1. Engkai iciptaken Jahwe malekat ras manusia?

OPE iciptaken Jahwe kerinana, Ia nggeluh sisada. Tapi labo Ia sedih. La perlu Ia ise pe guna erban meriah ukurNa. Adi bage engkai maka dungna iciptakenNa malekat ras manusia? Perban ermeriah ukur ka ateNa kalak e. E buktina maka perkeleng kel Jahwe e.​—Msm. 36:9; 1 Joh. 4:19.

2. Uga nge perasan Jesus bage pe malekat-malekat sanga iciptaken Jahwe kerinana?

² Si pertama si iciptaken Jahwe eme anakNa, Jesus. Kenca si e, radu ras Jesus, iciptaken Jahwe “kerina si debanna,” termasuk kerina malekat. (Kol. 1:16) Meriah kel ukur Jesus erdahin ras Bapakna. (Kua. 8:30) Sanga Jahwe ras Si ErdahinNa eme Jesus nciptaken langit ras doni, kerina malekat-malekat ngidahsa janah meriah ukur kalak e. Kai buktina malekat-malekat e ermeriah ukur? Sanga idah kalak e doni iciptaken, malekat-malekat e “ersurak dem riahna.” Janah terus ka malekat-malekat e ersurak muji Jahwe sanga idahna kerina iciptaken khususna manusia. (Jop 38:7; Kua. 8:31) Arah kerina ciptan e teridah maka Jahwe e perkeleng janah pentar.​—Msm. 104:24; Rom. 1:20.

3. Bagi si ikataken 1 Korinti 15:21, 22, kai manpaat korban tebusen Jesus?

³ Ersura-sura Jahwe gelah manusia banci nggeluh si rasa lalap bas planet si mejile si enggo iciptakenNa. Tapi, sanga erdosa Adam ras Hawa man Bapakna si perkeleng, lanai kalak e banci nggeluh si rasa lalap. (Rom. 5:12) Kai si ilakoken Jahwe? Mis ikatakenNa kai kari si ilakokenNa guna nelamatken manusia. (Kej. 3:15) Ibereken Jahwe me anakNa eme Jesus guna jadi tebusen gelah keturunen Adam ras  Hawa banci bebas arah dosa ras kematen. Kenca si e iberekenNa kegeluhen si rasa lalap man tiap kalak si nggit ngelayani Ia.​—Joh. 3:16; Rom. 6:23; baca 1 Korinti 15:21, 22.

4. Penungkunen kai kari si ibahas bas artikel enda?

⁴ Turah melala penungkunen perban lit janji Dibata kerna kekeken. Contohna, uga nge pagi kekeken e terjadi? Banci denga nge sitandai pagi kalak si ipekeke? Engkai kekeken e banci erban kita ermeriah ukur? Arah kekeken, kai nge si banci sipelajari kerna kekelengen, kepentaren, bage pe kesabaren Jahwe? Mari sibahas kerna si e.

5. Engkai maka sikataken labo mungkin kerina kalak radu ipekeke?

⁵ Erkelangken anakNa, ipekeke Jahwe pagi miliaren kalak. Tapi, mbelin kemungkinenna labo pagi radu ipekeke Jahwe kerina kalak. Engkai? Perban adi rempet pagi enterem kel kalak bas doni enda, banci saja lanai teratur keadanna. Pasti e la mungkin terjadi perban kai pe si ilakoken Jahwe lalap teratur. Iteh Jahwe maka penting kel kerinana teratur gelah manusia banci nggeluh alu dame. (1 Kor. 14:33) Sanga kerja sama Jahwe ras Jesus nciptaken doni enda guna ingan tading manusia pagi, sada-sada iciptakenNa. Arah e teridah maka Jahwe e pentar ras sabar. Icidahken Jesus ka kari kepentaren ras kesabaren sanga kerja sama ia ras kalak si selamat ngelewati Harmagedon guna nikapken doni enda man kalak si ipekeke.

6. Menurut Perbahanen Rasul-Rasul 24:15, ise ka si termasuk si ipekeke Jahwe?

⁶ Kalak si selamat pagi bas Harmagedon ngelakoken tugas si seh kel pentingna.  Perlu iajarina kalak si ipekeke kerna Kerajan Dibata bage pe kerna patoken Jahwe. Engkai? Perban teremen kalak si ipekeke eme “kalak si la benar.” (Baca Perbahanen Rasul-Rasul 24:15.) Arus iban kalak si ipekeke e perubahen gelah banci idatna manpaat arah tebusen Kristus. Ukuri uga buena pagi pendahin guna ngajarken kebenaren kerna Dibata man miliaren kalak si la lit pemetehna kerna Jahwe. Tiap kalak nge pagi siajari bagi carata ngajari kalak erlajar Pustaka gundari? Itugasken nge kalak e ku runggun-runggun janah ilatih guna ngajari kalak si ipekeke si deban? La siteh kerna si e. Tapi si pasti, bas akhir Pemerentahen Seribu Tahun Kristus, “Doni enda dem alu pemeteh kerna [Jahwe].” (Jes. 11:9) Pasti melala kel pendahin si erban meriah ukurta sedekah seribu tahun!

7. Sanga ngajari kalak si ipekeke, engkai maka banci iangkai umat Jahwe perasan kalak e?

⁷ Pasti banci iangkai umat Dibata perasan kalak si ipekeke sanga isampatina kalak e ngelawan sura-sura si salah ras ngikutken patoken Jahwe. Engkai? Perban sedekah pemerentahen seribu tahun, kerina umat Dibata pe arus terus erban perubahen gelah banci erban meriah ukur Jahwe. (1 Pet. 3:8) Idah kalak si ipekeke pagi maka umat Jahwe e tuhu-tuhu meteruk ukur janah terus denga erban perubahen. Emaka nggit kalak si ipekeke e ngelayani Jahwe radu ras umat Jahwe.​—Pil. 2:12.

8. Engkai maka masuk akal adi sikataken banci denga pagi sitandai kalak si ipekeke?

⁸ Lit piga-piga alasen engkai banci sikataken maka sitandai denga nge pagi kalak si ipekeke. Contohna, arah kebangkiten si enggo pernah terjadi mbarenda, siteh maka sanga ipekeke Jahwe sekalak jelma, lalap ibanNa penampilen, cara ngerana, bage pe ingeten kalak e seri bagi ope ia mate. Emaka banci sikataken bage me pagi cara Jahwe mpekeke kalak si mate. Ingetlah maka ipeseri Jesus kalak si mate bali bagi kalak si medem janah kekeken bali bagi ngingeti kalak si medem. (Mat. 9:18, 24; Joh. 11:11-13) Sanga kalak si medem enggo medak, penampilenna, sorana, bage pe ingetenna bali bagi ope ia medem. Cuba ukuri kerna Lasarus. Empat wari dekahna ia enggo mate, emaka dagingna enggo mulai macik. Tapi, sanga ipekeke Jesus ia, mis itandai Maria ras Marta ia janah ia pe itandaina ka kalak e.​—Joh. 11:38-44; 12:1, 2.

9. Engkai maka labo mis pagi sempurna kalak si ipekeke?

⁹ Erjanji Jahwe maka “lanai pagi lit si sakit” bas pemerentahen Kristus. (Jes. 33:24; Rom. 6:7) E ertina kalak si ipekeke enggo sehat pagi dagingna. Tapi, labo mis kalak e jadi sempurna perban adi bage si terjadi, banci saja lanai pagi itandai kalak si ngalo-ngalosa ia. Mbelin kemungkinenna kerina pagi manusia alu manjar-anjar jadi sempurna bas Pemerentahen Seribu Tahun Kristus. Bas akhir seribu tahun, iserahken Jesus me mulihi Kerajan man Bapakna. Paksa si e, enggo ilakoken Kerajan e kerina si isuruh Jahwe, termasuk erban manusia jadi sempurna.​—1 Kor. 15:24-28; Ket. 20:1-3.

10. Uga nge perasanndu sanga terjadi kekeken?

¹⁰ Bayangken uga nge pagi perasanndu sanga ialo-alondu keluargandu ntah pe temanndu  si ipekeke. Tawa ntah ngandung nge kam perban riahna akapndu? Rende nge kam muji Jahwe perban lanai tanggung kapndu riahna? Sada si pasti, pasti keleng kel ateta Bapakta si ermediate bage pe anakNa si perkeleng perban enggo iberekenNa hadiah si luar biasa eme kekeken.

11. Menurut kata-kata Jesus bas Johanes 5:28, 29, pasu-pasu kai pagi si ialoken kalak si patuh man Dibata?

¹¹ Bayangken keriahen ukur si igejapken kalak si ipekeke pagi sanga ibanna perubahen gelah banci patuh man Dibata. Kalak si erban perubahen banci nggeluh si rasa lalap. Tapi, kalak si mberontak man Jahwe la ipediat tetap nggeluh bas Pardis gelah la icedaina perdamen i doni.​—Jes. 65:20; baca Johanes 5:28, 29.

12. Uga pagi Jahwe masu-masu kerina kalak i doni?

¹² Bas pemerentahen Kerajan Dibata, banci igejapken kerina umat Dibata maka tuhu kel si ikataken Kuan-kuanen 10:22, “Erkiteken pasu-pasu Dibata nge maka kalak jadi bayak, erdahin erbintuas labo nambahi kebayaken.” Perban penampat kesah si badia, banci kalak e jadi bayak secara rohani. Maksudna, reh dekahna reh miripna kalak e ras Kristus janah reh dekahna jadi sempurna. (Joh. 13:15-17; Ep. 4:23, 24) Tiap wari reh sehatna kalak e janah reh ulina. Tuhu-tuhu kegeluhen si seh kel riahna! (Jop 33:25) Tapi gundari nari pe banci sidat manpaat adi siukuri kerna arapen kekeken. Kai saja manpaatna?

13. Bagi si ikataken Masmur 139:1-4, uga kekeken mbuktiken maka tuhu-tuhu itandai Jahwe kel kita?

¹³ Bagi si enggo sibahas, sanga terjadi pagi kekeken, iban Jahwe la lit si berubah arah ingeten bage pe arah sipat kalak si ipekeke. Cuba ukuri kai maksudna e. Keleng kel ate Jahwe kam emaka iperdiatekenNa janah ingetNa kerina kai si iukurindu, si igejapkenndu, si ikatakenndu, janah si ilakokenndu. Emaka adi ipekekeNa kam pagi, pasti menukah iakapNa ngulihken ingetenndu, carandu rukur, ras sipat-sipatndu. Ieteh Raja Daud maka tuhu-tuhu itandai Jahwe kel kita sekalak-sekalak. (Baca Masmur 139:1-4.) Kai nge pengaruhna man banta perban siteh maka tuhu-tuhu itandai Jahwe kel kita?

14. Uga arusna perasanta sanga siukuri maka itandai Jahwe kel kita?

¹⁴ Sanga siukuri maka itandai Jahwe kel kita, arusna la kita kuatir. Engkai? Ingetlah maka ermediate kel Jahwe man banta. Meherga kel iakapNa kita sekalak-sekalak. IngetNa kerina kai si enggo mpengaruhi kegeluhenta. IperdiatekenNa kerina si terjadi man banta si mpengaruhi sipat-sipatta. Tuhu-tuhu mpegegehi kel e! Ula pernah siakap kita sisada. Siteh maka katawari pe Jahwe ras kita janah lalap idaramiNa kesempaten guna nampati kita.​—2 Kro. 16:9.

15. Engkai kekeken mbuktiken Jahwe e pentar?

¹⁵ Mbiar kel kalak mate, emaka iban kalak kematen e jadi senjata guna mpebiar-biar kalak. Kalak si ikuasai Setan nggunaken kebiaren e guna maksa kalak si deban nghianati temanna ntah pe ngelakoken kai si salah. Tapi, la banci igunakenna senjata e guna ngelawan kita. Siteh maka adi ibunuh musuh-musuhta kita, pasti ipekeke Jahwe kita. (Ket. 2:10) Tek kita maka la lit kai pe si banci ilakoken kalak e guna mpengadi kita ngelayani Jahwe. (Rom. 8:35-39) Jelas me maka arapen kekeken e mbuktiken Jahwe e seh kel  pentarna. Perban lit arapen kekeken, iban Jahwe me lanai erguna salah sada senjata Setan si megegehna. Arapen e erban kita pang ngadapi tentangen kai pe.

16. Penungkunen kai nge si banci iukurindu? Janah uga jawapen arah penungkunen e banci nampati kam meteh uga belinna kinitekenndu man Jahwe?

¹⁶ Adi kalak si segat atena Jahwe ngataken maka ibunuhna atena kam, tek nge kam maka pasti ipekeke Jahwe kam? Ja nari banci itehndu maka pasti kam tek? Salah sada carana eme sungkunilah bandu, ‘Teridah nge aku tek man Jahwe arah keputusen-keputusen si kitik si kuban tiap wari?’ (Luk. 16:10) Ntah, ‘Arah caraku nggunaken waktu ras sen, kubuktiken nge maka aku tek man janji Jahwe guna ncukupi keperlunku adi kupelebe Kerajan Dibata?’ (Mat. 6:31-33) Adi ue jawapenndu man penungkunen-penungkunen e, enggo terbukti tek kam man Jahwe, janah enggo ersikap kam guna ngadapi ancamen si reh pagi.​—Kua. 3:5, 6.

17. (a) Uga kesabaren Jahwe teridah arah kekeken? (b) Uga carata ngergai kesabaren Jahwe?

¹⁷ Enggo itetapken Jahwe waktuna ndigan kari ikernepkenNa doni si jahat enda. (Mat. 24:36) Jahwe pasti sabar janah labo kari ikernepkenNa adi lenga seh waktuna. Merhat kel Ia mpekeke kalak si enggo mate, tapi tetap Ia sabar. (Jop 14:14, 15) ItimaiNa waktu si tepat guna mpekeke kalak e. (Joh. 5:28) Melala alasenta ngataken bujur man Jahwe perban Ia enggo sabar. Cuba ukuri enda, perban Jahwe sabar lit kesempaten man enterem kalak, termasuk kita banci “ertobat.” (2 Pet. 3:9) Jahwe ersura-sura gelah enterem kel min kalak ndatken kegeluhen si rasa lalap. Emaka siergai min kesabaren Jahwe e. Uga carana? Semangatlah kita ndarami kalak si “pusuh ras perbahanenna ngaloken kebenaren guna kegeluhen si rasa lalap” janah sisampati kalak e ngkelengi Jahwe ras ngelayani Ia. (Perb. 13:48) Alu bage, kalak e pe banci igejapkenna manpaat kesabaren Jahwe e.

18. Engkai maka kita arus sabar man kalak si deban?

¹⁸ Sabar Jahwe nimai akhir seribu tahun seh ngasa kita jadi sempurna. Nggit Jahwe terus ngampuni dosa-dosata. Emaka arus siusih Jahwe, sidaramilah sipat-sipat si mehuli bas kalak si deban janah sabar  kita man kalak e. Cuba perdiateken kai si terjadi man sekalak turang seninata. Bas sada paksa, sakit perbulangenna si erbanca katawari pe kuatir kel perbulangenna e, janah lanai reh ku perpulungen. Nina turang seninata e, “Getem kel pusuhku perban si e. Rempet berubah kegeluhen kami, janah lanai banci ilakoken kami kerina si ate kami ilakoken kami.” Tapi ndehara si perkeleng enda sabar man perbulangenna. Iandalkenna Jahwe janah la pernah ia nyerah. Bagi Jahwe, terus iukurina kai si mehuli kerna perbulangenna e. Nina, “Luar biasa kel kuakap sipat-sipat perbulangenku e, janah iusahakenna asa ngasupna gelah banci iatasina perasan kuatirna.” Seh kel pentingna kita sabar man keluargata ntah pe man turang seninata si iusahakenna ngatasi masalahna si mberat!

19. Kai arusna si jadi tekadta?

¹⁹ Meriah kel ukur Jesus ras malekat-malekat sanga doni iciptaken. Tapi, reh riahna ukurna sanga idahna doni enda dem alu manusia si sempurna si ngkelengi ras si ngelayani Jahwe. Bayangken ka uga riahna iakap kalak si merentah pagi ras Kristus i surga sanga idahna kai si enggo ilakokenna erguna kel man manusia. (Ket. 4:4, 9-11; 5:9, 10) Bayangken lanai pagi lit iluh mambur perban ceda ate tapi iluh mambur perban riahna ukur. Bayangken lanai pagi lit pinakit, ceda ate, ras kematen. (Ket. 21:4) Emaka teruslah kita ertekad ngusih Bapakta si perkeleng, pentar, ras sabar. Adi usihndu Ia, pasti tetap kam ermeriah ukur la soal tentangen kai pe si iadapindu. (Jak. 1:2-4) Ngata bujur kel kita man Jahwe perban enggo ijanjikenNa “lit kekeken i bas si mate nari”!​—Perb. 24:15.