1. Daviba tae-e Jehovab di ǃgamǃgamsenxasib xa ge mî?

JEHOVAB ǃgamǃgamsenxasiba ūhâ ti ama mî ǁkhā i da a? Î, mî ǁkhā da a. Davib ge ge mî: “ǁKhātits ge satsa tita sa ǃgâiǃōb di khōsikhōba ge mā; tsî sa tsamtsiǃnâsib [“ǃgamǃgamsens,” NW] ge go kaikai te.” (2Sam. 22:36; Psa. 18:35) Davib ge nē mîde a xoa ob ge ǀnîsi Samueli ge ǁîb bab oms ai Israeli gao-aobab nî ǂkhau ga a sī tsēs xa gere ǂâi. Davib ge ǁkhaisa ǀgôagu ǃnâ ǀuniga i xaweb ge Jehovaba ǁîba ge ǁhûi îb gao-aob Saula ǃkhōǃkhuni.—1Sam. 16:1, 10-13.

2. Tae-e da nē ǁkhāǁkhāǃâs ǃnâ nî ǃhoaǃgao?

² Gao-aob Davib ge ǀnî Psalmdi xoa-aob ge Jehovab xa a mî xū-e gere ǃkhō-am: “ǃGamse ra kōb, ǀhommi ǃnâ tsî ǃhūbaib aiba? ǃHaraxūsaba tsaraba xu ra ǃkhōkhâib, tsî ǂhâb ǃnâ hâba . . . ra ǀgapiǀgapiba; gaosagu xōǀkhāb nî ǂnû kai bise.” (Psa. 113:6-8) ǂGurose da ge nē ǁkhāǁkhāǃâs ǃnâ Jehovab di ǃgamǃgamsenxasib xa nî ǁkhāǁkhāsen tsî matib ge nē ǀgauba a ǁgauǂuisa. ǁNapa xū da ge gao-aob Sauli, kēbo-aob Danieli tsî Jesub di ǃgamǃgamsenxasib di aiǁgaude xu nî ǁkhāǁkhāsen.

3. Jehovaba sida ǀkha mati ra hâ tsî nēsa tae-e ra ǁgau?

³ Jehovab ge ǃgamǃgamsenxasibab ūhâ ǃkhaisa ra ǁgau ǀoasa kurusa ūhâ tama hâ khoen ǀkhab ra sîsen ǀgaub ǃnâ. ǁÎb ge sida ǃoabas ǀguisa ūǃoa tama hâ xawe ǀhōsan ase ra ūǃoa da. (Psa. 25:14) Sida di ǀhōsagusisa ǁîb ǀkha ī kais ǃaromab ge Jehovaba ǁîb di ôaba ge sî, sida ǁoren ǃaroma. Jehovab ge kaise a ǀkhomxaǃnâ.

4. Jehovaba tae-e ra mā da tsî tae-i ǃaroma?

 ⁴ ǀKhara ǀgaugu hînab Jehovaba ǃgamǃgamsenxasiba ra ǁgaub xa ǂâi re. Jehovab ge kuru-aob ase aitsama ǁhûibasens di ǁkhāsib ose ga kuru da hâ. Xaweb ge ti dī tama ge ī. ǁÎb īsib ǃnâ kuru da, tsîb ge ǁhûibasens di ǁkhāsiba ge mā da. Jehovab ge ǂhâba hâ îda ǂgaoba xu ǃoababi ǀnambi da a amaga. Sida ra dī mîǁguigu ge Jehovab mûǁae a ǂhâǂhâsa, ǁîb ǀkha da ga a ǀgopeǀnōhe-o da a ǂkhariro tsî ǂkhabusa xawe. ǁÎb ge ra ǂhâba i da ǂgaoba xu ǃoababi tsî mûǃā ǁîba da ga ǁnâuǀnam o da nî ǀkhaega hōsa. (Deu. 10:12; Jes. 48:17, 18) Kaise da ge Jehovaba ra gangan ǁîb di ǃgamǃgamsenxasib ǃaroma.

5. Jehovaba mati ra ǁkhāǁkhā da î da ǃgamǃgamsenxasiba ūhâ? (Tsoatsoas ai hâ ai-īsiba mû re.)

⁵ Jehovab ge sidab ra hâ-ū ǀgaub ǃnâ ǃgamǃgamsenxasiba ra ǁkhāǁkhā da. Jehovab ge hoada xa a gā-ai. Xaweb ge nau khoen ra mî xūn tsîna ra ǃgâ ǂgao. Aiǁgauseb ge ǁÎb ôaba ge mā-am îb kurus ǀkha huibi. (ǂKhm. 8:27-30; Kol. 1:15, 16) Jehovab ge Hoaǀgaixab a xawe nau khoen ǀkha sîsen-e ra ǀgoragu. Aiǁgauseb ge Jesuba ǁîb Gaosib di Gao-aob ase ge ǁgaumâi tsî ǀnî sîsen-e 144 000 khoen hîna Jesub ǀkha sī nî ǂgaeǂguina ge mā. (Luk. 12:32) Ama as ge Jehovab ge Jesuba Gao-aosis tsî ǀgapi pristersis tsîna a ǁkhāǁkhāsa. (Heb. 5:8, 9) Jesub ǀkha sī nî ǂgaeǂgui khoen tsînab ge ge ǁkhāǁkhā xaweb ge nē sîsen-en ǁîna ra dī ǀgauba kō ga kō tama hâ. ǁÎb ǂâisan nî dī ǃkhaisab ge ǂgomǃgâ hâ.—J.ǂHa. 5:10.

6-7. Sida ǀhomsi ǁGûba xu da nau khoen ǀkha sîsen-e ǀgoragus xa tae-e ra ǁkhāǁkhāsen?

⁶ Sida ǀhomsi ǁGûb hîna khoe-i huiba ǂhâ tama hâb ge nau khoen ǀkha sîsen-e  ra ǀgoragu. O da kom sida tsîna ǁkhā xū-e nî dī o. Aiǁgause, omaris dana do? Tamas ka io ǀhaohâb ǃûi-ao do? Jehovab aiǁgausa sao re i nau khoena sîsen-e mā tsî ǁîna tā mâkhao. Jehovaba du ga ǁgae o i ge sîsen-e nî dī-e xawe du ge ǁnās ǂamai khoena nî ǁkhāǁkhā tsîn ge ǁîna harase nî tsâ. (Jes. 41:10) ǁNān hîna Jehovab xa ǀgaiba māhe hâna tae-e noxoba a ǁkhāǁkhāsen ǁkhā?

⁷ Elobmîs ge ra ǁgau Jehovab ge ǀhomǃgāgu di ǂâiǀgaub tsîna gere ǃgâsa. (1Gao. 22:19-22) ǁGûdo mati du Jehovab di aiǁgausa a ǁgae ǁkhā? ǀNî ǁaegu ai sadu ǀgôana dî re mati-i sîsen-e a dī-e ǁkhāsa. ǁÎn ǂâiǀgaub ga sîsen o ǁnāsa sao re.

8. Jehovaba Abrahammi tsî Saras ǀkha mati ge ǃnūǃnâxa i?

⁸ Jehovab a ǃnūǃnâxa ǃkhais ge ǁîb ǃgamǃgamsenxasiba ūhâsa ra ǁgau. Aiǁgauseb ge Jehovaba a ǃnūǃnâxa, ǁîba ra ǃoaba khoen ga ǃgôasib ǃnâ ǁîba dîna a dî o. Jehovab ge Abrahamma ge ǃgâ Sodoms tsî Gomoras nî hîkākāhe ǀgaub xab ǃgâibahe tama tib gere mî-o. (Gen. 18:22-33) Abrahammi taras Saras ǃoa-aib ge Jehovaba a tanisen ǀgaub xa ǂâi-oa re. ǁÎs kairasis ǃnâ ǀgôa-e nî hō tis ge mîbahe os ge ǁîsa a âi ob ge Jehovaba ǁîs ǀkha ge ǁaixa tama hâ i. (Gen. 18:10-14) Xaweb ge ǁÎba ǁîs ǀkha ǃgôasib ǃnâ ge ǃhoa.

9. ǁGûn tsî ǀhaohâb ǃûi-aoga Jehovab aiǁgausa xu tae-e a ǁkhāǁkhāsen ǁkhā?

⁹ ǁGûn tsî ǀhaohâb ǃûi-aogu tsîna Jehovab aiǁgausa xu tae-e a ǁkhāǁkhāsen ǁkhā? ǀGôa-i tamas ka io ǀhaohâb ǃnâ hâ khoe-i ga sats go dī mîǁguib ǀkhā ǂkhîǂâixa tama iots mati ra dī? ǃHaesets ǁî-i a tsū ǃkhaisa ǁî-e ra mîba? Tamas ka iots ǁî-i ra ǂâi ǀgauba ra ǁnâuǃā ǂgao? Omaridi tsî ǀhaohâgu ge kaise nî ǀama ǁnān hîna ǀgaiba ūhân ga Jehovab ǁîb ǀgaiba ra sîsen-ū ǀgauba a ǁgae-o. Nē-ao da ge Jehovab ǃgamǃgamsenxasib di aiǁgausa xu da a ǁkhāǁkhāsen ǁkhā xūna goro ǃhoaǃgao. Nēsisa da ge Elobmîs ǃnâ hâ aiǁgaude xu nî ǁkhāǁkhāsen mati da ǃgamǃgamsenxasiba nî ǁgausa.

10. Jehovaba nau khoen aiǁgaude xu mati ra ǁkhāǁkhā da?

¹⁰ Sida ‘ǁkhāǁkhā-aob’ Jehovab ge aiǁgaude ra mā da Elobmîs ǃnâ îda ǁnāpa xu ǁkhāǁkhāsen. (Jes. 30:20, 21) ǃGamǃgamsenxasib tsî nau ǀgaugu hîna Eloba a ǃgâibaga ūhâ khoen hîna Elobmîs ǃnâ hân di aiǁgaude ǂâiǃgâsa xu da ge ra ǁkhāǁkhāsen. Nē ǀgauga ge ūhâ tama hâ i khoen ǀkha ge ī xūna ǂâiǃgâsa xus tsîna da ge ra ǁkhāǁkhāsen.—Psa. 37:37; 1Kor. 10:11.

11. Sauli ǁgai aiǁgausa xu da tae-e a ǁkhāǁkhāsen ǁkhā?

¹¹ ǂÂiǃgâ re Gao-aob Sauli ǀkha i ge tae-e a ī sa. ǃGamǃgamsen hâ ǂkhamkhoeb aseb ge ge ǂgaeǂgui tsoatsoa. ǁÎb di ǃnubusigab ge ǃamkuse ge ǂan i tsîb ge ǃnāsa sîsen-e ge ūǃoa ǂgao tama hâ i. (1Sam. 9:21; 10:20-22) Xaweb ge ēga ge ǀgapiǂâixa tsoatsoa tsî mā-amhe tamab hâ xūna ge dī. Gao-ao kaib ges khaoǃgâb ge nē ǁgai ǂūb ǀkha ge tsoatsoa. ǀGui ǁae-i aib ge kēbo-aob Samuela ge ǃâuǁkhui. Jehovab ǁîb khoena nî huisa ǂgomǃgâs ǃâs ǃnâb ge ǁîba khau ǁguibas hînab mā-amhe tama hâsa ge dī. ǁNā-amagab ge Saula Jehovab mā-amsa ge ǂoaǃnâ tsî ega gaosis tsîna ge ūǀhana-e. (1Sam. 13:8-14) Nē ǁgai aiǁgausa xu ǁkhāǁkhāsen tsîda ge mā-amhe tama da hâ xūna tā nî dī.

12. Daniela tae-i ǃaroma ge ǃgâi aiǁgau-i?

 ¹² Kēbo-aob Danieli hîna ge Sauli khami ī tama îb di aiǁgausa kō re. Danieli ge ǁîb ûib hoaba ǃgamǃgamsenxasiba ge ūhâ-i tsî ǃnās hoasa Jehovaba gere ǂgan îb daoǁgauhe. Aiǁgauseb ge Jehovab xa hui-e tsî Nebukadnesari ǁhaposa a ǁguiǃā ob ge Daniela aitsamaba xub ge dī ti ge mî tama hâ i. ǁÎb ge hoa ǂkhaisiba Jehovaba ge mā. (Dan. 2:26-28) Tae-e da nēpa xu ra ǁkhāǁkhāsen? ǃGâsan ga sida ra mā ǃhoadi xa a ǃgâibahe tamas ka io da ga aoǁnâ sîsen-i ǃnâ a ǃgâi o, o da ge Jehovaba ǂkhaisiba māsa ǂâis ǃnâ nî ūhâ. ǂÂis ǃnâ da ge nî ūhâ nēn hoana da Jehovab huib ose ga dī hō tama hâsa. (Fil. 4:13) Nēti da ga dī o da ge Jesub di ǃgâi aiǁgausa ra ǁgae. Mati iosa ǁnāsa?

13. Jesub di mîdi hîna Johaneb 5:19, 30 ǃnâ hâde xu da tae-e ǃgamǃgamsenxasib xa ra ǁkhāǁkhāsen?

¹³ Dī ǀoaǀoasa kurusab ge ūhâ i xaweb ge Jesuba hoaǁae Jehovab ai gere ǂgomaiǂnûi. (Khomai re Johaneb 5:19, 30) ǁÎb ge tātsēs tsîna ǁîb ǀhōmsi ǁGûb di ǃharosa ge ū ǂgao tama hâ i. Filipeǁîn 2:6 ge ra mî: Jesub ge “Elob īsib ǃnâb hâ xawe ǁkhâuǁnâbasense Elob ǀkha ǀguiti-īsa ǃgôa tama” isa. ǃGamǃgamsen hâ ǀgôab aseb ge Jesuba ǁîb di ǃnubusina ge ǂan i tsî ǁîb ǁGûb ūhâ ǀgaiba gere ǃgôaǃgâ.

14. Mā-amhe tamab hâ xū-eb ge ǂganhe, ob ge Jesuba mati ǃeream?

¹⁴ Jakobub, Johaneb tsî ǁîkha mas tsîn ge Jesuba dī ǁoab a xū-e a ǂgan ob ge dī xū-i xa ǂâire. Îganǀgē tamaseb ge Jesuba ǁîna ge mîba ǁîb ǀhomsi ǁGûb ǀguib a mî ǁkhāsa tai-i ǁîb amǀkhāb tsî ǁareǀkhāb ai Gaosib ǃnâ nî ǂnûsa. (Mat. 20:20-23) Jesub ge ge ǁgau ǁîb ǃnubusigab a ǂansa. ǁÎb ge ǃgamǃgamsenxasiba ge ūhâ i. Jehovab xab dī kaihe tama hâ xū-eb ge ǁîba tātsē ge dī tama hâ i. (Jhn. 12:49) Mati da Jesub ge mā da ǃgâi aiǁgausa a ǁgae ǁkhā?

15-16. 1 Korinteǁîn 4:6 ǃnâ hâ ǁnamasa da mati nî sîsen-ū?

¹⁵ ǂGuro Korinteǁîn 4:6 ǃnâ hâ ǁnamasa da ga sîsen-ū o, o da ge Jesub aiǁgaus ǃgamǃgamsenxasib disa ra ǁgae. ǁNāpa da ge ra mîba-e: “Xoahe hâs ǂamai du ūhâsen tide.” ǁNā-amaga da ge khoe-e da ga ǀawemā-o sida ra ǂâi xūn ǀguin nî dīhesa tā nî ǂhâba. Tamas ka io da ge tā ǂâi tamase nî ǃhoa. Xawe da ge Elobmîs tsî  sida ǂkhinin hîna Elobmîs ai a ǃgaoǃgaosan ǃnâ hâ ǁnamasa ǃoa khoe-e nî ǁnaeǁgau. Nēsa da ga dī o da ge ǃnubusiga da ūhâsa ra ǂanǃgâ. ǁNās ǀkha da ge ǃgamǃgamsen tsî Jehovab ra mā da ǁnamas hoaǁae sida dis xa a ǂhanusa ra ǁgau.—J.ǂHa. 15:3, 4.

¹⁶ Jehovaba ǃgôasiba māsa hâ tsî ī ge ǀkhara ǃaromadi tsîna hâ ǃgamǃgamsenxasib a ǂhâǂhâsa ǃkhaisa ra ǁgaude. Nēsisa da ge nî kō ǃgamǃgamsenxasib mati ǂkhîba mā da tsî nau khoen ǀkha sîsen ǀhaos ǀkha nî huidasa.

17. ǃGamǃgamsenxasiba ūhâ tsî ǀnî xūnan a dī ǁoa ǃkhaisa ra ǂanǃgâ khoena mati io a ǂkhî?

¹⁷ ǃGamǃgamsen tsîda ga ǀnî xūna dī sa da mā-amhe tama hâ ǃkhaisa ǂanǃgâ o, o da ge nî ǂkhî. Tae-i ǃaroma? ǀNî xūna dīsa da mā-amhe tama hâ ǃkhaisa da ga ǂanǃgâ tsî da ga nau khoen xa a hui-e o, da ge kaise nî gangan. Aiǁgause, Jesub ge 10 ǃomamaxa khoega a ǂgauǂgau ǁaeb xa ǂâi re. ǁNā ǁgaora ǀaeba xub aitsama ǂgauǂgausen hō tide ǃkhaisab ge ǂanǃgâ amagab ge ǀgui khoeba oaǀkhī tsî Jesuba ge gangan ǂgauǂgaubib ge o. Nē ǃgamǃgamsenxa khoeb ge hōb ge huiba kaise ge gangan tsî Eloba koasa ge mā.—Luk. 17:11-19.

18. ǃGamǃgamsen tsî ǀnî xūnan a dī ǁoasa ra mûǂan khoena tae-i ǃaroma nau khoen ǀkha ǃgâise ra sîsen ǀhao? (Romeǁîn 12:10)

¹⁸ ǃGamǃgamsenxasiba ūhâ khoen ge nau khoen ǀkha ǃgâise ra sîsen ǀhao tsî ǃgâi ǀhōsana ūhâ. Tae-i ǃaroma? ǁÎn ge nau khoen ǃgâi ǀgauga ūhâsa ra ǂanǃgâ tsî nē khoenan ǂgomǃgâ hâsa ra ǁgau. ǃGamǃgamsen tsî ǀnî xūnan a dī ǁoasa ra mûǂan khoen ge nau khoen ga ǃgâisen sîsen-e ra dī amaga a koahe o a ǂkhî tsîn  ge ǁîna supuse nē khoena koa tsî ra ǃgôa.—Khomai re Romeǁîn 12:10.

19. Tae-i ǃaroma da ǀgapiǂâixasiba xu nî ǂgōsen?

¹⁹ ǀGopeǀnōts gara-on ge ǀgapiǂâixa khoena nau khoena harase koa tama hâ, ǁîn nî koahesan ra ǂhâba amaga. ǁÎn ge nau khoen ǀkha ra ǀnōsen tsî ǁîn ǀguina dan hâse ra hâ ǂgao. Nau khoenan nî ǁkhāǁkhās ǃâs ǃnân ge ǀgapiǂâixa khoena mâ xū i hoa-e aitsama ra dī ǂgao. ǁÎn ga ǁnā xū-e dī, o ǀgui-i ǂhanuse nî dîhe tin ta ǂâi amaga. ǀGapiǂâixa khoe-i ge nau khoe-i xa ǂhâǂhâsase ra mûsen ǂgao tsî nau khoe-i ga ǃgâise xū-e dī o ra suri. (Gal. 5:26) Nēti i khoen ge ǀgū ǀhōsa-e ūhâ tama hâ. ǀGapiǂâixasib di ǃgomsiba da ūhâsa da ga hōǃâ o da ge ǂgaoba xu Jehovaba ǀgore tsî nî ǂgan îb sida ‘ǂâisa ǀkharaǀkharas’ ǀkha huida îb nē ǁgai ǀgauba tā sida ǃnâ ǃnomaǃkhō.—Rom. 12:2.

20. Tae-i ǃaroma da ǃgamǃgamsen tsî ǀnî xūna da a dīǁoasa nî mûǂan?

²⁰ Jehovab ge māda aiǁgausa da ge kaise ra gangan. ǁÎb ǃgamǃgamsenxasiba da ge ǁîb ǃoaba-aon ǀkhab ra hâ ǀgaub ai ra mû tsî da ge ǁîba ra ǁgae ǂgao. ǁNās xōǀkhā da ge ǃgamǃgamsenxasib ǀkha ge Eloba gere ǃoaba khoen di aiǁgaudi hîna Elobmîs ǃnâ hâde ra ǁgae ǂgao. Ada hoaǁae Jehovaba koas tsî kares hînab anu hâsa mā re. (J.ǂHa. 4:11) Nē xūn hoana da ga dī o da ge ǀamosib kōse Jehovab ǀkha ǀhōsagusisa nî ūhâ. ǁÎb ǃgamǃgamsen tsî ǀnî xūnan a dī ǁoa ǃkhaisa ra ǂanǃgâ khoena a ǀnam amaga.