1. ¿Tlenon okijto David itech Jehová?

¿YEMELAK uelis tikijtoskej ika Jehová yolyemanki? Kema, pampa David okijto: “Tinechmaka motepostlatsakuilil yejuan ika tikmanauiya nonemilis. Moteiknelilis [noso ‘moyolyemanilis’, TNM] yonechtiochiu” (2 Sam. 22:36; Sal. 18:35). Ijkuak David okijto yejuin, kanaj tlanemilijtoya itech yejon tonajli ijkuak teotlajtoketl Samuel oyaj ichan itaj niman ijkon kitlapejpeniskia akin nochiuaskia tekiuaj ipan Israel. David kinpiaya chikome ikniuan, niman yejua akin xokoyotl katka, maski ijkon, Jehová okitlapejpeni makitekipatla tekiuaj Saúl (1 Sam. 16:1, 10-13).

2. ¿Itech tlenon titlajtoskej ipan yejuin tlamachtijli?

² David noijki ijkon tlanemiliaya ken se salmista akin okijkuilo: “Yejua [Jehová] uajnopachoua para uajtlacha ipan cielo niman ipan tlaltikpaktli. ToTEKO kixtia on mayanki kampa sanoyej tlajyouiya, [...] niman kintlalia kampa yejyeuatokej on yejuan uejueyixtokej” (Sal. 113:6-8). Ipan yejuin tlamachtijli, tikitaskej kenon Jehová okiteititi yolyemanilistli niman tlenon tiuelij itech yejon. Sakin, tikitaskej tlen okichiuj tekiuaj Saúl, teotlajtoketl Daniel niman Jesús.

3. ¿Kenon techita Jehová, niman tlenon techititia yejon itech yejua?

³ Jehová yemelak yolyemanki. Maski titlajtlakolejkej, yejua techkauilia matikueyichiuakan. San ika, xsan yejon, noijki  techita ken iamigos (Sal. 25:14). Tejuamej ueli iuan touikaj pampa yejua okitemakak iKonetsin niman ijkon techtlapopoluis totlajtlakoluan. ¡Kuajli nesi ika Jehová techiknelia!

4. ¿Tlenon techkauilia Jehová matikchiuakan, niman tleka ijkon kichiua?

⁴ Matikitakan okse tlemach tlen kiteititia ika Jehová yolyemanki. Ijkuak Jehová otexchijchiuj, yejua ueliskia kichiuas maka matiuelikan matiktlapejpenikan tlenon tikchiuaskej ipan tonemilis. San ika, xijkon okichiuj. Otexchijchiuj ijkon ken yejua niman otechkauili matiktlapejpenikan tlenon tikchiuaskej. Maski tejuamej xtiuejueyixtokej ijkon ken yejua, kineki matiktekichiuilikan pampa tiktlasojtlaj niman pampa tikmatstokej ika kuajli tinemiskej tla tiktlakamatij (Deut. 10:12; Is. 48:17, 18). ¡Melak tiktlasojkamatij ika Jehová yolyemanki!

5. ¿Kenon Jehová techititia matiyolyemankej? (Xkita tlaixkopinajli tlen onka ixpan yejuin revista).

⁵ Jehová techititia kenon noneki tiyolyemankej yeskej. Pampa maski yejua akin más tlamachilise ipan nochi universo, kinektika kichiuas tlen kijliaj oksekimej. San matikonnemilikan yejuin, yejua okikauili iKonetsin iuan makichijchiua nochi tlen onka (Prov. 8:27-30; Col. 1:15, 16). Niman maski yejua nochi ueli kichiua, kinpanoltilia tekitl oksekimej. Jehová okitlapejpeni Jesús ken Tekiuaj itech iTekiuajyo niman noijki kinkauilis on 144,000 tlapejpeniltin iuan matekiuajtikan (Luc. 12:32). Melauak, yejua okimajmachti Jesús kenon kichiuas itekiyo ken Tekiuaj niman ken Ueyi Teopixki (Heb. 5:8, 9). Niman noijki kinmajmachtia akin tekiuajtiskej iuan iKoneuj, san ika, ijkuak yakaj kimaka se tekitl, xsa kitstika kenon kichiua itekiyo, pampa yejua itech tlaneltoka (Apoc. 5:10).

6, 7. ¿Tlenon uelis nomachtiskej itech toTajtsin iluikakchane nochimej akin tlayekanaj?

 ⁶ Tla toTajtsin iluikakchane kitepanoltilia seki tekitl maski yejua xnoneki makipaleuikan, tejuamej noijki noneki ijkon tikchiuaskej. ¿Kenon akin kinyekanaj inchanejkauan niman tlayekankej ipan tlanechikojli uelis kichiuaskej ijkon ken Jehová? Tla kinpanoltiliaj oksekimej seki tekitl niman tla xsa kitstokej tla kema kuajli kichiujtokej intekiyo. Ijkon, xsan kuajli nochiuas on tekitl, noijki kinmajmachtiskej niman kinpaleuiskej oksekimej makitakan ika kema uelis kuajli kichiuaskej intekiyo (Is. 41:10). ¿Tlenon más uelis nomachtiskej itech Jehová nochimej akin tlayekanaj?

⁷ Biblia kiteititia ika Jehová kipatiojkaita tlen kinemiliaj iluikaktekitkej (1 Rey. 22:19-22). ¿Kenon tajtin noijki uelis ijkon kichiuaskej? Ijkuak nonekis, yejuamej uelis kintlajtoltiskej inkoneuan kenon kinemiliaj noneki manochiua se tekitl. Niman tla ueli, makichiuakan tlen kimijliaj.

8. ¿Kenon Jehová okimijyoui Abrahán niman Sara?

⁸ Jehová noijki kiteititia ika yolyemanki pampa teijyouiya. Yejua kimijyouiya itekipanojkauan ijkuak xkasikamatij tlen kineki kichiuas. Matikilnamikikan kenon kuajli okikak Abrahán ijkuak okijli ika xkasikamatiya tleka kinekiya kipopolos Sodoma niman Gomorra (Gén. 18:22-33). Niman maka matikilkauakan tlenon okichiuj ijkuak isiuauj Abrahán, Sara, ouetskak ijkuak okikak ika kipiyaskia se ikoneuj maski ilamajtsin katka. Yejua xonoyolkoko niman xokualan, yej okiteititi ika kitlakaitaya (Gén. 18:10-14).

9. ¿Kenon tlen kichiua Jehová uelis kinpaleuis tajtin niman tlayekankej?

⁹ Tla tejua titajtli noso titlayekanketl ipan se tlanechikojli, ¿kenon uelis mitspaleuis tlen kichiua Jehová? Xnemili tlenon tikchiua ijkuak yakaj akin tikyekana xkuelita tlen tiktlajtlanilia makichiua. ¿Nimantsin tikneki tikyektlalis? ¿Noso tikyejyekoua tikasikamatis tlenon kinemilia? Kuajli nesi ika, tla tajtin noso tlayekankej kichiuaj ijkon ken toTajtsin, familias niman tlanechikoltin kuajli nemiskej. Hasta nikan, yotikitakej kenon Jehová techititia matiyolyemankej. Aman matikitakan tlen sekimej itekipanojkauan Jehová okichiujkej yeuejkaui niman matikitakan tleka tikijtouaj ika melak kuajli tla tikasikamatij ika xnochi ueli tikchiuaj.

10. ¿Kenon techmachtia Jehová?

¹⁰ Pampa Jehová toUeyi Tlamachtijkauj, okichiuj ika ipan iTlajtol manoijkuilo tlen techpaleuis (Is. 30:20, 21). Tejuamej miyek tlen tiuelij itech itekipanojkauan toTajtsin. Matikitakan kenon okisatoj akin kasikamatiyaj ika xnochi ueliyaj kichiuayaj niman kenon okisatoj akin xijkon okichiujkej (Sal. 37:37; 1 Cor. 10:11).

11. ¿Tlenon tiuelij itech tlen xkuajli okichiuj Saúl?

¹¹ Matitlanemilikan itech tlen ipan onochiuj tekiuaj Saúl. Ijkuak telpochtli katka, kimatstoya ika xnochi ueliya kichiuaya, hasta ouijtika okitak kiselis okseki tekitl (1 Sam. 9:21; 10:20-22). San ika, ijkuak yokitlalijkaj ken tekiuaj, yejua opeuj noueyimati niman okichiuj seki tlemach tlen xkinamikiya kichiuas. Se tonajli, onosiaujkauj pampa teotlajtoketl Samuel xnimantsin oajsik kampa yejua nemiya. Saúl okinemili ika ueliskia nochi kichiuas niman xokineltokak ika Jehová kipaleuiskia ikalpan, yejua ika, otlauentlali, maski xyejua kinamikiya kichiuas. Ipampa yejon, Jehová xok okiseli niman sakin okikuili itekiuajyo (1 Sam. 13:8-14). Yejuin techititia ika xnoneki tikchiuaskej tlen xtechnamiki.

12. ¿Kenon Daniel okiteititi ika kasikamatiya ika xnochi ueliya kichiuaya?

 ¹² Teotlajtoketl Daniel xokichiuj ijkon ken tekiuaj Saúl. Daniel nochipa yolyemanki katka niman kasikamatiya ika nonekiya makipaleui toTajtsin. San matikonnemilikan tlenon okichiuj ijkuak toTajtsin okitekitilti niman ijkon makijli Nabucodonosor tlen kijtosnekiya itemik. Daniel xokijto tla okasikamat yejon temiktli pampa melak tlamachilise, yej okiteijli ika Jehová okasikamachiltijka (Dan. 2:26-28). Yejuin techititia ika, tla melak kuajli tikinpanoltiaj tlamachtiltin ipan tlanechikoltin noso tla melak kuajli ken titenojnotsaj, noneki tiyolyemankej yeskej niman san Jehová tikueyiteneuaskej. Matikilnamikikan ika xuelis itlaj tikchiuaskej tla xyejua techpaleuiya (Filip. 4:13, TNM). Tla tikchiuaj yejuin, noijki tikchiujtoskej ijkon ken Jesús. ¿Tleka ijkon tikijtouaj?

13. Itech tlen kijtoua Juan 5:19, 30, ¿tlenon tiuelij itech Jesús?

¹³ Maski Jesús xtlajtlakole katka pampa iKoneuj toTajtsin, yejua nochipa otlaneltokak itech Jehová (xpoua Juan 5:19, 30). Xkeman okinemili tla kikuilis iTekiuajyo iTajtsin. Ipan Filipenses 2:6 itech Traducción del Nuevo Mundo kijtoua ika Jesús “xokinemili kikuilis toTajtsin tlen kinamiki kipiyas nion nochiuas ijkon ken yejua”. Jesús kasikamatiya hasta kanon kinamikiya tlayekanas, kitlakaitaya tlen kinauatiaya iTajtsin niman kitlakamatiya.

14. ¿Tlenon okichiuj Jesús ijkuak okitlajtlanilijkej makichiua itlaj tlen yejua xkinamikiya kichiuas?

¹⁴ Matitlanemilikan itech tlen okichiuj Jesús ijkuak Santiago niman Juan iuan innan okitlajtlanilijkej: “Xtlanauati para ne kampa titlamandaros yejuamej in notlajsojkakoneuan se ma notlali moyekmakopa niman okse ipan moopochmakopa”. Jesús nimantsin okijto ika yejon san iTajtsin kinamikiya kijtos (Mat. 20:20-23). Ijkon okiteititi ika kasikamatiya ika onka seki tlemach tlen xkinamiki kichiuas. Yejua xonoueyimat niman xkeman okichiuj itlaj tlen Jehová xkinauatiaya (Juan 12:49). ¿Kenon uelis tikchiuaskej ijkon ken okichiuj Jesús?

15, 16. ¿Kenon uelis tikchiuaskej tlen kijtoua 1 Corintios 4:6?

¹⁵ Tejuamej tikchiuaj ijkon ken Jesús ijkuak tiktlakamatij tlen kijtoua 1 Corintios 4:6. Itech Traducción del Nuevo Mundo, yejuin tlaxelojli kijtoua: “Maka xchiuakan okseki tlemach  tlen xok ijkuiliujtok”. Ika yejon, ijkuak yakaj techtlajtlanilis matikpaleuikan, maka matikijlikan tlen san tejuamej tiknemiliaj noso san tlen ijkuakon tikuajnemilijtiuetsiskej. Yej matikititikan tlen kijtoua Biblia niman toamatlajkuiloluan. Ijkon tikteititiskej ika xtoueyimatij, ika tikasikamatij ika xnochi ueli tikchiuaj niman ika itlanauatiluan Jehová nochipa más tepaleuijkej xijkon ken tlen tejuamej tikijtouaj (Apoc. 15:3, 4).

¹⁶ Ijkon ken yotikitakej, tejuamej tikueyichiuaj Jehová ijkuak tiyolyemankej niman ijkuak tikasikamatij ika xnochi ueli tikchiuaj. Aman tikitaskej ika nochi yejuin noijki uelis techpaleuis matiyolpakikan niman kuajli matouikakan imiuan oksekimej.

17. ¿Tleka yolpakij akin yolyemankej?

¹⁷ Tla tiyolyemankej niman tla tikasikamatij ika xnochi ueli tikchiuaj, más ika toyojlo tinemiskej. ¿Tleka? Pampa ijkuak tikasikamatij ika xnochi ueli tikchiuaj, más tiktlasojkamatij ijkuak yakaj kineki techpaleuis. Matikilnamikikan tlenon opanok ijkuak Jesús okinpajti majtlaktli tlakamej akin kipiayaj lepra. San se ouajnokuep niman ijkon okitlasojkamachilito Jesús pampa okipajti itech yejon xkuajli kokolistli. Yejuin yolyemanki tlakatl kuajli kimatiya ika iselti xueliskia pajtiskia, ika yejon, melak okitlasojkamat tlen okichiujkej ipampa niman okiueyichiuj toTajtsin (Luc. 17:11-19).

18. ¿Tleka tikijtouaj ika akin yolyemankej más kuajli nouikaj imiuan oksekimej? (Romanos 12:10).

¹⁸ Akin yolyemankej niman akin kasikamatij ika xnochi ueli kichiuaj más kuajli nouikaj imiuan oksekimej niman kipiyaj kuajli amigos. ¿Tleka? Pampa kitaj ika oksekimej uelij kichiuaj itlaj tlen yejuamej xuelij, niman intech tlaneltokaj.  Niman yolpakij ijkuak kitaj ika oksekimej melak kuajli kitekichiuilijtokej Jehová. Ipampa yejon, kimijliaj ika kuajli tlen kichiuaj niman kintlakaitaj (xpoua Romanos 12:10).

19. ¿Tleka xkipiya ika toueyimatiskej?

¹⁹ San ika, akin noueyimatij melak ouijtika kitaj kimijliskej oksekimej tlen kuajli kichiuaj, niman kinekij ika san yejuamej makimijlikan tlen kuajli kichiuaj. San kitstokej tlenon kichiuaj oksekimej niman ijkon imiuan notlatlaniskej. Yejuamej xkuelitaj kinmachtiskej oksekimej nion kitepanoltiliskej tekitl, pampa kinemiliaj ika san yejuamej kuajli kichiuaj se tekitl. Noijki, san kinekij makinueyiteneuakan niman melak tenexikolitaj (Gál. 5:26). Niman san achijtsitsintin amigos kinpiyaj. Kuakon, tla tikmachiliaj ika toueyimatisnekij, matiktlajtlanilikan Jehová matechpaleui maka sa ijkon matikchiuakan (Rom. 12:2).

20. ¿Tleka noneki tiyolyemankej yeskej?

²⁰ Melak tiktlasojkamatij ika Jehová techititia kenon tiyolyemankej yeskej. Ueli tikitaj ika Jehová yolyemanki pampa maski titlajtlakolejkej touan nouika. Noijki tiknekij tikchiuaskej ijkon ken itekipanojkauan toTajtsin akin okiyolpaktijkej. Nochipa matiktlakaitakan niman matikueyichiuakan Jehová ijkon ken kinamiki (Apoc. 4:11). Ijkon, noijki tikyolpaktiskej toTajtsin, akin kintlasojtla akin yolyemankej niman kasikamati ika xnochi ueli tikchiuaj.