1. Bulagurhe Yehova alemaga akalamo?

MANGO maguma Yehova aliri yenyine. Aliko arhalihugirwe. Alichiyeneze yenyine mu ngasi kantu. Chiro akaba ntyo, Mungu alilonzeze abandi basimire akalamo. Obuzigire bwarhuma Yehova ahwanza kulema.​—Zb. 36:9; 1 Yo. 4:19.

2. Gurhe Yesu na bamalayika balichiyunvirhe amango Yehova alemaga ebindi bintu?

² Oburhanzi, Yehova arhangaga kulema Omugala Yesu. N’ahola, kugerera eyola Fula yage, “ebindi bintu byoshi byalemwa,” kuheba ha n’amamiliyoni m’ebilemwa by’eroho bigwerhe obwenge. (Kol. 1:16) Yesu aligwerhe mwishingo gunene amango aliri akola n’Eshe. (Mez. 8:30) Na bamalayika ba Mungu nabo baligwerhe empanvu y’okuchishinga. Baliriho amango Yehova n’Omukozi wage Mulenga, Yesu balemaga embingu n’egulu. Gurhe bamalayika balichiyunvirhe? “Bahwanza kuheba omulenge enyanya n’omwishingo” amango egulu lyalemwaga, barhanalekaga okusimira bwenene buli chilemwa omu bilemwa bya Yehova, ahanene amango babonaga abantu bamalemwa. (Yob. 38:7; Mez. 8:31, amahugulo m’eshishi.) Buli chiguma mw’ebyola bilemwa chiyerekene obuzigire n’obwengehe bwa Yehova.​—Zb. 104:24; Ro. 1:20.

3. Nk’oku olwandiko lwa 1 Wakorinto 15:21, 22 luderhere, bushobozi buchi enterekero y’enchungu ya Yesu yalerhere?

³ Yehova alisimire abantu balame esiku n’amango omu gulu likwirire abaga alemere. Aliko amango Adamu na Eva bachihenulaga  ku Eshe w’obuzigire, echaha n’olufu byayenera oku gulu lyoshi. (Ro. 5:12) Gurhe Yehova alijirire? Han’ahola, aderha nka gurhe akachungwire abantu. (Mwa. 3:15) Y’abana ba Adamu na Eva bachungulwa kurhenga omu chaha n’olufu, Yehova abona oku ahane Omugala Yesu nka nterekero y’enchungu. Ahola, aha buli muntu obushobozi b’okuchishoga kumukolera y’alama esiku n’amango.​—Yoh. 3:16; Ro. 6:23; osome 1 Wakorinto 15:21, 22.

4. Bibazo bihe rhwaganirira mu gunola mwazi?

⁴ Echilagane cha Mungu ch’okufula abafire chizusize bibazo binene. Omufano, nkabaga, gurhe obufuke nji bwaba? Nji rhwanagala kurhegera abazigirwa berhu amango nji bafuka si? Mu njira zichi obufuke nji bwarhulerhera omwishingo? Na bichi obufuke burhuyigirize eju y’obuzigire, obwengehe n’okulindira kwa Yehova? Leka rhuganire ku buli chibazo.

5. Bichi byakarhuma rhwayemera oku abantu boshi barhakafukira chaligumira?

⁵ Amango Yehova nj’akolesa Omugala omu kufula amamiliyoni m’abantu, rhwakaderha oku nji barhafukira chaligumira. Bulagurhe rhuderhere ntyo? Bulala nka bantu banene bamafukira chaligumira oku gulu, ebyola byakalerha akalaba. Rhunamenyere oku byoshi Yehova anajira biba oku mustari. Amenyere oku y’omurhula gugenderera, bihemere ebintu bigende oku mustari. (1 Kor. 14:33) Yehova Mungu aliyerekene obwengehe n’okulindira amango aliri akola haguma na Yesu omu kurheganya egulu y’abantu balilamako. Yesu naye nj’ayiganya ezola ngeso omu chihe cha Myaka Chihumbi nj’Arhegeka amango nj’akola haguma n’abantu nji bafuma Armagedoni amango nji baba balibarheganya egulu omu kukaribisa balala nji bafuka.

6. Nk’oku olwandiko lwa Matendo 24:15 luderhere, bande nji baba omu bantu Yehova nj’afula?

 ⁶ Ech’akamaro mw’ebyola byoshi, aba nji bafuma Armagedoni, nji byahema bayigirize balala nji bafuka eju y’Obwami bwa Mungu n’eju y’amarhegeko ma Yehova. Bulagurhe? Bulala banene mu balala nji bafuka bali mu balala Ebiblia eyirikire “barhali b’okunali.” (Osome Matendo 24:15.) Nji byabahema okuhindamula bintu binene omu kalamo yi bayunguka n’enchungu ya Kristu. Jaga wawaza gurhe akasi nji kaba kangana k’okuyigiriza abola bantu barhenji chiro n’ehityu eju ya Yehova. Aliko si, buli muntu nj’agwarha owage-wage mwalimu we Biblia nk’oku bili zene? Nji byahema abola bahyahya nji bafulwa babe omu bibaga n’okukomezwa gurhe bakayigiriza aba nji bafulwa enyuma zabo? Rhukwanene rhulinge y’inji rhubona gurhe nji byaba. Aliko echirhumenyere chili chechi: okubuzinda bwa Myaka Chihumbi y’Oburhegesi bwa Kristu, “kweri egulu nji lyayunjula obumenyi eju ya Yehova.” (Isa. 11:9) Akola nji kaba kasi kalerhere mwishingo gunene nji rhwakola mu myaka chihumbi!

7. Bulagurhe abantu ba Mungu nji bagwarha olukogo amango nji baba bali bayigiriza balala nji bafuka?

⁷ Mu Myaka Chihumbi y’Oburhegesi bwa Kristu, buli mwana yeshi wa Yehova olamire oku gulu nj’ahindamula binene omu kalamo kage y’amusimisa. Echola nji charhuma boshi nji baba bagwerhe lukogo lunene amango nji baba bali barhabala balala nji bafuka yi bagala kuhima amashumi m’ebyaha byoshi n’okulama nk’oku amarhegeko ma Yehova maderhere. (1 Pe. 3:8) Nta ngangane; balala nji bafuka nji baba haguma n’abantu berhohye ba Yehova, nabo nji baba bali “bakolera obuchunguke [bwabo] bonyine.”​—Flp. 2:12.

8. Bulagurhe rhwakalangalira oku nji rhwagala kurhegera abantu b’omulala na bera berhu nji bafuka?

⁸ Hali mpanvu zinene zakarhuma rhwaderha oku balala nji bakaribisa abantu nji bafuka nji bagala kurhegera abazigirwa babo. Omufano, nka rhuwazize oku bantu Yehova afulaga mira, bibonekene oku Yehova nj’alema abantu buhyahya aliko eyi bali babona, baderha, n’okuwaza nk’oku banaliri embere bafe. Oyibuke oku Yesu alishushanyize olufu n’ero, n’obufuke nka kula omuntu akanazuka omu ro. (Mt. 9:18, 24; Yoh. 11:11-13) Amango omuntu amazuka omu ro, ab’ashushire eyi anagwerhe amagala mage na byoshi byaliri omu bwenge bwange nka kulala byanaliri amango ero lyamufarhaga, n’obwenge bwage bunashuba kumugalukira. Waza oku mufano gwa Lazaro. Haligerere siku ene eyi afire, n’omubiri gwage gwabaga gwarhondere kubola. Aliko amango Yesu amufula, bali-babo bayurukira bamurhegera, na Lazaro abere ababona, abayibuka.​—Yoh. 11:38-44; 12:1, 2.

9. Bulagurhe balala nji bafuka, barhakayinjana emibiri n’obwenge bushinganene?

⁹ Yehova alaganyize oku ntaye nji waba alamire eshishi y’oburhegesi bwa Yesu mpu ashube aderhe ntya: “Ndwere.” (Isa. 33:24; Ro. 6:7) Kweri, balala nji bafuka, nji baba bagwerhe amagala ma kwirire. Chiro akaba ntyo, nji barhayurukira bagwarha akalamo kashinganene aho han’aho. Nka nji bayurukire bashinganana, ntako abantu b’omulala haguma na bera babo bakagala kubarhegera. Bibonekene oku abola bantu boshi nji bayinja baba bashinganyanya kubuya-buya mw’echola chihe cha Myaka Chihumbi y’Oburhegesi bwa Kristu. Hanola eyola myaka chihumbi nj’ehwa, Yesu nj’agalulira Eshe Obwami. Ahola Obwami nji bwaba eyi bwamayeneza bwinja-bwinja  akasi kabo, kuheba han’obufuke bw’abantu nji bashuba kulama.​—1 Ko. 15:24-28; Ufu. 20:1-3.

10. Nka gurhe obufuke nji bwakusimisa?

¹⁰ Waza gurhe byakaba nka wamashuba kubuganana n’omuzigirwa wawe wabaga afire. Obusime nji wab’ogwerhe, nji bwakushekesa changwa nji bwakulakisa si? Obusime nji wab’ogwerhe nji bwakushunika oyimpe omu kukuza Yehova si? Rhumenyere bwinja oku nji wayunva osimire bwenene Yisho mwinja haguma n’Omugala w’echinege eju y’olola luhembo lwinja l’obufuke.

11. Nk’oku ebinwa bya Yesu bili omu Yohana 5:28, 29 biderhere, bichi nji byabera balala balamire nk’oku amarhegeko m’okunali ma Mungu maderhere?

¹¹ Ba nka wawaza omwishingo balala nji bafuka nji baba bagwerhe omango nji balekana n’oborhere bwabo bwa mira n’okulama nk’oku amarhegeko m’okunali ma Mungu maderhere. Balala nji bahindamuka ntyo omu kalamo, obufuke bwabo nji bwaba b’okulama esiku n’amango. Aliko balala nji bachihenula ku Mungu barhakayemererwa baja kuvuruga omurhula omu paradizo.​—Isa. 65:20; osome Yohana 5:28, 29.

12. Nka gurhe abantu boshi oku gulu nji bagishwa na Yehova?

¹² Amango obola Bwami nji bwaba buli bwarhegeka, abantu ba Mungu boshi nji bachibonera gurhe ebinwa bili omu Mezali 10:22 byayenera. Olola lwandiko luderhere ntya: “Emigisho ya Yehova y’echiza omuntu, Naye arhayongera malumwa haguma nayo.” Kugerera oburhabale bw’eroho lichesibwa lya Yehova, abantu ba Mungu nji baba bachirire ekiroho, ntyo kubinali; nji bagenderera kuba kuguma na Kristu, n’okuyinja bayegera obushinganyanya. (Yoh. 13:15-17; Efe. 4:23, 24) Buli lusiku nji baba bagwerhe emisi, eyi banali lubaga lwinja bwenene. Kweri, nji kaba kalamo k’omwishingo gunene amola mango! (Yob. 33:25) Aliko si, nka gurhe okuwaza eju y’obufuke kwakakurhabala kurhenga zene?

13. Nk’oku olwandiko lwa Zaburi 139:1-4 luderhere, nka gurhe obufuke nji bwayerekana oku Yehova arhuyinji bwinja-bwinja?

¹³ Nk’oku rhwabwene, amango Yehova nj’afula abantu, nj’abagalulira obwenge bwabo n’okuba abo ban’abola. Jaga wawaza bichi ebyola biderhere. Yehova akuzigire bwenene, che chirhumire amenyere anayibukire amawazo mawe, okuntu onachiyunva, okuntu onaderha n’eby’onakola. Bobunola nji bikahema oku akufule, kweri agwerhe obuhashe b’okukugalulira amawazo, oborhere n’obumuntu bwawe, k’okuderha, nk’okuwanaliri embere. Omwami Daudi alimenyere kangana gurhe Yehova ayinji buli muguma werhu bwinja-bwinja. (Osome Zaburi 139:1-4.) Gurhe rhuchiyunva amango rhumenyere oku Yehova arhuyinji bwinja-bwinja?

14. Gurhe rhukwanene kuchiyunva amango rhwamawaza bwenene okuntu Yehova arhuyinji bwinja?

¹⁴ Amango rhwamawaza bwenene okuntu Yehova arhuyinji bwinja, ntacho chakava charhulaza. Bulagurhe ntyo? Oyibuke oku Yehova ab’arhulagireko bwenene. Anabona buli muguma werhu oku ali w’akamaro emunda ali. Anabona buli chintu rhwagereremo omu kalamo chirhujirire tofauti n’abandi. Echola chihebere omurhima bwenene! Rhurhakwanene kuwaza oku rhwenyine rhuli. Yehova arhuli eburhambi buli kasanzi na buli muniti, ali alonza nka gurhe akarhurhabala.​—2 Ny. 16:9.

15. Nka gurhe obufuke buyerekene oku Yehova ayengehere?

¹⁵ Nk’abantu bayubahire olufu, abashombanyi babo bakabaseza bajire ebi barhakakola  bulala babayubahisize oku babayirha. Balala barhegekerwe na Shetani bali bakolesa echola chubahirizo omu kuseza abantu bachihenule oku bera babo changwa kubaseza bajire ebi bamenyere oku bibihire. Aliko barhakarhuseza rhujire ntyo. Rhumenyere oku chiro akaba abashombanyi berhu bakarhuyirha, Yehova nj’arhugalulira akalamo kerhu. (Ufu. 2:10) Rhuyemerere bwinja oku nta chintu bakajira chakarhulahiza kukolera Yehova. (Ro. 8:35-39) Yehova ayerekene oku ayengehere bwenene omu kurhuhereza obulangalire b’obufuke! Kugerera obola bulangalire, rhurhakayubaha amango abakozi ba Shetani bamarhuyubahisa oku barhuyirha akaba rhurhajirire ebi barhubwirire. Kandi kurhuhere obushiru b’okubera bimana emwa Yehova.

16. Bibazo bihe okwanene kuchibaza, na nka gurhe ebishubizo byawe byakakurhabala omenye kangana gurhe olangalire Yehova?

¹⁶ Nk’abashombanyi ba Yehova bamakuyubayisha oku bakuyirha, wakalangalira oku Yehova nj’akufula si? Nka gurhe wakamenya oku wakalangalira Yehova mw’akola kasanzi? Njira nguma kuli kuchibaza, ‘Emihigo yani migeke-geke ya ngasi lusiku enayerekana oku ndangalalire Yehova si?’ (Lu. 16:10) Echindi chibazo wakachibaza che chinola, ‘Okuntu nankolesa ebisanzi n’efuranga zani, biyerekene oku ndangalire oku Yehova anyenezeza ebintu by’omubiri nkerene amango namahira ‘Obwami oku nafasi y’oburhanzi si?’ (Mt. 6:31-33) Nk’oshubize nechi kw’ebyola bibazo, ahola eyi wamayerekana ok’olangalire Yehova, n’ok’ochirheganyize oku bibazo by’amango mayinjire.​—Mez. 3:5, 6.

17. a) Nka gurhe obufuke buyekerene oku Yehova analindira? b) Nka gurhe rhwakayerekana eshukurani yerhu eju y’okulindira kwa Yehova?

¹⁷ Yehova arheganyize olusiku n’esa nj’alimbula mu linola gulu libi. (Mt. 24:36) Arhaluha kulindira mpu akole eby’akakolere n’akasanzi kage karhazi hika. Agwerhe omurhumambo g’okufula abafire, aliko ali alingiriza tu. (Yob. 14:14, 15) Ali alinga kugera akasanzi kakwanene k’okubafula kahike. (Yoh. 5:28) Rhugwerhe empanvu z’okubwira Yehova koko eju y’okulindira kwage. Waza si: Bulala Yehova analindira, bantu banene, kurhuheba ho, rhuherhe akansanzi “k’okuhungama.” (2 Pe. 3:9) Yehova alonzeze bantu banene nk’oku byakagalikana bagwarhe obushobozi b’okupata akalamo k’esiku n’amango. Bobola rhukwanene kusimira Yehova bulala analindira. Nka gurhe? Rhulonze n’obushiru balala “bakwanene akalamo k’esiku n’amango” n’okubarhabala bazigire Yehova n’okumukolera.  (Mdo. 13:48) Okulindira kwa Yehova kwa balerhera enyungu nk’oku nerhu kwarhulerhere enyungu.

18. Bulagurhe rhukwanene kulindira abandi?

¹⁸ Yehova nj’ashuba kulindira kugera oku buzinda bwa myaka chihumbi y’arhubona oku rhuli bashinganyanya. Oku amola mango managera, Yehova agenderera kubabalira ebyaha byerhu buzira ngangane. Okuderha okuli, rhukwanene kuyiga Yehova omu kubona engeso zinja z’abandi n’okubalindira. Rhulole omufano gwa mwali-werhu muguma ogwerhe eba wahanzaga kulwala ebaka analeka kuja oku mbuganano. Aderha ntya: “Byalinkomerere bwenene, akalamo kerhu kahindamuka juba-juba, rhurhakachigalire kukola byoshi rhwakalonzeze kukola.” Aliko oyola mukazi ogwerhe obuzigire agenderera kulembera eba. Alangalira Yehova, arhanaluhaga chiro n’akatyu. Kuguma na Yehova, ayibirira ebibazo bya mira anagederera kuwaza oku ngeso zinja z’eba. Ashubire kuderha ntya: “Bani agwerhe engeso zinja bwenene, anali achihangana kurhulera omu bwege kubuya-buya.” Chili chintu ch’akamaro bwenene rhulindire abantu b’omu mulala gwerhu changwa b’omu chibaga cherhu bali bachihangana kuhima ebibazo byabo!

19. Bichi rhukwanene kuhigirira?

¹⁹ Yesu na bamalayika baligwerhe omwishingo gunene amango egulu lyalemwaga. Aliko, ba nka wawaza busime bungana gurhe nji baba bagwerhe amango nji babona gurhe egulu lyayunjulirana abantu bashinganene, bazigire n’okukolera Yehova. Shubaga owaze busime bungana gurhe balala nji barhenga oku gulu n’okuja embingu yi barhegeka haguma na Yesu nji bagwarha amango nji babona gurhe abantu ba buli buko bali bayunguka kugerera akasi nji baba bali bakola. (Ufu. 4:4, 9-11; 5:9, 10) Jaga washuba kuwaza akalamo k’amango emiziga y’omwishingo nji yaja ahali h’emiziga y’amalumwa, eyi n’obulwala, emishibo n’olufu byahwere loshi. (Ufu. 21:4) Oku olola lusiku lwanagera, ohigirire okuyiga Yisho w’obuzigire, w’obwengehe, onalindira. Nk’ojirire ntyo, wagenderera kugwarha omwishingo, chiro wahurana n’ebibazo bili gurhe. (Yak. 1:2-4) Rhugwerhe busime bunene bwenene eju y’echilagane cha Yehova chiderhere oku “nji haba obufuke”!​—Mdo. 24:15.