1. Hano misangaˈ ci Yihofa to roma a pinaˈorip?

SALAKAT edengan ci Yihofa ko materekay, kawra cowa ka matoˈol Cingra, cowa pisaali Cingra to papacafayen kamayan a lipahak. Kawra, makalimay Cingra paladaˈ to lipahak no kaˈorip, mansa mikitini i olah a misatapang misangaˈ to maamaan.—ˈOlic 36:9; 1 Yohani 4:19.

2. Misangaˈ ci Yihofa to maamaan i, ci Yis ato coyoh samanay ko harateng hani?

² Salakat misangaˈan ni Yihofa ko Wawa Ningra ci Yis, dotoc malacafayay toniya Wawa misangaˈ to ‘romaroma a maamaan,’ mahawpay ko masacaˈolay masaemangay a coyoh. (Kolosay 1:16) Malacafay ci Yis ci Yihofaan a matayal tada lipahakay, o romaroma a coyoh malecaday a lipahak, samanen pakaˈaraway cangra to pisangaˈ ni Yihofa ato ‘Ngaˈayay Sayho’ Ningra ci Yis to maamaan i paro no kakarayan. (Taneng 8:30) Samanay ko coyoh a paihkal to kalipahak nangra hani? Sowal no Fangcalay Cudad, tiya masangaˈ ko cikiw i, ‘mawahoay a mahemek’ cangra. Ikorto, misangaˈ ci Yihofa to kihcod i fafekang no cikiw, mangalef ko tamdaw, tada lipahakay cangra! (Yopu 38:7; Taneng 8:31) O kihcod misangaˈan ni Yihofa paihkalay to olah ato taneng Ningra.—ˈOlic 104:24; Loma 1:20.

3. Mikitini 1 Korinto 15:21, 22, o sapatefoc ni Yis pairaay to manan hatokel no tamdaw?

³ Tokel ni Yihofa to polong a tamdaw aitini i makapahay cikiw tahadaˈoc lipahak ko kaˈorip, kawra ikor mitowakangay  ci Atam aci Ifa to Kawas, telocto cowa to kangaˈay cangra ato teloteloc tahadaˈoc a maˈorip. (Loma 5:12) Samanay ci Yihofa a misaysay toniya demak hani? Tangsolay Cingra milasil to sapilidong to tamdaw a limasmas. (Satapangan 3:15) Misaˈosiay ci Yihofa misadak to sapatefoc, ho ngaˈay ira ko tokel no teloteloc ni Atam aci Ifa mihepol to raraw ato patay, paira to hatoki no mipiliˈay midoko to Kawas a tamdaw ngaˈay tahadaˈoc a maˈorip.—Yohani 3:16; Loma 6:23; ˈOsien ko 1 Korinto 15:21, 22.

4. Oniya lalakaw wa milengo to maanan salicay?

⁴ Mikiˈokay ci Yihofa to patikol paˈorip to mapatayay tamdaw, adihay ko sasa ita tonini alatek. Tinakoen, o samanay ko pipatikol a paˈorip? Ano patikol a maˈorip ko salawina i, papakahapinang kita cangranan han? O patikolay maˈorip a limasmas papaira to masamanay a lipahak ita? Pakayni i olah, taneng ato mihadidiay ni Yihofa, mikitini patikolay maˈorip a limasmas mamananam ita ko maanan? Dotoc, wa milengo kita toniya salicay.

5. O mapatayay a tamdaw hano cowa ko mahecaday tatokian a patikol maˈorip hani?

⁵ Pakaynien ni Yihofa i Wawa Ningra patikol a paˈorip to masacaˈolay masaemangay a mapatayay tamdaw, wa itini malecaday tatokian cangra a patikol maˈorip han? Cowa ko mamahaen, samanen ano tangsol sa matongal ko tamdaw wa masasifod alatek. Polong a demak ni Yihofa masieroday, mafanaˈay Cingra ira ko malikakawaay, masieroday, mihaen ngaˈ rihaday ko kaˈorip no tamdaw. (1 Korinto 14:33) Malacafay ci Yihofa aci Yis misangaˈ to cikiw i, paihkalay to kasapaan a taneng ato mihadidiay, masongilaˈ to ko pisaday nangra i, itiyaay a misangaˈ to tamdaw. Itini Pikowan to Comaˈol Miheca, wa malecad ci Yis ci Yihofaan  paihkal to taneng ato mihadidiay. Wa keriden ningra ko milakowitay to Armakiton a tamdaw misaday toniya cikiw, militemoh to patikolay maˈorip a tamdaw.

6. Mikitini Dmak 24:15, o cimacima ko papatikol a maˈorip hani?

⁶ O milakowitay to Armakiton a tamdaw iraayho ko kalimlaan a demak, padama cangranan cipinang to Hongti Kitakit ato saali ni Yihofa. Samanen ˈalomanay patikolay maˈorip a tamdaw sahtoay o ‘cowa ka moecel a tamdaw,’ misaaliay to taˈangayay kafalic ngaˈ mikitini sapatefoc milifok to haepoc, tahadaˈoc maˈorip. (ˈOsien ko Dmak 24:15.) ˈAlomanay ko cowa ka fanaˈ ci Yihofaan, sapasifanaˈaw cangranan misaaliay to adihayay toki ato ˈicel, itiya o kahacecay nangra wa ira ko cecay a padama cangranan, malecad o pipacekiw ita anini to Fangcalay Cudad han? O sasilsilen cangra tayra i kasakopang, hanaca micada to sapahatatanam a pasifanaˈ to midotocay cangranan patikol maˈorip a tamdaw han? Itiyato ngaˈ mafanaˈ kita to caˈof. Kawra ngaˈayay pakasoˈlinen ita i, mahererek ko Pikowan to Comaˈol Miheca, ‘pakayniay ci Yihofaan a sifanaˈ o mamiedef toniya cikiw,’ i lalomaˈ no comaˈol miheca o ˈaˈifowa kita, wa taˈangay ko lipahak!—Isaya 11:9.

7. Ano pasifanaˈ to patikolay maˈorip a tamdaw i, o finawlan no Kawas hano ngaˈay ‘palecaden nangra ko falocoˈ’ hani?

⁷ Itini Pikowan ni Kristo to Comaˈol Miheca, o papadotoc a mifalic ko finawlan ni Yihofa ngaˈ ngaˈay pakahemek ci Yihofaan, mihaenay o ‘papalecaden nangra ko falocoˈ,’ padama to patikolay maˈorip a tamdaw miremo to sakararawaw a harateng, mitoor to saali ni Yihofa a midemak. (1 Pitiro 3:8) Maˈaraw no patikolay maˈorip a tamdaw ko finawlan ni Yihofa ‘padotocay a misaˈicel, ho malidong ko niyah,’ maedeng o mamakalim a kalacafay to misapoeneray ko falocoˈ a tamdaw midoko to Kawas.—Filipi 2:12.

8. Hano ira ko lalangian ita a pakasoˈlin, o mamahapinang ita ko patikolay maˈorip a salawina?

⁸ Iraay ko lalangian ita a pakasoˈlin, ano militemoh kita to patikolay maˈorip a salawina i, wa pakahapinang cangranan. Tinakoen, pakayni maˈoningay i Fangcalay Cudad pakayniay patikolay maˈorip, patikolen ni Yihofa paˈorip ko cecay tamdaw, wa miliyaw a misangaˈ cingranan, o papisingan, sasowalen, harateng malecaday to ˈayaw no mapatay. Haratengen, patinakoan ni Yis ko mapatayay to mafotiˈay, patikolay maˈorip patinakoan to mipalalay to maeholay a tamdaw. (Matay 9:18, 24; Yohani 11:11-13) Ano mapalal ko maeholay a tamdaw i, o pising ato ngihaˈ ningra malecaday to ˈayaw no mafotiˈ, o maharatengay cowa ka falic. Haratengen ita ko tinakoan ni Lacarus, patikolen ni Yis cingra paˈorip i, sepatayto romiˈad mapatay cingra, misatapangayto maponiˈ ko tireng. Patikol cingra maˈorip i, oya tatosaay fafahiyan salikaka ningra tangsolay mahapinang cingra, ano cingrato mafanaˈay cangranan.—Yohani 11:38-44; 12:1, 2.

9. O patikolay maˈorip a tamdaw hano cowa ko tatangsol a malo malefotay hani?

⁹ Mahererek ko Pikowan to Comaˈol Miheca i, patikolen ni Yis ko Hongti Kitakit i kakarayan Wama, itiyato malaˈosi no Hongti Kitakit ko araaw no Kawas, mahawpay papatikol a malefot ko tamdaw. (1 Korinto 15:24-28; Paˈarawan 20:1-3) Mihaenay, itini Pikowan to Comaˈol Miheca, palidlid saan ko tamdaw malefot. Mikiˈokay ci Yihofa, itini Lakoing cowato ko papasowal ko tamdaw ‘adadaay kako,’ mihaenay o patikolay maˈorip a tamdaw o tatanektek  ko tireng, kawra cowa ka tangsol a malefot koniya tamdaw, mihaenay oha papakahapinang ko salawina nangra cangranan.—Isaya 33:24; Loma 6:7.

10. Ano patikol maˈorip ko salawina, wa samaan ko harateng iso hani?

¹⁰ Haratengen hena ano militemoh kita to patikolay maˈorip a salawina. Itiya wa maacang a mahemek kiso anca tahatangic a mahemek hokira? Cowa ko papakaˈmet kiso a sakaromadiwaw a pakahemek ci Yihofaan han? Wa ngaˈay a pakasoˈlinen, o kalimlaan a sapatelong no sidaˈitay Wama ato Wawa Ningra ngaˈay patikol maˈorip, o mamikifalocoˈ a miakoˈid kita Cangraanan, tangongol ko kaolah Cangraanan.

11. Pakayni Yohani 5:28, 29, mitooray to moecelay palinian no Kawas a tamdaw wa milifok to maanan?

¹¹ Haratengen, mahepolayto no patikolay maˈorip a tamdaw ko matelangay capeling, misaˈicel a mitoor to moecelay palinian no Kawas, wa hakowa ko kalipahak nangra! Mihaen ko kafalic nangra, wa ngaˈayto tahadaˈoc maˈorip i Lakoing. Kawra ano cakakahi a mafalic ko patikolay maˈorip a tamdaw, cowato ko mamihai ci Yihofa padadotoc a maˈorip cangra, mipalak to rihaday no Lakoing.—Isaya 65:20; ˈosien ko Yohani 5:28, 29.

12. Itini pikowan no Hongti Kitakit, wa malifok ita ko maanan a sapalemed?

¹² Itini pikowan no Hongti Kitakit no Kawas, o tatahatanam ko finawlan no Kawas to sowal i Taneng 10:22: ‘O sapafeli no Kawas a lemed pahafayay to tamdaw, cowa paira to roray.’ Itini sapadama no fangcalay saocor, wa palidlid saan kita a malefot, malecad ci Kristoan. (Yohani 13:15-17; Ifiso 4:23, 24) To romiˈamiˈad matongal ko tanektek no tireng, mamalefot ko capeling. Itiya maedeng o tataˈangay ko lalipahak ita! (Yopu 33:25) Mihaenay, midotim kita to patikol maˈorip a limasmas anini, wa ira ko maanan a sapadama kitanan hani?

13. Pakayni ˈOlic 139:1-4, hakowaay ko kacipinang ni Yihofa kitaanan hani? O patikol maˈorip a limasmas hano ngaˈay misawacay tonini hani?

¹³ Masowalay i ˈayaway a fatac, ano patikolen ni Yihofa paˈorip ko cecay tamdaw i, wa palecaden ko maharatengay ato pinangan ningra to saˈayaway. Tatodong nonini tada maolahay ci Yihofa tisowanan, o maharatengay ato matanamay iso, o misowalan ato midemakan iso, o hahacecayen Ningra a mitilid. Ano papatikolen Ningra paˈorip kiso, o papahecaden to salakatay kiso, pakaynien Cingranan ko sowal o madoloay a demak. Mafanaˈay ci Tafiti, ihkalay ko kafanaˈ ni Yihofa to kahacecay tamdaw. (ˈOsien ko ˈOlic 139:1-4.) Mafanaˈ tonini, pakayni kitaanan wa ira ko maanan sapadama hani?

14. Mafanaˈ to ciharatengay ci Yihofa kitaanan, samaan ko harateng ita hani?

¹⁴ Maharateng to cipinangay ci Yihofa kitaanan, wa mahapinang ita tada ciharatengay Cingra kitaanan, itini pinengneng Ningra, o cecacecay tamdaw mikiriwiˈay, o kalimlaan. Adihayay malifaay i nokaˈorip mifiyoray kitaanan, mihacecayan Ningra a mitilid. Tada parihadayay koni kitaanan! Cowa ko matoˈolay kita, miceriday ci Yihofa i tatihi ita, mikilim to toki a padama kitaanan.—2 Rayray 16:9.

15. O patikol maˈorip a limasmas hano paihkalay to taneng ni Yihofa?

¹⁵ O saroero no patay o ciˈicelay a lalosidan ni Satan. O maontingay ni Satan a tamdaw marariday tanoniya lalosidan a pacieci to tamdaw misawad to pihakelongan, misafelit to widang. Kawra awaay ko kapo noniya  lalosidan kitaanan, samanen mafanaˈay kita, soˈlin patayen no ˈada kita, o papatikolen ni Yihofa paˈorip kita. (Paˈarawan 2:10) Pakasoˈlinay kita, ano samaanto ko demak no ˈada, cowa ko papakaconged to Kawas maolah kitaanan. (Loma 8:35-39) Pafeli ci Yihofa kitanan to patikol maˈorip a hatokel, tada citanengay koniya demak! Pasokiyaway koniya lalosidan ni Satan, pairaay to timolo ita, malecad o micaˈedongay to tanektekay sapilood a rikoˈ!

16. Wa miharateng kita to manan tosa salicay? Hano papadama koni kitanan, mihapinang to hakowaay ko pitadiˈec noniyah ci Yihofaan?

¹⁶ Ano patalaw ko ˈada mamipatay tisowanan, wa pakasoˈlin kiso to papatikolen ni Yihofa kiso a paˈorip han? Samaan a mafanaˈ kita toya tatokian o mamitadiˈec ko niyah ci Yihofaan hani? Cecay pakayraan i licayen ko niyah: “O misaˈosian ako to romiˈamiˈad paihkalay to mitadiˈecay kako ci Yihofaan han?” (Luka 16:10) Ngaˈayho licayen ko niyah: “O pakayraan ako a maˈorip, paihkalay to paisalakatay kako micangacang to Hongti Kitakit, pakasoˈlinay to mamidimokos ko Kawas to sakaˈorip ako a dafong han?” (Matay 6:31-33) Ano masaˈosiay ko caˈof, o soˈlinayto kiso a mitadiˈec ci Yihofaan, hanaca maharekayto a misaday misiˈayaw to masakenaay a sapalifet.—Taneng 3:5, 6.

17. (1) O patikolay maˈorip a limaslimas hano paihkalay to mihadidiay ni Yihofa hani? (2) Sasamaan ko hademak ita a miakoˈid ci Yihofaan hani?

¹⁷ Maharekayto ci Yihofa misaˈosi to hacowa tatokian a palaˈafo toniya ciraraway a hekal, itini ˈayaw noya romiˈad, cowa ko mamacaloh Cingra a midemak. (Matay 24:36) Soˈlin makalimay ci Yihofa patikol paˈorip to mapatayay tamdaw, kawra kamayan a mihadidi Cingra. (Yopu 14:14, 15) Wa mitala Cingra to matatodongay a tatokian patikol paˈorip cangranan. (Yohani 5:28) Hatiniay ko pihadidi ni Yihofa, tada miakoˈiday kita Cingranan! Haratengen, ano cowa pihadidi ci Yihofa, wa awato ko toki ita ato ˈalomanay tamdaw pasasiyor. (2 Pitiro 3:9) Tokel ni Yihofa nanay ˈaloman ko tamdaw milifok to tahadaˈocay ˈorip. Sasamaan ko demak ita a miakoˈid ci Yihofaan hani? Fanekfek kita mitosil, misaˈicel mikilim to ‘matatodongay ko waywayan ngaˈayay milifok to tahadaˈocay ˈorip a tamdaw,’ padama cangranan maolah ato midoko ci Yihofaan. (Dmak 13:48) Mihaen o mamalecadto cangra kitaanan, pakayni pihadidi ni Yihofa a malidong.

18. Hano papairaen ita ko mihadidiay falocoˈ to tao hani?

 ¹⁸ Padotocay ci Yihofa mihadidi kitaanan, makahi a misodod to raraw ita, samanen mafanaˈay Cingra tahirato i kahererekan no Pikowan ni Kristo to Comaˈol Miheca ngaˈ malefot kita. Mihaenay, tatodongen ita ci Yihofa, o ngaˈayay no tao ko nengnengen, mihadidi cangranan. Nengnengen ita ko nalifetan no cecay fafahiyan salikaka. Fahafahal sanay a pakidem marawraw ko faˈinay ningra, ikorto misawaday mirienang to saˈopo. Sanay cingra: “Tada marorayay kako! Fahal sanay mafalic ko kaˈorip niyam, i ˈayaw ciharatengay malacafay matayal, cowato kangaˈay midemak.” Soˈlin mahaen, kamayan a maolah cingra to faˈinay, mihadidiay cingranan, padadotoc a mitadiˈec ci Yihofaan, caay pisawad. Malecaday cingra ci Yihofaan, cowa ko pasangaray ko misamacayan, o ngaˈayay no faˈinay ko minengnengan, sanay cingra: “Adihayay ko makapahay capeling no faˈinay ako, hanaca misaˈicelay cingra miremo to cariraw, palidlid sanay a ngaˈay.” O paro no lomaˈ ita ato salikaka ano misiˈayaway to pakidemay a pasangaray, pairaen ita ko mihadidiay, mihaen to demka tada kalimlaan!

19. Wa misetek kita to falocoˈ misamaan to demak?

¹⁹ Misangaˈ ko Kawas to cikiw i, tada mahemekay ci Yis ato coyoh! Haratengen hena, noikor matomes ko malefotay tamdaw i fafekang no sera, midoko ato maolah ci Yihofaan, wa hakowa ko kalipahak nangra hani! (Paˈarawan 4:4, 9-11; 5:9, 10) Oya malacafayay ci Yisan mikowan i kakarayan a tamdaw, maˈaraw ko kalipahak no mikowanan nangra a tamdaw i fafekang no sera i, wa hakowa ko karenec nangra hani! Ano kotayen no lipahakay a losaˈ ko marorayay a losaˈ, ano awato materek ko adada, somad ato patay, wa hakowa ko kaacang ita hani! (Paˈarawan 21:4) ˈAyaw no malaˈosi koniya demak i, seteken ko falocoˈ mitodong to sidaˈitay, iraay ko taneng, mihadidiay a kakarayan Wama. Mihaenay, ano o mananto ko malifaay ita a sapalifet, wa ngaˈay padadotoc a lipahak. (Yakop 1:2-4) Mikiˈokay ko Kawas, ‘moecelay tamdaw ato cowa ka moecel a tamdaw wa patikol a maˈorip,’ tada aakoˈiden ita Cingra!—Dmak 24:15.