1. ¿Ndáaña ni̱ka̱ʼa̱n ta̱ David xa̱ʼa̱ ña̱ vitá-ini Jehová?

¿Á ÑA̱ nda̱a̱ kúú ña̱ vitá-ini Jehová? Ña̱ nda̱a̱ kúúvaña, chi ta̱ David ni̱ka̱ʼa̱nra ña̱yóʼo: “Yóʼó kúú ta̱ táxi escudo ña̱ sáka̱ku yi̱ʼi̱, ta ña̱ vitá-iniún ndásakáʼnuña yi̱ʼi̱” (2 Sam. 22:36; Sal. 18:35). Tá ka̱ʼyíra ña̱yóʼo, sana xi̱ndakanixi̱níra xa̱ʼa̱ ki̱vi̱ ña̱ ni̱xa̱ʼa̱n ta̱ profeta Samuel veʼe yivára ña̱ va̱ʼa ndaka̱xinra ta̱ koo rey ña̱ ñuu Israel. Ni xi̱kuu ta̱ David ta̱ loʼo va̱ʼaka nu̱ú u̱na̱ saá na̱ ñanira, Jehová nda̱kaxinra ta̱yóʼo ña̱ koora rey nu̱ú ta̱ Saúl (1 Sam. 16:1, 10-13).

2. ¿Ndáaña ka̱ʼa̱nyó xa̱ʼa̱ nu̱ú ña̱ artículo yóʼo?

² Ta̱ David inkáchi xi̱ndakanixi̱níra xíʼin ña̱ ka̱ʼyí iin ta̱ salmista xa̱ʼa̱ Jehová: “Ta̱yóʼo sánuura xi̱níra, ña̱ va̱ʼa kotora ndiví xíʼin ñuʼú, ña̱ va̱ʼa ndaniʼira na̱ vitá-ini tañu yáká. Ta na̱ ndáʼvi ndániʼirana [...] ña̱ va̱ʼa koona xíʼin na̱ yiví na̱ ndáyáʼvi” (Sal. 113:6-8). Nu̱ú ña̱ artículo yóʼo ka̱ʼa̱nyó ama kúú ña̱ ni̱na̱ʼa̱ Jehová ña̱ vitá íyo inira, ta kotoyó ndáaña kivi sakuaʼayó xíʼin ña̱yóʼo. Tándi̱ʼi, ka̱ʼa̱nyó ndáaña sákuaʼayó xíʼin ña̱ ke̱ʼé ta̱ rey Saúl, ta̱ profeta Daniel xíʼin ta̱ Jesús ña̱ ndakuniyó ña̱ íyo sava ña̱ʼa ña̱ va̱ása kívi keʼéyó.

3. ¿Ndáa ki̱ʼva kéʼé Jehová xíʼinyó, ta ndáaña náʼa̱ ña̱yóʼo?

³ Ña̱ kéʼé Jehová xíʼin na̱ káchíñu nu̱úra ni kúúna na̱ yiví ku̱a̱chi náʼa̱ña ña̱ vitá íyo inira. Táxira ña̱ ná ndasakáʼnuyóra ta saátu ña̱ kooyó migora (Sal. 25:14). Ta va̱ʼa kítáʼanyó xíʼinra tíxa̱ʼvi ña̱ ta̱xira se̱ʼera ni̱xi̱ʼi̱ra xa̱ʼa̱ ku̱a̱chiyó. Xíʼin ña̱yóʼo ni̱na̱ʼa̱ra ña̱ kúndáʼviní-inira xínira miíyó.

4. ¿Ndáaña ta̱xi Jehová ndaʼa̱yó, ta nda̱chun?

⁴ Ná kotoyó inka ki̱ʼva ña̱ náʼa̱ Jehová ña̱ vitá íyo inira.  Ta̱yóʼo, va̱ása níxiniñúʼuví taxira ña̱ ndaka̱xinyó ndáaña keʼéyó xíʼin ña̱ tákuyó. Soo ke̱ʼévaraña. Tá ki̱ʼva íyo miíra saá i̱xava̱ʼara miíyó, ta ta̱xira ña̱ ná ndaka̱xinyó ña̱ kúni̱yó keʼéyó. Ni káʼnuní Jehová nu̱úyó ta ndáyáʼviníra soo kúni̱ra ña̱ ná kachíñuyó nu̱úra xa̱ʼa̱ ña̱ kúʼvi̱-iniyó xíniyóra ta kúnda̱a̱-iniyó ña̱ tá kándíxayóra ku̱a̱ʼání ña̱ va̱ʼa ndakiʼinyó (Deut. 10:12; Is. 48:17, 18). Táxiníyó tíxa̱ʼvi xa̱ʼa̱ ña̱ vitání-ini Jehová.

5. ¿Ndáa ki̱ʼva sánáʼa̱ Jehová miíyó ña̱ vitá koo iniyó? (Koto na̱ʼná ña̱ va̱xi chí sa̱tá tutu yóʼo).

⁵ Ña̱ kéʼé Jehová xíʼin na̱ yiví sánáʼa̱ña miíyó ña̱ vitá koo iniyó. Ni kúúra ta̱ ndíchiní íyo iníí saá ñuyǐví, soo kándíxavara ña̱ káʼa̱n inkana xíʼinra. Tá kúú, ta̱xira ña̱ ná chindeétáʼan se̱ʼera xíʼinra tá i̱xava̱ʼara ndiʼi ña̱ʼa (Prov. 8:27-30; Col. 1:15, 16). Ta ni íyoní ndee̱ra, táxira chiñu ndaʼa̱ inkana. Tá kúú, ta̱xira ña̱ ná koo ta̱ Jesús Rey ti̱xin Reinora, ta taxira chiñu ndaʼa̱ na̱ 144,000 na̱ kaʼndachíñu xíʼin ta̱ Jesús (Luc. 12:32). Mií Jehová kúú ta̱ i̱xatu̱ʼva ta̱ Jesús ña̱ koora Rey ta saátu ña̱ koora su̱tu̱ káʼnu (Heb. 5:8, 9). Ta saátu sánáʼa̱ra na̱ kaʼndachíñu xíʼin se̱ʼera, soo tá xa̱a̱ ná taxira chiñu yóʼo ndaʼa̱na su̱ví ndiʼi tiempo kiʼinra kuenta ndáa ki̱ʼva keʼéna chiñuna. Chi kandíxara ña̱ keʼéna ña̱ kúni̱ra (Apoc. 5:10).

6, 7. ¿Ndáa ki̱ʼva kivi kundiku̱n na̱ níʼi yichi̱ nu̱ú na̱ veʼena xíʼin na̱ anciano yichi̱ Jehová?

⁶ Yiváyó ta̱ íyo chí ndiví táxira chiñu ndaʼa̱ inkana ni va̱ása xíniñúʼura ña̱ ná chindeétáʼanna xíʼinra, soo miíyó xíniñúʼuníka keʼéyó ña̱yóʼo. Tá kúú, na̱ níʼi yichi̱ nu̱ú na̱ veʼena xíʼin na̱ anciano, ¿ndáa ki̱ʼva kivi kundiku̱nna yichi̱ra? Kéʼéna ña̱yóʼo tá táxina chiñu ndaʼa̱ inkana ta su̱ví ndiʼi tiempo  kíʼinna kuenta ndáa ki̱ʼva kéʼéna chiñu yóʼo. Tá saá kéʼéna vií kana chiñu, sanáʼa̱na inkana ta chindeétáʼanna xíʼinna ña̱ va̱ása yi̱ʼvína keʼéna iin chiñu (Is. 41:10). ¿Ndáaña kivika sakuaʼa na̱yóʼo xíʼin ña̱ kéʼé Jehová?

⁷ Ña̱ Biblia náʼa̱ña ña̱ xíniso̱ʼo Jehová ña̱ káʼa̱n na̱ ángel (1 Rey. 22:19-22). ¿Ndáa ki̱ʼva kivi kundiku̱n na̱ íyo se̱ʼe yichi̱ Jehová? Sava yichi̱ kivi nda̱ka̱tu̱ʼunna se̱ʼena ndáa ki̱ʼva kivi keʼéna iin chiñu ña̱ íyo ti̱xin veʼena. Ta tá kívi ná keʼéna ña̱ káʼa̱n se̱ʼena.

8. ¿Ndáa ki̱ʼva ni̱na̱ʼa̱ Jehová ña̱ kúee ni̱xi̱yo inira xíʼin ta̱ Abrahán ta saátu xíʼin ñá Sara?

⁸ Tá kúee íyo ini Jehová náʼa̱ra ña̱ vitá íyo inira. Tá kúú, kúee íyo inira xíʼin na̱ káchíñu nu̱úra tá ndáka̱tu̱ʼunnara xa̱ʼa̱ ña̱ nda̱kaxinra keʼéra. Tá ni̱ka̱ʼa̱n Jehová ña̱ sandíʼi-xa̱ʼa̱ra ñuu Sodoma xíʼin Gomorra viíní xi̱niso̱ʼora ña̱ ni̱ka̱ʼa̱n ta̱ Abrahán xa̱ʼa̱ ña̱ xi̱sandíʼi̱-inira (Gén. 18:22-33). Ná ndakaʼányó xa̱ʼa̱ ña̱ ke̱ʼéra xíʼin ñá Sara ñá síʼi ta̱ Abrahán, tá ni̱xa̱ku̱ñá chi xi̱niso̱ʼoñá ña̱ koo se̱ʼeñá ni xa̱a̱ chéeníñá. Nu̱úka ña̱ sa̱a̱ra xíʼinñá viíní ke̱ʼéra xíʼinñá (Gén. 18:10-14).

9. ¿Ndáaña kivi sakuaʼa na̱ íyo se̱ʼe xíʼin na̱ anciano xíʼin ña̱ kéʼé Jehová?

⁹ Tá íyo se̱ʼún á kúún anciano, ¿ndáaña kivi sakuaʼún xíʼin ña̱ kéʼé Jehová? Ndakanixi̱ní xa̱ʼa̱ ña̱ kéʼún tá iin se̱ʼún á na̱ hermano ña̱ congregación va̱ása inkáchi ndákanixi̱nína xíʼún xa̱ʼa̱ ña̱ kúni̱ún keʼún. ¿Á kama káʼún xíʼinna ña̱ va̱ása va̱ʼa ña̱ kéʼéna? ¿Á chíka̱ún ndee̱ ña̱ kotoún nda̱chun kúú ña̱ ndákanixi̱nína saá? Ku̱a̱ʼání ña̱ va̱ʼa ndákiʼin na̱ familia á na̱ congregación, tá na̱ níʼi yichi̱ nu̱úna ndíku̱nna yichi̱ Ndióxi̱. Xa̱a̱ ni̱ka̱ʼa̱nyó xa̱ʼa̱ ña̱ sákuaʼayó xíʼin ña̱ kéʼé Jehová. Vitin ka̱ʼa̱nyó xa̱ʼa̱ na̱ ni̱xi̱yo tá tiempo xi̱naʼá na̱ káʼa̱n Biblia xa̱ʼa̱, ta kotoyó ndáaña kivi sakuaʼayó ña̱ va̱ʼa ndakuniyó ña̱ íyo sava ña̱ʼa ña̱ va̱ása kívi keʼéyó.

10. ¿Ndáa ki̱ʼva sánáʼa̱ Jehová miíyó?

¹⁰ Jehová kúú ta̱ sánáʼa̱ miíyó, xa̱ʼa̱ ña̱yóʼo nu̱ú tu̱ʼunra va̱xi ejemplo na̱ ni̱xi̱yo tiempo xi̱naʼá ña̱ kivi sakuaʼayó xíʼin (Is. 30:20, 21). Kivi ndakanixi̱níyó xa̱ʼa̱ na̱ ni̱xi̱yo tiempo xi̱naʼá na̱ xi̱kuumií táʼan ña̱ va̱ʼa ña̱ kútóo Ndióxi̱, tá kúú vitá ni̱xi̱yo inina ta nda̱kunina ña̱ ni̱xi̱yo sava ña̱ʼa ña̱ va̱ása níkivi keʼéna, ta saátu kivi ndakanixi̱níyó xa̱ʼa̱ ña̱ ndo̱ʼo na̱ va̱ása nína̱ʼa̱ ña̱yóʼo (Sal. 37:37; 1 Cor. 10:11).

11. ¿Ndáaña sákuaʼayó xíʼin ña̱ va̱ása va̱ʼa ke̱ʼé ta̱ Saúl?

¹¹ Ná ndakanixi̱níyó xa̱ʼa̱ ña̱ ndo̱ʼo ta̱ rey Saúl. Tá ni̱xi̱yo loʼora, vitání ni̱xi̱yo inira ta xi̱ndakanixi̱níra ña̱ va̱ása ndáyáʼvira ta xa̱ʼa̱ ña̱yóʼo i̱xayo̱ʼvi̱ña xíʼinra ña̱ ndakiʼinra ku̱a̱ʼáka chiñu (1 Sam. 9:21; 10:20-22). Soo tá ni̱ya̱ʼa loʼo tiempo ña̱ ndu̱ura rey, ki̱xáʼara ni̱nuní kúnira ta ke̱ʼéra sava ña̱ʼa ña̱ va̱ása níxiniñúʼu keʼéra. Iin yichi̱ va̱ása kúee níxi̱yo inira ña̱ kundatura ki̱xaa̱ ta̱ profeta Samuel. Nu̱úka ña̱ ndakunira ña̱ íyo sava ña̱ʼa ña̱ va̱ása kívi keʼéra, ta kandíxara ña̱ chindeétáʼan Jehová xíʼin na̱ ñuura, ta̱xira iin sacrificio ta su̱ví ta̱yóʼo kúú ta̱ xíniñúʼu keʼé ña̱yóʼo. Ña̱kán, Jehová va̱ása nítaxikara bendición ndaʼa̱ra ta ki̱ndaara chiñura ña̱ kúúra rey (1 Sam. 13:8-14). Va̱ʼaní ña̱ sákuaʼayó xíʼin ña̱yóʼo, ña̱ va̱ása kuni̱yó keʼéyó iin ña̱ʼa ña̱ va̱ása xíniñúʼu keʼéyó.

12. ¿Ndáa yichi̱ kúú ña̱ sa̱ndákoo ta̱ Daniel nu̱úyó?

 ¹² Soo xa̱a̱ síín íyo ña̱ ke̱ʼé ta̱ profeta Daniel nu̱ú ta̱ Saúl, saáchi va̱ʼaní yichi̱ sa̱ndákoora nu̱úyó. Ndiʼi tiempo ña̱ xi̱takura vitání ni̱xi̱yo inira, ta xi̱kunda̱a̱-inira ña̱ ni̱xi̱yo sava ña̱ʼa ña̱ va̱ása níkuchiñura keʼéra ña̱kán xi̱ka̱ʼa̱nra xíʼin Jehová ña̱ ná chindeétáʼanra xíʼinra. Tá kúú, tá xi̱niñúʼu Jehová ta̱yóʼo ña̱ ka̱ʼa̱nra xa̱ʼa̱ ña̱ ni̱xa̱ní ta̱ Nabucodonosor, ta̱ Daniel va̱ása níka̱ʼa̱nra ña̱ miíra ke̱ʼé ña̱yóʼo, chi nda̱kunira ña̱ chi̱ndeétáʼan Ndióxi̱ xíʼinra ta xíʼin ña̱ ke̱ʼéra nda̱sakáʼnura Jehová (Dan. 2:26-28). Xíʼin ña̱yóʼo sákuaʼayó ña̱ tá kútóo na̱ hermano discurso ña̱ táxiyó á tá va̱ʼaní xíniso̱ʼo na̱ yiví ña̱ nátúʼunyó, iinlá Jehová kúú ta̱ xíniñúʼu ndukáʼnu xa̱ʼa̱ ña̱yóʼo. Ná ndakuniyó ña̱ va̱ása kuchiñu iinlá miíyó keʼéyó ña̱yóʼo tá va̱ása chíndeétáʼan Jehová xíʼinyó (Filip. 4:13). Ta saátu, tá kéʼéyó ña̱yóʼo ndíku̱nyó yichi̱ ta̱ Jesús. Ná kotoyó nda̱chun káʼa̱nyó ña̱yóʼo.

13. ¿Ndáaña sánáʼa̱ Juan 5:19, 30 miíyó xa̱ʼa̱ ta̱ Jesús?

¹³ Ta̱ Jesús kǒo ku̱a̱chi kúúmiíra chi se̱ʼe Ndióxi̱ kúúra, soo ndiʼi tiempo xi̱kandíxara Jehová (kaʼvi Juan 5:19, * 30). * Nda̱a̱ ni iin yichi̱ va̱ása níkuni̱ra kindaara chiñu ndaʼa̱ yivára ta̱ íyo chí ndiví. Filipenses 2:6 káʼa̱nña xa̱ʼa̱ ta̱ Jesús ña̱ “va̱ása níndakanixi̱níra ña̱ kindaara chiñu ña̱ kúúmií Ndióxi̱, ta koora nda̱a̱ táki̱ʼva íyo ta̱yóʼo”. Ta̱ Jesús xi̱kunda̱a̱-inira ña̱ iinlá yivára kúú ta̱ xáʼndachíñu, ña̱kán xi̱ ixato̱ʼóra ña̱yóʼo ta xi̱kandíxarara.

14. ¿Ndáaña ke̱ʼé ta̱ Jesús tá ni̱ka̱ʼa̱nna xíʼinra ña̱ keʼéra iin ña̱ʼa ña̱ va̱ása kívi keʼéra?

¹⁴ Ná ndakanixi̱níyó xa̱ʼa̱ ña̱ ke̱ʼé ta̱ Jesús tá ni̱ka̱ʼa̱n siʼí ta̱ Santiago xíʼin ta̱ Juan xíʼinra, ña̱ ná taxira koo iin na̱yóʼo chí ndaʼa̱ kúaʼara ta inkana koo chí ndaʼa̱ yítinra ti̱xin Reino. Soo ta̱ Jesús ni̱ka̱ʼa̱nra xíʼinñá, ña̱ iinlá yivára kúú ta̱ kivi taxi ña̱yóʼo ndaʼa̱na (Mat. 20:20-23). Saá ni̱na̱ʼa̱ra  ña̱ xi̱kunda̱a̱-inira ña̱ íyo sava ña̱ʼa ña̱ va̱ása kívi keʼéra. Ta ña̱ xi̱keʼé kuitíra kúú ña̱ xi̱ka̱ʼa̱n yivára xíʼinra keʼéra (Juan 12:49). ¿Ndáa ki̱ʼva kivi kundiku̱nyó yichi̱ra?

15, 16. ¿Ndáa ki̱ʼva kivi keʼéyó ña̱ káʼa̱n 1 Corintios 4:6?

¹⁵ Ndíku̱nyó yichi̱ ta̱ Jesús tá kándíxayó ña̱ káʼa̱n 1 Corintios 4:6: “Va̱ása xíniñúʼu keʼéndó ña̱ va̱ása níka̱ʼyi̱”. Xa̱ʼa̱ ña̱yóʼo tá iinna ndúkúna iin consejo nu̱úyó, ná va̱ása ixandúxayó xíʼinna keʼéna ña̱ kúni̱ miíyó á ka̱ʼa̱nyó xíʼinna xa̱ʼa̱ ña̱ siʼna nda̱kanixi̱níyó. Va̱ʼaka ná ka̱ʼa̱nyó xíʼinna xa̱ʼa̱ consejo ña̱ va̱xi nu̱ú Biblia xíʼin tutu ña̱ tává na̱ ñuu Ndióxi̱. Tasaá na̱ʼa̱yó ña̱ kúnda̱a̱-iniyó ña̱ íyo sava ña̱ʼa ña̱ va̱ása kívi keʼéyó, ta va̱ʼaníka ña̱ káʼa̱n Jehová nu̱ú consejo ña̱ kivi taxi miíyó (Apoc. 15:3, 4).

¹⁶ Nda̱a̱ táki̱ʼva xa̱ʼa̱ ni̱ka̱ʼa̱nyó, tá vitá íyo iniyó ta ndákuniyó ña̱ íyo sava ña̱ʼa ña̱ va̱ása kívi keʼéyó, ndásakáʼnuyó Jehová. Ta vitin sakuaʼayó ña̱ chíndeétáʼantu ña̱yóʼo xíʼinyó ña̱ si̱í koo iniyó, ta vií kutáʼanyó xíʼin inkana.

17. ¿Nda̱chun si̱íníka íyo na̱ vitá-ini?

¹⁷ Si̱íníka kooyó tá vitá íyo iniyó, ta ndákuniyó ña̱ íyo sava ña̱ʼa ña̱ va̱ása kívi keʼéyó. ¿Nda̱chun? Saáchi tá kúnda̱a̱-iniyó ña̱ va̱ása kívi keʼé iinlá miíyó iin ña̱ʼa, taxiyó tíxa̱ʼvi ndaʼa̱ na̱ kúni̱ chindeétáʼan xíʼinyó. Ná ndakaʼányó xa̱ʼa̱ ña̱ ku̱u tá sa̱ndáʼa ta̱ Jesús u̱xu̱ na̱ ta̱a na̱ xi̱kuumií lepra. Iin kuití kúú ta̱ nda̱ndikó, ta ta̱xira tíxa̱ʼvi ndaʼa̱ ta̱ Jesús xa̱ʼa̱ ña̱ sa̱ndáʼarara. Vitání ni̱xi̱yo ini ta̱ ta̱a yóʼo chi xi̱kunda̱a̱-inira ña̱ va̱ása kuchiñura sándaʼara miíra, ña̱kán ta̱xira tíxa̱ʼvi ta nda̱sakáʼnura Ndióxi̱ (Luc. 17:11-19).

18. Tá vitá íyo iniyó, ¿ndáa ki̱ʼva chíndeétáʼanña xíʼinyó ña̱ vií kutáʼanyó xíʼin inkana? (Romanos 12:10).

 ¹⁸ Na̱ vitá-ini xíʼin na̱ ndákuni ña̱ íyo sava ña̱ʼa ña̱ va̱ása kívi keʼéna, va̱ʼaníka kítáʼanna xíʼin inkana. ¿Nda̱chun? Saáchi va̱ása íxayo̱ʼvi̱ña xíʼinna ña̱ ndakunina ña̱ inkana kúúmiína ña̱ va̱ʼa ta kándíxanana. Ta saátu, kúsi̱í-inina tá xítona ña̱ ku̱a̱ʼání ña̱ va̱ʼa ndákiʼin inkana xa̱ʼa̱ ña̱ káchíñuna nu̱ú Jehová, ta káʼa̱nna tu̱ʼun va̱ʼa xíʼinna ta íxato̱ʼónana (kaʼvi Romanos 12:10). *

19. ¿Nda̱chun va̱ása xíniñúʼu ni̱nu kuniyó?

¹⁹ Soo na̱ ni̱nu kúni íxayo̱ʼvi̱ña xíʼinna ña̱ ka̱ʼa̱nna tu̱ʼun va̱ʼa xíʼin inkana, chi kúni̱na ña̱ ná ka̱ʼa̱nna tu̱ʼun va̱ʼa xíʼin miína. Chítáʼanna ña̱ kéʼéna xíʼin ña̱ kéʼé inkana, ta kútóonína keetáʼanna xíʼin inkana. Nu̱úka ña̱ sanáʼa̱na inkana ta taxina chiñu ndaʼa̱na, iinlá miína kéʼé ndiʼi ña̱ʼa chi túvina ña̱ va̱ʼaníka kana iin chiñu saá á kooña nda̱a̱ táki̱ʼva kúni̱ miína. Ta saátu, kútóonína kundayáʼvina nu̱ú inkana, ta sáa̱na tá xítona ña̱ va̱ʼaníka kána ña̱ kéʼé inkana (Gál. 5:26). Va̱ása naʼá kítáʼanna xíʼin inkana. Ña̱kán tá kíʼinyó kuenta ña̱ ni̱nu kúniyó, ná ka̱ʼa̱nyó xíʼin Jehová ña̱ chindeétáʼanra xíʼinyó ña̱ ndasaxa̱áyó ña̱ ndákanixi̱níyó, tasaá va̱ása taxikayó koo ña̱yóʼo iniyó (Rom. 12:2).

20. ¿Nda̱chun xíniñúʼu vitá koo iniyó ta ndakuniyó ña̱ íyo sava ña̱ʼa ña̱ va̱ása kívi keʼéyó?

²⁰ Táxiníyó tíxa̱ʼvi xa̱ʼa̱ ña̱ va̱ʼaní náʼa̱ Jehová ña̱ vitá íyo inira. Náʼa̱ra ña̱yóʼo xíʼin ki̱ʼva ña̱ kéʼéra xíʼin na̱ káchíñu nu̱úra, ta kúni̱yó kundiku̱nyó yichi̱ra. Ta saátu kúni̱yó kundiku̱nyó yichi̱ na̱ xi̱táʼan xíʼin Ndióxi̱ ta xi̱ndakunina ña̱ ni̱xi̱yo sava ña̱ʼa ña̱ va̱ása níkivi keʼéna. Ndiʼi tiempo ná ixato̱ʼóyó Jehová ta ná ndasakáʼnuyóra (Apoc. 4:11). Tasaá kúú ña̱ kivi kutáʼanyó xíʼin yiváyó ta̱ íyo chí ndiví, chi ta̱yóʼo kúʼvi̱ní-inira xínira na̱ vitá-ini xíʼin na̱ ndákuni ña̱ íyo sava ña̱ʼa ña̱ va̱ása kívi keʼéna.