1. Andi Dafiti bi taki u di sakafasi di Jehovah abi?

U SA taki tuutuu taa Jehovah abi sakafasi ö? Wë aai, u sa taki ën. Dafiti bi taki taa: „Joo tjubi mi da hogi. Di sakafasi fii hën wë ta hei mi” (2 Sam. 22:36; Ps. 18:35). Di Dafiti bi taki di soni aki, nöö kandë a bi ta mëni di daka di di tjabukama Samuëli bi ko nëën tata pisi, ko salufu di sëmbë di bi o toon di njunjun könu. Dafiti tata bi abi aiti womi mii, nöö Dafiti hën bi dë di möön pikiwan. Ma hën Jehovah bi tei faa ko dë könu a Könu Saulosu kamian.​—1 Sam. 16:1, 10-13.

2. Andi woo taki a di woto aki?

² A musu u dë sö taa Dafiti bi o piki ku di soni di wan psalöm sikifima bi taki u Jehovah. A bi taki taa: „A ta bendi faa sa luku mundu ala ku goonliba aki. A ta hopo di möfina sëmbë puu a goon. A ta hopo di pooti sëmbë . . . u mbei a go sindo ku dee heihei sëmbë” (Ps. 113:6-8). A di woto aki, woo taki fosu andi u sa lei u di fasi de kai sakafasi, te woo luku unfa Jehovah bi lei taa a abi di fasi dë. Baka di dë, nöö woo luku andi u sa lei a Könu Saulosu, a di tjabukama de kai Daniëli, söseei a Jesosi, te a nama ku sakafasi.

3. Unfa Jehovah ta libi ku u, nöö andi di soni dë ta lei u?

³ Jehovah ta lei taa a abi sakafasi, te u luku di fasi fa a ta libi ku dee dinima fëën, hii fa de abi zöndu. A ta wai ku di dini di u ta dini ën. Ma na di dë nöö, a ta si u kuma mati fëën tu (Ps. 25:14). U di Jehovah bi kë jabi pasi da u fuu ku ën sa ko dë mati, mbei a manda di Womi Mii fëën ko dëdë paka dee zöndu fuu da u. Na piki tjalihati fuu Jehovah lei taa a abi!

4. Andi Jehovah da u, nöö faandi mbei a da u di soni dë?

 ⁴ Luku wan woto soni di ta lei taa Jehovah abi sakafasi. Jehovah hën mbei u, nöö a bi sa mbei u a sö wan fasi taa wa sa taki da useei andi u kë du ku u libi. Ma an du di soni dë. A mbei u kumafa hënseei dë, hën a da u pasi fu useei sa taki andi woo du. Hii fa wa dë wan hojo soni, tökuseei Jehovah kë fuu dini ën ku hii u hati u di u lobi ën, söseei u di u ta si taa a bunu da u tuutuu fuu ta piki hën buka a soni (Deto. 10:12; Jes. 48:17, 18). U musu ta tei ën u bigi seei taa Jehovah abi sakafasi sö!

5. Unfa Jehovah ta heepi u fuu ko abi sakafasi? (Luku di peentje u di kafiti.)

⁵ Jehovah ta heepi u fuu ko abi sakafasi. A ta du di soni dë ku di fasi fa a ta libi ku u. Jehovah da di möön köni sëmbë u hii di mundu. Ku ën sö seei a ta dë kabakaba u haika dee soni dee wotowan ta piki ën. Jehovah bi da di Womi Mii fëën pasi faa heepi ën mbei hii dee soni dee a mbei (Nöng. 8:27-30; Kol. 1:15, 16). Hii fa Jehovah abi hii makiti, tökuseei a ta da wotowan taki a soni tu. A buta Jesosi faa dë Könu u di Könuköndë fëën, nöö a o da dee 144.000 sëmbë dee o tii ku Jesosi, taki a so soni tu (Luk. 12:32). Wë an dë u taki taa Jehovah bi heepi Jesosi faa bi sa ko dë Könu ku Gaan Mindima (Heb. 5:8, 9). A ta heepi dee sëmbë dee o tii ku Jesosi u de ko sabi unfa de musu du di wooko u de tu. Ma an ta dë a de baka hii juu ta piki de unfa de musu du di wooko. Ka faa du sö, nöö a ta futoou de taa de o du soni kumafa a kë.​—Ako. 5:10.

6-7. Andi u sa lei a di Tata fuu di dë a liba ala, te a nama ku di da di u musu ta da wotowan so wooko u de du?

⁶ Di Tata fuu di dë a liba ala an abi fanöudu u sëmbë heepi ën. Ma tökuseei a ta da wotowan taki a soni. Di wan seei soni aki u musu ta du tu. I da wan hedima u wosudendu nasö wan gaanwomi u kemeente u? Wë ee sö, nöö djeesi  Jehovah a di fasi fa a ta du soni. Da wotowan so wooko u de du, nöö na ta dë a de baka hii juu ta piki de unfa de musu du di wooko. Te i ta djeesi Jehovah, nöö di wooko o du. Ma na di dë nöö, joo heepi wotowan u deseei ko sa’ u du wooko tu. Söseei joo heepi de u de ko ta biibi taa de sa du soni tu (Jes. 41:10). Andi da wan woto soni di dee sëmbë dee abi taki a soni, sa lei a di fasi fa Jehovah ta du soni?

⁷ Di Bëibel ta heepi u fuu si taa Jehovah ta kë sabi unfa dee womi mii fëën a liba ala seei ta si soni tu (1 Kön. 22:19-22). Un dee mama ku dee tata, unfa unuseei sa djeesi Jehovah? Wë te a fiti, nöö un sa hakisi dee mii fuunu u deseei taki unfa de si kuma un sa du wan wooko. Nöö te a fiti, nöö un sa du kumafa de taki.

8. Unfa Jehovah bi libi ku pasensi, ku Abahamu ku Sala?

⁸ Jehovah ta lei tu taa a abi sakafasi, ku di pasensi di a abi. Jehovah ta hoi pasensi te dee dinima fëën ta hakisi a wan lesipeki fasi ee faandi mbei a du wan soni kumafa a du ën. Jehovah bi haika di Abahamu bi taki taa an bi ta si kuma a bi o bunu u Jehovah booko Sodom ku Gomola (Ken. 18:22-33). Buta pakisei tu a di fasi fa Jehovah bi libi ku Sala, Abahamu mujëë. A bi paamusi Abahamu ku Sala taa Sala bi o ko dë ku bëë hii fa a bi ko gaandi, hën Sala lafu di soni di a taki. Ma hati fëën an bi boonu ku Sala (Ken. 18:10-14). Ma a bi libi ku ën ku lesipeki.

9. Andi dee mama ku dee tata, ku dee gaanwomi, sa lei a di fasi fa Jehovah ta du soni?

⁹ Un dee mama ku dee tata, ku un dee gaanwomi, andi un sa lei a di fasi fa Jehovah ta du soni? Andi un ta du te dee mii fuunu, nasö te so sëmbë u di kemeente an lobi di soni di un kë du? Un ta biinga piki de taa de hën na ta si soni a wan bunu fasi ö? Naa un ta mbei möiti fuun ko fusutan unfa de ta si di soni? Wë u sa dë seiki taa dee sëmbë u wan wosudendu ku dee sëmbë u wan kemeente ta feni wini, te dee sëmbë dee ta tei fesi ta djeesi Jehovah a di fasi fa a ta du soni. Wë u taki kaa andi u sa lei a di sakafasi di Jehovah abi. Nöunöu boo taki andi u sa lei a wantu sëmbë di di Wöutu u Gadu ta taki soni u de, te a nama ku sakafasi.

10. Unfa Jehovah ta tei woto u sëmbë, u lei u soni?

¹⁰ Jehovah da di Sëmbë di ta lei u soni, nöö a ta konda soni u sëmbë a di Wöutu fëën da u, u lei u soni (Jes. 30:20, 21). U ta lei soni te u ta pakisei fundu u dee woto u dee sëmbë, dee bi lei taa de abi fasi di Gadu lobi, te kisi di fasi de kai sakafasi. U ta lei wan soni tu a dee sëmbë dee an bi lei taa de abi dee bunu fasi aki.​—Ps. 37:37; 1 Kol. 10:11.

11. Andi u sa lei a di föutu fasi fa Saulosu bi du soni?

¹¹ Pakisei di soni di bi pasa ku Könu Saulosu. Bigibigi, a bi dë wan njönku kijoo di bi abi sakafasi. A bi sabi andi a bi sa du ku andi an bi sa du, nöö a bi pasa seei taa an bi kë u de dëën möön faantiwöutu (1 Sam. 9:21; 10:20-22). Ma bakaten Saulosu bi ko abi gaanfasi, nöö a bi du soni di an bi abi leti u du. A bi ko dë sö, kölö sö baka di a toon könu. Wan pasi, an bi hoi pasensi wakiti di tjabukama Samuëli. Ka faa bi futoou Jehovah taa Jehovah o du wan soni u heepi dee Isaëli sëmbë, hën a tjuma wan soni da Jehovah, hii fa an bi abi leti faa du di soni dë. Te u kaba fëën, Jehovah an bi feni Saulosu u bunu möön, hën a puu ën fu an dë könu möön (1 Sam. 13:8-14). Wë a bunu seei fuu lei wan soni a di woto aki. U musu ta köni fu wa du soni di wa abi leti u du.

12. Unfa Daniëli bi lei taa an bi ta si hënseei hei?

¹² Saulosu an bi du soni a wan bunu fasi. Ma luku fa di tjabukama Daniëli hën a bi du soni a wan bunu fasi. Daniëli bi dë wan sakafasi  womi hii hën libi longi, nöö an bi ta si hënseei hei. Hii juu a bi ta hakisi Jehovah faa tii ën. Di Jehovah bi tei Daniëli faa puu di sunjan u Nebukatnesali dëën, nöö Daniëli an bi taki taa hën puu di sunjan. Ma a bi taki taa Jehovah hën bi du ën (Dan. 2:26-28). Andi di soni aki ta lei u? Wë a ta lei u taa ee dee baaa ku dee sisa lobi dee taki dee u ta hoi, nasö ee soni ta waka bunu da u a di peleikiwooko, nöö Jehovah hën u musu da di gafa. U musu lei taa u sabi taa wa bi o sa du dee soni dë ee Jehovah an bi heepi u (Fil. 4:13). Te u ta du soni a di lö fasi dë, nöö a o dë taa u ta djeesi Jesosi a di bunu fasi fa a bi ta du soni. Unfa sö?

13. Andi u ta lei a Jesosi, te u luku Johanisi 5:19, 30?

¹³ Hii fa Jesosi bi dë di Womi Mii u Gadu, söseei hii fa an bi abi zöndu, tökuseei a bi ta mbei Jehovah tii ën. (Lesi Johanisi 5:19, 30.) Nöiti a suku u puu di makiti fëën Tata nëën maun. Filipi 2:6, NW ta piki u taa Jesosi „an pena pakisei u tei di hei [u Gadu] ku taanga faa bi sa dë kuma Gadu”. Jesosi bi ta saka hënseei nëën Tata basu. A bi ta fusutan taa soni dë di an sa du, nöö a bi ta lesipeki di makiti di hën Tata abi.

14. Unfa Jesosi piki di sëmbë bi hakisi ën faa da de wan soni di an bi abi taki nëën liba faa da sëmbë?

¹⁴ Buta pakisei a di fasi fa Jesosi bi piki di Jakobosi, Johanisi, ku de mama bi waka ko nëën, hën de hakisi ën faa da de wan soni di an bi abi taki nëën liba, faa da sëmbë. Wantewante dë Jesosi bi piki de taa di Tata fëën a liba ala wanwan nöö bi sa taki ambë bi o sindo nëën leti maun së, söseei nëën töötö maun së, a di Könuköndë (Mat. 20:20-23). Jesosi bi lei taa a bi ta lesipeki di soni dë. A bi sabi andi a bi abi leti u du, ku andi an bi abi leti u du. A bi abi sakafasi. Nöiti a du wan soni di Jehovah an bi piki ën faa du (Joh. 12:49). Unfa u sa djeesi Jesosi a di bunu fasi fa a bi du soni?

15-16. Unfa u sa du di soni di di Bëibel ta taki a 1 Kolenti 4:6?

¹⁵ U ta lei taa u ta djeesi Jesosi a di sabi di a bi sabi andi a bi abi leti u du, ku andi an bi abi leti u du, te u ta du di soni di di Bëibel ta taki a 1 Kolenti 4:6. Di Bëibel ta piki u naandë taa: „Wan musu tei oto wëti möön leki dee wëti Gadu da u.” Fëën mbei te sëmbë hakisi u fuu piki de unfa de sa du wan soni, nöö nöiti u musu duwengi de u de si soni kumafa uu ta si soni. Söseei wa musu piki de wan soni söndö  fuu buta pakisei bumbuu a di soni di woo piki de. Ka fuu du soni sö, nöö u musu buta pakisei a di soni di di Bëibel ta taki, nasö di dee buku fuu ta taki. Te u ta du soni a di lö fasi dë, nöö woo lei taa u ta fusutan taa wa sabi hii soni. Boiti di dë, woo lei taa u ta fusutan taa hii juu di soni di Jehovah taki, ta bunu möön di u fuu.​—Ako. 15:3, 4.

¹⁶ Te u ta lei taa u abi sakafasi, nöö u ta tja gafa ko da Jehovah. Ma woto soni dë tu di mbei u musu ta lei taa u abi di fasi aki. Nöunöu woo taki unfa di fasi aki sa heepi u fuu ta dë waiwai, söseei fuu sa ta libi fiifii ku wotowan.

17. Faandi mbei dee sëmbë dee abi sakafasi, söseei dee ta fusutan taa na hii soni de sa du, ta dë waiwai?

¹⁷ Te u abi sakafasi, söseei te ta fusutan taa na hii soni u sa du, nöö u ta möön dë waiwai. Faandi mbei u taki sö? Wë te u fusutan taa so soni dë di wa sa du, nöö woo ta tei hiniwan soni di wotowan ta du da u, u bigi. Pakisei di Jesosi bi kula dee teni kököbëma. Wan kodo u de nöö bi toona ko a Jesosi ko dëën tangi, u di a bi kulëën. Di womi aki bi abi sakafasi, nöö a bi sabi taa an bi o sa ko bëtë ee Jesosi an bi heepi ën. Fëën mbei a bi gafa Gadu.​—Luk. 17:11-19.

18. Unfa sakafasi ku di si di wa ta si kuma u sa du hii soni, ta heepi u fuu sa libi fiifii ku wotowan? (Loomë 12:10)

¹⁸ Sëmbë di abi sakafasi, söseei di ta fusutan taa na hii soni de sa du, lo’ u libi fiifii ku wotowan. Boiti di dë, de möön lo’ u abi mati tu. Faandi mbei? Wë u di de ta dë kabakaba u si taa wotowan abi bunu fasi, nöö de ta futoou de. Sëmbë di abi sakafasi, söseei di ta fusutan taa na hii soni de sa du, ta wai te soni ta waka bunu da wotowan a dee soni de ta du. Boiti di dë, de ta dë kabakaba u gafa de, söseei u hei de.​—Lesi Loomë 12:10.

19. Faandi mbei u musu ta köni fu wa ko abi gaanfasi?

 ¹⁹ Soni ta dë woto fasi ku sëmbë di abi gaanfasi. A ta taanga da sëmbë di abi gaanfasi u de gafa wotowan, u di de ta kë taa de sëmbë musu gafa. Sëmbë di abi gaanfasi ta möön lo’ u tei deseei maaka ku wotowan, söseei de lo’ u mbei möiti faa dë taa de ta du soni bunu möön wotowan. Dee lö sëmbë aki an lo’ u heepi wotowan u deseei ko sa’ u du soni, söseei de an lo’ u da wotowan faantiwöutu. Ka u de du sö, nöö de lo’ u taki taa: „Ee i kë u wan soni musu du bunu, nöö i musu du ën iseei.” Wan sëmbë di abi gaanfasi ta kë dë hei möön wotowan hii juu, nöö a ta haun te wotowan du soni bunu möön ën (Gal. 5:26). A lo’ u pasa taa dee sëmbë aki ku wotowan an ta dë mati longi. Ee u ko si taa u ta du soni di ta lei taa u abi gaanfasi, nöö u musu begi Jehovah ku hii u hati be a heepi u fuu ’tooka di pakisei fuu’, be di fasi aki an fika ku u.​—Lom. 12:2.

20. Faandi mbei u musu abi sakafasi?

²⁰ U dë ku tangi a hati seei u di Jehovah dë sö wan Gadu! U ta si taa a abi sakafasi, te u luku di fasi fa a ta libi ku dee dinima fëën, nöö u kë djeesi ën a di fasi dë. Boiti di dë, u kë djeesi dee sëmbë di di Bëibel ta piki u taa bi du soni a wan bunu fasi, u di de bi dini Jehovah ku sakafasi. Boo ta mbei möiti hii juu fuu ta da Jehovah di gafa di a musu kisi (Ako. 4:11). Ee u du hii dee soni aki, nöö u ku Jehovah o sa dë mati u nöömö, u di a lobi sëmbë di abi sakafasi.