1. Jewba, ¿chemu dewmafi tati mongen?

FÜTRA kuyfi mu, Jewba kidulefuy, welu weñangkükelafuy. Duamnielafuy chem no rume ka iney no rume tañi ayüwküleal. Femfule rume, ayüniefuy kakelu ñi mongeleal ka ñi ayüwküleal. Feymu fente tañi piwkeyechen mu, eluwi ñi dewmayal kom tati mülelu (Hecho 17:⁠24, 25; 1 Juan 4:⁠19).

2. Dewmangelu itrokom tati mülelu, ¿chum duamkülefuy Jesus ka tati pu kümeke püllü?

² Wünelu mu, Jewba dewmafi tañi Fotüm, Jesus pingelu. Fey “Ngünechen dewmay itrokom tati mülelu”, kenü tati pu kümeke püllü (Juan 1:⁠3). Jesus müna ayüwülfeyew küdawal tañi Chaw engu (Prov. 8:⁠30). Pu kümeke püllü pefilu kom ñi dewmael Jewba Jesus engu, tati Mapu ka tati wenu, rume ayüwkülefuyngün. Biblia feypi pu kümeke püllü ñi püramyefiel ta Chaw Jewba dewmafilu ti Mapu. Ka femngechi fempelayngün dewmafilu itrokom tati mülelu, doyelchi may dewmangelu tati pu che (Job 38:⁠7; Prov. 8:⁠31). Kom tañi dewmael ta Jewba pengelkey tañi piwkeyecheken ka tañi rume kimün-ngen (Sal. 104:⁠24; Rom. 1:⁠20).

3. Ñi feypin 1 Korintio 15:⁠21, 22, ¿chumlerpuafuy pu che Jesus ñi lan mu?

³ Jewba ayüniefuy kom pu che ñi müleal kiñe adkülechi mapu tañi dewmael. Welu Adan Eva engu culpalu, famentuwingu Jewba mu. Feymu rumel mongelewelafuyngu ka femngechi  tañi pu küpanche (Rom. 5:⁠12). ¿Chumi ta Jewba? Pürüm feypi ñi chumafel tañi montulafiel tati pu che (Gén. 3:⁠15). Feymu eluwi ñi wülal tañi Fotüm ñi montulafiel tati pu che ti culpan ka lan dungu mu. Femngechi kake kiñeke che dulliafuy ñi serfiafiel ta Jewba, fey ñi rumel mongeleal (Juan 3:⁠16; Rom. 6:⁠23; papeltunge 1 Korintio 15:⁠21, 22).

4. ¿Chem inaduamaiñ tüfachi chillkatun mu?

⁴ Kimün mu iñchiñ Jewba ñi wiñomongeltuafiel pu layelu, ramtuwafuiñ chi: ¿Chumngechi wiñomongetuay pu layelu? ¿Kimpetuafiyiñ may tati pu wiñomongetualu? ¿Chemu fente ayüwün-ngeay taiñ petuafiel taiñ layechi pu che? Ñi wiñomongetual pu layelu, ¿chumngechi kimeltukeeiñmu Jewba tañi piwkeyecheken, tañi kimün-ngen ka tañi nien ta paciencia? Inaduamafiyiñ.

5. ¿Chemu feypiafuiñ ti pu layelu ñi trür mongeltufemngenoal engün?

⁵ Jewba elfalkünufi ta Jesus ñi wiñomongeltuafiel pütrünke che, welu kom mongeltufemlayafi engün. ¿Chemu feypiafuiñ tüfa? Kom che mongeltufemngele, re desorden mülepelayafuy. Welu Jewba ayükelay feychi dungu. Jewba kimniey ñi duamfalngen küme adnieafiel itrokom dungu, fey ñi tüngküleal ta che (1 Kor. 14:⁠33). Jewba ka Jesus pürüm kom dewmafemlafi ti Mapu, doy may ñochikechi dewmanierpufi. Femngechi Jewba pengeli fente tañi kimün-ngen ka ñi nieel ta paciencia. Ka femngechi Jesus küme adkünuafi ti Mapu ka kom ñi duamnieafel pu wiñomongetualu, femngechi pengelay tañi kimün-ngen ka ñi nieel ta paciencia.

6. Ñi feypin Hecho 24:⁠15, ¿chem che wiñomongetuay?

 ⁶ Biblia feypi: “Ka tüfachi pu wentru reke, iñche ka maneluwkülen Chaw Ngünechen mew, ñi wiñomongetual pu norngechi che ka pu norngenochi che” (Hecho 24:⁠15, TNM). Tati küme mülewe mu, wiñomongetuay fentren norngenochi che. Feymu pu mongetripayalu Armagedon mu kimeltulelafingün Jewba tañi Gobierno mu ka tañi ley dungu mu. Feytachi pu che wiñomongetulu, müleay tañi küme elkünutual tañi mongen, femngechi ñi kümelkayaetew Jesus tañi lan, fey ñi nieal ta rumel mongen. Pütrün küdaw müleay tañi enseñalngeal feytachi pu che Jewba tañi kümeke dungu. ¿Chumngechi femngeay feytachi küdaw? ¿Wichuke enseñalngepeay may Biblia kake kiñeke tati pu che? Tati pu wiñomongetulu, ¿elungepeay may ñi enseñayafiel tati pu inangechi wiñomongetulu? ¿Pepikangepeayngün may trawünche mu ñi femal feytachi küdaw? Petu kimlaiñ. Welu kimnieiñ afle ti warangka tripantu ñi ngünenieal ta Jesus, “tati Mapu apoleay Jewba ñi kimün mew” (Is. 11:⁠9). ¡Müna falinke küdaw nieaiñ akule feychi warangka tripantu!

7. Chaw Dios tañi pu che, ¿chumngelu kutranpiwkeyeafi tati pu wiñomongetulu?

⁷ Akule feychi warangka tripantu, kom pu poyekefilu ta Jewba küdawküleay ñi doy küme femal Chaw Dios tañi ayükeel, feymu kutranpiwkeyeafiyiñ tati pu wiñomongetulu. Kidu engün tañi pu culpafe chengen mu ka küdawtuayngün ñi femal Jewba tañi ayükeel (1 Ped. 3:⁠8). Feytachi pu che wiñomongetulu peafi ñi ñom piwkengen Chaw Dios tañi pu che ka tañi eluwken ñi ayüwülafiel ta Jewba, fey ka ayürpuafuyngün tañi poyeafiel (Filip. 2:⁠12, TNM).

8. ¿Chemu kimfemtuafuiñ taiñ pu che wiñomongetualu?

⁸ Fillke dungu mu feypiafuiñ tati pu wiñomongetulu kimtuaeyew tañi pu che. Inaduamliyiñ tati wiñomongetulu nütramkalu ta Biblia, rakiduamafuiñ tati pu che wiñomongetuay chumngechi ad ñi niekefel, tañi chumngechi dungukefel ka chem rakiduam ñi niekefel petu tañi lanon. ¿Chemu feypiafuiñ? Jesus feypi tati layechi che umawkülelu reke felekeyngün. Feymu wiñomongetule ta che, nepelngeayngün reke (Mat. 9:⁠18, 24; Juan 11:⁠11-13). Umawkülechi che nepen mu, ka femngechi rakiduam niekey müten, kaletukelay tañi ad ka tañi dungun no rume. Rakiduamaiñ ñi rupan ta Lasaru. Meli antü lalefuy ka nümüwefuy tañi cuerpo. Welu wiñomongetulu Lasaru, tañi epu lamngen kimfemtueyew. Kidu ka femngechi kimfemtufi engu (Juan 11:⁠38-44; 12:⁠1, 2).

9. Wiñomongetule ta che petu culpanche ngeayngün, ¿chemu feypiafuiñ?

⁹ Kafey Jewba feypikünuy ti we Mapu mu, “iney no rume feypilayay: ‘Iñche kutrankülen’” (Is. 33:⁠24; Rom. 6:⁠7, TNM). Feymu wiñomongetule ta che, Jewba eluafi kiñe tremol cuerpo, welu petu culpanche ngeayngün. Culpanche ngewenofule ta che tañi wiñomongetun mu, ka ad niepelayafuy, feymu kimwetulayafuiñ. Ngünenietule Kristo warangka tripantu, ñochikechi ngewelayay ta culpan. Rupale feytachi warangka tripantu, Jesus wiñoleltuafi tañi Chaw ñi ngünenietual kom tati mülelu. Femngechi Jesus tañi Gobierno femürpuay kom ñi ayükeel ta Jewba, ngewelayay ta culpan (1 Kor. 15:⁠24-28; Apok. 20:⁠1-3).

10. Wiñomongetule tati pu che, ¿chumaiñ?

¹⁰ Amupe tami rakiduam we Mapu mu. Wiñomongetule tami pu che, ¿chumafuymi chi? Müna ayüwkülepelayafuymi. Ngümatripayafuymi chi fente tami ayüwün. Ka ülkantulelafuymi chi ta Jewba tami mañumtuafiel. Puwle feychi antü, doy piwkeyeafiyiñ taiñ Wenu Chaw ka tañi Fotüm Jesus ñi wiñomongeltuchen mu.

11. Ñi feypin ta Juan 5:⁠28, 29, ¿chumlerpuay pu eluwlu ñi ayüwülafiel ta Chaw Ngünechen?

¹¹ Ka femngechi rume ayüway tati pu wiñomongetulu elungele ñi küme elkünutuafiel ñi mongen, fey ñi ayüwülafiel ta Chaw Ngünechen. Feytachi pu che elungeay ta rumel mongen, welu tati che pinole ñi serfiafiel ta Chaw Dios apümkangeay (Is. 65:⁠20; papeltunge Juan 5:⁠28, 29).

12. Chaw Jewba, ¿chumngechi kümelkayafi kom pu mülealu Mapu mu?

¹² Biblia feypi: “Jewba tañi kümelkan feyta riculchekey ka kutrankachekelay ñi elufiel mu” (Prov. 10:⁠22). Jewba tañi Gobierno mu, felerpuay ñi feypin feychi versiculo. Jewba tañi newen mu, kom pu poyekefilu ta Jewba doy küme inayenturpuafi ta Jesus ka ñochikechi culpan niewetulayay, femngechi Jewba riculaeyew reke (Juan 13:⁠15-17; Efes. 4:⁠23, 24). Kake antü doy tremoletuay ka doy küme chengetuay. ¡Ayüwkületuay! (Job 33:⁠25). Welu, ¿chumngechi kümelkayafeiñmu taiñ rakiduamal ti wiñomongetun mu? Fewla peafiyiñ.

13. Ñi feypin Salmo 139:⁠1-4, ¿chumngechi pengelkey ti wiñomongetun fente taiñ kimnieetew Jewba?

¹³ Chumngechi taiñ ngüneduampeel, wiñomongetule ta che, Jewba elutuaeyew chem tañi rakiduam niekefel ka tañi chumngechi che ngekefel petu tañi lanon. ¿Chem kimeltukeeiñmu tüfa? Jewba ngüneduamkey ka longkontukukey kom taiñ rakiduamkeel, kom taiñ feypikeel ka kom taiñ femkeel. Feymu lafuliyiñ, Jewba wiñomongeltuafeiñmu. Fey küdawtulayafuy taiñ elutuaetew taiñ chumngechi che ngekefel. David kimniefuy fente taiñ kimnieetew Jewba kake kiñeke iñchiñ. Feymu feypi: “¡Awem Jewba! Eymi ngüneduamnieen, ka küme kimnieen. Eymi kimüñmaen tañi anüken ka tañi witraken. Fütra kamapu mu eymi inaduamkeymi tañi rakiduamkeel iñche. Chew rume miyawli iñche ka kuduli iñche, eymi nagkintupakeen. Küme kimnieymi kom tañi femkeel iñche. Petu ñi mülenon rume kiñe dungun tañi kewün mew, ¡tüfey! Eymi lle Chaw Jewba dew küme kimniefimi” (Salmo 139:⁠1-4). Inaduamün mu tami küme kimnieetew Jewba, ¿chumkey tami piwke?

14. Kimfiel mu iñchiñ fente taiñ kimnieetew Jewba, ¿chem rakiduamkeiñ?

¹⁴ Feley llemay, Jewba rume küme kimnieeiñmu kake kiñeke iñchiñ. Welu rakinieñmakelaeiñmu kom taiñ weda femkeel. Welu may, Jewba müna piwkeyenieeiñmu kake kiñeke iñchiñ ka falintukeeiñmu chumngefuliyiñ rume. Jewba kimniey kom taiñ rupan taiñ mongen, feymu kimniey taiñ femngen. Taiñ kimfiel tüfa, rume küme duamelkeeiñmu. Chumkawnorume kidulelu trokiwlayaiñ. Jewba fill antü afkadinieeiñmu ka kintuyawülkey reke chumngechi taiñ kelluaetew (2 Crón. 16:⁠9).

15. Ti wiñomongetun, ¿chumngechi pengeli fente ñi kimün-ngen ta Jewba?

¹⁵ Pu che ñi ngünenieetew ta Weküfü  aneltukefi ta che tañi langümafiel. Fey tati pu che tañi llükan mu, famentukefi tañi rakiduamkeel ka tañi pu weni, femngechi tañi lanoal. Welu Jewba fente tañi kimün-ngen, elukeeiñmu maneluwün taiñ llükalkanoaetew Weküfü. Kimnieiñ langümngefuliyiñ rume, Jewba wiñomongeltuafeiñmu. Feymu tunte aneltungeliyiñ rume, llükakelafiyiñ tati lan (Apok. 2:⁠10). Chumllefule rume taiñ pu kayñe, turpu püntünentulayafeiñmu Jewba mu (Rom. 8:⁠35-39). Taiñ kimfiel ñi wiñomongeltucheal Jewba, newen piwkekeeiñmu, llükakelaiñ taiñ layal. Feymu feypiafuiñ tati wiñomongetun pengeli fente ñi kimün-ngen ta Jewba.

16. 1) ¿Chem ramtuwafuiñ? 2) Ramtuwliyiñ feytachi dungu, ¿chem kimaiñ?

¹⁶ “Langümaeyu” pieliyiñmu taiñ pu kayñe, ¿maneluwpeafuiñ may Jewba taiñ wiñomongeltuaetew? Taiñ kimal tunte taiñ maneluwken Jewba mu, ramtuwafuiñ: “Tati pichiken dungu ñi femkeel fill antü, ¿pengelkepey may tañi maneluwken Jewba mu?” (Luka 16:⁠10). “Chaw Dios feypikünuy ñi eluaetew kom tañi duamnieel doyümfili tañi Gobierno, ¿rüf maneluwkepen may feytachi dungu mu? Kom ñi chumken tañi mongen mu, ¿pengelkepen may ñi maneluwün Jewba tañi feypikünuel mu?” (Mat. 6:⁠31-33). Ramtuwliyiñ feytachi dungu, kimaiñ tunte taiñ maneluwken Jewba mu. Rüf maneluwliyiñ Jewba mu, chaftuafuiñ chem weda dungu rume rupafuliyiñ (Prov. 3:⁠5, 6).

17. 1) Ñi petu akunon ti wiñomongetun, ¿chumngechi pengeli Jewba ñi nieel ta paciencia? 2) ¿Chumngechi mañumtuafuiñ Jewba ñi nien ta paciencia?

¹⁷ Chaw Jewba rakiniewyey chem antü apümafi kom ñi ngünenieel tati Weküfü (Mat. 24:⁠36). Jewba rume ayüniey ñi wiñomongeltuafiel pu layelu. Welu petu akunole ñi dullielchi antü, ayüwünkechi esperanieay (Job 14:⁠14, 15; Juan 5:⁠28). Chaw Jewba müna niey paciencia, elueiñmu iñchiñ ka fentren che ñi konal tañi trokiñche mu. Feymu rume mañumkefiyiñ. Chaw Jewba ayükey kom che ñi nieal ta rumel mongen (2 Ped. 3:⁠9). Feymu kintuafiyiñ “kom pu eluwlu ñi rumel mongeleal” ka kelluafiyiñ ñi piwkeyerpuafiel ta Jewba. Femliyiñ, mañumtuafiyiñ Jewba tañi nien ta paciencia (Hecho 13:⁠48, TNM). Feytachi pu che ka montuluwafuyngün Jewba tañi paciencia mu.

18. ¿Chemu müley taiñ inayentuafiel Jewba tañi nien ta paciencia?

 ¹⁸ Rupale tati warangka tripantu, ngewelayay ta culpan. Welu petu akunole feychi antü, Jewba ayüwünkechi esperaniey ka perdonakeeiñmu taiñ culpan, femngechi pengelay ñi nien ta paciencia. Inayentuafiyiñ ta Jewba. Ngüneduamaiñ ñi küme femken taiñ pu peñi ka pu lamngen ka perdonayafiyiñ engün, femngechi pengelaiñ taiñ nien ta paciencia. Peafiyiñ ñi rupan kiñe lamngen. Tañi füta konturumeeyew ansiedad pingechi kutran, feymu kümelewelay tañi rakiduam, amuwelay trawün mu. Taiñ lamngen feypi: “Tüfachi dungu tañi ruparupangen rume weda duamelenew, kalerumetuy tañi mongen. Fillke dungu küpa femkefuyu tañi füta iñchiw, welu tañi kutran mu femwetulayu” pi. Rupafulu rume wedake dungu mu, feytachi lamngen piwkeyenkechi cuidafi tañi füta. Maneluwi Jewba mu, feymu kellunierpufi tañi füta. Taiñ lamngen inayentufi ta Jewba, feymu ngüneduamfi ñi küme femken tañi füta kutrankülelu rume. Taiñ lamngen feypi: “Tañi füta rume küme piwkengey ka chumkey rume tañi doy küme felerpual” pi. Ka femngechi taiñ pu che, ka taiñ pu peñi ka pu lamngen rupale wedake dungu mu, müley taiñ piwkeyenkechi kelluafiel engün, femngechi pengelaiñ taiñ nien ta paciencia.

19. Petu akunole ti we Mapu, ¿chem eluwküleafuiñ taiñ femal?

¹⁹ Jesus ka tati pu kümeke püllü ayüwingün dewmangelu ti Mapu. Ka femngechi rume ayüwayngün küpalechi antü mu. Mapu mu ngewelayay ta culpan, apoleay re kümeke che mu, ayüwünkechi serfiafingün ta Jewba. Tati pu ngünenietualu wenu, rume ayüwkülepelayayngün pefile ñi küme feletun kom tati che mülelu Mapu mu (Apok. 4:⁠4, 9-11; 5:⁠9, 10). Rakiduamaiñ ñi kom küme feletual tati pu che. Ngewelayay ta kutran, ngüman ka lan no rume. Re ayüwün müten mületuay (Apok. 21:⁠4). Petu akunole feychi antü, inayentunieafiyiñ Jewba ñi piwkeyecheken, ñi kimün-ngen ka tañi nien ta paciencia. Femliyiñ, ayüwküleaiñ chem weda dungu rume rupafuliyiñ (Sant. 1:⁠2-4). Rume mañumküleiñ Jewba taiñ feypikünuetew ñi wiñomongetual ta che (Hecho 24:⁠15).