1. ¿Bin la yal te David ta swenta te spekʼelil yoʼtan te Jehovae?

¿SNUJPʼBAL te ya kaltik te ay spekʼelil yoʼtan te Jehovae? Snujpʼ, melel te David jich la yal: «Jaʼat ya awakʼbon te majkilal awuʼun yuʼun kolel, te spekʼelil awoʼtan ya yakʼ te mukʼ ya xkʼoone» (2 Sam. 22:36, TNM; Sal. 18:35). Kʼalal jich la stsʼibay-abi, te David jaʼniwan yak ta snopel-a te kʼalal te Samuel bajt stsa te machʼa ajwalil ya xkʼot ta Israel. Manchukme jaʼ xutil kerem te Davide, jaʼ tsaot yuʼun Jehová swenta ya sjelolin ta ajwalil te Saule (1 Sam. 16:1, 10-13).

2. ¿Bin ya kilbeytik skʼoplal ta artikulo ini?

² Ya jnaʼtik te pajal la yaʼiy sba te David sok jtul salmista te jich la yal ta stojol te Jehová: «Ya spehcʼan sba ta yilel te chʼulchan soc te bahlumilale [...] Ha ya shach ta tsʼuʼlum te pobre, [...] yuʼun ya yacʼ huhcajuc soc te príncipaletic» (Sal. 113:6-8). Ta artikulo ini ya kiltik bitʼil yakʼoj ta ilel spekʼelil yoʼtan te Jehová sok te bin ya yakʼ jnoptike. Ta patil ya kiltik te bin ya jnoptik ta swenta te bin la spas te ajwalil Saúl, te j-alwanej Daniel sok te Jesuse.

3. ¿Bin yilel ya yilotik te Jehová sok bin ya yakʼ jnaʼtik?

³ Te bin ya yakʼ jnaʼtik te pekʼel yoʼtan te Jehová jaʼ ta swenta te bin yilel ya yil te j-abatetik yuʼun te maba tojike. Te Jehová ya smulan te ya kichʼtik ta mukʼe, pero jaʼnix jich ya skʼan ya yamigoinotik (Sal. 25:14). Ya xjuʼ ya kamigointik te  Jehová, melel lokʼ ta yoʼtan yakʼel te sNichʼan yuʼun ya stoj te jmultike. ¡Mero ya snaʼ yoʼbolil jbatik te Jehová!

4. ¿Bin yakʼoj ta jtojoltik te Jehová sok bin yuʼun?

⁴ Kiltik yan te bitʼil ya xchiknaj ta ilel te spekʼelil yoʼtan te Jehová. Te kʼalal la spasotik te Jehovae, libre la yakʼotik ta stsael te bin ya jpas ta jkuxlejaltike. Jaʼ jich la spasotik te bin yilel stalele sok la yakʼ te libre ayotik ta snopel te bin ya jpastike. Manchukme ma jpajbeytik smukʼul te Jehová, jaʼ ya skʼan te yakuk x-abatinotik ta stojol ta swenta te kʼux ta koʼtantik sok te ya jnaʼtik te jaʼ lek ya xlokʼotik-ae (Deut. 10:12; Is. 48:17, 18). Ya kalbeytik bayal wokol yuʼun te ay spekʼelil yoʼtan te Jehovae.

5. ¿Bin-utʼil ya snojptesotik te Jehová ta yakʼel ta ilel spekʼelil koʼtantik? (Ilawil te dibujo ta yelaw te rebista).

⁵ Te Jehová ya snojptesotik ta yakʼel ta ilel spekʼelil koʼtantik kʼalal ya kiltik te bin ya spas ta stojol te machʼatik spastiklanoje. Manchukme maʼyuk machʼa ya spajbey spʼijil te Jehová, ya yichʼ ta wenta te bin ya x-albot yuʼun te yantike. Jun ejemplo ta swenta-abi, jaʼ te koltayot yuʼun te sNichʼan ta spasel spisil te bintik aye (Prov. 8:27-30; Col. 1:15, 16). Jaʼnix jich manchukme spisil ya xjuʼ yuʼun spasel te Jehová, ya yakʼbey yaʼtel te yantike. La yakʼbey yaʼtel ta Ajwalil te Jesús sok ya xbajt yakʼbey yaʼtel te 144,000 ta tul te ya xwentainwanik sok te Jesuse (Luc. 12:32). Te Jehová la snojptes te Jesús yuʼun ya x-och ta Ajwalil sok ta Mukʼul Saserdote (Heb. 5:8, 9). Jaʼnix jich ya snojptes te machʼatik ya xwentainwanik sok te sNichʼane. Pero kʼalal te Jehová ya yakʼ ta stojolik te aʼtelil-abi, maba patil ya yil teme lek yakik ta spasel te yaʼtelike. Snaʼoj te jaʼ ya xpasbot te skʼanojel yoʼtane (Apoc. 5:10).

6, 7. ¿Bin-utʼil ya xjuʼ ya stʼunbeyik stalel Jehová te machʼatik yichʼoj yaʼtelike?

 ⁶ Te Jehová ya yakʼbey yaʼtel te yantik manchukme ma xtuun yuʼun koltayel, jaʼ yuʼun kʼaxtoxan jich ya skʼan ya jpastik te joʼotik te ya jkʼantik koltayele. ¿Bin-utʼil ya xjuʼ te jich ya spasik-euk te jolaletik ta na sok te ansianoetike? Jaʼ te ay bin ya yakʼbey spas te yantike sok te manchuk patil ya yil teme lek la spasik te aʼtele. Teme ya stʼunbeyik stalel te Jehovae, ma jaʼuknax te ya xjuʼ te aʼtelile, jaʼnix jich ya snojptesik te yantik sok ya skoltayik yuʼun maba ya xiwik ta spasel jun aʼtelil (Is. 41:10). ¿Bin ya xjuʼ ya snopikxan ta swenta Jehová te machʼatik ay yichʼoj yaʼtelike?

⁷ Te Biblia ya yakʼ jnaʼtik te Jehová ya yichʼ ta wenta te bin ya yalik te chʼul-abatetike (1 Rey. 22:19-22). Jaʼex meʼil tatiletik ¿bin-utʼil ya xjuʼ ya atʼunbeyik stalel Jehovae? Te kʼalal snujpʼ ya awilike, jojkʼoybeyaik te awal anichʼnabik te bitʼil ta pasel jun aʼtelil. Teme ya xjuʼe ichʼa ta wenta te bin ya yalike.

8. ¿Bin-utʼil la yakʼ ta ilel slamalil yoʼtan te Jehová ta stojol te Abraham sok te Sarae?

⁸ Te Jehová jaʼnix jich ya yakʼ ta ilel spekʼelil yoʼtan te kʼalal ma x-ilin ta orae. Jich bitʼil te maba ilin kʼalal ay bin jojkʼoybot yuʼun te j-abatetik yuʼune. Juluk ta koʼtantik te bitʼil la yaʼiybey skʼop te Abraham te kʼalal ay bin la yal ta swenta te ya yichʼ lajinel te Sodoma sok te Gomorrae (Gén. 18:22-33). Jaʼnix jich juluk ta koʼtantik te bin la spas te Jehová kʼalal te Sara te yinam Abraham tseʼejin te kʼalal la yichʼ albeyel te ya sta alal manchukme meʼelix. Te Jehová maba ilin yuʼun te tseʼejin te Sarae (Gén. 18:10-14).

9. ¿Bin ya snopik ta swenta te ejemplo yuʼun Jehová te meʼil tatiletik sok te ansianoetike?

⁹ Teme meʼil tatilat o ansianoat, ¿bin ya xjuʼ ya anop ta swenta te ejemplo yuʼun te Jehovae? Nopa awaʼiy bin ya apas te kʼalal ay machʼa te ay ta awenta yilel o skanantayel maba lek ya yil te bin ya apase. ¿Oranaxbal ya atojobtes? ¿O ya apas tulan yuʼun ya xkʼot ta awoʼtan te bin ya snope? Ya sta slekilal te familiaetik sok te kongregasion te kʼalal ya stʼunbeyik stalel Jehová te machʼatik yichʼoj yaʼtelike. La kiltikix te bin ya yakʼ jnoptik te spekʼelil yoʼtan te Jehovae. Ta ora ini kilbeytik skʼoplal ejemploetik ta Biblia sok kiltik bin ya jnoptik ta swenta te pekʼel-oʼtanile.

10. ¿Bin-utʼil ya snojptesotik te Jehovae?

¹⁰ Te Jehová jaʼ Mukʼul Jpʼijubteswanej kuʼuntik, jaʼ yuʼun ta Biblia ay yakʼoj jilel ejemploetik te ay bin ya yakʼ jnoptike (Is. 30:20, 21). Ya xjuʼ ya jnopilan ta koʼtantik te bitʼil la yakʼik ta ilel spekʼelil yoʼtanik ants winiketik te ya yalbey skʼoplal te Biblia sok te bin wokolil la staik te machʼatik maba la yakʼik ta ilel spekʼelil yoʼtanike (Sal. 37:37; 1 Cor. 10:11).

11. ¿Bin ya jnoptik ta swenta te bin ma lek la spas te Saule?

¹¹ Jnop ta koʼtantik te bin la spas te ajwalil Saule. Te kʼalal keremto-a mero pekʼel yoʼtan-a, jaʼ yuʼun ma snujpʼuk la yaʼiy te ya x-och ta ajwalile (1 Sam. 9:21; 10:20-22). Pero te kʼalal ochix ta ajwalil-ae, kaj stoy sba sok la spas te bin ma jaʼuk ay ta swenta spasele. Ta jun buelta lujb ta smaliyel te j-alwanej Samuele. Ma la yakʼ ta ilel spekʼelil yoʼtan sok ma la smukʼulin yoʼtan te Jehová te jaʼ ya skoltay te lume, la yakʼ te chikʼbil majtanil  te ma jaʼuk ay ta swenta spasel-ae. Jich yuʼun ma lek ilotix yuʼun te Jehová sok ta patil la slokʼes ta ajwalil (1 Sam. 13:8-14). Jaʼ-abi ya yakʼ jnoptik te ma skʼan ya jtoy jbatike sok te manchuk ya jpastik te bin ma jaʼuk ay ta jwentatik spasele.

12. ¿Bin ya yakʼ jnoptik te spekʼelil yoʼtan te Daniel?

¹² Te j-alwanej Daniel la yakʼ kiltik jun lekil ejemplo, ma jichuk te bitʼil te Saule. Te jayeb kʼajkʼal kuxine, spisil-ora la yakʼ ta ilel spekʼelil yoʼtan sok la sle te koltayel yuʼun Jehová. Jun ejemplo jaʼ te maba la yakʼ sba ta ichʼel ta mukʼ te kʼalal tuuntesot yuʼun te Jehová ta yalbeyel swentail te swayich te Nabucodonosor, jaʼ la yakʼ ta ichʼel ta mukʼ te Jehovae (Dan. 2:26-28). Jaʼ-abi ya yakʼ jnoptik te jaʼ ya skʼan ya kakʼtik ta ichʼel ta mukʼ te Jehová te kʼalal ay ya kakʼtik jun diskurso te la smulanik te ermanoetik o te kʼalal ay bin lek ya xlokʼ kuʼuntik ta scholel te skʼop Diose. Pekʼeluk koʼtantik sok akʼame jnaʼtik te maba juʼ kuʼuntik spasel te manchuk la skoltayotik te Jehovae (Filip. 4:13, TNM). Teme jich ya jpastike jaʼnixme jich ya jtʼunbeytik stalel te Jesuse. Kiltik te bin yuʼun te jich ya kaltike.

13. Ta swenta te bin la yal te Jesús ta Juan 5:19, 30, ¿bin ya jnoptik ta swenta ta pekʼel-oʼtanile?

¹³ Manchukme jaʼ sNichʼan Dios te Jesuse, spisil-ora la smukʼulin yoʼtan te Jehová (kʼopona Juan 5:19, 30). Jaʼ yuʼun te Biblia ya yal te Jesús «maba la snop te ya spojbey yaʼtel te Dios sok te pajal ya xkʼot soke» (Filip. 2:6, TNM). Kʼoem ya yoʼtan te bin maʼyuk ta swenta spasele, la yichʼ ta mukʼ te yaʼtel te sTate sok ya schʼuunbey te smantale.

14. ¿Bin la yal te Jesús te kʼalal ay bin kʼanbot te ma jaʼuk ay ta swenta yakʼele?

¹⁴ Jnop kaʼiytik te bin la yal te Jesús kʼalal te Santiago, te Juan sok te smamaik bajt skʼanbeyik te yakuk xnajkaj jtul ta swaʼel sok jtul ta skʼexen kʼab ta Wentainel yuʼun te Diose. Te Jesús la yal te jaʼnax ay ta swenta yakʼel te sTate (Mat. 20:20-23). Jich la yakʼ ta ilel te snaʼoj te ay bintik maʼyuk ta swenta spasele. La yakʼ ta ilel spekʼelil yoʼtan sok maba la spas te bin ma albot yuʼun te Jehovae (Juan 12:49). ¿Bin-utʼil ya xjuʼ ya jtʼuntik te lekil ejemplo yuʼune?

15, 16. ¿Bin-utʼil ya xjuʼ ya jpastik te mantalil ay ta 1 Corintios 4:6?

 ¹⁵ Ya jtʼuntik te spekʼelil yoʼtan te Jesús kʼalal ya jchʼuuntik spasel te bin ya yal 1 Corintios 4:6: «Ma me xjelawex ta bin tsʼihbabil». Jaʼ yuʼun kʼalal ay machʼa ya skʼanbotik tojobtesel, ma jaʼuk ya kaltik te bin ya jnoptik sok te bin oranax ya xtal ta koʼtantike. Jaʼ lek te ya kakʼbeytik yil te tojobteseletik ay ta Biblia sok ta publikasionetik. Jich ya kakʼtik ta ilel te ay spekʼelil koʼtantik, melel jnaʼojtik te ay bintik ma xjuʼ kuʼuntik spasel sok te jaʼ toj te mantaliletik yuʼun te Jehová (Apoc. 15:3, 4).

¹⁶ Jich te bitʼil la jnoptikixe, kʼalal ay spekʼelil koʼtantik ya kichʼtik ta mukʼ te Jehovae. Ta ora ini ya kiltik bitʼil te pekʼel-oʼtanil ya skoltayotik yuʼun tseʼeluk koʼtantik sok te lekuk ya kil jbatik sok te yantike.

17. ¿Bin yuʼun tseʼel yoʼtanik te machʼatik pekʼel yoʼtanike?

¹⁷ Teme pekʼel koʼtantike jaʼ tseʼelxan koʼtantik-a. Melel kʼalal ya jnaʼtik te ay bintik ma xjuʼ kuʼuntik spasele, ya kaltik wokol te kʼalal ay machʼa ya skʼan ya skoltayotike. Juluk ta koʼtantik te kʼalal la slekubtes te lajuntul jkʼaʼel chameletik te Jesuse, jtulnax sujt tal ta yalel wokol ta swenta te lekub yuʼun te tulan chamel tsakbile. Te winik-abi te pekʼel yoʼtane snaʼoj te ma xjuʼ ya xlekub ta stukelnaxe, jaʼ yuʼun la yal wokol sok la yalbey yutsilal te Diose (Luc. 17:11-19).

18. 1) ¿Bin-utʼil ya skoltayotik te spekʼelil koʼtantik yuʼun lek ya kil jbatik sok te yantike? 2) ¿Bin ya yakʼ jnoptik te Romanos 12:10?

¹⁸ Te machʼatik pekʼel yoʼtanik lek ya yil sbaik sok te yantike sok ya staxan lek yamigotakik.  ¿Bin yuʼun? Jaʼ yuʼun te maba wokol ya yaʼiyik yilbeyel lek stalel te yantik sok ay smukʼul yoʼtan ta stojolik. Jaʼnix jich tseʼel yoʼtanik te kʼalal ay bin lek ya spasik te yantik ta stojol te Jehová sok ya yutsilkʼoptayik (kʼopona Romanos 12:10).

19. ¿Bin yuʼun ya skʼan ya jpʼajtik te toybaile?

¹⁹ Te machʼatik ya stoy sbaike, wokol ya yaʼiyik te ay machʼa ya yutsilkʼoptayike, jaʼnax ya skʼanik utsilkʼoptayel. Ya spaj sba sok te yantik sok ya smulan stsalel te yantike. Maba ya spʼijubtes te yantik sok maba ya yakʼbeyik yaʼtel, spisil ya skʼan ya spas ta stukelik, melel ya snopik te jaʼnax lek ya snaʼik spasel sok te jich ya xlokʼ te bitʼil ya smulanike. Jaʼnix jich ya yakʼ sbaik ta tsalel yuʼun te sbikʼtal yoʼtanike (Gál. 5:26). Maʼyuk lek yamigotakik. Jaʼ yuʼun teme ya kiltik te ay stoybail koʼtantike, kalbeytik wokol te Jehová yuʼun ya skoltayotik ta yachʼubtesel te snopojibal kuʼuntik, yuʼun ma xchʼixan ta koʼtantik (Rom. 12:2).

20. ¿Bin yuʼun ya skʼan pekʼel koʼtantik?

²⁰ Te Jehová ay spekʼelil yoʼtan, jaʼ kʼax lekil ejemplo kuʼuntik. Ya jtatik ta ilel te jich stalel ta swenta te bin ya spas ta stojol te j-abatetik yuʼune, jaʼ yuʼun ya jkʼan ya jnopbeytik te stalele. Jaʼnix jich ya jkʼan ya jnopbeytik stalel te machʼatik ya yalbey skʼoplal te Biblia te la schʼuunbeyik skʼop te Diose. Mame jkom jbatik ta yalbeyel yutsilal te Jehová sok te ya kichʼtik ta mukʼ te bitʼil snujpʼ ya yichʼ akʼbeyele (Apoc. 4:11). Jichme ya kamigointik sbajtelkʼinal te Jehová te kʼux ta yoʼtan te machʼatik pekʼel yoʼtanike.