1. Rey Davidca ¿imatata Jehovamandaca nirca?

REY Davidca Jehová Dios humilde cashcatami nirca. Paica nircami ‘quishpirina canba escudotapashmi cuhuarcangui. [Can humilde cashpami, NM ] jatunyachihuashcangui’ (2 Sam. 22:36; Sal. 18:35). Cai shimicunata David escribijushpaca profeta Samuel paita agllangapaj rishca punllatami yarijushcanga. Israel llactapi rey cachunmi Davidtaca agllarca. Jehová Diosca rey Saulpa randi rey cachunmi Jesé runagupa último churiguta agllarca (1 Sam. 16:1, 10-13).

2. Caipica ¿imatata yachajugripanchi?

² Salmo libropi nishcaca cierto cashcatami Davidca ricurca. Jehová Diosmanda parlashpaca: “Paimi jahua pachatapash, cai pachatapash urai ricujun. Paimi, imagutapash na charijtaca, ñutu alpamanda jatarichin. Imagupash illaj runagutapash [...] mandajcunahuan tiachingapajmi, shina ruran” ninmi (Sal. 113:6-8). Caipica Jehová Dioshna na jariyashca cana cashcatami yachajupashun. Chai jipaca rey Saul, profeta Daniel, Jesuspash na jariyashca cashcatapashmi yachajupashun.

3. Jehová Diosca ¿imashinata ñucanchitaca tratan?

³ Jehová Diosca ¿imashinata humilde cashcataca ricuchin? Juchayu gentecunata imasha tratajta ricushpami Jehová Diosca humilde cashcata ricuchin. Shinallata ñucanchicuna Jehová Diospa ali amigocuna cachunbashmi saquishca (Sal. 25:14). Paipa Churiguta ñucanchi juchacunamanda huañuchun  cachamushcamandami ñucanchicunaca paipa amigocuna caita ushapanchi.

4. a) Jehová Diosca ñucanchicuna ¿imata rurana munaihuanda rurashca? b) Shina rurashpaca ¿imashina cashcatata ricuchin?

⁴ Imata ruranata, imata na ruranata agllachunmi Jehová Diosca ñucanchita rurashca. Shina rurashpapashmi Jehová Diosca humilde cashcata ricuchishca. Ñucanchicunataca paiman parecidotami rurashca. Jehová Dioshuan ricujpica ñucanchica paishnaca imatapash na ruraita ushapanchichu. Shinapash Jehová Diosca paita juyaimanda cazuchunmi munan. Jehovata cazushpaca ñucanchillatami cushilla causashun (Deut. 10:12; Is. 48:17, 18). Jehová Dios humilde cashcamandami ñucanchicunaca agradecido causana capanchi.

5. Jehovamandaca ¿imatata yachajupanchi? (Callari paginapi dibujota ricupangui).

⁵ Jehová Diosca tucui gentecunatami ali tratan. Shinami paica humilde cashcata ricuchin. Jehová Dioshnaca pipash alipacha yachaitaca na charinllu. Shina cashpapash shujcuna paita ayudachunmi saquin. Por ejemplo, Jehová Dios tucui tucuita rurajujpica Jesusmi paitaca ayudarca (Prov. 8:27-30; Col. 1:15, 16). Jehová Diosmi tucui poderta charin. Shina poderta charishpapash paipa Reinopi Jesús mandachunmi churashca. Shinallata 144 mil ungidocuna Jesusta ayudachunbashmi mingashca (Luc. 12:32). Jesustaca Sumo Sacerdote, rey cachunbashmi Jehová Diosca yachachirca (Heb. 5:8, 9). Shinallata 144 mil ungidocunatapashmi Jesushuan mandachun yachachinga. Shina  mingashpapash Jesús, 144 mil ungidocunapash imatalla rurajujtaca na huasha huasha ricushpaca catiriajungachu. Chaipa randica paicuna Jehová Diospa munaita pactachinatami confianga (Apoc. 5:10).

6, 7. Taitamamacuna, ancianocunapash ¿imatata Jehovamandaca yachajuita ushan?

⁶ Jehovapashmi shujcuna paita ayudachun saquin. Ñucanchicunacarin pipash ayudachunmi saquina capanchi. Taitamamacuna, ancianocunaca ¿imatata Jehovamandaca yachajuita ushan? Huauquipanicuna o huahuacunapash paicunata ayudachunmi imagutapash ninalla can. Shina nishca jipaca imata rurajujta o na rurajujta huasha huasha ricushpaca na catiriajunachu can. Chaipa randica paicunapi confiashcatami ricuchina can. Shinallata huauquipanicunata, huahuacunatapash imaguta rurachunbash yachachishpa, ayudashpami catina can (Is. 41:10). Taitacuna, ancianocunaca ¿imatata ashtahuan Jehovamandaca yachajuita ushan?

⁷ Bibliapica Jehová Diosca angelcuna imata nishcatapashmi uyan ninmi (1 Rey. 22:19-22). Shinaca taitacunaca ¿imatata Jehovamandaca yachajuita ushan? Taitamamacunaca imaguta ruragrinajushpapash huahuacunata tapunaca alimi can. Huahuacuna imata nijta uyashpami paicuna nishcatapash valichina can.

8. Abrahanhuan, Sarahuanbash na culirashcataca ¿imashinata Jehová Diosca ricuchirca?

⁸ Jehová Diosca humilde cashcataca na culirajlla cashpapashmi ricuchishca. Por ejemplo, Sodoma, Gomorra llactacunata Jehová Dios tucuchigrijujpica Abrahanga cutin cutinmi Jehovataca tapujurcalla. Shinapash Jehová Diosca na culirarcachu (Gén. 18:22-33). Shinallata Sara huarmigu vijsayu quidanata yachashpaca Sara huarmiguca asitarami asirca. Shina asijpipash Jehová Diosca na culirashpami respetohuan Sarataca tratarca (Gén. 18:10-14).

9. Taitacuna, ancianocunapash Jehovamandaca ¿imatata yachajui ushapanguichi?

⁹ Taitacuna o ancianocunaca Jehovamandaca ¿imatata yachajui ushapanguichi? Quiquin imatapash rurajpi huahuacuna o huauquipanicuna imatapash nijpica ¿imashinata sintiripangui? ¿Chai ratochu na shina nichun munanichu nipangui? ¿Na cashpaca paicuna imaguta nijpipash alimanllu uyapangui? Quiquin Jehová Dioshna familia ucupi, congregacionbipash cangapaj esforzarijpica tucuicunallatami cushilla yalinga. Caicamanga Jehová Dios humilde cashcatami yachajupashcanchi. Cunanga Jehovapa huaquin sirvijcunamandami yachajupashun. Paicunaca na jariyashcacuna carcachu.

10. Jehová Diosca ¿imashinata ñucanchitaca yachachishpa catin?

¹⁰ Jehová Diosca ñucanchicunata yachachingapami punda tiempomanda paipa sirvijcunapa causaita Bibliapica escribichishca (Is. 30:20, 21). Huaquin Jehovata sirvijcunaca tucuipimi Jehovata cazurca. Cutin shujcunaca jariyashca caimandami Jehovata na cazurca. Paicunamanda yachajunaca ñucanchipaca minishtirishcapachami can (Sal. 37:37; 1 Cor. 10:11).

11. Rey Saulmandaca ¿imatata yachajupanchi?

¹¹ Saúl joven cai horasca paica humildemi carca. Humilde caimandami rey tucuitaca na ushashachu nirca (1 Sam. 9:21; 10:20-22). Shinapash ña rey tucushpaca orgullosomi tigrarca. Paica Jehová Diosman sacrificiocunata  cuna derechotaca na charircachu. Shinapash shuj punllaca profeta Samuelta shuyanapa randica pairami sacrificiota curca. Shinami Jehová Diospi na confiashcata ricuchirca. Chaimi Jehová Diosca canga ñana israelitacunata mandanachu cangui nirca (1 Sam. 13:8-14). Rey Saulshnaca na canachu capanchi.

12. Profeta Danielmandaca ¿imatata yachajui ushapanchi?

¹² Cutin profeta Danielca na rey Saulshnachu carca. Profeta Danielca na jariyashca runagumi carca. Paica Jehová Dios paita ayudajushcatami siempre yarin carca. Por ejemplo rey Nabucodonosorpa muscui imata ricuchijushcata yachangapaj Danielta cayajpica, Danielca chai muscui ima cashcatami villarca. Chaita rurashcamandaca na jariyarcachu. Paica tucuitami Jehová Dios ayudajpilla rurai ushapani nircami (Dan. 2:26-28). Pipash ñucanchicunata asignacionda alimi pactachircangui o alimi villachinata yachangui nishpa felicitajpica ¿imatata rurana capanchi? Danielshnami Jehová Dios ayudajpimi chaitaca pactachi usharcani ninami capanchi (Filip. 4:13, NM ). Shinami Jesuspa ejemplota catijushcata ricuchipanchi. ¿Imamandata shina nipanchi?

13. Jesús na jariyashca cashcataca ¿imashinata Juan 5:19, 30​pica ricuchijun?

¹³ Jehová Diospa churi cashpapash Jesusca siempremi Jehovapi confiarca (Juan 5:19, 30, liingui). Ima punllapash Jehovata yalimi cani nishpapash na pensarcachu. Filipenses 2:6​pica Jesusca “Taita Dioshuan [igualmi] cani, chaitaca na saquishachu nishpaca na causarcachu” nijunmi. Jehová Dioslla mandana autoridadta charishcataca siempremi Jesusca yarishpa causan carca.

14. a) Santiagopa, Juanba mamaca ¿imatata Jesustaca mañarca? b) Shina mañajpica ¿imatata Jesusca rurarca?

¹⁴ Santiago, Juanbash paicunapa mamapash Jesuspaman quimsandi quimirishpami quiquin mandajujpica ñuca churigucunata shujtaca ali ladoman shujtaca lluqui ladoman tiachipangui nishpa mañarca. Shina nijpica ¿imatata Jesusca rurarca? Jesusca Jehová Dioslla chaita decidina derechota charishcatami chai huarmigumanga intindichirca (Mat.  20:20-23). Shinami Jesusca Jehová Diospa mandashcatalla rurajushcata ricuchirca (Juan 12:49). Ñucanchicunaca Jesushnami cana capanchi.

15, 16. ¿Imashinata 1 Corintios 4:6​pi mandashcataca pactachi ushapanchi?

¹⁵ Ñucanchicunaca 1 Corintios 4:6​pi shimicunatami cazuna capanchi. Chaipica ‘escribishcapi nijujtalla’ cazuichi nijunmi. Shinami Jesuspa ejemplota catishpa na jariyashcacuna cashcata ricuchipanchi. Pipash shuj consejota mañajpica ñucanchipa yuyaicunata nijunapa randica Bibliapi, publicaciongunapipash consejocunata mascachunmi ayudana capanchi. Shinami na jariyashcacuna cashcata, Jehovapa mandashcacunalla ‘na llullaj’ cashcatapash ricuchipashun (Apoc. 15:3, 4).

¹⁶ Imashinami ña yachajupashcanchi ñucanchicuna humilde cashpaca Jehová Diostami alabanajupanchi. Cunanga ñucanchicunallata cushilla cangapaj, shujcunahuanbash ali llevaringapaj imata rurana cashcatami yachajupashun.

17. Humilde gentecunaca ¿imashinata can?

¹⁷ Humildecuna cashpaca ñucanchillatami cushilla causapashun. Humildecuna cashpaca shujcuna imaguta nijpipash tucui shunguhuanmi cazungapaj munapashun. Shinallata pipash ayudajpica agradecido cashcatami ricuchipashun. Cunanga Jesuspa tiempopi lepra ungüihuan 10 jaricunata yaripashunchi. Jesusca 10puratami jambirca. Shinapash shugullami Jesustaca agradicingapaj tigrarca. Shina rurashpaca paimandallata na jambiri ushashcatami cai jariguca cuenta japirca.  Chaimi Jehová Diosta agradicirca. Shinami humilde cashcatapash ricuchirca (Luc. 17:11-19).

18. Romanos 12:10​pi nishca shinaca humildecunaca ¿imashinata can?

¹⁸ Humilde gentecunaca tucuicunahuanmi ali ali llevarin. Shinallata shuj huauqui o shuj pani shuj asignacionda o imagutapash ali rurajpica tucui shunguhuanmi felicitan. Shinami humildecuna cashcata, shujcunapi confiashcatapash ricuchin (Romanos 12:10, liingui).

19. Jariyashca gentecunaca ¿imashinata can?

¹⁹ Jariyashca gentecunaca paicunapilla pensarimandami paicunatalla felicitachun munan. Imatapash paicunalla ali ruranchi nishpami jariyan. Shujcuna imaguta yachajuchunbash na munanllu. Ñucashnaca pipash na ruraita ushanllu nishpami paipacha tucuita rurangapaj munan. Shujcuna imaguta charijpipash envidiashpami ricun (Gál. 5:26). Shina jariyashcacuna caimandaca ni shuj amigotapash na charinllu. Ñucanchicunapash jariyashca shunguta charishpaca uchallami Jehová Diosta cambiangapaj ayudahuai nishpa mañana capanchi (Rom. 12:2).

20. ¿Imamandata humilde cana capanchi?

²⁰ Paipa sirvijcunata imasha tratajta ricushpami Jehová Diosca humilde cashcata ricuchin. Chaimi Jehovataca agradicina capanchi. Punda tiempopi Jehovata sirvijcunaca humildecuna caimandami Jehovataca alabarca. Ñucanchicunapashmi paicunashna cangapaj esforzarina capanchi. Shinallata Jehová Diostallami alicachina o alabana capanchi (Apoc. 4:11). Shinami Jehová Diospa ali amigopash caita ushapashun. Humilde gentecunatami Jehová Diosca ninanda juyan.