1. Devit i tok wanem long pasin daun bilong Jehova?

YU TING i stret long tok olsem Jehova i gat pasin daun? Yes, i stret long yumi inap tok olsem. Devit i tok: “Yu givim mi hap plang bilong yu long pait bilong kisim bek mi, pasin bilong yu long daunim yu yet i mekim mi i gat biknem.” (2 Sml. 22:36; Sng. 18:35) Ating Devit i tingim gen taim we profet Samuel i kam long haus bilong papa bilong Devit long anointim neks king bilong Israel. Devit i gat 7-pela brata, na em i las bon; maski i olsem, Jehova i makim em long kisim ples bilong King Sol.—1 Sml. 16:1, 10-13.

2. Long dispela atikol, yumi bai skelim wanem ol samting?

² Devit bai wanbel long tok bilong man i raitim wanpela hap bilong Buk Song, em i tok long Jehova olsem: “Em i save lindaun na lukluk long heven na graun, na em i save litimapim man i no gat nem i stap long das. Na em i save litimapim rabisman . . . [na] mekim ol i sindaun wantaim ol bikman.” (Sng. 113:6-8) Long dispela atikol, pastaim yumi bai skelim sampela bikpela skul long sait bilong pasin daun—olsem na yumi bai skelim hau Jehova yet i bin mekim pasin daun. Yumi bai stori tu long skul yumi inap kisim long eksampel bilong King Sol, profet Daniel, na Jisas, long hau yumi inap mekim pasin daun.

3. Olsem wanem Jehova i soim klia olsem em i gat pasin daun?

³ Taim yumi skelim ol samting Jehova i mekim long yumi ol lain i lotuim em, yumi luksave olsem Em i gat pasin daun. Em i wanbel long wok lotu bilong yumi, na em i tingim yumi olsem  ol pren bilong em. (Sng. 25:14) Jehova i laik stretim rot na bai yumi inap kamap pren bilong em, olsem na long laik bilong em yet, em i givim Pikinini bilong em olsem sakrifais bilong baim bek yumi long sin. Em i marimari tru na sori tru long yumi!

4. Jehova i larim yumi stap fri long mekim wanem? Bilong wanem?

⁴ Skelim narapela samting i soim klia olsem Jehova i gat pasin daun. Jehova em Krieta, so em yet inap mekim disisen long olgeta samting yumi laik mekim. Tasol em i no mekim olsem. Em i wokim yumi i kamap olsem em yet na em i larim yumi i stap fri long makim wanem samting yumi laik mekim. Sapos yumi laikim God na yumi luksave olsem gutpela samting bai kamap taim yumi bihainim tok bilong em, orait em i laik bai dispela i kirapim yumi long givim bel olgeta long mekim wok bilong em. (Lo 10:12; Ais. 48:17, 18) Yumi pilim tru pasin bilong Jehova long daunim em yet!

5. Olsem wanem Jehova i skulim yumi long bihainim pasin daun? (Lukim fran pes piksa.)

⁵ Jehova i bihainim pasin daun long ol samting em i mekim long yumi, na long dispela rot em i skulim yumi long mekim pasin daun. Jehova i gat bikpela savetingting moa winim olgeta lain long heven na long graun. Maski i olsem, em i redi long kisim tingting bilong ol narapela. Eksampel: Jehova i larim Pikinini bilong em i helpim em long wokim ol samting long heven na long graun. (Prov. 8:27-30; Kol. 1:15, 16) Maski Jehova em God i Gat Olgeta Strong, em i makim ol narapela tu long mekim wok bos. Em i makim Jisas long stap King long Kingdom, na Em i makim 144,000 manmeri long mekim wok king wantaim Jisas. (Luk 12:32) Jehova i trenim Jisas long mekim wok olsem King na Hetpris. (Hib. 5:8, 9) Em i trenim tu ol lain husat bai mekim wok king wantaim Jisas; em i givim asainmen long ol, tasol em i no kontrolim olgeta liklik samting ol i  mekim. Em i trastim ol, na em i save olsem ol bai mekim ol samting i stret long laik bilong em.—Rev. 5:10.

6-7. Yumi inap kisim wanem skul long Papa bilong yumi long heven long pasin bilong tilim wok?

⁶ Papa bilong yumi long heven i no nidim ol narapela long helpim em long mekim wok, tasol em i tilim wok long ol, olsem na em i bikpela samting tru long yumi tu i mas mekim olsem! Ating yu stap olsem het bilong famili, o yu mekim wok elda long kongrigesen. Sapos olsem, orait yu mas bihainim eksampel bilong Jehova na tilim wok long ol narapela, na no ken kontrolim olgeta liklik samting ol i mekim. Taim yu bihainim eksampel bilong Jehova, yu bai pinisim wok, na tu, yu bai trenim ol narapela na strongim tingting bilong ol long mekim dispela wok. (Ais. 41:10) Orait ol lain i mekim wok bos, ol inap kisim wanem narapela skul long eksampel bilong Jehova?

⁷ Baibel i soim klia olsem Jehova i save redi long kisim tingting bilong ol ensel. (1 Kin. 22:19-22) Yupela ol papamama, hau bai yupela inap bihainim eksampel bilong Jehova? Sapos i stret long mekim, orait kisim tingting bilong ol pikinini long wei bilong mekim wanpela wok. Na sapos i stret, orait yupela i ken bihainim tingting bilong ol.

8. Long pasin Jehova i mekim long Abraham na Sara, olsem wanem em i soim olsem em i no les kwik?

⁸ Jehova i gat pasin daun bikos em i no save les kwik. Eksampel: Jehova i no save les kwik long ol manmeri bilong em taim ol i soim rispek na kwestenim ol disisen bilong em. Em i putim yau taim Abraham i kwestenim disisen bilong bagarapim Sodom na Gomora. (Stt. 18:22-33) Na tingim pasin Jehova i mekim long Sara, meri bilong Abraham. God i tok promis olsem Sara bai gat bel taim em i lapun tru, na God i no kros o belhat taim Sara i lap long dispela tok promis. (Stt. 18:10-14) Em i soim rispek long Sara.

9. Ol papamama na ol elda inap kisim wanem skul long eksampel bilong Jehova?

⁹ Yupela ol papamama na ol elda, yupela inap kisim wanem skul long eksampel bilong Jehova? Yupela i save mekim wanem taim ol pikinini o ol pablisa i kwestenim ol disisen bilong yupela? Wantu yupela i laik stretim ol? O yupela i traim long pilim tingting bilong ol? Ol famili na ol kongrigesen i save stap gut taim ol lain i mekim wok bos i bihainim eksampel bilong Jehova. Yumi stori pinis long hau yumi inap bihainim eksampel bilong Jehova long mekim pasin daun. Orait nau yumi ken skelim hau yumi inap bihainim eksampel bilong ol narapela bilipman em Baibel i stori long ol.

10. Olsem wanem Jehova i yusim eksampel bilong ol narapela long skulim yumi?

¹⁰ Jehova em “Nambawan Bikpela Tisa,” na em i larim ol eksampel i stap long Baibel bilong skulim yumi. (Ais. 30:20, 21) Yumi kisim skul taim yumi tingim tingim stori bilong Baibel long ol manmeri em ol i bihainim ol pasin bilong God, olsem pasin daun. Na tu, yumi kisim skul taim yumi skelim stori bilong ol manmeri em ol i no bihainim ol pasin bilong God.—Sng. 37:37; 1 Kor. 10:11.

11. Eksampel bilong Sol inap givim wanem tok lukaut long yumi?

¹¹ Tingim samting i kamap long King Sol. Pastaim em i bihainim pasin daun. Taim em i yangpela man, em i tingim em yet olsem man i no gat nem, na em i surik taim ol i makim em long mekim bikpela wok. (1 Sml. 9:21; 10:20-22) Tasol bihain pasin bilong Sol i senis. Em i kisim pasin antap bihain tasol long em i kamap king. Wanpela taim, em  i wetim profet Samuel inap sampela de, na em i les long wet. Sol i no bihainim pasin daun na em i no bilip olsem Jehova bai helpim ol manmeri bilong em, olsem na em i mekim sakrifais bilong paia i kukim olgeta, tasol em i no gat rait long mekim olsem. Jehova i no amamas moa long Sol, na em i no orait long Sol i mekim wok king. (1 Sml. 13:8-14) Eksampel bilong Sol i mas stap olsem tok lukaut na stiaim yumi long abrusim pasin antap.

12. Olsem wanem Daniel i soim olsem em i bihainim pasin daun?

¹² Skelim gutpela eksampel bilong profet Daniel. Long laip olgeta bilong Daniel, em i bihainim pasin daun na mekim wok bilong God na oltaim em i askim Jehova long stiaim em. Taim Jehova i yusim em long tokaut long mining bilong driman bilong Nebukatnesar, em yet i no kisim biknem long dispela samting. Em i bihainim pasin daun na givim olgeta glori long Jehova. (Dan. 2:26-28) Yumi inap kisim wanem skul? Sapos ol brata i amamas long ol tok yumi givim, o sapos yumi gat ol gutpela ekspiriens long wok autim tok, orait yumi mas givim olgeta glori i go long Jehova. Yumi mas daunim yumi yet na luksave olsem yumi inap mekim ol dispela samting bikos Jehova i helpim yumi. (Fili. 4:13) Taim yumi mekim olsem, yumi bihainim gutpela eksampel bilong Jisas. Olsem wanem em i daunim em yet?

13. Tok bilong Jisas long Jon 5:19, 30 i givim wanem skul long yumi long sait bilong mekim pasin daun?

¹³ Maski Jisas em i Pikinini Bilong God na em i gutpela olgeta, em i larim Jehova i stiaim em long olgeta samting em i mekim. (Ritim Jon 5:19, 30.) I no gat wanpela taim em i traim long kisim wankain namba olsem Papa bilong em. Filipai 2:6 i tok Jisas “i no tingting liklik long kisim namba, olsem em i mas i gat wankain namba olsem God.” Jisas i stap daun long Papa na luksave olsem em i no inap mekim olgeta samting long strong bilong em yet, na em i rispektim wok bos bilong Papa.

14. Taim ol narapela i askim Jisas long mekim samting em i no gat rait long mekim, Jisas i tok wanem?

¹⁴ Taim disaipel Jems na Jon wantaim mama bilong ol i kam lukim Jisas, na mama i askim long wanpela samting we Jisas i no gat rait long givim, tingim tok Jisas i mekim. Em i tokaut stret olsem Papa long heven tasol i gat rait long makim husat bai sindaun long rait sait na left sait bilong  Jisas long Kingdom. (Mat. 20:20-23) Jisas i luksave olsem em i no gat namba long givim dispela blesing. Em i bihainim pasin daun. I no gat wanpela taim we Jisas i mekim ol samting em Papa i no tokim em long mekim. (Jon 12:49) Hau bai yumi inap bihainim gutpela eksampel bilong Jisas?

15-16. Olsem wanem yumi inap bihainim tok bilong Baibel long 1 Korin 4:6?

¹⁵ Tok bilong Baibel long 1 Korin 4:6 inap stiaim yumi long bihainim eksampel bilong Jisas na mekim pasin daun. Dispela skripsa i tok: “No ken kalapim ol tok i stap long Rait Holi.” So taim ol narapela i askim yumi long edvais, yumi no ken fosim ol long bihainim tingting bilong yumi, na yumi no ken tromoi nating ol tok. Mobeta yumi stiaim ol i go long ol stiatok bilong Baibel na ol tok i stap long ol pablikesen bilong yumi. Long dispela rot, yumi soim olsem yumi no save long olgeta samting. Yumi bihainim pasin daun na stiaim ol narapela long bihainim “ol stretpela lo” bilong God i Gat Olgeta Strong.—Rev. 15:3, 4.

¹⁶ I gat ol narapela risen na yumi mas bihainim pasin daun. Yumi bai stori nau long olsem wanem pasin daun inap helpim yumi long stap amamas na pas gut wantaim ol narapela.

17. Taim ol man i bihainim pasin daun, wai na ol i save amamas?

¹⁷ Taim yumi bihainim pasin daun, yumi bai amamas. Wai? Taim yumi luksave olsem yumi no gat strong na save bilong mekim sampela samting, yumi bai amamas long kisim helpim long ol narapela. Eksampel: Tingim stori bilong Jisas i oraitim 10-pela lepraman. Namel long ol, wanpela tasol i tanim i go bek na tenkim Jisas long oraitim sik nogut bilong em—dispela man i no gat strong na save bilong oraitim em yet. Dispela man i bihainim pasin daun na em i tok tenkyu long helpim em i kisim, na em i litimapim nem bilong God.—Luk 17:11-19.

18. Olsem wanem pasin daun i save helpim yumi long pas gut wantaim ol narapela? (Rom 12:10)

 ¹⁸ Ol man i gat pasin daun, ol i save pas gut wantaim ol narapela na ol i gat ol gutpela pren. Wai? Ol i luksave olsem ol narapela i gat ol gutpela pasin na ol i save trastim ol. Ol man i gat pasin daun i save amamas taim ol narapela i mekim gut ol asainmen bilong ol, na ol i save tok amamas na givim ona long ol.—Ritim Rom 12:10.

19. Wanem sampela risen na yumi mas abrusim pasin antap?

¹⁹ Ol man i gat pasin antap, ol i save pilim hatwok long tok amamas long ol narapela bikos ol i laik bai ol yet i kisim biknem. Ol i save skelim ol yet wantaim ol narapela na ol i gat pasin bilong resis. Ol i no inap trenim ol narapela na givim namba long ol long mekim wok; ating ol bai tok olsem, “Sapos yu laik wok i kamap gut”—long wei ol i laikim—“orait yu yet i mas mekim dispela wok.” Man i gat pasin antap, em i save painim rot bilong i stap namba 1, na em i save jeles long ol narapela. (Gal. 5:26) Ol kain lain olsem i no gat ol pren em ol inap pas gut wantaim ol inap longpela taim. Sapos yumi yet i luksave olsem yumi gat pasin antap, yumi mas beten strong na askim Jehova long helpim yumi long “kisim nupela tingting” na bai pasin antap i no ken kamap pasin bilong yumi.—Rom 12:2.

20. Wai na yumi mas bihainim pasin daun?

²⁰ Yumi amamas tru olsem Jehova i stap gutpela eksampel yumi inap bihainim! Em i bihainim pasin daun long ol samting em i mekim long ol wokman bilong em, na yumi laik bihainim pasin bilong em. Na tu, yumi laik bihainim gutpela eksampel bilong ol manmeri em stori bilong ol i stap long Baibel, em ol i bin mekim pasin daun na wokabaut wantaim God. Oltaim yumi mas givim ona na glori long Jehova bikos i stret long em i kisim biknem. (Rev. 4:11) Long dispela rot, yumi tu bai wokabaut wantaim Papa bilong yumi long heven, em God bilong laikim ol man i gat pasin daun.