1. Porque si Jehova ya dale vida con otro?

DEL antes, solo-solo lang si Jehova pero gendeh le triste. Gendeh le necesita maskin con quien para queda alegre. Maskin pa ansina, quierre si Jehova que vivi y queda alegre el otro. Por causa na de suyu amor, ya principia crea si Jehova.​—Sal. 36:9; 1 Juan 4:19.

2. Cosa ya sinti si Jesus y el maga angel cuando ya crea si Jehova con el todo las cosas?

² Una, ya crea si Jehova con el de suyu Anak, si Jesus. Despues, por medio na este primer Anak ele, “ya hace todo el maga cosa-cosa” incluido ya el millones de maga inteligente espiritu creatura. (Col. 1:16) Bien alegre trabaja si Jesus junto con el de suyu Tata. (Prov. 8:30) Bien alegre tambien el maga angel cay ya puede sila mismo mira cuando si Jehova y el Buen Trabajador, si Jesus, ya hace con el cielo y con el tierra. Cosa ya hace el maga angel? “Ya principia [sila] alaba suena con ele” cuando ya forma con el tierra y asigurao que ya continua sila alaba mientras uno-uno ya crea si Jehova con el de suyu maga creacion, especialmente cuando ya crea le con el maga gente. (Job 38:7; Prov. 8:31, ftn.) El cada uno de este maga creacion ta revela con el amor y sabeduria de Jehova.​—Sal. 104:24; Roma 1:20.

3. Como cosa ya menciona na 1 Corinto 15:21, 22, cosa ya puede hace posible el rescate de Jesus?

³ Quierre si Jehova que vivi hasta para cuando el maga  gente na bonito planeta que ya crea le. Pero cuando ya comete pecado kanda Adan y Eva contra con el diila amable Tata, sila y el diila maga anak, gendeh mas puede vivi hasta para cuando. (Roma 5:12) Cosa ya hace si Jehova? Ya habla le dayun si paquemodo le salva con el maga gente. (Gen. 3:15) Hay dale si Jehova un rescate para puede libra con el maga anak de Adan y Eva na pecado y muerte. Na ese manera, puede Le dale vida hasta para cuando con el maga gente quien iscuji sirvi con Ele.​—Juan 3:16; Roma 6:23; le con el 1 Corinto 15:21, 22.

4. Cosa maga pregunta kita considera na este articulo?

⁴ Manada kita maga pregunta acerca na promesa del Dios de resureccion. Por ejemplo, paquemodo este posible sucede? Hay conoce ba kita con el diaton maga familia, amigo y amiga quien hay vivi otravez? Na cosa manera dale kanaton alegria el resureccion? Y na cosa manera mas aprecia kita con el amor, sabeduria y paciencia de Jehova si medita kita acerca na resureccion? Considera kita con el cada uno de ese maga pregunta.

5. Porque kita puede expecta que gendeh hay resucita con el maga gente na un tiempo lang?

⁵ Cuando hay hace vivi otravez si Jehova con el millones de maga gente por medio na de suyu Anak, puede kita expecta que gendeh kanila hace vivi otravez na un tiempo lang. Porque? Cay si bigla lang tiene bien manada gente, grande el posibilidad que hay queda trambulicao el tierra. Y si Jehova gendeh ta hace maga cosas na gendeh organizao manera. Sabe le que para tiene paz, necesita hace con el maga cosas na arreglao manera. (1 Cor. 14:33) Sabio y paciencioso si Dios Jehova cuando ya trabaja le junto con Jesus  para hinay-hinay prepara con el tierra antes crea con el maga gente. Hay queda tambien sabio y paciencioso si Jesus durante el Un Mil Año Rulanza cuando hay trabaja le junto con aquellos quien hay salva na Armagedon mientras prepara sila con el tierra para con aquellos quien hay resucita.

6. Asegun na Maga Actividad 24:15, quien el incluido na resureccion?

⁶ Aquellos quien hay salva na Armagedon necesita tambien enseña con aquellos quien hay resucita acerca na Reino del Dios y acerca na maga mandamiento de Jehova. Porque? Cay “maga pecador” o gendeh recto el mayoria de aquellos quien hay vivi otravez. (Le con el Maga Actividad 24:15.) Necesita sila hace manada cambio para beneficia na rescate del Cristo. Pensa si paquemodo de grande el trabajo que necesita hace para enseña el verdad acerca con Dios con el millones de maga gente quien nuay cosa sabe acerca con Jehova. Uno-uno ba enseña con el maga gente, igual si paquemodo ta conduci kita maga Bible study ahora? Pone ba tambien kanila na maga congregacion y man train kanila si paquemodo enseña con aquellos con quien hay resucita tambien? No sabe pa kita ahora. Pero sabe kita que na fin del Un Mil Año Rulanza del Cristo, “el tierra hay llena na saber de Jehova.” (Isa. 11:9) Asigurao que alegre kita y manada cosa hace durante ese tiempo!

7. Porque hay tiene empatia el maga siervo del Dios mientras ta enseña con aquellos quien hay resucita?

⁷ Durante el Un Mil Año Rulanza del Cristo, el todo maga anak de Jehova aqui na tierra necesita continua hace maga cambio para hace alegre con ele. Poreso, todo sila hay tiene empatia mientras ta ayuda con aquellos quien hay resucita para quita con el diila maga gendeh justo tendencia y para vivi asegun na principio de Jehova. (1 Ped. 3:8) Asigurao que aquellos quien hay vivi otravez hay puede mira con el maga humilde siervo de Jehova quien ta ‘continua trabaja para el diila salvacion’ y hay man junto sila kanila para sirvi con Jehova.​—Fil. 2:12.

8. Porque kita puede habla que puede kita conoce con el diaton familia, amigo y amiga si resucita kanila?

⁸ Tiene manada razon si porque kita puede habla que puede kita conoce con el diaton maga familia, amigo y amiga si resucita kanila. Por ejemplo, base na maga resureccion que ya sucede de antes, puede kita expecta que si crea otravez si Jehova con el maga gente, igual siempre el diila ichura, converzada y manera si paquemodo sila ta pensa antes sila muri. Acorda que ya compara si Jesus con el muerte na durmida y con el resureccion na dispiertada. (Mat. 9:18, 24; Juan 11:11-13) Si ta dispierta el maga gente, igual siempre el diila ichura, voz y memoria cuando ya durmi sila. Considera con el ejemplo de Lazaro. Cuatro dia ya le muerto poreso ya principia ya man buluk el de suyu cuerpo. Pero, cuando ya resucita con ele si Jesus, ya conoce dayun con ele el de suyu maga hermana y asigurao que ya acorda tambien kanila si Lazaro.​—Juan 11:38-44; 12:1, 2.

9. Porque gendeh dayun perfecto aquellos con quien hay resucita?

⁹ Ya promete si Jehova que na Paraiso, nuay mas quien habla: “Enfermo yo.” (Isa. 33:24; Roma 6:7) Poreso, tiene buen salud aquellos quien hay resucita. Pero, gendeh sila dayun queda perfecto. Cay si ansina, baka gendeh kanila conoce el diila familia, amigo y amiga. Hinay-hinay queda perfecto el maga gente durante el Un Mil Año Rulanza del Cristo. Hay debolbe si Jesus con el Reino na de suyu  Tata na fin del un mil año. Llega ese tiempo, ya cumpli ya el Reino con el todo cosa quierre si Jehova y perfecto ya tambien el maga gente.​—1 Cor. 15:24-28; Rev. 20:1-3.

10. Cosa el efecto del resureccion contigo?

¹⁰ Imagina si cosa tu sinti si puede tu mira otravez con aquellos quien ya muri. Hay re ba tu o llura na alegria? Hay canta ba tu alabanza con Jehova? Un cosa el asigurao, hay queda gayot hondo el de tuyu amor para con el de tuyu amable Tata y con el de suyu Anak cay ya hace sila posible con el regalo de resureccion.

11. Asegun na palabra de Jesus na Juan 5:28, 29, cosa sucede con aquellos quien vivi harmonia na maga principio del Dios?

¹¹ Imagina el alegria de aquellos quien hay resucita mientras quita sila con el diila daan personalidad y vivi asegun na maga principio del Dios. Aquellos quien hace ese maga cambio hay vivi hasta para cuando na Paraiso. Pero gendeh permiti con aquellos quien tan rebelde con Dios que esta na Paraiso y quita con el paz alla.​—Isa. 65:20; le con el Juan 5:28, 29.

12. Cosa el maga bendicion de aquellos quien esta na tierra?

¹² Bajo na rulanza del Reino, el todo maga siervo del Dios hay puede gayot mira que deverasan el cosa ya habla na Proverbio 10:22: “El bendicion de Jehova amo el ta hace rico con el un persona y gendeh Le omenta dolor con ese.” Na ayuda del espiritu de Jehova, el maga siervo del Dios hinay-hinay queda igual con el Cristo y queda perfecto. (Juan 13:15-17; Ef. 4:23, 24) Hay queda tambien sila mafuerza cada dia. Asigurao que queda gayot sila alegre na ese tiempo! (Job 33:25) Pero, cosa el beneficio si medita tu acerca con el resureccion ahora?

13. Harmonia na Salmo 139:1-4, na cosa manera el resureccion ta dale mira que bien conoce kanaton si Jehova?

¹³ Como cosa kita ya discuti enante, si resucita si Jehova con el maga gente, hay hace tambien le bira con el diila memoria y personalidad. Pensa si cosa este quierre decir. Ta ama gayot contigo si Jehova. Y gane, ta nota le y ta acorda con el todo cosa tu ta pensa, ta sinti, ta habla y ta hace. Poreso si resucita le contigo, bien facil lang para con ele que hace bira otravez con el de tuyu memoria, custumbre y personalidad. Sabe si Rey David si paquemodo de interesao si Jehova con el cada uno kanaton. (Le con el Salmo 139:1-4.) Ciendo sabe kita que bien conoce kanaton si Jehova, cosa el efecto de este kanaton ahora?

14. Cosa debe el efecto kanaton si medita kita si paquemodo de conoce kanaton si Jehova?

¹⁴ Si medita kita si paquemodo de conoce kanaton si Jehova, gendeh kita debe man lingasa. Porque? Acorda que ta ama gayot kanaton si Jehova. Precioso con ele el cada uno kanaton. Ta nota le con el todo cosa ta sucede na diaton vida. Ta dale este kanaton asiguranza que gendeh kita solo. Pirmi kanaton junto si Jehova y ta busca le oportunidad para ayuda kanaton.​—2 Cron. 16:9.

15. Na cosa manera el resureccion ta dale mira que sabio si Jehova?

¹⁵ El maga gente ta usa con el amenazo de muerte para hace miedo con otro. Aquellos quien bajo na control de Satanas ta usa con este para forza con el maga gente que traiciona con el diila maga amigo o hace el un cosa que sabe sila que gendeh justo. Pero gendeh se efectivo kanaton. Sabe kita que si mata kanaton el diaton maga enemigo, hay hace kanaton vivi otravez si Jehova. (Rev. 2:10) Convincido kita que nuay sila cosa puede hace  que puede quita con el diaton buen amistad con Jehova. (Roma 8:35-39) Ya dale mira si Jehova que bien sabio le cay ya dale le kanaton el esperanza de resureccion. Por causa con este, gendeh kita ta tiene miedo que mata kanaton aquellos quien bajo na control de Satanas. Ta dale tambien este kanaton coraje para esta leal con Jehova.

16. Cosa tu necesita pregunta na de tuyu mismo cuerpo, y na cosa manera el maga contestacion de este puede manda sabe contigo si paquemodo de grande el de tuyu confianza con Jehova?

¹⁶ Si amenaza el maga enemigo de Jehova que mata sila contigo, hay confia ba tu que resucita le contigo? Paquemodo tu sabe que hay confia tu con ele na ese tiempo? El un manera amo si pregunta tu con el de tuyu mismo cuerpo, ‘El maga diutay decision ba que ta hace yo cada dia ta dale mira que ta confia yo con Jehova?’ (Luc. 16:10) El otro pregunta amo, ‘El de mio manera de vida ba ta dale mira que ta confia yo con el promesa de Jehova que dale le con el de mio material necesidad si hace yo una con el de suyu Reino?’ (Mat. 6:31-33) Si positivo el de tuyu contestacion na ese maga pregunta, ta dale tu mira que ta confia tu con Jehova y preparao tu na maskin cosa probanza na futuro.​—Prov. 3:5, 6.

17. (a) Na cosa manera ta dale mira el resureccion que paciencioso si Jehova? (b) Paquemodo kita dale mira que ta aprecia kita con el paciencia de Jehova?

¹⁷ Ya decidi ya si Jehova si cuando le destroza con este daan sistema. (Mat. 24:36) Gendeh perde el de suyu paciencia y actua antes de ese tiempo. Bien quierre le resucita con el maga muerto pero paciencioso le. (Job 14:14, 15) Ta espera le con el justo tiempo para hace vivi kanila otravez. (Juan 5:28) Tiene maga buen razon si porque debe kita aprecia con el paciencia de Jehova. Pensa este: Por causa na paciencia de Jehova, manada gente, incluido ya kita el tiene pa tiempo para “arripinti.” (2 Ped. 3:9) Quierre si Jehova que mas manada gente el tiene oportunidad para vivi hasta para cuando. Poreso, dale kita mira que ta aprecia kita con el de suyu paciencia. Paquemodo? Puede kita hace con este si hace kita el todo para busca con aquellos quien “tiene justo condicion de corazon para obtene vida eterna” y ayuda kanila ama y sirvi con Jehova. (Act. 13:48, NWT) Como resulta, hay beneficia tambien sila na paciencia de Jehova igual kanaton.

18. Porque kita debe queda paciencioso con otro?

¹⁸ Si Jehova con paciencia espera hasta na  fin del un mil año antes le expecta que queda kita perfecto. Mientras nuay pa ese tiempo, si Jehova ta perdona con el diaton maga pecado. Poreso, debe kita sigui con el de suyu ejemplo y man focus na maga buen calidad del otro y queda paciencioso kanila. Considera con el ejemplo del un hermana que el marido ta experiencia sobra lingasa y gendeh mas ta atende na maga miting. “Bien duele este para conmigo,” ya habla le. “Ya cambia lang dayun el diamon vida y gendeh mas kame puede hace con el diamon maga plano para na futuro.” Pero maskin pa ansina, este amable mujer ya continua dale mira paciencia con el de suyu marido. Ya confia le con Jehova y ya continua aguanta. Igual con Jehova, nuay le man focus na problema sino na maga buen cosas acerca na de suyu marido. Ele ya habla, “El de mio marido tiene maga buen calidad y ta hace le el todo para hinay-hinay queda bueno.” Bien importante que queda kita paciencioso con aquellos miembro del diaton familia o na congregacion quien ta experiencia maga dificultad.

19. Cosa kita debe determinao hace?

¹⁹ Alegre si Jesus y el maga angel cuando ya crea con el tierra. Pero imagina si paquemodo sila de alegre si mira sila con el tierra que lleno de maga perfecto gente quien ta ama y ta sirvi con Jehova. Imagina si paquemodo de alegre aquellos quien ta rula junto con el Cristo na cielo si ta mira sila con el maga gente que ta beneficia na diila rulanza. (Rev. 4:4, 9-11; 5:9, 10) Y imagina que el maga gente ta llura por causa na alegria y gendeh por causa del dolor cay nuay mas enfermedad y muerte. (Rev. 21:4) Mientras nuay pa se tiempo, queda determinao que imita con el de tuyu amable, sabio y paciencioso Tata. Si hace tu se, hay esta tu alegre maskin cosa probanza pa tu ta enfrenta. (Sant. 1:2-4) Ta rindi gayot kita gracias con Jehova cay ya promete le kanaton que “el maga gente . . . ay resucita”!​—Act. 24:15.