1. Ni kyahi kyo kikakanganaya ngoko Yehova akayikehaya?

KWENENE Yehova akanayikehaya kwehi? Ingaa. Dawidi mwahandika ati: “Kandi wabirimba erilamia ry’engabo yawe. N’eriwatikya lyawe, eriyikehya lyawe lyabirinyiyira mo mukulu.” (2 Sam. 22:36; Esy. 18:35, NWT) Alinga Dawidi abya akalengekania oko mughulu omuminyereri Samweli ahika omo nyumba ya tata wiwe akasyahira amaghuta oko yukandibya mwami we Israeli omo biro ebikasa. Oko balwana munane ba Yese, Dawidi yo wabya mulere, aliwe iye yo Yehova asombola eribya mwami omo mwanya w’oMwami Sauli.​—1 Sam. 16:1, 10-13.

2. Tukandikania okuki omo mwatsi ono?

² Alinga Dawidi angalighirene n’oghundi mwimbi w’esyonyimbo, oyuwabugha atya oko Yehova: “Nikwa akunama, erilangira olubula n’ekihugho. Akasumba abera oko lututu, akasumba ab’obwagha oko malighe wabo, akahirabo omo balikyabo abanya-mwami. . . .” (Esy. 113:6-8) Omo mwatsi ono, eky’erimbere, tukandilangira ngoko Yehova mwakangania omubere w’eriyikehya, n’esyosomo silebe esyomughaso esyo omwatsi ono akatw’ighisaya. Ekyakabiri, tukend’igha emyatsi mingyi oko mubere w’eriyikehya tukakania oko ky’erileberyako ky’omwami Sauli, omuminyereri Danieli na Yesu.

3. Yehova akakolera ati abaghombe biwe n’ekyo kikakanganayaki?

³ Ngoko Yehova akakolera abaghombe biwe abatahikene kikakanganaya ngoko ni Mungu oyukayikehaya. Syaliligha eriramia lyetu lisa, aliwe kandi akatulangira mo bira biwe. (Esy. 25:14) Kusudi obwira obo butokekane, Yehova mwaherera omwana wiwe busana n’amalolo wetu. Ekyo kikakanganaya ngoko Yehova nimughanyiri kandi akayihira omo mwanya w’abandi.

4. Yehova mwatuhaki, kandi busanaki?

 ⁴ Telisyalengekania oko mwatsi ono owakakanganaya eriyikehya lya Yehova. Kundi iye yo Muhangiki wetu, Yehova abya n’obutoki bweritubumba isitwangayisombolera omwatsi ghosi-ghosi omo ngebe yetu. Aliwe mwatakola atya! Mwatubumba omo kisosekano kiwe, kandi mwatuha obwiranda bw’eriyisombolera. Anzire itwe bandu b’olututu itwamukolera erilwa oko mutima kusangwa tumwanzire, kandi itunasi ngoko ekyo kikatuletera endundi. (Ebr. 10:12; Isa. 48:17, 18) Tukasima kutsibu ngoko Yehova akakanganaya omubere w’eriyikehya.

5. Yehova akatukangiriraya ati omubere w’eriyikehya? (Lebaya epitsa eyiri oko kijalada.)

⁵ Enzira eyo Yehova akatukoleramo, yikakanganaya ngoko anzire eritukangirirya omubere w’eriyikehya. Yehova yo mundu wamenge kulenga abandu bosi omo kihugho. Aliwe akanaligha amalengekania w’abandi. Eky’erileberyako, Yehova mwaligha omwana wiwe erimuwatikya eribumba ebindu byosi. (Emi. 8:27-30; Kol. 1:15, 16) Kandi n’omwane mutoki w’ebyosi, syaliyighangira emibírí. Eky’erileberyako, Yehova abirisombola Yesu mo mwami. Kandi abiriha abandu 144 000 b’ehamuli y’eritabala na Yesu. (Luka 12:32) Oko kwenene, Yehova mwabegherya Yesu eribya Mwami kandi Muhereri Mukulu. (Ebr. 5:8, 9) Kandi anamubegherya abakasyatabala na Yesu omo mubírí wabo. Aliwe, syalibatondogholera obuli mwatsi ogho bangakola omo mubírí wabo. Omo mwanya w’erikola atya, akayiketerabo, inyanasi ngoko bakendikola erisonda riwe.​—Erib. 5:10.

6-7. Tata wetu w’elubula syaliyighangira emibírí, ekyo kyamatw’ighisyaki?

⁶ Tata wetu w’elubula oyutalaghire oko buwatikya b’omundu ghosi-ghosi, amabya isyaliyighangira emibírí, simulangire netu ngoko tutolere itwakola tutya! Uli  mutwe w’ekihanda, kutse musyakulu w’endeko? Kyamabya iko kiri kitya, ukwame eky’erileberyako kya Yehova, ubye ukaha abandi b’emibírí, kandi isiwabya ukakwamirira obuli katsi oko bakakola. Omughulu tukigha Yehova yo tutya, omubírí syalikoleka lisa, aliwe kandi tukabya itwamabibegherya abandi erikola omubírí. (Isa. 41:10) Ni kindi kyahi ekyo abawite ehamuli bang’igha oko Yehova?

⁷ EBiblia yikakanganaya ngoko Yehova akanasonda eriminya amalengekania w’abamalaika biwe. (1 Abam. 22:19-22) Babuti, mwangigha muti eky’erileberyako kya Yehova? Omughulu owatolere, saba omwana wawu amalengekania wiwe oko mubírí mulebe ogho mukasonda erikola. N’eryo amaleta amalengekania aw’uwene, imwakwamagho.

8. Yehova mwakangania ati Abrahamu na Sara b’omutima w’erilindirira?

⁸ Eyindi nzira eyo Yehova akakanganayamo ngoko akayikehaya, ry’eribya n’omutima w’erilindirira. Eky’erileberyako, Yehova syalikapikira omughulu abaghombe biwe bakatika-tikira eriyisogha liwe. Yehova mwatakapikira omughulu Abrahamu amubwira ati iye amalangira nga siritolere eritoghotia e Sodomo ne Gomora. (Enz. 18:22-33) Kandi, w’ibuke ngoko Yehova akolera Sara mukali wa Abrahamu, mwatakapikira omughulu Sara aseka abimubwira ati akendiheka obukule omo bukekulu bwiwe. Omo mwanya w’erikapikira mwakolera Sara n’olukogho. (Enz. 18:10-14).

9. Babuti n’inywe b’asiakulu b’endeko mwamighaki oko ky’erileberyako kya Yehova?

⁹ Inywe babuti n’abasyakulu b’endeko mwang’ighaki oko ky’erileberyako kya Yehova? Ukakolaki omughulu abana baghu kutse abandu balebe omo ndeko baka tika-tikira eriyisogha lyaghu? Ukanalu wasonda eriyilwirako? Kutse ukanasonda erihulikirira amalengekania wabo? Omughulu abawite ehamuli bakakolesaya eky’erileberyako kya Yehova, endeko yikabana endundi. Twamabilangira ekyo twang’igha oko mubere wa Yehova w’eriyikehya,neryo muleke tulebaye eby’erileberyako by’eBiblia e bikatwighisaya.

10. Yehova akakolesaya ati eby’erileberyako byabandi eritukangirirya?

¹⁰ Kundi yo “Mukangirirya wetu mukulu,” Yehova akatukangiriraya erilabira eby’erileberyako ebiri omo kinywa kiwe. (Isa. 30:20, 21) Tukigha omoghulu tukasoma omo Biblia emyatsi eyikakanaya oko bandu abakanganaya emibere eyikatsemesaya Yehova ng’omubere oweriyiminya lulengo. Kandi tukigha omughulu tukalengekanaya, oko byahikira abatakanganaya emibere eyuwene ng’eyo.​—Esy. 37:37; 1 Kor. 10:11.

11. Eky’erileberyako ekituwene kya Saulo kyamatwighisyaki?

¹¹ Telilengekania ekyahikira omwami Sauli. Oko nzuko abya inimulwana oyukayikehaya. Omughulu abya mulwana inyayasi lulengo. Nibya mwasagha omughulu bamusombola eribya mwami. (1 Sam. 9:21; 10:20-22) Aliwe, endambi muyahika amatsuka eriyiheka. Mwatsuka erikolatya habilaba ebiro bike abibya mwami. Kiro kighuma omuhereri Samweli abere abitselewa, omwami Saulo mwabya mw’epaku- paku. Omo mwanya w’eriyiketera Yehova erilamya abandu, Saulo mwakola eky’atabya ahamulirwe erikola mwaherera obuhere bw’eryokererya. Busana n’ekyo Yehova mwapona Saulo n’okonduli mwaherya obwami bwiwe. (1 Sam. 13:8-14) Twangabya b’amenge twamabilengekania oko ky’erileberyako e kikakunga eki n’erighana erikola ekyotutahamulirwe erikola.

12. Busanaki Danieli abya eky’erileberyako eky’uwene?

 ¹² Omuminyereri Danieli iye niky’erileberyako ekyuwene syabya nga Saulo. Omongebe yiwe yosi, Danieli abya mughombe wa Yehova oyukayikehaya kandi oyuyasi lulengo oyuwabya akasondia obusondoli bwa Yehova. Eky’erileberyako mwatayipipa omughulu Yehova amukolesaya erikumbulira Nebukadnezare y’esyonzoli siwe. Aliwe omwiyikehya, mwaha olukengerwa losi lo Yehova. (Dan. 2:26-28) Ekyo kyamatwighisyaki? Abaghala betu bamabya bakatsemera emikania yetu kutse twamabya itukakola ndeke omo mubírí w’eritulira, litolere itwaha olukengerwa losi lo Yehova. Litolere itwaminya ngoko sitwangatoka erikola emyatsi butsira buwatikya bwa Yehova. (Flp. 4:13) Twamakola tutya tukabya itukigha ekindi ky’erileberyako kyuwene kya Yesu. Tuti?

13. Ebinywa ebiri omo Yoane 5:19, 30 bikatwighisayaki oko Yesu?

¹³ Nomo anabya mughala w’oMungu oyuhika hikene, Yesu mwayiketere Yehova mughulu w’osi. (Soma Yoane 5:19, 30.) Syalyatasondia erimya omwanya wa Tata wiwe w’elubula. Erisako ry’Abanya Filipi 2:6 rikatubwira ritya oko Yesu: ‘Oyo nomo anabya n’omubiri w’oMungu mwataghanza erilingirirana n’oMungu nga kindu ky’erihamba kutsibu.’ Ng’omwana oyukowa, Yesu mwayiminya lulengo kandi mwasikya ehamuli ya Tata wiwe.

14. Omughulu bamusaba omwatsi owatahamulirwe erikola Yesu mwasubirya ati?

¹⁴ Lengekanaya oko ky’oYesu akola omughulu Yoane, Yakobo na mama wabo, bamuhikira n’erimusaba bati akolerebo omwatsi ow’atabya ahamulirwe erikola. Yesu mwalunyababwira ati, Tata wiwe yoyuwite ehamuli y’eribugha nga nindi y’oyukasyabya oko byala biwe byamali kutse eby’amalembe omo Bwami. (Mat. 20:20-23) Yesu mwakangania ngoko syalyatakola emyatsi eyatahamulirwe erikola. Abya inyayasi lulengo. Syalyatakola n’ekindu n’ekighuma ekyo Yehova atalyamuhamulira. (Yoa. 12:49) Twang’igha tuti eky’erileberyako kibuya kya Yesu?

15-16. Twangakolesya tuti erihano ry’eBiblia eriri omo 1 Abanya Korinto 4:6?

¹⁵ Tukigha eky’erileberyako kya Yesu, eky’eriyiminya lulengo omughulu tukakolesaya erihano ry’eBiblia eriri omo 1 Abanya Korinto 4:6. Omo risako eryo tukabanamo erihano rino: “Isimwaya hali oko bihandikire.”  Neryo omughulu tukahana abandi siritolere itwabakasa erikwama amalengekania wetu kutse eribugha luba-luba butsira erilengekania. Omo mwanya w’ekyo litolere itwasondekania amahano awakabanika omo Biblia n’omo vitsapo byetu ebiseghemere eBiblia. Aho tukakanganaya ngoko tuyasi lulengo. Omwiyikehya lyosi, tukaligha ‘emibírí eyitunganene’ y’oMungu.​—Erib. 15:3, 4.

¹⁶ Eritomeka okwisikya Yehova, hane n’eyindi nzumwa eyikaleka. Neryo tulangire ngoko eriyikehya n’eriyiminya lulengo rikatuletere obutseme n’eribya omo bughuma n’abandi.

17. Busanaki abandu abakayikehaya bakabya n’obutseme?

¹⁷ Twamabibya abakayikehaya kandi abayasi lulengo itwanganabya n’obutseme. Busanaki? Kundi twamabiminya ngoko hane emyatsi eyo tute twangatoka erikola itukandibya tukasima abandi n’eriligha bweghu bweghu obuwatikya bwabo. Telilengekania oko kyabya omughulu Yesu alamaya abahagha ikumi. Omughuma musa w’okwibo yowanasubula erisyasima Yesu busana n’erimulamya obukoni bwiwe obukalire​—omwatsi owabya isiangatoka eriyikolera. Omulume oyukayikehaya oyu kandi oyuyasi lulengo, mwaminya ngoko Yesu kwatamuwatikaya sy’angalamire. Neryo mwapipa Yehova busana n’omwatsi oyo.​—Luka 17:11-19.

18. Eriyiminya lulengo n’eriyikehya bikatuwatikaya biti eribya n’obwira obuwene n’abandi? (Abanya Roma 12:10)

¹⁸ Abandu abakayikehaya, kandi abayasi lulengo kangyi-kangyi bakabya n’obwira obuwene n’abandi. Busanaki? Kundi balighire ngoko abandi nabo banawite emibere eyuwene, kandi bakabakanganaya ngoko bayiketerebo. Abakayikehaya n’eriyiminya lulengo bakatsema bakalangira abandi bakatoka  omwatsi ogho bakakola kandi bonabangu eribasima n’eribasikya.​—Soma Abanya Roma 12:10.

19. Busanaki sikyuwene eribya n’emiyiheko?

¹⁹ Aliwe abandu abakayiheka kikabakalako erisima abandi kusangwa bakanza ibobanabya bakahalambwa. Kangyi-kangyi bakayilingiriranaya n’abandi kandi banzire ibobanalangirwa mo babuya kulenga abandi. Omo mwanya w’eribegherya abandi, n’erihabo emibírí abandu abakayiheka bakayighangira emibírí kusangwa bakalengekanaya bati batitakola omubírí mulebe syanga hwererera. Omundu oyukayiheka akayilangira mo w’omughaso kulenga abandi kandi akatsurabo. (Gal. 5:26) Kangyi kangyi obwira bw’abandu abayanzire kutsibu abo bukahwa luba. Twamabilangira omutsie mubi oyu inyamabitsuka eritubyamo, litolere itwasaba Yehova arilua oko mutima atuhe ‘obulengekania buhya buhya’ tutoke erikinda omutsie mubi oyu.​—Rom. 12:2.

20. Kundiki tutolere itwabya bandu abakayikehaya, n’abayasi lulengo?

²⁰ Tukatsemera kundu eky’erileberyako ekyuwene kya Yehova! Tukalangira eriyikehya liwe erilabira ngoko akakolera abaghombe biwe, kandi twanzire erimwigha. Okw’ekyo twanzire erigha eby’erileberyako ebyuwene ebiri omo Biblia eby’abandu ababya n’olusunzo luerikolera Yehova ibana yikehirye. Mughulu ghosi tuhe Yehova y’erisikya n’olukengerwa ebyatolere. (Erib. 4:11) Twamabikola ebyosi ebyo itukandibya bira ba Yehova kera na kera, kundi akanza abakayikehaya n’abayasi lulengo.