1. Ngatta pinaratu ni Jehova i inango?

EGGA i tiempo nga magitetadday si Jehova, ngem ari yayya nga maraddam. Ari nga kawagan ni Jehova i maski sinni tapenu mabbalin tu magayayya. Maski paga kunnari, ikayà na Dios nga mattolay gapa i tanakuan anna magayayya ira. Megafu ta aya, namaratu si Jehova.​—Sal. 36:9; 1 Juan 4:19.

2. Anni i natageno ni Jesus anna na anghel ira ta pinaratu ni Jehova?

² Ollu, pinaratu ni Jehova i Anana nga si Jesus. Tapus, gukaban naw nga ollu nga Ana, “naparo ngamin i ganna-gannug,” nelagum i minillion ira nga anghel. (Col. 1:16) Nagayayya si Jesus nga makipattrabahu ta Yamana. (Prov. 8:30) Magayayya gapa i anghel ira. Nemammatadda mismu i pinamaratu ni Jehova anna na Malalaki nga Trabahador nga si Jesus ta langi anna ta davvun. Anni i reaksion na anghel ira? ‘Nakkukkulle ira ta paddayaw’ turi ta naparatu i davvun anna siguradu nga zinayoda si Jehova ta kada pinaratuna, nelagum tatun i pinakamakasta nga obra maestrana—i totolay. (Job 38:7; Prov. 8:31) Masingan tatun ira nga pinaratu i aya anna i sirib ni Jehova.​—Sal. 104:24; Roma 1:20.

3. Segun ta 1 Corinto 15:21, 22, anni i pinapposible na sakrifisio nga tavvu ni Jesus?

³ Gakkag ni Jehova nga mattolay tu mannanayun i totolay ta makakkasta nga planeta nga pinaratuna. Ngem turi ta narrebelde si Adan anni Eva kontra ta minaggiddu nga Yamada, narresulta yatun ta liwa anna patay ta ngamin nga totolay.  (Roma 5:12) Anni i kingngua ni Jehova? Insigida nga kinagina nu kunnasina nga paliaran i totolay. (Gen. 3:15) Niyawa ni Jehova i tavvu nga namapposible para ta ána ni Adan anni Eva nga mapalubbangan ta liwa anna patay. Megafu tatun, niddanna tu tiansa i kada tolay nga mappili nga passerbian Yayya anna makalawa tu mannanayun nga inango.​—Juan 3:16; Roma 6:23; bibbigan i 1 Corinto 15:21, 22.

4. Anni ira nga pakkiavu i ikonsidera tam taw nga artikulo?

⁴ Mamalattuag tu aru nga pakkiavu i promesa na Dios nga paginnolay. Angngariganna, kunnasi noka nga mesimmu i paginnolay? Makilala tam kari i iddeddukattam ira sonu mapaginnolay ira? Ngatta mamagayayya nittam noka i paginnolay? Anni i meyuffun na paginnolay tapenu maappresia tam i aya, sirib, anna pappasa-pasensia ni Jehova? Sinaggi-tadday nga ikonsidera tam danatun nga pakkiavu.

5. Ngatta posible nga organisadu anna ari nga maggiriddang i kapaginnolay na ngamin nga totolay?

⁵ Sonu paginnolayan ni Jehova gukaban na Anana i minillion nga totolay, posible nga ari ira nga maggiriddang. Ngatta gapa? Megafu ta nu insigida nga umaru i totolay ta davvun, marresulta yatun ta gulu. Ngem ammu tam nga kanayun nga organisadu i pangngua ni Jehova ta ngamin nga gannug. Ammuna nga tapenu mannanayun i imammo, mawag nga mattalupaddian i unnug. (1 Cor. 14:33) Masirib anna mapasensia si Jehova nga Dios turi ta nakipattrabahu yayya kani Jesus ta sisinu nga pangiprepara ta davvun nigeda nga pinaratu i totolay. Kunnatun gabbalaman sonu Tanga-rivu Dagun nga pammaguray ni Jesus. Ipasinganna noka danatun nga kualidad sonu makipattrabahu yayya ta nepaliag ira ta Armagedon ta pangipreparada ta davvun tapenu alawatan uli danuri napaginnolay.

6. Segun ta Kingngua 24:15, sinni noka i nelagum ta paginnolayan ni Jehova?

 ⁶ I pinaka-importante nga kuan noka danuri mepaliag ta Armagedon ay i panudduda ta napaginnolay ira meyannung ta Pappatulan na Dios anna meyannung ta ikikkiddaw ni Jehova. Ngatta? Megafu ta magaru ta mapaginnolay ay melagum ta “ari matunung.” (Bibbigan i Kingngua 24:15, NW.) Aru nga panguloli i mawagda nga kuan tapenu mabbenefisio ira ta tavvu ni Cristo. Nonopan ngana laman i minillion nga totolay nga mawag nga matudduan tu kinakurug gafu ta awan vuluvuga tu ammuda meyannung kani Jehova. Egga kari i manuddu ta kada tolay, gittana pangikondukta tam ta paggigiammu tu Biblia ta maddaggun? Egga kari noka i kongregasion ira nu sitaw nga meyasayn danaw nga mapaginnolay anna masanay kari gapa ira tapenu tudduan danuri tumunug nira nga mapaginnolay? Innaggattam yatun. Ngem ammu tam nga ta ultimu na Tanga-rivu Dagun nga pammaguray ni Cristo, “i davvun ay siguradu nga mapannu tu pakannammu kani Jehova.” (Isa. 11:9) Kuruga okupadu ittam noka ngem magayayya durante natun nga Tanga-rivu Dagun!

7. Ngatta magigiammu noka na totolay na Dios i makipattageno durante nga tudduadda danuri mapaginnolay?

⁷ Ta Tanga-rivu Dagun nga Pammaguray ni Cristo, mawag tu tulu-tuloy nga manguli i ngamin nga totolay ni Jehova tapenu mapagayayyada yayya. Megafu tatun, magigiammuda i makipattageno turi ira ta mapaginnolay durante nga uffunadda ira nga labanan i tendensia nga makaliwa anna tapenu makapattolay ira segun ta estandarte ira ni Jehova. (1 Ped. 3:8) Siguradu nga maddukko danuri mapaginnolay ta minappakalinno nga totolay ni Jehova nga mappuppursigi gapa nga ‘talakkurugan nga ibalin i kapaliagda.’​—Fil. 2:12.

8. Kunnasi tam makagi nga makilala tam noka i iddeddukattam ira nga mapaginnolay?

⁸ Aru i rason nu ngatta makagi tam nga makilala danuri manafung ta napaginnolay ira i iddeddukadda. Angngariganna, base ta nesimmu ngana ira nga paginnolay, posible nga paratuan uli ni Jehova i totolay tapenu i itchurada, i paguvovugda, anna i pannonoda ay kagitta lagapa turi ta nige ira nga natay. Daddamman gapa nga negitta ni Jesus i patay ta pakkatrug anna i paginnolay ta pallukag. (Mat. 9:18, 24; Juan 11:11-13) Nu malukag i tadday nga tolay, parefu lagapa i itchura anna i ngaralna gitta turi ta nakkatrug yayya anna ari lagapa nga mawawan i memoriana. Innattam i nesimmu kani Lazaro. Appa nga aggaw ngana yayya nga natay yatutta navunno ngana i baggina. Ngem turi ta pinaginnolay yayya ni Jesus, insigida nga nakilala yayya na wawwaragina nga babbay anna siguradu nga kilalana lagapa ira.​—Juan 11:38-44; 12:1, 2.

9. Ngatta ari insigida nga perfekto i nono anna i baggi danuri mapaginnolay?

⁹ Nipromesa ni Jehova nga ta paraiso, awan ngana tu makkagi nga: “Mataki ngà.” (Isa. 33:24; Roma 6:7) Yatutta, metoli i makasta nga gawa-gawayyan danuri mapaginnolay. Ngem ari nga insigida nga mabbalin ira tu perfekto. Ta nu kunnatun, ari ngana ira nga makilala danuri iddeddukadda. Awayyana nga sisinu nga mabbalin tu perfekto i ngamin nga totolay durante ta Tanga-rivu Dagun nga Pammaguray ni Cristo. Ta ultimu natun nga marivu nga dagun, tatun laman nga itoli ni Jesus i Pappatulan ta Yamana. Tatun gapa nga tiempo, netuppal ngana na Pappatulan i ngamin  nga ikaya ni Jehova nga kuan natun, nelagum ngana i pamabbalin ta totolay tu perfekto.​—1 Cor. 15:24-28; Nep. 20:1-3.

10. Anni noka i efekto nikaw na paginnolay?

¹⁰ Imajinammu sonu dafungammu i natay ira nga iddeddukammu. Gumalo ka kari noka onu tumangi megafu ta ayayya mu? Onu fermi kari i ayayya mu yatutta makkansiokka tapenu dayawan si Jehova? Tadday laman i siguradu: Mas nga ayatammu noka i minangngikavurung nga Yamam anna i ari nga makasarili nga Anana megafu ta kappabbaw nga regalu na paginnolay.

11. Segun ta kinagi ni Jesus ta Juan 5:28, 29, anni noka i mesimmu turi ira ta mattuppal ta Dios?

¹¹ Fugurammu i ayayya nga matageno danuri mapaginnolay durante nga alsadda ngana i dana nga kata-katoleda anna mattuppal ira ta Dios. Danuri mangngua tu kunnatun ira nga panguli ay mepamavulun nga mattolay tu mannanayun ta paraiso. Ngem ari nga mepamavulun nga daralan danuri marrebelde ta Dios i imammo ta paraiso.​—Isa. 65:20; bibbigan i Juan 5:28, 29.

12. Kunnasi noka nga bendisionan ni Jehova i ngamin nga egga ta davvun?

¹² Ta pammaguray na Pappatulan, maekspiriensa noka na ngamin nga totolay na Dios nga kurug i nakagi ta Proverbio 10:22: “I bendision ni Jehova i mamarriku ta tadday, anna awan tu daddam nga iyammunna tatun.” Ta uffun na espiritu ni Jehova, sisinu nga mabbalin tu kagitta ni Cristo i personalidad na totolay na Dios anna mabbalin ira tu perfekto. (Juan 13:15-17; Efe. 4:23, 24) Ta kadaggaw, mas nga magawa-gawayyan anna makkasta noka i kata-katoleda. Anni ngana kasta natun nga pattolay! (Job 33:25) Ngem kunnasi nga makoffun nikaw ta maddaggun i monag nga pannono ta paginnolay?

13. Segun ta Salmo 139:1-4, kunnasi nga pakurugan na paginnolay nga ammammu ittam tu mapia ni Jehova?

¹³ Gittana nagigiammu tam, sonu paginnolayan ni Jehova i totolay, itolina i memoria anna i personalidadda nigeda nga natay. Kebalinan natun nga kuruga iddeddukan naka ni Jehova. Oobserbanna anna keraddammanna i ngamin nga nononopan, mataga-tageno, kakkagian, anna kukukuammu. Ngatta? Tapenu sonu mawag nga paginnolayan naka, mabi laman para nisa nga itoli i memoria, ugali, anna i kata-katolem. Kinagi ni Patul David nga ammammu tu mapia ni Jehova i kada tadday nittam. (Bibbigan i Salmo 139:1-4.) Anni i efekto natun nittam?

14. Anni nakuan i efektona nittam nu nonopattam i konag na pakannammu ni Jehova nittam?

¹⁴ Nu nonopattam nga ammammu ittam tu mapia ni Jehova, ariattam nakuan nga mavurung nga ammuna maski i pakkafiattam ira. Ngatta? Daddamman nga kuruga ikavurungan ittam ni Jehova. Para nisa, espesial i kada tadday nittam. Keraddammanna gapa i ngamin nga gannug nga naka-influwensia ta pattoletam. Kuruga makapabannay yatun! Ariattam nakuan vuluvuga matageno nga magitetadday ittam. Ari ittam vuluvuga panawan ni Jehova anna kayàna nga uffunan ittam.​—2 Cro. 16:9.

15. Ngatta pakurugan na paginnolay nga masirib si Jehova?

¹⁵ Efektibo nga armas i pangananassing nga matay. Usan yatun danuri kontroladu ni Satanas tapenu fuersan i totolay nga  traidoran i kokkofudda onu kuan i mali. Ngem awan tu pakawayya natun nittam. Ammu tam nga nu patayan ittam na kumokkontra nittam, itoli ni Jehova i inango tam. (Nep. 2:10) Kumbinsidu ittam nga awan tu mamagimmang nittam nga masserbi kani Jehova. (Roma 8:35-39) Talaga masirib si Jehova ta pangiyawana ta iddanama na paginnolay! Gafu tatun, ari ittam nga mamippig nu ananassingadda ittam nga matay nu ariattam kuan i ipakuada. Maggutu ittam gapa nga kanayun nga mammakatalo kani Jehova.

16. Anni ira i iyavu mu ta baggim, anna kunnasi makoffun nikaw i tabbag mu tatun ira?

¹⁶ Nu ananassingaddaka na kalaban ira ni Jehova nga patayaddaka, mattalo ka kari nga paginnolayan naka ni Jehova? Kunnasi ka kasiguradu? Iyavu ta baggim, ‘Pakurugan kari na baraddi nga desisiokku ta kadaggaw nga mattattalo ngà kani Jehova? (Luc. 16:10) Pakurugan kari na pangusà ta oras anna kuartù nga mattattalo ngà kani Jehova nga iyawana i pakawagakku ira nu pagolluakku i Pappatulanna?’ (Mat. 6:31-33) Nu wan i tabbag mu tatun ira nga pakkiavu, mapakurug mu nga mattalo ka kani Jehova, anna preparadu ka nga arubangan i maski anni nga duttal nga kapurueba.​—Prov. 3:5, 6.

17. (a) Ngatta pakurugan na paginnolay nga mapasensia si Jehova? (b) Kunnasi tam mepasingan nga appresiattam i pappasa-pasensia ni Jehova?

¹⁷ Neplano ngana ni Jehova i eksakto nga aggaw onu oras nu kanni nga pangultimuanna yaw nga marake nga mundo. (Mat. 24:36) Ari yayya magguyu nige natun nga tiempo megafu ta mapasensia yayya. Kakayàna nga paginnolayan i natay ira, ngem mapasensia yayya nga maginnag. (Job 14:14, 15) Iinnagganna i mepangngo nga tiempo tapenu paginnolayan ira. (Juan 5:28) Mepangngo laman gafu nga mappabalo ittam ta pappasa-pasensia ni Jehova. Nonopan yaw: Megafu ta minappasensia si Jehova, aru nga totolay nelagum ngana ittam i napeggan tu tiempo nga ‘pallikuran i katagaruliadda.’ (2 Ped. 3:9) Ikayà ni Jehova nga mas nga aru nga totolay i mapeggan tu tiansa nga mattolay tu mannanayun. Yatutta ipasingattam nga appresiattam i appasensiana. Kunnasi? Alerattam danuri “mepangngo nga mangalawa tu mannanayun nga inango” anna uffunattam ira nga ayatan anna passerbian si Jehova. (King. 13:48, NW ) Megafu tatun, mabbenefisio gapa ira ta pappasa-pasensia ni Jehova kagitta tam.

18. Ngatta pasa-pasensiattam nakuan i tanakuan?

 ¹⁸ Mapasensia nga innaggan ni Jehova i pangultimu na tanga-rivu nga dagun nigena nga ekspektan nga mabbalin ittam tu perfekto. Adde ta ari paga nga nabalin yatun nga tiempo, sigga-paran yayya nga pakoman i liwi-liwa tam. Kunnatun ittam nakuan gapa. Maffokus ittam ta makasta ira nga kualidad na tanakuan anna pasensiattam ira. Egga i sister nga grabe i pavvuru-vurung (onu, anxiety attacks) na atawana anna nagimmang nga makistudy. “Marigi-riga yatun para niakan,” kunna. “Gavva nga nanguli i pattolemi anna ariammi ngana makua i ngamin nga kayàmi nga kuan.” Ngem pinasa-pasensian na sister i atawana. Nattalo yayya kani Jehova anna kanayun lagapa nga inuffunanna i atawana. Kagitta ni Jehova, naffokus yayya ta positibo ira nga gannug meyannung ta atawana. Kinagina: “Egga ira i makasta nga ugali na atawà, anna laba-labananna i grabe nga pavvuru-vurunna.” Kuruga importante gafu nga pasensiattam i kafamilia onu kakongregasiottam nga atta-attammadda i mariga ira nga problema!

19. Anni i determinadu tam nga kuan?

¹⁹ Nagayayya si Jesus anna i anghel ira turi ta naparatu i davvun. Imajinammu gafu i ayayyada sonu mapannu i davvun tu perfekto nga totolay nga mangaya anna masserbi kani Jehova. Nonopan gapa i ayayya danuri na makipammaguray kani Cristo ta langi durante nga masingi-singadda nga mabbenefisio i totolay ta pammagureda. (Nep. 4:4, 9-11; 5:9, 10) Imajinammu gapa sonu awan ngana tu tumangi megafu ta paddaga-raging, anna sonu awan ngana vuluvuga tu mattaki, maddaddam, anna matay. (Nep. 21:4) Nige natun nga tiempo, determinadu ka nakuan nga parigan i minaggiddu, masirib, anna minappasensia nga Yamam. Nu kuammu yatun, ari nga mawawan i pagayayya mu maski anni nga kapurueba i arubangammu. (Sant. 1:2-4) Talaga mappabalo ittam ta promesa ni Jehova nga “egga noka i paginnolay”!—King. 24:15, NW.