1. Weeche was hot Yeehoowa tas leepe erxaft?

ES WAAR een tsayt woo Yeehoowa aleen waar. Awer tee hot net weeche tas sich traurich kexpiirt. Yeehoowa praucht net tas yemant pay tëm playpt fer froo wëre. Awer Kot wolt aach tas anere leepe teete un froo weyere. Weeche liip, Yeehoowa hot aan kefang erxafe. (Sal. 36:9; 1 João 4:19)

2. Wii hon Yeesus un ti engele sich kexpiirt wii Yeehoowa ti anere tinge erxaft hot?

² Eyerst, Yeehoowa hot een mitaarwayter kemacht — sayn Soon Yeesus. Tan, torich sayn Soon, hot Yeehoowa al ti anere tinge kemacht, tepay milyoone engele. (Col. 1:16) Yeesus waar aarich froo tas eyer khont mit sayn Fater xafe. (Pro. 8:30) Un ti engele hate aach uersache fer sich fraye. Tii hate te ekstra priwilëj kehat fer tat sin wën Yeehoowa un sayn Pauermayster, Yeesus, hon ti himele un ti eyert kemacht. Wii hon ti engele sayn frooheet ketsaycht? Tii hon Kot mit yukse keloopt wën eyer hot ti eyert erxaft, un tii hon wayter tëm keloopt wii se kesiin hon ales was noch kemacht waar, tepay Kot sayn letst wunerlich aarwayt — ti mënxe. (Jó 38:7; Pro. 8:31, noote) Yeete eene fon tiise kriatsyoone hot Yeehoowa sayn liip un kluucheet taytlich ketsaycht. (Sal. 104:24; Rom. 1:20)

3. Tëm noo 1 Coríntios 15:21, 22, was tuut Yeesus sayn fray khaaf opfer meechlich mache?

³ Yeehoowa wolt tas ti mënxe fer imer leepe teete uf te xeen eyert woo eyer fer tëne kemacht hot. Awer wii Aatam un Ewa hon sich keeche sayn liipliche Fater kextelt, ti sint un te toot hon tunkelheet uf te eyert keprung. (Rom. 5:12)  Was hot Yeehoowa kemacht? Eyer hot klaych kesaat wii teet eyer ti mënxe rete. (Gên. 3:15) Yeehoowa teet sayn Soon, Yeesus, wii fray khaaf opfer kepe un soo meechlich mache tas Aatam un Ewa sayn khiner fon te sint un tëm toot pefrayt wëre. Yeete persoon teet ti xans hon fer raus suuche Yeehoowa tiine un soo tas eewiche leepe kriin. (João 3:16; Rom. 6:23; lees 1 Coríntios 15:21, 22. *)

4. Was fer frooche tuun mer in tiise artikel antworte?

⁴ Es kept fiile frooche woo mer khene mache iwer Yeehoowa sayn ferxpreche fer ti toote uf ruufe. Tsum payxpiil, wii tuut tas ufxtaye fom toot woerxaynlich pasiire? Meecht mer unser keliipte erkhëne wën se tsurik tsum leepe khome? In was fer aate tuut tas ufxtaye fom toot frooheet fer uns pringe? Un wii triwer noo tenke iwer tas ufxtaye fom toot khan ti weyert woo mer kepe fer Yeehoowa sayn liip, kluucheet un ketult ferkreese? Wole mer yeete eene fon tiise frooche antworte.

5. Warom khene mer waarte tas net al tuun tsum leepe khome in te selwich xtun?

⁵ Torich sayn Soon, tuut Yeehoowa milyoone un milyoone layt fom toot uf ruufe. Awer, meyer khene waarte tas se tuun net al tsum leepe khome in te selwich xtun. Warom net? Wayl wën es pletsich tsu fiil layt uf te eyert weyere, tas teet een torich naner sin. Awer Yeehoowa tuut niks in een xtrupich aat mache. Tee wees tas, fer ti friit tauere, ales mus in ortnung sin. (1 Cor. 14:33) Yeehoowa Kot waar kluuch un ketultich wën eyer mit Yeesus kexaft hot fer ti eyert lamsam in richte, tas ti mënxe khente tat leepe. Torich ti  Tausent Yoere Rechiirung, tuut Yeesus tiise selwiche kwaliteete tsayche, wën eyer mit tii woo ti Armaxeton iwerleepe xaft, fer ti eyert in richte fer tii woo ufxtaye, wilkhome.

6. Tëm noo Atos 24:15, weer tuut tswixich tii sin woo Yeehoowa tuut uf ruufe?

⁶ Awer tii woo te Armaxeton iwerleepe, mise noch etwas mache fer tii woo tuun fom toot uf xtaye helfe — in woerheet, is tas haupste: tëne in lërne iwer Kot sayn Raych un was Yeehoowa saat richtich is. Warom? Wayl ti meyerste woo uf xtaye tuun, wëre fom krup fon “te unkerechte” sin. (Lees Atos 24:15.) * Tii prayche, tan, fiile ënerunge mache fer fon Kristus sayn fray khaaf opfer nutse kriin. Tenk ploos een pisye traan iwer wii fiil aarwayt wërt tas: milyoone layt in lërne woo tuun kraat kaar niks iwer Yeehoowa wise. Tuut yeete eene een leerer ploos fer sich hon, soo wii meyer hayt een Piipel xtuutyum fiire? Tuun se teel fon een kemaynt mache un keiipt wëre fer, tii woo noo tëne uf xtaye, in lërne? Mise mer waarte fer es wise. Was mer xon wise, is tas, am ën fom Kristus sayn Tausent Yoere Rechiirung, ‘ti eyert wërt sicher fol mit Yeehoowa sayn khëntnis sin’. (Isa. 11:9) Meyer tuun fiil aarwayt torich ti tausent yoere hon, awer tas wërt een xeen aarwayt sin!

7. Warom tuut Kot sayn folek empatii hon wën se, tii woo fom toot uf xtaye, in lërne?

⁷ Torich ti Tausent Yoere Rechiirung fon Kristus, ale fon Yeehoowa sayn folek uf te eyert tuun wayter ënerunge mache fer tëm kefale. Tes weeche, tuun se al empatii hon soo lang wii se helfe, tii woo uf xtaye, torich ferkheerte ketanke un winxe triwer wech khome un mache was Yeehoowa saat richtich is. (1 Ped. 3:8) Tii woo tsurik tsum leepe khome, tuun siin tas Yeehoowa sayn folek teemuutich is un wayter ënerunge macht fer Kot kefale; un tan, tuun se aach winxe Yeehoowa mit tiise folek aan peete. (Fil. 2:12)

8. Warom khene mer klaape tas mer tuun unser keliipte erkhëne wën se fom toot uf xtaye?

⁸ Meyer hon phaar uersache fer se klaape tas mer tuun unser keliipte erkhëne, wën tii fom toot uf xtaye. Tsum payxpiil, weeche ti aat wii Yeehoowa ti layt friier fom toot uf keruuft hot, meyer khene waarte tas Tee tuut ti layt noch mool erxafe kraat soo wii se aus kesiin, kexprooch un ketenkt hon pisye foer se xtërpe. Eriner tich tas Yeesus hot ferklaycht te toot mim xloof, un tas ufxtaye fom toot mim ufwachte fom xloof. (Mat. 9:18, 24; João 11:11-13) Wën yemant fom xloof uf wacht, tuut se noch ekaal aus siin un xpreche, un hot ti selwiche erinerunge wii wën se xloofe kang is. Kuk mool Lasaro sayn payxpiil. Tee waar xon fier taache toot, soo sayn khërper hat xon aan kefang se faule. Awer wën Yeesus hot tëm uf keruuft, sayn xwestere hon tëm klaych erkhënt, un Lasaro sicher hot sich fon tëne erinert. (João 11:38-44; 12:1, 2)

9. Warom tuun tii woo fon toot uf keruuft wëre net klaych perfëkte ferxtant un khërper kriin?

⁹ Yeehoowa ferxprecht tas im Paratiis nimant tuut saan: “Ich sin krank.” (Isa. 33:24; Rom. 6:7) Tes weeche, tii woo fom toot uf keruuft wëre, tuun kesunte khërper kriin. Awer tii tuun net klaych perfëkt wëre. Wën net, sayn familye un froynte teete se fiilaycht net erkhëne. Siit es aus tas al ti mënxheet tuut xrit noo xrit perfëkt wëre torich ti Tausent Yoere Rechiirung fon Kristus. Ploos am ën fon  te tausent yoere, tuut Yeesus tas Raych tsurik fer sayn Fater kepe. In tiise tsayt, ti aarwayt fom Raych tuut xon fërtich sin — too tepay ti mënxheet perfëkt mache. (1 Cor. 15:24-28; Apo. 20:1-3)

10. Wii tuut tas ufxtaye fom toot tich petrefe?

¹⁰ Iwerlee tich wii wërt tas sin tayn keliipte noch mool wilkhome. Tuust tuu fon frooheet lache, orer prile? Wërst tuu soo froo, tas tuu tuust liite fer Yeehoowa singe? Etwas is sicher: tuu tuust een xtark liip xpiire fer tayn Fater, woo soo fiil sich mit uns khimert, un fer sayn liipliche Soon, wayl tii hon tich tiise wunerlich kexenk kep — tas ufxtaye fom toot!

11. Tëm noo Yeesus sayn wërter in João 5:28, 29, was tuut pasiire mit tii woo tuun Kot aan heere?

¹¹ Iwerlee tich ti frayt woo tii woo fom toot uf xtaye xpiire tuun, wën se sayn alt personlichkheet aus tsiie un aan fange se leepe tëm noo was Kot saat richtich is! Tii woo tiise ënerunge mache, tuun “een ufxtaye fers leepe” kriin. Uf te aner sayt, tii woo sich keeche Kot xtele, wëre net erlaupt te friit fom Paratiis xteere. (Isa. 65:20; lees João 5:28, 29. *)

12. Wii wëre al uf te eyert fon Yeehoowa keseechent?

¹² Unich Kot sayn Raych, al fon Kot sayn folek tuun mërke wii ti wërter fon Provérbios 10:22 wërklich woer sin: “Yeehoowa sayn seeche macht raych, un eyer tuut khee xwiirichkheet tepay setse.” Mit te hilef fon Yeehoowa sayn kayst, Kot sayn folek tuut kaystlich raych wëre — tii tuun imer mee soo wii Kristus sin un mit te tsayt, tuun se perfëkt wëre. (João 13:15-17; Efé. 4:23, 24) Yeete taach tuun se kesunter un peser layt wëre. Was fer een frooes leepe wërt tas sin! (Jó 33:25) Awer wii khan tas hayt xon uns helfe in tëm ufxtaye fom toot triwer noo tenke?

13. Soo wii in Salmo 139:1-4 xteet, wii tuut tas ufxtaye fom toot tsayche wii fiil Yeehoowa khënt uns?

¹³ Soo wii mer kraat kexprooch hon, wën Yeehoowa tuut ti mënxe fom toot uf ruufe, tuun se ti selwiche erinerunge hon un ti selwich sort persoon sin. Tenk mool aan was tas petayt. Yeehoowa liipt tich soo fiil tas eyer mërkt un erinert sich fon ales was tuu tenkst, xpiirst, saast un machst. Soo, wën eyer praucht tich fom toot uf ruufe, khent eyer laycht tich noch mool mache wiis tuu foer waarst. Te kheenich Tawi wust tas Yeehoowa tuut yeete eene fon uns kuut khëne. (Lees Salmo 139:1-4.) * Wën mer ferxteen wii fiil Yeehoowa khënt uns, wii fine mer uns?

14. Wii sole mer uns xpiire wën mer triwer noo tenke aan wii fiil Yeehoowa khënt uns?

¹⁴ Wën mer triwer noo tenke aan wii fiil Yeehoowa khënt uns, prauche mer uns net ketanke mache. Weeche was net? Eriner tich tas Yeehoowa tuut sich fiil mit tich khimere. Tee fint soo xeen yeete kleene tings woo macht tas tuu soo eenich wërst. Tee kept fiil acht fer ales woos tuu in tayn leepe mit machst — woo macht tas tuu wërst weer tuu pist. Tas treest uns, kël? Tes weeche, prauchst tuu tich nii aleen fine. Yeehoowa is kans ticht pay tich — yeete minut fon yeete taach — un suucht keleechenheete fer tich helfe. (2 Crô. 16:9)

15. Wii tuut tas ufxtaye fom toot Yeehoowa sayn kluucheet pewayse?

¹⁵ Wën ti layt hon pang fom toot, sayne faynte khene saan tas tii tuun tëne um pringe fer tëne tswinge etwas mache woo wole se net mache. Tii woo unich Satanaas sayn kontrol sin, khene tiise pang penutse fer yemant tswinge sayne froynte im xtich lose un fon sayn klaape uf kepe. Awer tiise waf tuut net keeche uns pariire. Meyer wise tas wën unser faynte uns um pringe, Yeehoowa tuut uns tas leepe tsurik kepe. (Apo. 2:10) Meyer sin uns sicher tas niks woo se mache khan unser froyntxaft mit Yeehoowa fersaue. (Rom. 8:35-39) Ti hofnung fon tëm ufxtaye fom toot fer uns kepe tsaycht wii kluuch Yeehoowa is! Torich tii, ferprecht eyer eene fon Satanaas sayn xtarkste wafe un, in te selwich tsayt, lost uns fol mit koraaj fer troy tsu Tëm plaype.

16. Was prayche mer uns frooe? Un wii tuun ti antworte tsayche wii fiil tuun mer uf Yeehoowa traue?

¹⁶ Wën Yeehoowa sayn faynte saan tas tii tuun tich um pringe, tuust tuu traue tas Yeehoowa tuut tich tsurik tsum leepe ruufe? Wii khanst tuu tas xon yets wise? Een aat is fer tich selepst frooe: ‘Tuun ti kleene ëntxlise woo ich yeete taach mache, tsayche tas ich uf Yeehoowa traue?’ (Luc. 16:10) Een aner frooch khan sin: ‘Tuut ti aat woo ich mayn tsayt un kelt fertraype, tsayche tas ich klaape aan Yeehoowa sayn ferxpreche fon mayn neetichkheete uf phase, wën ich tas Raych im eyerste plats tuun?’ (Mat. 6:31-33) Wën tayn antwort fer tiise tswaay frooche is ‘yaa’, tan tuust tuu tsayche tas tuu uf Yeehoowa traust un fërtich pist fer yeete proop woo noch khomt. (Pro. 3:5, 6)

17. (a) Wii tuut tas ufxtaye fom toot pewayse tas Yeehoowa ketultich is? (b) Wii khene mer tsayche tas mer weyert fer Yeehoowa sayn ketult kepe?

¹⁷ Yeehoowa hot xon een taach un uertsayt pextimt fer tiise alt sisteem tsum ën pringe. (Mat. 24:36) Tee tuut net sayn ketult ferliire un etwas mache foer tiise pextimte tsayt. Un aach wën eyer een xtarke wunx hot fer ti toote uf ruufe, tee is ketultich. (Jó 14:14, 15) Tee is am waarte ti richtich tsayt khome fer tëne tsum leepe tsurik pringe. (João 5:28) Meyer hon kuute uersache fer weyert fer Yeehoowa sayn ketult kepe. Tenk traan: wayl Yeehoowa ketultich is, fiile layt, tepay meyer, hon tsayt kehat fer ‘sich peroye’. (2 Ped. 3:9) Yeehoowa wil tas soo fiil layt wiis meechlich is, fer imer  leepe. Soo, wole mer tsayche tas mer weyert fer Yeehoowa sayn ketult kepe. Wii? Torich unser pestes mache fer ti layt suuche woo te ‘richtich muut fer tas eewiche leepe hon’, un tëne helfe Yeehoowa liipe un tiine. (Atos 13:48) Tan, tuun se aach nutse fon Yeehoowa sayn ketult kriin, soo wii meyer.

18. Warom sole mer ketultich mit te anere sin?

¹⁸ Yeehoowa wees tas mer tuun ploos perfëkt sin am ën fon te tausent yoere. Pis tan, tuut eyer ketultich sin un wilich unser feeler fertsaye. Soo, meyer sole tëm sayn payxpiil noo mache un aan te xeene kwaliteete fon te anere uns traan hale, un ketultich mit tëne sin. Kuk tas payxpiil fon een xwester. Tëne sayn man hot aan kefang tiif ëngstlichkheete layte. Weeche tas, hot eyer noo kelos in te fersamlunge keen. Ti xwester saat: “Tas waar seer xroo fer mich. Ales was mer hate fer tas futuer wii familye kepleent, is uner kang.” Awer tiise liiplich fraa waar wayter ketultich mit sayn man. Tii hot uf Yeehoowa ketraut un hot nii uf kep. Soo wii Yeehoowa, tii hot net fer ti propleeme kekukt, awer sich traan kehal aan te xeene kwaliteete fon sayn man. Tii saat: “Mayn man hot wunerliche kwaliteete un tee is am sich aan xtrenge fer torich sayn ëngstlichkheete triwer wech khome, xrit noo xrit.” Wii wichtich is tas mer ketultich sin mit tii in unser familye orer kemaynt woo sin am sich aan xtrenge fer torich xrooe propleeme triwer wech khome.

19. Was sole mer pextimt sin fer se mache?

¹⁹ Yeesus un ti engele hon sich aarich kefrayt wën ti eyert erxaft kep is. Awer, iwerlee tich wii froo tuun se plaype, wën se ti eyert siin fol mit perfëkte mënxe woo Yeehoowa liipe un tiine. Iwerlee tich wii tuun ti kesalpter woo mit Yeesus im himel rechiire sich fraye, wën se ti mënxheet siin nutse fon sayn aarwayt kriin. (Apo. 4:4, 9-11; 5:9, 10) Un xtel tich mool foer te taach wën ti treene nii mee weeche traurichkheet laafe, awer ploos weeche frooheet; ti tsayt wën krankheet, traurichkheet un toot sin fer imer fat kang. (Apo. 21:4) Pis tiise tsayt, say pextimt fer tayn liiplich, kluuch un ketultich Fater noo mache. Wëns tuu soo machst, tuust tuu tayn frooheet hale, een tuun ti xwiirichkheete woos tuu mit machst. (Tia. 1:2-4) Wii petanklich khene mer sin fer Yeehoowa sayn ferxpreche tas ‘es een ufxtaye fom toot kept’! (Atos 24:15)