1. Ni kyahi ekyaleka Yehova iniahangika engebe?

HANABYA omughulhu Yehova abya iniane iyuwene. Aliwe syabya omo mbwera. Isyaliyithagha oyukamubugha-bughaya. Nomwabine, Nyamuhanga mwanza n’abandi batsemere engebe. Busana n’olhwanzo, Yehova mwatsuka erihangika.​—Esy. 36:9; 1 Yn. 4:19.

2. Ebya Yehova ahangika mubyaleka Yesu n’abamalaika ibayowa bathi?

² Yehova mwatsuka erihangika Mughalha wiwe, Yesu. Neryo, erilhabira omo Mughalha wiwe w’erimbere oyu, “mwahangika ebindu byosi,” imwamune n’abamalaika abosi. (Kol. 1:16) Yesu mwatsema kutsibu erikolha na Thatha wiwe. (Emi. 8:30) N’abaghalha ba Nyamuhanga abamalaika nabu mubatsema. Mubalhangira Yehova n’Omukoli wiwe Mukulhu ya Yesu bakahangika olhubulha n’ekihugho. Abamalaika mubakolhaki? “Mubutha obwogho busana n’obutseme” ekihugho kikahangikwa, kandi ahathe erithika-thika mubalholha embere eritsema bakalhangira ebyosi ebyo Yehova ahangika, imwamune n’ekihangikwa ekikolire ndeke eky’erighunzerera, abandu. (Yobu 38:7; Emi. 8:31) Obuli kighuma ky’okwa bihangikwa ebi, kikakanganaya olhwanzo n’amenge wa Yehova.​—Esy. 104:24; Abar. 1:20.

3. Ngoku kiri omwa 1 Abanya Korinto 15:21, 22, ni kyahi ekikathokekana busana n’ekihongwa ky’endongolya ya Yesu?

³ Yehova abya anzire abandu ibatsemera engebe kera na kera okwa kihugho kibuyanga ekyo abya iniabirihangika. Adamu  na Eva babere bakayisamambulha oku Thatha wabu w’olhwanzo, ekibi n’olhuholho mubyingira muna-kihugho. (Abar. 5:12) Yehova mwakolhaki? Aho naho, mwahiraho emitheghekere y’erilhamiryamo abandu. (Enz. 3:15) Yehova mwathegheka erihayo endongolya eyanga lekire ikyathokekana abaana ba Adamu na Eva eribya bwiranda okwa kibi n’olhuholho. Neryo mwabya iniangana lighira obuli mundu erithwamu erimukolera nuku asyabana engebe y’erikotha.​—Yn. 3:16; Abar. 6:23; soma 1 Abanya Korinto 15:21, 22.

4. Ni bibulyo byahi ebyo thukendi kaniako omo mwatsi ono?

⁴ Omulhaghe wa Nyamuhanga ow’erilhubukya abandu akaleka ihabya bibulyo bingyi. Ng’eky’erileberyako, erilhubuka lyangana syabya lithi? Mbwino thunemwendi syaminyerera abanze bethu bakalhubuka? Erilhubuka likendi syathulethera etseme omwa nziraki? Kandi erighanirya okw’ilhubuka lyanga ghumya lithi omubere wethu w’erisima olhwanzo lhwa Yehova, amenge, n’erighumisirizya liwe? Thukanaye okwa bibulyo ebyo kighuma okwa kighuma.

5. Busana naki ni ky’amenge erikirirya ngoku abandu bakendi syalhubuka omwa buyithondeke?

⁵ Yehova akendi syabya akalhubukya akathabarika k’esyomiliyoni sy’abandu erilhabira omu Mughalha wiwe, ithwangana lengekania thuthi sibendi syalhubukira murundi mughuma. Busana naki? Kundi abandu eripumukira okwa kihugho ikyangana leka ihabulha obuyithondeke. Kandi syalikolha ebindu bya kimbunzange. Anasi ngoku obuholho eribyaho, hatholere ihabya obuyithondeke. (1 Kor. 14:33) Yehova Nyamuhanga mwakangania amenge n’erighumisirizya akakolha haghuma na Yesu erihangika ekihugho lyolho-lyolho athali ahangika omundu. Na Yesu nayu akendi  syakangania emibere iyan’eyo omwa Buthabali bw’Emyaka Rukumi akakolha haghuma n’abakendi syalhamibwa okwa Harmagedoni bakayitheghekera erithangirira abakendi syalhubuka.

6. Ngoku kiri omwa Emibiri 24:15, abaghuma b’okwa abo Yehova akendi syalhubukya babahi?

⁶ Ekikulhu kutsibu, abakendi syalhama okwa Harmagedoni bakendi syayithagha erikangirirya abakendi syalhubuka ebihambire oko Bwami bwa Nyamuhanga n’ebya Yehova akayithagha. Busana naki? Kundi abangyi b’okwa bakendi syalhubukibwa bakendi syabya ini baghuma b’okwa “babi [“abathathunganene,” NW].” (Soma Emibiri 24:15.) Bakendisya yithagha erikolha esyombinduka nuku baghasirawe omwa ndongolya ya Kristo. Thalengekania ng’akendisyabya mubiiri mungahi erikangirirya esyomiliyoni sy’abandu abathasi Yehova ekwenene eyihambire oku Nyamuhanga. Mbwino obuli mundu akendisyabya akakangiriribwa iyuwene ngoku thukan’eghesaya abigha be Biblia munabwire? Mbwino abahyaka abakendi syalhubuka aba bakendi syahebwa ebithunga eby’erihindaniramu n’erithendekwa ngoku bang’eghesya abakendi syabasubuka? Ithwe thulinde thulebaye. Aliwe ekyo thwasi, okw’ihwererera ly’Erithabalha lya Kristo ery’Emyaka Rukumi, “ekihugho kyasyusulha n’eriminya ly’omwami mukulhu.” (Isa. 11:9) Ni bingyi kandi ebikatsemesaya ebikendi syakolhwa omo myaka rukumi!

7. Busana naki abandu ba Nyamuhanga bakendisya yithagha erilhumirirwa abakendi syalhubukibwa bakabeghesya?

⁷ Omo myaka Rukumi y’Erithabalha lya Kristo, abaana ba Yehova abosi ab’okwa kihugho bakendi syayithagha erikolha esyombinduka nuku bamutsemesaye. Neryo abosi bakendi syalhumiriranwa erilhua okwa muthima bakawathikya abakendi syalhubuka erihindulha emibere yabu n’erithoka erighendera okwa bihano bya Yehova. (1 Pet. 3:8) Ahathe erithika-thika, abakendisya lhubuka bakendisya nywana abandu ba Yehova abayikehirye, nabu abakendi syabya ibanemukolera omulhamu wabu.​—Fil. 2:12.

8. Busana naki ithwabugha thuthi thwangana syaminyerera abahughu n’abanywani bethu abakendi syalhubuka?

⁸ Ni nzumwa nyingyi esikendi syaleka ithwalengekania thuthi abakendi sy’angirira abakalhubukibawa bakendi syathoka eriminyerera abanze babu. Ng’eky’erileberyako, erikwamana n’erilhubuka eryabirithabya, Yehova anganasyalhubukya abandu ibabya ibangana bugha, erilengekania n’erisosa ngoku banabya ibakisigha ibaholha. Wibuke ngoku Yesu mwasosekania olhuholho n’othulho kandi n’erilhubuka ng’eribuka omwa thulho. (Mt. 9:18, 24; Yn. 11:11-13) Abandu bakabya bakabuka, bakabugha, erilengekania, n’erisosa ngoku banalhue bakayaghotsera. Thalengekania okwa ky’erileberyako kya Lazaro. Mwaghunza biro bbini inianaholire, neryo omubiri wiwe abya iniabiritsuka erihonda. Aliwe, Yesu abere akamulhubukya, bali babu mubalhuaho ibamuminya, kandi ahathe erithika-thika, Lazaro mwabibuka.​—Yn. 11:38-44; 12:1, 2.

9. Busana naki abakendi syalhubuka sibendi syalhubuka ibanahikene?

⁹ Yehova akalhagha athi omwa buthabali bwa Kristo, sihali oyukendi syabugha athi: “Nyilhwere.” (Isa. 33:24; Abar. 6:7) Neryo, abakendi syalhubuka bakendi syathunga amaghalha awuwene. Aliwe, sibendisyalhuaho bakahikana. Kiryabya kithya, ab’okw’ibo ibangana syalemwa eribaminyerera. Abandu banganasya ghenda bakahikana lyolho-lyolho omwa Buthabali bwa Kristo obw’Emyaka Rukumi. Yesu akendi syasubulirya Thatha wiwe  y’Obwami okw’ihwererera ly’emyaka rukumi. Obwami bukendi syabya ibwamabirikolha ebyosi ebyo Yehova anzire, imwamuli n’erihikania abandu.​—1 Kor. 15:24-28; Erib. 20:1-3.

10. Erilhubuka likendi syakuhambako lithi?

¹⁰ Thalengekania nga bikendi syabya bithi wukathasyaramukya abanze bawu. Obutseme obo bunemwendisyaleka iwaseka kutse iwalira? Wunemwendisyimbira ighuma eripipa Yehova? Ahathe erithika-thika, thukendi syayilhangirira eritsomana lya Thatha wethu n’olhwanzo lhwa Mughalha wiwe busana n’ekihembo kibuyanga eki eky’erilhubuka.

11. Erikwamana n’ebinywe bya Yesu ebiri omu Yoane 5:28, 29, abakendi syaghendera okwa bihano bya Nyamuhanga ebithunganene bakendi syathungaki?

¹¹ Thalengekania abakendi syalhubuka ng’abakendisyatsema bungahi bakalhusya omundu wakera n’erighendera okwa bihano bya Nyamuhanga ebithunganene. Abakendi syakolha esyombinduka esi bakendi syabyaho kera na kera omwa Paradiso. Aliwe, abakendi syayisamambulha oku Nyamuhanga sibendi syalighirwa eritsandya obuholho bw’omwa Paradiso.​—Isa. 65:20; soma Yoane 5:28, 29.

12. Yehova akendi syatsumulha athi abandu abosi okwa kihugho?

¹² Omwa buthabali bw’Obwami, abandu ba Nyamuhanga abosi bakendi syayilhangirira okwenene kw’ebiri omwa Emisyo 10:22 hathi: “Omughisa w’Omwami Mukulhu akaletha obutheke [obughuda]; nayu syalithomeka obulighe bo kugho.” Busana n’obuwathikya bw’omulimu abuyirire wa Yehova, abandu ba Nyamuhanga bakendi syabya bagaga bunyakirimu, ni bugha ambu, bakendi syathoka erigherererya ndeke emibere ya Kristo n’erilholera okw’ihikana. (Yn. 13:15-17; Efe. 4:23, 24) Obuli kiro, bakendi syabya n’amaghalha awuwene kandi abandu abuwene. Eyi ka yikendi syabya engebe eyuwene okwa buthuku obo! (Yobu 33:25) Neryo, kwesi, erighanirya okw’ilhubuka kyanga kuwathikya kithi lino?

13. Ngoku kiri omwa Esyonyimbo 139:1-4, erilhubuka likendi syakangania lithi ngoku Yehova athwasi ndeke?

¹³ Ngoku thwabirilhangira, Yehova akendisyabya akalhubukya abandu, akendisya balhubukya ibangana lengekania kandi ibanasosire ngoku banabya. Lengekanaya ekyo nga kikamanyisayaki. Yehova akwanzire kutsibu indi akabya inianasi kandi inian’ibukire ebyosi ebya wukalengekanaya, eriyowa lyawu, ebya wukabugha, n’erikolha. Neryo amabya w’erisyakulhubukya, ikikendisyamwolhobera eryibuka amalengekania, emibere, n’emisosere yawu. Omwami Dawudi abya inianasi ngoku Yehova asi ndeke obuli mughuma w’okw’ithwe. (Soma Esyonyimbo 139:1-4.) Ithwe eriminya ngoku Yehova anathwasi ndeke kikathuhambako kithi lino?

14. Eriminya ngoku Yehova anathwasi ndeke, kikathuhambako kithi?

¹⁴ Eriminya ngoku Yehova anathwasi ndeke, kikaleka ithuthahangya-hangya. Busana naki? Wibuke ngoku Yehova athutsomene kutsibu. Akalhangira obuli mughuma w’okw’ithwe mwa w’obughuli. Ak’ibuka ebyosi ebyo thwabirilhabamo. Eki ka kikahumulikanaya! Isithwayowa nga thuli ithw’ibene. Obuli dakika, Yehova akabya iniane haghuma nethu, erilebya ng’akendi thuwathikya athi.​—2 Emy. 16:9.

15. Erilhubuka likakanganaya lithi amenge wa Yehova?

¹⁵ Erisagha olhuholho ky’ekithegho ekikalire ekya Sitani akakolesaya. Abakasondolibawa na Sitani bakakikolesaya erikaka abandu baghoberaye banywani babu kutse erileka bakole ekithahikire. Ekithegho ekyo sikithuwitheko  buthoki. Thunasi ngoku esyonzighu syethu syamathwitha, Yehova akendisyathulhubukya. (Erib. 2:10) Thukakasirye ngoku sihali ekyosi-kyosi ekyo bangakolha ekyanga thughabulha oku Yehova. (Abar. 8:35-39) Yehova abirikangania ku awithe amenge manene omw’ithuha amaha w’erilhubuka! Busana n’amaha ayo, abirilhusya oku Sitani kw’ekighuma ky’okwa bithegho biwe ebikamukolera ndeke n’erithuha obuthubaha obughumire.

16. Ni bibulyo byahi ebyo wutholere iwayibulya, kandi eby’erisubirya byanga kuwathikya bithi eriminya nga wuyikethere Yehova ya bungahi?

¹⁶ Esyonzighu sya Yehova syamabugha sithi sikendikwitha, iwunemwendiyikethera ngoku Yehova akendisyakulhubukya? Wangaminya wuthi ku wangana muyikethera okwa ndambi eyo? Enzira nguma ly’eriyibulya, ‘Erithwamu eryo ngakolha obuli kiro okwa hindu hike-hike, likanakanganaya ku nganayikethere Yehova?’ (Lk. 16:10) Ekindi kibulyo kya kino, ‘Engebe yaghe yikanakanganaya ngoku nganayikethere omulhaghe wa Yehova ow’erinyiha ebiyithawa byaghe ngamahira Obwami bwiwe bw’embere?’ (Mt. 6:31-33) Eky’erisubirya kyawu okwa bibulyo ebyo kyamabya ini ee, neryo iwamakangania ngoku wuyikethere Yehova, kandi iwukendibya iwunayitheghekere erilengwako lyosi-lyosi eryanga kuhikako.​—Emi. 3:5, 6.

17. (a) Erilhubuka likakanganaya lithi erighumisirizya lya Yehova? (b) Thwanga kangania thuthi ku thukasima erighumisirizya lya Yehova?

¹⁷ Yehova abirihiraho ekiro n’endambi y’erighunzaho omughulhu mubi ono. (Mt. 24:36) Syendilemwa erighumisirizya kandi syendi yira ekyo akakolha obuthuku obo buthe bwahika. Anzire kutsibu erilhubukya ababiriholha, aliwe akaghumisirizaya. (Yobu 14:14, 15) Analindirire obuthuku obutholere obw’eribalhubukiryamo. (Yn. 5:28) Ni bingyi ebyangaleka ithwasima erighumisirizya lya Yehova. Thakilengekaniako: Busana n’erighumisirizya lya Yehova, abangyi, nethu imwathune, thwabirihebwa obuthuku ‘bw’eribindulha emithima yethu n’erileka ebibi.’ (2 Pet. 3:9) Yehova anzire abandu bangyi ibasyabana engebe y’erikotha. Neryo, thukanganaye ku thukasima erighumisirizya liwe. Thuthi? Omw’isondekania n’omuhwa munene abali “n’amalengekania awakaleka ibatholera eribana engebe y’erikotha” n’eribawathikya erianza Yehova n’erimukolera. (Emib. 13:48, NW) Neryo ibakendighasirwa omw’ighumisirizya lya Yehova, ng’ithwe.

18. Busana naki thutholere ithwaghumisirizya abandi?

 ¹⁸ Omw’ighumisirizya, Yehova akendisyalinda erihika aho emyaka rukumi yikendisyahwera ithwe erihikana. Aho obuthuku obo bukendisyahikira, Yehova akendibya inianemughanyira ebibi byethu. Neryo, ahathe erithika-thika, thutholere ithwalhangira omwa bandi mw’ebibuya n’eribaghumisirizya. Lengekanaya okwa ky’erileberyako kya mwira wa mwali wethu oyuwathunga amaghaniryo manene n’erileka erihindana. Mwali wethu akabugha athi, “Eki mukyanyilethera obulhumi bunene. Esyondegheka syethu ng’eka musy’imana.” Aliwe omwa byosi ebi, mwali wethu ow’olhwanzo oyu mwaghumisirizya mwira wiwe. Mwayikethera Yehova kandi iniakabera eriwathikya mwira wiwe. Nayu nga Yehova, mwakyurukya ebitsibu bya meso n’erihwerya amalengekania w’okwa bibuya ebihambire oko mwira wiwe. Akabugha athi, “Mwira waghe awithe emibere eyuwene, kandi anemulengaho erirwanisya amaghaniryo wiwe lyolho-lyolho.” Kikatsemesaya thukaghumisirizya ab’omw’eka yethu kutse ab’omwa kithunga abanemulengaho erirwanisya ebitsibu ebikalire!

19. Thutholere ithwathwamu erikolhaki?

¹⁹ Yesu n’abamalaika mubatsema ekihugho kikatsuka erihangikwa. Aliwe thalengekania nga bakendisyatsema bungahi ekihugho kik’usulha mw’abandu abahikene, abanzire Yehova kandi abakamukolera. Thalengekania abalhua okwa kihugho erighenda elhubulha eriyathabalha na Kristo nga bakendisyayowa bathi bakalhangira abandu ku bakaghasirawa omwa mibiiri yabu. (Erib. 4:4, 9-11; 5:9, 10) Kandi thalengekania eribyaho okwa mughulhu emisoni y’obutseme yabirisuba omwa mwanya w’emisoni y’obulhumi, omughulhu amalhwere, erisusumana, n’olhuholho bikendisyabya esibikiriho. (Erib. 21:4) Wunalindire obuthuku obo, ithwamu erigherererya Thatha wawu ow’olhwanzo, ow’amenge kandi oyukaghumisirizaya. Wamakolha ekyo, iwukendibya iwunatsemire, nomuwangabana kitsibuki. (Yak. 1:2-4) Thukasima kutsibu omulhaghe wa Yehova owa, “hasyabya erilhubuka”!​—Emib. 24:15.