1. Ngu kutxani Jehovha a di vangile silo si si hanyako?

JEHOVHA a zumbile mbimo yi tala a di ekha. Kambe a si pfi txiwunda, nem a si txhotelwi ngu txilo. Hambi keto, aku Jehovha a ku ni lirando, a tsakela to vamwani ve tidila ngu wutomi, se a khatile kuvanga silo.—Mas. 36:9; 1 Joh. 4:19.

2. Jesu ni tingelezi va ti pfisile kutxani mbimo yi Jehovha a nga vanga silo?

² Kukhata Jehovha a vangile mwanana wakwe Jesu. Se ngu kuthumisa mwanana wakwe Jesu ene ‘a vangile sotshe simaha’ kupata ni timiliyoni ta tingelozi. (Vakl. 1:16) Jesu a ti tsaka ngu kuthuma kumweko ni Tate wakwe. (Mav. 8:30) Tingelozi ni tona ti tsakile ngu kuwona mithumo ya Txizimu. Ngu tona to khatha kuwona mbimo yi Jehovha ni Jesu va nga vanga nzuma ni mafu. Tingelozi ti ti pfisile kutxani? Tona ti tsakile ngutu, se ti to ‘patana ti embelela’ mbimo yi ku nga ti vangwa mafu, ni ku ti simamile ti embelela mbimo yi Jehovha a nga vanga silo simwani, kupata ni txivangwa txo xamalisa, i ku m’thu. (Jobe 38:7; Mav. 8:31) Txivangwa tximwani ni tximwani txi kombisa to Jehovha a ni lirando ni ni wutxhari.—Mas. 104:24; Var. 1:20.

3. Ngu kuya ngu 1 Vakorinto 15:21, 22, ngu yihi wuyelo yi yi tiswako ngu digandelo da Jesu?

³ Jehovha a ti lava to vathu ve hanya ngu ha ku si ngumiko ka mafu o tshura aya a nga ma vanga. Kambe Adhamu ni Evha va onhile se txionho ni lifo si wulete ha mafuni. (Var. 5:12) Se  Jehovha a mahile txani? Ngu txikuluveta, Jehovha a wombile nzila yi a ndi no hulukisa ngu yona vathu. (Gen. 3:15) Jehovha a ndi na ningela mwanana wakwe ti to e hulukisa vanana va Adhamu ka txionho ni lifo. Se m’thu ni m’thu a ndi nava ni lungelo yo tisawulela kuthumela Jehovha ti to e mana wutomi wo mbi guma.—Joh. 3:16; Var. 6:23; lera 1 Vakorinto 15:21, 22.

4. Ngu sihi siwotiso asi hi no bhula ngu sona ka gondo yiya?

⁴ Txithembiso txa Jehovha txo wusa vakufa txi guleta siwotiso so tala. Ngu txikombiso hi nga ti wotisa tiya: Ku na mahekisa kutxani kuwuka ka vakufa? Ina hi na ta maziva maxaka yathu aya ma no wuka ka vakufa? Ngu tihi ti ti no ta hi tsakisa ka kuwuka ka vafi? Kualakanyisisa ngu kuwuka ka vafi ti hi vhunisa kutxani kubonga lirando, wutxhari ni kutimisela ka Jehovha? He bhuleni ngu siwotiso soneso.

5. Ngu kutxani hi txi kholwa ti to ava va nga fa kha va na mbi ta wuswa ngu mbimo ya yimweyo?

⁵ Jehovha a na thumisa mwanana wakwe ti to e wusa vathu paradhesini. Kambe ti woneka nga vakufa kha va na mbi ta wuswa ngu mbimo yimweyo. Ngu kutxani? Nguko ngako vakufa va txo ta wuswa votshe ngu mbimo yimweyo ku nga ta va pfilu-pfilu ya hombe. Kuve Jehovha kha mahi to maha ngu nzila ya vhilinganya. Ene wa tiziva to ti to kuva ni kudikha tomaha ti fanete kumahwa ngu nzila yo khaleka. (1 Vak. 14:33) Jehovha Txizimu a kombisile wutxhari mbimo yi a nga ti thumisana ni Jesu, va txi vanga mafu kudotho-kudotho na va si se vanga m’thu. Jesu a na ta maha ti ti fanako mbimo yi a no tava a txi thumisana ni va va no ta huluka ka Armagedhoni va txi lulamisela mafu kasi ku ta amukela  ava va no wuswa ka vakufa ti to ve ta hanya ka Mfumo wakwe wa 1.000 wa malembe.

6. Ngu kuya ngu Mithumo 24:15, hahanze ka vo lulama mba mani vamwani vo na wuswa?

⁶ Ku ni mthumo wa lisima awu wu no ta mahwa ngu va va no ta huluka ka Armagedhoni, i ku ku ta gondisa ava va no wuswa, mayelano ni Mfumo wa Txizimu ni milayo ya txona yo guleka. Ngu kutxani ava va no wuswa ti txi lava ve ta gondiswa? Nguko wungi wa va va no ta wuswa va lumba mtxhawa wa va “vo mbi lulama.” (Lera Mithumo 24:15.) Se ti na ta lava ve maha kutxitxa ka hombe ti to ve wuyelwa ngu digandelo da Jesu. Alakanya ngu mthumo wu wuno ta vaho wo gondisa timiliyoni ta vathu ava va no ta wuswa ti to ve ziva Jehovha. Ina m’thu ni m’thu a na ta tsimbitiselwa gondo nga ti ti mahekisako tona nyamsi? Ina vathu va va no wuswa va na ta ya mitshanganoni ti to ve ya gonda ti to ve ta gondisa ava va no wuswa msana kwakwe? Hi na ta ti wona ngu mbimo ya kona. Ati hi ti zivako ngu ti to ngu magwito ka Mfumo wa Kristu wa 1.000 wa malembe “mafu ma na tala ngu kuziva MKOMA.” (Isaya 11:9) Ngu mbimo ya Mfumo wa Kristu hi na ta va ni mthumo wa wungi, kambe wu na tava wu txi tsakisa ngutu!

7. Ngu kutxani vathu va Jehovha ti no ta lava ve kombisa wumbilu va txi gondisa va va no wuswa?

⁷ Ngu mbimo ya Mfumo wa Kristu wa 1.000 wa malembe otshe malanda a Jehovha ti na lava me simama me maha kutxitxa ti to me tsakisa Jehovha. Se ngu toneto votshe ti na lava ve kombisa wumbilu mbimo yi va gondisako ava va no wuswa nguko va tiziva ti to ti lava mizamo ya hombe kasi kuxula minavelo yo biha ti to ve tsakisa Jehovha. (1 Pedro 3:8) Ava va no ta wuswa va na ta etetela malanda a Jehovha o tiveka hahatshi ava ni vo na tava vatxi ‘thumela kuhanyiswa kwakwe.’—Vaf. 2:12.

8. Nji txani txikombisako ti to hi na ta ma ziva maxaka athu ya ma no wuswa ka vakufa?

⁸ Hi ni sivangelo so tala so kholwa ti to hi na ta ma ziva maxaka athu ni vangana vathu ava va no wuswa. Ka mbimo yi yi nga pinda Jehovha a wusile vathu nga ti va nga ti ngu tona va si se fa. Se ti woneka nga ka mbimo yi yi tako ene a ta mahisa toneto, a na ta wusa ni mazumbelo, mawomba-wombelo ni mapimisela ya va nga ti navo va si se fa. Khumbula to Jesu a fananisila kufa ni kuwotela, se kuwuswa ka vafi kufana ni kuwuka kuwotelani. (Mat. 9:18, 24; Joh. 11:11-13) M’thu a txi wuswa kuwotelani kha txitxi mazumbelo ni mapimiselo ya a nga ti navo asi se kuwotela. Lazaru a hetile 4 wa masiku a di fite, se mmidi wakwe wu di khatile kusina. Hambiketo, mbimo a nga wuswa tindiyakwe ti mu zivile, nene a va zivile.—Joh. 11:38-44; 12:1, 2.

9. Ngu txani ava va no wuswa va no mbi tekela ku va vo hetiseka?

⁹ Jehovha a thembisile ti to ka Mfumo wakwe awalo awu a no ta khene “na lwala.” (Isaya 33:24; Var. 6:7) Ngu toneto, ava va no wuswa va na wuka va di ni dihanyo da dinene. Hambiketo, kha va na mbi wuka ve tekela kuhetiseka. Nguko, va txo wuka va di hetisekile ku ti lava hi nga ta va timelela. Ti woneka nga votshe va na txitxa kudotho kudotho ve va vo hetiseka ka mbimo ya Mfumo wa Kristu wa 1.000 wa malembe. Se ku di gumile 1.000 wa malembe ngu kona Jesu a no tshumeta Mfumo ka Tate wakwe. Ngu mbimo yoneyo, Mfumo wu na tava wu hetisisile mthumo wa wona wu patako kuvhuna vathu ve va vo hetiseka.—1 Vak. 15:24-28; Mtu. 20:1-3.

10. U na ti pfisa kutxani mbimo ku no wuswa vakufa?

¹⁰ Alakanya litsako li u no tava nalo u txi amukela maxako ako ya ma nga ti fite. Ina litsako li u no tava nalo li na kumaha u sinya mwendo u peka mikulungwani? Ina u na embelela u bona Jehovha? Phela, kuwuka ka vakufa i kateko ya hombe yo ta ngu ka Jehovha Tate wathu wa lirando, se tsaniseka ti to yi na ta kumaha u engetela lirando ali u ku nalo ngu ngene ni Jesu.

11. Ngu kuya ngu mapswi a Jesu aya ma ku ka Johani 5:28, 29 ku na maheka txani ngu va va no engisa milayo ya Jehovha?

¹¹ Ava va no ta wuswa na ta txitxa mahanyelo awe a kale kudotho-kudotho ve londisela milayo ya Jehovha yo lulama. Alakanya litsako li va no ta li mana ngu toneto! Evo ngu va va no ta tumelelwa kuhanya ngu ha kusigumiko. Kambe, ava no wukela Txizimu va na mbi tumelelwa kuhanya ngu ha ku si gumiko ti to va si khulumeteli kudikha Paradhiseni.—Isaya 65:20; lera Johani 5:28, 29.

12. Ngu yahi makatekwa aya Jehovha a no ta ninga vathu ha mafuni?

¹² Ngu mbimo yoneyo vathu va Txizimu va na tapfa kuhetisa ka mapswi ma ku ka Mavingu 10:22 aya ma ku: “Txikatekiso txa MKOMA ngu txona txi ningako thomba ka m’thu kambe ene kha ku engetela txilo [txo panda, NM].” Ngu kuvhunwa ngu moya wo sawuleka va na mu ziva kwati Jehovha ni kutekelela Jesu Kristu ve za ve va vo hetisaka. (Joh. 13:15-17; Vaef. 4:23, 24) Ditshiku ni ditshiku mimidi yawe yi na taya yi maha ya yiphya ni ku va ni dihanyo da dinene. Wutomi wu na tsakisa ngutu ta tinene! (Jobe 33:25) Ina kualakanyisisa ku kuwuswa ka vafi ti nga hi vhuna konakuwa?

13. Ngu kuya ngu Masalmo 139:1-4 kuwuka ka vakufa ti na kombisisa kutxani ti to Jehovha wa hi ziva kwati?

¹³ Nga ha hi nga ti wona ngu kona, mbimo yi Jehovha a no ta wusa vathu, a na ta va wusa ve zumbisa ti va nga ti ka tona va si se fa. Hi nga wona kutsakisa ka tona. Jehovha wa kuranda ngutu ha ko za e vekisa nzila yi u pimisako ngu yona, nzila yi u ti pfisako tona, ati u womba-wombisako tona ni ti u mahisako tona to maha. Ngako u txo fa, Jehovha a nge tandeki kukuwusa ni mialakanyo, mapimiselo ni ti u nga zumbisa tona. Mkoma Dhavhidha a txi ti ziva ti to Jehovha wa khatala ngu mmwani ni mmwani wathu. (Lera Masalmo 139:1-4.) Hi ti pfisa kutxani ngu kuziva ti to Jehovha wa hi ziva kwati?

14. Hi ti pfisa kutsani ngu kuziva ti to Jehovha wa khatala ngu ngathu?

¹⁴ Ngako mbimo yotshe hi txi zumba hi txi alakanya ti to Jehovha wa hi ziva kwati hi na mbi karateka. Ngu kutxani? Nguko mbimo yotshe Jehovha wa hi khatelela. Ene a wona mmwani ni mmwani kwathu i di wa lisima kwakwe. Kuziva toneto ta hi thavelela, ngu toneto hi nga karatekeni ngu txilo. Ditshiku ni ditshiku Jehovha a hafuhi ni nathu ene a lava tinzila to hi vhuna.—2 Mak. 16:9.

15. Themba ya kuwuswa ka vakufa yi hi vhunisa kutxani?

¹⁵ Ngako m’thu a txi thava ngutu kufa ta hehuka kudhukiselwa ngu vamwani. Sathani a thumisa vathu ti to ve dhukisela ava va thavako kufa ve ningela vangana vawe mwendo ve maha timhaka ti va tizivako ti to ti bihile. Athu va nge hi dhukiseli ngu ti to va na hi daya, nguko ha ti ziva ti to hambi valala vathu va txi hi daya Jehovha a na hi wusa. (Mtu. 2:10) Athu a ti ziva ti to kha txi nga ho  txi nga mahako Jehovha e hi divala. (Var. 8:35-39) Ha ti wona ti to ngu ditshuri Jehovha a na ni wutxhari ngu ku hi thembisa kuwusa vakufa! A ku hi ku ni themba yiya, a ti Sathani a ti mahako to hi dhukisela o vitwa mahala, ni ku yona yi hi ninga txibindi txo simama hi di thembekile.

16. Ngu sihi siwotiso si u fanelako ku ti wotisa, xamulo ya kona yi na kuvhuna kupfisisa txani?

¹⁶ Ngako valala va txi ku dhukisela ngu ku va lava kukudaya, ina wa themba ti to Jehovha a na ta kuwusa? U nga ti zivisa kutxani ti to ngu ditshuri wa mthemba Jehovha? Ti wotise tiya: ‘Ina sisungo si ni si mahako ditshiku ni ditshiku hambi i di sa sidotho sa kombisa ti to na m’themba Jehovha?’ (Luka 16:10) ‘Ina mahanyelo angu ma komba ti to na themba ti to Jehovha a na ni khatelela ngako ni txi thangetisa Mfumo?’ (Mat. 6:31-33) Ngako xamulo yako ya siwotiso soneso i di ina, ti ha kubasani ti to wa mu themba Jehovha, ni ku u ti emisete ku ta wonisana ni sikarato sa mbimo yi yi tako.—Mav. 3:5, 6.

17. a) Hi ti zivisa kutxani ti to Jehovha wa timisela ka mhaka ya kuwuswa ka vafi? b)  Hi nga kombisisa kutxani kubonga kutimisela ka Jehovha?

¹⁷ Jehovha a vekile ditshiku ni mbimo yi a no ta lovisa mafu yawa a Sathani. (Mat. 24:36) Ene kha na mbi karala ngu kutimisela e za e tisa magwito yi si se hoka mbimo ya kona. Jehovha wa ti xuva kuwusa vakufa, hambiketo wa timisela. (Jobe 14:14, 15) Ene a na rinzela kala yi hoka mbimo ya kona yo va wusa. (Joh. 5:28) Hi ni sivangelo so bonga aku Jehovha a timiselako. Phela i si nga ku Jehovha a timiselako, vathu vo tala kupata ni nathu, hi sa mana mkhanjo wo “hunduluka.” (2 Pedro 3:9) Jehovha a navela ti to votshe vathu ve mana wutomi wo mba na magwito. Se hi nga kombisisa kutxani kubonga kutimisela ka Jehovha? Ngu ku maha totshe ti hi nga tikotako ti to hi vhuna votshe va va ku “ni fanelo ya wutomi wo mbi guma” ti to ve randa ni kuthumela Jehovha. (Mith. 13:48) Se ni wona va na wuyelwa ngu kutimisela ka Jehovha kufana ni nathu.

18. Ngu kutxani ti txi lava hi timisela vamwani?

¹⁸ Jehovha a na rinzela 1.000 wa malembe a kufuma ka Jesu i di kona hi va vo hetiseka. Kala ka mbimo yoneyo Jehovha a ti emisete ku hi divalela hi txi phazama. Eto ti hi maha hi lava kuwona ta tinene ka vamwani ni ku va timisela. Wona txikombiso txa mwanathu awu mwamna wakwe a nga va ni txitrese se e leka kuya mitshanganoni. Ene a womba tiya:  “Eto ti ni pandile ngutu. Makungu ya hi nga ti navo maphwixilikile.” Ti si nga ni mhaka ni totshelele eto, mwanathu yule a mu timiselete mwamna wakwe. Ene a thembile Jehovha se kha guma mtamo. Kufana ni Jehovha kha veka mapimo ka sikarato sakwe, kambe vekile mapimo ka tifanelo tinene ta mwamna wakwe. Ene a womba tiya: “Mwamna wangu a na ni tifanelo ta tinene, ni ku a maha totshe ti a tikotako ti to e wuka ngu didhawa da moya.” Ngu toneto nda lisima ngutu ku timisela vanathu ava va lwisananako ni kutandeka kwawe!

19. Hi fanete kutiemisela kumaha txani?

¹⁹ Jesu ni tingelozi va kulungete mbimo yi ku nga vangwa mafu. Kambe alakanya mbimo yi va no ta wona mafu ma di tate ngu vathu vo hetiseka ava va randako Jehovha ni ku mu thumela. Alakanya litsako li va no lipfa ava va no fuma ni Jesu mbimo va no wona nzila yi mthumo wawe wuyelisako ngu yona vathu ha mafuni. (Mtu. 4:4, 9-11; 5:9, 10) Alakanya mbimo yi kupanda, kudila, kuxaniseka lifo si no va si ni vhaletilwe ngu litsako lo mbi guma. (Mtu. 21:4) Kala ka mbimo yoneyo ti emisela kuetetela lirando wutxhari ni kutimisela ka Jehovha. U txi maha toneto u na simama u tsaka ti si nga mhaka ni sikarato si u mananako naso. (Jak. 1:2-4) Hi nga wona ku tsakisa ka txithembiso txa Jehovha txo khene: “Vo lulama ni va ku ambi lulama va na wuka ka vakufa!”—Mith. 24:15.