1. Rosai ḇewar fa Yahwe irandak ifrur roi ḇebor kam?

FAFISU ono Yahwe ḇyarek ro manggundi. Ḇape, roi ine ifrur fa ḇyesanekar ḇa. Oso isya fa kyainus Yahwe I ḇa yo, na iryaḇ pdef. Rariryano, Yahwe imarisen insama ḇesesya sakkenem kako ma sakna raryaḇ. Inja, Yahwe saswar Ḇyediso eḇedari irandak fa ifrur roi ḇebor kam.​—Mz. 36:9; 1 Yoh. 4:19.

2. Moḇsa Yesus ma malaikat sya sḇaḇir rai fafisu smam Yahwe ifrur roi ḇesena?

² Yahwe ifrur ḇepon Roma Ḇyedi, Yesus i. Mura, roro Roma ḇepon Ḇyedine, ’Allah ifrur roi ḇeḇor kam’, ma malaikat sya kako. (Kol. 1:16) Yesus imarisen kaku fa fyararur kayam fnoḇek Kmari. (Ams. 8:30) Ḇar malaikat sya sakmarisen fafisu smam Yahwe ma Yesus sufrur farsyos ma supswan ine. Moḇsa sfasnai raryaḇ sena rai? Sisandik Yahwe I, ma siryaḇ kaku fafisu smam Yahwe ifrur roi ḇesena ma snonggaku koine. (Ayb. 38:7; Ams. 8:31) Yahwe fararur Ḇyesine oser-oser nfasnai saswar ma fawinanem Ḇyena.​—Mz. 104:24; Rm. 1:20.

3. Imnis wos ro 1 Korintus 15:21, 22, payamyum rosai na kosmai ya snar Yesus imarwarek ko kwar?

³ Allah Yahwe imarisen insama snonggaku syakam sikenem fyoro ro supswan ḇepyum ine. Imbape, roma kpu suḇesya kako saksmai sasar ma marmar ya. (Rm. 5:12) Inja, rosai Allah Yahwe ifrur ya? Fafisu ya ḇeri, ikofenḇair nyan fa ḇyuk payamyum ḇe snonggaku sya. (Kej. 3:15) Yahwe ḇyuk Roma Ḇyedi, Yesus i, fa imar ḇe farsarser  insama Adam ma Eva kpu up suḇesya simkei ro sasar ma marmari. Rarirya, snonggaku oser-oser ḇemarisen ḇefarmyan faro Yahwe I na ismai kankenem fyoro.​—Yoh. 3:16; Rm. 6:23; wasya 1 Korintus 15:21, 22.

4. Fakfuken rosai na komam kankarem ḇyena ro farkarkor ine?

⁴ Allah Yahwe ikofen kwar nari ḇyawes snonggaku ḇemar kwar sya fa sikḇok kaḇer. Mboi roi nane naser fakfuken. Raris, moḇsa kaḇakḇok ine na ḇyejadi rai? Fafisu snonggaku koswar sya sikḇok kaḇer, na komambir si kaker ke? Rariso na kaḇakḇok ya nafrur fa koryaḇ rai? Fafisu kokain kowasen kaḇakḇok ya, rosai kofarkor ro Yahwe saswar, fawinanem, ma kaḇaḇaḇ Ḇyena? Rwama komam kankarem faro fakfuken nane oser-oser.

5. Rosai ḇefnai fa kokyar ḇesmai kaḇakḇok sya na sikḇok kam ro ras oso ḇeri ḇa?

⁵ Fafisu Yahwe ḇye Yesus i fa ḇyawes snonggaku risyaran ro marmar ya, kokyar na sikḇok kam ro ras oso ḇeri ḇa. Rosai ḇefnai fa kokofen radine? Kukro nari supswan ine ifo ḇeri kuker snonggaku, rya moḇ ya na ḇyenapnap kaku. Kofawi kwar Yahwe fararur Ḇyena nyapnap ḇa. Ifawi roi nakam fandun fa nefasos mnis insama snonggaku sya sikenem ro payamyum. (1 Kor. 14:33) Allah Yahwe fyasnai fawinanem ma kaḇaḇaḇ fafisu fyararur kayam fnoḇek Yesus i fa sufasos pyum supswan ine insama snonggaku sya sḇarek ro na. Ro Ḇaḇepapoik Taun Syaran Oser, Yesus nari fyasnai rari ine kako rofyor fyararur kayam fnoḇek snonggaku ḇemkeibur Armagedon sya fa sfasos roi nakam faro snonggaku ḇekḇok sya.

6. Imnis ḇeyap ro Farfyar 24:15, mansei wer nari Yahwe ḇye si fa sikḇok kaḇer?

 ⁶ Ḇefandun syadi wer, snonggaku ḇemkeibur Armagedon sya nari sfarkor snonggaku ḇekḇok ro marmar sya fa sakfawi Karajan Allah ma Yahwe marisen Ḇyena. Kukro? Snar ḇebor ḇekenem kaḇer sya, Refo dap si ḇe snonggaku ”ḇenapes ḇa” kaker. (Wasya Farfyar 24:15.) Fandun fa sifrur fararwei ro kenem sena insama sismai payamyum ro Kristus marmar ḇyedi ma sikenem fyoro. Kokarapan kada, nari fararur nabor naisya fa kofnoḇek snonggaku risyaran fa sifawi Yahwe I. Nari kofarkor si oser-oser imnis nyan kofnoḇek ḇefarkor Refo ro baboine ke? Snonggaku ḇefarkor babo ansine nari sakryur ro sidang-sidang ma sfarkor si insama sifnoḇek ḇesmai kaḇakḇok ḇesesya wer ke? Kowaf ma komam monda. Roi kofawi ya iso ro papupes Kristus Ḇaḇepapoik Taun Syaran Oser Ḇyedi, ”supswan ine nari ifo kuker fawawi ro Yahwe I”. (Yes. 11:9) Nari kofararur kuker raryaḇ kaku ro swaf taun syaran oser ine!

7. Rosai ḇefnai fa Yahwe kawasa Ḇyesi sna kakara oser fyor sifnoḇek ḇesmai kaḇakḇok sya?

⁷ Ro fafisu Ḇaḇepapoik Taun Syaran Oser, Yahwe kawasa Ḇyesi kam fandun fa sifrur fararwei pdef insama Yahwe imarisen. Rarirya, sikam sna kakara oser fyor sifnoḇek ḇesmai kaḇakḇok sya fa spampum marisen ḇesasar ma sikenem imnis Yahwe marisen Ḇyena. (1 Ptr. 3:8) Snonggaku ḇesmai kaḇakḇok ansine nari smam Yahwe kawasa Ḇyesi sfasnai sne ḇerun ma sisya sfadwer kenem sena insama Yahwe imarisen. Rarirya na sakmarisen sisyom Yahwe I fnoḇek si.​—Flp. 2:12.

8. Rosai ḇefnai fa kokyar fafisu kosrow kaḇer kuker snonggaku koswar sya ro fafisu sikḇok kaḇer, nari komambir si kaker?

⁸ Roi ḇeḇeso naisya nafnai fa kokyar fyor kosrow kaḇer kuker snonggaku koswar sya ro fafisu sikḇok kaḇer, nari komambir si kaker. Imnis raris rosai Yahwe ifrur kwar ro fafisu naiwara, kokyar rofyor Yahwe ḇyuk kaḇakḇok faro snonggaku oso, nari ifrur kaḇer i insama smam moḇ isnai raya, moḇ dawos raya, ma kakara ḇyena namnis ro randak fafisu imar ḇaim anya. Koswarepen Yesus doḇe snonggaku ḇemar kwar ima imnis ra denef, ma kaḇakḇok imnis ra snonggaku ḇeyenef ḇo ikḇok kaḇer. (Mat. 9:18, 24; Yoh. 11:11-13) Fafisu snonggaku sya sikḇok ro anenef sena, nari smam, srower, ma siswarepen kaḇer roi nakam imnis ro fafisu senef ḇaim. Kokarapan fawar ro Lazarus i. Imar ro ras rifyak kwar, inja na baken ḇyedi ipokem kwar. Ḇape, rofyor Yesus ḇyawes i fa ikenem kaḇer, srar ḇyansuya sumambir i ḇeri, ma Lazarus dakmambir su kako.​—Yoh. 11:38-44; 12:1, 2.

9. Rosai ḇefnai fa snonggaku ḇesmai kaḇakḇok sya nari sḇe snonggaku ḇenapes kaku ḇeri ḇa?

⁹ Yahwe ḇyeasas nari snonggaku ḇekenem ro Firdaus ipok ikofen radine ḇa, ”Yadufe.” (Yes. 33:24; Rm. 6:7) Inja, snonggaku ḇekenem kaḇer sya nari sna baken ḇeprei kaku. Mboi, nari sḇe snonggaku ḇenapes kaku ḇeri ḇa kukro nari kina ma bati sesya smambir si ḇa. Rya ro fafisu Kristus Ḇaḇepapoik Taun Syaran Oser Ḇyedi, nari fawawas snonggaku sya sinapes kaku. Ro papupes taun syaran oser anya, Yesus ḇyuk kaḇer Karajan ani  ḇe Kmari. Mura Karajan ani ifrur Allah marisen Ḇyena kam, ine kako ifrur snonggaku sya fa sḇe snonggaku ḇenapes kaku.​—1 Kor. 15:24-28; Why. 20:1-3.

10. Fafisu wasrow kaḇer kuker snonggaku waswar sya rofyor sikenem kaḇer, moḇsa na ḇaḇir rai?

¹⁰ Kwarapan fafisu wasrow kaḇer kuker snonggaku waswar sya rofyor sikenem kaḇer. Nari wamarisen rawo imbe wambrif ḇaido kwanes ke? Na waryaḇ kaku isof wadisen dow fa wasandik Yahwe I ke? Nane nari nafrur fa koswar syadi Kma koḇedi ma Roma Ḇyedi kukro sufasos insama snonggaku ḇemar kwar sya na sikenem kaḇer.

11. Imnis Yesus wos ḇyena ro Yohanes 5:28, 29 ya, snonggaku ḇesouser faro Yahwe I rosai nari sismai na?

¹¹ Kokarapan ḇesmai kaḇakḇok sya moḇsa sḇaḇir rai fafisu sibur kenem ḇekwar sena ma sikenem imnis Yahwe marisen Ḇyena. Snonggaku ḇefrur fararwei ansine nari Allah Yahwe ḇye si fa sikenem fyoro ro supswan ine. Imbape snonggaku ḇemewer ḇesouser faro I, nari ryir si fa sikenem pdef ro Firdaus ya ḇa.​—Yes. 65:20; wasya Yohanes 5:28, 29.

12. Barakas rosai monda Yahwe ḇyuk ḇe snonggaku ḇekenem ro supswan ine sya?

¹² Fafisu Karajan Allah ḇyepoik supswan ine, Allah kawasa Ḇyesi kam nari smam wos ḇero Amsal 10:22 nkaku rarirya. Mnuk ani doḇe, ”Barakas ro Yahwe iso ḇefrur fa snonggaku sya snana, ma ḇyuk fafardun na fa nawarpu ḇa.” Yahwe ḇyuk rur ḇesren Ḇyedi fa ifnoḇek kawasa Ḇyesi. Nari senana ro rur, sifrur raris Kristus i syadi wer, ma sḇe snonggaku ḇenapes. (Yoh. 13:15-17; Ef. 4:23, 24) Baken sena nsambraḇ syadi wer ro ras ḇe ras, ma sikenem pyum syadi. Kankenem ḇeradine nari dun raryaḇ kaku! (Ayb. 33:25) Ḇape, rofyor wawasen mura ro saneraro kaḇakḇok ya, rariso ine nafnoḇek Au ro fafisu ine rai?

13. Imnis ḇeyap ro Mazmur 139:1-4 ya, rariso mujisat kaḇakḇok fyasnai Yahwe myambir pyum ko rai?

¹³ Insanja kawos kwar, rofyor Yahwe ḇyawes snonggaku ro marmar ya, na ḇyuk kaḇer swarapepen sena ma rari-rari ḇeḇair manggunsi. Kokarapan farkarkor ḇyena ḇe ko. Yahwe iswar kaku ko, inja ifawi pyum ma iswarepen rosai kokara, koḇaḇir, kokofen, ma fararur koḇena. Rarirya, rofyor ḇyawes kaḇer ko ro marmar ya, na ḇye ko fa komnis moḇ kosnai raya fafisu komar ḇaim anya. Raja Daud ḇyaḇir kaku Yahwe ima myambir pyum ko oser-oser. (Wasya Mazmur 139:1-4.) Snar kofawi Yahwe myambir kaku ko, inja moḇsa koḇaḇir rai?

14. Fafisu kowasenkara Yahwe ima myambir pyum ko, moḇsa na koḇaḇir rai?

¹⁴ Fafisu kowasenkara Yahwe ima myambir pyum ko, na kopok komgakwarek wer ḇa kukro koswarepen Yahwe ima iswar kaku ko. Myam ko oser-oser koḇemaeja syadi. Myamepen rosai monda ḇekur kankenem koḇena. Ine nbuk sneprei kaku ko! Komgak ḇa kukro na kemir ḇa. Yahwe ryous ko ma imarisen ifnoḇek ko ḇesya kwar.​—2 Taw. 16:9.

15. Rariso saneraro kaḇakḇok fyasnai Yahwe fawinanem Ḇyena?

¹⁵ Komgak faro marmar ya ido, nari mbroḇ koḇesi sidif ko fa kofrur roi  kofawi kopok kofrur awer na. Setan ḇyuk roi ḇeradine fa snonggaku sya sfamyun bati sesya ḇaido sisusu ro kakyar sena. Ḇape, koma kopok kofrur rarirya awer. Kofawi mbroḇ koḇesi smun ko rariryano, Yahwe nari ḇyawes ko fa kokenem kaḇer. (Why. 2:10) Kokyar kaku roi oso ḇaḇeri na ḇedwarek ko fa kofarmyan ḇe Yahwe I. (Rm. 8:35-39) Yahwe fyasnai nya fawinanem ḇeba kaku kuker ḇyuk saneraro kaḇakḇok ine ḇe ko! Iso ḇefnai fa na komgak ḇa rofyor ḇeso Ibiris sya sawos ḇo soḇe imbe smun ko kukro komewer kofrur roi sor na. Oso wer ido, saneraro kaḇakḇok syambraḇser ko fa kosoasuser faro Yahwe I pdef.

16. Fakfuken rosai fandun fa kofuken ḇe manggunko, ma kankarem koḇena nfasnai koma kokyar kaku faro Yahwe I ke?

¹⁶ Ḇembroḇ Yahwe I sya soḇe imbe smun Au ido, wakyar Yahwe nari ḇyawes Au fa wakenem kaḇer ke? Moḇsa wafawi nwa kakyar faro roi ine kwar rai? Nyan oser ya wafuken, ’Roi kasun monda yafrur ro kenem ayena, yafasnai yakyar faro Yahwe I ke?’ (Luk. 16:10) Oroḇaido wafuken, ’Ro nyan kenem yedine, yafasnai yakyar Yahwe nari fyasos fandun ayena fyor yasewar ḇepon Karajan Ḇyedi ke?’ (Mat. 6:31-33) Kwarem imbo faro fakfuken risuru suine ido, ima wakyar faro Yahwe I ma nari swambraḇ fafisu wasmai roi ḇesamswen ro ras meser iyama.​—Ams. 3:5, 6.

17. (a) Rariso saneraro kaḇakḇok fyasnai Yahwe kaḇaḇaḇ Ḇyena rai? (b) Moḇsa kofasnai syowi faro Yahwe kaḇaḇaḇ Ḇyena?

¹⁷ Yahwe dap kwar fafisu risai nari kyakok dunya ḇeḇarḇor ine. (Mat. 24:36) Imarisen kaku fa ifrur fasaw na. Imander kaku fa ḇyawes kaḇer snonggaku ḇemar kwar sya, mboi iwaf kuker kaḇaḇaḇ. (Ayb. 14:14, 15) Allah Yahwe isya iwaf kaker isof ras anya ryama fa ḇyuk kaḇakḇok faro si. (Yoh. 5:28) Koḇesyowi kaku Yahwe kaḇaḇaḇ Ḇyenane. Kokara kada: Snar Yahwe kyaḇaḇ, inja snonggaku ḇebor ma ko kako, kona swaf fa ’kombror ma kokaḇer’. (2 Ptr. 3:9) Yahwe imarisen insama snonggaku ḇebor syadi wer saksmai kankenem fyoro. Inja, rwama kofasnai syowi faro Yahwe kaḇaḇaḇ Ḇyena. Moḇsa kofasnai na rai? Kosewar fa kosrow snonggaku  ḇefasnai simarisen ’saksmai kankenem ḇemnai ḇa’. (Kis. 13:48) Rarirya ido, nari saksmai payamyum ro Yahwe kaḇaḇaḇ Ḇyena kako.

18. Rosai ḇefnai kaku fa kokaḇaḇaḇ faro snonggaku ḇesesya?

¹⁸ Yahwe imarisen kaku myam kokunem ḇe snonggaku ḇenapes kaku, mboi kuker kaḇaḇaḇ iwaf rawo taun syaran oser imnai. Isof ras ani ryama, Yahwe imarisen ḇyuk ampun faro sasar koḇena. Inja, fandun fa koso nyan Ḇyena ma komam roi ḇepyum ro snonggaku ḇese ma kokaḇaḇaḇ faro si. Kokarapan fawar ro imbesrar oso, swari ḇyekandera kukro imgakwarek ker, nane nafnai rawo iso fananjur wer ḇa. Fyar ḇo doḇe, ”Roi nane nun samswen kaku ḇe aya. Fasawdam kenem nuḇena nfadwer ḇeri, ma jadi fa nufrur roi numarisen kam ḇa.” Rarirya mboi, imbesrar ine ḇyekaḇaḇaḇ pdef faro swari. Ikyar kaku faro Yahwe I ma ifnoḇek swari pdef. Iso mnis Yahwe nyan Ḇyena kuker myam monda roi ḇepyum ro swari. Doḇe, ”Swa yedi nya rari ḇepyum ma fawawas syewar fa isawen makakwarek ḇyena.” Inja, kofasnai kaḇaḇaḇ faro kina koḇedi ḇaido naek srar ro sidang ḇesewar fa simkuepen ro samswen ḇekur si na!

19. Rosai kosewar kaku fa kofruri?

¹⁹ Yesus ma malaikat sya siryaḇ fafisu randak kaku Yahwe ifrur supswan ine. Mboi kokara wer kada, na siryaḇ syadi wer fafisu smam snonggaku ḇenapes kaku ḇeswar ma ḇefarmyan faro Yahwe I sifo ro supswan ine. Kowasen ḇeyek ḇe nanggi fa sakḇepoik kayam fnoḇek Yesus i sya, moḇsa na sḇaḇir rai fafisu smam snonggaku sya sismai payamyum ro fararur sena. (Why. 4:4, 9-11; 5:9, 10) Ma kowasenpan fafisu nari kankanes, dafduf, fafardun, ma marmar napromes kwar ḇo kokenem kuker marasrisen. (Why. 21:4) Inja, kirine kosewar kaku fa koso Kma koḇedi saswar, fawinanem, ma kaḇaḇaḇ Ḇyena. Kofrur na ido, nari koryaḇ pdef ro samswen rosai monda ḇekur ko. (Yak. 1:2-4) Kokofen kasumasa kaku ḇe Yahwe I kukro ḇyeasas kwar nari ḇyawes kaḇer snonggaku ḇemar kwar sya!​—Kis. 24:15.