1. Daavide bakwile kinyi pabitale kwiyisha kwa Yehowa?

TWI kwakula na kushinkamisha kooso’shi Yehowa mmwiyishe su? Oolo. Ungi musango, Daavide bakwile’shi: ‘Bompa ngabo oobe a kipandjilo, na kwiyisha koobe a kunyingisha.’ (2 Sam. 22:36; Mis. 18:36) Nsaa ibaadi Daavide mufunde ano mayi, abimweka’shi baadi pangi atentekyesha pabaadi Samuele mufikye kw’aabo bwa kumwela mwimu, aye baadi na kya kufika bu nfumu a Isaleele. Daavide baadi ka nsongwalume ka nfudiilo mu bana balume 8; kadi Yehowa baadi mu musangule bwa kupyana Nfumu Saule.​—1 Sam. 16:1, 10-13.

2. Nkinyi kyatutaluula mu uno mwisambo?

² Daavide baadi musangeele mayi a ungi mufundji a misambo bakwile pabitale Yehowa’shi: “Ailamina muushi, bwa kumon’eyilu na nsenga. Eebwesha mubofule mupone mu nsenga, atuusha mulanda mu butete . . . bwa kumutuula pamune na baana-buwa.” (Mis. 113:6-8) Mu uno mwisambo, atubanda kutaluula malongyesha e na muulo pabitale kwiyisha, pa kulonga kipaso kibaadi Yehowa muleshe dino eyikashi. Akupu, atutaluula dingi kyatudi balombene kulongyela kwi Nfumu Saule, mutemuki Ndanyele, na Yesu pabitale eyikashi dya kwiuka mikalo yetu.

3. Yehowa etukitshinaa myanda naminyi, na byabya abilesha kinyi?

³ Yehowa aleshaa’shi mmwiyishe mu mushindo wakitshinaa balangwidi baye bakutwe kupwidika myanda. T’akumiina penda  lulangwilo lwetu nya, kadi etumonaa bu ba kuuku b’aaye. (Mis. 25:14, EEM) Bwa kwitukwasha’shi twikale n’aaye mu bu kuuku, Yehowa baadi mwate mpángo ya kutusha Mwana’aye bu mulambu bwa milwisho yetu. Yehowa nyi Efile sha lusa!

4. Yehowa mmwitupe kinyi, na bwa kinyi?

⁴ Tala ungi mushindo auleshaa Yehowa’shi mmwiyishe. Bu byaadi mupangi eetu, baadi mulombene kwitutshibila kyatudya kukita mu muwa wetu. Anka tamukite byabya nya. Mwitupangye ku kifwanyi kyaaye na mmwitupe bulungantu bwa kusangula kii buwa na kii bubi. Bitshibilo by’atwata bi na muulo ku meso a Yehowa, sunga twekala bashaadile na ba bofule p’atwipwandikisha naye. Akumiina’shi tumufubile n’eshimba dyooso mwanda twibamufule, na atuuku’shi kumukookyela akwitutwadila myabi. (Miy. 10:12; Yesh. 48:17, 18) Atutumbula Yehowa bikata, mwanda mwiyishe!

5. Mushindo kinyi awitulongyesha Yehowa bwa kwikala beyishe? (Tala kifwatulo kya ku kipusu.)

⁵ Yehowa etulongyesha bwatudya kwikala beyishe mu mushindo w’etukitshina myanda. Yehowa Nyi sha kinangu kukila kya bantu booso mwiyilu na pa nsenga. Sunga mbyabya, akumiinaa mweneno a bangi. Bu kileshesho, Yehowa baadi mutadiile Mwana’aye bwadya kumukwatshishena mu kupanga kwa bintu. (Nki. 8:27-30; Kol. 1:15, 16) Na sunga ekala sha bukome booso, Yehowa apeyaa bangi mashito. Bu kileshesho, mmusangule Yesu bwa kwikala bu Nfumu a Bufumu bwaye, na mmupe bantu 144 000 bushito bwa kwikala bu bakunkushi pamune na Yesu. (Luk. 12:32) Kushi mpaka, Yehowa mulongyeshe Yesu mushindo wa kwikala bu Nfumu na bu Tshite-mwakwidi mukata e panundu. (Eb. 5:8, 9) Mulongyeshe dingi baba abakakunkusha pamune na Yesu mushindo wabadi balombene kulombasha mudimo wabo, anka ta mwibemane  mmongo bwa kulondesha byooso byabeukitshi nya. Kadi, mmukulupile’shi abakitshi kikyebe ky’eshimba dy’aaye.​—Kibaf. 5:10.

6-7. Nkinyi kyatudi balombene kulongyela kwi Nshetu e mwiyilu pabitale kupa bangi mashito?

⁶ Su Nshetu e mwiyilu​—shii na lukalo lwa bukwashi bwa muntu su ngumune​—apa bangi mashito, bi na muulo ngofu bwa’shi tukite namu nka byabya. Bu kileshesho, we nfumu a kifuko, su we mukulu mu kakongye? Ambula kileshesho kya Yehowa pa kupa bangi mashito na kuleka kwibemana mmongo bwa kuuka byabeukumbasha. Nsaa yw’ambula kileshesho kya Yehowa, t’anka penda mudimo aukitshika kalolo nya, kadi webakwasha dingi bwabadya kukita bibungi. (Yesh. 41:10) Nkinyi kingi kilombeene bano be na matalwa kulongyela kwi Yehowa?

⁷ Bible alesha’shi Yehowa akumiinaa mweneno a ba mikeyilu. (1 Bf. 22:19-22) Ba nambutwile, mushindo kinyi wanudya kwambula kileshesho kya Yehowa? Nwi kwipusha bana benu bi mweneno aabo na bilombene kukitshika mudimo kampanda. Su mweneno abo ebuwa, mukumiineyi.

8. Yehowa baadi muleshe Abrahame na Sara lwishinko naminyi?

⁸ Kwiyisha kwa Yehowa akumwenekyela dingi mu lwishinko lwaye. Bu kileshesho, Yehowa aleshaa lwishinko nsaa i bafubi baaye abapele kukumiina bitshibilo byaaye na kaneemo. Baadi mutemeshe Abrahame nsaa ibaadi amba’shi tabaadi apwandikisha’shi Yehowa e kubutula Sodome na Gomoore. (Kib. 18:22-33) Tentekyesha bibaadi bikite Yehowa pabaadi Sara musepe. Tabaadi mufite munda nsaa ibaadi Sara musepe pabitale bibaadi mwakule’shi akemita ku bununu. (Kib. 18:10-14) Anka, baadi mumukitshine myanda na kaneemo kooso.

9. Ba nambutwile na bakulu mbalombene kulongyela kinyi ku kileshesho kya Yehowa?

⁹ Ba nambutwile na bakulu, nkinyi kyanudi balombene kulongyela ku kileshesho kya Yehowa? Okitaa naminyi nsaa i bana b’oobe sunga bangi bantu mu kakongye abapele bitshibilo byobe. Okimbaa bya kukalwila kitshibilo kyobe musango umune su? Su otompaa kukumiina mweneno aabo? Bifuko na tukongye abikalaa kalolo nsaa i bano be na matalwa abambula Yehowa. Tubapu kwisambila mushindo watudi balombene kwambula kileshesho kya kwiyisha kya Yehowa. Binobino, tutaluuleyi kyatudi balombene kulongyela ku bileshesho bi mu Bible pabitale kwiuka mikalo yeetu.

10. Yehowa afubisha bileshesho bya bangi naminyi bwa kwitulongyesha?

¹⁰ Bu byaadi ‘Mulongyeshi eetu Mukata,’ Yehowa mmutushe bileshesho bi bungi Mwiyi dyaaye bwa kwitulongyesha. (Yesh. 30:20, 21) Atulongo nsaa yatunangushena pabitale bileshesho bya bantu be mu Bible abaadi baleshe ngikashi ayisankisha Efile Mukulu, mpa na kwiuka mikalo yaabo. Atulongo dingi pa kutaluula bibaadi bikitshikile booso bashibaadi baleshe ino ngikashi i buwa.​—Mis. 37:37; 1 Kod. 10:11.

11. Nkinyi kyatulongyela ku kileshesho ki bubi kya Saule?

¹¹ Banda kunangushena pa bibaadi bikitshikile Nfumu Saule. Pabaadi nsongwalume, baadi auku mikalo yaaye, baadi mpa na akyebe kupela mashito ebungi. (1 Sam. 9:21; 10:20-22) Kadi mwenda mafuku, babangile kwitatula na nkukita bintu byashibaadi na matalwa a kukita. Baadi muleshe uno mwikelo wi bubi nk’aye kyafiki bu nfumu. Dingi efuku, baadi mukutwe lwishinko nsaa ibaadi atengyela mutemuki  Samwele. Pamutwe pa kukulupila Yehowa bwa kufubila mwilo, Saule baadi mu kalambule mulambu, aku tabaadi na matalwa a kwibikita. Nyi bwakinyi baadi mushimishe kipwano kyaye na Yehowa mpa na bufumu. (1 Sam. 13:8-14) Bibuwa tulongyele ku kino kileshesho akitudimusha na kupela kukita kintu kyatushii na matalwa a kukita.

12. Bwakinyi Ndanyele baadi kileshesho ki buwa?

¹² Mu kwilekena na kileshesho ki bubi kya Saule, tala kileshehso ki buwa kya mutemuki Ndanyele. Mu muwa waaye ooso, Ndanyele baadi mufubi a Efile Mukulu mwiyishe na baadi auku mikalo yaaye. Bu kileshesho, pabaadi Yehowa mumufubishe bwa kupatuula kilotwa kya Nabukodonosore, Ndanyele ta baadi mwitumbishe nya. Na kwiyisha kooso, baadi mutumbishe Yehowa. (Nda. 2:26-28) Bino abitulongyesha kinyi? Su bakwetu abasangeela mwisambo ubatukitshi, sunga’shi atwiuku kulungula mukandu wibuwa kalolo, abitungu tutumbishe Yehowa. Abitungu tushingule’shi ta twi balombene kukita kintu kapanda kushii bukwashi bwa Yehowa. (Fid. 4:13) Su twi na uno mweneno, atwambula kileshesho ki buwa kya Yesu. Mu mushindo kinyi?

13. Mayi e mu Yowano 5:19, 30, aetulongyesha kinyi pabitale Yesu?

¹³ Sunga bibaadi Yesu mupwidikye, baadi mukulupile nka mwi Nshaye Yehowa. (Badika Yowano 5:19, 30.) Tabaadi efuku su ndimune mutompe kwata matalwa a Nshaye e mwiyilu. Mukanda wa Beena-Fidipe 2:6 awamba’shi Yesu ‘ta mupwandjikishe kwikala lutshi lumune n’Efile Mukulu nya.’ Bu bibaadi Mwana mukookyele, Yesu baadi auku mikalo yaaye na kuneemeka matalwa a Nshaye.

14. Nsaa ibabaadi bamutekye bwa kukita kintu kyashibaadi na matalwa a kukita, Yesu baadi mukite kinyi?

¹⁴ Tala kibaadi Yesu mukite nsaa ibaadi Shake, Yowano na nyinabo bamutekye kintu kyashibaadi na matalwa a kwibapa. Kushii kunyengakana, baadi mwibaluule’shi nka penda Nshaye e mwiyilu nyi mulombene kutuula muntu ku mboko ibalume na ku ibakashi ya Yesu mu Bufumu bwaaye. (Mat. 20:20-23) Yesu baadi muleshe’shi auku mikalo yaaye. Baadi mwiyishe. Tabaadi akitshi kintu su nkimune kishibadi Yehowa mumulungule bwa kukita nya. (Yo. 12:49) Mushindo kinyi watudi balombene kwambula kileshesho ki buwa kya Yesu?

15-16. Mbikunyi byatudya kutumikila elango di mu 1 Beena-Kodinda 4:6?

 ¹⁵ Twi balombene kwambula kileshesho kya Yesu kya kuuka mikalo yetu pa kutumikila elango di mu 1 Beena-Kodinda 4:6. Elango adyamba’shi: “Ta nwi balombêne kusambuka mudyanyino wabadi bele kwi Bifundwe.” Byabya, nsaa yabetutekye elango, tatukumanga kwakula mweneno eetu’twe banabene sunga kwakula kyooso akitufwila mu binangu. Abitungu elango dyetu ditukile mu Bible na mu mikanda ya mpika. Su tubakitshi bino, twi bashingule mikalo yetu. Na kwiyisha kooso, atutumbisha ‘mayi . . . alulame’ a Sha bukome booso.​—Kibaf. 15:3, 4.

¹⁶ Kukatusha kutumbisha Yehowa, kwi tungi tubingilo atwitutakula mu kuuka mikalo yetu. Binobino atukyebe kumona bi kwiyisha na kuuka mikalo yetu byabidi bilombene kwitutwadila muloo na kwitukwasha bwa kwikala bibuwa na bangi.

17. Bwakinyi bantu ba sha kwiyisha na abauku mikalo yaabo abekalaa na muloo?

¹⁷ Su twi beyishe na kuuka mikalo yetu, atwikala na muloo wi bungi. Bwakinyi? Su atuuku mikalo yetu, atwikala na lutumbu na muloo bwa bukwashi bwatupete kwi bangi. Tentekyesha musango ubaadi Yesu mupaashe ba shaa nsudi ekumi. Penda umune akwabadi, nyi balukile mu kutumbula Yesu mwanda baadi mumupaashe ku wawa mukumbo wibukopo​—washibaadi mulombene kwipasha. Uno muntu sha kwiyisha, baadi na lutumbu bwa bukwashi bubaadi mupete, na aye nkutumbisha Efile Mukulu.​—Luk. 17:11-19.

18. Kwiyisha na kuuka mikalo yetu akwitukwasha naminyi bwa kwikala kalolo na bangi? (Beena-Looma 12:10)

¹⁸ Bantu beyishe na abauku mikalo yaabo abakumiinaa kwikala pamune na bangi bantu, na kwikala n’abo bu kuuku. Bwakinyi? Abatundulaa’shi  bangi bantu be na ngikashi ibuwa na abebakulupilaa. Dingi, abekalaa na muloo nsaa ibangi abakitshi mudimo wabaadi bebape kalolo, abebatumbulaa na kwi ba neemeka.​—Badika Beena-Looma 12:10.

19. Tubingilo kinyi atwitutakula bwa kupela kwitatula?

¹⁹ Ku lungi lupese, bantu basha kwitatula t’abatumbulaa bangi, abakumiinaa nka’shi abo bebatumbishe. Abepwandjikisha na bangi na mbakumiine kikudi kya kwipikena. Pamutwe pa kulongyesha bangi na kwibapa mashito, muntu sha kwitatula amba’shi: “Abitungu nkite nkami nabeene, mwanda bangi tabekikitshi kalolo nya.” Muntu sha kwitatula akumiinaa kwilesha bu e na muulo kukila bangi na ekalaa na kyuutu nsaa ibangi abakitshi kintu kalolo ku mukila. (Nga. 5:26) Bantu be byabya tabakambaa kupeta ba kuuku. Su twa tundula’shi twi na kwitatula, abitungu tutekye Yehowa n’eshimba dyetu dyooso bwa’shi ‘etupe binangu bipya’ bwa’shi tatwikalanga na kwitatula.​—Lom. 12:2, EEM.

20. Bwakinyi abitungu twikale beyishe na kuuka mikalo yetu?

²⁰ Twi na lutumbu ngofu bwa kileshesho kya Yehowa! Tubamono mushindo wadi mukitshine bafubi baaye myanda, na atukumiina kumwambula. Na dingi, twambuleyi bileshesho bi buwa bi mu Bible bya bantu beyishe abaadi bapete kineemo kya kutambuka n’Efile Mukulu. Tutungunukyeyi na kuneemeka na kutumbisha Yehowa mwanda mbimulombene. (Kibaf. 4:11) Su tubakitshi bino byooso, atutambuka na Yehowa mwanda mmufule bantu beyishe na abauku mikalo yabo.