1. Daudi akagamba ki aha bucureezi bwa Yehova?

MBWENU shi buzima nitubaasa kugira ngu Yehova n’omucureezi? Eego nitubaasa. Daudi akahandiika ati: ‘Ompaire engabo y’okujuna kwawe, okutwaza gye kwawe kunkurize.’ (2 Sam. 22:36; Zab. 18:35) Obundi Daudi akaba naijuka obu nabi Samueli yaija owaabo kumushukaho amajuta kuba omugabe wa Israeli ow’ebiro by’omumaisho. Daudi niwe yaabaire naahererukayo obuto aha batsigazi munaana, kwonka Yehova niwe yaatooraine kuza omu bigyere by’Omugabe Saulo.​—1 Sam. 16:1, 10-13.

2. Nituza kugamba ahari ki omu kicweka eki?

² Daudi buzima akaba naikirizana n’omuhandiiki wa Zaaburi owaagizire ati: ‘[Nainama] kureeba ebiri omu iguru n’eby’omu nsi. Atunguura omworo naamwiha omu mucuucu ngu amushutamye n’abanyiginya.’ (Zab. 113:6-8) Omu kicweka eki, nituza kubanza kureeba amashomo makuru agarikukwata aha bucureezi, turikureeba emirundi etari emwe n’emwe obu Yehova yaayoreka omutwarize ogu. Reero nituza kushwijuma eki turikubaasa kwegyera aha Mugabe Saulo, nabi Danieli, na Yesu aha bikwatiraine n’omutwarize gw’okwetwara.

3. Yehova naakoragana naitwe ata, kandi ekyo nikihamya ki?

³ Yehova naayoreka ngu n’omucureezi kurugiirira aha ku arikukoragana n’abantu abarikumuramya kwonka abatahikiriire. Tarikwikiriza bwikiriza okuramya kwaitu kwonka, beitu naatutwara nka banywani be. (Zab. 25:14) Kutubaasisa kugira omukago nawe, akataho entebeekanisa y’ekitambo  ky’Omwana we kugira ngu tusaasirwe ebibi byaitu. Buzima ka yaatugiriire embabazi n’esaasi nyingi!   

4. Yehova atuhaire ki, kandi ahabw’enki?

⁴ Yetegyereze omuringo ogundi oku Yehova arikworeka ngu n’omucureezi. Yehova Omuhangi waitu akaba naabaasa kutuhanga tutaine bushoboorozi bw’okwecweramu eki turikwenda kukora. Kwonka okwo tikwo yaatuhangire. Akatuhanga omu kishushani kye, kandi yaatuha obugabe bw’okwecweramu. Itwe abantu ab’ahansi munonga naayenda ngu tumuheereze kuruga aha mutima ahabw’okugira ngu nitumukunda, kandi nitureeba emigasho erikuruga omu kumworobera. (Bir. 10:12; Isa. 48:17, 18) Buzima ka nitusiima Yehova ahabw’okuba omucureezi!

5. Yehova naatwegyesa ata kuba abacureezi? (Reeba ekishushani ekiri aha kipampagare.)

⁵ Yehova naatwegyesa kuba abacureezi kurugiirira aha ku arikututwariza. Niwe arikukizayo obwengye omu nsi n’omu iguru. N’obu kiraabe kiri kityo, naaba ayeteekateekire kwikiriza ebiteekateeko by’abandi. Nk’eky’okureeberaho, Yehova akaikiriza Omwana we kumuhwera omu kuhanga ebintu byona. (Enf. 8:27-30; Kol. 1:15, 16) N’obu Yehova araabe ari ow’obushoboorozi bwona, naaha abandi obujunaanizibwa. Nk’eky’okureeberaho, akatoorana Yesu kuba Omugabe w’Obukama bwe, kandi naija kuha obushoboorozi buringaniire abantu 144,000 abaraategyeke na Yesu. (Luk. 12:32) Nangwa, Yehova akatendeka Yesu kuba Omugabe kandi Omunyamurwa Omukuru. (Heb. 5:8, 9) Kandi naatendeka abarikuza kutegyeka na Yesu, kwonka tarikubaha obujunaanizibwa kandi akaguma naayetaatsyataatsya omu mirimo yaabo arikubategyekyereza. Omu mwanya gw’ekyo, aine obwesigye ngu nibaija kukora ebi arikukunda.​—Kush. 5:10.

6-7. Nitubaasa kwegyera ki ahari Tataitwe ow’omu iguru aha bikwatiraine n’okurekurira abandi obujunaanizibwa?

 ⁶ Tataitwe ow’omu iguru otarikwetenga buhwezi kuruga aha muntu weena ku araabe naarekurira abandi obujunaanizibwa, itwe ka tushemereire kukikora n’okukiraho! Nk’eky’okureeberaho, ori omutwe gw’eka nari omureeberezi omu kibiina? Tooreza Yehova orikurekurira abandi obujunaanizibwa, kandi oyetantare kwetaatsyataatsya omu mirimo yaabo orikubategyekyereza. Waatooreza Yehova, emirimo terikwija kukorwa kyonka, beitu noija n’okutendeka abandi kandi obahwere kwegiramu obwesigye. (Isa. 41:10) Abaine obushoboorozi niki ekindi eki barikubaasa kwegyera ahari Yehova?

⁷ Baibuli neeyoreka ngu Yehova naafayo kuhurikiza ebiteekateeko bya baamaraika. (1 Bag. 22:19-22) Abazaire, nimubaasa kutooreza muta Yehova? Kyaba nikibaasika, buuza abaana baawe eki barikuteekateeka aha ku ekintu kirikubaasa kukorwa. Kandi kyaba kihikire, kuratira obuhabuzi bwabo.

8. Yehova akagumisiriza ata arikukoragana n’Abrahamu na Saara?

⁸ Obucureezi bwa Yehova nibureeberwa n’omu kugumisiriza kwe. Nk’eky’okureeberaho, Yehova naagumisiriza abarikumuheereza baabangaanisa aha kucwamu kwe omu muringo gw’ekitiinisa. Akahurikiza Abrahamu obu yaabaire naagamba ebiteekateeko bye aha bikwatiraine n’okucwekyerezibwa kwa Sodoma na Gomora. (Kut. 18:22-33) Kandi ijuka oku Yehova yaatwariize Saara muka Abrahamu. Yehova taragizire kiniga obu Saara yaashekyerera okuraganisa kwe ngu naija kugira enda omu myaka ye ya bukuru. (Kut. 18:10-14) Omu mwanya gw’ekyo, akatwariza Saara omu muringo gw’ekitiinisa.

9. Abazaire n’abareeberezi, nimubaasa kwegyera ki ahari Yehova?

⁹ Abazaire n’abareeberezi, nimubaasa kwegyera ki ahari Yehova? Shwijuma oku orikutwaza abari ahansi y’obushoboorozi bwawe baabanganisa aha bi orikucwamu. Ahonaaho nooba nooyenda kubahabura? Nari nooteeraho kwetegyereza emiteekateekyere yaabo? Amaka n’ebibiina buzima nibigasirwa, abaine obushoboorozi baatooreza Yehova. Ahu twahika, twaherize kushwijuma eki turikubaasa kwegyera ahari Yehova aha bikwatiraine n’obucureezi. Hati ka tureebe eki turikubaasa kwegyera ahari bamwe abarikugambwaho omu Baibuli aha bikwatiraine n’okwetwara.

10. Yehova naakoresa ata eby’okureeberaho by’abandi kutwegyesa?

¹⁰ Yehova Omwegyesa waitu Orikukirayo naatwegyesa kurabira omu by’okureeberaho by’abarikugambwaho omu Baibuli. (Isa. 30:20, 21) Nitwega amashomo maingi twateekateeka ahari abo abaabaire baine emitwarize mirungi otwariiremu okwetwara. Kandi nabwo nitwega bingi twashwijuma ebyahikire ahari abo abaabaire bataine mitwarize mirungi.​—Zab. 37:37; 1 Kor. 10:11.

11. Nitubaasa kwegyera ki aha ky’okureeberaho kibi kya Saulo?

¹¹ Teekateeka aha byahikire aha Mugabe Saulo. Akatandika ari omushaija arikwetwara. Akaba naamanya obugarukiro bwe, kandi akeeziringa kwikiriza n’obujunaanizibwa obundi. (1 Sam. 9:21; 10:20-22) Kwonka bwanyima Saulo akagira omweragiiro. Akooreka omutwarize mubi ahonaaho aherize kuba omugabe. Eizooba rimwe, akaremwa kugumisiriza obu yaabaire ategyereize nabi Samueli. Saulo omu mwanya gw’okwetwara akeesiga Yehova kugira eki yaakorera abantu, akahayo ekitambo kyokize n’obu araabe yaabaire atarikwikirizibwa kukikora. N’ekyarugiremu, Yehova akaba atakisiima Saulo, kandi aha muheru  akafeerwa n’obugabe bwe. (1 Sam. 13:8-14) Nituba abanyabwengye twayegyera aha ky’okureeberaho eki ekirikurabura, kandi tukeetantara omweragiiro.

12. Danieli akooreka ata ngu naayetwara?

¹² Okutaana n’eky’okureeberaho kibi kya Saulo, yetegyereze eky’okureeberaho kirungi ekya nabi Danieli. Danieli omu kubaho kwe kwona, akaguma ari omuheereza wa Yehova omucureezi kandi orikwetwara, butoosha arikushaba Yehova kumuhabura. Nk’eky’okureeberaho, obu Yehova yaakoresa Danieli kushoboorora ekirooto kya Nebukadeneeza, tarateekateekire ngu akakishoboorora ahabw’okwetegyereza kwe. Omu mwanya gw’ekyo, akooreka omutwarize gw’okwetwara buri kimwe yaakibarira Yehova. (Dan. 2:26-28) Eki nitukyegyeraho ki? Ab’eishe-emwe baaba nibakunda kuhurikiza embazo zaitu, nari twaba tutungire obusinguzi omu buheereza, ekitiinisa kyona tushemeire kukiha Yehova. Tushemereire kuba abarikwetwara tukamanya ngu titurikubaasa kukora ebintu ebi byona tutaine buhwezi bwa Yehova. (Fil. 4:13) Kandi twaba twine emiteekateekyere nk’egi, nituba nitutooreza Yesu. Mu muringo ki?

13. Yesu nitumwegyeraho ki aha bikwatiraine n’okwetwara kurugiirira ahari Yohaana 5:19, 30?

¹³ N’obu Yesu araabe yaabaire ari Omwana wa Ruhanga ohikiriire, akaba naayesiga Yehova. (Shoma Yohaana 5:19, 30.) Tarateireho kutwara obushoboorozi bwa Ishe. Abafilipi 2:6 nihagira ngu Yesu “tarateekateekire okwingana na Ruhanga ku kiri ekintu eki ashemereire” kutaho omutima. Yesu ahabw’okweta ahansi y’obushoboorozi bwa Ishe, akaba naamanya obugarukiro bwe, kandi akaba naaha Ishe ekitiinisa.

14. Yesu ku yaashabirwe kukora ekintu ekirengire obushoboorozi bwe, akatwaza ata?

¹⁴ Yetegyereze oku Yesu yaatwarize obu abeegi be, Yakobo na Yohaana na nyinabo baamushaba kubaha obujunaanizibwa oburengire obushoboorozi bwe. Atarikweziringa, akagira ngu Ishe ow’omu iguru wenka niwe arikubaasa kucwamu oraashutame aha mukono gwe ogwa buryo n’ogwa bumosho omu Bukama. (Mat. 20:20-23) Yesu akooreka ngu akaba naamanya obugarukiro bwe. Akaba naayetwara. Akaba atarikurenga aha ki Yehova amugambiire kukora. (Yoh. 12:49) Nitubaasa kutooreza tuta eky’okureeberaho kirungi kya Yesu?

15-16. Nitubaasa kugyendera tuta aha buhabuzi bwa Baibuli oburi omu 1 Abakorinso 4:6?

 ¹⁵ Nituba abarikwetwara nka Yesu turikugyendera aha buhabuzi bwa Baibuli oburi omu 1 Abakorinso 4:6. Nihagira ngu ‘otarenga aha Byahandiikirwe.’ N’ahabw’ekyo omuntu yaatushaba obuhabuzi, titurikwenda kwebembeza emiteekateekyere yaitu nari kugamba ekintu ekyabanza kwija omu biteekateeko byaitu. Omu mwanya gw’ekyo, twine kuta omutima aha buhabuzi oburi omu Baibuli n’omu bitabo ebirikushoboorora Baibuli. Omu muringo ogu, nitworeka ngu nitumanya obugarukiro bwaitu. Twaba abarikwetwara nitworeka butunu ngu obuhabuzi bwa Ruhanga ow’Obushoboorozi Bwona nibwo burikukirayo.​—Kush. 15:3, 4.

¹⁶ Oyihireho okuhimbisisa Yehova, twine enshonga nungi ezindi ezirikutureetera kuba abarikwetwara. Hati ka tureebe oku obucureezi n’okwetwara birikubaasa kutureetera kugira okushemererwa kandi bikatuhwera kukwatanisa n’abandi.

17. Ahabw’enki abantu abacureezi kandi abarikwetwara nibashemererwa?

¹⁷ Twaba turi abacureezi kandi abarikwetwara, nitubaasa kwongyera kushemererwa. Ahabw’enki kiri kityo? Twaba nitumanya obugarukiro bwaitu, nitusiima obuhwezi bwona obu abandi barikutuha kandi ekyo nikitushemeza. Nk’eky’okureeberaho, teekateeka obu Yesu yaakiza ababembe ikumi. Omwe aharibo wenka niwe yaagarukire kusiima Yesu ahabw’okumukiza endwara ye ey’akabi, ekintu eki omushaija ogwo yaabaire atarikubaasa kukora ahabwe. Omushaija ogu omucureezi kandi orikwetwara akasiima obuhwezi obu yaatungire, reero yaahimbisa Ruhanga ahabw’obuhwezi obwo.​—Luk. 17:11-19.

18. Obucureezi n’okwetwara nibituhwera bita kukoragana gye n’abandi? (Abarooma 12:10)

 ¹⁸ Abantu abacureezi n’abarikwetwara nibakira kukoragana gye n’abandi, kandi nikiboorobera kutunga abanywani b’aha mara. Ahabw’enki? Beekundiire nibamanya ngu abandi baine emitwarize mirungi kandi nibooreka ngu nibabeesiga. Abantu abacureezi n’abarikwetwara nibashemererwa abandi baaba abasinguzi omu buheereza bwona obu barikutunga, kandi nibarahuka kubasiima n’okubaha ekitiinisa.​—Shoma Abarooma 12:10.

19. Ni nshonga ki ezishemereire kutureetera kwetantara omwetunguuro?

¹⁹ Okutaana n’ekyo, abantu abaine omwetunguuro nikibagumira kusiima abandi, kureka nibaba nibenda ngu babe nibo baahimbisibwa. Nibabaasa kwegyeragyeranisa n’abandi, kandi bagire omwoyo gw’okuhayahayana. Omu mwanya gw’okutendeka abandi n’okubaha obushoboorozi, nibabaasa kugira ngu, “waaba nooyenda ekintu kikorwe gye, nk’oku orikwenda, nooba oine kukyekorera.” Omuntu oine omwetunguuro naakira kugira ebigyendererwa by’okweyendeza n’eihari. (Gal. 5:26) Abantu nk’abo tibarikukira kugira emikago erikuhangaara. Twayeshwijuma tukashanga twine omwetunguuro, twine kushaba Yehova kutuhwera ‘kugarurwa obusya omu biteekateeko byaitu,’ kugira ngu omutwarize mubi ogu gutatugumamu.​—Rom. 12:2.

20. Ahabw’enki twine kuba abacureezi kandi abarikwetwara?

²⁰ Ka nitusiima Yehova ahabw’okututeeraho eky’okureeberaho kirungi! Nitureeba obucureezi bwe omu ku arikukoragana n’abaheereza be, kandi nitwenda kumutooreza. Okwongyera ahari ekyo, nitwenda n’okutooreza abaabaire nibeetwara abarikugambwaho omu Baibuli, abaatungire omugisha gw’okugyenda na Ruhanga. Butoosha ka tuhe Yehova ekitiinisa n’okuhimbisa ebi ashemereire kutunga. (Kush. 4:11) Reero naitwe nitwija kuba abahikire kugyenda na Tataitwe ow’omu iguru, orikukunda abantu abacureezi kandi abarikwetwara.