1. Isiyani Davidi yuulumalyaawe nhina wiiyeviha wa Yehova?

NIIREKE Yehova khweeliini nawiiyeviha? Iyee, nawiiyeviha. Moone itthu yantikhalyaawe Davidi amwaacaka Nluku: “Weeva unaakivaha nikula naa nowoopola, Ni wiiyeviha waa, unaakuunuwiha.” (2 Sam. 22:36; Isaa. 18:35) Ukati wantikhalyaawe ayo moolumwaayo, Davidi atthunaka oopuwenle itthu yaakhumelenle uwakati porofeeta Samuweli waawilyaawe wapuwani waathumwaane wiira anthanle ule aahala ukhala mwene o Isarayeli. Davidi phaari mwaana o mwankaani iriyari waasulupalyaawe 8. Hataa ukhalaka commo, Yehova ahonthanla wiira akhale mwene.—1 Sam. 16:1, 10-13.

2. Ninhala wiitthucani nhina ula mwahoola?

² Unawoonannya wiira Davidi oopuwela toko coopuwelaawe ule antikhale Isaalimu 113. Amwaacaka Yehova, uyo enre co: ‘Uyo nawooroma wiira awehe irimu ni itthaya, naamunwusa wantthupini ule neeyeviha. Naamunwusa mmasikhini wiira amonkomihe wamoca naakhulupale.’ (Isaa. 113:6-8) Nhina ula mwahoola, ninaahala woona mananna Yehova cithoonyenryaawe wiiyeviha ni isiyani ntakihero nawe ninniitthucihaaya. Ciicammo, ninaahala woona isiyani ninniitthucihaaya ntakihero na mwene Sawuli, na porofeeta Daniele ni na Yesu nhina wiiyeviha.

3. Yehova nniwacera manannani ni iyo inthoonyera isiyani?

³ Mananna Yehova cinaawaceraawe atthu oopahuwa anonswalela anthoonyera wiira uyo nawiiyeviha. Yehova khannoona paasi ukhala atthu anonswalela; masi uyo ciicammo noniwehera khampa asipatthannyaawe. (Isaa. 25:14) Wiira nikhitiri ukhala apatthannyaawe, Yehova honvaherera mwanawe Yesu wiira anoopole ni anilevelele matampiihu. Ayo manannaayo, Yehova khweeliini hothoonyera ikiri ni uthunku. Ni iyo inthoonyera wiira uyo khanle Nluku owiiyeviha.

4. Isiyani Yehova innihiyaawe uthanla, ni kontha isiyani?

 ⁴ Moone itthu ikiina inthoonyera wiira Yehova nawiiyeviha. Ukhala wiira Yehova phinumpale, uyo ahaana isariya yoolakela meettelo khula ntthu anlamuliyaawe utthara, masi uyo khapankale iyo. Yehova honumpa ni makhalelo arinaawe ni naanihiya uthanla meettelo ampheeleehu ukhalana, hataa acuwelaka wiira nikhanle ankaani ni khaninonlikanana. Kontha uyo khampheela wiira ninswalele nlattu wookhanyererihiya, masi mpheela wiira ninswalele nlattu wonfenta ni nlattu woocuwela wiira namwiiwelelaka, ninaahala uphwanya ifayita. (Deut. 10:12; Isai. 48:17, 18) Khweeliini, unaareera venci unswalela Nluku owiiyeviha commo!

5. Manannani Yehova cinniitthucihaawe wiiyeviha? (Nwehe ilatarato iri wakaapani.)

⁵ Inanna Yehova cinaawaceraawe atthu akiina inaaniitthuciha wiiyeviha. Ntuninyani ni hataa wiirimu, khaavo ntthu oocuwelaca ompwaha Yehova. Hataa ukhalaka commo, Yehova naatthuna uvahiya nruku. Wootakihera, Yehova hotthuna wiira Mwanawe ankavihere wumpa citthu cotheene. (Miru. 8:27-30; Akol. 1:15, 16) Unookhalaru wiira Yehova khanle nakuru cotheene, uyo nawaavahacera miteko cikiina atthu akhwaawe. Uyo honthanla Yesu wiira akhale Mwene muumweneni wawe ni haavahacera ukhulupale makristau 144.000 anhala ulamulela ni Yesu. (Luka 12:32) Unawoonannya wiira Yehova honlakihacera Yesu wiira acuwele ulamulela ni akhale Nankuttho Muulupale. (Mabere. 5:8, 9) Uyo ciicammo haalakihacera ale anhala ulamulela ni Yesu. Masi Yehova khanaakhalenla wiira oone khula itthu impankaaya wiira avare uyo ntekooyo. Uyo nawaakhuluvela wiira anaahala ukhitiri upanka intthunaawe.—Apoka. 5:10.

6-7. Ntakiheroni Yehova ninnivahaawe nhina waavahacera miteko cikiina akhwiihu?

⁶ Yehova naakhitiri uvara citthu cotheene woohikaviheriya ni ntthu. Hataa ukhalaka commo,  uyo nawaavahacera miteko cikiina atthu akhwaawe. Vano hiiva, niireke khawaahala uniphwanela waavahacera akhwiihu miteko cikiina? Wakhala wiira nyuuva nkhanle nhooleli o watthokoni awula nkhanle humu o wanlokoni, muntakihe Yehova: mwaavahacere miteko cikiina akhwiinyu ni nhimananihe waakhalenla wiira nweheehe mananna cinvaraaya uyo ntekooyo. Mwantakihaka Yehova, nteko waavahacenreenyu akhwiinyu unaahala uvariya saana, unaahala wuutteelani nrima nlattu wo woona wiira nhaalakihera akhwiinyu ni nhaakavihera uhoova uvara uyo ntekooyo. (Isai. 41:10) Ale avahaceriye ukhulupale isiyani-tho ineetthucaaya ni ntakihero na Yehova?

⁷ Ibiiblya inthoonyera wiira Yehova naatothaka ucuwela itthu inoopuwelaaya malayikha. (1 Mam. 22:19-22) Ayari, nnolamuliya untakiha cani Yehova? Ukati nkiina, nhinaaya upanka itthu, mwaakohe asaaniinyu itthu inoopuwelaaya nhina mananna ooreera upanka iyo itthwiiyo. Ni wakhala wiira itthu inoopuwelaaya ikhanle yomaana, mpanke yeeyo.

8. Yehova anvilenle cani Aparahaamu ni Sara?

⁸ Inanna ikhwaawe Yehova cinthoonyeraawe wiiyeviha ukhanle uvilela. Wootakihera, Yehova nawaavilela atthu anonswalela waarikarikaka wiiweeha itthu ilakenlyaawe upanka. Ukati Yehova waalakenlyaawe umalamaliha isittatti yo Sotoma ni Komora, Aparahaamu wahonrikela ucuweleeha itthu Yehova yaalakenlyaawe ni ahonhimyera masukhulyaawe, ni Yehova ahonviriyana. (Upha. 18:22-33) Sara ahothya ukati weewalyaawe inatiri ya Yehova wiira anhala urupala irukulu hataa ooluvalaka, masi Yehova khaarusiye. (Upha. 18:10-14) Uhiya commo, Yehova ahonwacera Sara niihisima.

9. Ayari ni mahumu anlamuliya untakiha cani Yehova?

⁹ Wakhala wiira nyuuva nkhanle nnyari awula humu, munlamuliya untakiha cani Yehova? Muupuwelele vakaani mananna cinkhaleenyu wakhalaka wiira asaaniinyu awula mayamunna o wanlokoni anawuukohakohani nlattu wo itthu ilakenleenyu upanka. Niireke nnawaakuva upheela waavaanyiha? Awula nnopaca waaviriyana toko wiira mwiiweehe itthu inoopuwelaaya? Ale arina ukhulupale yeeyevihaka khampa Yehova cineeyevihaawe, amucyaaya ni maloko anaakhala saana. Mpaka va, niheetthuca mananna ninlamuliyeehu utakiha wiiyeviha wa Yehova. Vano nttwee noone isiyani matakihero makhwaawe o mbiiblyani anniitthucihaaya nhina wiiyeviha.

10. Yehova noniitthuciha cani?

¹⁰ Yehova, ‘Mwiitthucihiihu Muulupale,’ hohela mbiibyani matakihero anniitthuciha citthu cofayita. (Isai. 30:20, 21) Nasomaka Ibiiblya, ninaaphwanya ihantisi caatthu enci athoonyenre makhalelo anoncivela Nluku, toko wiiyeviha awula uhiicuunuwiha. Ciicammo ninaaphwanya ihantisi caatthu yahaathoonyenre ayo makhalelwaayo, ni citthu caakhumelenle nlattu woohithoonyera wiiyeviha ni uhiicuunuwiha. Neetthaalelaka usoma nnyo ihantisinnyo ni noopuwelaka itthu insomeehu ninawiitthuca citthu cinci.—Isaa. 37:37; 1 Akor. 10:11.

11. Ntakihero na Sawuli ninniitthuciha isiyani?

¹¹ Muupuwele itthu yankhumelenle mwene Sawuli. Wuupaceroni, uyo aari mmirawo owiiyeviha. Uyo aanaacuwela wiira cihaavo citthu cahaalamuliyaawe upanka, ni ukati waathanliyaawe ukhala mwene, uyo aapacale ukhotta. (1 Sam. 9:21; 10:20-22) Masi ukati waathanliyaawe ukhala mwene, vakaani-vakaani, Sawuli ahancera wiicoona. Nihuku nimoca, Sawuli khaavilenle ni ahooceela unweherera porofeeta Samuweli. Uhiya wiiyeviha ni unkhuluvela Yehova wiira anhala waahoolela apoovwaawe, Sawuli ahopanka itthu yahaalamuliyaawe upanka: uyo ahonvaha itthuvo Yehova. Yankhumelenle isiyani? Sawuli ahohiya ukhala mpatthani  a Yehova ni Yehova ahonkhotta ukhala mwene. (1 Sam. 13:8-14) Khweeliini, nihaana niitthuceraka nno ntakiheronno ni wiikurumica wiira nihikhale atthu owiicoona toko Sawuli.

12. Daniele aathoonyenre cani wiiyeviha?

¹² Moone ntakihero nomaana na porofeeta Daniele ninvirikana venci ni ntakihero noohinamaana na Sawuli. Muukumini wawe motheene, Daniele ahonswalela Nluku athoonyeraka wiiyeviha ni uhiicuunuwiha. Ni khula ukati, antotha weettela malakihero a Yehova. Ukati waakaviheriyaawe ni Yehova utaphulela itthu yaalohalyaawe Napukotonosor, Daniele khaamananihale wiittitthimiha. (Dan. 2:26-28) Nineetthuca isiyani? Wakhalaka wiira nihottottopeliya nlattu wootaphulela mwaha saana wanlokoni, awula nlattu woonikhumela saana nteko woolalyeera, khaninlamuliya wiicoona, masi nihaana ninttottopelaka Yehova. Nihaana niiyevihaka ni ukupali wiira khanaahala ukhitiri upanka iyo itthwiiyo nahaakaviheriye ni Yehova. (Afili. 4:13) Napankaka commo, ninantakiha Daniele ni ciicammo ninantakiha Yesu. Manannani?

13. Toko cinthoonyeraaya Joau 5:19, 30, ntakihero na Yesu ninniitthuciha isiyani?

¹³ Hataa akhalaka Mwaana oohipahuwa a Nluku, Yesu aanaathoonyera wiira ankhuluvela Yehova. (Nsome Joau 5:19, 30. *) Khuuvo ukati Yesu waamananihalyaawe uwaakha ukhulupale Athumwaane. Afilipo 2:6 ineera wiira Yesu “khoopuwenle wiicuunuwiha awula unlikanana Nluku.” Toko Mwaana owiiwelela, Yesu ancuwela wiira cihaavo cahaakhitiryaawe upanka ni anhisima ukhulupale waathumwaane.

14. Isiyani Yesu yaapankalyaawe ukati waalepeliyaawe itthu yahaalamuliyaawe upanka?

¹⁴ Muupuwele itthu yaapankalyaawe Yesu ukati Tiyaku, Joau waamoca naanumwanaya wanlepenlyaaya iparakha yahaalamuliyaawe waavaha. Woohuupuwela imaara piili, Yesu ahaahimyereeha wiira Athumwaane paahi phinlamuliya ulakela tipani nlamuliya wonkoma moono wonlopwana awula wonthiyana muumweneni wa Yesu. (Mat. 20:20-23) Yesu aanaacuwela wiira cihaavo citthu cahaalamuliyaawe upanka. Uyo kheecuunuwiha  ni khaahiile weettela malakihero yaavahiyaawe ni Yehova. (Joau 12:49) Ninlamuliya untakiha cani?

15-16. Ninhala weettela cani ikano imphwanyannya nhina 1 Akorintu 4:6?

¹⁵ Ninhala utakiha wiiyeviha wa Yesu nattharaka itthu inhimyaaya 1 Akorintu 4:6 ineera: “Nhihiye weettela citthu cantikhiye.” Phimaana ntthu anilepelaka unvaha ikano, khaninlamuliya unhimyera itthu inoopuweleehu, masi ninlamuliya unthoonyera itthu yantikhiye mbiiblyani ni mmalivuruni cihu. Napankaka commo, ninthoonyera wiira cihaavo citthu cihinkhitiriihu upanka. Wiiyeviha, unaanikavihera waamini wiira malamulo osariya a Nluku Nakuru-Cotheene phiverihenle ukhala omaana, uvikana khula ikano yaahaleehu uvaha nikumihaka mmuru wihu.—Apoka. 15:3, 4.

¹⁶ Nakhalaka atthu owiiyeviha ninaahala unttitthimiha Yehova. Masi cihaavo iparakha cikhwaawe cinhaleehu waakhela neeyevihaka. Phimaana nttwee noone manannani wiiyeviha cinhalaaya unikavihera ukhala ootteeliya ni ukhalana upatthani womaana naakhwiihu.

17. Kontha isiyani atthu owiiyeviha anaakhala ootteeliya?

¹⁷ Neeyevihaka ninaahala ukhala ootteeliya. Nlattuni? Naaminiki wiira cihaavo citthu cihinkhitiriihu upanka, akhwiihu anaahala unikavihera. Nlattu wo iyo, hiiva ninawaasukhuru ni unaanitteela nrima. Wootakihera, nnawuupuwela ukati Yesu waavonihalyaawe anamakuttula 10? Aahokolyaale namakuttula mmoca paahi wiira onsukhuru Yesu nlattu woovonihiya. Uyo khaahala ukhitiri wiivoniha ahaakaviheriya ni Yesu. Nlattu wo wiiyeviha, ule nlopwanoole ahosukhuru ni ahonttottopela Nluku woonalyaawe wiira ahokaviheriya.—Luka 17:11-19.

18. Toko cinhimyaaya Arooma 12:10 wiiyeviha unnikavihera cani ukhalana upatthani womaana naakhwiihu?

¹⁸ Ntthu owiiyeviha nawiiwanana naakhunanawe ni naakhalana apatthani. Kontha isiyani? Kontha  atthu owiiyeviha anaakhitiri woona makhalelo omaana aatthu akiina ni anawaakhuluvela akhwaaya. Atthu owiiyeviha anaakhala ootteeliya yawoonaka akhwaaya caakhumelaka saana miteko cinvaraaya, hataa cikhalaka mitekoni. Ayo ciicammo khanoonela ihaaya waattottopela akhwaaya awula waattitthimiha.—Nsome Arooma 12:10. *

19. Nlattuni ninlamuliyeehu wiikurumica wiira nihiicoone?

¹⁹ Masi atthu owiithenca unawaarika waattottopela akhwaaya, ni unaacivela attottopeliyaka ayova paahi. Ayo unawaacivela wiilattaniha naatthu akiina ni anaatotha waasintta akhunanaya. Uhiya waalakihera awula waavahacera miteko atthu akhwaawe, ayo anoopuwela co: “Ula ntekoola wiira uvariye saana, kihaana kipankaka mwaaneennyaaka.” Ayo unaacivela wiira citthu cotheene cipankiyeke mananna caahalaaya upanka ayova. Atthu owiicoona ankhalaka atthu onttima. (Akalas. 5:26) Ayo khankhalana upatthani woolipa naakhwaaya. Noonaka wiira ninawiicoona, nihaana ninhimyeraka Yehova irineehu wanrimani, ni unlepela wiira anikavihere urehererya moopuwelelweehu. Commo, khaninhala wiihiya nikhalaka atthu owiicoona.—Aroo. 12:2.

20. Nlattuni ninlamuliyeehu ukhala atthu owiiyeviha ni oohiicuunuwiha?

²⁰ Ninansukhuru venci Yehova nlattu wo ntakihero nivahalyaawe! Nawehaka mananna uyo cinaawaceraawe atthu anonswalela, ninaakhitiri woona wiira khanle Nluku owiiyeviha, ni hiiva nimpheela untakiha. Ciicammo nimpheela waatakiha atthu anoolumiya mbiiblyani yanswalenle Yehova yiiyevihaka. Napankaka commo, ninaahala unttitthimiha ni unttottopela Yehova toko cinomphwanelaaya. (Apoka. 4:11) Ni khaninhala uhiya waaswalela Apaapeehu o wiirimu anaafenta atthu owiiyeviha ni ahineecuunuwiha.