1. ¿Ambe uandaspi Dabidi na enga xáni kaxumbitika Jeoba?

¿SÉSI JIMBOCHI uá uandani eska Jeoba kaxumbitiska? Jo, jimboka Dabidi uandaspka: “Tʼurini íntskusïnga chíti pʼímutantskueri kuájpitarakuani, na engari xáni kaxumbitika tʼu, úsïndi eskani kʼéri ambeuaka” (2 Sam. 22:36; Sal. 18:35). Enga Dabidi ini ambe karapka, jamberi imani jurhiatikuani miántapti enga profeta Samueli imeo nípka para erakuni imani enga reipiringa Israeli. Nájkiruka Dabidi sánderu sapichuepka siete ermanuecheri, Jeoba imani erakuspti para reini enga rei Sauli nóteru reipiringuia (1 Sam. 16:1, 10-13).

2. ¿Ambechi exea ini jorhenguarhikua jimbo?

² Seguru eska Dabidi májkueni eratsenga eska ima enga Jeobaeri ambe karapka salmu ma jimbo: “Ima kʼutitsesïndi para exeni auandani ka echerini, para tʼupurirhu uératini jauatantani kaxumbitini. [...] Jauatantasïndi imani enga no jatsikuarhirika para imecha jingoni uaxakatani engaksï juramukua jatsika” (Sal. 113:6-8). Ini jorhenguarhikua jimbo, exeakachi uánikua ambe nani enga Jeoba kaxumbikua xarhatapka ka ístu ambe engachi jorhenguarhijka. Tátsekua, exeakachi ambe engajtsïni jorhendajka rei Sauliri ejemplu, profeta Danieliri ka Jesusiri parachi miáni eskachi no iámu ambe úsïnga úni

3. ¿Nénajtsïni kámasïni Jeoba ka ambe xarhatasïni inde ambe?

³ Ma ambe enga xarhatajka eska Jeoba kaxumbitiska, jindesti na enga kaajka imeri marhuarichani engaksï kʼamanharhintstika. No solu jiókuarhisïndi eskachi kómarhiaka, ístujtsïni ísï exesïndi eska imeri amiguecha (Sal. 25:14). Úsïngachi ambakiti pájperakua ma jatsini imani jingoni jimboka íntspiska imeri Uájpani juchari pekaduechani jimbo. ¡Kánikuajtsïni pʼamojkusti!

4. ¿Nénajtsïni kueraski Jeoba ka andi?

 ⁴ Ju je exeni máteru ambe enga xarhatajka eska Jeoba kaxumbitiska. Imajtsïni ísï kuerasti parachi erakuni ambechi uá juchari tsípikua jingoni, nájkiruka no jatsipka para ísï úni. Ísïjtsïni kuerasti eska ima ka ístujtsïni íntskusti sésikua parachi jucha erakuni ambe úni. Ka nájkirukachi no ma ambeka imani jingoni terukukuarhintaparini, ima uékasïndi eskachi marhuakuaka jimbokachi xénchasïnga ka jimbokachi míteska eskajtsïni marhuachisïnga engachi kurhajchajka (Deut. 10:12; Is. 48:17, 18). Kánikuachi jukaparharasïnga enga Jeoba xáni kaxumbitika.

5. ¿Nénajtsïni jorhendasïni Jeoba parachi kaxumbitini? (Exe je dibujuni enga uénakuarhu jaka).

⁵ Na enga kaajka Jeoba kʼuiripuechani, jorhendasïndijtsïni kaxumbitini. Nájkiruka Jeoba sánderu jánhastika eska né uéjki, ima tsípikua jingoni jiókuarhisïndi úni ambe engaksï máteruecha arhijka. Por ejemplu, jurajkuspti eska imeri Uájpa imani jingoni ánchikuarhipiringa para kueraani iámindu ambe (Prov. 8:27-30). Ka nájkiruka Jeoba újka iámu ambe úni, juramukua íntsaasïndi máteruechani. Por ejemplu, Rei ústi Jesusini imeri Reinurhu ka juramukua íntsauati imani 144,000 kʼuiripuechani engaksï Jesusi jingoni juramuaka (Luk. 12:32). Ka jorhendasti Jesusini para jindeni Rei ka Kʼéri Saserdoti (Ebr. 5:8, 9). Ístu, jorhendaasïndi imechani engaksï Jesusi jingoni juramuaka, ka enga íntsauakia ini ánchikuarhitani, no méntku arhiani jauati na engaksï jatsiaka para úni ambe ma. Sánderu sési, mintsikaati eskaksï imecha uáka ambe enga ima uéjka (Jaŋ. 5:10).

6, 7. ¿Nénaksï uá májkueni úni imecha engaksï juramukua jatsika ísï eska juchari Táti auandarhu anapu?

⁶ Enga juchari Táti auandarhu anapu íntsaajka máteruechani juramukua o ánchikuarhita nájkiruka no uétarhinchajka eska nema jarhuataaka, jiájkani juchajtuchi jatsiska para májkueni úni. Por ejemplu, ¿nénaksï  uá májkueni úni táticha o kúnguarhikuarhu anapu orhejtsïkuticha? Ánchikuarhita ambe íntsapariani máteruechani ka jánguarhintani pʼíngukuarhini para no méntku arhijpini jarhani na enga jatsika para úkuarhini ambe ma. Engaksï ísï uáka, nóksï solu jurajkuáti eska úkuarhiaka ambe ma, sinoksï jorhendauati máteruechani ka jarhuatauatiksï paraksï no chéni ánchikuarhita ma úni (Is. 41:10). ¿Ambe sánderu ambeksï uá jorhenguarhini Jeobaeri ambe imecha engaksï juramukua jatsika?

⁷ Biblia xarhatasïndi eska Jeoba jukaparharasïnga ambe engaksï eratsejka ánjelicha (1 Rey. 22:19-22). ¿Nénaksï uá táticha májkueni úni? Na engaksï jatini imecha exeaka eska sési jauaka, uátiksï kurhamarhiani sapiichani nénaksï exesïni eska uétarhisïnga úni ambe ma. Ka engaksï táticha exeaka eska uáka ísï úkuarhini eskaksï sapiicha na uandajka, uátiksï ísï úni.

8. ¿Néna xarhatakuspi Jeoba tekaantskua Abraanini ka Sarani?

⁸ Ístu, Jeoba xarhatasïndi eska kaxumbitiska jimboka tekaantstiska. Por ejemplu, tekaantskua xarhatakuasïndi imeri marhuarichani engaksï janhanharhikua jingoni kurhamarhijka andisï eratsejki úni ambe ma. Ju je miáni na enga kurhajchapka Abraanini jiáni enga kurhamarhipka Jeobani andisï uékeni kʼamajkuni Sodomani ka Gomorrani (Gén. 18:22-33). Ka ju je miáni ambe enga úpka Jeoba jiáni enga Sara, Abraaniri témba, terekuarhipka enga kurhaapka eska sapi ma kánguarhipiringa nájkiruka kánikua jatiripkia. Jeoba no no sési pʼikuarheraspti indeni ambe jimbo ni ikiapi, sánderu sési, janhanharhikua jingoni kámaspti Sarani (Gén. 18:10-14).

9. ¿Ambeksï uá jorhenguarhini táticha ka orhejtsïkuticha, Jeobaeri ejemplueri ambe?

⁹ Engajtsï táti máeka o orhejtsïkuti ma, ¿ambejtsï uá jorhenguarhini Jeobaeri ejemplueri ambe? Eratsi je ambejtsï úsïni engaksïni nema kurhamarhijka andijtsïsï ísï úni jaki ambe ma. ¿Jirejiresïjtsï uandasïni eska sési jarhaska ambe engajtsï erakuka úni? ¿Ojtsï jánguarhintasïni kurhangukuni? Xarharasïndi eska kánikua marhuakuasïnga familiechani ka kúnguarhikuechani engaksï imecha engaksï juramukua jatsika májkueni újka eska Jeoba. Asta ixú jamberichi exeskia ambe engachi jorhenguarhijka na enga kaxumbitika Jeoba. Iásï, ju je jorhenguarhini nénachi uá xarhatani kaxumbikua ísï eska ima kʼuiripuecha enga Biblia uandaajka.

10. ¿Jeobajtsïni néna jorhendasïni ambe ma?

¹⁰ Jimboka Jeoba jindeska juchari Ambakiti Jorhentpiri, imeri Karakatarhu jurajkuasti ejempluechani engajtsïni jorhendajka ambe ma (Is. 30:20, 21). Uákachi eratsentani imani kʼuiripuecheri enga Biblia uandaajka engaksï kaxumbikua xarhatapka ísï eska Jeoba na jaiapanhintajka ka ístu ambe engaksï úkuarhinchapka imecha engaksï no kaxumbitipka (Sal. 37:37; 1 Kor. 10:11).

11. ¿Ambechi jorhenguarhisïni imeri ambe enga Sauli úpka?

¹¹ Ju je eratsentani ambe enga úkuarhinchapka rei Sauli. Enga tumbipka, xáni kaxumbispti ka ísï exekuarhini enajki no ma ambepti enga jamberi kánikua úkua jukanchapka kʼéri ánchikuarhita ambe jiókuarhini (1 Sam. 9:21; 10:20-22). Peru ísï tátsekua enga reipkia, uénaspti kʼéramakuarhini ka úspti máru ambe enga no jatsipka para úni. Ma xanhari, kuatantaspti profeta Samuelini erokani. Enbesi de kaxumbikua xarhatani ka mintsikani eska Jeoba jarhuatapiringa imeri iretani, kéjtsïtakua ma úspti nájkiruka no ima no sésikua jatsipka para indeni ambe úni. Inde ambe jimbo, Jeoba nóteru jaiapanhintasptia ka sánderu tátsekua nóteru jurajkusptia eska reipiringa (1 Sam. 13:8-14). Ini ambe jingonchi jorhenguarhisïnga eskachi no jatsiska para úni ambe engachi no sésikua jatsika.

12. ¿Andisï Danieli ambakiti ejemplu máe?

 ¹² Peru profeta Danieli, ambakiti ejemplujtsïni ma jurajkuchisti ka no ísï eska Sauli. Méntkisï kaxumbikua xarhataspti ka mítespti eska no úsïrenga iámu ambe úni jimbosï méntkisï jirinhendi Jeobaeri jarhuajperatani. Por ejemplu, jiáni enga Jeoba úrapka para uandantani ambe enga arhikuekenga Nabukodonosoriri tsánharhikua, Danieli no kʼéramakuarhispti imani ambe jimbo, sino úspti eska Jeoba kʼéri ambe arhinhapiringa (Dan. 2:26-28). ¿Ambechi jorhenguarhisïni? Eska engachi nitamataraska arhijtsïperata ma ka erachichaksï tsitini ochi sési uéranchani aianhpikuarhu, jatsiskachi para Jeobani kʼéri ambe arhini. Ju je kaxumbitini ka miáni eskachi no úpiringa ini ambe úni engajtsïni Jeoba no jarhuatapiringa (2 Kor. 4:7). Engachi ini ambe újka, májkuenchi úni jarhasïnga eska Jesusi. Ju je exeni andichisï ísï uandajki.

13. Ambe enga Jesusi uandapka ixú Juanu 5:19, 30 jimbo, ¿ambechi jorhenguarhisïni kaxumbikueri ambe?

¹³ Nájkiruka Jesusi, Tata Diosï uájpepka enga no kʼamanharhintstipka, méntkisï mintsikaspti Jeobani (arhinta je Juanu 5:19, 30). No méni uékaspti sánderu juramukua jatsini eska imeri Táti auandarhu anapu. Filipusʌ 2:6 (TNM) arhisïndi eska Jesusi no méni eratsespka “euakuarhini Tata Diosïni imeri lugarini ka ísï úkuarhini eska ima”. Mítespti nani enga jamberi úpiringa juramuni ka janhanharhisïrendi Táti jémberi juramukuani ka kurhajchasïrendi.

14. ¿Ambe úspi Jesusi engaksï arhipka para úni ambe ma enga no sésikua jatsipka?

¹⁴ Ju je miáni ambe enga úpka Jesusi jiáni engaksï Santiagu, Juanu ka imecheri amamba májku kʼéri arhipka eskaksï icha imeri jurhijkandani ka uikixkandani ladu jimbo uaxakapiringa Reinurhu. Jesusi uandaspti eska solu imeri Táti auandarhu anapu úsïnga indeni sésikua íntspini (Mat. 20:20-23). Jesusi ísï xarhataspti eska mítespka ambe enga uénga úni ka ambe nómbe. Kaxumbikua xarhataspti ka no méni úspti ambe enga Jeoba no íntskupka sésikua (Juanu 12:49). ¿Nénachi uá juchajtu májkueni úni eska Jesusi?

15, 16. ¿Nénachi uá úni ambe enga 1 Korintu 4:6 uandajka?

¹⁵ Xarhatasïngachi kaxumbikua ísï eska Jesusi engachi újka ambe enga 1 Korintu 4:6 arhijka: “No sánderu ambe eratseni ka eska enga karakata jaka”. Ísï jimbo, engajtsïni nema konseju ma kurhachiaka, ju je no méni afuersa uékani eskaksï máteruecha ísï eratseaka  eska jucha, níjtuchi arhini ambe ma ante dechi sési eratsentani. Sánderu sési, ju je imani konsejuechani arhiani engaksï Bibliarhu jaka ka juchari publikasionicharhu. Ísïchi xarhatani jauaka eskachi kaxumbitiska, jimbokachi miásïnga eskachi no iámu ambe míteska ka eskaksï sánderu marhuasïnga Jeobaeri ambakiti juramukuecha ka eska ambe uéjki engachi jucha uáka uandani (Jaŋ. 15:3, 4).

¹⁶ Eskachi na exekia, kʼéri ambechi arhisïnga Jeoba engachi kaxumbitijka ka miánchi eskachi no iámu ambe úsïnga úni. Iásï, ju je exeni eskajtsïni i ambe ístu jarhuatasïnga parachi tsípikua jingoni irekani ka parachi sési pájperani máteruecha jingoni.

17. ¿Andiksïsï tsípikua jingoni irekajki imecha engaksï kaxumbitika?

¹⁷ Engachi kaxumbitiska ka miáni eskachi no iámu ambe úsïnga úni, uákachi sánderu tsípikua jingoni irekaaka. ¿Andi? Jimboka engachi miájka eskachi no iámindu ambe úsïnga úni, jukaparharaakachi engajtsïni máteruecha uékaaka jarhuatani. Ju je miáni jiáni enga Jesusi ambakerantaapka 10 kʼuiripuechani engaksï lepra pʼamenchani japka. Ma acheetijkusï kʼuanhatsentapti diosmaiamukua arhini Jesusini enga ambakerantapka imani xáni no sési jásï pʼamenchakueri. I acheeti kaxumbiti, mítespti eska no méni úpiringa jandiajku tsinakuarhini, ísï jimbo kánikua jukaparharaspti imani ambe ka kʼéri ambe arhispti Jeobani (Luk. 17:11-19).

18. ¿Nénajtsïni jarhuatasïni kaxumbikua parachi sési pájperani máteruecha jingoni? (Roma 12:10).

¹⁸ Sáno méntkisï, ima kʼuiripuecha engaksï kaxumbitika ka engaksï miájka eskaksï no úsïnga iámu ambe úni, sésiksï pájperasïndi máteruecha jingoni ka ambakiti amiguechanksï jatsiasïndi. ¿Andi? Jimbokaksï no úkua jukanchasïnga jiókuarhini eskaksï máteruechajtu ambakiti ambe xarhatasïnga  ka mintsikaasïndiksï. Ístuksï tsípisïndi engaksï máteruecha ambakiti ambe újka para Jeobani marhuakuni ka ambakiti ambeksï arhiasïndi ka janhanharhiani (arhinta je Roma 12:10).

19. ¿Andichisï no jatsi para kʼéramakuarhini?

¹⁹ Joperu, imecha engaksï kʼéramakuarhijka kánikuaksï úkua jukanchasïndi ambakiti ambe arhiani máteruechani ka sánderuksï tsitisïndi eskaksï imecha ambakiti ambe arhinhaaka. Pʼidestiksï terukukuarhintani máteruecha jingoni ka méntkisïksï uékasïndi xarhatani eskaksï sánderu sési úsïnga ambe ma eska máteruecha. Enbesi deksï jorhendaani máteruechani ka jurajkuani eskaksï uáka ambe ma, iámindu ambeksï imecha uékasïndi úni, jimbokaksï eratsesïnga eska solu ísï uáka sési pakarani ambe ma o eskaksï imecha na tsitijka. Ístu, sáno méntkisïksï kánikua tsitisïndi kʼéri ambe exenhani ka ikiasïndiksï engaksï máteruecha ambakiti ambe újka (Gal. 5:26). Iauani ménksï jatsiasïndi ambakiti amiguechani. Ísï jimbo, engachi exeaka eskachi uénaxaka kʼéramakuarhini ju je kurhakuni Jeobani eskajtsïni jarhuataaka ménderueni eratseni parachi no xásï kʼuiripu máeni (Rom. 12:2).

20. ¿Andichisï jatsi para kaxumbikua xarhatani?

²⁰ Kánikuachi jukaparharasïnga engajtsïni Jeoba xarhatachijka eska kaxumbitiska. Ka míteskachi eska Jeoba kaxumbitiska, jimbokachi exesïnga na enga kaajka imeri marhuarichani ka uékasïngachi májkueni úni eska ima. Ístuchi uékasïnga májkueni úni eska ima kʼuiripuecha enga Biblia uandaajka, engaksï méntkisï kaxumbikua jingoni marhuakupka Jeobani. Ju je méntkisï kʼéri ambe arhini Jeobani ísï eska na jukanchaka (Jaŋ. 4:11). Engachi ísï úska, ístuchi uáka Jeobaeri amigueni jimboka ima xénchaasïnga kaxumbitichani.