1. Gurhi Daudi adesire okubiyerekire obwirhohye bwa Yehova?

KA RHWANADERHA oku Yehova aba mwirhohye? Neci rhwanaderha ntyo. Daudi ayandisire ntya: “Wampa empenzi yawe y’obucunguke, n’obwirhohye bwawe bwanjira mukulu.” (2 Sam. 22:36; Enna. 18:35, NWT) Nkaba Daudi akag’irhanya okubiyerekire akasanzi omulebi Samweli ajaga aha mwabo alishiga omwami muhyahya w’ishanja lya Israheli amavurha. Daudi ye wali murho omu bagala munani ba Yese; cikone Yehova acishoga ye oku ye wayimula Mwami Sauli.​—1 Sam. 16:1, 10-13.

2. Bici rhwaganirira mw’eci cigabi?

² Daudi al’iyemire n’obwalagale ezi nderho ziri omu ennanga za 113 zidesire ntya: “Oyunama kurhenga empingu alole enw’igulu abone ebiri empingu n’en’igulu, yerhenza omuzamba omu katulo. Yenayimanza omukenyi . . . amutamaze oku ntebe haguma n’abaluzi.” (Enna. 113:6-8) Mw’eci cigabi rhwarhangiganirira masomo maguma na maguma ga bulagirire okubiyerekire obwirhohye lyo rhubona gurhi Yehova naye ayerekana obo borhere. Buzinda rhwaganirira bintu biguma na biguma rhwakaciyigizako mwami Sauli, omulebi Daniyeli na Yezu, okubiyerekire okuba n’oborhere bw’okuba walugero.

3. Gurhi Yehova arhujirira, na bici oko kuyerekine?

³ Yehova anayerekane oku ali mwirhohye, kugerera ebintu ajirira bene bantu barhali bimana. Arhali nterekêro yirhu  yone ayemera, cikone anakarhubona nka bîra bage. (Enna. 25:14, NWT) Lyo Yehova arhuhashisa rhube bîra bage, ahâna omugala abe ngombôlo erhi rhwe rhurhuma. Omu ntyo ayerekana oku ali wabonjo na wakubabalira!

4. Bici Yehova arhuhîre na bulya gurhi?

⁴ Rhulolage eyindi njira Yehova ayerekanamwo oku ali mwirhohye. Ye nka Lulema agwerhe obuhashe bw’okurhupangira ngasi kantu koshi rhwakajira. Cikone arhajiraga ntyo. Bulya gurhi? Bulya arhulemire oku nshusho yage, na kandi arhuha oluhûma lw’okucishoga ebi rhulonzize okujira. Aba alonzize rhube birhohye. Na kandi aba alonzize rhucishoge erhi rhwamukolera n’omurhima gwirhu goshi bulya rhumuzigire rhunahugûsirwe obunguke bw’okumurhumikira. (Lush. 10:12; Iza. 48:17, 18) Okuyumva oku Yehova naye aba mwirhohye kurhushagalwire bwenene!

5. Gurhi Yehova arhuyigirizamwo okuba birhohye? (Olole enfoto eri oku cijalada c’eyi gazeti)

⁵ Yehova anarhuyigirize obwirhohye kugerera ebi ajirira bene bantu. Yehova ye Muntu Mukulu wa hanw’igulu n’omu mpingu, cikone aba mubidu okuyemera entanya z’abandi. Kwa lwiganyo, Yehova akolesize Omugala lyo amurhabaza okulema ebintu hanw’igulu n’empingu. (Mig. 8:27-30; Kol. 1:15, 16) Na ciru akaba Yehova aba Mugala Byoshi, anakakolesa abandi omu kubaha emikolo yago-yago. Kwa lwiganyo, ajijire Yezu abe Mwami w’Obwami bwage, cikone ayishiha abandi bantu 144 000 obuhashe bw’okurhambula haguma na Yezu. (Luka 12:32) Kobinali Yehova akomerezize Yezu lyo aba Mwami na Mudahwa Mukulu. (Habr. 5:8, 9) Anaciri akomereza abo bayish’irhegeka haguma na Yezu, cikone arhaba kapita wabo mpu aje alabiriza ngasi byoshi bali bajira. Lubero n’oko aba alangalire oku bajira obulonza bwage.​—Maf. 5:10.

6-7. Bici olwiganyo lwa Larha wirhu w’omu mpingu lw’okuha abandi emikolo lwakarhuyigiriza?

 ⁶ Bici okuyumva oku Yehova anakaha abandi emikolo erhi arhanaba abuziri emisi, kwakarhuyigiriza? Kwa lwiganyo, k’oli ishe w’omulala erhi oli mugula w’omu cigamba? Mukulikire olwiganyo lwa Yehova omu kuha abandi emikolo n’okuyaka okuba bakapita babo. Erhi mwakayiga olwiganyo lwa Yehova, murhakacikajira ngasi mikolo mwene, cikone mwanakomereza abandi n’okubalangalira. (Iza. 41:10) Bici abagwerhe bukulu bulebe bakaciyigiriza kuli Yehova?

⁷ Ebibliya eyerekine oku Yehova anakayumva entanya za bamalahika bage bishwekerezi. (1 Bam. 22:19-22) Mwe babusi, gurhi mwakayiga olwiganyo lwa Yehova? Hali akanga mwakadosamwo abana binyu entanya zabo okubiyerekire gurhi mukolo mulebe gwakajirwa. N’amango bali bahâna entanya zabo mube babidu okubayumvirhiza.

8. Gurhi Yehova alembiremwo Abrahamu na Sara?

⁸ Yehova anakayerekana oku ali mwirhohye omu kulembera abandi. Kwa lwiganyo, Yehova analembere abakozi bage erhi bakarhindira okujira ebi anababwiraga. Ayumvirhizize entanya za Abrahamu okubiyerekire obushereze bw’e Sodoma n’e Gomora. (Murh. 18:22-33) Okengere gurhi Yehova alemberaga Sara muka Abrahamu. Erhi bayishimubwira oku aburha omwana, arhayemeraga, arhondera asheka mpu gurhi akaciburha omu bugikulu bwage. (Murh. 18:10-14) Cikone Yehova arhaderhaga mpu ye mukazi muci oyu orhagwerhi bukenge, agendekera amulembera n’okumukenga.

9. Bici olwiganyo lwa Yehova lwakayigiriza ababusi n’abagula?

⁹ Bici ababusi n’abagula bakaciyigiriza kugerera olwiganyo lwa Yehova? Gurhi mujira erhi aba mukulire bakarhindira okujira ebi mwababwiraga? Ka ho n’aho munabe mwabahanula erhi kubabwira oku bajijire kubi? Erhi munaciseze okuyumvirhiza entanya zabo? Omu mulala n’omu cigamba munabe ecinyabuguma n’obololoke erhi abayimangire bakayiga olwiganyo lwa Yehova. Rhwaganirire ebi rhwakaciyigiriza kugerera olwiganyo lwa Yehova lw’obwirhohye. Rhukolaga rhwalola enyiganyo z’abantu baganirirwe omu Bibliya zakarhurhabala rhube ba lugero.

10. Bulya gurhi Yehova akolesa enyiganyo z’abandi lyo arhuyigiriza?

¹⁰ Nka “Mwigiriza Mukulu,” Yehova ayandikisize omu Bibliya nyiganyo nguma na nguma z’abakozi bage lyo arhuyigiriza. (Iza. 30:20, 21) Rhwanaciyigiriza bintu binji erhi rhwakarhanya oku nyiganyo z’abantu bal’igwerhe amorhere minja, kwa lwiganyo nk’okuba n’olugero. Kandi hali ebintu rhwakaciyigiriza okubiyerekire abantu barhayerekanaga amorhere minja.​—Enna. 37:37; 1 Kor. 10:11.

11. Bici olwiganyo lubi lwa Sauli lwakarhuyigiriza?

¹¹ Orhanye oku bintu byahikiraga Mwami Sauli. Embere abe mwami, ali musole mwirhohye. Al’ihugûsirwe oku arhagwerhi luhusa lw’okuhikiriza ngasi mukolo. (1 Sam. 9:21; 10:20-22) Cikone, erhi hagera kasanzi, Sauli aba nnantwaza kwage, kw’okuderha oku aja mw’iroho ly’obucibone anarhonderha ajira ebintu nk’oku analonzize. Kasanzi kaguma abula bwalembera n’okulinda oku omulebi Samweli ayisha. Ahali hw’okuba n’olugero n’okuleka Yehova yene amanye ebi ajirira olubaga lwage, Sauli ajihâna enterekêro n’obu arhali mudahwa. Oko kuba nnantwaza kwage kwa mulerhera nyamanja; Yehova amuyimûla na ntyo aheza obwami n’obwîra bwage haguma naye. (1 Sam. 13:8-14) Rhwanayerekana  oku rhuli ba lugero erhi rhwakayaka okuba ba nnantwaza kwabo omu kuleke okujira bintu biguma na biguma barharhubwizire oku rhujire.

12. Gurhi Daniyeli ayerekinemwo oku ali walugero?

¹² Lubero n’olwiganyo lubi lwa Sauli, rhuganirirage olwiganyo lwinja lw’omulebi Daniyeli. Daniyeli omu kalamo kage koshi abezîre mukozi wa Yehova mwirhohye na walugero, bulya akagihûna Yehova amahano. Kwa lwiganyo, amango akolesibagwa na Yehova oku ahugûlire mwami Nebukdneza ebilôrho byage arhacihaga irenge. Cikone n’obwirhohye boshi amuyereka oku Yehova amuhugûlira byo. (Dan. 2:26-28) Bici oko kwakarhuyigiriza? Rhuyake okuciha irenge, amango bene wirhu na bali birhu bamarhuvuga omunkwa oku rhwagezize ehotuba bwinja erhi rhwalongozize ifunzo bwinja. Lubero n’oko rhukwanine rhuhugûkwe oku Yehova ye warhuhaga emisi y’okujira ebi rhwahikirizagya, na buzira ye rhurhakahikire aho. (Flp. 4:13) Erhi rhwakaba n’entanya za ntyo rhwanaba erhi rhuyizire Yezu lwiganyo lwinja lw’obwirhohye. Gurhi rhwakamuyigamwo?

13. Bici enderho za Yezu z’obwirhohye ziri omu Yowane 5:19, 30, zakarhuyigiriza?

¹³ Ciru akaba Yezu ali Mugala wa Nnamahanga, arhakag’ijira oku alonzize, cikone akag’ilangalira Yehova. (Osome Yowane 5:19, 30) Nta lusiku alonzize okuyumanana n’Ishe. Olwandiko lwa Abafilipi 2:6, ludesire oku Yezu arhaderhaga mpu alonze ciru n’ehitya “okuyumanana na Nyamuzinda.” Yezu ayerekana oku ali Mwana wa kurhumikira, omu kuhugûkwa oku Ishe ali mukulu kumulusha.

14. Gurhi Yezu akag’ikashuza erhi bakamubwizire mpu ajire ebintu Ishe arhal’imurhegesire?

¹⁴ Rhulole gurhi Yezu ashuzagya Yakobo na Yowane na nnina erhi balimuhûna akantu arhagwerhe kw’obuhashe bw’okuhâna. Ho n’aho Yezu abashuza oku Ishe ye wahiga ndi wayishitamala ekulyo kwage erhi ekulembe kwage omu Bwami bwage. (Mat. 20:20-23) Yezu ayerekana oku alihugûsirwe oku hali ebintu akahasha n’ebi arhakahasha. Ali mwirhohye, nta kantu koshi-koshi ajijire Yehova arhali murhegesire. (Yne. 12:49) Gurhi rhwakayiga olwiganyo lwage?

15-16. Gurhi rhwakakolesa ihano ly’Ebibliya liri omu 1 Abakorinti 4:6?

¹⁵ Rhwanayiga olwiganyo lwa Yezu lw’okuba birhohye omu kukolesa ihano ly’Ebibliya  liri omu 1 Abakorinti 4:6. Mw’olo lwandiko barhubwizire ntya: ‘Murhakag’ijira akantu kalushire ebiri biyandike.’ Omu ntyo erhi muntu mulebe akayishirhuhûna ihano, rhwanayaka okumubwira ebinarhuyishire omw’irhwe buzira kurhanya. Lubero n’oko rhukwanine rhusegeze amahano gali omu Bibliya n’agali omu bitabu birhu biyimangire oku Bibliya. Erhi rhakakajira ntyo rhwanayerekana oku rhuli ba lugero rhunahugûsirwe oku hali ebi rhwakahasha n’ebi rhurhakahasha. Erhi rhujira ntyo rhunayerekane oku rhurhahugûsirwi ebintu byoshi, na ntyo rhuyerekana oku rhukenzire ‘enjira nshinganyanya’ z’Ogala Byoshi.​—Maf. 15:3, 4.

¹⁶ Aha nyuma n’okukenga Yehova hali ebindi bintu byakarhuma rhwaba birhohye. Rhukolaga rhwaganirira gurhi obwirhohye n’okuba ba lugero kwakarhuha omwishingo n’okurhurhabala rhukayumvikana na bene wirhu na bali birhu.

17. Bulya gurhi abantu birhohye na balugero baba n’omwishingo?

¹⁷ Erhi rhwakaba birhohye na balugero rhwanaba n’omwishingo. Bulya gurhi? Erhi rhwakahugûkwa oku hali ebi rhwakahasha n’ebi rhurhakahasha, rhwanaba ba bushagaluke na ba kuvuga omunkwa okuburhabale abandi barhuhire. Kwa lwiganyo, orhanye kwa balya bashomyo 10 Yezu afumagya. Muguma mulibo agaluka ayishivuga Yezu omunkwa bulya alihugûsirwe oku arhakacifumize yene. Oyo mulume mwirhohye na walugero ahugûkwa oku arhakafumire buzira burhabale bwa Yezu na ntyo aha Nyamuzinda irenge okibiyerekire ebyo bamujiriraga.​—Luka 17:11-19.

18. Nk’oku olwandiko lwa Abaroma 12:10 luyerekine, gurhi obwirhohye n’okuba walugero kwakarhurhabala rhukayumvikana n’abandi?

¹⁸ Abantu birhohye n’ab’olugero banakajira okwabo koshi lyo bayumvikana n’abandi  na ntyo kunabe kulembu kulibo okujira obwîra busezire haguma n’abandi. Bulya gurhi? Bulya baba bahugûsirwe oku abandi bajira amorhere minja na ntyo banabalangalire. Abantu birhohye n’ab’olugero banashagaluke erhi abandi bakahabwa omukolo gwago-gwago, banabakenge n’okubavuga omunkwa.​—Osome Abaroma 12:10.

19. Bici birhumire rhushinganine rhuyake obucibone?

¹⁹ Abantu bw’obucibone barhavuga abandi omunkwa kw’ebi babajirire bulya banakarhanya oku bone bashinganine okuvugwa omunkwa. Babà bantu bakucishushanya n’abandi n’okukayorha nk’abali omu kamashigwe bulya banakolonza babe ba burhanzi omu kalamo. Ahali hw’okukomereza abandi, banakaba nk’abali barhanya ntya: “Erhi wakalonza mpu kantu kalebe kajirwe bwinja, kuli kwinja okajire wene.” Oyo muntu wa ntyo anakayumviza abandi obumvu. (Gal. 5:26) Abantu ba ntyo barhajira obwîra busezire haguma n’abandi. Erhi rhwakalabiriza akandalala kirhu, buzinda rhubone oku rhuba mw’ehy’obucibone, rhukwanine rhusalire Yehova n’obwirhohye boshi, rhumubwire arhurhabale rhuhinduke bantu “bahyahya omu murhima,” lyo rhukulamwo er’iroho libi.​—Bar. 12:2.

20. Bulya gurhi rhushinganine rhube bantu birhohye na balugero?

²⁰ Rhuvuzire omunkwa oku lwiganyo Yehova arhulekire! Rhunabone obwirhohye bwage kugerera oku ashibirira abakozi bage, na ntyo rhulonzize okumuyiga. Na kandi rhulonzize rhuyige enyiganyo nyinja z’abakozi ba Yehova bayerekine obwirhohye na ntyo bagendekera bakolera Yehova. Omu ntyo rhwanaderha oku rhulonzize rhuyige abantu bakolire Yehova n’obwirhohye. Na ntyo rhwanaha Yehova olukengwa n’irenge ashinganine. (Maf. 4:11) Na ntyo rhwanahash’igenda haguma na Yehova bulya aba mwîra w’abantu birhohye n’ab’olugero.