1. Ndaga itshi Davidi azuelele mukunda nu khadilo dia gudibulumuisa dia Yehowa?

TUAJIYA diago guzuela egi Yehowa wakhala nu khadilo dia gudibulumuisa ba? Ayi. Davidi wazuelele gamba: ‘Aye wana gungubamba gifua tshibu, gudibulumuisa guaye guana gungubuisa muthu wakoma.’ (2 Sam. 22:36; Ngi. 18:35) Yajiya gukhala egi, Davidi wakhalele mutangiza lusugu profete Samuele gajile gumbo dia sh’enji ha gutomba fumu mbawuhinyina mu Isalele. Mu inzo yawo avualewe ana a mala 8; Davidi wakhalele galenge gawo, uvi Yehowa wamutombele phamba muene ha gukhala Fumu ha fundo dia Saula.—1 Sam. 16:1, 10-13.

2. Itshi tuza muzuelela mu longo edi?

² Yajiya gukhala egi Davidi wakhalele musuanguluga nu matangi azuelele muyimbi wa ngimbo mukunda nu Yehowa egi: ‘Muene wana shiguga ha gutala gosa nu hashi, wana katula muenya gikenene mu fuluguta. Muene wana katula phutu mu lamba . . . wana guahaga fundo dimoshi nu manene.’ (Ngi. 113:6-8) Mu longo edi tuza muzuelela thomo luholo Yehowa gana gumonesa khadilo dia gudibulumuisa, nu malongo a ndando tuajiya guzula mu gifezegeselo gienji. Tuza mumona luko malongo tuajiya guzula mu gifezegeselo gia Fumu Saula, profete Danyele nu Yesu gu ndaga yatadila gudibulumuisa.

3. Luholo lutshi Yehowa gana gutukalegela ndaga? Ndaga yene idi mumonesa itshi?

³ Yehowa wana gumonesa khadilo dia gudibulumuisa tangua gana kalegela athu ashigo atagana ndaga. Ganago gutshigina phamba gukombelela guetu, uvi wana gutuzula nji gifua mafut’enji. (Ngi. 25:14) Ha gukuata n’enji ufuta, Yehowa wahanele mulambu  wa mun’enji mukunda nu gubola guetu. Ndaga eyi idi diago mumonesa egi Yehowa wana gutuvuila khenda!

4. Itshi Yehowa atuhanele, nu mukunda natshi?

⁴ Tutadilenu luholo luko Yehowa gana gumonesa khadilo dia gudibulumuisa. Yehowa wakhalele naye gututombela luholo lua gujinga handaga muene watufugile. Uvi gakalegelego ngenyi. Watufugile mu gifuanesa gienji, watuhanele luendu lua guditombela ndaga. Wana tshigina egi tumukalegele nu mutshima wetu wagasue handaga tuamuzumba, nu tuana jiya egi gumutumagela mbagutubatela gubonga. (Mikh. 10:12; Yesh. 48:17, 18) Tudi naye guhana Yehowa mersi luholo wana gutumonesela khadilo dia gudibulumuisa!

5. Luholo lutshi Yehowa gana gutulongesa ha gukhala athu a gudibulumuisa? (Tala gifuanesa holu dia gizula.)

⁵ Yehowa wana gutulongesa ha gukhala athu a gudibulumuisa mu luholo gana gutukalegela ndaga. Yehowa wakhala watema gubalega athua agasue. Ikhale ngenyi, muene wakhala hehi ha gutshigina malongo a athu ako. Hagufezegesa, Yehowa watogele Mun’enji ha gumukuatesa ha gufuga ima iko yagasue. (Ish. 8:27-30; Kol. 1:15, 16) Ikhale Yehowa wakhala Nzambi wa ngolo jiagasue, muene wana hana inemo gudi athu ako. Tufezegese: Yehowa watombele Yesu ha gukhala Fumu wa Ufumu wenji, nu mbawuhana ginemo gudi athu 144 000 ha guhinyina hamoshi nu Yesu. (Luka 12:32) Yehowa wahanele Yesu formasio ha gukhala Fumu nu ha gukhala Nganga-nzambi wakoma. (Heb. 5:8, 9) Wana hana nji formaisio gudi athu anyi mbaahinyina nu Yesu ha gutagenesa inemo yawo, uvi ganago gualandula ha ngima ha gutala luholo adi mutagenesa mudimo wene. Wana guashila mutshima egi ene mbaatagenesa ginemo giene muabonga.—Yat. 5:10.

6-7. Longo ditshi akulu nu atata ajiya guzula mu gifezegeselo gia Tata wetu wa mu dilu mu ndaga yatadila guhana athu ako ginemo?

⁶ Sh’etu wa mu dilu ganago gukhala nu funu  ya ukuateshi nga wa muthu mumoshi, uvi wana hana inemo gudi athu ako; tudi naye gulandula gifezegeselo gienji! Gula udi tata nga ndo udi mukulu mu hungu, luholo lutshi wajiya gulandula gifezegeselo gia Yehowa? Hana athu ako midimo ya gutshita, uvi waalandulago gungima ha gutala luholo adi guyikalagala. Gula udi mulandula gifezegeselo gia Yehowa, mudimo mbawuya gutuama, mbawudi muhana athu ako formasio, mbaayakuatesa nji muavula. (Yesh. 41:10) Longo ditshi diko akulu nu atata ajiya guzula mu gifezegeselo gia Yehowa?

⁷ Biblia idi mumonesa egi Yehowa wana suanguluga nu matangi ana hana anjelo enji. (1 Maf. 22:19-22) Mvuaji, luholo lutshi muajiya gulandula gifezegeselo gia Yehowa? Gula luholo ludi guene, muajiya guhula matangi a an’enu ha gujiya luholo ndaga imoshi idi naye gukalegewa. Gula matangi awo adi awaha, muajiya guakalegela.

8. Luholo lutshi Yehowa amonesele khadilo dia guhuiminyina gudi Abalahama nu Sara?

⁸ Gudibulumuisa gua Yehowa guana gumonega nji mu khadilo dienji dia guhuiminyina. Ha gufezegesa, Yehowa wana gumonesa khadilo dia guhuiminyina gudi akombeledi enji tangua ana gumuhula mihu nu ginemua giagasue mukunda nu badesizio enji. Wategelele Abalahama tangua gamuhudile mulonga watadila gushiya dimbo dia Sodoma nu Gomola. (Gis. 18:22-33) Tangiza nji luholo Yehowa gakadikile Sara ndaga. Sara walelele tangua amuwambelele egi mbawumita vumo ngatshima muene wakhalele muthu wa gukola, uvi Yehowa gamuvidilego khabu. (Gis. 18:10-14) Wakalegele Sara ndaga nu ginemua giagasue.

9. Malongo atshi akulu nu mvuaji ajiya guzula mu gifezegeselo gia Yehowa?

⁹ Gula udi mvuaji nga mukulu, longo ditshi wazula mu gifezegeselo gia Yehowa? Itshi wana kalagala gula an’aye nga athu ako mu hungu ashigo musuanguluga nu desizio diaye? Wana kamba thomo gudibingisa, nga wana tegelela matangi awo? Enya mu fami nga aphangi mu hungu ana suanguluga muavula gula athu adi guatuameza adi mulandula gifezegeselo gia Yehowa. Tuazuelela gale malongo tuajiya guzula mu gifezegeselo gia gudibulumuisa gia Yehowa. Henyaha tutadilenu malongo tuajiya guzula mu ifezegeselo ya athu ako idi mu Biblia gu ndaga yatadila gudibulumuisa.

10. Luholo lutshi Yehowa wana gukalegela ifezegeselo ya athu ako ha gutulongesa?

¹⁰ Yehowa udi ‘Mulongeshi wetu Wakoma’; wana kalegela ifezegeselo idi mu Biblia ha gutulongesa. (Yesh. 30:20, 21) Mene jia athu tuana gulonguga mu Biblia, jiana gumonesa luholo athu ene amonesele makalegelo a Nzambi gifua gudibulumuisa. Tuana gulonguga nji ndaga jiabuidile athu anyi atunyile gumonesa makalegelo awa awaha.—Ngi. 37:37; 1 Kol. 10:11.

11. Longo ditshi tuazula mu gifezegeselo giabola gia Saula?

¹¹ Tutadilenu gale ndaga yabuidile Fumu Saula. Wakhalele muvuala mumoshi wa gudibulumuisa. Wakhalele mujiya fundo ngolo jienji jiakhalele musuga, wakhalele nji muvua woma wa guzula inemo yavula. (1 Sam. 9:21; 10:20-22) Gungima, Saula wabuile muenya lulendo, nu wakalegele ndaga gakhalelego naye gukalagala. Wamonesele khadilo edi diabola matangua azonda gungima dia gubua fumu. Lusugu lumoshi, gamonesele ndo khadilo dia guhuiminyina tangua gakhalele munengena profete Samuele. Wakhalele naye gudibulumuisa, nu guhaga mutshima egi Yehowa mbawukuatesa athu enji. Uvi Saula gakalegelego ngenyi, wahanele genji mulambu, ngatshima yakhalelego ginemo gienji. Yehowa wamutunyile, gatshiginyilego luko egi muene akhalele fumu. (1 Sam. 13:8-14) Gifezegeselo  gienji gidi gutukuatesa ha gukhala athu a tema nu ha gutuna gukalagala ndaga ishigo gututadila esue.

12. Luholo lutshi Danyele wamonesele khadilo dia gudibulumuisa?

¹² Henyaha tutadilenu giwa gifezegeselo giabonga gia profete Danyele. Danyele wakhalele mukombeledi wa Nzambi wa gudibulumuisa, muene wakhalele mukamba utuameji wa Yehowa mu monyo wenji wagasue. Tangua Yehowa gamukuatesele ha gukotelesa nzoji (ndoji) ya Nebukadenezale, muene gadihanelego lutumbu. Uvi muene wahanele lutumbu gudi Yehowa nu gudibulumuisa guagasue. (Dan. 2:26-28) Longo ditshi tuajiya guzula? Gula aphangi ana gusuanguluga nu luholo luetu lua gulongesa mu hungu, nga ndo tuana heta mbuto jiabonga mu mudimo wa gulongesa, lutumbu luagasue tudi naye guhana Yehowa. Tudi naye gujiya nu gudibulumuisa guagasue egi tuanago gukalagala ndaga jiene mu ngolo jietu, uvi mu ukuateshi wa Yehowa. (Fili. 4:13) Gukalagala ngenyi, gudi mumonesa egi esue nji tudi mulandula gifezegeselo giabonga gia Yesu. Luholo lutshi?

13. Longo ditshi tuazula mu gifezegeselo gia gudibulumuisa gua Yesu gidi mu Yone 5:19, 30?

¹³ Yesu wakhalele muthu watagana, uvi wakhalele mushila Yehowa mutshima. (Tanga Yone 5:19, 30.) Gakambelego nga hazonda gunyonga ufumu wa Sh’enji wa mu dilu. Filiphi 2:6 idi muzuela egi, Yesu ‘ganyongelego ufumu wa Nzambi, yakotelesa egi ha gukhala gifua muene.’ Luholo wakhalele Mona watumaga wakhalele mujiya egi, Sh’enji wamuhanele ufumu, wakhalele nji munemesa ufumu wa Sh’enji.

14. Mvutu itshi Yesu wahanele tangua amutogele ha gutshita ndaga inyi muene gakhalelego nu ufumu wa guyikalagala?

¹⁴ Tangiza gale ndaga yakagele Yesu tangua Yakoba nu Yone nu gin’awo amutogele ha gukalagala ndaga inyi muene gakhalelego nu ufumu wa guyitshita. Yesu waahanele mvutu mbala imoshi egi, phamba Shenji wa mu dilu udi naye guzula desizio gula nanyi udi naye gukhala gu koko dienji gua tata nga gua mama mu Ufumu wenji. (Mat. 20:20-23) Yesu wamonesele egi wakhalele munemesa ufumu wamuhuiwe. Wakhalele muthu wa gudibulumuisa. Muene wakalegele phamba ndaga Yehowa wamumbelele ha gutshita. (Yone 12:49) Luholo lutshi tuajiya gulandula gifezegeselo giabonga gia Yesu?

15-16. Luholo lutshi tuajiya gukalegela longo dia Biblia didi mu 1 Kolinto 4:6?

 ¹⁵ Tuana landula khadilo dia gudibulumuisa dia Yesu tangua tuana kalegela longo didi mu 1 Kolinto 4:6. Verse yene idi muzuela egi: “Tuwende mu nduedi ya Mbimbi ya Nzambi.” Tangua tudi muhana muthu longo, tushigo naye gumushinjiga ha gutshigina matangi etu, nga guzuela ndaga gutangiza ndo muabonga. Uvi malongo etu adi naye guzoga mu Biblia nu mikanda ya organizasio. Gutshita ngenyi, mbagumonesa diago egi, tudi mujiya fundo dietu. Tangua tudi mutshita ngenyi, tudi mumonesa egi tudi athu agudibulumuisa, handaga tudi mujiya egi malongo a Yehowa akhala tangua diagasue abonga gubalega etu.—Yat. 15:3, 4.

¹⁶ Gula tudi mutumbuisa Yehowa tuana gumonesa khadilo dia gudibulumuisa. Uvi gudi nji ndaga jiko jiabonga jiana gututuma ha gumonesa khadilo diene. Henyaha, tutadilenu luholo khadilo diene diana gutubatela gusuanguluga nu luholo diana gutukuatesa ha gujinga muabonga nu athu ako.

17. Mukunda natshi athu agudibulumuisa akhala nu gusuanguluga?

¹⁷ Tuana khala nu gusuanguluga guavula, gula tudi mumonesa khadilo dia gudibulumuisa. Mukunda natshi? Handaga gula tudi mutshigina egi gudi nu ndaga jiko tuajiyilego gutshita, mbayitukuatesa ha guhana mersi nu mbatusuanguluga gula athu ako adi gutukuatesa. Ha gufezegesa, tangiza gale luholo Yesu wasagele enya misongo ya hute kumi. Phamba muthu mumoshi wavutugile ha gumuhana mersi luholo gamusagele gu misongo yakola—ndaga mutu gakhalelego naye gutshita mu ngolo jienji hakhenji. Muthu owu wagudibulumuisa wahanele mersi luholo Yesu wamukuatesele nu watumbuishile Nzambi mukunda nu ndaga yene.—Luka 17:11-19.

18. Luholo lutshi gudibulumuisa guana gutukuatesa ha gujinga muabonga nu athu ako? (Lomo 12:10)

 ¹⁸ Athu a gudibulumuisa ana gujinga muabonga nu athu ako nu ana gukolesa nji ufuta wawo nu athu ene. Mukunda natshi? Handaga ana gusuanguluga ha gujiya egi athu ako akhala nu makalegelo abonga nu ana guashila mutshima. Athu a gudibulumuisa ana gusuanguluga tangua athu ako ana gukalagala midimo yawo muabonga. Ikhale aheta inemo ya luholo lutshi athu agudibulumuisa akhala hehi ha guashimana nu guanemesa.—Tanga Lomo 12:10.

19. Ndaga tshi jiko jidi gututuma ha gutuna khadilo dia lulendo?

¹⁹ Enya lulendo anago gushimana athu ako, uvi ana suanguluga egi athu ako a ashimane. Ana tshigina gudithesa nu athu ako, nu ana gumona egi adi abonga gubalega athu ako. Muenya lulendo ganago guhana athu ako formasio nga guahana inemo. Uvi wana guzuela egi: “Udi naye gutshita ndaga muene hakhenji, handaga gula athu ako ayitshita ajiya guzangela.” Muenya lulendo wazumba ndaga jiakoma koma nu wakhala muenya fuwa. (Gal. 5:26) Athu a luholo elu ana gukhala diago ndo nu mafuta. Gula tuamona egi tudi nu khadilo dia lulendo, tudi naye gutoga Yehowa mu gisambu atuhane ‘ndunge jihe-jihe’ jiajiya gutukuatesa hagula tukudisago khadilo diene diabola mu mutshima wetu.—Lomo 12:2.

20. Mukunda natshi tudi naye gukhala athu a gudibulumuisa?

²⁰ Tuana gusuanguluga muavula nu gifezegeselo gia Yehowa! Yehowa wana monesa khadilo dia gudibulumuisa luholo gana gukalegela akombeledi enji ndaga, esue nji tudi naye gulandula khadilo dienji. Luko, tudi naye gulandula ifezegeselo yabonga ya athu anyi akalegele Yehowa mudimo nu gudibulumuisa guagasue. Yehowa udi diago watagana ha gutumbuishiwa nu gunemesewa tangua diagasue. (Yat. 4:11) Gula tuatshita ndaga eji jiagasue, tuajiya gubua mafuta a Yehowa ivo nu ivo handaga muene wana zumba athu a gudibulumuisa.