1. ¿Chucoch tsiʼ mele Jehová chuqui tac cuxul?

TI ÑAXAN i bajñel jach Jehová cuxul, pero maʼañic baqui ora i bajñel tsiʼ yubi i bʌ. Maʼañic chuqui anto yom i chaʼan. Pero tsiʼ mulaj cheʼ an tac yambʌ chuqui cuxul. Jin chaʼan, jiñi cʼuxbiya tsiʼ ñijcʌbe i pusicʼal chaʼan miʼ mel chuqui tac an (Sal. 36:9; 1 Jn. 4:19).

2. ¿Bajcheʼ tsiʼ yubi i bʌ Jesús yicʼot jiñi ángelob cheʼ bʌ Jehová tsiʼ mele yan tac bʌ?

² Tsaʼ bʌ i ñaxan mele (pʌtʌ) Jehová jiñʌch i Yalobil, Jesús. Ti wiʼil, tiʼ coltaya Jesús tsaʼ mejli «pejtel chuqui tac an» i yaʼ ochem jaʼel yonlel ángelob (He. 1:2). Jesús wen tijicña tsiʼ yubi cheʼ bʌ tsiʼ chaʼle eʼtel (troñel) yicʼot i Tat (Pr. 8:30). I jiñi ángelob tijicña tsiʼ yubiyob jaʼel come jiñʌch tsiʼ ñaxan qʼueleyob cheʼ bʌ Jehová yicʼot Jesús tsiʼ meleyob jiñi panchan yicʼot jiñi Lum. ¿Bajcheʼ tsiʼ jacʼʌyob jiñi ángelob? Jiñi Biblia miʼ yʌl: «Tsiʼ chaʼleyob oñel pejtel i yalobilob Dios chaʼan tijicñayob i pusicʼal». I tsaʼ i bej aqʼueyob i ñuclel Jehová chaʼan pejtelel chuqui tac tsiʼ mele cʼʌlʌl jinto tsaʼ ujti i mel jiñi ñaxam bʌ wiñic yicʼot ñaxam bʌ xʼixic (Job 38:7; Pr. 8:31). Tiʼ pejtelel tsaʼ bʌ i mele Jehová miʼ pʌs chaʼan añʌch i cʼuxbiya yicʼot chaʼan wen an i ñaʼtʌbal (Sal. 104:24; Ro. 1:20).

3. Cheʼ bajcheʼ miʼ yʌl 1 Corintios 15:21, 22, ¿bajcheʼ miʼ coltañonla cheʼ bʌ tsiʼ yʌcʼʌ i cuxtʌlel Jesús?

³ Jehová yom ti ñaxan chaʼan tiʼ pejtelel jiñi quixtañujob miʼ chumtʌlob tiʼ pejtelel ora ti jiñi wen utsʼatax bʌ Lum tsaʼ bʌ  i mele. Pero cheʼ bʌ Adán yicʼot Eva maʼañic tsiʼ jacʼbeyob i tʼan jiñi cʼuxbibil bʌ i Tat, ti jimbʌ ora tsaʼ ochi jiñi mulil yicʼot chʌmel ila ti Lum (Ro. 5:12). ¿Chuqui tsiʼ mele Jehová? Ti jin jach bʌ ora tsiʼ yʌcʼʌ ti ñaʼtʌntel bajcheʼ mi caj i coltan jiñi quixtañujob (Gn. 3:15). Tsiʼ yʌlʌ chaʼan mi caj i yʌcʼ ti chʌmel (sajtel) i Yalobil chaʼan miʼ coltan loqʼuel i pʼolbalob jiñi Adán yicʼot Eva ti jiñi mulil yicʼot chʌmel. Cheʼ bajcheʼ iliyi, mi caj i yʌqʼuen i yajcan jiñi quixtañujob mi yomob i chʼujutesan yicʼot mi yomob i taj jiñi cuxtʌlel mach bʌ añic miʼ jilel (Jn. 3:16; Ro. 6:23; pejcan 1 Corintios 15:21, 22).

4. ¿Chuqui mi caj laj qʼuel ti ili estudio?

⁴ Cheʼ bʌ Dios tsiʼ yʌcʼʌ i tʼan chaʼan mi caj i chaʼ tejchesan jiñi chʌmeñoʼ bʌ, an i yʌcʼʌ chaʼan mi lac melben lac bʌ ili cʼajtiya tac: ¿Bajcheʼ yilal miʼ cajel jiñi chaʼ tejchel? ¿Muʼ ba caj laj cʌn jiñi muʼ bʌ caj i chaʼ tejchelob lac chaʼan? ¿Chucoch mi caj i yʌcʼ cabʌl tijicñʌyel jiñi chaʼ tejchel? ¿Bajcheʼ miʼ pʌsbeñonla jiñi chaʼ tejchel chaʼan yom mi laj qʼuel ti ñuc jiñi i cʼuxbiya Jehová, i ñaʼtʌbal yicʼot i pijt? Laʼ laj qʼuel.

5. ¿Chucoch mi la cʌl chaʼan mach junlajalic mi caj i chaʼ tejchelob jiñi quixtañujob tsaʼ bʌ chʌmiyob?

⁵ Jehová mi caj i cʼʌn i Yalobil chaʼan miʼ chaʼ tejchesan yonlel wiñicob xʼixicob (quixtañujob). Pero tajol mach junlajalic mi caj i chaʼ tejchelob. ¿Chucoch cheʼ mi la cʌl? Come mi tsaʼ bujtʼi ti jin jach bʌ ora jiñi Lum, miʼ tejchel cabʌl wocol. I Jehová maʼañic miʼ mulan cheʼ mach luʼ chajpʌbilic chuqui miʼ mejlel. Yujil chaʼan wersajʌch yom chaʼan chajpʌbilʌch chuqui tac miʼ mejlel chaʼan an ñʌchʼtʌlel (1 Co. 14:33, TNM). Jehová tsiʼ pʌsʌ i ñaʼtʌbal yicʼot i pijt cheʼ bʌ cʼunteʼ cʼunteʼ tsiʼ mele majlel yicʼot Jesús ili Lum chaʼan miʼ bujtʼel ti quixtañujob. I Jiñʌch muʼ bʌ caj i mel Jesús ti jiñi  Mil jab cheʼ bʌ miʼ caj i coltan jiñi cuxul bʌ miʼ ñumelob ti Armagedón chaʼan miʼ chajpañob ili Lum chaʼan miʼ pijtʌntelob jiñi muʼ bʌ caj i chaʼ tejchelob.

6. Cheʼ bajcheʼ miʼ yʌl Hechos 24:15, ¿majqui jiñi yaʼ bʌ ochemob ti jiñi muʼ bʌ caj i chaʼ tejchelob?

⁶ Jiñi ñumen ñuc bʌ mi caj i melob jiñi cuxul bʌ miʼ ñumelob ti Armagedón jiñʌch cheʼ mi caj i cʌntesañob chaʼan i Yumʌntel Dios yicʼot chaʼan i mandar tac jiñi muʼ bʌ caj i chaʼ tejchelob. ¿Chucoch yom miʼ cʌntesʌntelob? Come jiñi yonlel muʼ bʌ caj i chaʼ tejchelob jiñobʌch jiñi «mach bʌ tojobic» cheʼ bajcheʼ miʼ yʌl yaʼ ti Biblia (pejcan Hechos 24:15). Cabʌl chuqui mi caj i qʼuextañob tiʼ cuxtʌlel chaʼan miʼ tajob i wenlel ti jiñi i cuxtʌlel tsaʼ bʌ i yʌcʼʌ Jesús. Jumpʼejlʌch tsʌts bʌ troñel cheʼ bʌ mi caj i cʌntesʌntelob tiʼ sujmlel Dios jiñi yonlel muʼ bʌ caj i chaʼ tejchelob. ¿Jujuntiquil ba mi caj la cʌqʼueñob estudio cheʼ bajcheʼ mi lac mel ili ora? ¿Muʼ ba caj i chojquelob majlel ti jumpʼejl congregación yicʼot mi caj i chajpʌntelob chaʼan miʼ cʌntesañob jiñi muʼ bʌ caj i chʼojyelob jaʼel? Yomto mi lac pijtan chaʼan miʼ cʼotel lac ñaʼtan. La cujil bʌ jiñʌch chaʼan cheʼ tiʼ yujtibal jiñi Mil jab i Yumʌntel Cristo «mi caj i bujtʼel pañimil ti winicob xʼixicob muʼ bʌ i cʌñob lac Yum [Jehová]» (Is. 11:9). ¡Cabʌl wem bʌ eʼtel mi caj lac mel ti jiñi Mil jab!

7. ¿Chucoch jiñi i wiñicob Jehová mi caj i chʼʌmbeñob i sujm jiñi muʼ bʌ caj i chaʼ tejchelob cheʼ bʌ mi caj i cʌntesañob?

⁷ Ti jiñi Mil jab, pejtelel i wiñicob Dios cabʌl chuqui mi caj i qʼuextañob chaʼan wen miʼ qʼuejlelob ti Jehová. Jin chaʼan, mi caj i chʼʌmbeñob i sujm cheʼ bʌ mi caj i coltañob jiñi muʼ bʌ caj i chaʼ tejchelob chaʼan yomʌch miʼ chaʼleñob wersa i mʌlbeñob (jotbeñob) jaʼel jiñi mulil yicʼot chaʼan miʼ chumtʌlob cheʼ bajcheʼ yom Dios (1 P. 3:8). Cheʼ bʌ jiñi muʼ bʌ caj i chaʼ tejchelob miʼ qʼuelob chaʼan jiñi i tejclum Dios añobʌch i pecʼlel yicʼot chaʼan choncolobʌch i chaʼleñob wersa i qʼuextañob i melbal jaʼel i chaʼan wen miʼ qʼuejlelob ti Dios, mi caj i ñijcʌbeñob i pusicʼal chaʼan miʼ chʼujutesañob Jehová jaʼel (Fil. 2:12).

8. ¿Chucoch yomʌch mi lac ñop chaʼan mucʼʌch caj laj cʌñob jiñi muʼ bʌ caj i chaʼ tejchelob lac chaʼan?

⁸ Añʌch cabʌl chucoch mi lac ñop chaʼan mucʼʌch caj laj cʌñob jiñi muʼ bʌ caj i chaʼ tejchelob lac chaʼan. Jumpʼejl ejemplo, jiñi muʼ bʌ i taj ti tʼan jiñi Biblia chaʼan jiñi tsaʼ bʌ chaʼ chʼojyiyob miʼ yʌqʼueñonla lac ñaʼtan chaʼan Jehová tajol lajal i ñiʼ i wut mi caj i chaʼ mel jiñi quixtañujob, chaʼ lajal jach bajcheʼ yujilob tʼan yicʼot mi caj i chaʼ aqʼueñob jiñi pensar añoʼ bʌ i chaʼan cheʼ bʌ cuxulobto. Cheʼ jaʼel, laʼ laj cʼajtesan chaʼan Jesús tsiʼ yʌlʌ chaʼan cheʼ bʌ an majqui miʼ chʌmel lajal bajcheʼ wʌyʌl jach, i cheʼ bʌ miʼ chaʼ cuxtʌyel lajal bajcheʼ miʼ chaʼ tejchel cheʼ wʌyʌl (Mt. 9:18, 24; Jn. 11:11-13). Cheʼ bʌ an majqui miʼ pʼixel maʼañic miʼ qʼuextʌyel i ñiʼ i wut, i tʼan yicʼot i pensar. Laʼcu lac ñaʼtan tsaʼ bʌ ujti tiʼ tojlel Lázaro. Cheʼ bʌ Jesús tsiʼ chaʼ tejchesa añix chʌmpʼejl qʼuin i chʌmel, jin chaʼan i bʌcʼtal wolix (choncolix) i tejchel i yocʼmʌn. Pero jiñi xchʼoc bʌ i yerañob ti orajach tsiʼ cʌñʌyob i jiñi Lázaro tsaʼʌch i cʌñʌyob jaʼel (Jn. 11:38-44; 12:1, 2).

9. ¿Chucoch jiñi muʼ bʌ caj i chaʼ tejchelob maxto tojobic?

⁹ Jehová miʼ yʌcʼ i tʼan chaʼan cheʼ ti Yumʌntel Cristo maʼañix majqui mi caj i yʌl: «Cʼamon» (Is. 33:24; Ro. 6:7). Jin chaʼan, cheʼ bʌ Dios mi caj i chaʼ melben i bʌcʼtal jiñi tsaʼ bʌ chʌmiyob maʼañix mi caj i cʼamʼañob. Pero maxto tojobic mi caj i yajñelob ti jimbʌ ora. Come mi cheʼqui bajcheʼ jiñi, maʼañic mi caj i mejlelob ti cʌjñel tiʼ familia o tiʼ yamigojob.  Ti jiñi Mil jab i Yumʌntel Cristo xucʼu xucʼul mi caj i sujtelob ti toj jiñi quixtañujob. Cheʼ bʌ miʼ yujtel jiñi Mil jab, Jesús mi caj i chaʼ aqʼuen i Tat jiñi i Yumʌntel. Cheʼ jiñi, ili Yumʌntel mi caj i tsʼʌctesan jiñi ñaʼtʌbil bʌ i chaʼan Jehová baqui mi caj i sujtesan ti toj jiñi quixtañujob (1 Co. 15:24-28; Ap. 20:1-3).

10. ¿Bajcheʼ yubil mi caj la cubin cheʼ bʌ miʼ chaʼ tejchelob jiñi chʌmeñoʼ bʌ?

¹⁰ Laʼcu ñaʼtan bajcheʼ yilal miʼ cajel cheʼ bʌ mi lac chaʼ qʼuelob jiñi lac familia. ¿Muʼ ba caj lac chaʼlen tseʼñal o uqʼuel chaʼan tijicñayonla? ¿Muʼ ba caj laj cʼʌyin Jehová chaʼan wen tijicñayonla? La cujil bʌ jiñʌch chaʼan mi caj lac ñumen cʼuxbin Jehová yicʼot i Yalobil come tsiʼ chaʼ tejchesa jiñi chʌmeñoʼ bʌ.

11. Cheʼ bajcheʼ tsiʼ yʌlʌ Jesús ti Juan 5:28, 29 (TNM), ¿chuqui mi caj i yʌqʼuentelob jiñi muʼ bʌ i jacʼbeñob jiñi toj bʌ i mandar tac Dios?

¹¹ Laʼcu lac ñaʼtan jaʼel i tijicñʌyelob jiñi muʼ bʌ caj i chaʼ tejchelob cheʼ bʌ miʼ cʌyob jiñi mach bʌ weñic i melbal (chaʼlibal) i miʼ jacʼbeñob jiñi toj bʌ i mandar tac Dios. Jiñi muʼ bʌ caj i qʼuextañob i melbal mi caj i «chʼojyelob chaʼan cuxtʌlel», pero jiñi mach bʌ añic miʼ jacʼbeñob i tʼan Jehová maʼañic mi caj i yʌjqʼuelob chaʼan miʼ jisañob jiñi ñʌchʼtʌlel yaʼ ti Paraíso (pejcan Juan 5:28, 29, TNM; * Is. 65:20).

12. ¿Bajcheʼ mi caj i tajbeñob i bendición Jehová jiñi muʼ bʌ caj i chumtʌlob ila ti Lum?

¹² Cheʼ wolix (yʌquelix) i mel i yeʼtel jiñi i Yumʌntel Dios, jiñi i wiñicob mi caj i qʼuelob chaʼan i sujmʌch chuqui miʼ yʌl Proverbios 10:22: «Miʼ yochel ti rico jini muʼ bʌ i taj i yutslel i pusicʼal lac Yum. Mach xʌbʌlic ti chʼijiyem bʌ chuʼ bʌ miʼ yʌqʼuentel ti Dios». Tiʼ coltaya jiñi chʼujul bʌ espíritu jiñi quixtañujob mi caj i sujtelob ti rico tiʼ chaʼan bʌ Jehová, yom bʌ i yʌl, chaʼan xucʼu xucʼul mi caj i sujtelob bajcheʼ Cristo cʼʌlʌl jinto miʼ sujtelob ti yoque toj bʌ quixtañujob (Jn. 13:15-17; Ef. 4:23, 24). Jujumpʼejl qʼuin mi caj i qʼuextañob i melbal yicʼot ñumen pʼʌtʌl mi caj i yajñelob. ¡Wen tijicña mi caj i yajñelob! (Job 33:25). Pero ¿bajcheʼ miʼ coltañonla ili ora cheʼ mi lac ñaʼtan bajcheʼ yilal miʼ cajel jiñi chaʼ tejchel?

13. Cheʼ bajcheʼ miʼ yʌl Salmo 139:1-4, ¿bajcheʼ miʼ tsictiyel ti jiñi chaʼ tejchel chaʼan Jehová i wen cʌñʌyoñʌchla?

¹³ Cheʼ bajcheʼ tsaʼix la cʌlʌ, Jehová mi caj i chaʼ aqʼuen i pensar yicʼot i melbal am bʌ i chaʼañob ti ñaxan jiñi muʼ bʌ caj i chaʼ tejchelob. Laʼcu lac ñaʼtan chuqui yom i yʌl jiñi. Ti jujuntiquil miʼ wen cʼuxbiñonla Jehová i miʼ qʼuel chuqui mi lac ñaʼtan, bajcheʼ yubil mi la cubin, chuqui mi la cʌl yicʼot chuqui mi lac mel. Jin chaʼan cheʼ mi caj i tejchesañonla, mach wocolic mi caj i yubin chaʼan miʼ chaʼ aqʼueñonla jiñi am bʌ ti lac pensar yicʼot bajcheʼ yilalonla. Jiñi rey David yujil chaʼan Jehová i wen cʌñʌyonla ti jujuntiquil (pejcan Salmo 139:1-4). ¿Bajcheʼ yubil mi la cubin cheʼ mi laj qʼuel chaʼan Jehová mucʼʌch i wen cʼuxbiñonla?

14. ¿Bajcheʼ yubil yom mi la cubin cheʼ bʌ la cujilʌch chaʼan Jehová i wen cʌñʌyoñʌchla?

¹⁴ Cheʼ la cujil chaʼan Jehová wen i cʌñʌyonla mach yomic mi laj cʼojoʼtan. ¿Chucoch? Come la cujil chaʼan miʼ wen cʼuxbiñonla yicʼot ti jujuntiquil miʼ qʼuelonla ti ñuc. I cheʼ jaʼel, an i qʼuele chuqui am bʌ lac ñusa ti jujuntiquil am bʌ i mele chaʼan cheʼonla bajcheʼ jiñi. Ili mucʼʌch i yʌqʼueñonla lac tijicñʌyel. Jehová mi caj i yajñel la quicʼot tiʼ pejtelel ora chaʼan  miʼ coltañonla, jin chaʼan mach yomic mi la cubin chaʼan lac bajñel jach añonla (2 Cr. 16:9).

15. ¿Chucoch jiñi chaʼ tejchel miʼ pʌs chaʼan Jehová añʌch cabʌl i ñaʼtʌbal?

¹⁵ Jiñi quixtañujob miʼ bʌcʼñañob chʌmel. Jin chaʼan, jiñi añoʼ bʌ tiʼ wenta Satanás miʼ cʼʌñob ili bʌqʼuen chaʼan miʼ xicʼob jiñi quixtañujob i melob mach bʌ weñic tiʼ tojlel i yamigojob o chaʼan miʼ cʌyob chuqui ñopol bʌ i chaʼañob. Pero joñonla maʼañic mi lac bʌcʼñan come la cujil chaʼan mi jiñi la contrajob miʼ tsʌnsañonla, Jehová mi caj i chaʼ cuxtesañonla (Ap. 2:10). Mucʼʌch lac ñop chaʼan maʼañic chuqui miʼ mejlel i ñajtʼesañonla ti Dios (Ro. 8:35-39). Jehová añʌch i pʌsʌ chaʼan wen añʌch i ñaʼtʌbal cheʼ bʌ an i yʌqʼueyonla jiñi pijtaya chaʼan chaʼ tejchel. Cheʼ bajcheʼ ili, Jehová miʼ mʌlben Satanás i joñonla miʼ yʌqʼueñonla lac chʼejlel maʼañic bʌ miʼ mejlel ti jisʌntel.

16. ¿Chuqui yom mi laj cʼajtiben lac bʌ, i chuqui mi caj i pʌs jiñi i jacʼbal muʼ bʌ la cʌqʼuen lac bʌ?

¹⁶ Mi jiñi laj contrajob miʼ subeñonla chaʼan mi caj i tsʌnsañoñobla, ¿muʼ ba caj lac ñop chaʼan Jehová mi caj i chaʼ cuxtesañonla? Chaʼan miʼ mejlel lac ñaʼtan, laʼ laj cʼajtiben lac bʌ: «Cheʼ bʌ an chuqui mic ñaʼtan c mel mach bʌ wen ñuquic, ¿muʼ ba c pʌs chaʼan mucʼʌch c ñop ti Jehová?» (Lc. 16:10, TNM). «¿Muʼ ba c pʌs cheʼ bajcheʼ chumulon chaʼan mucʼʌch c ñop chaʼan Jehová mi caj i yʌqʼueñon chuqui i cʼʌjñibal bʌ c chaʼan miʼ mucʼʌch cʌcʼ ti ñaxan jiñi i Yumʌntel?» (Mt. 6:31-33). Mi tsaʼ la cʌlʌ chaʼan mucʼʌch lac ñop, ili jiñʌch muʼ bʌ caj i coltañonla chaʼan mi lac lʌtʼ jiñi wocol tac muʼ bʌ i mejlel i tilel ti lac tojlel (Pr. 3:5, 6).

17. a) ¿Chucoch jiñi chaʼ tejchel miʼ pʌs chaʼan Jehová yujilʌch pijt? b) ¿Bajcheʼ miʼ mejlel lac pʌs chaʼan mucʼʌch laj qʼuel ti ñuc cheʼ yujilʌch pijt Jehová?

¹⁷ Jehová yujilix jala mi caj i jisan ili mach bʌ weñic pañimil (Mt. 24:36). Anquese yomix i tejchesan jiñi chʌmeñoʼ bʌ, yujil i pijtʌntel i yorajlel (Job 14:14, 15). Yʌquel i pijtan i yorajlel chaʼan miʼ mel jiñi (Jn. 5:28). Wocolix i yʌlʌ Jehová cheʼ yujilʌch pijt come an i yʌcʼʌ chaʼan jiñi quixtañujob miʼ cʌyob i mul, i yaʼ ochemonla jaʼel (2 P. 3:9). Jehová yom chaʼan cabʌl miʼ chumtʌlob tiʼ pejtelel ora. Jin chaʼan, cheʼ bʌ mi lac chaʼlen wersa lac sʌclan jiñi «yomoʼ bʌ i taj i cuxtʌlel mach bʌ añic miʼ jilel» woli lac pʌs chaʼan mucʼʌch laj qʼuel ti ñuc chaʼan Jehová yujilʌch pijt (Hch. 13:48, TNM).  Cheʼ bajcheʼ jiñi, miʼ mejlel i tajob i wenlel jaʼel cheʼ yujilʌch pijt Jehová.

18. ¿Chucoch yom an lac pijt tiʼ tojlel yambʌlob?

¹⁸ Ili ora Jehová muʼto caj i bej ñusan majlel lac mul i mi caj i cʌy i mel jinto cheʼ bʌ miʼ yujtel jiñi Mil jab i maʼañix lac mul mi la cajñel. Jin chaʼan, mi lac lajiben i melbal cheʼ mi la qʼuelbeñob wem bʌ i melbal jiñi yambʌlob yicʼot cheʼ maʼañic mi lac lujbʼan lac pʌs lac pijt. Mi caj laj qʼuel chuqui tsaʼ ujti tiʼ tojlel juntiquil hermana. Jiñi i ñoxiʼal tsaʼ cʼamʼa tiʼ caj cʌlʌx pensar i tsiʼ cʌyʌ majlel ti tempa bʌ. Jiñi hermana miʼ yʌl: «Wocol tsaʼ cubi iliyi. Jiñi chajpʌbil bʌ lon c chaʼan bajcheʼ familia maʼañix tsaʼ mejli lon c mel». Anquese cabʌl wocol tsiʼ ñusa jiñi hermana, tsiʼ chʌn cʼuxbi i ñoxiʼal yicʼot tsiʼ chʌn pʌsbe i pijtaya. Tsiʼ yʌcʼʌ i ñopoñel ti Jehová i maʼañic tsiʼ cʌyʌ i coltan i ñoxiʼal. Jiñi hermana tsiʼ mele cheʼ bajcheʼ miʼ mel Jehová, mach cojach tsaʼ caji i qʼuel jiñi wocol, tsaʼ caji i qʼuelben jiñi wem bʌ i melbal i ñoxiʼal. Miʼ yʌl: «Jiñi c ñoxiʼal an wem bʌ i melbal i woliʼ chaʼlen wersa chaʼan miʼ cʼocʼan majlel». Ñuc i cʼʌjñibal cheʼ bʌ mi lac pʌsbeñob lac pijt jiñi lac familiajob o jiñi la quermañujob añoʼ bʌ i wocol.

19. ¿Chuqui maʼañic bʌ mi caj laj cʌy lac mel?

¹⁹ Jesús yicʼot jiñi ángelob wen tijicña tsiʼ yubiyob cheʼ bʌ tsaʼ mejli ili Lum. Laʼcu lac ñaʼtan bajcheʼ cʼamel i tijicñʌyel mi caj i yubiñob cheʼ bʌ miʼ qʼuelob butʼul ili Lum ti toj bʌ quixtañujob muʼ bʌ i cʼuxbiñob Jehová yicʼot miʼ melbeñob i yeʼtel. I cheʼ jaʼel, wen tijicña mi caj i yubiñob jiñi muʼ bʌ caj i chaʼleñob yumʌntel yicʼot Cristo yaʼ ti panchan cheʼ mi caj i qʼuelob chaʼan jiñi quixtañujob miʼ tajob i wenlel chaʼan jiñi i yeʼtelob (Ap. 4:4, 9-11; 5:9, 10). Laʼcu lac ñaʼtan jaʼel cheʼ bʌ maʼañix mi caj uqʼuel tiʼ caj wocol, cheʼ bʌ maʼañix cʼamʌjel, chʼijiyemlel yicʼot maʼañix majqui miʼ cajel ti sajtel (Ap. 21:4). Pero cheʼ bʌ maxto tsʼʌctiyi iliyi, mach laj cʌy lac lajiben i cʼuxbiya Jehová, i ñaʼtʌbal yicʼot i pijt. Mi cheʼʌch mi lac mel, chʌn tijicña mi caj la cajñel anquese mi lac ñusan baqui jach bʌ wocol (Stg. 1:2-4). Mi la cʌqʼuen wocolix i yʌlʌ Jehová cheʼ bʌ miʼ yʌl chaʼan «mi caj i chʼojyelob jini chʌmeñoʼ bʌ» (Hch. 24:15).