1. So o David phendža andi e Jehovasi poniznost?

DA LI čače šaj te phena so o Jehova tano ponizno? Ja, šaj te phena. O psalmista David jekhvar phendža: „Tu deja man to štit ando spasenje, ti poniznost čerela man te ovav baro“ (2. Sam. 22:36; Ps. 18:35). Ked o David pisindža akala lafija, šaj mislindža ko vreme ked o prorok Samuilo alo ko lese dadeso čher te pomazini okole kova ka ovel aver kralj ko Izrael. Iako o David hine najtikneder ando ofto čhave, ipak o Jehova ole birindža te avel ko e Sauleso than (1. Sam. 16:1, 10-13).

2. So ka dikha ko akava članko?

² Sigurno o David bi složini pe e lafencar kola o psalmista phendža ando Jehova: „Ov teljari pe te dikhel odova soj tano ko nebo hem ki phuv, andi prašina e jadno manuše vazdela, ando praho e čorore manuše vazdela. Hem dela le te bešel bare manušencar“ (Ps. 113:6-8). Ko akava članko, najangleder ka dikha ko kola situacije o Jehova mothovdža poniznost hem ka dikha so šaj amen te sikljova ando odola situacije. Palo odova, ka dikha so šaj te sikljova kotar i skromnost ando kralj Saul, ando prorok Danilo hem ando Isus.

3. Sar o Jehova postupini amencar hem so odova mothovi?

³ E Jehovasi poniznost dičhola ko odova sar postupini pe slugencar, iako tane nesavršena. Ov na samo so prihvatini amaro obožavanje, već dikhela amen sar pe amala (Ps. 25:14). Te šaj te ova amala oleja, o Jehova dindža pe Čhave sar otkupno žrtva aso amare grehija. Odova mothovi so o Jehova tano čače but milosrdno hem saosećajno.

4. So o Jehova dindža amen hem sose?

 ⁴ E Jehovasi poniznost šaj te dikhel pe ko pana jekh način. Sar amaro Stvoritelj, o Jehova šajindža te čerel amen bizi slobodno volja. Ama, ov na čerdža adžahar. Ov stvorindža amen premali pi slika hem dindža amen slobodno volja. Iako hijam nesavršena manuša, ov mangela te služina lese celone vileja sebepi so mangaja le hem sebepi so haljovaja sose tano amare šukaripase te šuna le (Pon. zak. 10:12; Is. 48:17, 18). But hijam zahvalna odolese so o Jehova tano odobor ponizno.

5. Sar o Jehova sikavi amen sar te ova ponizna? (Dikh i slika ko početko ando akava časopis.)

⁵ Odoleja sar postupini amencar, o Jehova sikavi amen sar te ova ponizna. O Jehova tano najmudro Osoba ko celo svemir. Iako olese nikastar na valjani savet, ov tano spremno te prihvatini averenge predlogija. Na primer, o Jehova dozvolindža pe Čhavese te pomožini lese dži stvorindža sa o buča (Posl. 8:27-30; Kol. 1:15, 16). Isto adžahar, iako o Jehova tano svemoćno, disave odgovornostija dela hem averendže. Na primer, ov čhivdža e Isuse te ovel Kralj ko oleso Kraljevstvo, hem o 144 000 manuša kola ka vladinen e Isuseja, dobindže olestar disavo autoritet (Luka 12:32). Naravno, o Jehova sikavdža e Isuse sar te ovel Kralj hem Prvosveštenik (Jevr. 5:8, 9). Isto adžahar, ov sikavi hem okolen kola ka vladinen e Isuseja, ama ked dela len disavo zadatko, ov na mangela te kontrolišini sar on ka čeren odova zadatko. Umesto odova, ov isi le poverenje so ka čeren olesi volja (Otkr. 5:10).

6-7. Sar šaj o poglavarija, o starešine hem o roditeljija te oponašinen e Jehova?

⁶ Ako amaro nebesko Dad, kase na valjani nikasi pomoć, dela disavo autoritet averendže,  kobor amen pana pobuter odova valjani te čera. Ako hijan poglavar ki porodica ja starešina ki skupština, oponašin e Jehova adžahar so disave zadatkija ka de averendže hem so na ka kontrolišine sar on čerena odova. Ked oponašineja e Jehova, na samo so i buti ka ovel čerdi, već tu ka sikave averen hem ka pomožine lendže te ovel len pobaro samopouzdanje (Is. 41:10). Ama, so okola kola isi len autoritet šaj pana te sikljon kotar o Jehova?

⁷ I Biblija mothovi so o Jehova spremno šunela e anđelen ked vačerena po mišljenje (1. Kralj. 22:19-22). Sar šaj tumen, o roditeljija, te oponašinen e Jehova? Ked odova šaj, pučen tumare čhaven sar bi on čerena disavo zadatko. Ako olengo predlog tano šukar, prihvatin le.

8. Sar o Jehova mothovdža strpljenje e Avrahameja hem e Saraja?

⁸ Isto adžahar, e Jehovasi poniznost dikhela pe ko odova so ov tano strpljivo. O Jehova tano strpljivo ked okola kola služinena lese, iako poštujinena le, anena ko pučibe olese odluke. Na primer, ov šundža e Avrahame dži vačerdža sose tano zabrinimo sebepi i odluka te oven uništime i Sodoma hem i Gomora (Post. 18:22-33). Hem setin tut sar o Jehova postupindža e Avrahamese romnjaja, e Saraja. Ov na uvredindža pe niti holjandža sose oj asandilji ked šundža so ka bijani ko phure berša (Post. 18:10-14). Umesto odova, ov na ljelja e Sarako dostojanstvo.

9. So šaj o roditeljija hem o starešine te sikljon kotar o Jehova?

⁹ So tumen, o roditeljija hem o starešine, šaj te sikljon kotar o Jehova? Razmislinen sar reagujinena ked tumare čhave ja o phralja hem o phenja ki skupština na slažinena pe tumare odlukencar. Da li odmah mangena te ispravinen len ja trudinena tumen te haljon sose adžahar razmislinena? Ked tumen kola isi tumen autoritet oponašinena e Jehova, odova but koristini hem tumare porodicendže hem e skupštinendže ko kola tumen služinena. Akana ka dikha so šaj te sikljova kotar i skromnost ando disave biblijake primerija.

10. Sar o Jehova sikavi amen prekalo averengo primer?

¹⁰ Sar amaro „Veličanstveno Učitelj“, o Jehova ko po Lafi dela amen primerija te bi sikavi amen prekalo lende (Is. 30:20, 21). Dži hor razmislinaja ando e biblijake izveštaja, amen sikljovaja ando manuša kola hine len osobine kola sviđinena pe e Devlese, sar soj tani i skromnost. Isto adžahar, sikljovaja hem sar nakhlje okola kola na mothovdže šukar osobine (Ps. 37:37; 1. Kor. 10:11).

11. So šaj te sikljova ando e Sauleso lošno primer?

¹¹ Razmislin sar nakhlja o kralj Saul. Ko početko, sar terno ov hine skromno. Ov džandža kola tane olese ograničenja hem čak darandilo te ovel le pobare odgovornostija (1. Sam. 9:21; 10:20-22). Ama, hari palo odova, o Saul ulo ponosno hem čerdža o buča ko kola na hine le pravo. Sigate palo odova so ulo kralj, ov mothovdža odija lošno osobina. Ki jekh situacija, ov našaldža po strpljenje dži adžičerdža te avel o prorok Samuilo. Umesto te ovel skromno hem te verujini so o Jehova ka zaštitini pe narodo, o Saul dindža i žrtva paljenica iako na hine le pravo te čerel odova. Sebepi so o Saul na čerdža o buča premali e Jehovasi volja, ov odbacindža le sar kralj (1. Sam. 13:8-14). Amen hijam mudra ako sikljovaja ando oleso primer hem ako trudinaja amen te na čera o buča kola nane amen pravo te čera.

12. Sar o Danilo mothovdža skromnost?

 ¹² O prorok Danilo hine averčhane kotar o Saul. Celo po dživdipe, o Danilo ačhilo ponizno hem skromno e Devleso sluga kova uvek rodindža e Jehovaso vođstvo. Jekhvar, o Navuhodonosor dikhlja jekh suno. O Jehova koristindža e Danilo te phenel lese so značini odova suno. O Danilo na phendža so kokri pestar objasnindža lese o suno. Umesto odova, ov hine skromno hem sa i čast dindža e Jehovase (Dan. 2:26-28). So šaj te sikljova? Ako e phraljendže sviđinena pe amare govorija ja ako isi amen šuže iskustvija ki služba, amen valjani sa i čast te da e Jehovase. Valjani te ova skromna hem te priznajina so sa odova na bi šaj te čera bizi e Jehovasi pomoć (Fil. 4:13). Ked isi amen asavko stav, amen oponašinaja e Isuse. Sar odova?

13. Premalo Jovan 5:19, 30, so kotar i skromnost sikljovaja ando Isus?

¹³ Iako o Isus hine savršeno e Devleso Čhavo, ov oslonindža pe upro Jehova. (Čitin Jovan 5:19, 30.) Ov niked na manglja te ljel pe Dadeso autoritet. Ko Filipljanima 2:6 phenela pe so o Isus „ni na pomislindža te ljel oleso than, te ovel sar o Devel“. Sar podložno Čhavo, o Isus haljilo kaj tane olese granice hem poštujindža pe Dadeso autoritet.

14. Sar o Isus reagujindža ked avera rodindže lestar te čerel o buča kola na hine le pravo te čerel?

¹⁴ Razmislin sar o Isus reagujindža, ked o Jakov hem o Jovan zajedno pe dajaja, alje koro leste. On pučlje le te del len than kova o Isus na hine le pravo te del len. O Isus odmah phendža so jedino oleso nebesko Dad šaj te odlučini ko ka bešel ki olesi desno hem levo strana ko Kraljevstvo (Mat. 20:20-23). O Isus mothovdža so poštujindža pe granice. Ov hine skromno. Ov niked na dželo prekalo odova so o Jehova zapovedindža lese te čerel (Jov. 12:49). Sar šaj te oponašina e Isuseso šukar primer?

15-16. Sar šaj te primenina e biblijako savet kova tano pisimo ki 1. Korinćanima 4:6?

¹⁵ Amen oponašinaja e Isuse ked primeninaja e biblijako savet kova tano pisimo ki 1. Korinćanima 4:6. Odothe pisini: „Ma džan prekalo odova soj tano pisimo.“ Ked avera pučena amen aso savet, niked na valjani zorjeja te čhiva averen te prihvatinen amaro mišljenje ja te vačera angleder bizo te razmislina  šukar. Umesto odova, amen valjani te dikha so odolestar pisini ki Bibija hem ko amare publikacije. Ko asavko način amen mothovaja so haljovaja so amen na džanaja sa. Ked čeraja adžahar, amen mothovaja so hijam ponizna, sose haljovaja so e Jehovaso savet tano uvek pošukar nego li amaro (Otkr. 15:3, 4).

¹⁶ Uzo odova so adžahar slavinaja e Jehova, isi amen hem avera šukar razlogija te ova ponizna. Akana ka dikha sar i poniznost hem i skromnost ka čeren amen bahtale hem sar ka pomožinen amen šukar te slažina amen averencar.

17. Sose tane o ponizna hem o skromna manuša bahtale?

¹⁷ Ked hijam ponizna hem skromna, verovatno ka ova pobahtale. Sose tano adžahar? Odolese so ked prihvatinaja so disave buča amen našti te čera, amen hijam zahvalna asi bilo koja pomoć koja dobinaja averendar. Na primer, razmislin so ulo ked o Isus sačardža dešen manušen kola hine len guba. Samo jekh olendar irindža pe te zahvalini pe e Isusese, sose sačardža le ando oleso baro nabormipe. Odova ponizno manuš džandža so ov naštindža kokri pes te sačari. Odolese, hine but zahvalno asi pomoć koja dobindža ando Isus hem slavindža e Devle sebepi odova (Luka 17:11-19).

18. Sar i poniznost hem i skromnost pomožinena amen šukar te slažina amen averencar? (Rimljanima 12:10)

¹⁸ Sebepi so o ponizna hem o skromna manuša trudinena pe šukar te slažinen pe averencar, verovatno ka ovel len šukar amala. Sose? On spremno priznajinena so avera manuša isi len šukar osobine hem isi len poverenje ano lende. Isto adžahar, o ponizna hem o skromna manuša tane bahtale ked avera  šukar čerena pe zadatkija hem spremna tane te pohvalinen len hem te mothoven lendže poštovanje. (Čitin Rimljanima 12:10.)

19. Sose na valjani te ova ponosna?

¹⁹ Ki aver strana, e ponosno manušendže tano pharo te pohvalinen averen, sose on mangena avera olen te hvalinen. Verovatno on uporedinena pe averencar hem mangena te oven pošukar averendar. Umesto te sikaven averen hem te den len disave odgovornostija, on šaj phenena: „Ako mangeja diso te čerel pe šukar“, odnosno sar so tu mangeja, „tegani odova mora kokri te čere.“ O ponosno manuš često mangela te ovel považno averendar hem ljubomorno tano ked avera čerena diso pošukar olestar (Gal. 5:26). Asavke manuša retko šaj te ovel len šukar amala. Ako dikhaja so uljam ponosna, valjani ando vilo te molina amen e Jehovase te pomožini amen te menjina amaro način sar razmislinaja, te na bi o ponos mukhela pe korenija hor ano amende (Rimlj. 12:2).

20. Sose valjani te ova ponizna hem skromna?

²⁰ But hijam zahvalna aso e Jehovaso primer. Olesi poniznost dikhela pe ko odova sar postupini pe slugencar hem amen mangaja te oponašina le. Uzo odova, amen mangaja te oponašina e skromno manušen kolendar vačeri i Biblija, a kola hine len prednost te služinen e Jehovase. Odolese, mangaja te da sa amendar i čast hem i slava uvek te da e Jehovase, sose jedino ov odova zaslužini (Otkr. 4:11). Ako čeraja sa akala buča, amen šaj zauvek te ova e Jehovase amala, odolese so ov mangela e ponizno hem e skromno manušen.