1. Pirang’o Yehova ucaku cwio piny?

NINDO moko bedo nuti ma Yehova ukeubedo i ie kende. Re ebedo ngo ku can pilembe nia etie kende, ento ebino kud anyong’a. Emito jumange bende gibed kud anyong’a. Eno ubenyutho nia, kan ecaku cwio piny, tie mer re m’ucwale.​—Zab. 36:9; 1 Yoh. 4:19.

2. Kinde ma Yehova ucwio piny, Yesu ku jumalaika giwinjiri nenedi?

² Ku kwong’a Yehova ular ucwio Yesu. I ng’eye, nikadhu kud i bang’ Wode maeno ma kayu, “gin ceke cwire,” uketho i ie udul jumalaika. (Kol. 1:16) Yesu ubino kud anyong’a lee nitimo tic karacelo ku Won. (Rie. 8:30) Jumalaika bende anyong’a negogi lee, kum kinde ma Yehova ku Yesu gibino cwio polo ku ng’om, gin de gibino nuti. Ginyutho anyong’ane nenedi? Biblia wacu nia ‘giwoi ku mutoro’ kinde ma gineno ng’om uwok, man gimediri nipaku Yehova pi gin ceke m’ecwio, asagane kinde m’ecwio dhanu. (Yob 38:7; Rie. 8:31) Cwic maeno ceke ubenyutho mer man rieko pa Yehova.​—Zab. 104:24; Rum. 1:20.

3. Calu m’ugorere i 1 Jukorinto 15:21, 22, lam mi jamgony ma Yesu thiero umio kaka mi lembang’o?

³ Yehova ukeco nia dhanu gikwo kud anyong’a rondo ku rondo  iwi ng’om. Ento kinde ma Adamu giku Eva gidubo ire, dubo ku tho umondo i ng’om, uketho tin nyikwaigi bende ubetho. (Rum. 5:12) Yehova utimo ang’o? M’umbe galu, enyutho kite m’ebibodho ko dhanu. (Tha. 3:15) Emaku yub mi mio jamgony pi nibodho nyikwai Adamu ku Eva kud i ng’eca mi dubo man tho, kara ng’atu ma tek ung’io nitimo ire ubin unwang’ kwo ma rondo ku rondo.​—Yoh. 3:16; Rum. 6:23; som 1 Jukorinto 15:21, 22.

4. Wabiweco iwi penji ma kani i thiwiwec maeni?

⁴ Lembang’ola pa Yehova mi cer copo ketho wapenjara ku penji dupa ma tung’ tung’. Ku lapor, cer bikadhu nenedi? Nyo wabing’io wedi mwa ma gibicer? Cer bimio iwa anyong’a ma nenedi? Man cer ubeponjowa ku lembang’o iwi mer, rieko man cirocir pa Yehova? Wakewec iwi penjinegi.

5. Pirang’o wacopo yero nia dhanu ceke bicer ungo i saa ma rom?

⁵ Yehova bitio ku Wode pi nicero dhanu milioni dupa iwi ng’om. Pieno, wacopo wacu nia dhanu maeno ceke gibicer ungo wang’ acel i saa ma rom. Pirang’o? Pilembe ka dhanu zoo ucer mbwang’ i saa ma rom, yakini copo nyai iwi ng’om. Bende, Yehova tie ngo Mungu mi yakini. Eng’eyo cuu nia kara dhanu ukwo ku kwiocwiny, mito lembe ukperere ma ber. (1 Kor. 14:33) Yehova Mungu unyutho rieko man cirocir, pilembe karacelo ku Yesu, ecwio ngo ng’om wang’ acel, ento ecwie nok nok i wang’ nicwio dhanu. Yesu bende binyutho kite ma rom eno i saa mi bimobim pare mi oro 1 000, kinde ma en karacelo ku ju ma biboth kud i Harmagedon, gibiyiko piny ma dhanu ma bicer bibedo ku yenyne iwi ng’om.

6. Nimakere ku Tic mi Jukwenda 24:15, kud i kind dhanu ma Yehova bicero, jumoko bibedo jukani?

 ⁶ Tic ma pire tek nisagu zoo, ma dhanu ma biboth kud i Harmagedon bitimo, utie niponjo ju ma bicer kara gin bende ging’ei lembe iwi Ker pa Mungu man lembe ma Yehova ubemito gitim. Pirang’o? Pilembe dupa m’i kind dhanu ma bicerne bibedo ngo “weg bedopwe.” (Som Tic mi Jukwenda 24:15.) Bikwayere nia gin bende gitim alokaloka dupa kara ginwang’ mugisa mi jamgony pa Kristu. Niponjo dhanu milioni dupa m’ung’eyo ngo Yehova, bibedo tic ma lee. Nyo ng’atuman m’i kindgi bibedo ku japonji pare gire calu ma wabed waponjo ko Biblia ku dhanu tin? Nyo cokiri ma tung’ tung’ bibedo nuti calu ma tin, ma jucopo orogi i ie kara gin de ginwang’ bodho mi ponji ma bikonyogi niponjo jumange ma bicer i ng’eigi? Wakuru wabineno saa meaca. Ento gin ma wang’eyo utie kende kende nia i thum mi oro 1 000 mi bimobim pa Kristu, “ng’om bibedo pong’ ku ng’eyong’ec pa Yehova.” (Isa. 11:9) Andha wabibedo ku tic dupa ma nyayu mutoro i the bimobim mi oro 1 000!

7. Pirang’o bikwayu nia dhanu pa Yehova gikethiri kaka ju ma bicer kinde ma gibeponjogi?

⁷ I the bimobim mi oro 1 000 pa Kristu, dhanu pa Yehova bibedo asu ku yeny mi timo alokaloka i kwo migi pi ninyayu anyong’a i ie. Bikwayu nia ginyuth kisa ni dhanu ma bicer kinde ma gibekonyogi nivoyo paru man awanya migi ma rac, kara gin bende gikwo nimakere ku cik mir ukungu pa Yehova. (1 Pet. 3:8) M’umbe jiji, ju ma bicer bineno nia dhanu pa Yehova gitie ju ma gijwigiri man gibetimo alokaloka asu pi ninyayu anyong’a i Yehova. Lembuno bitelogi kara gin bende gitim ni Yehova.​—Flp. 2:12.

8. Pirang’o wacopo wacu nia ebibedo yot ni dhanu ning’io wedi migi m’ucer?

⁸ Thelembe tie dupa m’ucwaluwa niyero nia, ebibedo yot ni dhanu ning’io wedi migi m’ucer. Ku lapor, nimakere ku cer m’ular utimere con, ubenen nia Yehova biketho dhanu m’ucer gibibedo kud ayi migi, ayi wec migi man paru migi de m’urombo ku ma gilar gibino ko i wang’e ma fodi githo ngo. Poi nia Yesu uporo tho ku nindo, man cer ke eporo ku cew kud i wang’ nindo. (Mat. 9:18, 24; Yoh. 11:11-13) Ka ng’atini ucew kud i wang’ nindo, ayi pare man kite m’eweco ko lokere ngo, man ebedo ku ng’eyong’ec ma rom ku m’elar ebino ko kinde m’ebecinindo. Ku lapor, Lazaru utho man etimo nindo ang’wen i liel, ma nwang’u dong’ kume ucaku betop. Re kinde ma Yesu ucere, nyimego pare ging’ie ndhundhu, man en de ayi migi urwinyo ngo i wang’e.​—Yoh. 11:38-44; 12:1, 2.

9. Pirang’o dhanu bicer ungo wang’ acel ku paru man kum m’umbe dubo?

⁹ Yehova ung’olo nia i the bimobim pa Kristu, ng’atu moko mbe ma biwacu nia “kuma lith.” (Isa. 33:24; Rum. 6:7) Pieno, dhanu ceke ma bicer bibedo ku leng’kum ma ber. Ento gibidoko ngo ku kum ma leng’ ndhu ndhu, niwacu kum m’umbe dubo. Kum kan ungo, wedi migi bing’iogi ngo. Ubenen nia i the bimobim mi oro 1 000 pa Kristu, dhanu bidoko ku kum ma leng’ m’umbe dubo nok nok. I thum mi oro 1 000 re ma Yesu bidwoko Ker i bang’ Won. Kum nwang’u dong’ Kerne upong’o lembakeca pa Mungu ceke, uketho i ie bedo ku kum ma leng’ m’umbe dubo.​—1 Kor. 15:24-28; Nyu. 20:1-3.

10. Cer biketho ibiwinjiri nenedi?

¹⁰ Kepar pir anyong’a m’ibibedo ko kinde  m’ibejolo wedi peri m’ucer! Nyo anyong’ane biketho ibing’iero ang’iera kunoke awaka? Kunoke nyo ebiketho ibiwero wer mi pak ni Yehova? Lembe ma wang’eyo utie nia, ibinyutho mer ma dit ni Yehova man ni Yesu pi dhanu ma giketho ucer, pilembe gimeri.

11. Calu ma Yesu yero i Yohana 5:28, 29, dhanu ma bikwo nimakere ku cik mir ukungu pa Mungu gibinwangu bero ma kani?

¹¹ Kepar pir anyong’a ma ju m’ucer bibedo ko kinde ma giwanyu kothgi ma con cen, man gibekwo nimakere ku cik mir ukungu pa Mungu! Ju m’utimo alokaloka maeno gibicer “cer mi kwo,” niwacu, gibikwo rondo ku rondo i Paradiso. Ju m’ujai ke, Yehova biyio ngo igi nia gikwo i Paradiso maru gibinyotho kwiocwiny mi dhanu pare.​—Isa. 65:20; som Yohana 5:28, 29.

12. Yehova bimio mugisa ma kani ni dhanu ceke ma bikwo iwi ng’om?

¹² I the bimobim mi Ker pa Mungu, dhanu pa Mungu ceke bineno nia wec ma nwang’ere i Lembrieko 10:22 m’uwacu nia “mugisa pa Yehova . . . lonyojo man emedo can moko ngo i kume,” utie lemandha. Ku kony mi tipo pa Yehova, dhanu pa Mungu bidoko julonyo i thenge mi tipo, niwacu nok nok gibidoko calu Kristu man gidoko ku kum m’umbe dubo. (Yoh. 13:15-17; Ef. 4:23, 24) Kubang’ nindo gibibenwang’u alokaloka mi leng’kum. Eno bibedo kwo ma ber mi tuko ngo! (Yob 33:25) Kawoni dong’ wakenen ponji ma cer ubemio iwa iwi mer, rieko man cirocir pa Yehova.

13. Zaburi 139:1-4, unyutho nenedi nia Yehova ung’eyowa cuu mandha, man cer ke binyutho lembuno nenedi?

¹³ Calu ma walar waneno, kinde ma Yehova bicero dhanu, ebiketho gibibedo ku kit rieko ma rom man ayi de ma rom ku ma gilar gibino ko i wang’ tho migi. Eno ubenyutho nia Yehova umeri lee, uketho egwoko ayi peri m’iparu ko lembe, m’iwinjiri ko, m’iweco ko, man m’itimo ko lembe. Pieno, kan ebikwayere nia iceri, ebidwoki tap i ayi m’ilar ibino ko i wang’e ma nwang’u fodi itho ngo. Ubimo Daudi ung’eyo nia Yehova ung’eyo ng’atuman acel acel m’i kindwa cuu mandha. (Som Zaburi 139:1-4.) Pirang’o etie lembe mi jukocwiny iwa nia Yehova ung’eyowa cuu mandha?

14. Pirang’o ninyang’ nia Yehova ung’eyowa cuu, tie lembe ma nyayu ngo lworo i iwa?

¹⁴ Ninyang’ nia Yehova ung’eyowa cuu, tie lembe ma nyayu ngo lworo i iwa, pilembe ebedieng’ piwa lee mandha man eketho ngo wang’e kwa i kum kosa mwa. Ng’atuman m’i kindwa pire tie tek lee i ie. Eng’eyo lembe ceke ma wanwang’ara ko i kwo mwa m’uketho kite mwa ubed ukoc. Eno tie lembe m’ubetielo cwinywa lee! Kud wapar nyanok de nia watie kendwa. Saa ceke Yehova ni kudwa man etie ayika nikonyowa.​—2 Kei. 16:9.

15. Cer ubenyutho nenedi nia Yehova tie Mungu ma riek?

¹⁵ Lworo mi tho utie uwic ma rac. Dhanu ma Sitani ubetelo wigi gitio ku lworo maeno pi niketho jumange ucib jurimbgi kunoke gitim lembe ma reco. Re gibivoyowa ngo. Kum kadok ginegowa de, Yehova bicerowa. (Nyu. 2:10) Wang’eyo nia kadok nwang’u gitim ang’o ngi, gicopo nyotho ngo winjiri mwa ku Yehova. (Rum. 8:35-39) Genogen mi cer ma Yehova umio iwa, unyutho kamaleng’ nia etie Mungu ma riek. Genogenne uketho lworo negowa ngo kadok jubesendowa i dhu tho, ento emio iwa tegocwiny ma lee.

16. (a) Ng’atuman m’i kindwa ucikere nipenjere ku kit penji ma kani? (b) Dwokowang’ penji maeno copo konyowa nenedi ning’eyo nia andha wageno Yehova?

 ¹⁶ Tek judegi pa Yehova gibesendi i dhu tho, nyo ibibedo ku genogen nia Yehova biceri ka ginegi? Ang’o m’unyutho nia andha ibigeno Yehova i saa maeno? Gin ma copo konyi utie nikepenjiri kumae: ‘Nyo nyithi yub ma thindhothindho m’abed amaku kubang’ ceng’ ubenyutho nia ageno Yehova?’ (Lk. 16:10) ‘Nyo kit kwo para ubenyutho andha nia ageno lembang’ola pa Yehova m’eng’olo nia ebipong’o yeny para tek aketho lembe mi Ker pare i kabedo ma kwong’a?’ (Mat. 6:31-33) Kan idwoko wang’ penji maeno nia eyo, nang’ inyutho nia andha igeno Yehova, man ibibedo ayika pir abidhe ceke m’ibinweng’iri ko i nindo m’ubino.​—Rie. 3:5, 6.

17. (a) Cer ubenyutho cirocir pa Yehova nenedi? (b) Wacopo nyutho foyofoc mwa nenedi ni Yehova pi cirocir pare?

¹⁷ Yehova udaru ketho nindo ku saa m’ebinyotho ie ng’om ma rac maeni cen. (Mat. 24:36) Ebitimo ngo lembe maeno i wang’ nindo m’eketho. Etie kud ava nicero dhanu m’utho, ento pi kawoni, fodi ebeciro. (Yob 14:14, 15) Ebekuro kinde ma saane biromo tap ci, e ebicerogi. (Yoh. 5:28) Yehova uromo ku foyofoc lee pi cirocir pare. Pilembe cirocirne umio kaka ni dhanu dupa tin kara “gitund ba lokocwiny,” uketho i ie wan bende (2 Pet. 3:9) Yehova ubemito nia ka copere, timba dhanu dupa unwang’ kwo ma rondo ku rondo. Dong’ wek wadwok foyofoc ire pi cirocir pare, ma watim ko kero mwa ceke nisayu dhanu “m’adundegi bedo ayika pi kwo ma rondo ku rondo” man wakonygi gimar Yehova kara gitim ire. (Tic. 13:48, NWT) E gin bende gibinwang’u bero nikum cirocir pa Yehova calu ma wan de wanwang’u.

18. Pirang’o ukwayu wanyuth cirocir ni jumange?

¹⁸ Yehova bikuro nitundo i ajijki mi oro elufu acel, ka dong’ ebidwokowa leng’. Ento ma fodi nindo maeno k’uromo ngo, etie ayika niweko dubo mwa. Pieno, wan bende ukwayu walub lapor pare, ma waketh ko wiwa iwi kite ma beco mi jumange man wanyuth igi cirocir. Wakewec pi lapor pa nyamego moko ma won ot pare ubino kud ang’abacwiny ma tek, m’uketho ejigo nicidho bende i coko. Nyamegone ukoro kumae: “Lembuni ubino lembe ma yot ungo ira. Lembe ma wapangu nia  wabitimo pi kwo mi ot mwa ceke upodho.” Re i peko maeno ceke, nyamegone unyutho mer man cirocir ni won ot pare. Ejengere iwi Yehova man evoc ungo. Calu Yehova, en de eketho ngo wie i kum peko, ento eketho wie i kum kite ma ber pa won ot pare. Emedo kumae: “Won ot para utie ku kite ma beco, ebetimo kero nivoyo ang’abacwiny pare nok nok.” Pieno, pire tie tek nia wabed wanyuth cirocir ni juruot mwa kunoke ni umego ku nyimego mwa ma gibeii nivoyo peko ma gibenwang’iri ko!

19. Ukwayu waketh lembakeca mi timo ang’o?

¹⁹ Kinde ma Yehova ucwio ng’om, anyong’a unego Yesu lee karacelo ku jumalaika. Kepar pir anyong’a ma gibibedo ko kinde ma ng’om ceke bipong’ ku dhanu ma leng’ m’umbe dubo, m’umaru Yehova man m’ubetimo yeny pare. Kepar bende pir anyong’a ma ju ma gibibimo ku Kristu i polo gibinwang’u, kinde ma gibeneno bero ma tic migi ubemio ni dhanu. (Nyu. 4:4, 9-11; 5:9, 10) Bende, kepar kinde ma piwang’ mi can bidoko ni piwang’ mir anyong’a, ma nwang’u dong’ remokum, can man tho de umbe. (Nyu. 21:4) Ento ma fodi lembuno k’utimere ngo, walubu lapor mi mer, mi rieko man mi cirocir pa Yehova. Ka watimo kumeno, wabibedo asu kud anyong’a kadok wabenwang’ara ku peko ma rukani de. (Yak. 1:2-4) Dong’ wek wadwok foyofoc ma lee ni Yehova pi lembang’ola m’eng’olo nia “cer ma jucer ko bibedo nuti”!​—Tic. 24:15.