1. Eaa ta Davida i tuatua no te tu akaaka o Iehova?

KA RAUKA ainei ia tatou i te tuatua e e tu akaaka to Iehova? Ae. Akakite a Davida: “Kua oronga katoa mai koe kiaku i te paruru ora naau: e na toou maru [“akaaka,” NW] i maataʼi au.” (2 Samu. 22:36; Sala. 18:35) Penei kua manako a Davida i te rā i aere mai ei te peroveta Samuela ki te are o tona metua i te akatainu i te ariki o Iseraela. Ko Davida te varu o te tamariki tamaroa; i na koia ta Iehova i iki ei mono i te Ariki ko Saula.—1 Samu. 16:1, 10-13.

2. Eaa ta tatou ka uriuri i roto i teia atikara?

² Kua āriki a Davida i ta te salamo e tuatua ra no Iehova: “Te tuku akaaka nei ra aia iaia uaorai i te akara anga mai ki raro, ki runga i te au rangi, e ki runga i te enua. Te akateitei nei aia i te akaaka ra . . . te akanoo anga iaia i rotopu i te aronga mamaata ra.” (Sala. 113:6-8) I roto i teia atikara, ka uriuri tatou i te apiianga puapinga no te tu akaaka na te akaraanga akapeea a Iehova i te akaari anga i teia tu. E oti ka akara tatou i te apiianga mei te Ariki ko Saula, te peroveta ko Daniela e Iesu, no te tu mako.

3. Akapeea a Iehova me akono ia tatou, eaa ta teia e akaari maira?

³ Kua akaari mai a Iehova e e tu akaaka tona ki tona au tangata apa ua te akamori ra iaia. Kua āriki aia i ta tatou akamorianga e kua akariro ia tatou ei oa nona. (Sala. 25:14) E tupu ei tetai pirianga oa kiaia, kua oronga mai a Iehova i tana Tamaiti ei atinga no ta tatou ara. E Atua aroa ua e te takinga meitaki Aia kia tatou!

4. Eaa ta Iehova i oronga mai kia tatou, no teaa ra?

 ⁴ Akamanako ana i tetai ravenga no to Iehova tu akaaka. Ko Tei Anga ia tatou, ka rauka ia Iehova i te anga ia tatou e te iki akapeea me akono i to tatou oraanga. Inara kare aia i rave i te reira. Kua anga aia ia tatou i tona tu e kua oronga mai i te tu rangatira kia tatou. Kua inangaro aia ia tatou tangata nei kia tavini ua atu iaia no to tatou inangaro e ka puapingaia tatou me kauraro kiaia. (Deu. 10:12; Isa. 48:17, 18) Mareka tikai tatou e e tu akaaka to Iehova!

5. Akapeea a Iehova me apii ia tatou kia vai akaaka? (Akara i te tutu i te kapi mua.)

⁵ Apii mai a Iehova ia tatou kia vai akaaka na roto i tona akono anga ia tatou. Ko Iehova tei pakari Ia i te ao katoa. Noatu rai, ka āriki ua aia i te manako o tetai ke. Ei akaraanga, kua akatika a Iehova i tana Tamaiti kia tauturu iaia i te anga i te au mea ravarai. (Mase. 8:27-30; Kolo. 1:15, 16) Noatu e Atua Mana Katoatoa a Iehova, kua tuʼa aia i te angaanga ki tetai ke. Ei akaraanga, kua iki aia ia Iesu ei Ariki no tona Patireia, e kua oronga Aia i te mana akaaere ki te 144,000 tangata te ka tutara kapiti kia Iesu. (Luka 12:32) Kua tereni a Iehova ia Iesu ei Ariki e ei Taunga Maata. (Ebe. 5:8, 9) Kua tereni katoa a Iehova i te aronga ka tutara kapiti kia Iesu e ka akaruke ia ratou kia rave i ta ratou angaanga. Irinaki aia e ka rave ratou i tona anoano.—Apo. 5:10.

6-7. Eaa ta tatou ka apii mei to tatou Metua i te rangi no te tuʼa i te angaanga ki tetai?

⁶ Me ka oronga to tatou Metua i te rangi—tei kore i anoano i te tauturu—i te  angaanga ki tetai ke, ka tanga ai tatou kia pera katoa! Ei akaraanga, e upoko ainei koe i roto i te ngutuare me kore e tangata pakari i roto i te putuputuanga? E aru i to Iehova akaraanga na te tuʼa anga i te angaanga ki tetai e oti e tuku ia ratou kia rave i te reira. Me aru koe ia Iehova, ka oti te angaanga ka tereni katoa koe i tetai ke, ka akamaroiroi ia ratou kia tauta ua atu. (Isa. 41:10) Eaa atu ta tetai aronga e apainga ta ratou ka apii mei ia Iehova?

⁷ Akaari mai te Pipiria e kua inangaro a Iehova i te kite i te manako o tana au tamariki angera. (1 Ari. 22:19-22) E te au metua, akapeea kotou me aru i te akaraanga o Iehova? Me tau, e ui ki taau tamariki i to ratou manako, akapeea me rave i tetai angaanga. Me ka tau te reira e aru i ta ratou tamanakoanga.

8. Akapeea a Iehova te akono anga ia Aberahama e Sara?

⁸ Kua akaari a Iehova i te tu akaaka na roto i te tu akakoromaki. Ei akaraanga, kua akakoromaki Aia me patoi ngateitei tona au tavini i tana ikianga. Kua akarongo aia kia Aberahama e akakite ra i tona manako no te akapouanga o Sodoma e Gomora. (Gene. 18:22-33) Akapeea a Iehova i te tuatua anga ki te vaine a Aberahama, ko Sara. Kare aia i riri i te kata aviri anga a Sara i tana taputou e ka nui a Sara i tona ruaine anga. (Gene. 18:10-14) Mari ra, kua akangateitei aia ia Sara.

9. Eaa ta te au metua e te aronga pakari ka apii mei te akaraanga o Iehova?

⁹ E te au metua e te aronga pakari, eaa ta kotou ka apii mei te akaraanga o Iehova? Akapeea koe me ariu me kare taau ikianga e ārikiia e te aronga i raro ake ia koe. Ka viviki ainei koe i te akatikatika ia ratou? Me ka aruaru koe kia mārama i to ratou manako? Ka puapingaia te ngutuare tangata e te putuputuanga me aru te aronga akaaere i to Iehova akaraanga. Kua uriuri tatou e eaa ta tatou ka apii no te tu akaaka mei te akaraanga o Iehova. Ka akara tatou i teianei i te tu mako o te aronga tei tataia i roto i te Tuatua a te Atua.

10. Akapeea a Iehova me apii ia tatou i te akaraanga o tetai ke?

¹⁰ Ei “Orometua” Maata, kua oronga mai a Iehova i te akaraanga i roto i tana Tuatua, ei apii ia tatou. (Isa. 30:20, 21) Ka puapingaia tatou me apii e te akamanako i te akaraanga Pipiria no te aronga tei akaari i te au tu o te Atua, te tu mako. Ka apii katoa tatou mei te aronga tei ngere i te akaari i teia au tu manea.—Sala. 37:37; 1 Kori. 10:11.

11. Eaa ta tatou ka apii mei te akaraanga kino o Saula?

¹¹ Akamanako ana i tei tupu ki te Ariki ko Saula. E tangata mako aia i tona mapu anga. Kua kite aia i tona turanga paruparu e kua emiemi i te āriki i tetai ua atu angaanga. (1 Samu. 9:21; 10:20-22) Kare i roa ana kua akamata a Saula i te akaari i te tu nengonengo. Kua akaari mai aia i teia tu, i muri ake i te riro anga aia ei ariki. I tetai atianga kua roi aia i te tiaki i te peroveta ko Samuela. Kare aia i irinaki ia Iehova, kua oronga a Saula i te atinga karakaratio kare ona tikaanga. Tei tupu, kua ngere a Saula i to Iehova tu mareka e te taoonga ariki. (1 Samu. 13:8-14) Ka meitaki tatou me aru i te  akamatakite anga e te kopae i te angaanga rapurapu.

12. Akapeea a Daniela i te akaari anga i te tu mako?

¹² Tuke kia Saula, e aru tatou i te akaraanga meitaki o te peroveta ko Daniela. I tona oraanga katoa, kua vai akaaka e te mako ua a Daniela ei tavini no te Atua tei akara kia Iehova no te aratakianga. Kua taangaanga a Iehova iaia kia uri i te moe a Nebukanesa, kare a Daniela i akapaapaa ana iaia uaorai. Mari ra, kua akakakā aia ia Iehova. (Dani. 2:26-28) Eaa te apiianga no tatou? Me reka te au taeake i te akarongo ki taau ako me kore me kite koe i te angaanga tutu aere, e akakakā ia Iehova. Ka āriki maru tatou mari ua ake ta Iehova tauturu i tupu ei teia. (Phili. 4:13) Me ko tera to tatou tu, te aru ra tatou i to Iesu akaraanga meitaki. Akapeea?

13. Eaa ta tatou i kite no te tu mako o Iesu ia Ioane 5:19, 30?

¹³ Noatu koia te Tamaiti apa kore a te Atua, kua irinaki a Iesu ia Iehova. (E tatau ia Ioane 5:19, 30.) Kare aia i noni i te mana akaaere o tona Metua i te rangi. Karanga a Philipi 2:6 no Iesu e “kare aia i manako e, e apinga āru kia aite katoa aia i te Atua.” Ei Tamaiti akaaka, kua kite a Iesu i tona kotinga e kua akangateitei i te mana akaaere o tona Metua.

14. Te patiia anga aia kia rave i tetai angaanga, eaa ta Iesu i tuatua?

¹⁴ Akamanako ana i te tuatua anga a Iesu ki tana nga pipi ko Iakobo e Ioane e to raua metua vaine e kua pati i tana tikaanga. Kare aia i emiemi, pau tika atu a Iesu na tona Metua i te rangi e iki e koai ka noo ki tona rima katau e te kaui i te Patireia. (Mata. 20:20-23) Akaari a Iesu e kua kotingaia tona tikaanga. E tu mako tikai tona. Kare aia i rave i tetai angaanga kare a Iehova i akaue iaia kia pera. (Ioa. 12:49) Akapeea tatou me aru i to Iesu akaraanga meitaki?

15-16. Akapeea tatou me taangaanga i te akoanga Pipiria ia 1 Korinetia 4:6?

¹⁵ Ka aru tatou i to Iesu akaraanga mako mei te akoanga Pipiria ia 1 Korinetia 4:6. Na ko ra: “Auraka kia rai to kotou manako i te tangata nei i tei tataia ra.”  No reira me pati mai tetai i te tauturu, kare tatou e akakite ua i to tatou manako. Mari ra, ka akaari tatou i te akoanga Pipiria e te au puka Pipiria. Na teia tu, kua kotingaia to tatou kite. Ma te tu mako, ka akapaapaa tatou i te Mana Katoatoa tei iaia te “au tutaki anga tika.”—Apo. 15:3, 4.

¹⁶ I te pae mai i te akangateitei anga ia Iehova, e au tumu ke atu tetai no tatou kia akaari i te tu mako. Ka akamanako tatou akapeea te tu akaaka e te mako me akarekareka ia tatou e te tauturu ia tatou kia au ki tetai.

17. Eaa i rekareka ai te aronga akaaka e te mako?

¹⁷ Me vai akaaka tatou e te mako, ka maata atu to tatou rekareka. Eaa te tumu? Me āriki tatou i to tatou turanga paruparu, ka mareka ua e ka mataora tatou no te tauturu ka oronga mai tetai ke. Ei akaraanga, i te akaora anga a Iesu i te aronga lepera e tai ngauru, e tai ia ratou tei oki mai i te akameitaki ia Iesu mei teia maki mate. Kua āriki teia tangata ma te akaaka e te mako i te tauturu tei rauka mai, e kua akakakā i te Atua.—Luka 17:11-19.

18. Akapeea te tu akaaka e te mako me tauturu ia tatou kia meitaki ki tetai e tetai? (Ia Roma 12:10.)

¹⁸ Oaoa te tangata akaaka e te mako ki tetai e ka maata te au oa. No teaa ra? Ka puareinga ratou i te akameitaki i te au tu manea o tetai ke e ka irinaki papu ia ratou. E aronga mataora te aronga akaaka e te mako me puapinga tetai i te rave i ta ratou angaanga e ka akameitaki e ka akangateitei ia ratou.—E tatau ia Roma 12:10.

19. Eaa te au tumu ka kopae tatou i te tu ngakau parau?

 ¹⁹ I tetai tua, ka ngata i te aronga ngakau parau i te akameitaki i tetai ke, varevare ratou e ko ratou ka akameitakiia. Ka taemoemo ratou kia ratou uaorai e ka aruaru kia meitaki atu i tetai. Kare e tereni i tetai e te tuʼa i te angaanga, ka karanga ratou, “Me inangaro koe kia mako te angaanga, ka rave koe i te reira.” Ko te tangata ngakau parau, ka akateitei e ka vareae. (Gala. 5:26) Kare o ratou oa. Me kite tatou e tu ngakau parau to tatou, e pure akatenga i te tauturu a Iehova kia ‘akaou i to tatou ngakau’ kia kore teia tu ia tatou.—Roma 12:2.

20. Eaa tatou ka akaari ua rai i te tu akaaka e te mako?

²⁰ Mareka tatou i to Iehova akaraanga! Kite tatou i tona tu akaaka i te akono anga i tona au tavini, e ka aru tatou iaia. Ka inangaro tatou i te aru i te akaraanga o te aronga mako i roto i te Pipiria tei aaere ma te Atua. Kia akapaapaa ua rai tatou ia Iehova ma te akangateitei e te akakakā iaia. (Apo. 4:11) I reira tatou e tau ei i te aaere ma to tatou Metua i te rangi, tei akaperepere i te aronga akaaka e te mako.