1. Kii i bi tinde Yéhôva i hek?

YÉHÔVA a bé ndugi nyetama. Ndi a bé bé a môdi. A bé a yôni manjel momasôna. Ndi a bééna ngôñ le bôt bape ba nok maséé i niñ. Gwéha yon i bi tinde Yéhôva i hek.​—Tjémbi 36:10; 1 Yôhanes 4:19.

2. Kii Yésu ni biañgel ba bi nôgda ngéda Yéhôva a hek bini gwom bipe?

² Yéhôva a bi bôk a hek Man wé Yésu, ba bôdôl sal ntôñ inyu hek “mana mam mape momasôna,” yak biañgel mukété. (Kôlôsé 1:16) Yésu a bé maséé ngandak i sal ni Isañ. (Bingéngén 8:30) Yak biañgel bi bé maséé. Bi bé ha i ngéda Yéhôva a bé sal ni Yésu inyu hek ngii ni hisi. Kii bi bi boñ? Bi bi bégés Yéhôva ngéda bi bi tehe hisi hi nhéga, bi ke ki ni bisu i bégés nye ngéda a bi hek bini gwom bipe, téntén bôt ba binam. (Hiôb 38:7; Bingéngén 8:31) Gwéha i Yéhôva ni pék yé bi bé nene mu bihégél bi gwobisôna.​—Tjémbi 104:24; Rôma 1:20.

3. Inoñnaga ni kaat 1 Korintô 15:21, 22, sesema i Yésu i nlona kii bés?

³ Sômbôl i Yéhôva i bé le bôt ba binam ba niñ i boga ni boga i paradis hana ’isi. Ndi i ngéda Adam bo Éva ba bi ndogbene Yéhôva, ba bé ha bé le ba niñ i boga ni boga, bo ni mbôda yap ba bé lama wo i mbus ngéda. (Rôma 5:12) Kii Yéhôva a bi boñ?  Mu manut ma, a bi unda lelaa a bé lama tohol bôt ba binam. (Bibôdle 3:15) Yéhôva a bi bôn le a ga ti Man wé kiki sesema inyu bôt ba binam, ni i njel i nyen mbôda i Adam bo Éva i ga pam i mok mi béba ni nyemb. Bôt bobasôna ba gwé ki pôla i gwélél nye ni i bana niñ boga.​—Yôhanes 3:16; Rôma 6:23; añ 1 Korintô 15:21, 22.

4. Mambe mambadga di ga timbhe munu yigil ini?

⁴ Kiki Djob a mbôn le a ga tugul bawoga, hala a ntinde bés i badba ngim mambadga kiki bo: Lelaa bitugne bi ga ba? Baa di ga yi bôt bés ba ba bi wo i ngéda ba ga tuge? Inyuki bitugne bi ga kônha bés maséé? Kii bitugne bi niiga bés inyu gwéha, pék ni wongut i Yéhôva? Di timbhe mambadga mana.

5. Inyuki di kôli hoñol le bôt bobasôna ba ga tuge bé i nlélém ngéda?

⁵ Yéhôva a ga gwélél Man wé inyu tugul didun di bôt, ndi di nhoñol le bobasôna ba ta bé le ba tuge nlélém ngéda. Inyuki? Inyule ibale ba ntuge ngélé yada, hala a yé le a lona yubda. Ndi Yéhôva a mboñ bé jam jo ki jo ikété yubda. A nyi le inyu boñ le nsañ u ba, mam ma nlama bôña ikété oda. (1 Korintô 14:33) Yéhôva Nyambe a bi unda pék ni wongut i ngéda a bi sal ni Yésu inyu hek hisi inyu boñ le bôt ba binam ba niñ mu. Yak Yésu a ga unda pék ni wongut i Ane i hikôô hi nwii ngéda a ga kôôba hisi ni i bet ba ga pei i Armagédôn inyu leege i bet ba ga tuge.

6. Inoñnaga ni Minson mi baôma 24:15, bonjee ba ga ba mu nsoñgi u bôt Yéhôva a ga tugul?

 ⁶ Jam li nloo momasôna li yé le, i bôt ba ga pei i Armagédôn ba ga niiga i bet ba ga tuge kii i yé Ane i Djob ni sômbôl i Yéhôva. Inyuki? Inyule libim li bôt li li ga lo i bitugne li mba “bôt ba téé bé sép.” (Añ Minson mi baôma 24:15.) Y’a béda le ba héñha ngandak mam mu niñ yap inyu boñ le ba kôs bisai ni njel sesema i Kristô. Di hégda bôlô ikeñi i nlama séla inyu niiga didun di bôt di di nyi bé Yéhôva, maliga. Baa ba ga niiga hiki mut Bibel kiki di ntégbaha gwigil bi Bibel i len ini? Baa i bôt ba ga lo bitugne b’a kôs biniigana i makoda inyu boñ le ba niiga i bet ba ga tuge i mbus ngéda? Di ga yi ha ngéda i. I yom di nyi, i yé le i mamélél ma Ane i hikôô hi nwii i Kristô, “hisi hiosôna hi’a yon ni yi i Yéhôva.” (Yésaya 11:9) Kinje maséé di ga nok mu kii di mba di nsal i Ane i hikôô hi nwii!

7. Inyuki bagwélél ba Yéhôva ba ga tôñ i bet b’a lo i bitugne i ngéda ba mba ba niiga bo?

⁷ I Ane i hikôô hi nwii i Kristô, bagwélél ba Yéhôva bobasôna ba ga ke ni bisu i boñ mahéñha i niñ yap inyu lémél Yéhôva. Jon mu kii ba mba ba nhôla i bet ba ga lo i bitugne i jôs bibomb gwap inyu lémél Yéhôva, ba ga tôñ bo. (1 Pétrô 3:8) Ibabé pééna, i bet ba ga lo i bitugne, ba ga jôp i ntôñ u Yéhôva inyule ba ga tehe suhulnyuu i bagwélél bé, ba ba ‘nsal inyu tohi yap bomede.’​—Filipi 2:12.   

8. Inyuki di kôli hoñol le i bet ba ga leege bôt ba nlo i bitugne ba ga yi bôt bap?

⁸ Ngandak mam i ntinde bés i hoñol le, i bôt ba ga leege i bet b’a lo bitugne ba ga la yimbe bôt bap. Kiki hihéga, i ngéda di mbigda bitugne bi bi bi bôña behee, i nene le Yéhôva a bé a tiimba ti i bôt ba nlélém libak, hala wee ba bé pot, ba béñgege bôt, ba hoñlak kiki ba bé boñ ilole ba nwo. Di hôya bañ le Yésu a bi hégha nyemb ni hilo, a hégha bitugne ni i ngéda ba ntôdôl mut. (Matéô 9:18, 24; Yôhanes 11:11-13) I ngéda mut a bak ’ilo ndi a tôde, su wé u nhéñha bé to kiñ yé, i mam a nyi ma nyoi bé. Di yoñ hihéga hi Lasarô. A bi nom i soñ dilo dina, a bôdôl yak bol. Ndi i ngéda Yésu a bi tugul nye, lôk kéé yé i bôda i bi yi nye ibabé ndutu yo ki yo, yak Lasarô a yi bo.​—Yôhanes 11:38-44; 12:1, 2.

9. Inyuki i bôt ba ga tuge, ba ga ba bé peles?

⁹ Yéhôva a mbôn le, isi Ane Kristô, mut a kal bé le: “Me nkon.” (Yésaya 33:24; Rôma 6:7) I bet ba ga tuge b’a témbna manyuu ma yé mbôô. Ndi hala a nkobla bé le ba ga ba peles ngéda ba ga tuge. Ibale ba yé peles, i nla pam le bôt bap ba lihaa ba yi bé bo. I nene le bôt ba binam bobasôna ba ga yila peles ndék ni ndék mu Ane i hikoo hi nwii i Kristô. I lisuk li Ane i hikôô hi nwii nyen Yésu a ga timbhe Isañ Ane. Ha ngéda i, Ane i mba i ma yônôs nson wé wonsôna, yak i yilha bôt ba binam peles.​—1 Korintô 15:24-28; Masoola 20:1-3.

10. Kii w’a nôgda i ngéda bitugne bi ga bôdôl?

¹⁰ Hégda maséé w’a nôgda i ngeñ w’a leege bôt boñ ba ba bi wo. Baa maséé ma ga tinde we i nol tole i ee? Baa u ga tubul Yéhôva tjémbi? Ibabé nkaa, di ga kônde gwés Yéhôva ni Man wé, inyu likébla li mbuma ñañ le bitugne.

11. Inoñnaga ni i yom Yésu a nkal i kaat Yôhanes 5:28, 29, i bôt ba ga niñ inoñnaga ni matiñ ma Bibel ba ga kôs kii?

¹¹ Hégda maséé i bôt ba ga lo i bitugne ba ga nôgda ngéda ba ga héñha libak jap ndék ni ndék inyu niñ inoñnaga ni matiñ ma Djob. I bet b’a boñ biliya bi, ba ga tuge inyu niñ. Ndi Yéhôva a ga nwas bé le, i bet ba ga kolba nye, ba ôbôs Paradis.​—Yésaya 65:20; añ Yôhanes 5:28, 29.

12. Ni imbe njel Yéhôva a ga sayap bôt bobasôna hana ’isi?

¹² I ngéda Ane Djob i ga bôdôl énél ’isi, bibañga bi kaat Bingéngén 10:22 bi ga yônôl bagwélél ba Djob bobasôna. I nlôñ u u nkal le: “Masoda ma Nyambe mon ma ngwéñbaha, ndumbba nson i nkônde bé jam mu.” Ni mahôla ma mbuu u Yéhôva, bagwélél ba Nyambe ha ngéda i ba ga yila mingwañ i pes mbuu, hala wee ndék ni ndék ba ga yila peles, kayéle ba pam i kôna Kristô. (Yôhanes 13:15-17; Éfésô 4:23, 24) Kiki ngéda i mba i ntagbe, ba ga kônde bana mbôô, ba ga kônde ki bana bilem bilam. Kinje niñ ilam ba ga bana! (Hiôb 33:25) Umbe nseñ di nla kôs i len ini ibale di ñôt pék mu likébla li bitugne?

13. Inoñnaga ni kaat Tjémbi 139:1b-4, lelaa bitugne bi ñunda le Yéhôva a nyi bés?

¹³ Kiki di mbôk di tehe, i ngéda Yéhôva a ntugul bôt, b’a témbna mahoñol map ni maboñok map. Kii hala a niiga bés? Le Yéhôva a nlôôha gwés bés kayéle a mbigda hiki jam di nhoñol, hiki jam di nkal, ni hiki jam di mboñ. Ibale i mpam le a tugul bés, i ga ba jam li ntomb le a témb a ti bés mahoñol di bééna, libak jés, ni bilem di bééna ilole di nwo. Kiñe David a bé yi le Yéhôva a nyoñ ngéda i yi hiki wada wés loñge loñge. (Añ Tjémbi 139:1b-4.) Kii di nôgda i len ini i ngéda di ntehe le Yéhôva a nyoñ ngéda i yi bés?

14. Inyuki hala a ntihba bés i yi le Yéhôva a nyi bés loñge loñge?

¹⁴ I ngéda di mbigda le Yéhôva a nyi bés loñge loñge, di nlama bé tôñ jam jo ki jo. Inyuki? Inyule di nyi le Yéhôva a ntôñ bés ngandak. A ntehe hiki wada wés kiki hégél i tôbôtôbô. A nyimbe hiki jam li ntihba bés. Kinje jam li ntina makénd! Di hoñlak bañ kekikel le di yé bésbotama. Ñ, Yéhôva a yé bés ipañ hiki kel, hiki linut, a yé bebee i hôla bés.​—2 Miñañ 16:9.

15. Lelaa pék i Yéhôva i nene mu bitugne a bi bôn?

¹⁵ Woñi u nyemb u yé jôl i gwét ikeñi. Nkoñ ’isi u Satan u mbéna gwélél wo inyu nyégsa bôt i liibana mawanda map ni i boñ mam ma téé  bé. Ndi i jôl gwét i i nkônha bé bés woñi. Di nyi le ibale baoo bés ba nol bés, Yéhôva a ga tugul bés. (Masoola 2:10) Di yé nkwoog nkaa le to kii ba mboñ, ba nla bé bagal bés ni Yéhôva. (Rôma 8:35-39) Ni njel bitugne a bôn, Yéhôva a bi unda le a gwé pék i mbuma ñañ. Bitugne bi nhéya Satan jôl yé gwét ikeñi le nyemb, bi nti ki bés makénd i ke ni bisu i gwélél Yéhôva.

16. Mambe mambadga di nlama badba, lelaa ndimbhe yés i nla hôla bés i yi too di mbôdôl Yéhôva ñem?

¹⁶ Ibale baoo ba Yéhôva ba nhan le ba nol we, baa w’a bôdôl Yéhôva ñem? Mambadga mana ma nla hôla bés i yi too di mbot ñem le Yéhôva a ga tugul bés: ‘Baa makidik me nyoñ hiki kel inyu disii di mam ma ñunda le me mbôdôl Yéhôva ñem?’ (Lukas 16:10) Mbadga ipe i yé le: ‘Baa nkôm wem u niñ u ñunda le me yé nkwoog nkaa le ibale me nyéñ ndugi Ane, Yéhôva a ga ti me hiki yom i mbéda me?’ (Matéô 6:31-33) Ibale ndimbhe yoñ munu mambadga mana i yé ñ, wee u yé bebee i kolba manoodana ma mbem we.​—Bingéngén 3:5, 6.

17. (a) Lelaa wongut i Yéhôva i nene mu bitugne? (b) Lelaa di nla unda le di nti Yéhôva mayéga inyu wongut yé?

¹⁷ Yéhôva a bi mal téé kel ni ngeñ a ga tjé i bôô nkoñ ’isi ini. (Matéô 24:36) Wongut yé i ntinde nye i bem letee ni ngéda i. A nyamnda ni ngôñ i tugul bawoga, ndi a nhônba. (Hiôb 14:14, 15) A nke ni bisu i bem letee ni i ngéda a ga tugul bo. (Yôhanes 5:28) Di kôli ti Yéhôva mayéga inyu wongut yé. Hoñol ki le: Wongut i Yéhôva i mboñ le ngandak bôt “i hiel miñem,” yak bés. (2 Pétrô 3:9) Sômbôl i Yéhôva i yé le, ngandak bôt i niñ i boga ni boga. Jon di nlama ti nye mayéga inyu wongut yé. Lelaa? Di boñ kii yosôna di nla inyu yéñ bôt ‘ba gwé libak lilam inyu kôhna niñ boga.’ Di hôla ki bo i gwés Yéhôva ni i gwélél nye. (Minson mi baôma 13:48) Ha nyen yak bo ba ga ôt nseñ mu wongut i Yéhôva kiki bés.

18. Inyuki di nlama hônba bôt bape?

 ¹⁸ Yéhôva a ga hônba letee ni lisuk li Ane i hikôô hi nwii inyu tehe bés di nyila peles. Ilole i ngéda i i nkola, a yé bebee i nwéhél bibéba gwés. Jon kiki Yéhôva, yak bés di nlama béñge bilem bilam bi bôt bape, di hônba ki bo. Di yoñ ndémbél i mankéé wada nu nlôm a bi bana kon u mahoñol, a waa ke makoda. A nkal le: “I jam li li bi lôôha tééñga me. Mam momasôna di bi kit le di ga boñ ma bi kwo i lép.” Ndi to hala, i sita i i bi hônba nlôm. A bi bôdôl Yéhôva ñem, a bi somol bé. Ndik kiki Yéhôva, a bi hélél bé i béñge ndutu yé, a bi bok mis mu mam malam nlôm a bé boñ. A nkal le: “Nlô wem a gwé bilem bilam i nya i mbuma ñañ, a mboñ ki biliya inyu témbna ndék ni ndék.” Di nlama boñ biliya inyu hônba bôt bés ba lihaa tole lôk kéé yés i likoda i i njo sañ inyu yémbél mandutu map.

19. Makidik més ma yé le kii?

¹⁹ Ngéda Yéhôva a bi hek ’isi, Yésu ni biañgel ba bi kon maséé. Ndi hégda le maséé ba ga nok ngéda b’a tehe hisi nyonok ni bôt ba yé peles, ba gwéhék Yéhôva, ba gwéélak nye. Hégda ki maséé i bôt ba bi yôña hana ’isi inyu ke ane i ngii ni Kristô, ba ga nôgda i ngéda ba ga tehe bôt ba binam ba ñôt nseñ ni i bôlô ba ga sal. (Masoola 4:4, 9-11; 5:9, 10) Hégda i ngéda gwiiha bi ga yila maséé, ngéda makon, ngoo ni nyemb bi ga ba ha bé i boga ni boga. (Masoola 21:4) Ilole i ngéda i i nkola, di kee ni bisu i nigle Yéhôva Tata wés nu gwéha, nu pék ni nu wongut. Ibale di mboñ hala, di ga ba maséé to ikété mandutu. (Yakôbô 1:2-4) D’a waa bé ti Yéhôva mayéga inyu mbônga unu le “bitugne bi ga ba”!​—Minson mi baôma 24:15.