1. ?From wanem Jehova i wokem olgeta samting?

I GAT wan taem we Jehova i stap hem wan nomo. Be hem i no harem nogud from. Hem i no nidim ol narafala blong oli mekem hem i glad. Nating se i olsem, hem i wantem se ol narafala tu oli laef mo oli glad. From we Jehova i gat lav, hem i stat blong wokem olgeta samting.—Sam. 36:9; 1 Jon 4:19.

2. ?Jisas mo ol enjel oli harem olsem wanem taem Jehova i wokem evri samting?

² Fastaem, Jehova i wokem wan narafala blong givhan long hem. Biaen, hem i yusum fasbon Pikinini ya blong hem, blong wokem “olgeta narafala samting,” wetem plante milian spirit pikinini blong hem, hemia ol enjel. (Kol. 1:16) Jisas i glad long janis ya blong wok wetem Papa blong hem. (Prov. 8:30) Mo ol enjel tu oli glad, from we taem Jehova mo Jisas we i Nambawan Man Blong Wok blong hem i stap wokem heven mo wol, olgeta oli stap long taem ya mo oli luk. ?Ol enjel oli mekem wanem? Oli “glad tumas, oli stap singsingaot” taem Jehova i wokem wol, mo i sua se oli gohed blong singsingaot taem hem i wokem evri samting, wetem laswan wok blong hem tu we i nambawan tumas, hemia man. (Job 38:7; Prov. 8:31) Evri samting ya we Jehova i wokem, oli soemaot lav mo waes blong hem.—Sam. 104:24; Rom 1:20.

3. Folem 1 Korin 15:21, 22, ?ransom sakrefaes blong Jisas i openem rod long wanem?

³ Jehova i wantem se olgeta man oli haremgud blong laef olwe long naesfala planet we hem i wokem. Be taem Adam mo Iv i rebel agensem Papa blong tufala we i gat lav, sin mo ded i  kasem olgeta man. (Rom 5:12) ?Jehova i mekem wanem? Kwiktaem nomo hem i talemaot samting we bambae hem i mekem blong sevem ol man. (Jen. 3:15) Hem i gat tingting blong givim wan ransom, blong ol pikinini blong Adam mo Iv oli save kam fri long sin mo ded. Nao hem i save givim laef we i no save finis long evri man we i jusum blong mekem wok blong hem.—Jon 3:16; Rom 6:23; ridim 1 Korin 15:21, 22.

4. ?Wanem ol kwestin we bambae yumi tokbaot long stadi ya?

⁴ Promes ya blong God se ol dedman bambae oli laef bakegen, i mekem plante kwestin i kamaot. Eksampol, ?laef bakegen ya bambae i hapen olsem wanem? ?Bambae yumi naf blong luksave ol famle mo fren taem oli laef bakegen? ?Olsem wanem laef bakegen i save givim glad long yumi? ?Olsem wanem bambae yumi kasemsave moa long lav, waes, mo longfala tingting blong Jehova taem yumi tingting dip long laef bakegen? Naoia bambae yumi tokbaot wanwan long ol kwestin ya.

5. ?From wanem i stret blong talem se ol man bambae oli no laef bakegen wantaem nomo?

⁵ Taem Jehova i yusum Jisas blong mekem plante milian man oli laef bakegen, yumi save talem se bambae i no olgeta evriwan oli laef bakegen long semtaem. ?From wanem? From we sipos populesen blong wol i kam plante wantem nomo, ol samting bambae i olbaot. Be Jehova i neva mekem samting long fasin we i olbaot. Hem i save se i mas gat oda blong pis i stap longtaem. (1 Kor. 14:33) Taem Jehova God i wok wetem Jisas, hem i wok wetem waes mo longfala tingting nao i rerem wol ya sloslo bifo we i putum man long hem. Taem Jisas i rul blong 1,000 yia, hem tu bambae i gat sem fasin ya taem i wok wetem olgeta we oli laef tru  long Amagedon, blong rerem wol ya bifo we ol dedman oli laef bakegen.

6. Folem Ol Wok 24:15, ?wanem kaen man tu bambae i laef bakegen?

⁶ Samting we i moa impoten, hemia se ol man we oli laef tru long Amagedon bambae oli mas tijim olgeta we oli laef bakegen, blong oli save Kingdom blong God mo ol samting we Jehova i wantem. ?From wanem? From we bighaf blong olgeta we oli laef bakegen, oli “ol man we oli no stret.” (Ridim Ol Wok 24:15.) Oli mas mekem plante jenis blong ransom blong Kraes i givhan long olgeta. Traem tingbaot bigfala wok blong tijim trutok blong God long plante milian man we oli no save Jehova nating. ?Olsem wanem? ?Bambae yumi tijim wanwan man long Baebol, olsem we yumi stap mekem tede? ?Ol niufala man ya bambae oli joen long ol kongregesen, blong oli save kasem trening blong tijim ol man we bambae oli laef bakegen afta? Yumi mas wet nomo blong luk. Be yumi save se long en blong 1,000 Yia Rul Blong Kraes, “wol ya i mas fulap gud long save blong Jehova.” (Aes. 11:9, NW) !I sua se long taem ya bambae yumi harem gud long plante wok!

7. ?From wanem ol man blong God bambae oli kaen long ol man we oli laef bakegen?

⁷ Long 1,000 Yia Rul Blong Kraes, evri pikinini blong Jehova long wol oli mas gohed blong mekem sam jenis, blong Jehova i save glad long olgeta. Taswe olgeta evriwan oli kasemsave long filing blong ol man we oli laef bakegen. Nao bambae oli kaen long olgeta taem oli givhan long olgeta blong winim ol rong tingting we i kamaot from sin, mo blong oli laef folem ol rul blong Jehova. (1 Pita 3:8) I sua se ol man we oli laef bakegen bambae oli laekem ol gudfala fasin blong ol man blong Jehova, we oli gat tingting daon mo oli “stap wok had blong God i sevem” olgeta tu.—Fil. 2:12.

8. ?From wanem yumi save talem se ol man bambae oli naf blong luksave ol famle we oli laef bakegen?

⁸ I gat plante risen blong talem se taem ol man oli go welkamem ol man we oli laef bakegen, bambae oli naf blong luksave ol famle mo fren blong olgeta. Eksampol, taem yumi tingbaot ol man we oli bin laef bakegen, i luk olsem we Jehova i wokem ol man ya bakegen nao fes, toktok, mo tingting blong olgeta i sem mak olsem hemia we oli gat jes bifo we oli ded. Yumi mas tingbaot we Jisas i se ded i sem mak long slip, mo laef bakegen i sem mak long man we i wekap long slip. (Mat. 9:18, 24; Jon 11:11-13) Taem ol man we oli slip oli wekap, fes, voes, mo ol samting we oli rimemba, oli stap sem mak yet olsem taem oli go slip. Tingbaot eksampol blong Lasaros. Hem i ded fo dei finis mo bodi blong hem i stat blong roten. Be taem Jisas i mekem hem i laef bakegen, ol sista blong hem oli luksave hem kwiktaem nomo, mo Lasaros tu i no fogetem olgeta.—Jon 11:38-44; 12:1, 2.

9. ?From wanem ol dedman bambae oli no laef bakegen wetem wan tingting mo bodi we i stret gud olgeta?

⁹ Jehova i promes se aninit long rul blong Kraes, bambae i no gat man i talem se: “Hem i sik.” (Aes. 33:24; Rom 6:7) Taswe, olgeta we oli laef bakegen, God bambae i wokem bakegen bodi blong olgeta we i helti. Be, bambae oli no stret gud olgeta. Sipos oli stret gud olgeta, ol famle blong olgeta bambae oli no naf blong luksave olgeta. I luk olsem se long 1,000 Yia Rul Blong Kraes, sloslo olgeta man bambae oli kam stret gud olgeta. Long en blong hem nomo, Jisas bambae i givimbak Kingdom long Papa blong hem. Long taem ya nao olgeta wok we Kingdom i mas mekem i finis gud, wetem wok ya tu blong mekem olgeta man oli kam stret gud olgeta.—1 Kor. 15:24-28; Rev. 20:1-3.

10. ?Laef bakegen bambae i mekem yu harem olsem wanem?

¹⁰ Traem tingbaot se bambae i olsem wanem taem yu mitim ol famle mo fren blong yu bakegen. Maet yu krae o yu laf from we yu glad tumas. O maet yu singsing strong blong presem Jehova. Samting we i sua se, bambae yu lavem tumas Papa blong yu mo Pikinini blong hem, from nambawan presen ya, laef bakegen. Papa blong yu i kea long yu mo Pikinini blong hem i tingbaot yu.

11. Folem Jon 5:28, 29, ?wanem bambae i hapen long olgeta we oli laef folem ol stret rul blong God?

¹¹ Traem tingbaot glad we olgeta we oli laef bakegen bambae oli gat, taem oli tekemaot olfala fasin blong olgeta mo oli laef folem ol stret rul blong God. Olgeta we oli mekem samting ya oli girap blong kasem laef. Be olgeta we oli rebel agensem God, bambae hem i no letem olgeta oli spolem pis long Paradaes.—Aes. 65:20; ridim Jon 5:28, 29.

12. ?Jehova bambae i blesem olgeta man long wol olsem wanem?

¹² Aninit long rul blong Kingdom, olgeta man bambae oli harem se ol tok blong Ol Proveb 10:22 (NW) oli tru, we i se: “Taem [Jehova] i givim blesing, hem i no mekem man i harem nogud from, mo hem i no ademap trabol i go wetem.” Wetem help blong spirit blong Jehova, ol man blong God bambae oli kasem moa blesing, yes sloslo bambae oli kam olsem Kraes mo oli kam stret gud olgeta. (Jon 13:15-17; Efes. 4:23, 24) Evri dei bambae bodi blong olgeta i kam strong moa, mo fasin blong olgeta i kam gud moa. !Bambae laef i gud tumas long taem ya! (Job 33:25) Be taem yu tingting dip long laef bakegen, ?olsem wanem samting ya i save givhan long yu naoia?

13. ?Ol Sam 139:1-4 i soem se Jehova i savegud yumi olsem wanem? ?Olsem wanem laef bakegen bambae i pruvum samting ya?

¹³ Olsem we yumi tokbaot finis, taem Jehova i mekem ol man oli laef bakegen, bambae hem i mekem se oli gat ol fasin blong olgeta bakegen mo oli rimemba ol samting. Traem tingbaot se hemia i minim wanem. Jehova i lavem yu tumas, nao hem i stap lukluk ol tingting, filing, mo toktok blong yu wetem ol samting we yu mekem, mo hem i no fogetem. Taswe sipos hem i wantem mekem yu laef bakegen, bambae i isi blong hem i putumbak ol memori, tingting, mo ol fasin blong yu. King Deved i kasemsave se Jehova i savegud yumi wanwan. (Ridim Ol Sam 139:1-4.) Be kwestin se: Taem yumi kasemsave se Jehova i savegud yumi, ?hemia i halpem yumi olsem wanem naoia?

14. Taem yumi tingting dip long fasin ya we Jehova i savegud yumi, ?hemia i givhan long yumi olsem wanem?

¹⁴ Taem yumi tingting dip long fasin ya we Jehova i savegud yumi, yumi no mas wari. ?From wanem? Yumi mas tingbaot se Jehova i keagud long yumi. Hem i luk se yumi wanwan i spesel. Hem i lukluk gud evri samting long laef blong yumi we i mekem se yumi defren long ol narafala. !Yumi glad tumas se hem i olsem! Yu neva mas harem se yu stap yu wan nomo. Jehova i stap klosap long yumi long evri minit blong evri dei, i stap lukaot rod oltaem blong halpem yumi.—2 Kron. 16:9.

15. ?Olsem wanem laef bakegen i pruvum se Jehova i waes?

¹⁵ Fraet long ded i wan tul we i gat paoa. Olgeta we Setan i bos long olgeta, oli yusum tul ya blong fosem ol man blong oli agensem ol fren blong olgeta, o oli lego ol samting we oli bilif strong long hem. Be tul ya i no gat paoa long yumi. Yumi save se sipos ol  enemi oli kilim yumi ded, Jehova bambae i mekem yumi laef bakegen. (Rev. 2:10) Yumi bilif strong se eni samting we oli mekem i no save tekemaot yumi long Jehova. (Rom 8:35-39) !Yumi glad tumas we Jehova i givim hop ya blong laef bakegen long yumi! !Hem i waes we i waes! Jehova i yusum tul ya blong kilimdaon paoa blong tul we Setan i stap yusum, mo long semtaem, hop ya i halpem yumi blong no fraet mo gat strong tingting.

16. ?Wanem tufala kwestin we yu mas ansa long hem? ?Olsem wanem ol ansa ya oli save halpem yu blong save sipos yu trastem Jehova o nogat?

¹⁶ Sipos ol enemi blong Jehova oli wantem kilim yu yu ded, ?bambae yu putum laef blong yu long han blong Hem? ?Olsem wanem bambae yu save se yu trastem Hem? Wan rod, hemia blong ansa long kwestin ya: ‘?Evri dei, taem mi mi mekem ol smosmol desisen, mi soemaot se mi trastem Jehova?’ (Luk 16:10) Wan narafala kwestin se: ‘?Fasin blong laef blong mi i soem se mi trastem promes ya blong Jehova, se bambae hem i givim ol samting we mi nidim sipos mi putum Kingdom fastaem?’ (Mat. 6:31-33) Sipos yu ansa yes long tufala kwestin ya, yu yu pruvum se yu trastem Jehova, mo yu rere blong fesem eni samting we bambae i traem yu.—Prov. 3:5, 6.

17. (1) ?Olsem wanem laef bakegen i soemaot longfala tingting blong Jehova? (2) ?Olsem wanem blong soem se yumi glad from longfala tingting blong Jehova?

¹⁷ Jehova i jusumaot finis wan stret dei mo aoa blong finisim rabis wol ya. (Mat. 24:36) Bambae hem i wet mo i no tekem aksen bifo long taem ya. Hem i wantem tumas blong mekem ol dedman oli laef bakegen, be hem i gat longfala tingting. (Job 14:14, 15, NW) Hem i stap wet go kasem stret taem blong hem, blong i save mekem olgeta oli laef bakegen. (Jon 5:28) Yumi gat ol gudfala risen blong glad se Jehova i gat longfala tingting. Traem tingbaot: From we Jehova i gat longfala tingting, plante man oli gat taem blong “tanem tingting blong olgeta,” mo yumi tu. (2 Pita 3:9) Jehova i wantem se plante moa man oli save gat janis ya blong kasem laef we i no save finis. Taswe i gud yumi soem se yumi glad long longfala tingting ya blong hem. ?Yumi soem olsem wanem? Hemia taem yumi wok strong blong faenem ol man we oli “stret blong kasem laef we i no save finis,” mo yumi halpem olgeta blong oli lavem Jehova mo mekem wok blong hem. (Wok 13:48) Olsemia bambae oli save kasem blesing from longfala tingting blong Jehova, olsem yumi.

18. ?From wanem yumi mas soem longfala tingting long ol narafala?

 ¹⁸ Jehova i save se yumi no stret gud olgeta, taswe bambae hem i gat longfala tingting long yumi go kasem en blong 1,000 yia. Go kasem taem ya, Jehova i glad blong fogivim ol sin blong yumi. Taswe, yumi tu yumi mas lukluk ol gudfala fasin blong ol narafala mo soem longfala tingting long olgeta. Tingbaot eksampol blong wan sista we hasban blong hem i no moa kam long ol miting, from we hem i gat sik ya we i stap wari bitim mak. Hem i talem se: “Samting ya i mekem mi harem nogud tumas. Ol plan we mifala i mekem long famle oli foldaon.” Be yet, waef ya i lavem hasban blong hem mo i gat longfala tingting. Hem i dipen long Jehova mo i neva givap. Olsem Jehova, sista ya i no tingbaot problem ya, be i tingbaot ol gudfala samting long saed blong hasban blong hem. Hem i talem se: “Hasban blong mi i gat ol nambawan fasin, mo hem i stap traehad sloslo blong kam gud.” !I impoten tumas we yumi soem longfala tingting long ol narafala long famle mo long kongregesen, we oli stap traehad blong winim ol hadtaem long laef!

19. ?Yumi mas gat strong tingting blong mekem wanem?

¹⁹ Jisas mo ol enjel oli singsingaot from glad taem God i wokem wol. Be traem tingbaot olsem wanem bambae oli glad moa taem wol ya i fulap long ol man we oli stret gud olgeta mo we oli lavem Jehova mo wosipim hem. Traem tingbaot ol man ya we God i tekemaot olgeta long wol, blong oli rul long heven wetem Kraes. Bambae oli glad tumas taem oli luk ol man long wol oli stap kasem blesing from wok blong olgeta. (Rev. 4:4, 9-11; 5:9, 10) Mo traem tingbaot sipos yu laef long taem ya we yu krae from we yu glad, be i no from we yu harem nogud, mo taem ya we sik, sore, mo ded i lus blong olwe. (Rev. 21:4) Be go kasem taem ya, yu mas gat strong tingting blong folem fasin blong Papa blong yu we i gat lav, i waes, mo i gat longfala tingting. Sipos yu mekem olsem, bambae yu glad oltaem nomata wanem samting i kam traem yu. (Jem. 1:2-4) !Yes, yumi glad tumas we Jehova i promes se ol man “bambae oli laef bakegen”!—Wok 24:15.