1. E aera ngke e karika te maiu Iehova?

BON iai te tai are akea iai raon Iehova bwa tii ngaia. Ma e aki nanokawaki iai. E bon aki kainnanoa temanna ibukini kakororaoani kukureina. Ma e ngae n anne, e tangiriia aomata te Atua bwa a na maiu ao ni kukurei naba. E kairaki n te tangira Iehova bwa e na moana ana karikibwai.​—TaiAre. 36:9; 1Ioa. 4:19.

2. Tera ana namakin Iesu ma anera ni baike e karikii Iehova?

² E karika moa raona ni mwakuri Iehova. Imwina ao “nikirani bwaai . . . a boni karikaki” rinanon Natina are te moanibung. E karikiia naba anera aika mirion ma mirion. (IKoro. 1:16) E kimwareirei Iesu ngkai e kona n uaia ni mwakuri ma Tamana. (TaeRab. 8:30) A kimwareirei naba natin te Atua ake anera. A bon nora Iehova ma ana tia Mwakuri ae Mwaatai ae Iesu ngke a karaoa karawa ma te aonnaba. Tera aroia anera iai? A “tatakarua ni kakatonga” ngke e karaoaki te aonnaba, ao a boni bae n teimatoa ni kakatonga n norani bwaai nako ake e karaoi Iehova, moarara riki aomata. (Iobi 38:7; TaeRab. 8:31, kbn.) E kaotaki ana tangira Iehova ao wanawanana ni baika karikaki aikai ni kabane.​—TaiAre. 104:24; IRom 1:20.

3. Ni kaineti ma 1 I-Korinto 15:21, 22, tera ae kona n reke man ana karea ni kaboomwi Iesu?

³ E kantaningaia Iehova bwa a na maiu n aki toki aomata n te buraneti ae tamaroa are e a tia ni karikia. Ma ngke a karitei  Atam ao Ewa nakon Tamaia ae tatangira, e a roko te bure ao te mate n te aonnaba. (IRom 5:12) Tera aron Iehova iai? E waekoa ni kaota te anga are e na kamaiua iai te botannaomata. (KBwaai 3:15) E baireia Iehova bwa e na katauraoa te kaboomwi are a na kona iai kanoan Atam ao Ewa ni kainaomataaki man te bure ao te mate. N te aro anne, e a angania aia tai aomata n tatabemania nako bwa a na rinea ae a na toro irouna ao ni karekea te maiu are aki toki.​—Ioa. 3:16; IRom 6:23; wareka 1 I-Korinto 15:21, 22.

4. Baikara titiraki aika ti na rinanoi n te kaongora aei?

⁴ A bati titiraki aika tabekaki ni kaineti ma ana berita te Atua ibukin te mangauti. N te katoto, e na karaoaki ia te kautiuti? Ti na kinaia naake a tangiraki iroura ngkana a a kautaki? E na tera aroni kimwareireira n te mangauti? Ao e na kangaa kananoan ara iango i aon te mangauti ni karikirakea ara kakaitau ibukin ana tangira Iehova, wanawanana, ao ana taotaonakinnano? Ti na rinanon titiraki akanne.

5. E aera bwa ti kona ni kakoauaa ae a na aki bane ni kautaki aomata n tii teuana te tai?

⁵ Ngkana e kautiia aomata aika mirion ma mirion Iehova rinanon Natina, ti kona n taekinna bwa a na aki bane ni kautaki n tii teuana te tai. Bukin tera? Ibukina bwa e na bae ni karekea te mangaongao kautakia aomata aika mwaitikurikuri i aon te aba n te tai ae tii teuana. Ao e aki kona Iehova ni karaoa te bwai teuana n te aro ae mangaongao. E ataia bwa ngkana e na teimatoa te rau, a riai ni karaoaki bwaai n te aro ae baireaki raoi. (1Kor. 14:33) E wanawana Iehova ae te Atua ao e taotaona nanona ngke e mwakuri ma Iesu ni katauraoa ngkoa te  aonnaba imwaini karikaia aomata. Ngaia are e na boni kaotiotii naba aroaro akanne Iesu i aan te Tautaeka ae Maanna Tenga te Ririki, ngkana e a uaia n ibuobuoki ma naake a reke maiuia n Aremaketon ni katauraoa te aonnaba imwaia naake a kautaki.

6. Ni kaineti ma Mwakuri 24:15, antai ake a na kautaki naba iroun Iehova?

⁶ Ma ae kakawaki riki, a riai naake a reke maiuia n Aremaketon n reireinia ake a kautaki taekan Ana Tautaeka n Uea te Atua ao ana tua Iehova. Bukin tera? Ibukina bwa angia naake a kautaki bon aomata aika “aki raoiroi.” (Wareka Mwakuri 24:15.) A bon riai ni karaoi bitaki aika bati bwa a aonga ni kakabwaiaaki man ana kaboomwi Kristo. Iangoa korakoran te mwakuri are e na karaoaki ibukin reireinakia aomata aika mirion ma mirion ake a aki kinaa Iehova. A na bane n toa aomata akanne ma aia tia reirei n arora ngkai ni kairi reirei n te Baibara? A na mwiokoaki aomata aika boou aikai nakon taian ekaretia ao ni kataneiaaki bwa a na manga reireinia naake a kautaki imwia? Ti a bon noria n taina. Ma ti ataia ae n tokin Ana Tautaeka Kristo ae Maanna Tenga te Ririki, “e na boni buta te aonnaba n ataakin Iehova.” (Ita. 11:9) E na boni kakukurei ao ni bati te mwakuri n tenga n ririki anne!

7. E aera ngkai a na bwaina te nanoanga ni koaua ana aomata te Atua ngkana a reireinia naake a kautaki?

⁷ I aan Ana Tautaeka Kristo ae Maanna Tenga te Ririki, a bon riai n teimatoa ni karaoi bitaki natin Iehova aika i aon te aba bwa a aonga ni kakukureia. Ngaia are a na boni bane ni bwaina te nanoanga ni koaua ngkana a buokiia naake a kautaki ni buakani aroaroia aika aki raraoi, ao ni maiuakin ana kaetieti Iehova. (1Bet. 3:8) A na boni bae naake a kautaki n anaaki nanoia irouia ana aomata Iehova aika nanorinano ao a teimatoa ni ‘mwamwakuria kamaiuaia.’​—IBir. 2:12.

8. E aera bwa ti kona n taekinna bwa ti na boni kinaia ara utu ao raoraora ake a kautaki?

⁸ A bati bukina aika ti kona n taekinna iai bwa naake a butimwaeiia aomata ake a kautaki, a na boni kinaia naake a tangiraki irouia. N te katoto, ni kaineti ma kautiuti ake a a tia ni karaoaki, n taraana ao Iehova e na manga boni karaoiia aomata n aron taraakia are imwaini mateia, aroia n taetae, ao aroia n iango. Uringnga are e kabotaua te mate Iesu ma te matu, ao te mangauti bwa ai aron te uti man te matu. (Mat. 9:18, 24; Ioa. 11:11-13) Ngkana a uti aomata mani matuia, bon titeboo taraakia ma are imwaini matuia, ao e aki bitaki aia ururing. Iangoa ana katoto Rataro. Ai abong ana bong ni mate, ngaia are e a moanna ni mka rabwatana. Ma ngke e kautia Iesu, a boni kinaa naba teuaei mwaanena, ao Rataro e uringia.​—Ioa. 11:38-44; 12:1, 2.

9. E aera bwa aomata ake a kautaki a aki kororaoi ngkekei naba aia iango ao rabwataia?

⁹ E berita Iehova bwa akea ae e na kangai i aan ana tautaeka Kristo: “I aoraki.” (Ita. 33:24; IRom 6:7) Ngaia are naake a kautaki man te mate, a nang marurung raoi rabwataia. Ma a na aki waekoa ni kororaoi, bwa ngkana e riki anne, tao a na aki ngkanne kinaaki irouia aia utu ao raoraoia. N taraana, a na ririkirake ni kororaoi aomata i aan Ana Tautaeka Kristo ae Maanna Tenga te Ririki. N tokin ririki akana tenga, ao Iesu e nang kaoka te Tautaeka n Uea nakon Tamana. E na kakororaoi bwaai ni kabane te Tautaeka n Uea n aron are e tangiria Iehova, n ikotaki ma kaokaia aomata nakon te kororaoi.​—1Kor. 15:24-28; TeKao. 20:1-3.

10. E na tera aron rotakim n te mangauti?

¹⁰ Iangoia bwa tera arom ngkana ko a manga kaitiboo ma naake a tangiraki iroum. Ko na ngarengare ibukini kimwareireim ke ko na tang? Ko na rangi ni kukurei n te aro are ko a anene naba n neboa Iehova? Ni koauana, ko na bon namakina te tangira ae bati ibukin Tamam ae mwamwannano ma Natina ae akoi, ibukin te bwaintangira ae tamaroa ae te mangauti.

11. Ni kaineti ma ana taeka Iesu ake n Ioane 5:28, 29, tera ae a na karekea naake a maiuakin ana kaetieti te Atua aika raraoi?

¹¹ Iangoa aia namakin naake a kautaki ngkana a a buuta te aroaro nikawai ao ni maiuakin ana kaetieti te Atua aika raraoi. Naake a karaoi bitaki aikai a na boni karekea te mangauti are te maiu. Ni kaitaraan anne, naake a karitei nakon te Atua a na bon aki kariaiakaki bwa a na urua te rau n te Bwaretaiti.​—Ita. 65:20; wareka Ioane 5:28, 29.

12. A na kangaa ni bane ni kakabwaiaaki kaain te aonnaba iroun Iehova?

¹² I aan ana kairiri te Tautaeka n Uea, ao ana aomata te Atua ni kabane a nang nora koauan are taekinaki n Taeka N Rabakau 10:​22, ae kangai: “Bon ana kakabwaia Iehova ae karika te aomata bwa e na kaubwai, ao E aki raonna n te maraki teuana.” Man ana ibuobuoki taamnein Iehova, a nang kaubwai n te itera n taamnei ana aomata te Atua, ae nanona bwa a nang ririkirake ni katotonga Kristo ao n rikirake ni kororaoi. (Ioa. 13:15-17; IEbe. 4:23, 24) A na ririkirake marurungia ni katoabong ao n riki bwa aomata aika raoiroi riki. Ai kakukureira te maiu n te tai anne! (Iobi 33:25) Ko na kangaa ni buokaki n taai aikai, mani kananoan am iango i aon te mangauti?

13. Ni kaineti ma Taian Areru 139:1-4, e na kangaa ni kaotaki n te mangauti bwa e kinaira raoi Iehova?

¹³ N aron ae ti maroroakinna mai mwaina, ngkana e kautiia aomata Iehova, e na boni kaoki aia ururing nakoia ao anuaia ake a kinaaki iai. Iangoa te bwai ae kaotaki n anne. E rangi n tangiriko Iehova n te aro are e atai ao e uringi baike ko iaiangoi, baike ko taekin, ao baike ko karaoi. Ngaia are ngkana e kautiko, e na boni kautiko nakon arom are mai mwaina. E ataia te Uea ae Tawita ae e rangi n tabeakinira Iehova n tatabemanira nako. (Wareka Taian Areru 139:1-4.) Tera aron rotakira n ataakin ae e boni kinaira raoi Iehova?

14. Tera aron rotakira ngkana ti iaiangoa ae e kinaira raoi Iehova?

¹⁴ Ngkana ti kananoa ara iango i aon ae e kinaira raoi Iehova, ti na bon aki raraoma. Bukin tera? Uringnga are e rangi n tabeakinira Iehova. E iangoira n tatabemanira nako bwa ti rangi ni kakawaki. E nori baike a riki nakoira ni maiura. Ai karaunanora anne! Ti aki riai n namakinna bwa ti tiku n tii ngaira. E teimatoa ni mena i rarikira Iehova ni katoabong, ao e tatauraoi ni buokira.​—2Rong. 16:9.

15. E kangaa ni kaotaki wanawanan Iehova n te mangauti?

¹⁵ Maakakin te mate bon te bwai ni buaka teuana ae korakora. A kamanena maakakin te mate taani boutokaa Tatan ni kairoroiia iai aomata bwa a na kamwaneia raoraoia, ke ni kaaki aia onimaki. Ma ti bon aki maaka te bwai ni kakamaaku anne. Ti ataia ae ngkana a tiringira taani kairiribai nakoira, e na manga kautiira Iehova.  (TeKao. 2:10) Ti kakoauaa ae akea te bwai ae a kona ni karaoia ae a na urua iai ara iraorao ma Iehova. (IRom 8:35-39) Ai rianakora wanawanan Iehova ngkai e anganira te kantaninga ae te mangauti! Ibukin te kantaninga anne, ti a aki maaka ana bwai ni buaka Tatan ae rangi ni kokona naba iai ae maakakin te mate, ao ti kaninikoriaaki naba iai bwa ti na teimatoa ni kakaonimaki nakon Iehova.

16. Baikara titiraki aika ko riai n titirakiniko iai, ao ko na kangaa n ataia man am kaeka bwa tera aroni korakoran onimakinan Iehova iroum?

¹⁶ Ngkana a kakamaakuko bwa a na tiringko taani kairiribai nakon Iehova, ko na mwiokoa Iehova ibukini maium? Ko na kangaa n ataia bwa ko na boni karaoa anne? Te anga teuana, titirakiniko ni kangai, ‘A oti n au motinnano aika uarereke aika I karaoi ni katoabong bwa I onimakina Iehova?’ (Ruka 16:10) Titirakiniko naba ni kangai, ‘E oti n aroni maiuu bwa I onimakina ana berita Iehova are e na tabeakinai n te itera n rabwata ngkana I moanibwaia ana Tautaeka n Uea?’ (Mat. 6:31-33) Ngkana am kaeka eng nakon titiraki akanne, ko kaotia bwa ko onimakina Iehova, ao ko na bon tauraoi imwaini kataakim aika imwaim.​—TaeRab. 3:5, 6.

17. (a) E kangaa te mangauti ni kaotaki raoi iai ana taotaonakinnano Iehova? (b) Ti na kangaa ni kaota ara kakaitau ibukin ana taotaonakinnano Iehova?

¹⁷ E a tia ni motika te bong ao te aoa Iehova are e na karokoa iai n tokina te waaki ae ngkai. (Mat. 24:36) E na bon teimatoa n taotaona nanona ao e na aki rimoan te tai anne. E ingainga nanona ni kani kautiia maate, ma e taotaona nanona. (Iobi 14:14, 15) E tataningaa te tai ae riai are e na kautiia iai. (Ioa. 5:28) Ti bon riai ni kakaitau ibukin ana taotaonakinnano Iehova. Iangoa aei: Ibukina bwa e taotaona nanona Iehova, a bati aomata ake a a reke aia tai n “rairi nanoia,” n ikotaki naba ma ngaira. (2Bet. 3:9) E tangiriia aomata aika bati Iehova bwa a na karekea te maiu are aki toki. Ngaia are ti bia kaota ara kakaitau ibukin ana taotaonakinnano. N te aro raa? Man arora n ingainga n ukoukoriia naake “a tauraoi nanoia ni butimwaea te koaua ae kairiia nakon te maiu are aki toki,” ao ni buokiia bwa a na tangira Iehova ma ni beku ibukina. (Mwa. 13:48) N te aro anne, a na kakabwaiaaki naba man ana taotaonakinnano Iehova n ai arora.

18. E aera ngkai ti riai n taotaon nanora nakoia tabemwaang?

 ¹⁸ E na taotaona nanona Iehova n taningaa tokin tenga n ririki, ike ti nang tibwa kororaoi iai. E tauraoi Iehova n tarariaoi ara bure ni karokoa rokon te tai anne. Ngaia are ti bon riai naba n tatarai raoiroia tabemwaang ao n taotaon nanora nakoia. Iangoa ana katoto te tari te aine temanna are e rotaki buuna n te raraoma ae riao ao e a aki manga iririi bobotaki. E taku neiei: “E rangi ni karawawata aei irou. A bane n uruanaki ara babaire n ara utu ibukin taai aika imwaira.” Ma e teimatoa n taotaona nanona neiei nakoni buuna ribuakon te kangaanga aei. E onimakina Iehova ao e aki kabwaraa nanona. N aron Iehova, e tarariaoa te kangaanga ao e tataraa riki raoiroini buuna. E taku: “Iai aroaroni buu aika tamaroa, ao e kakorakoraa n tokanikai i aon ana kangaanga, teutana imwin teutana.” Ai kakawakira bwa ti na taotaon nanora nakoia kaain ara utu ke te ekaretia, ake a kekeiaki n tokanikai i aon aia kangaanga!

19. Tera ae ti riai ni motinnanoia bwa ti na karaoia?

¹⁹ E kimwareirei Iesu ma anera ngke e moani karikaki te aonnaba. Ma iangoa kukureia ngkana a a nora te aonnaba ae onrake irouia aomata aika kororaoi, aika tangira Iehova ao ni beku ibukina! Iangoa kukureia naake a anaaki mai aon te aba nako karawa bwa a na tautaeka ma Kristo, ngkana a a noriia aomata ni kakabwaiaaki man aia mwakuri! (TeKao. 4:4, 9-11; 5:9, 10) Ao iangoa te maiu ae e nang akea iai te tang ibukin te rawawata ma ai te tang ibukin te kimwareirei, ao e nang maunanako iai n aki toki te aoraki, te rawawata, ao te mate! (TeKao. 21:4) Mangkai ni karokoa te tai anne, motinnanoia bwa ko na katotonga Tamam ae tatangira, e wanawana, ao e taotaona nanona. Ni karaoan anne, ko na boni kateimatoa kimwareireim n aki ongei kataaki ake ko kaaitarai. (Iak. 1:2-4) Ai kakaitaura ngaira n ana berita Iehova are e na ‘bon iai te mangauti’!​—Mwa. 24:15.