukela na bifwa byabibwa nga tusinganyekesesa ha banu baje bamwesele ebi bifwa bya kufwa ngwe kulikehesa. Tukalilongesa lalo ku byuma byalingiwile ku banu baje bonowele kukala na bifwa byabibwa.—Myaso 37:37; 1 Koli 10:11.

11. Bika bitulilongesa ku byuma byalingiwile kuli Saulu?

¹¹ Tusimutwiyeni ha byuma byalingiwile kuli Mwene Saulu. Ku bukwenje bwendi wapwile wa kulikehesa. Wazibukile hayalenga nzili yendi, co washakele kubyana kumupwisa mwene. (1 Samwe 9:21; 10:20-22) Oloni mu kwita kwa simbu, Saulu washangumukile kulyalesa. Wamwesele eci cifwa mwapwile mwene. Litangwa limo, wonowele kukwata mbunge mwakele na kubandamena kapolofweto Samwele. Saulu kakulahehelele ngwendi Yehova amena banu bendi, co wanene ñombelo nameme kakele  na lisesa lya kulinga ngoco. Ngeci, Saulu walubalesele Yehova, co Yehova wamubyanene. (1 Samwe 13:8-14) Tunapande kulilongesako bimo ku byuma byalingiwile kuli Saulu na kujenjuka kulinga bipangi bije kubatutabesele.

12. Ndanyele wamwese bati ngwendi wapwile wa kulikehesa?

¹² Tusimutwiyeni hali kapolofweto Ndanyele uje walisezele na Saulu. Ndanyele wapwile wa kulikehesa mu kukoya kwendi kwoshe, co wakele na kulomba bukwasi kuli Yehova. Cakumwenako, Yehova mwamukwasele kulumbununa cilota ca Nebukataneza, Ndanyele kalishashele ngwendi walingile ngoco mu nzili yendi lika. Oloni wanene kasingimiko na bumpau kuli Yehova. (Ndanye 2:26-28) Bika bitulilongesa? Nga bandolome batuleka ngwabo tukendeka mwamubwa biñanda, nambe nga tukalingi mwamubwa cipangi ca kwambulula, co tunapande kwana bumpau kuli Yehova. Tunapande kwanuka ngwetu kutwesi kulinga ebi byuma mu nzili yetu lika, oloni Yehova ikeye akatukwasa. (Fili 4:13) Nga tulinga ngoco, co tutembwinina Yesu. Mu ngila muka?

13. Bika bitulilongesa ku majwi a Yesu aje ali ku mukanda wa Yowano 5:19, 30?

¹³ Yesu wapwa Muna Njambi, co lalo wapwa wa kulumbunuka. Oloni wakulahelele Yehova. (Tandeni Yowano 5:19, 30.) Kashakele kupwisa hamo na Ishe wa mwilu. Mukanda wa Filipu 2:6 wendeka ngwawo Yesu “kayongwele kupwa hamo na Njambi.” Yesu wazibukile hayalenga nzili yendi, co wasingimikile Ishe.

14. Yesu wakumbulwile bati mubamulombele ngwabo alinge byuma bije kakele na lisesa lya kubilinga?

¹⁴ Tumoneni mwakumbulwilile Yesu omwo bandongesi bendi babali, Yakomba na Yowano hamo lika na baina, bezile kuli ikeye na kumulomba ngwabo abalingile byuma bije kakele na lisesa lya kulinga. Yesu wabalekele ngwendi Ishe wa mwilu ikeye lika ali na lisesa lya kwangula baje bakatumbama ku liboko lyendi lya cilyo nambe lya cimoshwe mu Bumwene bwa Njambi. (Mateo 20:20-23) Yesu wamwesele ngwendi wazibukile hayalenga nzili yendi. Wapwile wa kulikehesa. Walingile lika byuma bije byamushikile Yehova ngwendi alinge. (Yowa 12:49) Twasa kutembwinina bati Yesu?

15-16. Twasa kupangesa bati cinangulo cili ku mukanda wa 1 Kolinte 4:6?

 ¹⁵ Twasa kutembwinina Yesu mu kupwa ba kulikehesa nga tupangesa cinangulo cili ku mukanda wa 1 Kolinte 4:6, NWT. Ou mukanda ngwawo: “Keti mulinge byuma bije kubasonekele.” Ngeci, nga munu umo atulomba ngwendi tumunanguleko ha cuma cimo, kutwapandele kumuleka lika biyongola byetu nambe kwendeka kwa kujeneka kusinganyekesesa. Oloni tunapande kupangesa Mbimbiliya na mabulu etu aje anakundama ku Mbimbiliya. Nga tulinga ngoco, co tumwesa ngwetu tuzibuka hayalenga nzili yetu. Co lalo tusingimika ‘mashiko a busunga’ a Yehova.—Kujo 15:3, 4.

¹⁶ Kusingimika Yehova kutulingisa tulikehese. Oloni kuli byuma bikwabo lalo bikatulingisa tupwe ba kulikehesa. Tusimutwiyeni mutwasa kupwila ba kubwahelela nomwo mutwasa kuyoyela mwamubwa na bakwetu nga tupwa ba kulikehesa.

17. Mwafwa bika banu ba kulikehesa bakapu ba kubwahelela?

¹⁷ Kulikehesa na kuzibuka hayalenga nzili yetu, kutulingisa tupwe ba kubwahelela. Mwafwa bika? Mwafwa nga tuzibuka hayalenga nzili yetu, co tukandelela na kubwahelela nga bakwetu batukwasa. Cakumwenako, tumoneni byalingiwile omwo Yesu wakangwisile banu likumi baje bakele na mushongo wa mbumba. Munu umo lika hakati kabo ikeye welukile kuli Yesu na kukandelela mwafwa ya kumukangwisa ku mushongo uje wamuyandesele manene. Uje munalume wa kulikehesa wazibukile ngwendi kasele kulikangwisa ikeye babenya mukemwo wakandelele kuli Yesu ha kumukwasa, co washangazalele Njambi.—Luka 17:11-19.

18. Kulikehesa kutukwasa bati tuyoye mwamubwa na bakwetu? (Loma 12:10)

 ¹⁸ Banu ba kulikehesa bakayoyo mwamubwa na bakwabo, co bakapu na babusamba bababwa. Mwafwa bika? Mwafwa bazibuka ngwabo bakwabo nabo bali na bifwa byabibwa, co bakabakulahela. Banu ba kulikehesa bakabwahelela nga bakwabo balinga mwamubwa bipangi bibanabana, co bakabashangala na kabasingimika.—Tandeni Loma 12:10.

19. Mwafwa bika kutwapandele kulyalesa?

¹⁹ Banu ba kulyalesa, kubesi kushaka kushangala bakwabo. Bashaka lika ngwabo bakwabo babashangale. Bashaka kulyesekesa ku bakwabo na kulimona kupwa ba seho kutubakana bakwabo. Kubesi kushaka kwana bakwabo bipangi mwafwa bakasinganyeka ngwabo bakebo lika basa kubipanga mwamubwa. Bakazibila bakwabo cipululu nga banalingi byuma bije binatubakana bibakalingi. (Ngala 5:26) Banu ba cifwa eci kukabakaluwila kuwana babusamba bababwa. Nga tunanguka ngwetu tunashangumuka kulyalesa, co tunapande kulombela kuli Yehova atukwase ‘kutengulula biyongola byetu’ mangana keti tukale neci cifwa.—Loma 12:2.

20. Mwafwa bika tunapande kupwa ba kulikehesa?

²⁰ Twabezika manene mwafwa Yehova natumwesa mwanja waubwa. Akamwesa kulikehesa kwendi mwakapanga netu, co tushaka kumutembwinina. Co lalo, tushaka kutembwinina banu babanendeka mu Mbimbiliya baje balikehesele omwo bapangelele Njambi. Tushangazaleni Yehova na kumwana bumpau simbu yoshe. (Kujo 4:11) Nga tulinga ngoco, co tulikuta busamba na Tate yetu wa mwilu uje washaka banu ba kulikehesa.