1. Vim li cas Yehauvas thiaj tsim ib puas tsav yam?

UA NTEJ Yehauvas tsim cov tubtxib saum ntuj thiab ib puas tsav yam, tsuas muaj nws ib leeg xwb. Txawm muaj nws ib leeg xwb, tsis muaj lwm tus nrog nws los nws yeej muaj kev zoo siab. Tiamsis vim Yehauvas muaj kev hlub nws thiaj tsim ib puas tsav yam kom lwm leej lwm tus tau nrog nws muaj kev zoo siab thiab.​—Phau Ntawv Nkauj 36:9; 1 Yauhas 4:19.

2. Yexus thiab cov tubtxib saum ntuj xav li cas thaum Yehauvas tsim lub ntuj, lub ntiajteb, thiab tibneeg?

² Thawj tug uas Yehauvas tsim yog nws tus tub Yexus ces nws thiab nws tus Tub mam li tsim ib puas tsav yam xws li nkawd tsim cov tubtxib saum ntuj. (Kaulauxais 1:16) Yexus zoo siab nrog nws Leej Txiv ua haujlwm ua ke. (Pajlug 8:30) Cov tubtxib saum ntuj los zoo siab heev thaum lawv pom Yehauvas thiab Yexus nkawd tsim tau lub ntuj thiab lub ntiajteb. Lawv sawvdaws qhuas Vajtswv thaum Vajtswv tsim lub ntiajteb thiab ib puas tsav yam uas nyob hauv lub ntiajteb, qhov uas lawv zoo siab tshaj yog thaum Vajtswv tsim tibneeg. (Yauj 38:7; Pajlug 8:31) Txhua yam uas Yehauvas tsim qhia tias nws muaj kev hlub thiab muaj laj lim tswvyim.​—Phau Ntawv Nkauj 104:24; Loos 1:20.

3. Raws li 1 Kauleethaus 15:21, 22, qhov uas Yexus tuag theej peb lub txhoj pab tau peb li cas?

³ Yehauvas xav kom tibneeg nyob mus ib txhis hauv lub ntiajteb uas nws tsim tau zoo nkauj heev. Tiamsis vim Adas thiab Evas fav xeeb rau nkawd Leej Txiv Yehauvas, nkawd thiab nkawd cov menyuam thiab xeeb leej xeeb ntxwv thiaj txawj laus txawj tuag. (Loos 5:12) Yehauvas ua li cas xwb? Thaum ntawd Yehauvas npaj tau ib txoj hau kev los cawm noob neej. (Chivkeeb 3:15) Yehauvas yuav muab nws tus Tub Yexus los tuag theej Adas thiab Evas  nkawd tej tub tej ki tej xeeb leej xeeb ntxwv lub txhoj kom lawv thiaj dim kev txhaum thiab kev ploj kev tuag. Twb yog li no cov uas teev tiam nws thiaj yuav tau txojsia ntev dhawv mus ib txhis.​—Yauhas 3:16; Loos 6:23; nyeem 1 Kauleethaus 15:21, 22.

4. Hauv zaj no peb yuav tham txog cov lus nug twg?

⁴ Muaj ntau yam uas peb xav paub txog thaum Vajtswv tsa cov tuag sawv rov qab los. Xws li Vajtswv yuav tsa cov tuag sawv rov qab los li cas? Peb puas yuav paub peb cov neeg thaum Yehauvas tsa lawv sawv rov qab los? Peb yuav zoo siab npaum li cas thaum cov tuag sawv rov qab los? Thiab qhov no qhia li cas rau peb txog Yehauvas txojkev hlub, nws lub laj lim tswvyim, thiab nws lub siab ntev? Cia peb tham txog cov lus nug no.

5. Vim li cas peb thiaj paub tias Yehauvas yuav tsis tsa tag nrho cov uas tuag lawd sawv rov qab los thooj txhij?

⁵ Thaum Yehauvas txib nws tus Tub los tsa neeg coob coob sawv rov qab los, nws yuav tsis tsa lawv sawv los thooj txhij. Yog vim li cas? Yog cia li muaj tibneeg sawv coob coob thooj txhij li ntawd ces yuav ua kev ntxhov hnyo rau sawvdaws. Thiab Yehauvas tsis lam tau lam ua kom muaj kev ntxhov hnyo li ntawd. Nws paub hais tias yuav tsum ua kom muaj lub muaj log muaj hauv paus hauv ntsis tibneeg thiaj muaj kev kaj siab. (1 Kauleethaus 14:33) Vajtswv Yehauvas muaj laj lim tswvyim thiab ua siab ntev heev thaum nws nrog nws Leej Tub npaj lub ntiajteb rau tibneeg nyob. Lub sijhawm uas Yexus Kav 1,000 Xyoo los Yexus yuav muaj laj lim tswvyim thiab ua siab ntev pab cov uas dim Amankedoos npaj lub ntiajteb tos txais cov tuag sawv rov qab los.

6. Raws li Tes Haujlwm 24:15, Yehauvas yuav tsa cov neeg zoo li cas sawv rov qab los?

⁶ Qhov tseem ceeb tshaj, cov uas dim Amankedoos yuav tau qhia cov uas sawv rov qab los txog Vajtswv lub Nceeg Vaj thiab Yehauvas tej kevcai. Yog vim li cas? Vim rau qhov cov uas yuav sawv rov qab los ntawd feem coob yog “cov neeg ua phem” lossis cov neeg tsis ncaj ncees. (Nyeem Tes Haujlwm 24:15.) Lawv  yuav tsum hloov lawv lub neej lawv thiaj tau txais koob hmoov ntawm Yexus tus nqi txhiv thiab tau nyob mus ib txhis. Sim xav seb haujlwm yuav ntau npaum li cas thaum peb yuav tsum qhia tsheej plhom leej neeg uas tsis tau paub Yehauvas dua li. Puas yog lawv ib leeg yuav tsum muaj ib tug qhia lawv ib yam li peb ua tamsim no? Puas yuav muab cov kawm tshiab no tso rau tej koom txoos thiab pab kom lawv paub qhia cov uas tseem yuav sawv rov los tom hauv ntej? Peb yuav tsum tos txog thaum ntawd peb mam li paub. Tiamsis peb paub tias thaum Khetos Kav 1,000 Xyoo xaus lawd “neeg thoob ntiajteb yuav paub tus TSWV [“Yehauvas,” NWT ].” (Yaxayas 11:9) Lub caij Khetos Kav 1,000 Xyoo, haujlwm yuav ntau heev tiamsis peb yuav zoo siab ua!

7. Vim li cas Vajtswv cov neeg thiaj to taub cov uas sawv rov qab los?

⁷ Lub caij Khetos Kav 1,000 Xyoo, Yehauvas cov neeg yuav tsum niaj hnub hloov kom lawv ua tau li Yehauvas lub siab nyiam. Lawv thiaj to taub cov uas sawv rov qab los thiab paub pab kom lawv ua lub neej raws li Yehauvas txojcai es tsis txhob rov qab mus qaug rau kev txhaum. (1 Petus 3:8) Cov uas sawv rov qab los yuav pom tias Yehauvas cov neeg yog neeg txo hwjchim thiab lawv los tseem niaj hnub hloov kom lawv ua tau li Yehauvas lub siab nyiam. Qhov no kuj yuav ua rau cov uas sawv rov qab los xav teev tiam Yehauvas thiab.​—Filipis 2:12.

8. Ua li cas peb thiaj hais tau tias peb yeej yuav paub peb cov neeg uas sawv rov qab los?

⁸ Txawm li cas los peb yeej yuav paub peb cov neeg uas sawv rov qab los. Thaum ub, thaum Yehauvas tsa cov tuag sawv rov qab los, lawv yeej tseem zoo li qub, hais lus li qub thiab lawv txojkev xav ua ntej lawv tuag tsis tau hloov. Cov neeg uas Yehauvas yuav tsa yav tom hauv ntej hauv vaj kaj siab los nws yuav ua ib yam li ntawd thiab. Nco ntsoov Yexus hais tias thaum ib tug neeg tuag ces zoo li nws pw tsaug zog xwb. (Mathais 9:18, 24; Yauhas 11:11-13) Thaum ib tug neeg tsaug zog sawv los, nws yeej tseem zoo li qub, hais lus li qub thiab muaj lub cim xeeb qub. Yog li ntawd thaum cov tuag sawv rov qab los ces yuav zoo ib yam li tus neeg tsaug zog sawv xwb. Muab piv xam li thaum Yexus tsa Laxalus sawv rov qab los. Laxalus twb tuag tau 4 hnub thiab nws lub cev twb pib lwj lawm. Tiamsis thaum Laxalus sawv rov qab los nws 2 tug muam yeej paub hais tias yog nws, thiab Laxalus los yeej tseem nco qab nkawd.​—Yauhas 11:38-44; 12:1, 2.

9. Thaum Vajtswv tsa cov neeg tuag sawv rov qab los, lawv tseem zoo tsis tau tiav. Yog vim li cas?

⁹ Yehauvas cog lus hais tias hauv Vaj Kaj Siab yuav tsis muaj ib tug hais tias: ‘Kuv mob lawm.’ (Yaxayas 33:24; Loos 6:7) Yog li ntawd thaum Yehauvas tsa cov tuag sawv rov qab los lawv yuav tsis muaj mob muaj nkeeg lawm. Tiamsis lawv tseem zoo tsis tau tiav. Rau qhov yog lawv zoo tiav log lawm ces ntshe lawv tsev neeg thiab tej phoojywg yuav tsis paub lawv. Lub caij Khetos Kav 1,000 Xyoo, noob neej mam li maj mam pib zoo zuj zus mus txog thaum lawv zoo tiav log. Tom qab 1,000 xyoo xaus lawm, Yexus yuav muab lub Nceeg Vaj cob rov qab rau nws Leej Txiv. Thaum ntawd Vajtswv lub Nceeg Vaj twb pab tau neeg thoob ntiajteb zoo tiav log thiab ib puas tsav yam zoo raws li Yehauvas lub siab nyiam lawm.​—1 Kauleethaus 15:24-28; Tshwmsim 20:1-3.

10. Thaum Vajtswv tsa cov tuag sawv rov qab los, koj yuav zoo siab npaum li cas?

¹⁰ Sim xav seb koj yuav zoo siab npaum li cas  thaum koj rov pom cov uas koj hlub sawv rov qab los. Tej zaum koj yuav luag thiab los kua muag vim koj zoo siab heev. Tej zaum koj yuav tsa suab hlo hu nkauj qhuas Yehauvas thiab. Txawm li cas los peb yuav nco peb Leej Txiv thiab nws Leej Tub txiaj ntsig heev rau qhov uas nkawd tsa cov tuag sawv rov qab los.

11. Raws li Yexus cov lus hauv Yauhas 5:28, 29, cov uas mloog Vajtswv lus yuav tau dabtsi?

¹¹ Sim xav seb cov uas sawv rov qab los yuav zoo siab npaum li cas thaum lawv pib hloov lawv lub neej kom haum Vajtswv siab. Cov uas hloov lawv lub neej li no yuav tau txojsia ntev dhawv mus ib txhis hauv Vaj Kaj Siab. Tiamsis Yehauvas yuav tsis cia cov uas tsis kam hloov lawv lub neej thiab tsim kev kub ntxhov rau sawvdaws tau txojsia mus ib txhis nyob hauv lub Vaj Kaj Siab.​—Yaxayas 65:20; nyeem Yauhas 5:28, 29.

12. Yehauvas yuav foom koob hmoov li cas rau cov uas nyob hauv ntiajteb?

¹² Thaum Vajtswv lub Nceeg Vaj kav lub ntiajteb lawm, tag nrho Vajtswv cov neeg yuav pom tias muaj tseeb li Pajlug 10:22 hais no: “Twb yog tus TSWV [“Yehauvas,” NWT ] foom koob hmoov rau koj, koj thiaj muaj txiag npluanuj. Tsis yog qhov uas koj niaj hnub khwv ua rau koj npluanuj.” Thaum ntawd Yehauvas lub hwj huam dawb huv yuav pab nws cov neeg kom lawv xyaum coj li Khetos mus txog thaum lawv tus cwjpwm zoo tiav log. (Yauhas 13:15-17; Efexus 4:23, 24) Tsis tas li ntawd xwb, txhua txhua tagkis thaum lawv sawv los lawv lub cev yuav zoo zuj zus thiab muaj zog tuaj. Lub sijhawm ntawd peb lub neej yuav zoo tiag tiag li. (Yauj 33:25) Yog peb ua zoo xav txog lub sijhawm uas Vajtswv tsa cov tuag sawv rov qab los, yuav pab tau peb li cas tamsim no?

13. Thaum Yehauvas tsa cov tuag sawv rov qab los qhia tias nws paub peb zoo npaum li cas, raws li Phau Ntawv Nkauj 139:1-4?

¹³ Zoo li peb twb tham tas los lawd, thaum Yehauvas tsa cov tuag sawv rov qab los lawv yuav muaj lub cim xeeb qub thiab zoo li tus neeg qub. Qhov no qhia li cas txog Yehauvas? Qhov no qhia tias Yehauvas hlub koj heev, nws nco qab tej koj xav tej koj ua thiab tej koj hais huv tibsi. Yog hais tias koj ho tas sim neej lawm es nws yuav tau tsa koj sawv rov qab los, los yuav yoojyim rau nws muab koj lub cim xeeb, koj tus cwjpwm, thiab tus neeg qub rov qab rau koj. Vajntxwv Daviv paub tias Yehauvas paub peb txhua leej txhua tus zoo heev. (Nyeem Phau Ntawv Nkauj 139:1-4.) Thaum peb paub li no, pab tau peb li cas?

14. Peb xav li cas xwb txog qhov uas Yehauvas paub peb zoo heev?

¹⁴ Peb tsis txhob cia qhov uas Yehauvas paub peb zoo heev ua rau peb txhawj. Yog vim li cas? Nco ntsoov tias Yehauvas hlub peb heev. Peb txhua leej txhua tus muaj nqis heev rau nws. Nws saib ntsoov peb thiab paub tias peb loj hlob li cas thiab vim li cas peb thiaj ua tej yam uas peb ua. Qhov no txhawb tau peb lub zog heev rau qhov peb paub tias Yehauvas yeej nrog nraim peb txhua txhua hnub thiab xav pab peb.​—2 Xwmtxheej Vajntxwv 16:9.

15. Qhov uas Yehauvas cog lus tias nws yuav tsa cov tuag sawv rov los qhia tias nws muaj laj lim tswvyim zoo heev li cas?

¹⁵ Cov neeg uas ntshai tuag, lawv cov yeeb ncuab yuav yuam tau lawv ua tej yam uas lawv tsis xav ua. Cov uas nyob hauv Xatas qab kev tswj hwm yuav hem tau cov neeg ntawd tias yog lawv tsis ntxeev siab rau lawv cov phoojywg lossis tsis ua raws li cov yeeb ncuab hais  ces lawv yuav raug tua pov tseg. Yog lawv ho hem peb li no los peb yuav tsis ntshai rau qhov peb paub hais tias txawm peb tuag lawm los Yehauvas yuav tsa peb sawv rov qab los. (Tshwmsim 2:10) Qhov uas Yehauvas cog lus tias nws yuav tsa cov tuag sawv rov los qhia tias nws muaj laj lim tswvyim zoo heev. Qhov no pab kom peb tsis txhob ntshai thaum Xatas cov neeg hem tias lawv yuav muab peb tua. Qhov no kuj pab tau peb ua siab tawv qhawv muab siab npuab rawv Yehauvas. Yeej tsis muaj ib yam dabtsi uas yuav ua rau peb tso tseg tsis teev tiam Nws.​—Loos 8:35-39.

16. Koj yuav tau nug koj tus kheej li cas koj thiaj paub seb koj puas tso siab rau Yehauvas tiag?

¹⁶ Yog Yehauvas cov yeeb ncuab hem tias lawv yuav muab koj tua, koj puas tso siab tias Yehauvas yeej yuav tsa koj sawv rov qab los? Koj yuav ua li cas koj thiaj paub tias thaum txog lub sijhawm zoo li ntawd koj yuav tso siab rau Yehauvas? Koj yuav tsum nug koj tus kheej li no, ‘Tej uas kuv niaj hnub ua puas qhia tias kuv tso siab rau Yehauvas?’ (Lukas 16:10) Lossis koj kuj nug koj tus kheej li no, ‘Kuv puas ntseeg tias Yehauvas yuav muab tej uas kuv cheem tsum rau kuv yog kuv muab nws lub Nceeg Vaj tso ua ntej?’ (Mathais 6:31-33) Yog koj tso siab rau Yehauvas niaj hnub nimno ces thaum koj raug kev sim siab yav tom hauv ntej los koj yuav tso siab rau nws thiab.​—Pajlug 3:5, 6.

17. (1) Qhov uas Yehauvas tos txog caij txog nyoog nws mam li tsa cov tuag sawv rov qab los qhia tias nws muaj lub siab ntev li cas? (2) Peb yuav ua li cas nco Yehauvas txiaj ntsig rau qhov uas nws ua siab ntev?

¹⁷ Yehauvas twb teem caij teem nyoog lawm tias nws yuav rhuav tshem lub qab ntuj phem no thaum twg. (Mathais 24:36) Nws yuav ua siab ntev tos kom txog thaum ntawd. Nws yeej tos nrhw txog hnub uas nws yuav tsa cov tuag sawv rov qab los tiamsis nws yuav ua siab ntev tos kom txog caij txog nyoog tso. (Yauj 14:14, 15; Yauhas 5:28) Peb zoo siab tias Yehauvas siab ntev. Tsis li ntawd ces peb coob tus yuav tsis muaj sijhawm muab peb ‘tej kev txhaum tso povtseg.’ (2 Petus 3:9) Yehauvas xav kom muaj neeg coob li coob tau, tau txojsia ntev dhawv mus ib txhis. Yog li ntawd peb yuav tsum nco nws txiaj ntsig rau qhov uas nws ua siab ntev. Peb yuav nco nws txiaj ntsig yog tias peb rau siab ntso mus nrhiav cov neeg uas xav tau txojsia ntev dhawv mus ib txhis thiab pab kom lawv los hlub thiab teev tiam Yehauvas. (Tes Haujlwm 13:48, NWT ) Yog lawv los teev tiam Yehauvas ces qhov uas Yehauvas siab ntev yuav pab tau lawv ib yam li pab tau peb thiab.

18. Vim li cas peb yuav tau ua siab ntev rau lwm tus?

 ¹⁸ Yehauvas ua siab ntev rau peb rau qhov nws paub hais tias peb yuav zoo tsis tiav mus txog thaum Khetos Kav 1,000 Xyoo xaus. Ua ntej ntawd, yog peb ua txhaum los Yehauvas yuav zam txim rau peb. Yog li ntawd peb yuav tsum tau xyaum Yehauvas es xam pom qhov zoo txog lwm tus thiab ua siab ntev rau lawv. Cia peb tham txog ib tug muam uas nws tus txiv muaj kev txhawj xeeb ntau yam es tsis mus kev sib txoos lawm. Tus muam no hais tias, “Yeej nyuaj kawg li. Wb lub neej cia li hloov kiag lawm. Wb ua tsis tau tej uas wb npaj siab yuav ua.” Txawm li ntawd los tus muam no yeej ua siab ntev rau nws tus txiv thiab pab nws tsis tseg. Nws thov Yehauvas pab nws thiab xam pom qhov zoo txog nws tus txiv xwb. Nws hais tias, “Kuv tus txiv muaj ntau yam zoo thiab nws yeej ua li nws ua tau kom nws zoo zuj zus.” Tseem ceeb heev rau peb ua siab ntev rau peb tsev neeg thiab cov kwvtij nkauj muam hauv lub koom txoos uas raug kev nyuaj siab ntxhov plawv ntau yam.

19. Ua ntej txog hnub uas Vajtswv tsa cov tuag sawv rov qab los, peb yuav tau xyaum ua li cas?

¹⁹ Yexus thiab cov tubtxib saum ntuj zoo siab heev thaum Vajtswv tsim tau lub ntiajteb. Lawv hajyam yuav zoo siab thaum lawv pom muaj cov neeg uas zoo tiav log hlub thiab teev tiam Yehauvas nyob puv nkaus lub ntiajteb. Cov uas ua vajntxwv nrog Khetos kav saum ntuj los yuav zoo siab heev thaum lawv pom tias lawv tes haujlwm pab tau noob neej li cas. (Tshwmsim 4:4, 9-11; 5:9, 10) Sim xav seb yuav zoo npaum li cas thaum peb los kua muag tsis yog vim peb quaj ntsuag tiamsis vim peb muaj kev zoo siab xyiv fab. Thiab peb yuav zoo siab npaum li cas thaum kev mob kev nkeeg, kev quaj ntsuag thiab kev ploj kev tuag yuav tsis muaj dua li lawm. (Tshwmsim 21:4) Tiamsis ua ntej hnub ntawd los txog cia peb xyaum peb Leej Txiv uas muaj kev hlub, muaj laj lim tswvyim, thiab muaj lub siab ntev. Yog peb xyaum coj li Yehauvas ces txawm peb raug dabtsi los peb yeej yuav muaj kev zoo siab. (Yakaunpaus 1:2-4) Peb ua Yehauvas tsaug rau qhov uas nws cog lus tias nws ‘yuav tsa cov neeg uas tuag lawm sawv rov qab los.’​—Tes Haujlwm 24:15.