ICIPANDE CA KUSAMBILILAMO 33
Isubilo lya Kubuuka Lilanga Ifyo Yehova aba no Kutemwa, Amano, no Kutekanya
“Kukaba ukubuuka.”—IMIL. 24:15.
ULWIMBO 151 Aketa
IFYO TWALASAMBILILA *
1. Cinshi Yehova abumbile ifintu?
KWALI inshita imo iyo Yehova ali fye eka. Lelo taletalalilwa. Yehova takabila ukuba na umo pa kuti aleba ne nsansa. Na lyo line, Lesa alefwaya ukuti na bambi baleipakisha ubumi. Ukutemwa kwalengele Yehova atendeke ukubumba ifintu.—Amalu. 36:9; 1 Yoh. 4:19.
2. Bushe Yesu na bamalaika baleumfwa shani Yehova nga abumba ifintu?
2 Yehova abalilepo ukubumba Umwana wakwe Yesu. Lyena Yehova alibombele pamo no yu Umwana wakwe uwa kubalilapo pa kubumba “ifintu fyonse,” ukubikako fye na ma milioni ya bamalaika. (Kol. 1:16) Yesu alitemenwe nga nshi ukubomba na Wishi. (Amapi. 8:30) Kabili bamalaika nabo balitemenwe icine cine. E ko bali ilyo Yehova na Yesu Uwaishibisha Imilimo babumbile imyulu ne sonde. Cinshi bamalaika bacitile? ‘Baliweleshe’ ilyo isonde lyabumbilwe, kabili ukwabula no kutwishika balitwalilile ukulalumbanya Yehova lyonse ilyo abumba ifintu, ukubikako ne lyo abumbile icibumbwa icisuma nga nshi, umuntu. (Yobo 38:7; Amapi. 8:31) Ifi fyonse ifyo Yehova abumbile fyalangile ukuti aliba no kutemwa kabili wa mano nga nshi.—Amalu. 104:24; Rom. 1:20.
3. Nga fintu ilembo lya 1 Abena Korinti 15:21, 22 lilanda, finshi fyafumamo muli filya Yehova apeele Umwana wakwe nge cilubula?
3 Yehova alefwaya ukuti abantu baleikala umuyayaya pe sonde ilisuma nga nshi ilyo abumbile. Nomba ilyo Adamu na Efa bapondokele Wishi uwaba no kutemwa, pano isonde palishileba ulubembu ne mfwa. (Rom. 5:12) Cinshi Yehova acitile? Apo pene alilandile ifyo ali no kucita pa kuti abantunse bakalubuke. (Ukute. 3:15) Yehova ali no kupeela Umwana wakwe ukuba icilubula pa kuti abana ba kwa Adamu na Efa balubuke ku lubembu ne mfwa. Lyena ali no kupeela ubumi bwa muyayaya ku muntu onse uwasalapo ukumubombela.—Yoh. 3:16; Rom. 6:23; belengeni 1 Abena Korinti 15:21, 22.
4. Mepusho nshi twala-asuka muli cino cipande?
4 Kwaliba amepusho ayengi ayo twingepusha pa fyo Lesa atulaya ukuti akabuusha abafwa. Ku ca kumwenako, kuti twaipusha ukuti bushe ukubuuka kukaba shani? Bushe tukalaishiba balupwa lwesu ne fibusa ilyo bakalabuuka? Bushe ukubuuka ku bafwa kukatulenga shani ukuba ne nsansa? Kabili bushe ukutontonkanya sana pe subilo lya kubuuka kuti kwalenga shani twalatasha Yehova pa fyo aba no kutemwa, pa fyo aba na mano, na pa fyo atekanya? Natwasuke aya mepusho.
BUSHE UKUBUUKA KUKABA SHANI?
5. Cinshi cilenga tule-enekela ukuti ukubuuka kukalacitika panono panono kabili ukwabula icimfulumfulu?
5 Tatwenekela ukutila abantu bonse bakabuukila pa muku umo ilyo Yehova akabuusha abantu abengi nga nshi abafwa, ukubomfya Umwana wakwe. Cinshi twalandila ifi? Pantu nga ca kuti abantu abengi nga nshi babuukila pa muku umo, nalimo pano isonde kuti paba icimfulumfulu. Kabili twalishiba ukuti Yehova acita ifintu ukwabula icimfulunganya. Alishiba ukuti pa kuti kube umutende, ifintu fyonse fifwile ukucitwa ukwabula icimfulumfulu. (1 Kor. 14:33) Yehova alilangile ukuti wa mano kabili alitekanya ilyo alepekanya isonde pamo na Yesu pa kuti abantu bakaleikalamo. Yesu na o akalanga ukuti wa mano kabili alitekanya pa myaka 1,000 iyo akalateka, ilyo akalapekanya isonde pamo na bakapusuka Armagedone umo abakabuuka bakalaikala.
Abakapusuka inkondo ya Armagedone bakalasambilisha abakabuushiwa pa Bufumu bwa kwa Lesa na pa fyo Yehova afwaya (Moneni paragrafu 6) *
6. Ukulingana na Imilimo 24:15, ni bani bakaba pabo Yehova akabuusha?
6 Inshila iikalamba iyo abakapusuka Armagedone bakaafwilamo abakabuushiwa, kubasambilisha pa Bufumu bwa kwa Lesa na pa fyo Yehova afwaya. Cinshi kukabela ukubasambilisha? Pantu abengi abakabuushiwa bakaba pali balya Baibolo ita ukuti “abashalungama.” (Belengeni Imilimo 24:15.) Bakakabila ukwaluka mu fintu ifingi pa kuti bakanonkelemo mwi lambo lya kwa Kristu. Elenganyeni ifyo uyu mulimo ukakula uwa kusambilisha abantu abengi nga nshi abashaishibapo nangu cimo pali Yehova. Bushe tukalabasambilisha umo umo nga ifi tucita pa kutungulula amasambililo ya Baibolo? Bushe kukaba ifilonganino ifyo bakabeba ukulayako pa kuti nabo bakasambilile ifya kusambilisha abantu bambi abakalabuushiwa? Tatwaishiba, tufwile ukulolela. Na lyo line twalishiba ukuti Imyaka Ikana Limo iyo Kristu akalateka nga yapwa, “isonde likesulamo ukwishiba Yehova.” (Esa. 11:9) Ala tukakwata imilimo iingi iikalatulenga ukuba ne nsansa pa myaka 1,000!
7. Cinshi cikalenga abantu ba kwa Yehova bakalelangulukilako abakabuuka ilyo bakalabasambilisha?
7 Mu Myaka Ikana Limo iyo Kristu akalateka, abantu ba kwa Yehova bonse bakatwalilila ukwalula imibele yabo pa kuti bakalecita ifikalenga Yehova akalesekelela. Kanshi bonse bakalalangulukilako abakabuuka ilyo bakalabafwa ukwaluka pa kuti bekalatontonkanya no kucita ifyabipa, na pa kuti bakalecita ifintu ukulingana ne fyo Yehova afwaya. (1 Pet. 3:8) Ukwabula no kutwishika abakabuushiwa bakatemwa sana ukuba pamo na bantu ba kwa Yehova abaicefya ‘abakabombela ipusukilo lyabo.’—Fil. 2:12.
BUSHE TUKALAISHIBA BALUPWA BESU NE FIBUSA ILYO BAKALABUUKA?
8. Cinshi twingalandila ukuti abakalasengela abafwa abakabuushiwa bakalaishiba balupwa lwabo ne fibusa?
8 Kwaliba ifingi ifingalenga twalanda ukuti abakalasengela abakalabuushiwa bakalaishiba balupwa lwabo ne fibusa. Ku ca kumwenako, nga twatontonkanya pa fyo Yehova alebuusha abantu kale, kuti twaenekela ukuti abo akabuusha akababumba cipya cipya pa kuti bakalemoneka filya fine balemoneka, bakalelanda filya fine balelanda kabili bakaletontonkanya filya fine baletontonkanya ilyo bali mupepi no kufwa. Ibukisheni ukuti Yesu apashenye imfwa ku kulaala utulo, e lyo ukubuushiwa ku kushibuka ukufuma mu tulo. (Mat. 9:18, 24; Yoh. 11:11-13) Umuntu nga ashibuka mutulo, ishiwi lyakwe ne fyo amoneka fiba fye filya fine fiba ilyo ashilalaala, kabili alebukisha ne fyacilacitika ilyo ashilalaala. Tontonkanyeni pa fyo cali kuli Lasaro. Alifwile kabili palipitile ne nshiku shine ica kuti no mubili wakwe walitendeke ukubola. Nomba ilyo Yesu amubushishe, ilyo line fye bankashi yakwe balimwishibe kabili na o afwile alibebukishe.—Yoh. 11:38-44; 12:1, 2.
9. Cinshi abakabuushiwa bashakabuukile na matontonkanyo ayapwililika e lyo no mubili uwapwililika?
9 Yehova alilaya ukuti takuli nangu umo uukaba pe sonde ilyo Kristu akalateka uukatila: “Nindwala.” (Esa. 33:24; Rom. 6:7) Kanshi bonse abakabuushiwa ukufuma ku bafwa bakabuuka ne mibili iituntulu. Na lyo line tabakabe abapwililika apo pene. Pantu nga babuuka abapwililika balupwa babo ne fibusa te kuti babeshibe. Cimoneka kwati abantu bonse bakaya balepwililika panono panono mu Myaka Ikana Limo iyo Kristu akalateka. Lyena imyaka 1,000 nga yapwa, Yesu akalubwila Wishi Ubufumu. Pali iyi inshita ninshi Ubufumu nabucita fyonse ifyo Yehova afwaya bukacite ukubikako fye no kulenga abantu baba abapwililika.—1 Kor. 15:24-28; Ukus. 20:1-3.
BUSHE UKUBUUKA KUKATULENGA SHANI UKUBA NE NSANSA?
10. Bushe ukubuuka kwa bafwa kukalenga mukomfwe shani?
10 Elenganyeni ifyo cikaba ilyo mukalasengela balupwa ne fibusa fyenu abafwa. Bushe insansa mukakwata shikalenga mukaleseka nelyo shikalenga mukalelukusha ifilamba? Bushe shikalenga mukalelumbanya Yehova mu nyimbo? Ico twaishiba ca kuti mukatemenwako Shinwe uwamubikako amano no Mwana wakwe uwamutemwa nga nshi, pantu e bakalenga abafwa bakabuuke.
11. Ukulingana na mashiwi Yesu alandile ayaba pali Yohane 5:28, 29, cikaba shani ku bakalakonka amafunde ya kwa Lesa?
11 Elenganyeni ifyo abakabuushiwa bakaba ne nsansa ilyo bakafuula ubuntu bwa kale no kutendeka ukukonka amafunde ya kwa Lesa ayalungama. Bonse abakaalula imibele no kutendeka ukukonka amafunde ya kwa Lesa ayalungama bakabasuminisha ukwikala umuyayaya mu Paradaise. Lelo abakakaana ukulakonka amafunde ya kwa Lesa tabakabasuminishe ukwikala mu Paradaise pantu kuti balafulunganya umutende.—Esa. 65:20; belengeni Yohane 5:28, 29.
12. Bushe Yehova akapaala shani bonse abakalaikala pano isonde?
12 Ilyo Ubufumu bwa kwa Lesa bukalateka, abantu bakwe bonse bakashininkisha ukuti amashiwi yaba pa Amapinda 10:22 ya cine ayatila: “Ipaalo lya kwa Yehova lilacindamika, kabili talundako ukucululuka.” Umupashi wa kwa Yehova ukalenga abantu ba kwa Lesa bakabe nga Kristu kabili bakaya balepwililika. (Yoh. 13:15-17; Efes. 4:23, 24) Cila bushiku bakalabelako no bumi ubusuma kabili bakaba abantu abasuma. Ala ubumi bukawama icine cine! (Yobo 33:25) Nomba bushe ukutontonkanya sana pe subilo lya kubuuka kuti kwamwafwa shani pali ino nshita?
IFYO TUSAMBILILA KU KUTEMWA KWA KWA YEHOVA
13. Nga fintu Baibolo ilanda pa Amalumbo 139:1-4, bushe ukubuuka kwa bafwa kukalanga shani ukuti Yehova alitwishiba bwino?
13 Nga fintu tulandilepo kale, ilyo Yehova akabuusha abafwa akababuusha mu musango wa kuti bakaleibukisha abo baishibe ilyo bashilafwa kabili akababuusha ne fifyalilwa filya fine bali na fyo ilyo bashilafwa. Bushe ifi filolele mwi? Filolele mu kuti Yehova alimutemwa nga nshi ica kuti alabika amano kuli fyonse ifyo mutontonkanya, ifyo mumfwa, ne fyo mucita kabili alafibukisha. Kanshi nga mukaba pa bo Yehova akabuusha, ninshi akamubuusha mu nshila ya kuti mukaleibukisha ifyalecitika ilyo mushilafwa, kabili akamubuusha ne cifyalilwa cilya cine mwali na co ilyo mushilafwa. Imfumu Davidi yalishibe ifyo Yehova abika amano ku muntu umo na umo. (Belengeni Amalumbo 139:1-4.) Tumfwa shani nga twaishiba ifyo Yehova atwishiba bwino?
14. Bushe tufwile ukumfwa shani nga twatontonkanya sana pa fyo Yehova atwishiba bwino?
14 Nga twatontonkanya sana pa fyo Yehova atwishiba bwino, tatulingile ukusakamikwa ukuti nalimo abika sana amano ku filubo fyesu. Cinshi tushilingile ukusakamikilwa? Tufwile ukulaibukisha ukuti Yehova alatusakamana sana. Amona ifwe bonse umo umo ukuti twalicindama. Alabika amano kuli fyonse ifitucitikila. Ukwishiba ifi kulatusansamusha icine cine! Tatulingile ukulamona kwati twaba fye fweka. Yehova alaba na ifwe cila bushiku kabili alafwaya ukutwafwa.—2 Imila. 16:9.
IFYO TUSAMBILILA KU MANO YA KWA LESA
15. Bushe ukubuuka kulanga shani ukuti Yehova wa mano icine cine?
15 Abantu nga baletiina ukufwa, abalwani babo balabatiinya ukuti balabepaya nga bakaana ukucita ifyalubana ifyo bashicita. Pa kuti abatungululwa na Satana bapatikishe abantu bambi ukufutuka ifibusa fyabo nelyo ukucita ifintu ifyo baishiba ukuti fyalilubana, balabatiinya ukuti balabepaya. Lelo icintiinya ca musango uyu te kuti cibombe kuli ifwe. Twalishiba ukuti abalwani besu nga batwipaya, Yehova akatubuusha. (Ukus. 2:10) Twalishininkisha ukuti takuli ico bengacita icingalenga twaleka ukuba ifibusa fya kwa Yehova. (Rom. 8:35-39) Ala ifi Yehova atupeela isubilo lya kubuuka filanga ukuti wa mano icine cine! Pa mulandu wa kuti twalikwata ili isubilo, tatutiina nga ca kuti abantu abatungululwa na Satana balanda ukuti balatwipaya nga twakaana ukucita ifyo baletweba. Na kabili, isubilo lya kubuuka lilalenga twaba abashipa no kutwalilila ukuba aba cishinka kuli Yehova.
Bushe ifyo tusalapo ukucita filanga ukuti twalicetekela ifyo Yehova atulaya ukutila akulatupeela ifyo tukabila? (Moneni paragrafu 16) *
16. Mepusho nshi mulingile ukuyipusha, kabili amasuko yenu kuti yalenga shani mwaishiba nga ca kuti mwalicetekela Yehova?
16 Nga ca kuti abalwani ba kwa Yehova bamweba ukuti balamwipaya, bushe mukacetekela ukuti Yehova akamupususha? Kuti mwaishiba shani nga ca kuti mukacetekela Yehova? Cimo ico mwingacita kuyipusha amuti, ‘Bushe ifyo nsalapo ukucita mu fintu ifinono cila bushiku filanga ukuti nalicetekela Yehova?’ (Luka 16:10) Na cimbi icipusho mwingayipusha ca kuti, ‘Bushe ifyo momfya inshita yandi ne ndalama filanga ukuti nalicetekela ifyo Yehova alaya ukuti akalampeela ifyo nkabila nga ndebika Ubufumu intanshi?’ (Mat. 6:31-33) Nga mwa-asuka amuti ee kuli aya amepusho, ninshi mwalanga ukuti mwalicetekela Yehova kabili ninshi namuipekanya ku mesho ayali no kwisa.—Amapi. 3:5, 6.
MULETASHA PA FYO YEHOVA ATEKANYA
17. (a) Bushe isubilo lya kubuuka lilanga shani ukuti Yehova alitekanya? (b) Kuti twalanga shani ukuti tulatasha pa fyo Yehova atekanya?
17 Yehova alisala kale ubushiku ne nshita ilyo akonaula cino calo cabipa. (Mat. 24:36) Apo akatwalilila ukuba uwatekanya, takonaule cino calo ilyo inshita asala ishilafika. Nangu ca kuti alafwaisha ukubuusha abafwa, alitekanya. (Yobo 14:14, 15) Alalolela ukuti inshita yalinga ikafike iya kubabuusha. (Yoh. 5:28) Kwaliba ifingi ififwile ukutulenga ukulatasha pa fyo Yehova atekanya. Tontonkanyeni pali ici: Ifi Yehova atekanya fyalilenga abantu abengi ukubikako fye na ifwe bene ukukwata inshita ya ‘kulapila.’ (2 Pet. 3:9) Yehova afwaya ukuti abantu abengi nga nshi bakabe no mweo wa muyayaya. Kanshi tufwile ukulalanga ukuti tulatasha pa fyo Yehova atekanya. Kuti twalanga shani ukuti tulatasha? Kuti twacita ifi nga ca kuti tule-esha apo twingapesha ukufwaya ababa ‘no mutima uusuma uufwaya umweo wa muyayaya,’ no kubafwa ukutemwa Yehova no kulamubombela. (Imil. 13:48) Ukucita ifi kukalenga nabo bakanonkelemo mu fyo Yehova atekanya nga fintu na ifwe tunonkelamo.
18. Cinshi tulingile ukutekanishisha abantu?
18 Yehova akalanga ukuti alitekanya ilyo akalolela ukuti imyaka 1,000 ikapwe e lyo tukapwililike. Ilyo iyi imyaka ishilapwa, Yehova akatwalilila ukutwelela imembu. Kanshi tufwile ukulamupashanya ukulafwaya ifisuma mu bantu e lyo no kulabatekanishisha. Tontonkanyeni pali nkashi umo uo abena mwakwe batendeke ukusakamikwa ukucila mu cipimo ica kuti balilekele no kulongana. Atile: “Calinkosele sana. Ifintu fyalyalwike ica kuti fyonse ifyo twalepanga ukucita fyalifulungene.” Lelo uyu nkashi alitwalilile ukutekanishisha umwina mwakwe kabili alimutemenwe. Alicetekele Yehova kabili tabalile anenuka. Uyu nkashi alepashanya Yehova ukubika amano ku fintu ifisuma ifyo alemona mu bena mwakwe. Atile, “Abena mwandi baliba ne mibele iisuma, kabili balesha na maka ukucita ifingalenga balenashako ukusakamikwa.” Calicindama ukulatekanishisha balupwa lwesu na ba mu cilonganino abesha na maka ukucimfya amafya bakwata!
19. Finshi tufwile ukulafwaisha ukucita?
19 Yesu na bamalaika balisekelele ilyo Yehova abumbile isonde. Nomba elenganyeni ifyo bakatemwa ilyo bakamona isonde lyaisulamo abantu abapwililika, ababombela Yehova kabili abamutemwa. Elenganyeni ne fyo abafuma pano isonde abakateka na Yesu ku muulu bakasekelela ilyo bakamona ifyo abantu bakanonkelamo mu fyo bakalabomba. (Ukus. 4:4, 9-11; 5:9, 10) Kabili elenganyeni ifyo cikaba ilyo ifilamba fya nsansa fikapyana pa filamba fya bulanda, ilyo amalwele, amalanda, ne mfwa fikafumininapo. (Ukus. 21:4) Nomba ilyo ifi fishilacitika, twalilileni ukulapashanya Shinwe uwaba no kutemwa, amano, kabili uwatekanya. Nga mulecita ifi mukatwalilila ukusekelela te mulandu na mafya mwingakwata. (Yako. 1:2-4) Kabili tukalatasha nga nshi Yehova pa fyo atulaya ukuti “kukaba ukubuuka”!—Imil. 24:15.
ULWIMBO 141 Umweo Waba Cipesha Amano
^ para. 5 Yehova ni Shifwe uwaba no kutemwa, amano, kabili alitekanya. Kuti twamona iyi mibele akwata mu fyo abumba ifintu fyonse na mu fyo atulaya ukuti akabuusha abafwa. Cino cipande cala-asuka amepusho yamo ayo nalimo twakwata pa kubuuka kwa bafwa, kabili calalandako na pa fyo twingalanga ukuti tulatasha Yehova pa kutemwa kwakwe, pa mano yakwe, na pa kutekanya kwakwe.
^ para. 59 UBULONDOLOSHI BWA CIKOPE: Umwina America inkonko uo papitile imyaka iingi nga nshi ukufuma apo afwilile, abuuka mu Myaka Ikana Limo iya Kuteka kwa kwa Yesu. Munyinefwe uupuswike inkondo ya Armagedone alesambilisha munyinefwe uubuushiwe ifyo alingile ukucita pa kuti anonkelemo mwi lambo lya kwa Yesu.
^ para. 61 UBULONDOLOSHI BWA CIKOPE: Munyinefwe ale-eba abakalamba ba ncito ukuti inshiku ishingi mu kati ka mulungu takulabomba ama-awala yalundwako. Alebalondolwela ukuti pali ishi inshiku icungulo alakwata ifya kucita ifingi ifyakuma ukupepa Yehova. Na lyo line, abeba ukutila nga ca kuti kwaba ifyapamfya ifyo alingile ukubombelapo, kuti bamweba pa kuti abombe ama-awala yalundwako.
