1. Wanem nao David talem abaotem wei wea Jehovah hem hambol?

WASWE iumi fit for sei Jehovah hem hambol? Yes. David hem sei: “Yu putum sil blong yu fo sevem mi. An yu kamdaon [or “hambol,” NW] fo helpem mi, mekem mi garem biknem.” (Mektu Samuel 22:36; Sams 18:35) Maet David ting bak lo taem wea profet Samuel kam lo haos blo dadi blo hem for anointim hem for kamap future king blo Israel. David hem lastborn lo eitfala boy, nomata olsem hem nao Jehovah chusim for changem King Saul.—Fas Samuel 16:1, 10-13.

2. Wanem nao bae iumi storyim lo disfala article?

² Masbi David bae agree lo toktok wea stap lo Sams 113 abaotem Jehovah, wea sei: “Hemi luk kamdaon long skae an graon fo helpem olketa pipol. Hemi helpem olketa hu i pua, an hemi tekem olketa aot from trabol. Hemi mekhae long olketa.” (Sams 113:6-8) Lo disfala study, bae iumi lanem samfala important leson abaotem wei for hambol, taem iumi story raonem hao Jehovah showimaot datfala fasin. Then bae iumi story raonem wanem iumi savve lanem from King Saul, profet Daniel, and Jesus abaotem wei for luksavve lo wanem iumi fit for duim and no fit for duim.

3. Hao nao Jehovah deal witim iumi, and wanem nao datwan showimaot?

³ Wei wea Jehovah deal witim pipol blo hem wea no perfect showimaot Jehovah hem hambol. Hem no just acceptim nomoa worship blo iumi bat hem ting lo iumi olsem olketa fren blo hem. (Sams 25:14) For mekem iumi savve fren witim hem, Jehovah provaedem son blo hem olsem wanfala sakrifaes for olketa sin blo iumi. Datwan showimaot bigfala mercy and hem kaen lo iumi!

4. Wanem nao Jehovah givim iumi, and why nao olsem?

 ⁴ Tingim narafala wei wea showimaot Jehovah hem hambol. From Jehovah hem Creator, hem fit for wakem iumi lo wei wea iumi no savve chusim wanem iumi laek for duim lo laef blo iumi. Bat hem no duim datwan. Hem wakem iumi lo image blo hem and givim iumi freedom for chus. Nomata iumi olketa man nating, hem laekem iumi for servem hem witim full heart bikos iumi lovem hem and iumi luksavve lo gud samting wea bae kamaot from wei for obeyim hem. (Diutronomi 10:12; Aesaea 48:17, 18) Tru nao, iumi shud tinghae lo wei wea Jehovah hem hambol!

5. Hao nao Jehovah teachim iumi for hambol? (Lukim piksa lo kava.)

⁵ Jehovah teachim iumi for hambol thru lo wei wea hem deal witim iumi. Jehovah hem wise winim eniwan lo universe. Nomata olsem, hem willing for acceptim idea blo olketa narawan. Olsem example, Jehovah letem son blo hem for helpem hem for creatim evri samting. (Provebs 8:27-30; Col. 1:15, 16) And nomata Jehovah hem olmaeti, hem willing for givim responsibility lo olketa narawan. Olsem example, hem chusim Jesus for King lo Kingdom, and hem givim responsibility lo 144,000 pipol from earth for rul witim Jesus. (Luke 12:32) Bat Jehovah trainim Jesus for kamap King and Hae Priest. (Heb. 5:8, 9) Hem trainim tu olketa wea bae rul witim Jesus, hem no givim disfala assignment and then laek for kontrolem evri waka wea olketa duim. Bat hem trustim olketa for duim samting followim wanem hem laekem.—Rev. 5:10.

6-7. Wanem nao iumi savve lanem from Dadi blo iumi lo heven lo wei for givim responsibility lo olketa narawan?

⁶ Sapos Jehovah wea hem Dadi lo heven, wea no needim help blo eniwan, hem willing for givim responsibility lo olketa narawan, iumi tu shud duim sem samting! Olsem example, sapos iu wanfala famili hed or elder lo kongregeson, iu savve followim example blo Jehovah lo wei for  givim responsibility lo olketa narawan, and no go and trae kontrolem moa wanem olketa duim. Taem iu followim example blo Jehovah, iu bae no just finisim nomoa waka wea iu duim bat iu trainim olketa narawan tu and helpem olketa no fraet for duim datfala waka. (Aesaea 41:10) Wanem moa olketa narawan wea garem responsibility savve lanem from Jehovah?

⁷ Bible storyim dat Jehovah hem laek for herem tu tingting blo olketa angel blo hem lo heven. (Fas Kings 22:19-22) Olketa parents, hao nao iu savve followim example blo Jehovah? Lo taem wea fitim, hem gud for askem olketa pikinini wanem nao tingting blo olketa lo hao for duim wanfala waka. And sapos fitim, iu savve followim tu idea blo olketa.

8. Hao nao Jehovah showimaot hem patient witim Abraham and Sarah?

⁸ Jehovah showimaot tu wei wea hem hambol thru lo wei wea hem patient. Olsem example, Jehovah patient taem olketa wea worshipim hem kwestinim disison blo hem. Hem lisin taem Abraham storyim olketa wari blo hem abaotem datfala disison for distroem Sodom and Gomorrah. (Jenesis 18:22-33) And tingim hao Jehovah deal witim Sarah, waef blo Abraham. Hem no feel nogud or kros taem Sarah hem laf taem hem herem datfala promis hao hem bae babule taem hem olo finis. (Jenesis 18:10-14) Bat, Jehovah treatim Sarah lo wei wea showimaot hem respectim Sarah.

9. Wanem nao olketa parents and elder savve lanem from example blo Jehovah?

⁹ Iufala olketa parents and elder, wat nao iu lanem from example blo Jehovah? Tingim hao bae iu ansa sapos olketa wea iu lukaftarem kwestinim disison blo iu. Waswe, first samting wea iu bae duim hem for stretem olketa? Or waswe, bae iu trae for minim wat nao tingting blo olketa? Olketa famili and kongregeson savve kasem gud samting taem olketa parents and elder followim example blo Jehovah. So iumi bin storyim wanem iumi savve lanem abaotem wei wea Jehovah hem hambol. Distaem bae iumi storyim wanem nao iumi savve lanem from olketa example lo Bible abaotem hao for luksavve lo wanem iumi fit for duim and no fit for duim.

10. Hao nao Jehovah iusim example blo olketa narawan for teachim iumi?

¹⁰ From Jehovah hem nambawan teacher hem provaedem staka example lo Bible for teachim iumi. (Aesaea 30:20, 21) Iumi lane taem iumi ting raonem story blo olketa lo Bible wea followim olketa wei blo God, insaed diswan hem olketa wea luksavve lo wanem olketa fit for duim and no fit for duim. And tu, iumi savve lane from olketa samting wea happen lo olketa wea fail for showimaot olketa gudfala wei hia.—Sams 37:37; 1 Cor. 10:11.

11. Wanem nao iumi savve lanem from nogud example blo Saul?

¹¹ Tingim samting wea happen lo King Saul. Taem hem young hem hambol. Hem luksavve lo wanem hem fit for duim and wanem hem no fit for duim, hem hol bak tu for duim samfala big responsibility. (Fas Samuel 9:21; 10:20-22) Bat gogo Saul kamap praod. Diswan showaot klia no longtaem bihaen hem kamap king. Wantaem, hem no patient for weitim profet Samuel. Winim wei for hambol and trustim Jehovah for protectim pipol blo hem, Saul offerim wanfala sakrifaes wea hem no garem raet for duim. From datwan, Jehovah no hapi lo hem and rejectim hem olsem king. (Fas Samuel 13:8-14) Iumi wise sapos iumi lane from disfala warning example and stap klia from wei for praod.

12. Hao nao Daniel showimaot hem luksavve lo wanem hem fit for duim and wanem hem no fit for duim?

¹² Nara example wea difren from nogud example blo Saul, hem gudfala example blo profet Daniel. Lo full laef blo Daniel, hem gohed for hambol and hem evritaem luksavve lo wanem  hem fit for duim and hem evritaem luk lo Jehovah for leadim hem. Olsem example, taem Jehovah iusim hem for explainim dream blo Nebuchadnezzar, Daniel hem no sei datwan hem savve blo hemseleva. Bat hem hambol for luksavve evri praise mas go lo Jehovah. (Daniel 2:26-28) Wanem nao leson for iumi? Sapos olketa brata barava laekem tok wea iumi givim or iumi garem olketa naesfala experience lo ministry, iumi mas tingim hao evri praise mas go lo Jehovah. Iumi need for hambol for luksavve hard for iumi duim datwan sapos Jehovah no helpem iumi. (Phil. 4:13) Taem iumi garem kaen tingting olsem, iumi followim tu example blo Jesus. Lo wanem wei?

13. Wanem nao iumi lanem abaotem wei for hambol from toktok blo Jesus lo John 5:19, 30?

¹³ Nomata Jesus hem perfect Son blo God, hem barava depend lo Jehovah. (Readim John 5:19, 30.) Hem nating laek for tekovarem responsibility blo Dadi blo hem lo heven. Philippi 2:6 hem storyim hao Jesus “no enitaem hem ting for trae tekem position bilong God for mekem hem semsem witim God.” From hem wanfala son wea hambol, hem luksavve lo wanem hem fit for duim and wanem hem no fit for duim and hem respectim position blo Dadi blo hem.

14. Wanem nao Jesus duim taem olketa askem hem for duim wanfala samting wea hem no responsibility blo hem?

¹⁴ Tingim wanem Jesus duim taem disaepol James and John witim mami blo olketa, kam askem Jesus for givim wanfala privilege for tufala wea Jesus no fit for givim. Jesus no hol bak for talem hao only Dadi blo hem lo heven savve disaedem hu nao bae sidaon lo raet saed blo Jesus and hu nao bae sidaon lo left saed insaed Kingdom. (Matt. 20:20-23) Jesus showimaot hem luksavve lo wanem hem fit for duim and wanem hem no fit for duim. Hem hambol and hem nating duim samting winim wanem Jehovah komandim hem for duim. (John 12:49) Hao nao iumi savve followim nambawan example blo Jesus?

15-16. Hao nao iumi savve followim kaonsel wea stap lo 1 Corinth 4:6?

¹⁵ Iumi followim example blo Jesus for hambol taem iumi followim olketa kaonsel lo Bible wea stap lo 1 Corinth 4:6. Datfala scripture hem sei: “Followim nomoa samting wea olketa raetem finis.” So taem samwan askem advaes lo iumi, iumi shud no talem nomoa idea blo iumiseleva or first samting wea kam lo mind blo  iumi. Bat, iumi laek for helpem olketa luksavve lo wanem Bible talem and olketa information wea stap lo olketa pablikeson blo iumi. Taem iumi duim olsem, iumi showimaot iumi luksavve lo wanem iumi no fit for duim. Taem iumi hambol olsem, iumi givim glory lo olketa “raeteous law” blo Olmaeti.—Rev. 15:3, 4.

¹⁶ Witim wei for mekhae lo Jehovah, iumi garem tu olketa nara reason why iumi laek for hambol. Distaem bae iumi lukluk lo hao wei for hambol and wei for luksavve lo wanem iumi fit for duim and no fit for duim hem savve mekem iumi hapi and helpem iumi stap gud witim olketa narawan.

17. Why nao wei for hambol and luksavve lo wanem man fit for duim hem mekem man hapi?

¹⁷ Taem iumi hambol and luksavve wanem iumi fit for duim and no duim, bae iumi hapi. Why nao olsem? Taem iumi luksavve hao iumi no fit for duim samfala samting, bae iumi barava tinghae and hapi taem olketa narawan helpem iumi. Olsem example, tingim samting wea happen taem Jesus healim tenfala man wea garem leprosy. Only wanfala nomoa kam bak for sei thankiu lo Jesus from hem kiurim hem from datfala nogud sik, bikos hard for datfala man hem kurim hemseleva. Datfala man hem hambol and hem luksavve lo wanem hem no fit for duim, so hem thankiu for bigfala help wea hem kasem, and hem givim glory lo God for datwan.—Luke 17:11-19.

18. Hao nao wei for hambol and luksavve dat iumi no fit for duim samfala samting, hem helpem iumi for stap gud witim olketa narawan? (Rome 12:10)

¹⁸ Pipol wea hambol and luksavve dat olketa no fit for duim samfala samting, olketa savve stap gud witim olketa narawan and hem moa isi for olketa garem olketa klos fren. Why nao olsem? Bikos olketa willing for luksavve dat olketa nara pipol garem olketa gud wei and olketa trustim olketa. Olketa wea hambol and  luksavve lo wanem olketa fit for duim, olketa hapi tu taem olketa lukim olketa narawan duim gud assignment blo olketa and olketa no hol bak for praisem olketa.—Readim Rome 12:10.

19. Wanem nao samfala reason why iumi shud no praod?

¹⁹ Olketa praod pipol barava difren, olketa faendem hem hard for praisem narawan, staka taem olketa seleva nao laek for kasem praise. Olketa savve comparem olketa seleva tu witim olketa narawan and savve laek for compete. Winim wei for trainim narawan and givim responsibility lo olketa, staka taem olketa savve sei, “Sapos miseleva duim datwan nao bae hem stret.” Praod man staka taem bae hem laek for garem hae position and hem savve jealous. (Gal. 5:26) Staka taem, kaen pipol olsem no savve garem olketa gud frens. Sapos iumi luksavve iumi praod, iumi shud prea strong lo Jehovah for helpem iumi for changem tingting blo iumi mekem olketa nogud wei olsem no kamap wei blo iumi.—Rome 12:2.

20. Why nao iumi shud hambol and luksavve wanem nao iumi fit for duim?

²⁰ Iumi barava hapi tumas from Jehovah showimaot example for iumi! Iumi lukim hao hem hambol taem hem deal witim olketa servant blo hem, and iumi laek for followim hem. And tu, iumi laek for followim nambawan example blo olketa lo Bible wea followim God and showimaot wei for hambol and luksavve lo wanem olketa fit for duim. Iumi laek for evritaem givim praise and honor lo Jehovah wea hem nomoa fit for kasem datwan. (Rev. 4:11) Taem iumi duim datwan, bae iumi tu savve followim Dadi blo iumi lo heven wea lovem pipol wea hambol and wea luksavve lo wanem olketa fit for duim.