1. Kɛkɔnge kɛ Davidɛ ndatepela lá n’kambo djɛ okitshakitshɛ wɔ Yehova?

ISO nkoka ntepela nsɔsɔlɔ ente Yehova alekɔ l’okitshakitshɛ? Ee, iso nkoka ntepela nghɔsɔ. Davidɛ atepelaka loshi lɔmɔtshi ante : ‘Wɛ mpɛyɛka lemi nguwa kɛko djɛ lemi namema, edjinge okitshakitshɛ wɔko ndjilaka lemi ekekete.’ (2 Sa. 22:36; Yee. 18:35) Mbala imɔtshi Davidɛ akanelaki wina wɔ, ɔprɔfɛtɛ Samwɛlɛ ndaye lá mvulu kɛ papa kɛnde ndokfuta amvuta djɛ ndjala nkfumi kɛngɔlɔdjɛ lá Isariyɛlɛ. Davidɛ ayalaki ilɛngɛ l’anteyi kɛ wananyɔ kɛnde, wayalaka wana w’apame enanɛyi; koko, nde ndeke Yehova ndasɔnɛ djɛnde mpɛna Nkfumi Saolo.​—1 Sa. 16:1, 10-13.

2. Ɛnaso lɔ nge lá djamba djɛnɛ?

² Davidɛ awolaka ikanyi yɛ ontshumbi yeembo lotepelisa lá n’kambo djɛ Yehova ante: ‘Nde nyinamaka djɛ ndenda olongo la looko, nde nyimɛka intatemba má etoko. Nde mbetsholaka kanga ɔnvɔ djɛnde ndjintansɛ nya kanga okfudji.’ (Yee. 113:6-8) Lá djamba djɛnɛ, tongowa elakanyelo efula wɛ djonyi má okitshakitshɛ woyɛ má ndjeka wopo wɔ Yehova ndɛnyɛ djekeka n’tshɔ. M’eteyi, tongeka wopo wokokaso ndjala la djekeka djɛ djewa ndjawilela elelo la ndjɔmbɔmba kɛ nkfumi Saolo, ɔprɔfɛtɛ Danyɛlɛ, edjinge Yeso.

3. Wopo wɔkɔnge Yehova ɔtɔsakande, edjinge kɛsɔ ɛnyɛwɔnge?

³ Wopo wɔ Yehova ɔsande enkambi wɛnde wɛ n’tshamba djɛ djɔ, nyɛnyɛka djɛ nde alekɔ l’okitshakitshɛ. Apengo angawolake etolo kɛso toko, koko angɔtɔsake ngete tolongo tɔnde. (Yee.  25:14) Edjinge dj’iso ndjala tolongo tɔnde tɔsɔ, Yehova asangolaka djɛ ndambola wɔnande ngete olambo wɔ evunga wɛso. Ɔsɔngo nkɛtshi la djandji ndotoke nghɔsɔ!

4. Kɛkɔnge kɛ Yehova ɔtɔpɛyɛnde, edjinge lamo?

⁴ Tolende n’kambo nkina djɛ Yehova ɛnyɛnde djɛnde alekɔ l’okitshakitshɛ. Etengo oyɛnde Otongi, Yehova atasamba ntɔpɛyɛ mbamba kɛ nsɔna kɛnɛ k’ɔkɔpaso lá mbiko yɛso. Koko nde atánanghá nghɔsɔ. Nde atotongaka l’ɛfɔ kɛnde edjinge atɔpɛyɛka mbamba kɛ nsɔna kɛnɛ k’ɔkɔpaso. Nde nkɔpaka dj’iso anto ngo anto ndokambela l’oloko ɔmɔ má ngandji kɛso tende edjinge má wapɔ wowaso má ndokambela. (Mvu. 10:12; Iza. 48:17, 18) Iso ladjɛ nyɛnyɛ djedjɛ djɛso te Yehova l’ɔtɛ w’okitshakitshɛ wɔnde!

5. Wopo wɔkɔnge Yehova otolakanyɛnde djɛ ndjala l’okitshakitshɛ? (Lenda n’tshango djelá loposo.)

⁵ Yehova ntolakannyɛka wopo wɔ ndjala l’okitshakitshɛ má wopo wotonanghelande akambo. Yehova alekɔ Onto woleka balo tshɛ l’andja w’otondo. Kaanga oyɛwɔ ngɔsɔ, nde ndjawolaka tokanyi time anto ankina. Ndjɔmbɔmba, Yehova alɔmbaka Wɔnande djɛnde ndokotshɛ la olemo wɔ ntonga n’kete nkfumɔ. (Woo. 8:27-30; Kɔl. 1:15, 16) Kaanga oyɛnde kanga nkfulu inkfumɔ, nde mpɛyɛka anto ankina edjito. Ndjɔmbɔmba, Nde ilaka Yeso Nkfumi lá Onkfumi wɔnde, edjinge angɔpɛyɛ ndambo kɛ l’owandji le anto 144 000 wangokamba esanga la Yeso. (Luka 12:32) Nsɔsɔlɔ, Yehova a kfumbaka Yeso djɛ ndjala Nkfumi edjinge Nkfundji k’Ekekete. (Heb. 5:8, 9) Nde akfumba lonkina waangokamba esanga la Yeso, koko nde apango shishima djɛ nsipisoyɛ n’kambo nkfumɔ dj’okokawɔ nangha djɛ nkotshɛ elemo wɛwɔ. Ladjikɛnde, nde ndawɛkɛka tewɔ djɛ wangonangha ɛkɔpa kɛnde.​—Ndj. 5:10.

6-7. Olakanyelo wɔkɔnge w’isombowa la wopo wɔ Papa kɛso ke l’olongo ɔpɛyɛnde anto ankina edjito?

 ⁶ Ntsha Papa kɛso kelá djiko kepalekɔ la djonyi djɛ okotshɔ w’onto mpɛyɛka anto ankina edjito, iso oyɛso ná dj’isopakoke mpɛyɛ anto ankina edjito ngete nde? Oyalɛnde ɔtɛ wɔ nkfumbo ndokoko ikokolo yelá otshumano? Ntsha nghɔsɔ, okola ndjɔmbɔmba kɛ Yehova lá mpɛyɛka anto ankina edjito edjinge yala la n’tɔnɔ dj’ipa wɛ mpikaka wiso efula lá ikakambo inkfumɔ yonanghawɔ. Ntsha ombokilika ndjɔmbɔmba kɛ Yehova, apengo djɛ olemo nanghema toko, koko djɛ ndekola nkfumba ankina edjinge ndakotshɛ dj’iwɔ ndawɛkɛ le anto ankina. (Iza. 41:10) Kɛkɔnge kɛ wakotshi ndambo kɛ lowandji oyɛwɔ ladjɛ nangha djɛ ndjeka ndjokola Yehova?

⁷ Bible nyɛnyɛka djɛ Yehova ndjawolaka tokanyi tɔ wana wande andjelo. (1 Nk. 22:19-22) Ambotshi, wopo wɔkɔnge wokokanyo ndjokola Yehova lá n’kambo n’tshɔ? Ntsha nkokaka, opola ikanyi yɛ wana wako lá wopo wokokanyo nkamba olemo ɔmɔtshi. Edjinge ntsha ɛdje, kilika tokanyi tɔwɔ.

8. Wopo wɔkɔnge Yehova ndɛnyɛka bale ntshitshi te Abrahama la Sara?

⁸ Wopo wonkina wɔ Yehova ɛnyɛnde okitshakitshɛ wɔnde nde má bale ntshitshi djɛnde. Ndjɔmbɔmba, Yehova nyɛnyɛka bale ntshitshi wina wɔ ankambi wande owopowolawɔ l’okitshakitshɛ weepó ɛmɔtshi welendana l’akano wande wa ndɔmbɔsa. Nde ekameyɛka Abrahama wina wɔ ndoshimelaka ikanyi yɛnde la n’kambo djɛ etshitanelo kɛ Sɔdɔmɔ la Gɔmɔra. (Ewa. 18:22-33) Edjinge kovungɔ wopo wɔ Yehova ndananghela wadjɛ Abrahama, Sara. Nde atayala la nkɛlɛ kana nyomala wina wɔ ndɔlɛ atɔla lá n’kambo djɛ ondjelo ndatepela ante, angowa wɔna kaanga ndombotshunda efula. (Ewa. 18:10-14) Koko, nde ananghelaka Sara akambo la nɛmɔ.

9. Olakanyelo wɔkɔnge ambotshi la tokokolo oyɛwɔ ladjɛ ndjeka má ndjɔmbɔmba kɛ Yehova?

⁹ Nyo ambotshi la tokokolo, olakanyelo wɔkɔnge wowanyo má ndjɔmbɔmba kɛ Yehova? Nghongonangha nge ntsha wɔnako kana onto ɔmɔtshi wɔ l’otshumano amboposɛ ikanyi yetshikitanyi la yɛko? Mbamba kɛko kɛ ntondo oyɛwɔnde djɛ nsuka ikanyi yɛko? Ndo koko ongohonake djɛ ndjoka tokanyi tɔ anto ankina? Nkfumbo la ntshumano mbaka esako efula wina wɔ anto walekɔ la ndambo kɛ lowadji okolawɔ Yehova. Polo wina wɔsɔ, tɔmbɛna kɛnɛ kokokaso djeka má ndjɔmbɔmba k’okitshakitshɛ wɔ Yehova. Wina wɔsɔ nyotshɔ tokolenda olakanyelo wokokaso mba ma ndjɔmbɔmba yelekɔ l’Otepela wɔ Ndjambe lá kɛnɛ kelendana la ndjewa elelo wɛso.

10. Wopo wɔkɔnge Yehova okambande la ndjɔmbɔmba y’anto ankina djɛ ntolakanyɛ?

¹⁰ Etengo oyɛnde ‘Wetsha wɔso w’Ekekete,’ Yehova ananghaka djɛ ndjɔmbɔmba y’anto efula nfunama l’Otepela wɔnde djɛ ntolakanyɛ. (Iza. 30:20, 21) Iso nkoka ndjeka n’kete efula má ntɔnɔla lá wamba w’anto welá Bible wɛnyisa wekeka wa wɔlɔ, ngete ndjewa ndawilela elelo kana ndjala l’okitshakitshɛ. Lakoko iso ladjɛ ndjeka djɛ mba olakanyelo lá kɛnɛ kekomelisa wanɛ watakamba la djekeka n’tshɔ.​—Yee. 37:37; 1 Kɔ. 10:11.

11. Olakanyelo wɔkɔnge wowaso má ndjɔmbɔmba kɛ nyɛtshi kɛ Saolo?

¹¹ Kokanela la kɛnɛ kekomelisa Nkfumi Saolo. Wina wɔ ndayalaka olangala, nde ayalaki l’okitshakitshɛ. Nde awewaki ndáwilela elelo edjinge akaakandaki mbɛmba edjito. (1 Sa. 9:21; 10:20-22) Koko, mɔkɔngɔ wɔ Saolo ndjala nkfumi, ayɛka ndoyala la otako. Nde ananghaka n’kambo mɔtshi djɛ ndotayala la lotshungɔ lɔ nangha. La mbamba kɛmɔtshi,  nde atshutshɛka bale ntshitshi djɛnde wina windakongaka ɔprɔfɛtɛ Samwɛlɛ. L’etena kɛnde ndawilela elelo ko ndapɛyɛ te Yehova djɛnde nanghela owila wɔnde, Saolo alambolaka olambo wɔndotayala la lotshungɔ lɔ nangha. Eposelo nde, Saolo atshutshɛka ɛkɔpa kɛ Yehova edjinge onkfumi. (1 Sa. 13:8-14) Tɛnyɛ balo lá mba olakanyelo má ndjɔmbɔmba kɛ nyɛtshi kɛnɛ edjinge totananghake akambo la nsaki yɛso isɔmɛlɛ la lonkenkesa.

12. Wopo wɔkɔnge Danyɛlɛ oyɛnde ndjɔmbɔmba kɛ wɔlɔ k’okitshakitshɛ?

¹² Lá ndotshikitanyɛ la Saolo, ɔprɔfɛtɛ Danyɛlɛ, atotshikelaka ndjɔmbɔmba kɛ wɔlɔ kɛ nkilika. Lowiko lɔnde lonkfumɔ, Danyɛlɛ ayalaki l’okitshakitshɛ edjinge awewaki ndawilela elelo la ndakambelaka Ndjambe, wina onkfumɔ ahonaki ngo ɛlɔndjɛlɔ kime Yehova. Kanga, wina wɔ Yehova ndakambe lande djɛnde nsakisola n’dɔ djɛ Nebukadnezara, Danyɛlɛ atafuna ante nde ndeke lombosakisola n’dɔ djɛsɔ. L’okitshakitshɛ onkfumɔ, nde apɛyɛka Yehova lumo. (Dan. 2:26-28) Olakanyelo wɔkɔnge isombowa? Ntsha wananyɔ la wankaana ntolumɛka ambɔ tɔpɛyɛ wamba wa nsɔsɔlɔ la wa wɔlɔ efula kana koko tombowa eposelo wɛ wɔlɔ m’olemo w’ipoposanyɛ, totayawandolake koko tɔpɛyɛ Yehova lumo. Ngo iso nvungɔka l’okitshakitshɛ onkfumɔ ente, ntsha tonangha akambo ankfumɔ wasɔ nde, m’okotshɔ wɔ Yehova. (Flp. 4:13) Ntsha tombonangha nghɔsɔ, mbɔkoko tongo kilika ndjɔmɔmba kɛ Yeso. Lamo nghɔsɔ?

13. Olakanyelo wɔkɔnge w’isombowa má etepela wɛ Yeso welá Djɔanɛ 5:19, 30?

¹³ Kaanga ndayalaka Wɔna Ndjambe wɔ djɔ w’ipa l’ɛkɔmɔ, Yeso ayawɛkɛki ngo te Yehova. (Wala Djɔanɛ 5:19, 30.) Nde atahona ndɔsa mpipo kɛ Papa kɛnde. Filipɛ 2:6 ntoshimelaka djɛ Yeso ‘atahona ndjala l’ikanyi yɛ ndɔsa idjena yɛnde, kana ntepela ente ndjɛlama la Ndjambe.’ Yeso ayalaka Wɔna woyalisa la n’tshunamo, Yeso awewaki ante lowandji lɔnde lolekɔ la elelo edjinge alɛmɛyɛki lowandji lɔ Papa kɛnde.

14. Kɛkɔnge kenanghisa Yeso wina wiyɔlɔmbɛ djɛ nangha n’kambo mɔtshi djɛ ndopalekɔ la lotshungɔ lɔnangha?

¹⁴ Tokolenda kɛnɛ kɛ Yeso ndananghe wina wɔ ambeki wande Djakɔbɔ nya Djɔanɛ iyaye esanga la nyɔ kɛwɔ djɛ ndɔlɔmba dj’iwɔ tintansɛ ɔnɛ la lɔwɔ lɔ wome ɔnkina la lɔwɔ lɔ wadji lá Onkfumi. Ipa la nkaakanda, Yeso akadjimolaka mbala kɛkɔ kɛmɔ ante ngo Papa kɛnde ke  l’olongo ndeke la lotshungɔ lɔ nsɔna onto wokoka ndjala lá wome lɔwɔ la lá wadjɛ lɔwɔ lɔ Yeso l’Onkfumi. (Mat. 20:20-23) Yeso ɛnyɛka djɛ lowandji lɔnde lolekɔ la elelo. Nde ewaki elelo wɛnde. Nde atatambaki elelo wɛ Yehova ndowilelaka la ndekana kɛnɛ k’iyɔtɔlɔmba djɛ nangha. (Dj. 12:49) Wopo wɔkɔnge okokaso ndowekola?

15-16. Wopo wɔkɔnge wokokaso nkamba la dako djɛ Bible djelekɔ lá 1 Kɔrɛtɔ 4:6?

¹⁵ Djɛ ndjekola ndjɔmbɔmba kɛ Yeso kɛ okitshakitshɛ, iso ladjɛ nkilika dako djela 1 Kɔrɛtɔ 4:6. Dako djɛkɔ ntepelaka ante: ‘Nyotatambake kɛnɛ kembofunama.’ Djɛkondeke, wina wotɔlɔmbawɔ dako, iso topakoke mpetshɛ tokanyi tɔso ntondo kana ntepela ikanyi yeyɛ ntondo lá wɔɔngɔ ipala nkanela. Koko, iso ladjɛ nsepa yambalo y’anto tá alako wayɛ má Bible edjinge má enkanda wɛso. Má nangha nghɔsɔ, tɔngɛnyɛ ente, iso ndjewaka elelo wɛso. L’okitshakitshɛ onkfumɔ, iso ndjewaka lonkfunda lɔ ‘mboka yɛ sii’ yɛ Kanga Nkfulu inkfumɔ.​—Ndj. 15:3, 4.

¹⁶ Okitshakitshɛ wɔso kana wopo wɔso woyawilelaso elelo numɛka Yehova. Ladjiko djɛ lasɔ tolekɔ la donga djɛ wɔlɔ djɛ ndjala l’okitshakitshɛ. Tɔkapa nyɛna winɔsɔ, wopo wɔ ndjewa elelo wɛso la ndjala l’okitshakitshɛ okokawɔ ntɔpɛyɛ osasa edjinge ntokotshɛ dj’iso ndjokana l’anto ankina.

17. Ladjikɛnge anto w’okitshakitshɛ la wayawilelaka elelo oyalakawɔ l’osasa?

¹⁷ Wina woyalaso l’okitshakitshɛ edjinge oyawilelaso elelo, iso nkoka ndjala l’osasa efula. Ladjikɛnge? Ladjikɛnde, wina w’ewaso elelo wɛso, iso nyɛnyɛka djedjɛ djɛso l’osasa wɔso lá okotshɔ onkfumɔ wowaso mé anto ankina. Ndjɔmbɔmba, tɔkɔtɔnɔla lá n’kambo djɛ ase sudi djomi wa Yeso ndawikɛ. Ɔmɔ toko ndeke loyisa ndɔɔpɛyɛ lokasa la wopo wɔ ndɔkɔnɔla  má olando wɔnde w’ekekete, n’kambo djɛ ndotakoka nangha nyɔmɛlɛ. Mpame k’okitshakitshɛ la kewa elelo wɛnde kɛsɔ, ayalaka la djedjɛ te Yeso l’okotshɔ wɔnde, edjinge alumɛka Ndjambe lá n’kambo n’tshɔ.​—Luka 17:11-19.

18. Wopo wɔkɔnge okitshakitshɛ la ndawilela elelo otokotshɛwɔ dj’iso ndjokana wɔlɔ l’anto ankina? (Ɔrɔma 12:10)

¹⁸ Mbala efula, kanga okitshakitshɛ la kanga lewa elelo wɛnde, ndjokanaka l’anto ankina edjinge mbaka tolongo. Ladjikɛnge? Ladjikɛnde nde ndjewaka mbala kɛkɔ kɛmɔ djɛ anto ankina walekɔ la wekeka wa wɔlɔ edjinge nde ndawɛkɛka tewɔ. Kanga okitshakitshɛ la kanga lewaka ndawilela elelo, ndjalaka la osasa djɛ nyɛna anto ankina wawɛmba edjito wiyombapɛyɛka edjinge wapatshatshimbaka ndawɛnyɛ lumo.​—Wala Ɔrɔma 12:10.

19. Lá donga djɛkɔnge oyɛso ladjɛ ntona otako?

¹⁹ Otshikitanyi la kanga okitshakitshɛ, kanga otako ndjokaka wolo mbandola anto ankina, koko nde ɔkɔpakande ngo wowandole ngonde. Nde nkɔpaka ndawɛdjɛ l’anto ankina la nkɔpaka ndjila yamano. Lá mbamba kɛ nkfumba anto ɔmɔtshi la ndapɛyɛ edjito, “nde nkɔpaka nangha tshɛ ngo nyɔmɛlɛ,” ladjikɛnde nde nkanelaka ante “wapengewa nangha wɔlɔ ngete lemi.” Kanga otako ndjalaka l’ofuno edjinge la djuwa wina w’anto ankina onanghawɔ akambo wa wɔlɔ ndoleka. (Nga. 5:26) Alekɔ wolo nangha lotombe l’onto wɔnghɔsɔ. Ntsha tɔmbɛna ente tolekɔ la ndambo k’otako, tɔlɔmbɛ Yehova wɔlɔ djɛnde ntokotshɛ dj’iso ‘ndenda wopo wɔ ntɔnɔla’ dj’ipa kfumbo djɛ nyɛtshi n’tshɔ mpika esisa leso.​—Ɔrɔ. 12:2.

20. Ladjikɛnge oyɛso ladjɛ ndjala l’okitshakitshɛ edjinge ndjewa ndawilela elelo?

²⁰ Tolekɔ la djedjɛ dj’efula te Yehova má ndjɔmbɔmba kɔtɔpɛyɛnde! Iso nyɛnaka okitshakitshɛ wɔnde lá wopo wokambande l’ankambi wande, edjinge iso nkɔpaka ndowokola. Iso nkɔpaka lonkina, nkilika ndjɔmbɔmba yelá Bible y‘anto w’ewisa ndawilela elelo má mpeyi k’iyawa djɛ nkɛnda esanga la Ndjambe. (Ndj. 4:11) Iso nkoka nkɛnda esanga lá Papa kɛso kɛl’olongo, kanga lɔkɔpaka anto walekɔ l’okitshakitshɛ edjinge w’ewa ndawilela elelo.