1. Pine nemene matre hnei Iehova hna xup la itre xan?

 NGACAMA Iehova caasi ekö ngöne la qaan, ngo ka madrine Nyidrë. Ame pe, hnei Nyidrëti hna xupe la itre xan me aijijë angatr troa hane mele madrin. Eje hi, hnene la ihnimi Iehova matre hnei Nyidrëti hna xup la nöjei ewekë asë.—Sal. 36:9; 1 Ioane 4:19.

2. Nemene la aqane ujë i Iesu me itre angela ngöne la Iehova a xup la itre ewekë?

² Hnei Iehova hna pane xupi Iesu, nge hnei nyidroti hna ce “xup la nöjei ewekë asë,” tune la itre milio lao angela. (Kol. 1:16) Ka madrine palahi Iesu troa ce huliwa memine la Keme i nyidrë. (Ite Edomë 8:30) Ketre, madrine catre fe la itre angela. Hnei angatr hna öhne la Iehova me Iesu a xupe la hnengödrai me ihnadro. Nemene la aqane ujë i angatr? Hnei angatr hna ‘ce sue madrin.’ Angatr a madrin me haine la aqane xupi ewekë i Iehova, tune lo Nyidrëti a xup la pane atr. (Iobu 38:7; Ite Edomë 8:31) Eje hi, kola mama la ihnim me inamacane i Iehova ngöne la nöjei ewekë hna xup.—Sal. 104:24; Rom. 1:20.

3. Thenge la 1 Korinito 15:21, 22, nemene la hna aijijë së hnene la thupene mel?

³ Iehova a ajane tro la itre atr a mel epine palua ngöne la ihnadro ka mingöming. Ngo hnei Adramu me Eva hna icilekeu memine la Keme i nyidro. Celë hi matre, tha ijiji  nyidroti hë me itre matra i nyidro troa mel epine palua. (Rom. 5:12) Nemene la hna kuca hnei Iehova? Hnei Nyidrëti hna amamane la aqane tro Nyidrëti a amelene hmaca la itre atr. (Gen. 3:15) Jëne la thupene mel, tro Nyidrëti a thapa la itre matra i Adramu me Eva qa ngöne la ngazo me mec. Ketre, tro Nyidrëti a hamëne la mel ka pë pun kowe la itre ka thel troa nyihlue i Nyidrë.—Ioane 3:16; Rom. 6:23; e jë la 1 Korinito 15:21, 22.

4. Nemene la itre hnying hne së hna troa wang?

⁴ Ngo nyimutre la itre hnyinge së göi melehmaca. Tune kaa la aqane troa amelene hmaca elany la itre atr? Tro kö sa wangatrehmekune la itre sinee së hna troa amelene hmaca? Nemene la itre manathith göi mele hmaca hne së hna troa kapa elany? Nge nemene la hna ini së göne la ihnim, me inamacan, me aqane xomihni aqeanyi Iehova? Tro sa ce wang la itre hnying celë.

5. Pine nemene matre tha tro kö a aca tro amelene la itre atr ka mec?

⁵ Jëne la Nekö i Nyidrë, Iehova a troa amelene hmaca la itre miliar lao atr. Ngo hapeu, tro kö Nyidrëti a aca tro amele angatr asë? Waea. Pine nemen? Maine tru palaha la itre atr hna amelen, tro ha jol troa eköth la huliwa. Iehova a ajane troa eköthe hnyawa la huliwa i Nyidrë, matre tro palahi a tingeting. (1 Kor. 14:33) Hnei Iehova hna xomihni aqean me inamacan ngöne la Nyidrëti a ce hnëkën me Iesu la ihnadro, qëmekene troa xup la lue pane atr. Ame ngöne la ijine Iesu a troa musi e celë fen, tro fe nyidrëti a amamane la itre thiina  cili. Tro nyidrë memine la itre ka mele pe ngöne la isi Amagedro a hnëkëne la ihnadro thatraqane la itre hna troa amelene hmaca.

6. Thenge la Itre Huliwa 24:15, hapeu, Iehova hmekuje hi a troa amelene la itre ka meköt?

⁶ Ngo hetre ketre huliwa hna troa kuca hnene la itre hlue i Iehova ka mele pe ngöne la isi Amagedro. Tro angatr a inin la itre atr hna amelene hmaca, la pengöne la Baselaia memine la aja i Iehova. Pine nemen? Pine laka, nyimutre la itre “ka tha meköti kö.” (E jë la Itre Huliwa 24:15.) Nyipiewekë tro angatr a saze, matre troa hane kepe thangane qa ngöne la thupene mel. Hnëqa së elany troa amamane la nyipici göi Akötresie kowe la itre milio lao atr ka thatre Nyidrë. Pane mekune jë la etrune la huliwa së elany! Hapeu, tro kö sa isa ini tusi me angatr, tune enehila? Tro kö angatr a sine la ketre ekalesia me inine troa hamë ini kowe la itre xaa atr hna amelen? Thatre kö së. Ngo atre hi së laka, “troa tiqa la fene hnengödrai hnene la ate hmekunyi Iehova” ngöne la pune la musi Iesu. (Is. 11:9) Drei la madrine së troa huliwa fene la musi Keriso ka 1 000 lao macatre!

7. Pine nemene matre loi e tro la itre hlue i Iehova a hetre hni ne utipin kowe la itre hna troa amelene hmaca?

⁷ Ame fene la musi Keriso, hetre nyine tro palakö la itre hlue i Iehova a saze, matre hane kepe angatr hnei Nyidrë. Celë hi matre, loi e tro angatr a utipin la itre hna amelene hmaca. Loi e troa xatua angatr troa xomehnöthe la itre aja ka ngazo me trongëne hnyawa la itre trepene meköti Akötresie. (1 Pet. 3:8) Tro ha canga mama kowe la itre hna amelene hmaca, la hni ne ipië i angatr me aqane ‘huliwa catre angatr thatraqane la mele i angatr.’—Fil. 2:12.

8. Pine nemene matre ijije hi tro sa wangatrehmekune la itre sinee së hna troa amelene hmaca elany?

⁸ Ijije hi tro sa qaja ka hape, tro sa wangatrehmekune la itre sinee së hna troa amelene hmaca elany. Pane mekune jë lo itre atr hna amelene hmaca ekö hnei Iehova. Tha hna saze kö la iqëmeke i angatr, nge caasi palahi la aqane ithanata me mekuna i angatr. Ketre, hnei Iesu lo hna aceitunëne la mec memine la easa meköl, nge ceitu la melehmaca memine la easa hlë. (Mat. 9:18, 24; Ioane 11:11-13) Ame la easa hlë qa hna meköl, caasi palahi la iqëmeke së me aqane ithanata së. Nge tha thëthëhmine kö së la itre hne së hna melën. Celë hi la ka traqa koi Lazaro ekö. Traqa koi foa lao drai ne meci angeic, nge punepune hë la ngönetrei angeic. Ngo ame la Iesu a amele Lazaro hmaca, canga wangatrehmekunyi angeice hi hnei Maretha me Maria. Ketre, tha hna thëthëhmi nyidroti kö hnei angeic.—Ioane 11:38-44; 12:1, 2.

9. Pine nemene matre tha tro kö a canga pexeje la itre atr hna troa amelene hmaca?

⁹ Hnei Iehova hna perofetan laka, ame fene la musi Keriso, pëhë ka troa qaja ka hape, “Ini a mec.” (Is. 33:24; Rom. 6:7) Eje hi, tro ha lolo la ngönetrei ne la itre hna troa amelene hmaca. Ngo tha pexeje palakö angatr, wanga tha tro kö a canga wangatrehmekunyi angatr hnene la itre sinee i angatr. Nge ame fene la musi Iesu, tro la itre atr a isa kökötre trootro utihë la pexeje angatr. Thupene la 1 000 lao macatre, tro hmaca Iesu a nue  la Baselaia kowe la Keme i nyidrë. E cili, tro ha pexeje la huliwa ne la Baselaia, nge tro fe a pexeje la itre atr.—1 Kor. 15:24-28; Hna ama. 20:1-3.

10. Nemene la aliene hni së ngöne la kola troa amelene hmaca la itre atr elany?

¹⁰ Pane mekune jë së laka, easa kapa la itre sinee së hna amelene hmaca. Hapeu, tro kö sa madrin maine treij? Tro kö sa thinge la itre nyima nyine olene koi Iehova? Xecie hnyawa koi së laka, tro sa amamane la etrune la ihnimi së koi Iehova me Iesu. Hnei nyidroti hna hamëne koi së la ketre ahnahna ka tru, ene la melehmaca.

11. Thenge la Ioane 5:28, 29, nemene la itre manathith hna troa kapa hnene la itre ka trongëne la itre trepene meköti Iehova?

¹¹ Pane mekune jë së la madrinene la itre atr hna troa amelen hmaca elany! Angatr palahi a thel troa nuetrije la itre thiina ka ngazo hnapan me trongëne la itre trepene meköti Iehova. E cili, tro ha ‘amele angatr kowe la mel’ ka pë pun ngöne la Paradraiso. Ngo ame la itre ka icilekeu, tha tro kö Iehova a nue angatr troa thë la tingeting e hnine la Paradraiso.—Is. 65:20; e jë la Ioane 5:28, 29.

12. Nemene la itre manathith hna troa kapa elany hnene la itre atr?

¹² Ame hë fene la musi ne la Baselaia i Akötresie, tro la itre hlue i Nyidrëti a öhn laka, “manathithi qaathei Iehova la ka atrenamon; nge pëkö akötr ka xulu qa ngön.” (Ite Edomë 10:22, MN) Eje hi, tro la uati hmitrötre i Iehova a xatua angatr troa kökötre utihë la angatr a pexej tui Keriso. (Ioane 13:15-17; Efe. 4:23, 24) Ketre, tro ha lolo la mele i angatr. Drei la ketre manathithi ka tru! (Iobu 33:25) Ngo nemene la hna ini së hnene la melehmaca, göne la ihnim, me inamacan, me aqane xomihni aqeanyi Iehova?

13. Thenge la Salamo 139:1-4, pine nemene matre hatrene la ihnimi Iehova koi së isa ala caas, la melehmaca?

¹³ Eje hi, tro Iehova a amelene hmaca la itre atr, memine la itre mekun me itre thiina ka lolo i angatr. Pine nemen? Pine laka, Iehova a hnimi së. Nyidrëti a wangatrune la itre mekuna së me aliene hni së, me itre hne së hna qaja me kuca. Hnei Dravita ekö hna öhn laka, Iehova a wangatrunyi së isa ala caas. (E jë la Salamo 139:1-4.) Pine nemene matre nyipiewekë tro sa trotrohnine la aqane goeë së hnei Iehova?

14. Pine nemene matre tha tro kö sa xou laka, atrepengö së hnyawa hi hnei Iehova?

¹⁴ Hapeu, tro kö sa xou ke atrepengö së hnyawa hi hnei Iehova? Waea. Pine nemen? Pine laka, Nyidrëti a hnimi së me wangatrunyi së isa ala caas. Atre hi Iehova la itre ewekë ka traqa ngöne la mele së, nge atreine hi Nyidrë troa saze la pengö së. Eje hi, tha tro pi kö sa hnehengazo menu me mekun laka, easë caasi hi. Ce Iehova palahi me easë, nge tro kö Nyidrëti a xatua së.—2 A. l. ite jo. 16:9.

15. Pine nemene matre hatrene la inamacane i Iehova la melehmaca?

¹⁵ Ame la troa xoue mec ke, ketre hnö lai. Hnene la itre hna musinën hnei Satana hna axouene la itre atr, matre tro angatr a nuetrije la itre sinee me itre hnei angatr hna mejiune kow. Ngo  tha celë kö aqane ujë së. Maine troa humuthi së elany, tro kö Iehova a amele së hmaca. (Hna ama. 2:10) Pëkö ewekë ka atreine troa thapa la ihnimi së koi Akötresie. (Rom. 8:35-39) Nyipici kola mama la inamacane i Nyidrë jëne la melehmaca! Jëne la mejiune cili, Iehova a sewe Satana troa axounyi së me ithuecatre koi së.

16. Nemene la lue hnying nyine tro sa isa mekun, nge nemene la hna amaman?

¹⁶ Hapeu, tro kö sa mejiun elanyi koi Iehova, ngöne la kola thele troa humuthi së hnene la itre ithupëjia? Loi e tro sa hnying, ka hape: ‘Hapeu eni kö a amamane la mejiuneng koi Iehova, ngöne la eni a axecië mekun e nöjei drai?’ (Luka 16:10) Ketre, Iehova a thingehnaen laka, maine tro sa amë panëne la Baselaia i Nyidrë, tro hë Nyidrëti a hamë së la ka ijij. Loi e tro sa isa hnying, ka hape: ‘Eni kö a mejiune kowe la hna thingehnaeane celë hnei Iehova?’ (Mat. 6:31-33) Maine eje hi, kolo hi lai a amamane laka, easa mejiune koi Iehova, nge ijije hi tro sa cile kowe la nöjei pengöne jol.—Ite Edomë 3:5, 6.

17. (a) Nemene la ka mama jëne la melehmaca, göne la aqane xomihni aqeanyi Iehova? (b) Tro sa amamane tune kaa la hni ne ole së koi Iehova?

¹⁷ Ase hë Iehova axeciëne la drai me hawa ne la pune la fene celë. (Mat. 24:36) Nyipici laka, aja i Iehova troa amelene hmaca la itre ka mec, ngo Nyidrëti a xomihni aqeany. (Iobu 14:14, 15) Nyidrëti a treqene la nyipi ijin matre troa amele angatr hmaca. (Ioane 5:28) Loi e tro sa hetre hni ne ole kowe la aqane xomihni aqeanyi Iehova, pine laka, kola aijijëne la nöjei atr troa “ietra.” (2 Pet. 3:9) Iehova a ajane tro la nöjei atr asë a mel epine palua. Tro sa amamane tune kaa la hni ne ole së koi Nyidrë? Loi e tro sa catre thele “la itre ka hmalahnine troa kapa la mele ka pë pun.” Loi e tro fe sa xatua angatr troa hnim me nyihlue i Iehova. (Itre hu. 13:48) E cili, tro hë angatr a kepe thangane qa ngöne la aqane xomihni aqeanyi Iehova, tui easë ekö.

18. Pine nemene matre nyipiewekë tro sa xomihni aqeany?

¹⁸ Nyipici laka, qëmekene troa nyipune la musi Iesu koi 1 000 lao macatre, tha  Iehova a treqene tro sa pexej. Nyidrëti pe a xomihni aqeany me köletrije la itre ngazo së. Tui Iehova, loi e tro sa goeëne la itre thiina ka lolo i itre xan me xomihni aqeany. Hane hi la hna melën hnene la ketre trejine föe. Ame la föi eahlo ke, ka hnehengazo catr, matre tha sine hmaca kö nyidrë la itre icasikeu. Öni eahlo: “Hace catre koi ni ke, thatreine hë nyio eatrëne la itre aja i nyio.” Ngo ame pe, tru la ihnimi eahlo koi nyidrë, matre hnei eahlo hna xomihni aqeany. Hnei eahlo fe hna catre mejiune koi Iehova. Ketre, tha hnei eahlo kö hna wangatrune la meci nyidrë. Hnei eahlo pe hna goeëne la itre thiina ka lolo i nyidrë. Öni eahlo: “Nyimutre la itre thiina i nyidrë, nge hnei nyidrëti palahi hna catre xomihnine la meci nyidrë.” Eje hi, loi e tro sa xomihni aqeany me trotrohnine la itre sinee së memine la itre trejin ka cile kowe la itre jol ka tru.

19. Nemene la nyine tro sa catre kuca?

¹⁹ Madrine catre Iesu memine la itre angela ngöne la kola xup ekö la ihnadro. Ngo the qaja palaha elany ngöne la kola troa lapan ej hnene la itre atr ka pexej me ka hnimi Iehova! Easa mekune la madrinene la itre ka troa ce musi me Iesu. Tro angatr a öhne la itre manathithi hna troa kapa hnene la itre atr qa ngöne la musi angatr. (Hna ama. 4:4, 9-11; 5:9, 10) Ketre, easa mekun la mele elany, laka, pë hmaca kö treij me akötr. Easë pe a madrin ke, paatre hë la itre sine mec me akötr me mec. (Hna ama. 21:4) Lapa treqene hnyawa jë së la ijine cili. Tui Iehova, catre jë së ihnim me inamacan, me xomihni aqeany. Tro lai a xatua së troa madrin ngacama tru la itre jol. (Iako. 1:2-4) Eje hi, “tro kö nyidrëti a amelene la itre atr.” (Itre hu. 24:15) Haawe, catre jë së troa amamane la hni ne ole së koi Iehova!