1. ¿Ima niranmi David Jehová Diosmanta?

JEHOVÁ DIOSQA k’umuykukuqmi chaychá Davidqa niran: “Qanmi atipana escudoykita qowanki, llamp’u sonqo [k’umuykukuq] kayniykin jatunchawan”, nispa (2 Sam. 22:36; Sal. 18:35). David chayta qelqashaspaqa yuyariranchá imaynatas Jehová Dios rey kananpaq ajllaran chayta. Jehová Diosqa profeta Samueltan kamachiran Jesepa wasinman rinanpaq, chaypin churinkunamanta jujninta ajllanan karan rey kananpaq. Pusaq wawakunayoqña Jesé karan chaypas, Jehová Diosqa sullk’a kaq wawan Davidtan ajllaran Saulpa rantinpi rey kananpaq (1 Sam. 16:1, 10-13).

2. ¿Imakunamantan kay yachachikuypi yachasunchis?

² Davidqa Salmos librota qelqaq runa jinachá piensaran. Salmos librota qelqaqmi niran: “Janaq pachata kay pachata qhawananpaqmi k’iraykamun. Payqa wajcha runatan pampamanta oqarin [...] umalli runakunatawan kuska tiyachinanpaq”, nispa (Sal. 113:6-8). Kaypin yachasunchis, imaynatas Jehová Dios juch’uyaykukuq kasqanta rikuchiran chayta. Yachallasuntaqmi rey Saulmanta, profeta Danielmanta, Jesusmantapas.

3. ¿Imaynatan Jehová Dios qhawariwanchis? ¿Imatan Jehová Diosmanta yachanchis?

³ Jehová Diosqa k’umuykukuqmi. Chaymi serviqninkunataqa amigonkunata jina qhawariwanchis, manan kamachinkunata jinachu (Sal. 25:14). Chaymantapas k’umuykukuq  kasqantan rikuchillarantaq Jesusta kay pachaman wañunanpaq kachamuspa. Jesuspa wañusqanraykun noqanchisqa Jehová Dioswan amigontin kayta atinchis.

4. ¿Imaynatan Jehová Dios kamawaranchis? ¿Imatan chaymanta yachanchis?

⁴ Jehová Diosqa kikillanchismanta imatapas ajllakunanchispaqmi kamawaranchis. Chaymi mana obligawanchischu payta servinanchispaqqa. Aswanpas munakusqanchisraykun servinanchistan munan (Deut. 10:12; Is. 48:17, 18). Chhaynata kamawasqanchispin Jehová Diosqa rikuchillantaq k’umuykukuq kasqanta, chaymi anchata kusichiwanchis.

5. ¿Imaynatan Jehová Dios k’umuykukuq kasqanta rikuchillarantaq? (Qhaway tapanpi kaq dibujota.)

⁵ Jehová Diosqa yachayniyoqmi, payqa manan necesitanchu pipas yuyaychanantaqa, chaywanpas payqa runakunaq angelkunaq nisqantan uyarin. Chaymi kay pachata kamashaspaqa Jesuswan kuska llank’aran. Chaypiqa uyariranchá imayna kamanankumanta Jesuspa ima nisqantaqa (Prov. 8:27-30; Col. 1:15, 16). Chaymantapas Jehová Diosqa tukuy atiyniyoqmi, payqa imatapas ruwallanmanmi. Ichaqa jujkunamanmi imaymana llank’anata qon. Chaymi Jesusmanpas 144.000 ajllasqa cristianokunamanpas janaq pachamanta kamachikamunankupaq atiyta qonqa (Luc. 12:32). Jehová Diosqa Jesustan rey kananpaq, uma sacerdote kananpaq ima yachachiran (Heb. 5:8, 9). Kay tiempopipas yachachishanmi ajllasqa cristianokunata Jesuswan kamachikamunankupaq. Paykuna kamachikamuqtinkuqa, Jehová Dios manan qhawashallanqachu allintachus ruwashanku icha manachus chayta, aswanpas confianqan paykunapi (Apo. 5:10).

6, 7. ¿Imaynatan umalliqkunapas, tayta-mamakunapas Jehová Dios jina k’umuykukuq kasqankuta rikuchinkuman?

 ⁶ Jehová Diosqa juch’uyaykukuq kasqanraykun kamachinkunaman imaymana llank’anata qon. ¿Imatan chaymanta umalliqkuna yachankuman? Paykunapas juch’uyaykukuspan Diospa llaqtanpi iñiqmasikunaman llank’ayta qonanku, manan paykunallachu imatapas ruwananku. Chaymantapas manan tukuy tiempochu qhawashananku allintachus iñiqmasikuna llank’ay chaskisqankuta junt’ashanku icha manachus chaytaqa. Aswanpas sumaqllatan iñiqmasikunata Diospa llaqtanpi yanapakunankupaq yachachinanku, jinaspapas confianankun paykunapiqa, chhaynapin iñiqmasikunaqa mana manchakuspa yanapakunqaku (Is. 41:10). ¿Imatan tayta-mamakuna Jehová Diosmanta yachankuman?

⁷ Bibliaq nisqan jina, Jehová Diosqa sumaqtan angelkunaq rimasqanta uyarin (1 Rey. 22:19-22). ¿Imatan chaymanta tayta-mamakuna yachankuman? Tayta-mamakunaqa yaqapaschá mayninpiqa wawankuta tapurinkuman imaynatas imapas ruwakunman chayta. Ajinapin wawankuq piensasqan allin kaqtinqa chayman jina imatapas ruwankuman.

8. ¿Imaynatan Jehová Dios rikuchiran Abrahanwan Sarawanpas pacienciayoq kasqanta?

⁸ Jehová Diosqa pacienciakuqmi. Chaypin rikuchillantaq k’umuykukuq kasqanta. Juj kutinmi Jehová Diosqa Abrahanman willaran Sodoma Gomorra llaqtakuna chinkachinanta. Abrahanmi ichaqa mana allinpaqchu chayta qhawariran. Chaywanpas Jehová Diosqa pacienciawanmi payta uyariran (Gén. 18:22-33). Abrahanpa esposan Saramanpas Jehová Diosqa willaranmi onqoq rijurinanta. Paymi ichaqa asikuran. Chaywanpas Jehová Diosqa manan phiñakuranchu, aswanpas pacienciawanmi uyariran (Gén. 18:10-14).

9. ¿Imatan tayta-mamakunapas, umalliqkunapas Jehová Diosmanta yachanchis?

⁹ Sichus tayta-mamapas otaq umalliqpas kashanki chayqa, kaykunatan tapukunayki: “¿Imatan Jehová Diospa k’umuykukuq kasqanmanta yachani? ¿Imatan ruwani wawaypas otaq iñiqmasikunapas: ‘Manan allintachu kaytaqa ruwashanki’, nispa niwaqtinku? ¿Phiñakunipachachu? Icha, ¿kallpachakunichu pacienciawan uyarikunaypaq?”, nispa. Tayta-mamakuna, umalliqkuna, kallpachakushallaychis Jehová Dios jina k’umuykukuq kanaykichispaq. Kunanmi astawan yachasunchis Bibliapi kaq wakin runakunamanta, chaymi yanapawasun k’umuykukuq kananchispaq.

10. ¿Imawanmi Jehová Dios yachachiwanchis k’umuykukuq kananchispaq?

¹⁰ Jehová Diosqa Bibliawanmi ‘yachachiwanchis’ k’umuykukuq kananchispaq (Is. 30:20, 21). Bibliapin willan k’umuykukuq runakunamanta. Paykunamanta yachaymi yanapawasun ama jatunchakunanchispaq, aswanpas k’umuykukuq kananchispaq (Sal. 37:37; 1 Cor. 10:11).

11. ¿Imatan rey Saúl ruwaran? ¿Imatan chaymanta yachasuman?

¹¹ Rey Saulmanta yachasun. Waynallaraq kashaspaqa juch’uyaykukuqmi payqa karan. Chaymi rey kananpaq payta ajllaqtinkuqa manchakuymanta pakakuran (1 Sam. 9:21; 10:20-22). Ichaqa pisi-pisimantan jatunchakapuran.  Juj kutinmi Saulqa, profeta Samuelta suyasharan Jehová Diosman sacrificiota jaywananpaq. Saulqa manan Diosmanqa sacrificiotaqa jaywananchu karan. Samuel mana rijurimuqtinmi ichaqa Saul-llaña Jehová Diosman sacrificiota jaywaran. Chayta ruwaspan rikuchiran jatunchakuq kasqanta. Jatunchakuq kasqanraykun Jehová Diosqa manaña Saulta yanaparanñachu. Jinaspapas jujtan paypa rantinpi rey kananpaq churaran (1 Sam. 13:8-14).

12. ¿Imaynan Daniel karan? ¿Imatan Danielmanta yachanchis?

¹² Profeta Danielmanta yachasun. Payqa k’umuykukuqmi karan. Jinaspapas payqa Diospa yanapaynintan mañakullaqpuni. Chaymi Jehová Diosqa Danielta yanaparan Nabucodonosorpa mosqokusqanta sut’inchananpaq. Nabucodonosorpa mosqoyninta Daniel sut’inchaspaqa manan jatunchakuranchu, aswanpas Jehová Diostan jatuncharan. Chaymi Nabucodonosorta niran: ‘Reypa pakasqa yachay munasqantaqa [...] janaq pachapi [Jehová Diosmi] willarasunki’, nispa (Dan. 2:26-28). ¿Imatan Danielmanta yachasunman? Imataña ruwaspapas Jehová Diostan jatunchananchis. Chaymi runakunaman yachachishaspa llaqtanpi yanapakushaspapas Jehová Diosllatan jatunchananchis (Filip. 4:13). Jesuspas chaytan ruwaran. Chaymantan astawan yachasunchis.

13. Juan 5:19, 30 nisqan jina, ¿imatan Jesusmanta yachasunman?

¹³ Jesusqa mana juchayoqña karan chaypas k’umuykukuspan Jehová Diostaqa kasukuran (leey Juan 5:19, 30). Payqa manan jayk’aqpas taytanwanqa igualakuranchu. Chaymi Filipenses 2:6 texto nin: “Payqa Dios jinaña karan chaypas, manan jayk’aqpas piensallaranpaschu Dioswan igualakuytaqa”, nispa. Bibliaq nisqan jina, Jesusqa anchatan taytanta respetaran.

14. ¿Imaynatan Jesús k’umuykukuq kasqanta rikuchillarantaq Santiagoq Juanpa mamitanwan rimaspa?

¹⁴ Juj kutinmi Santiagoq Juanpa mamitanqa Jesusman achhuykuspa niran: “Valekuykin kay iskay wawaykuna gobiernoykipi qanwan kuska tiyanankupaq, jujnin paña ladoykipi jujnintaq lloq’e ladoykipi”, nispa.  Jesusmi ichaqa niran: “Yayaymi ajllanqa pikunachus chaypi tiyanqa chaytaqa”, nispa (Mat. 20:20-23). Jesusqa k’umuykukuqmi karan, chaymi Jehová Diospa kamachisqallanta ruwaq, manan payllamantaqa imatapas ruwaqchu (Juan 12:49).

15, 16. ¿Imaynatan rikuchisunman 1 Corintios 4:6 textoq nisqanta kasukusqanchista?

¹⁵ ¿Imaynatan Jesús jina k’umuykukuq kasqanchista rikuchisunman? 1 Corintios 4:6 texton nin: “Imachus qelqasqa kashan chaykunallatan ruwanki”, nispa. Bibliaq nisqan jina, mayqen iñiqmasinchispas ima consejotapas mañakuwaqtinchisqa manan piensasqanchistachu ninanchis. Aswanpas Bibliawan, juj qelqanchiskunawanmi yanapananchis. Bibliawan jujkunata yanapaspaqa Jehová Diostan jatunchanchis. Jesús jina k’umuykukuq kasqanchistataq rikuchinchispas (Apo. 15:3, 4).

¹⁶ Yachamusqanchis jina, k’umuykukuq kaspaqa Jehová Diostan jatunchanchis. Kunanqa astawanmi yachasunchis, imaraykus k’umuykukuq kanallanchistaq jujkunawan kusisqa kausananchispaq chayta.

17. ¿Imaraykun k’umuykukuq runakuna aswan kusisqa kausanku?

¹⁷ K’umuykukuq runakunaqa aswan kusisqan kausanku. ¿Imarayku? Paykunaqa reparakunkun kallpallankuwanqa mana tukuy imatapas ruway atisqankuta. Chaymi jujkuna paykunata yanapaqtinkuqa agradecekunku. Chhayna k’umuykukuq kasqantan Jesuspa tiemponpi juj lepra onqoyniyoq runapas rikuchiran. Juj kutinmi Jesusqa lepra onqoyniyoq chunka runakunata qhaliyachiran. Ichaqa jujllan k’umuykuspa agradecekuran. Chay runaqa yacharanmi Diospa atiynillanwan qhaliyapusqanta.  Chaymi “alto kunkawan Diosta jatunchaspa kutimuran” (Luc. 17:11-19).

18. ¿Imaraykun k’umuykukuq kananchispaq kallpachakunanchis? (Romanos 12:10.)

¹⁸ K’umuykukuq runaqa jujkunaq allinkuna ruwasqantan qhawan, manan pantasqankutachu, jinaspapas jujkunapin confian. K’umuykukuq runaqa jujkunaq allinkuna ruwasqankumantan kusikun. Chaymantapas jujkunatan kallpachan yanapan ima (leey Romanos 12:10). Sichus k’umuykukuq kasunchis chayqa, jujkunawanmi kusisqa kausasunchis.

19. ¿Imaraykun mana jatunchakunanchischu?

¹⁹ Jatunchakuq runakunaqa manan jujkunataqa kallpachankuchu. Paykunan ichaqa kallpachasqa kayta munanku. Jatunchakuq runakunaqa jujkunawanmi igualakunku atipanakunku ima. Jinaspapas paykunallan imatapas ruwayta munanku, chaymi mana jujkunataqa yachachinkuchu. Jatunchakuq runakunaqa allin qhawarisqa kaytan munanku, jinaspapas ‘envidioso’ runakunan kanku (Gál. 5:26). Chhayna runakunaqa mana amigokunayoqmi kanku. Sichus reparakushanki jatunchakuq kasqaykita chayqa, Jehová Diospa yanapayninta mañakuy ‘yuyayniykita mosoqyachinaykipaq’.

20. ¿Imaraykun k’umuykukuq kananchis?

²⁰ Yachamusqanchis jina, Jehová Diosqa k’umuykukuqmi. Chaymi kallpachakunanchis pay jina k’umuykukuq kananchispaq. Kallpachakunallanchistaqmi ñaupa tiempopi Daniel jina, Jesús jina k’umuykukuq kananchispaqpas. Chaymantapas kallpachakunanchismi Jehová Diosllata jatunchananchispaq (Apo. 4:11). K’umuykukuq kasunchis chayqa Jehová Dioswanmi amigontin kasunchis. Payqa k’umuykukuq juch’uyaykukuq runakunatan munakun.