1. Eeghe kụ iḍighi kụ aZihova alhẹm bọ ghuḍum?

AMEM irọl li dị ogina aZihova bịn kụ arọl ghan. Kuolọ odị o/rọl dọl igini. Odị amhunhughan ni esi oomo areten phọ odị. Toroboiperolbọ, Ephomhoghiạn inyu ni aZihova omhiigh olhẹm aghuḍum. Odị awạ ni mọ torobọ oye aghelhọm aani ghuḍum.—Ps. 36:9; 1 Jọn 4:19.

2. AZizọs r’aruukpaạny phọ ulhoghoma ika ilọ olhẹm mọ aZihova?

² Eḅẹl phọ, aZihova aphụr alhẹm oye dị r’odị koḅọph okumuan, oọny phọ odị Zizọs Kraist. Esi Oọny phọ odị kụ edị olhẹm bọ “oomo araraạr phọ,” eḅaramaạm olhẹm aruukpaạny phọ. (Kọl. 1:16) AZizọs amhoọgh ni ibo ilọ eepoogh okumuan r’Odẹ phọ odị. (Prov. 8:30) Anmụny phọ Enhaạn oḍighi bọ ruukpaạny phọ umhoọgh ni riphigh otuạn obo aani. Bidị kụ uphụr omhiịn mem mọ aZihova r’Uw-oḍighi phọ odị, Zizọs, olhẹm bọ kẹ phọ r’ade phọ. Bidị umhegheron ika? Bidị ulọ ni “ḍiolọ ibo” mem mọ olhẹm bọ de phọ, kụ iikia i/lo mọ aḍiolọ ibo phọ abidị ighiọm ni ghisigh esi atorobọ iyaạr dị aZihova alhẹm eḅaramaạm olhẹm mọ aZihova asughanham bọ omhạn phọ, oye. (Job 38:7; Prov. 8:31, ) Torobọ olhẹm mọ agananamhi ephomhoghiạn phọ r’osụ-olhoghi phọ aZihova.—Ps. 104:24; Rom. 1:20.

3. Odaphạn 1 Korịnt 15:21, 22, eeghe iyaạr kụ merue idughanhaan iyira oteẹny loor esi ekiạ etagharạn phọ aZizọs?

³ AZihova awạ dị eghunotu omhạr awe mukelhọm ghuḍum k’agee-pọ siẹn ughede phọ ophọn odị amhaạr bọ alhẹm anhighemhị. Kuolọ mem mọ Adạm r’Iv ogbagharạn bọ Odẹ ephomhoghiạn phọ abidị, bịn ikarạph r’aḍuugh eponomaam oomo  ade phọ. (Rom. 5:12) AZihova amhegheron ika? Mem mem mọ bịn odị aghaạph ni ipẹ odị katagharạn bọ omhạr awe. (Gen. 3:15) AZihova aguan ilọ omiteom ekiạ etagharạn dị keḍighi idị kedugh orue otagharạn anmụny phọ Adạm r’Iv osighẹ esi ikarạph r’aḍuugh. Kụ odị angọ eepoogh dị torobọ oye kasaḅạr okumu odị kụ omoọgh ghuḍum k’agee-pọ.—Jọn 3:16; Rom. 6:23; bạl 1 Korịnt 15:21, 22.

4. Ighẹn asipuru kụ edị yira kooḅeghiọn siẹn emhuoghaạph phọ ephẹn phọ?

⁴ Oguan phọ Enhaạn ilọ oḅerion awe esi aḍuugh phọ amiteom ni ibadị asipuru. Esi omaạm, oḅerion esi aḍuugh phọ kakạr atọl ika? Yira kotue ni olọgh elhegh buọ ephomhoghiạn phọ ayira abuphẹ koḅerion bọ ḍughụm? Ighẹn areten kụ edị oḅerion esi aḍuugh phọ kingọ iyira ibo? Ḅilhẹ ika kụ idị ogbirima ghan ilọ oḅerion esi aḍuugh phọ kilhoghonhaạn iyira ḍighaạgh osereghiạn ephomhoghiạn phọ, osụ-olhoghi phọ, r’okparạm mọ aZihova? Uguạ ooḅeghiọn sipuru phọ iphẹn phọ eniin etum nyeniin.

5. Eeghe kụ iḍighi kụ enhighẹ bọ ni dị yira komeeraam mọ komiigha ni loor kụ oḅerion we phọ enụm enụm oḅilhẹ ongọ ghuḍum siẹn ade phọ?

⁵ Mem dị aZihova kaḅenhị bọ oọny phọ odị oḅerion irubal awe phọ oḅilhẹ ongọ ghuḍum siẹn ade phọ, odị ka/ḅerion oomo phọ abidị mem. Eeghe kụ iḍighi? Loor esi dị oḅerion egu awe bịn okpologhi siẹn ade phọ ketue ni ekọm igbaragbarạ. Kuolọ aZihova ra/ḍighi ghan iyaạr eten dị u/maạr udẹ ḅilhẹ u/ḅoonemhị. Odị alegheri ni mo ewạ ni dị komaạr odẹ raraạr pidị eephọ etọl. (1 Korịnt. 14:33) AZihova Enhaạn phọ aḍighinhom ni osụ-olhoghi r’okparạm mem mọ odị rakumuan bọ r’aZizọs ookolhobian ade phọ, enụm enụm kụ egbi oteẹny amem mọ olhẹm bọ oye. AZizọs kaḍighi aani ni iniin phọ mem dị odị rakumuan r’abuphẹ okpetenhaan bọ Amagedọn siphẹ Itooghị Oonịr Asiạ phọ  odị, oḅilhẹ ookolhobian ade phọ eten dị abuphẹ roḅerion bọ komaạr okelhọm.

6. Odaphạn Iiḍighi 24:15, buọ anhiạn kụ kotolhọm aani igbo abuẹn aZihova kaḅerion bọ?

⁶ Edị emhạn maạr epelhom, kemoghi ni dị abuphẹ okpetenhaan bọ Amagedọn phọ kotughemhị aani buphẹ moḅerion bọ ilọ Omhạr phọ k’Enhaạn ḅilhẹ r’ipẹ rewạ bọ okumu aZihova. Uḍighi ika? Loor esi dị ogbogh opol abuẹn koḅerion bọ oḍighi “bukarạph phọ.” (Bạl Iiḍighi 24:15.) Kemoghi ni dị bidị konmeeghi ibadị araraạr siphẹ adọl aghuḍum mọ abidị orue omhooghọm asuọ etagharạn phọ aKraist. Tuutughiạn ipẹ oḍighi phọ katọl bọ, otughemhị aani ilọ Enhaạn irubal awe phọ abuẹn phọ u/legheri bọ r’iyaạr ilọ aZihova. Keḍighi edị torobọ onyọ abidị kamoọgh otughemhiạ aBaibul iduọn yira rotughemhị ghan bọ we Baibul phọ ḍio arodon ḍughụm? Keḍighi edị kodiighi buẹn phọ oḅerion bọ rookpomhoghan kụ otughemhị ilọ otughemhị aani abuẹn purukụ roḅerion bọ ḍughụm? Yira kogon ni kụ omiịn aani ipẹ kekị bọ. Toroboiperolbọ, siphẹ eekunha Itooghị Oonịr Asiạ phọ aKraist, “ade phọ kemuza r’olegheri iyaạr phọ aZihova.” (Isa. 11:9) P’eeghe iboom arukumuan oghelhọm dị ketọl siphẹ itooghị oonịr asiạ phọ!

7. Eeghe kụ iḍighi kụ awe phọ Enhaạn komoọgh bọ ni ogbolhomaam mem dị bidị rotughemhị buphẹ koḅerion bọ?

⁷ Mem Itooghị Oonịr Asiạ phọ aKraist, oomo arebenhẹ phọ aZihova siẹn ade phọ kokiọm ni ghisigh onmeeghi dọl aghuḍum mọ abidị, orue oḍighi araraạr dị keḅeraạn nyodị. Oomo phọ abidị komoọgh ni ogey ogbolhomaam okị esi abuẹn oḅerion bọ, iduọn bidị rokparaghạ bọ okpạr opu inyuughiom oḍighi ikarạph kụ orolhọm aani siigbu phọ aZihova. (1 Pit. 3:8) Iikia i/lo, buẹn koḅerion bọ ongọ ghuḍum kooḍikuan ni r’awe phọ Enhaạn osooromhi bọ ni loor kụ rokparamhị bọ ni ḍighaạgh oḍighi aani “ilọ apelieẹny phọ [abidị] kamunughan.”—Fil. 2:12.

8. Eeghe kụ iḍighi kụ eḍighi bọ ni osụ-olhoghi omheeraam mọ abuphẹ kokị bọ oomhaghạgh abuphẹ koḅerion bọ kolọgh ni elhegh buọ ephomhoghiạn phọ abidị?

⁸ Ibadị ariphigh edi ni otuạn omheeraam mọ abuẹn kokị bọ omhaaghạgh abuphẹ oḅerion bọ kolọgh ni elhegh buọ ephomhoghiạn phọ abidị. Esi omaạm, odaphạn oḅerion esi aḍuugh dị mamite ghan ni epẹ omhạn, ekịgh mudị aZihova kaḅilhẹ ni alẹm we phọ dị kootughiạn ghan, oḅạ ghan eniin phọ eten phọ oḅilhẹ otọl ipẹ bidị orọl ghan bọ kụ ogbi bọ omhugh phọ. Tuutughiạn mọ aZizọs atomaạm ḍuugh ralhạ kụ atomaạm oḅetenhu esi aḍuugh phọ idiphọ rosumeẹny ghan bọ oye ralhạ. (Mat. 9:18, 24; Jọn 11:11-13) Mem dị awe oḅetenhu esi aralhạ oomhanham, bidị roḅạ ghan iniin phọ koḅilhẹ orọl eten phọ epẹ bidị orọl ghan bọ kụ ogbi bọ omhinạ phọ. Ooḅeghiọn eḍeenhaan phọ aLazarọs. Odị mamhugh ni esi inya aḍughul otu, kụ iḍighi kụ eḍeenhaan mọ aloor phọ odị reḅọr. Ghalhamọ r’iduọn phọ ni, mem mọ aZizọs aḅeton bọ nyodị, mem mem mọ bịn abumarani phọ odị ulhọgh ni nyodị elhegh, ḅilhẹ, iigholhaan ni mọ aLazarọs aatughiạn ni bidị.—Jọn 11:38-44; 12:1, 2.

9. Eeghe kụ iḍighi kụ buphẹ koḅilhẹ bọ oḅerion ko/ḅetenhuom bọ ilhoghi r’asiloor dị emhunhughan?

⁹ AZihova aguanaan mọ oye ka/tọl eeḍiạn itooghị phọ aKraist kụ aḅẹm mọ: “Mị u/moon.” (Isa. 33:24; Rom. 6:7) Kụ iḍighi kụ buphẹ koḅerion bọ siphẹ aḍuugh phọ koḅilhẹ omoọgh siloor dị emhoon. Toroboiperolbọ bidị ko/munughan mem mem mọ. Eḍighi iduọn phọ, abuọ ephomhoghiạn phọ abidị otue ni ookia bidị. Ekịgh mudị enụm enụm kụ oomo omhạr awe omunughan siphẹ eeḍiạn Itooghị Oonịr Asiạ phọ aKraist. Itooghị oonịr asiạ phọ resi eekunha kụ aZizọs aḅọgh itooghị Omhạr phọ angọ Odẹ phọ odị. Mem mọ amuẹn phọ bịn Omhạr phọ makuamhị amunenhi oomo iiḍighi phọ odị, eḅaramaạm oḅilhẹ oḅerion omhạr awe ongọ  aghuḍum dị amhunhughan.—1 Kọr. 15:24-28; Ogan. 20:1-3.

10. Ika kụ idị oḅetenhu esi aḍuugh phọ katir nyinhạ?

¹⁰ Tuutughiạn ipẹ ketọl bọ mem dị nạ aghị oomhaghạgh abuọ ephomhoghiạn phọ anạ. Ibo phọ nạ kaloghoma bọ kengọ nyinhạ emoghi ḍughụm obobọ reẹgh? Nạ kamoọr ri suọr kụ aboom ghan aZihova ḍughụm? Yira okuphom ni owol eniin iyaạr, nạ kaloghoma ni eboom ephomhoghiạn dị u/ḅarạm beeph ikarạph ḅilhẹ r’ogbolhomaam Odẹ k’akẹ phọ r’Oọny phọ odị, loor esi iikiạ inmo oḅetenhu esi aḍuugh phọ.

11. Odaphạn ikpo onhụ phọ aZizọs ogẹ bọ siphẹ Jọn 5:28, 29, eeghe kụ kemitenhaan buphẹ kotolhọm bọ siigbu phọ Enhaạn?

¹¹ Tuutughiạn ibo phọ abuphẹ koḅerion bọ komoọgh bọ, mem dị bidị onme dọl aghuḍum mọ abidị, orue orolhọm asiigbu phọ Enhaạn. Buphẹ konmeeghi bọ dọl aghuḍum mọ abidị komoọgh ni eepoogh omhoọgh aghuḍum k’agee-pọ dọl aParadais. Ḍieriphọ aḍighaạgh phọ, aZihova ka/meera abulọ u/meera unmia orọl ogbaragbaramhị eephọ aParadais phọ.—Isa. 65:20; bạl Jọn 5:28, 29.

12. Eghẹn eten kụ edị aZihova kasẹph bọ oomo abuphẹ kotọl bọ siẹn ade phọ?

¹² Eeḍiạn itooghị Omhạr phọ Enhaạn, oomo awe phọ Enhaạn komiịn ni omhunhughan ipẹ edi bọ siphẹ Proverbs 10:22 eḅẹm bọ mọ: “Aḍisẹph phọ k’ aZihova kụ reḍighi ghan idị oye kameel eelạ, ḅilhẹ Odị ra/ḅarạm ghan eephinha.” Uwaloor phọ aZihova katolhạn ni we phọ Enhaạn, kụ bidị omoọgh igey asiya r’odị, kụ bidị okiọm ghisigh otọl aani idiphọ aKraist, oḍighi we dị momhunhughan. (Jọn 13:15-17; Efẹ. 4:23, 24) Torobọ aḍio bidị kopoph ghan bịn okị ghisigh, oḍighi bugey awe. P’eeghe ibo dị ketọl mem mọ amuphẹ phọ! (Job 33:25) Ika nuụn kụ edị ogbirima ghan ilọ oḅetenhu esi aḍuugh phọ kelhoghonhaạn nyinhạ ḍighaạgh nyiidiphọ?

13. Odaphạn Psalm 139:1-4, ika kụ idị oḅerion esi aḍuugh phọ keḍeenhaan odọ esi dị aZihova ulhegheri iyira asi?

¹³ Idiphọ yira moghaạph bọ ni epẹ omhạn, mem dị aZihova aḅerion we phọ, odị kaḅulemhi ni iitughiạn phọ abidị angọ ḅilhẹ r’araagharạ phọ ipẹ olhegheriom ghan bọ bidị, r’ipẹ bidị orọl ghan bọ. Ipẹ phọ remạ ghan eeghe? Remạ ghan mọ aZihova aphomhoghiạn nyinhạ asi esi dị alhegheri oomo ipẹ nạ raatughiạn ghan bọ, raloghoma ghan bọ, raḅạ ghan bọ, ḅilhẹ raḍighi ghan bọ iyaạr. Kụ iḍighi kụ mem dị odị aḅeton nyinhạ, kedughanhaan ni nyodị oḅulhemhi iitughiạn phọ anạ, roozọ phọ anạ, ḅilhẹ r’araagharạ phọ anạ. Uw-emhạ phọ aDevid alhọgh ni elhegh mọ aZihova amoọgh ni ogbolhomaam atu esi atorobọ onyọ ayira. (Bạl Psalm 139:1-4.) Eghẹn eten kụ edị onhaghanhạn ipẹ aZihova akạr bọ ulhegheri iyira asi, ketue itir iyira nyiidiphọ?

14. Ritir ghan iyira ika mem dị yira ogbirima ilọ ipẹ aZihova ulhegheri bọ iyira?

¹⁴ Mem dị yira ogbirima ilọ ipẹ aZihova akạr bọ ulhegheri iyira, yira koo/ḅaghamhiạn loor. Eeghe kụ iḍighi? Legheri mọ aZihova akaraghị ni amoọgh ogbolhomaam ayira. Torobọ onyọ ayira amạn ni maạr esi odị. Odị alegheri ilọ asidọl phọ ipẹ ekọm bọ odọ oye phọ yira oru bọ. P’eeghe idị iphẹn phọ iidereghị iyira! Kụ iḍighi kụ r’amem r’amem yira ku/loghoma mọ ogina ayira bịn kụ odi. Torobọ okalhạ siphẹ aḍio phọ, aZihova odi ni oogaạny ayira rapogh ghan roopoogh olhoghonhaạn ayira ḍighaạgh.—2 Chron. 16:9.

15. Ika kụ idị oḅetenhu esi aḍuugh phọ uḍeenhaan iyira osụ-olhoghi phọ aZihova?

¹⁵ Aḍuugh eḍighi ni egbagarạ ekpinhạ dị amulhọgh ḍien phọ rosighẹ ghan kophoghomhiom we. Abuphẹ odi bọ eeḍiạn aSetan rosighẹ  ghan ni kokpaariọm we phọ Enhaạn mọ owilhẹ omheeraam mọ abidị. Kuolọ oghiilhaan aḍuugh ka/tue uzuoghom iyira. Yira olegheri ni mọ ghalhamọ amulhọgh ḍien phọ ayira uzẹ ni iyira, aZihova kuḅeton ni iyira angọ ghuḍum. (Ogan. 2:10) Yira omeeraam ni mọ iyaạr i/lo dị ketue egbariọn siya phọ ayira r’aZihova. (Rom. 8:35-39) P’eeghe idị aZihova maḍeenhaan osụ-olhoghi, esi ongọ ayira oḍuomolhoghi oḅetenhu esi aḍuugh phọ! Dị eego esi oḍuomolhoghi oḅetenhu esi aḍuugh phọ, odị mawunughi elhom ekpinhạ phọ aSetan, eniin phọ amem mọ aḅilhẹ kẹn unyaamhị iyira r’ogbagarạ akpọ oḅio.

16. Ighẹn asipuru kụ edị ewạ mọ puruan loor, ika kụ idị ophanyanhaạn phọ kelhoghonhaạn nyinhạ ḍighaạgh olhegheri mughumọ nạ aḍuom ni olhoghi aZihova?

¹⁶ Nạ kaḍighi ika kụ alegheri mọ nạ katue ni amerenyạn mem dị amulhọgh ḍien phọ aZihova opaạr oghiigh anạ? Eniin eten pọ opuruan aloor mọ, ‘Eḍighi ni idị osopha kirokirọ phọ mị rasopha ghan bọ ḍio ḍio ḍio eḍeenhaan mọ mị aḍuom ni olhoghi aZihova ḍughụm?’ (Luk 16:10) Aḍinhọn pọ, adọl aghuḍum mọ amhị eḍeenhaan ni mọ mị aḍuom ni olhoghi ruguanhaan phọ aZihova, ongọ amhị ipẹ ikuom bọ imhị eḍighi maạr dị mị asighẹ Omhạr phọ kụ aḍighi eḅẹl ḍughụm?’ (Mat. 6:31-33) Eḍighi maạr dị ophanyanhaạn phọ anạ aḍighi ii, pọ eḍeenhaan mọ nạ aḍuom ni olhoghi aZihova, ḅilhẹ mọ nạ aakolhobian ni okaran atorobọ odẹgh ophogh dị nạ asoman.—Prov. 3:5, 6.

17. (a) Ika kụ idị oḅerion esi aḍuugh phọ aḍeenhaan mọ aZihova amoọgh ni okparạm? (b) Ika kụ idị yira kotue oḍeenhaan mọ yira osereghiạn ni okparạm mọ aZihova?

¹⁷ AZihova magu ḍio r’amem dị odị kasiemhi eekunha aḅirinhi phọ ophọn phọ. (Mat. 24:36) Odị ka/ḍeenhaan e”moọgh okparạm bịn azọ mem dị ke/teẹny. Odị amoọgh ni ḍiḅeraạn oḅilhẹ oḅerion abuphẹ momhuughu bọ, kuolọ odị akparạm ni rakori. (Job 14:14, 15) Odị rakoriom ghan mem mọ opọ ekasiạn bọ oḅerion abuphẹ momhuughu bọ oḅilhẹ ongọ aghuḍum. (Jọn 5:28) Yira omoọgh ni igey ariphigh otuạn osereghiạn okparạm mọ aZihova. Tuutughiạn aạ, loor esi okparạm mọ aZihova, ibadị awe ghalhamọ r’ayira phọ kẹn, morue “okiton esi ikarạph.” (2 Pit. 3:9) AZihova rawạ dị ibadị awe, lọ edugh ni, komoọgh aani eepoogh omhoọgh aghuḍum k’agee-pọ. Kụ iḍighi kụ, oḍeenhaan mọ yira osereghiạn ni okparạm mọ aZihova. Ika? Esi okuamhị olhọgh inyaạm owạ “abuphẹ Enaạn mesaḅạr bọ omoọgh aghuḍum k’agee-pọ phọ” kụ olhoghonhaạn abidị ḍighaạgh ophomhoghiạn r’okumu aZihova. (Iiḍighi 13:48) Bịn bidị momhooghọm aani suọ okparạm mọ aZihova, iduọn ayira.

18. Eeghe kụ iḍighi kụ yira komoọgh bọ ni okparạm okị esi abunhọn?

 ¹⁸ AZihova kakparạm ni akori tutụ k’eekunha oonịr asiạ phọ, kụ agbi ogon dị yira komunughan. Tutụ k’amem mọ amuphẹ phọ, aZihova aakolhobian ni ophogh ghan ogunhọm ikarạph phọ ayira. Loor ephigh phọ ephẹn phọ, yira ophogh ghan imạ ilọ abunhọn kụ omhoọgh ghan okparạm oghị esi abidị. Ooḅeghiọn eḍeenhaan oniin onyọ umarani ayira dị olom mọ asoman ogbagarạ ooḅaghamhiạn aloor dị tutụ awilhẹ oghị ghan ituughạ. Onyọ umarani phọ aḅẹm mọ: “Iphẹn phọ iphin ni esi amhị iboom, iikolhobian ayoor ilọ aghisigh phọ inmia ni.” Ghalhamọ r’iduọn phọ ni, esi oomo adọl phọ aḍiẹn phọ anhịr phọ ophọn phọ amhoọgh bọ ephomhoghiạn, amhoọgh ni okparạm aghị esi olom mọ odị. Odị abeḍenhọm aZihova, i/pẹr nyodị. Idiphọ aZihova, odị aphogh ghan atenhom iiḅaghamhị phọ kụ agbon ghan imạ araagharạ olom mọ odị. Odị aḅẹm mọ, “Olom mọ amhị amoọgh ni imạ araagharạ, ḅilhẹ rakparaghạ ni onmia enụm enụm.” P’eeghe idị emhạn maạr dị yira komoọgh okparạm okị esi abuọ eghunotu phọ ayira obobọ buọ ookpomhoghan phọ ayira rokparaghạ bọ ni okpạr opu ipaanhaạn!

19. Eeghe kụ eḍighi osopha ayira?

¹⁹ AZizọs r’aruukpaạny phọ umhoọgh ni ibo mem mọ olhẹm bọ de phọ. Kuolọ gbiom olhoghi odọ ibo dị bidị komoọgh mem dị omhiịn dị awe dị omhunhughan, ophomhoghiạn, kụ rokumu aZihova omuza siẹn ade phọ. Gbiom olhoghi odọ ibo dị buphẹ kotooghị bọ r’aKraist komoọgh mem dị bidị omhiịn dị omhạr awe rokelhọm iiḍighi itooghị phọ abidị. (Ogan. 4:4, 9-11; 5:9, 10) Ḅilhẹ kẹn ni, gbiom olhoghi idị ketọl mem dị izin ibo esighẹ esi izin eephinha, mem dị imhinhimhiịn, emoghi, r’aḍuugh i/lo mun (Ogan. 21:4) Kụ egbi oteẹny amem mọ amuphẹ phọ, sopha otuughaạny ephomhoghiạn phọ, osụ-olhoghi phọ, r’okparạm Odẹ phọ ayira. Eḍighi maạr dị nạ aḍighi iduọn phọ, nạ kapamhanhạm ni ibo phọ anạ etigheri ipaanhaạn dị nạ asoman. (Jems. 1:2-4) P’eeghe idị olhoghi ayira aḅaạl ilọ oguan phọ aZihova uguanhaan bọ iyira mọ onọ “kaḅeton ni” buphẹ momhuughu bọ!—Iiḍighi 24:15.