1. Jehovah nih zeicah nunnak kha a ser?

JEHOVAH cu amah lawngin a um caan a rak um. Asinain a li a leng lo. Aa nuamh nakhnga Jehovah cu midang he umṭi a herh lo. Asinain Pathian nih midang kha nuam tein nung ve hna seh ti a duh. Dawtnak nih Jehovah kha nunnak pawl ser awkah a forh.—Salm 36:9; 1 Johan 4:19.

2. Jehovah sermi thilnung pawl kong he aa tlaiin Jesuh le vancungmi hna cu zeitindah an um?

² A hmasa bik ah Jehovah nih a Fapa, Jesuh kha a ser. Cun a hmasa bik a Fapa thawngin vancungmi nuai tampi i telin “thil vialte kha a ser hna.” (Kol. 1:16) Jesuh cu a Pa he rian an ṭuanṭi caah aa nuam tuk. (Ptb. 8:30) Cun vancungmi pawl zong an i nuam tuk. Jehovah le Rianthiam Bikmi Jesuh nih van le vawlei an sermi kha an rak hmuh. Mah tikah vancungmi nih an i lawmhnak kha zeitindah an rak langhter? Vawlei ser a si tikah “lunglawm in an au,” cun Jehovah nih a dang thilnung pawl a ser tik, a hleiin minung a sermi hna an hmuh tikah Pathian kha an thangṭhat. (Job 38:7; Ptb. 8:31.) Sermi thilnung pakhat cio nih Jehovah dawtnak le fimnak kha an langhter.—Salm 104:24; Rom 1:20.

3. Jesuh tlanhnak man nih 1 Korin 15:21, 22 ah a langhter bantukin zeidah a siter khawh?

³ Jehovah nih minung kha a sermi aa dawh tukmi vawlei ah zungzal in nung hna seh ti a duh. Asinain Adam le Evi nih  Jehovah kha ralchanh in sualnak an tuah caah zungzal in an nung kho ti lo. Anmah le an tefa hna cu a donghnak ah an thi. (Rom 5:12) Jehovah nih zeitindah a lehrulh hna? Minung pawl khamh an si khawh nakhnga a rak tuah colh. (Gen. 3:15) Jehovah nih Adam le Evi tefa sualnak le thihnak in an luat khawh nakhnga a Fapa Jesuh kha raithawinak caah a rak pek. Cuticun Pathian nih amah biak dingin aa thimmi pawl kha zungzal nunnak a pek khawh hna.—Johan 3:16; Rom 6:23; 1 Korin 15:21, 22 rel.

4. Hi capar ah zei biahalnak dah kan i ruah hna lai?

⁴ A thimi hna ka thawhter ṭhan hna lai timi Pathian biakam kong he aa tlaiin biahalnak tampi a chuak. Tahchunhnak ah, thawhṭhannak cu a um taktak lai maw? Kan dawtmi a thimi hna an thawhṭhan tikah kan hngal ti hna lai maw? Thawhṭhannak nih zeiti lam in dah nuamhnak a kan hmuhter lai? Thawhṭhannak kong nih Jehovah dawtnak, fimnak le lungsaunak kong he aa tlaiin zeidah a kan cawnpiak? Mah biahalnak pakhat cio kha zohhmanh hna u sih.

5. A thimi hna cu caan khatte ah an tho ṭhan dih lai lo tiah zeicah kan zumh khawh?

⁵ Jehovah nih a Fapa thawngin minung nuai tampi a thawhter ṭhan hna tikah caan khatte ah an tho ṭhan dih lai lo tiah kan ruah men lai. Zeicah? Caan khatte ah vawleicung ah minung tampi an thawhṭhan ahcun ningcang lo a si lai. Asinain Jehovah nih zeitikhmanh ah ningcang loin thil a tuah bal lo. Pathian nih thil pawl cu ningcang tein um a hau ti kha a hngalh caah minung pawl cu dai tein an um kho. (1 Kor. 14:33) Jehovah le Jesuh nih vawleicung ah minung pawl um kho dingin an rak timhtuah lioah Jehovah nih fimnak le  lungsaunak a rak langhter. Jesuh zong nih a tho ṭhanmi hna nih vawlei ro an co khawh nakhnga Armageddon in a luatmi hna he vawlei an timhtuah tik Kum Thongkhat Uknak chungah fimnak le lungsaunak kha a langhter ve lai.

6. Lamkaltu 24:15 ningin Jehovah nih ahote dah a thawhter ṭhan hna lai?

⁶ A biapi bikmi cu Armageddon in a luatmi hna nih a tho ṭhanmi hna kha Pathian Pennak kong le Jehovah halmi kong an cawnpiak hna a hau lai timi kha a si. Zeicah? Zeicahtiah a tho ṭhanmi tam deuh cu “miṭhalo” an si lai caah a si. (Lamkaltu 24:15 rel.) Annih nih Khrih tlanhnak man in ṭhatnak an hmuh nakhnga thlennak tampi an tuah a hau lai. Jehovah kong a hngal lomi, mi nuai tampi cawnpiak awkah zeitlukin dah rian a tam lai ti kha ruathmanh. Tuchan ah Baibal cawnpiaknak kan tuah bantukin pakhat cio nih anmah tein cawnpiaktu an ngei lai maw? Mah mithar pawl kha Khrihfabu ah rian pek le anmah hnuah a thoṭhanmi hna bawmh awkah cawnpiak an si lai maw? Mah kong hngalh awkah kan hngah a hau. Asinain Khrih Kum Thongkhat Uknak a dih tikah “hi ram cu Bawipa hngalhnak in a khat lai” ti kha kan hngalh. (Isa. 11:9) Kum thongkhat chungah zeitlukin dah rian a tam lai i a nuamh zong a nuamh lai!

7. Pathian miphun pawl nih a tho ṭhanmi hna cawnpiaknak ah zeicah unau dawtnak an ngeih a herh lai?

⁷ Khrih Kum Thongkhat Uknak chungah Jehovah miphun dihlak nih Pathian lunglawmhter awkah thlennak an tuah peng rih lai. Cutin thlennak an tuah caah a ṭhalomi ruahnak le duhnak kha an tei khawh lai i Jehovah phunglam ningin an nung kho lai. (1 Pet. 3:8) Mah a tho ṭhanmi hna nih Jehovah salle pawl cu aa toidormi an si ti kha an hngalh lai i Pathian lunglawmhter awkah thlennak an tuah lai, cun anmah he Jehovah biak kha an duh lai.—Fil. 2:12.

8. A tho ṭhanmi hna nih an dawtmi hna kha an hngalh hna lai tiah zeicah kan zumh khawh?

⁸ A tho ṭhanmi hna nih an dawtmi hna kha an hngalh hna lai tiah kan zumh khawhnak a ruang tampi a um. Tahchunhnak ah, Jehovah nih hlanlio ah a rak thawhter ṭhanmi hna bantukin a thimi hna cu an thih hlan i an mui, an biachim ning le an ruahnak ningin a ser ṭhan hna lai ti kha kan zumh khawh. Jesuh nih thihnak cu ih bantuk a si i thawhṭhannak cu i hlauh bantuk a si tiah a timi kha phihhlah. (Matt. 9:18, 24; Johan 11:11-13) Aa hngilhmi pakhat cu aa hlauh tikah a ruahnak aa thleng lo i a mui le a aw zong aa thleng lo. Lazaruh kong kha ruathmanh. A thihnak cu nili a si cang caah a pum cu a hung nam. Asinain Jesuh nih a thawhter ṭhan tikah a farle nih an hngalh colh i amah zong nih a rak hngalh colh ve hna.—Johan 11:38-44; 12:1, 2.

9. A tho ṭhanmi hna cu zeicah a tlingmi pum le ruahnak an ngeih colh lai lo?

⁹ Khrih uknak tangah ahohmanh nih “ka zaw tiah an zai ti lai lo” tiah Jehovah nih bia a kan kamh. (Isa. 33:24; Rom 6:7) Cucaah a tho ṭhanmi hna cu a dammi pum in ser an si ṭhan lai. Asinain mitling an si colh lai lo. Mitling an si colh ahcun an dawtmi hna nih an hngal ti men hna lai lo. Khrih Kum Thongkhat chungah mi pawl cu duhsah tein mitling hung si dawh an si. Kum thongkhat a dih tik lawngah Jesuh nih Pennak kha a Pa sinah a pek ṭhan lai. Cun Pennak nih minung pawl tlinternak i telin Jehovah duh ningin thil vialte kha a tuah lai.—1 Kor. 15:24-28; Biat. 20:1-3.

10. Thawhṭhannak nih zeitindah an umter lai?

¹⁰ Na dawtmi a thimi hna he nan i ton ṭhan tikah zeidah a lawh lai ti kha na mitthlam ah cuanter hmanh. Mah nih aan nihter lai maw asiloah aan ṭahter lai dah? Naa nuamh tuk caah Jehovah sinah thangṭhatnak hla na sa lai maw? Mithi pawl an thawhter ṭhanmi hna nih a kan zohkhenhtu kan Pa le a Fapa nih an kan dawt tuk ti kha kan zumh khawh.

11. Johan 5:28, 29 i Jesuh chimmi bia ningin Pathian i a dingmi a phunglam ningin a nungmi hna nih zeidah an hmuh lai?

¹¹ A tho ṭhanmi hna nih an mihlun kha i phoih in Pathian i a dingmi a phunglam ningin an nun tikah zeitindah an um lai ti kha na mitthlam ah cuanter hmanh. Cutin thlennak a tuahmi hna cu Paradis ah zungzal nunnak an hmu lai. Asinain Pathian a ralchanhmi hna cu Paradis ah zungzal nunnak an hmu lai lo.—Isa. 65:20; Johan 5:28, 29 rel.

12. Vawleicung ah a ummi dihlak kha Jehovah nih zeiti lam in dah thluachuah a pek hna lai?

¹² Pennak uknak tangah Pathian salle hna nih Phungthlukbia 10:22 ah a chimmi “BAWIPA thluachuahnak cu rumtertu a si i ngaihchiatnak zeihmanh a ratter chih hna lo” timi bia cu a hmaan ti kha an hngalh lai. Jehovah thiang thlarau bawmhnak thawngin Pathian salle hna cu Khrih he an i lo chinchin lai i duhsah tein mitling an hung si lai. (Johan 13:15-17; Efe. 4:23, 24) Nikhat hnu nikhat an pum cu a hung ṭhawng lai i miṭha an hung si lai. Mah nunnak cu zeitlukin dah a nuamh lai! (Job 33:25) Cucaah atu ah thawhṭhannak kong ruahnak nih zeitindah aan bawmh khawh?

13. Salm 139:1-4 ningin Jehovah nih zeitlukin dah a kan hngalh ti kha thawhṭhannak nih zeitindah a langhter lai?

¹³ A hmasa ah kan i ruah cang bantukin Jehovah nih a thimi a thawhter ṭhan hna tikah an ruahnak le pumpak an sining cu hlan bantukin a si ko lai. Mah cu zei sullam dah a si ti kha ruat. Jehovah nih aan dawt tuk caah na ruahnak, na intuarnak, na chimmi le na tuahmi vialte kha a hngalh i aa cinken dih. Cucaah Pathian nih aan thawhter ṭhan tikah hlan i na sining bantukin na si ṭhan lai. Jehovah nih kan dihlak in ṭha tein a kan hngalh ti kha Siangpahrang David nih a hngalh. (Salm 139:1-4 rel.) Jehovah nih ṭha tein a kan hngalhthiam ti kan hngalh tikah zeitindah kan um?

14. Jehovah nih ṭha tein a kan hngalh timi kong kan ruah tikah zeitindah kan um?

¹⁴ Jehovah nih ṭha tein a kan hngalh timi kong kan ruah tikah kan lungre a theih awk a si lo. Zeicah? Jehovah nih ṭha tein a kan zohkhenh ti kha philhhlah. Kan dihlak in a sunglawi tukmi in a kan hmuh. Kan nunnak ah kan cungah huham a ngeimi thil vialte kha a hngalh dih. Mah cu kan caah hnemtu taktak a si. Cucaah kanmah lawng kan si timi ruahnak kan ngeih awk a si lo. Zeitik caan poahah Jehovah cu kan pawngah a um zungzal i bawmh a kan duh zungzal.—2 Chan. 16:9.

15. Thawhṭhannak nih Jehovah fimnak kha zeitindah a langhter?

¹⁵ Thihnak tlerhkhonhnak cu a ṭhawng tukmi hriamnam bantuk a si. Satan nih mah ṭihnak kha hmangin mi nih an hawile an rawi hna nakhnga asiloah a hmaan lo ti an hngalhmi thil kha an tuah nakhnga a hnek hna. Asinain kannih cu cutin tuah awkah a kan hnek kho lo. Kan ral pawl nih an kan thah hmanhah Jehovah nih a kan nunter ṭhan lai ti kha kan hngalh. (Biat. 2:10) Zei thil hmanh nih Jehovah biak lo awkah a kan kham kho lai lo ti kha kan hngalh.  (Rom 8:35-39) Thawhṭhannak ruahchannak a kan peknak thawngin Jehovah nih a fimnak kha a langhter. Thawhṭhannak ruahchannak kan ngeih caah Satan leiah a ṭangmi hna nih an chimmi ningin kan tuah lo ahcun kan in thah hna lai tiah an kan tlerhkhonh tikah kan ṭih hna lo. Mah nih Jehovah cungah zumhfek tein um zungzal awkah ralṭhatnak zong a kan ngeihter.

16. Zei biahalnak dah naa hal awk a si, mah biahalnak a phi nih Jehovah kha zeitlukin dah naa bochan ti hngalh awkah zeitindah aan bawmh khawh?

¹⁶ Jehovah ral pawl nih kan in thah lai tiah an in tlerhkhonh ahcun na nunnak caah Jehovah kha lungtak tein naa bochan maw? Zeitindah na hngalh khawh? Hitin naa halnak thawngin na hngalh khawh: ‘Nifatin ka tuahmi biakhiahnak hmetete nih Jehovah kaa bochan kha a langhter maw?’ (Luka 16:10) Cun hiti zongin naa hal kho: ‘Ka nunning nih Pennak kha hmasa ah na chiah ahcun na herhmi thilri kaan pek hna lai timi Jehovah biakam ka zumh kha a langhter maw?’ (Matt. 6:31-33) Mah biahalnak kha ka langhter tiah na leh ahcun Jehovah naa bochan na langhtermi a si lai i hmailei ah zei bantuk hneksaknak na ton hmanhah timhcia na si lai.—Ptb. 3:5, 6.

17. (a) Thawhṭhannak nih Jehovah cu a lung a saumi a si ti kha zeitindah a langhter? (b) Jehovah lungsaunak kan sunsak kha zeitindah kan langhter khawh?

¹⁷ Jehovah nih a ṭha lomi hi vawlei hrawh awkah a caan a rak khiah cang. (Matt. 24:36) Mah caan a phanh hlanah Pathian nih lungsaunak a langhter. Mithi pawl thawhter kha aa ngaih, asinain a lung a sau. (Job 14:14, 15) Mithi pawl thawhter awkah aa tlakmi caan a phanh hlan tiang a hngah. (Johan 5:28) Jehovah nih lungsaunak a langhter caah kan i lawm tuk. Mah hi ruathmanh: Jehovah cu a lung a saumi a si caah kanmah i telin mi tampi nih “sual ngaihchihnak” caanṭha an ngei kho. (2 Pet. 3:9) Jehovah nih mi tam khawh chung tam nih zungzal nunnak hmu hna seh ti a duh. Cucaah Jehovah lungsaunak kan sunsak kha langhter hna u sih. Zeitin in dah? “Zungzal nunnak hmu dingah thim a simi hna” kha kan kawl hnanak thawngin le annih nih Jehovah an dawt i an biak nakhnga kan bawmh hnanak thawngin a si. (Lam. 13:48) Cutin kan tuah ahcun annih zong kanmah bantukin Jehovah lungsaunak in ṭhathnemhnak an hmu ve lai.

18. Midang cungah zeicah lungsaunak kan ngeih awk a si?

¹⁸ Jehovah nih mitling kan si nakhnga kum  thongkhat a dih tiang lungsau tein a hngah lai. Mah caan a phanh hlan tiang Jehovah nih kan sualnak kha lungtho tein a kan ngaihthiam. Cucaah Jehovah nunning kha kan i zohchunh a hau, cun midang nih an ngeihmi sining ṭha cungah lungthin pek in kan lung a sau zong a hau. A vapa a lungre a theih tuk caah aa pum ti lomi unaunu pakhat kong kha ruathmanh. Unaunu nih hitin a ti: “Mah cu ka caah a har tukmi a si. Kan nunning cu ruahlopi in aa thlen caah tuah kan duhmi thil kha kan tuah kho ti lo.” Asinain mah unaunu nih a vapa cungah lungsaunak a rak langhter zungzal. Jehovah kha aa bochan i a lung a dong bal lo. Jehovah bantukin unaunu nih a vapa ngeihmi sining ṭha pawl cungah lungthin a pek. Hitin a ti: “Ka vapa cu sining ṭha tampi a ngei i thil ṭha tuah awkah aa zuam caah a lungretheihnak kha a hun tei.” Cucaah kannih zong kan chungkhar asiloah Khrihfabu ah a harmi zuamcawhnak tei khawh awkah aa zuammi hna cungah lungsaunak langhter cu a biapi tukmi a si.

19. Zei tuah dingin dah biakhiahnak kan tuah awk a si?

¹⁹ Jesuh le vancungmi hna cu vawlei ser a si tikah an i nuam tuk. Asinain vawlei ah Jehovah a daw i a rian a ṭuanmi, a tlingmi minung in an khahmi an hmuh tikah zeitlukin dah an i nuamh chinchin lai ti kha na mitthlam ah cuanter hmanh. Cun vancung ah a kaimi hna nih an ṭuanmi rian in minung pawl ṭhathnemhnak an hmuhmi an hmuh tikah zeitlukin dah an i nuamh lai ti zong kha na mitthlam ah cuanter hmanh. (Biat. 4:4, 9-11; 5:9, 10) Zawtnak, ngaihchiatnak le thihnak cu zungzal in a um ti lai lo caah ngaihchiatnak mithli canah nuamhnak mithli a luan laimi zong kha na mitthlam ah cuanter hmanh. (Biat. 21:4) Mah caan a phanh hlan tiang dawtnak, fimnak le lungsaunak a ngeimi kan Pa i zohchunh awkah bia khiak. Cutin naa zohchunh ahcun zei thil na ton hmanhah naa nuam peng lai. (Jeim 1:2-4) “Thihnak in kan tho ṭhan dih lai” timi Jehovah biakam cungah kan i lawm tuk.—Lam. 24:15.