1. Ki David ti dir konsernan limilite Zeova?

ESKI nou kapav dir ki Zeova ena limilite? Wi, nou kapav. David ti ekrir: “To donn mwa to boukliye pou protez mwa, ek to limilite fer mwa vinn pli gran.” (2 Sam. 22:36; Ps. 18:35, NW) Kan David ti ekrir sa bann parol-la, sirman li ti pe pans moman kot Samiel ti vinn lakaz so papa pou swazir prosin lerwa Izrael. Parmi so wit frer, David ti pli zenn, ek kanmem sa, Zeova ti swazir li pou ranplas Lerwa Sail.​—1 Sam. 16:1, 10-13.

2. Ki nou pou examine dan sa lartik-la?

² Sirman David ti pou dakor ar seki enn ekrivin Psom ti dir konsernan Zeova: “[Li] verse pou get lesiel ek later. Li tir bann pov dan lapousier; li tir bann malere dan salte. Li fer zot vinn konpagnon bann prins.” (Ps. 113:6-8) Dan sa lartik-la, nou pou gete kouma Zeova inn manifeste limilite ek ki bann leson inportan nou kapav tire. Apre sa, nou pou gete seki lexanp Lerwa Sail, profet Daniel, ek Zezi aprann nou lor modesti.

3. Kouma Zeova azir ar bann dimounn, ek ki sa montre nou?

³ Zeova montre ki Li ena limilite par fason ki Li azir ar bann dimounn ki inparfe. Li pa zis aksepte nou ladorasion, me Li osi konsider nou kouma so bann kamarad. (Ps. 25:14) Pou ki nou kapav vinn so kamarad, Zeova inn ofer so Garson kouma enn sakrifis pou ki nou kapav gagn pardon nou bann pese. Vremem, Zeova ena boukou mizerikord ek konpasion!

4. Ki kitsoz Zeova inn donn nou, ek kifer?

 ⁴ Anou get enn lot fason ki Zeova montre so limilite. Zeova Li nou Kreater, alor Li ti kapav dir nou seki nou bizin fer ar nou lavi. Me Li pa finn fer sa. Li’nn kree nou dan so resanblans ek Li’nn donn nou liberte pou swazir. Bann swa ki nou fer zot inportan pou Zeova, mem si nou bien tipti ek feb konpare ar Li. Li anvi ki nou swazir pou servi Li ar tou nou leker parski nou kontan Li. Li anvi osi ki nou trouve par noumem ki nou gagn bann bienfe kan nou obeir Li. (Det. 10:12; Iza. 48:17, 18) Nou vremem rekonesan ki Zeova montre limilite anver nou!

5. Kouma Zeova ansegn nou pou ena limilite? (Get zimaz lor kouvertir.)

⁵ Zeova ansegn nou pou ena limilite par fason ki Li azir anver nou. Zeova Limem ena plis sazes dan liniver. Mem si Li pa bizin konsey ar personn, Li aksepte sigzesion lezot. Par exanp, Zeova finn permet ki so Garson ed Li pou kree tou kitsoz. (Prov. 8:27-30; Kol. 1:15, 16) Ek mem si Zeova Li Tou-Pwisan, Li deleg sertin responsabilite ar lezot. Par exanp, Li’nn etabli Zezi kouma Lerwa dan So Rwayom, ek Li pou osi donn enn sertenn lotorite 144,000 imin ki pou regn ansam avek Zezi. (Lik 12:32) Biensir, Zeova inn form Zezi pou vinn Lerwa ek Gran Pret. (Ebre 5:8, 9) Zeova inn osi form bann ki pou regn ansam avek Zezi pou ki zot kapav asim zot responsabilite, me Li pa esey kontrol tou ti detay konsernan zot travay. Okontrer, Li ena konfians ki zot pou fer So volonte.​—Rev. 5:10.

6-7. Ki nou kapav aprann ar Zeova konsernan deleg bann responsabilite ar lezot?

⁶ Zeova pa bizin led personn, pourtan Li deleg sertin responsabilite ar lezot.  Alor, eski nou osi nou pa bizin fer parey? Par exanp, si to enn sef fami ouswa enn ansien, to kapav swiv lexanp Zeova kan twa osi to deleg bann responsabilite ar lezot ek to pa esey kontrol tou ti detay konsernan zot travay. Kan to imit Zeova, travay-la pa pou zis fer, me to pou osi form lezot ek zot pou ena plis konfians an zotmem. (Iza. 41:10) Ki kitsoz ankor bann ki ena enn sertenn lotorite kapav aprann ar Zeova?

⁷ Labib montre nou ki Zeova interese ar seki bann anz panse. (1 Ler. 22:19-22) Paran, kouma to kapav imit lexanp Zeova? Kan sa posib, demann to zanfan so lopinion lor fason ki kapav fer enn kitsoz. Ek si sa apropriye, to kapav fer seki li’nn dir.

8. Kouma Zeova ti montre pasians anver Abraam ek Sara?

⁸ Enn lot fason ki Zeova montre so limilite se atraver so pasians. Par exanp, Zeova ena pasians kan so bann serviter pa dakor avek sertin desizion ki Li pran. Kan Zeova ti desid pou detrir Sodom ek Gomor, avek respe Abraam ti dir Zeova ki sa pa ti enn bon desizion, ek Zeova ti pran letan pou ekout Abraam. (Zen. 18:22-33) Reflesi osi kouma Zeova ti azir anver Sara. Kan Zeova ti promet ki Sara ti pou tom ansint dan so vie zour, Sara ti riye. Me Zeova pa ti ni ofanse, ni ankoler ar Sara. (Zen. 18:10-14) Okontrer, Li ti tret Sara avek respe.

9. Ki bann paran ek bann ansien kapav aprann ar lexanp Zeova?

⁹ Ki bann paran ek bann ansien kapav aprann ar lexanp Zeova? Reflesi lor fason ki to reazir kan to bann zanfan ouswa bann frer ek ser dan to lasanble pa dakor ar to bann desizion. Eski deswit to dir zot ki zot ena tor? Ouswa eski to esey konpran kifer zot pans koumsa? Bann fami ek bann lasanble gagn bann bienfe kan bann dimounn ki ena lotorite imit Zeova. Ziska ler, nou finn gete seki lexanp Zeova aprann nou lor limilite. Asterla, anou gete seki nou kapav aprann lor modesti gras-a bann lexanp ki ena dan Labib.

10. Kouma Zeova servi lexanp lezot dimounn pou ansegn nou?

¹⁰ Dan Labib, Zeova, nou “Gran Instrikter,” donn nou bann bon lexanp pou ansegn nou. (Iza. 30:20, 21) Kan nou medit lor sa bann lexanp-la, nou trouv bann zoli kalite ki sa bann dimounn-la ti manifeste, ek parmi sa bann kalite-la ena modesti. Nou tir bann leson osi kan nou examinn lexanp bann dimounn ki pa ti manifeste sa bann zoli kalite-la.​—Ps. 37:37, NW; 1 Kor. 10:11.

11. Ki leson nou aprann ar move lexanp Lerwa Sail?

¹¹ Reflesi lor seki ti ariv Lerwa Sail. O-koumansman, li ti ena modesti. Kan li ti zenn, li ti rekonet so bann limit ek li ti mem ezite pou aksepte plis responsabilite. (1 Sam. 9:21; 10:20-22) Selman, inpe letan apre ki li ti vinn lerwa, Sail ti vinn arogan ek li ti fer bann kitsoz ki li pa ti gagn drwa fer. Enn zour, li ti perdi pasians pandan ki li ti pe atann profet Samiel. Olie ki li fer Zeova konfians ek atann ki Li azir pou So pep, Sail limem ti fer enn sakrifis pou Zeova, mem si li pa ti gagn drwa fer sa. Akoz sa, Sail ti perdi faver Zeova, ek Zeova ti rezet li kouma lerwa. (1 Sam. 13:8-14) Dan sa lexanp-la,  nou aprann enn leson inportan. Nou montre ki nou ena sazes kan nou pa fer bann kitsoz ki nou pa gagn drwa fer.

12. Kouma Daniel ti montre ki li ti ena modesti?

¹² Asterla, anou get lexanp profet Daniel. Toutlong so lavi, Daniel ti enn dimounn ki ti ena limilite ek modesti, ek li ti touletan demann Zeova pou gid li. Par exanp, kan Zeova ti servi li pou interpret rev Naboukodonozor, Daniel pa ti donn limem laglwar. Okontrer, avek modesti, Daniel ti donn tou laglwar ek loner Zeova. (Dan. 2:26-28) Ki leson sa aprann nou? Si bann frer ek ser kontan nou bann size ek si nou pe gagn bann bon rezilta dan predikasion, nou bizin touletan donn laglwar Zeova. Avek modesti, nou bizin rekonet ki san led Zeova, nou pa ti pou reisi fer sa bann kitsoz-la. (Fil. 4:13, NW) Kan nou fer sa, nou pe osi imit lexanp Zezi. Kifer nou dir sa?

13. Ki nou aprann lor Zezi dan Zan 5:19, 30?

¹³ Mem si Zezi ti Garson Bondie ek ki li ti parfe, li ti touletan kont lor Zeova. (Lir Zan 5:19, 30.) Zame li pa ti rod pran lotorite so Papa. Filipien 2:6 dir nou ki Zezi zame “pa finn anvi vinn egal ar Bondie.” Zezi ti soumet ar Bondie, li ti konn so bann limit, ek li ti respekte lotorite so Papa.

14. Kouma Zezi ti reazir kan sertin ti demann li pou fer enn kitsoz ki li pa ti gagn drwa fer?

¹⁴ Enn zour, Zak, Zan, ek zot mama ti demann Zezi pou fer enn kitsoz ki li pa ti gagn drwa fer. Ki Zezi ti fer? Zezi deswit ti dir zot ki se zis so Papa ki ti kapav deside kisannla ki pou asiz dan so drwat ek so gos dan Rwayom Bondie. (Mat. 20:20-23) Zezi ti montre ki li ti konn so bann limit. Li ti modes. Li ti fer zis seki so Papa ti donn li lotorite pou fer. (Zan 12:49) Kouma nou kapav imit lexanp Zezi?

15-16. Kouma nou kapav met an pratik konsey ki trouv dan 1 Korintien 4:6?

¹⁵ Nou imit lexanp Zezi kan nou swiv konsey ki trouv dan 1 Korintien 4:6. Sa verse-la dir: “Pa al andeor limit seki finn ekrir.” Alor, kan enn kikenn demann nou enn konsey, zame nou pa pou inpoz  nou fason panse ouswa dir li tou seki pas par nou latet. Okontrer, nou pou servi Labib ek nou bann piblikasion pou donn li bann konsey. Kan nou fer sa, nou montre ki nou rekonet nou bann limit. Avek modesti, nou rekonet ki bann konsey Zeova touletan pli bon ki nou bann prop konsey.​—Rev. 15:3, 4.

¹⁶ Kan nou modes, nou donn Zeova loner. Me ena osi lezot rezon kifer nou bizin modes. Asterla, nou pou gete kouma limilite ek modesti kapav rann nou zwaye ek ed nou pou ena enn bon relasion avek lezot.

17. Kifer bann dimounn ki ena limilite ek modesti zot zwaye?

¹⁷ Kan nou ena limilite ek modesti, nou pou pli zwaye. Kifer? Kan nou rekonet nou bann limit, nou rekonesan pou ninport ki led nou gagne, ek sa rann nou ere. Par exanp, kan Zezi ti geri dis zom ki ti ena lalep, zis enn parmi zot ti retourne pou remersie Zezi. Sa zom-la ti rekonet ki li pa ti kapav geri li par limem. Li ti ena limilite ek modesti. Li ti rekonesan pou led ki li ti gagne ek li ti glorifie Bondie.​—Lik 17:11-19.

18. Kouma limilite ek modesti ed nou pou ena enn bon relasion avek lezot? (Romin 12:10)

¹⁸ Bann dimounn ki ena limilite ek modesti ena enn bon relasion avek lezot ek zot ena bann kamarad bien pros. Kifer? Parski zot rekonet ki lezot ena bann zoli kalite ek zot ena konfians dan sa bann dimounn-la. Bann dimounn ki ena limilite ek modesti kontan kan lezot reisi asim bann responsabilite ki zot gagne. Zot premie pou felisit zot ek pou onor zot.​—Lir Romin 12:10.

19. Sit sertin rezon kifer fode pa nou fier.

 ¹⁹ Parkont, bann dimounn ki fier trouv sa difisil pou felisit lezot. Zot prefer kan se zotmem ki gagn bann felisitasion. Zot kontan konpar zotmem ar lezot ek zot ena lespri konpetision. Olie ki zot form lezot ek donn zot bann responsabilite, zot panse ki zot bizin fer travay-la zotmem. Kifer? Parski zot panse ki lezot pa pou fer travay-la kouma bizin. Bann dimounn ki fier, souvan anvi vinn pli inportan ki lezot ek zot zalou kan lezot fer pli bien ki zot. (Gal. 5:26) Personn pa res kamarad lontan ar bann dimounn koumsa. Si nou trouve ki nou fier, nou bizin sipliy Zeova dan lapriyer pou Li ed nou “renouvle [nou] fason panse” pou ki fierte pa form parti nou personalite.​—Rom. 12:2, NW.

20. Kifer nou bizin ena limilite ek modesti?

²⁰ Zeova inn donn nou enn bon lexanp konsernan limilite, ek nou vremem rekonesan anver Li pou sa. Nou trouv so limilite dan fason ki Li azir ar so bann serviter, ek nou anvi imit Li. Anplis, nou anvi imit lexanp bann dimounn ki ti servi Zeova avek modesti. Alor, anou touletan donn Zeova loner ek laglwar ki Li merite. (Rev. 4:11) Si nou fer tou sa bann kitsoz-la, nou pou kapav vinn kamarad Zeova pou touletan, parski Li kontan bann ki ena limilite ek modesti.