1. Ndiéjunʼ niʼthí David ga̱jma̱a̱ numuu rí Jeobá nindxu̱u̱ guabaaʼ rá.

MA̱NDOO mbuʼyáá gajkhun dí Jeobá nindxu̱u̱ xa̱bu̱ guabaaʼ ráʼ. Xúʼko̱, numuu rí David niʼthí: “Ikháán naraxnuʼ escudo dí maʼni kríñunʼ ga̱jma̱a̱ rí nindxaaʼ xa̱bu̱ guabaaʼ naʼni rí maguʼdoʼ numuʼ” (2 Sam. 22:36; Sal. 18:35). Índo̱ David niʼnirámáʼ ajngáa rígi̱ mbáa nindxa̱ʼwáminaʼ índo̱ gaʼyee Samuel ni̱jkha̱ náa goʼwóo anu̱u̱ mu maríyaaʼ mani̱ndxu̱u̱ rey náa Israel nda̱wa̱á. Maski ajndu David ninindxu̱u̱ bi̱ itháan chíʼgíʼ náa mbá migiñiiʼ a̱ngui̱i̱n mú Jeobá niríyaaʼ mu mariʼkuriyaaʼ rey Saúl (1 Sam. 16:1, 10-13).

2. Ndiéjunʼ guʼyáá náa artículo rígi̱ rá.

² Mbáa David ndiʼyoo xó má nikumu̱u̱ mbáa bi̱ niʼnirámáʼ Salmo bi̱ niʼthí ga̱jma̱a̱ numuu Jeobá xígi̱: “Ikhaa naginduti̱ga̱ mu mbaʼyoo mekhu ga̱jma̱a̱ ku̱ba̱ʼ, mu makuxi̱i̱ xa̱bu̱ guabaaʼ náa yujndaʼ [...] mu maʼni rí magiʼi gajmíi̱n bi̱ guaʼdáá numúún” (Sal. 113:6-8). Náa artículo rígi̱ magutangáanʼ mbuʼyáá xú káʼnii nisngájma Jeobá rí ninindxu̱u̱ xa̱bu̱ guabaaʼ ma̱ngaa mbuʼyáá ikha rí gajmañulú. Nda̱wa̱á mbuʼyáá xú káʼnii eʼsngúlú xkri̱da ndrígóo rey Saúl, gaʼyee Daniel ga̱jma̱a̱ Jesús rí ikhiin ndiyáá rí ndiyóoʼ mixtambáñunʼ.

3. Xú káʼnii eʼyulú Jeobá, ga̱jma̱a̱ ndiéjunʼ esngájma rígi̱ rá.

³ Mbáa rí xóo nasngájma Jeobá rí nindxu̱u̱ xa̱bu̱ guabaaʼ rí xóo naʼniún xa̱bu̱ aʼkhá. Raʼkháa i̱ndó nagruiguáanʼlú xóo mbáa bi̱ ndaʼyamajkuu ma̱ngaa ndaʼyulú xóo mbáa bi̱ nambáxuʼ gajmiúlú (Sal. 25:14). Nandoo nambájxu gajmiúlú numuu rí nixnáxi̱i̱ a̱ʼdióo makhañúu ga̱jma̱a̱ numuu aʼkhúlúʼ. ¡Ra̱ʼkhá tháán nigáwiinʼ a̱jkiu̱u̱n kaʼyulú!

4. Xkáʼnii niʼniáánʼlú Jeobá, ga̱jma̱a̱ náá numuu rá.

⁴ Guʼyáá imbo̱ʼ rí nasngájma rí Jeobá nindxu̱u̱ xa̱bu̱ guabaaʼ. Na̱nguá má ndiyóoʼ maʼniwáánʼ rí ma̱ndoo muraʼwíí rí muʼni. Mú xúʼko̱ niʼniáánʼlu. Niʼniáánʼ rí ma̱ndoo mbuʼyaridáá ikhaa ga̱jma̱a̱ niʼni rí ma̱ndoo muraʼwíí rí muʼni. Maski ajndu ikháanʼ na̱nguá guaʼdáá numulú xóo ikhaa, mú nandoo rí muʼni ñajuunʼ numuu rí nandulú kuʼyáá ma̱ngaa numuu rí nduʼyáá rí á mu nuniʼmbulúʼ mambáyulú má ikháanʼ (Deut. 10:12; Is. 48:17, 18). Nuxnáa wéñuʼ núma̱aʼ rí Jeobá nindxu̱u̱ xa̱bu̱ guabaaʼ.

5. Xú káʼnii eʼsngúlúʼ Jeobá rí manindxu̱lúʼ xa̱bu̱ guabaaʼ rá. (Atayáá xtiʼkhuu rí na̱ʼkha̱ náa timbá ináa.)

⁵ Jeobá naʼsngúlúʼ rí manindxu̱lúʼ xa̱bu̱ guabaaʼ xó má eʼni ikhaa gajmíi̱n xa̱bu̱ bi̱ niʼniwíin. Maski ajndu ikhaa nindxu̱u̱ mbáa bi̱ itháan ndaʼyoo bi̱ xtáa náa tsu̱du̱u̱ numbaaʼ mú nagruigú ga̱jma̱a̱ gamajkhu dí nutháán eʼwíinʼ. Mbá xkri̱da niniñuuʼ rí A̱ʼdióo mambáyuuʼ índo̱ niʼniwíi xúgíʼ dí rígá (Prov. 8:27-30; Col. 1:15, 16). Maski ajndu Jeobá gíʼdoo xúgíʼ tsiakii mú naniñuuʼ rí eʼwíinʼ mumbayíí. Mbá xkri̱da nigíiʼ Jesús mani̱ndxu̱u̱ Rey náa Reino ga̱jma̱a̱ niʼni rí mbá 144,000 xa̱bu̱ numbaaʼ bi̱ mutañajunʼ gajmíi̱n ikhaa (Luc. 12:32). Niʼnirataa Jesús rí mani̱ndxu̱u̱ Rey ga̱jma̱a̱ bi̱ Mbayá Edxu̱u̱  náa Ndxajkun (Heb. 5:8, 9). Ma̱ngaa naʼniratiin bi̱ maʼtáñajunʼ gajmíi̱n A̱ʼdióo, mú na̱nguá exnún ñajunʼ mu nda̱wa̱á mbaʼyoo á mu najmiin nuni, ikhaa naku̱mu̱u̱ kaʼñún rí majmiin muni xó má nandoo ikhaa (Apoc. 5:10).

6, 7. Bi̱ kuya̱ edxu̱u̱ náa mbá guʼwíin o náa nagimbáanʼ xú káʼnii gándoo guʼyaridáá Jeobá xá.

⁶ Á mu Anu̱lú bi̱ xtáa mekhuíí naʼni rí eʼwíinʼ mumbayíí maski ajndu ikhaa na̱nguá eyóoʼ rí mixtambáyíi. Iwáá lá ikháanʼ rá. Ikha jngó gíʼmaa mbuʼyaridáá. Mbá xkri̱da, xú káʼnii gándoo mbuyaridáá bi̱ kuya̱ edxu̱u̱ náa mbá guʼwá ga̱jma̱a̱ bi̱ kuya̱ edxu̱u̱ náa congregación rá. Índo̱ guxnúún eʼwíinʼ ñajunʼ rí muni xuyáá kuduun dí kúwá runi, gakumu̱ún má rí muni májánʼ ñajunʼ. Á mu nuni xúʼko̱ raʼkháa i̱ndó magajnúu mbá ñajunʼ, ma̱ngaa rí musngúún eʼwíinʼ ga̱jma̱a̱ rí mumbañún makumún rí najmiin má nuni ñajunʼ (Is. 41:10). Bi̱ guaʼdáá mbá ñajunʼ, ndiéjunʼ i̱ʼwáʼ gándoo majmañún itháan náa Jeobá xá.

⁷ Náa Biblia naʼthí rí Jeobá ndiʼyamajkuu xóo nindxaʼwamijna ángeles (1 Rey. 22:19-22). Xú káʼnii gándoo xabuanii bi̱ guáʼdiin e̱ji̱n mbuyaridáá xá. Índo̱ gándoo, muraxu̱u̱n e̱jñún xú káʼnii ekumu̱ún ikhiin rí gíʼmaa maguma mbá ñajunʼ, ga̱jma̱a̱ á mu kayáa, ma̱ndoo muni xó má nithi.

8. Xú káʼnii nisngájma Jeobá rí niʼngo̱o̱ a̱jkiu̱u̱n kaʼyoo Abrahán ga̱jma̱a̱ Sara.

⁸ Jeobá ma̱ngaa nasngájma rí nindxu̱u̱ xa̱bu̱ guabaaʼ índo̱ naʼngo̱o̱ a̱jkiu̱u̱n. Mbá xkri̱da naʼngo̱o̱ a̱jkiu̱u̱n kaʼñún xa̱bi̱i̱ índo̱ naʼniún gakhii mundrígú mbá rí ikhaa niraʼwíí maʼni. Garmáʼáan a̱jkiu̱lú xóo niʼni índo̱ Abrahán niʼniuu gakhii maʼnimbo̱o̱ rí niraʼwíí maʼni gámbáa Sodoma ga̱jma̱a̱ Gomorra (Gén. 18:22-33). Ma̱ngaa xú káʼnii niʼni índo̱ Sara ninduʼwá índo̱ niʼdxaun rí maguewáan mbáa ada̱ índo̱ nikhi̱i̱ má. Ikhaa na̱nguá nikiʼnáa kaʼyoo niʼthúu̱n ga̱jma̱a̱ gamajkhu (Gén. 18:10-14).

9. Bi̱ kuya̱ edxu̱u̱ náa mbá guʼwá jma̱a̱ náa congregación xkáʼnii gándoo gajmañún náa xkridoo Jeobá xá.

⁹ Á mu ikháán ni̱ndxa̱ʼ anún e̱ji̱n o bi̱ kayá edxu̱u̱, ndiéjunʼ gándoo gajmañaaʼ náa xkridoo Jeobá rá. Atatsaʼwáminaʼ xú káʼnii tani ikháán índo̱ i̱mba̱ tsénigu̱u̱ʼ rí xóo nitraʼwíí matani. Lá mbá nacha̱ ratháán dí raʼkhí eʼni xáʼ. O nataniminaʼ makruaʼaaʼ náá numuu rí xúʼko̱ eʼthí dxe̱ʼ. Índo̱ bi̱ kuya̱ edxu̱u̱ nduyaridáá Dios nambáñun wéñuʼ bi̱ kúwá náa mbá guʼwíin ga̱jma̱a̱ bi̱ kúwá náa congregación. Ajndu gi̱jyooʼ nijmañulúʼ xú káʼnii eʼsngúlúʼ dí Jeobá nindxu̱u̱ xa̱bu̱ guabaaʼ. Rí xúgi̱ majmañulúʼ mbaʼa xkri̱da ndrígu̱ún bi̱ na̱ʼkha̱ raʼthí náa Biblia ga̱jma̱a̱ numuu rí xúʼyáá rí ikháanʼ najmañulúʼ má wéñuʼ.

10. Xú káʼnii eʼsngúlú ikha Jeobá rá.

¹⁰ Numuu rí Jeobá nindxu̱u̱ bi̱ “Naʼsngáa itháan májánʼ”, niniñuuʼ náa Ajngá rawuunʼ xkri̱da rí ma̱ndoo maʼsngulúʼ (Is. 30:20, 21). Ma̱ndoo mundxaʼwáá edxu̱lúʼ náa xkri̱da ndrígu̱ún bi̱ ninindxu̱ún xó má Dios niniguuʼ, xóo índo̱ nikumu̱ún rí na̱nguá ejmañún má wéñuʼ ga̱jma̱a̱ ndiéjunʼ niguaʼnii bi̱ nikumu̱ún dí ra̱ʼkhá tháán má nijmañún (Sal. 37:37; 1 Cor. 10:11).

11. Ndiéjunʼ ejmañuluʼ dí xóo niʼni Saúl.

¹¹ Gundxaʼwáá edxu̱lúʼ rí nigíʼnuu rey Saúl. Índo̱ kaʼnííʼ ndxáma nindxu̱u̱ tákumu̱u̱ rí ikhaa nijmañuu wéñuʼ, ikha jngó niʼniuu mingíjyúuʼ magruigú ñajunʼ mba̱ʼu̱ (1 Sam. 9:21; 10:20-22). Mú nda̱wa̱á rí ninindxu̱u̱ rey niʼnimbamínáʼ ga̱jma̱a̱ niʼni mbá dí rakáʼyoo maʼni ikhaa. Mbá miʼtsu táʼndoo gagíʼthu̱u̱n rí asndu maʼkhanu gaʼyee Samuel. Ikhaa nixnáxi̱ mbá tsigijñaʼ rí asndu na̱nguá kaʼyoo maʼni ikhaa, tánindxu̱u̱ xa̱bu̱ guabaaʼ ga̱jma̱a̱ takumu̱u̱ kaʼyoo Jeobá rí ikhaa má gámbáyúu xuajñuu. Ikha  jngó Jeobá nánguá nindoo gáʼyoo ga̱jma̱a̱ nda̱wa̱á nirígú káʼyúuʼ rí maʼtáñajunʼ (1 Sam. 13:8-14). Májánʼ gáʼni rí majmañulúʼ ikha rígi̱, rí xúʼni mbá dí rakáʼyulú muʼni.

12. Xú káʼnii xkri̱da májánʼ niniñuuʼ Daniel rá.

¹² Gaʼyee Daniel ninindxu̱u̱ mixtiʼkuii xóo Saúl, ikhaa niniñuuʼ mbá májánʼ xkri̱da. Náa xúgíʼ mbiʼi rí nixtáa ninindxu̱u̱ má xúʼko̱ xa̱bu̱ guabaaʼ ga̱jma̱a̱ na̱nguá ndiʼyoo dí nijmañuu wéñuʼ numuu rí ndiyáaʼ má xúʼko̱ ikha ndrígóo Jeobá. Mbá xkri̱da índo̱ Dios nijmiuu mu maʼtájuíi xnuʼndaa ndrígóo Nabucodonosor, na̱nguá niʼthí dí ikhaa nijmañuu rí phú niʼni nixnúu gamajkhu Jeobá (Dan. 2:26-28). Rígi̱ najmañulúʼ rí índo̱ nuxná mbá discurso índo̱ a̱ngiu̱lú nanigu̱u̱nʼ o nagájnuu májánʼ índo̱ na̱jkua̱ guʼtáraʼa, gíʼmaa muxnáa xúgíʼ gamajkhu Jeobá. Guʼyáá rí xajmañuluʼ á mu i̱ndó tsiakii ndrígúlú ikháanʼ eʼni, rí ndayóoʼ dí ikhaa mambáyulú (Filip. 4:13). Ma̱ngaa xúʼko̱ kuwáánʼ ruʼyaridáá Jesús. Guʼyáá náá numuu nuʼthá xúʼko̱.

13. Ndiéjunʼ eʼsngúlú dí naʼthí náa Juan 5:19, 30 dí xóo ninindxu̱u̱ Jesús rá.

¹³ Maski ajndu Jesús ninindxu̱u̱ A̱ʼdióo Dios, ikhaa nikumu̱u̱ kaʼyoo má xúʼko̱ Jeobá (atraxnuu Juan 5:19 *, 30). * Mu nditháan taʼniminaʼ rí marígú káʼyúuʼ ñajunʼ ndrígóo Anu̱u̱ bi̱ xtáa mekhuíí. Náa Filipenses 2:6 naʼthí rí Jesús “na̱nguá nindxa̱ʼwáminaʼ rí mani̱ndxu̱u̱ xó má Dios”. Nikro̱ʼo̱o̱ asndu náa etumuu ñajunʼ rí gajkuáa ñawúunʼ ikhaa, ma̱ngaa ndiʼyamajkuu rí kaʼyoo maʼni Anu̱u̱ ga̱jma̱a̱ naʼnimbo̱o̱ kaʼyoo.

14. Xú káʼnii niʼni Jesús índo̱ ninda̱ʼa̱a̱ mbá dí rakáʼyoo maʼni xá.

¹⁴ Gundxaʼwamíjna̱ xú káʼnii niʼni Jesús índo̱ ru̱dúu̱ Santiago ga̱jma̱a̱ Juan nindo̱ʼo̱o̱ maʼni rí mbáa a̱ʼdióo magiʼi náa ñawún mújúnʼ ga̱jma̱a̱ imba̱a̱ náa ñawún xti̱yu̱u̱ʼ ikhaa índo̱ gaʼtáñajunʼ. Mbá nacha̱ má Jesús niʼthí dí i̱ndó Anu̱u̱ bi̱ xtáa mekhuíí kaʼyoo maxnúún ñajunʼ rúʼko̱ (Mat. 20:20-23). Xúʼko̱ nisngájma rí ndiʼyamajkuu asndu náá jmbriga̱a̱ rí kaʼyoo maʼni ikhaa. Ninindxu̱u̱ xa̱bu̱ guabaaʼ ga̱jma̱a̱ nditháan táʼni  mbá rí Jeobá táʼthún maʼni (Juan 12:49). Xú káʼnii gándoo guʼyaridáá xá.

15, 16. Xú káʼnii gándoo muʼgíiʼ muʼni rí naʼthí náa 1 Corintios 4:6 rá.

¹⁵ Guʼyaridáá xkridoo Jesús índo̱ táʼni mbá dí rakáʼyoo maʼni índo̱ nuʼnimbánii dí naʼthí náa 1 Corintios 4:6: “Xárata itháan rí na̱ʼkha̱ náa kiʼniraʼmá”. Ikha jngó índo̱ mbáa naʼthúlú muxnáá mbá consejo xúʼtháán ginii rí nundxa̱ʼwáá edxu̱lúʼ. Rí phú gíʼmaa muʼni nindxu̱u̱ rí muʼthán dí na̱ʼkha̱ raʼthí náa Biblia ga̱jma̱a̱ dí naʼthí náa i̱yi̱i̱ʼ ndrígúlú. Xúʼko̱ nusngajmá dí ikháanʼ tséjmañulúʼ, ‹rí naʼthí Jeobá› nindxu̱u̱ itháan májánʼ rí ma̱ndoo muʼthá (Apoc. 15:3, 4).

¹⁶ Xó má ndiʼyáá rí manindxu̱lúʼ xa̱bu̱ guabaaʼ ga̱jma̱a̱ índo̱ nduʼyáá rí tsejmañulúʼ, naʼni rí muxnáá gamajkhu Jeobá. Rí xúgi̱ mbuʼyáá xú káʼnii embáyuluʼ rí manindxu̱lúʼ xa̱bu̱ guabaaʼ ga̱jma̱a̱ índo̱ nduʼyáá rí tsejmañulúʼ, mu makuwáanʼ gagi ga̱jma̱a̱ rí mambáxulúʼ májánʼ gajmiúlú eʼwíinʼ.

17. Ndíjkha rí nakúwá gagi bi̱ guabiinʼ ga̱jma̱a̱ bi̱ nduyáá rí ndayóoʼ mumbañún xá.

¹⁷ Á mu ni̱ndxu̱lú xa̱bu̱ guabaaʼ ga̱jma̱a̱ nduʼyáá rí ndayóoʼ mumbayulúʼ, rúʼko̱ gaʼni rí makuwáanʼ gagi. Náá numuu rá. Numuu rí nduʼyáá rí tséʼngulú má i̱ndó ikháanʼ muʼni xúgíʼ, índo̱ eʼwíinʼ nutulúʼ rí mumbáyulú nundriʼgú ga̱jma̱a̱ májánʼ. Garmáʼáan a̱jkiu̱lú índo̱ Jesús niʼni thanún mbá 10 xa̱bu̱ bi̱ niguaʼdáá lepra. Káaʼ mbáwíi xa̱bu̱ nitanga̱a̱ gáxnáa núma̱aʼ numuu rí nánguá gíʼdoo nandii xkawiʼ rúʼko̱. Xa̱bu̱ guabaaʼ bugi̱ ni̱jkha̱nú ndiʼyoo rí ikhaa mbáwíi nditháan xájmaa gáʼni thanaminaʼ, ikha jngó ra̱ʼkhá tháán nixnáa núma̱aʼ ga̱jma̱a̱ nixnúu gamajkhu Dios (Luc. 17:11-19).   

18. Xkáʼnii embáyuluʼ manindxu̱lúʼ xa̱bu̱ guabaaʼ jma̱a̱ mbuʼyáá dí ndayóoʼ mumbayulúʼ xá. (Romanos 12:10.)

¹⁸ Xa̱bu̱ guabiinʼ ga̱jma̱a̱ bi̱ nduyáá rí ndayóoʼ  mumbañún nambáxu̱u̱n májánʼ gajmiún eʼwíinʼ, numuu rí nakumu̱ún kuñún ga̱jma̱a̱ na̱nguá eʼniún mingíjyúuʼ mbuyáá rí eʼwíínʼ ni̱ndxu̱ún míjínʼ xa̱bu̱. Ma̱ngaa nadxún índo̱ eʼwíinʼ nundrígú rí májánʼ numuu nuni ñajuunʼ Jeobá, na̱nguá eni a̱jma̱ a̱jkiu̱ún índo̱ nutún rí májánʼ eni ga̱jma̱a̱ rí nduyamajkhún (atraxnuu Romanos 12:10). *

19. Náá numuu dí ragíʼmaa muʼni mbaʼumíjna̱ rá.

¹⁹ Xa̱bu̱ bi̱ nuni mbaʼumijna naʼniún mingíjyúuʼ muthún eʼwíinʼ rí májánʼ eni, ikhiin nandún mundrígú gamajkhu. Nuni rí ikhiin najmiin itháan ki xóo eʼwíinʼ. Tséni rathiin eʼwíinʼ ni má tséxnún ñajunʼ, i̱ndó ikhiin eni xúgíʼ numuu rí nakumu̱ún dí xúʼko̱ magajnúu májánʼ, xó má nanigu̱u̱nʼ ikhiin. Ma̱ngaa nanigu̱u̱nʼ maguaʼdáá wéñuʼ ga̱jma̱a̱ naxígu̱u̱n (Gál. 5:26). Ga̱jma̱a̱ na̱nguá guáʼdiin bi̱ nambáxu̱u̱n gajmiún mbayuuʼ. Ikha jngó á mu nakumulú dí nuʼni mbaʼumíjna̱, gunda̱ʼa̱a̱ Jeobá rí mambáyulú dí xundxaʼwami̱jna̱ xúʼko̱ mu xáni gachúu a̱jkiu̱lú (Rom. 12:2).

20. Ndíjkha rí gíʼmaa manindxu̱lúʼ xa̱bu̱ guabaaʼ ga̱jma̱a̱ mbuʼyáá rí ndayóoʼ mumbayulúʼ xá.

²⁰ Ra̱ʼkhá tháán exnáalu núma̱aʼ Jeobá rí naxnúlú mbá májánʼ xkri̱da. Nandoo nduʼyáá rí nindxu̱u̱ xa̱bu̱ guabaaʼ xóo eʼniún xa̱bi̱i̱, ikha jngó nandulú mbuʼyaridáá. Ma̱ngaa nandulú mbuʼyaridáá xkri̱da ndrígu̱ún bi̱ nimbáxu̱u̱n májánʼ gajmiún Dios bi̱ nikúwá nákha wajyúúʼ bi̱ ninindxu̱ún xa̱bu̱ guabiinʼ. Nditháan xuniʼñáán ruxnáá gamajkhu Jeobá xó má kaʼyoo (Apoc. 4:11). Xúʼko̱ gáʼni rí ikháanʼ ma̱ngaa mumbáxulúʼ gajmiúlú Anu̱lú bi̱ xtáa mekhuíí, bi̱ nandoo kaʼñún xa̱bu̱ guabiinʼ ga̱jma̱a̱ bi̱ nduyáá rí ndayóoʼ mixtambáñuun.