1. Le yɛɛ Chɛhowa toosiaa yɛ yoomoo?

TUUPA mi Chɛhowa kandu nyɔɔŋ toosiaa, ndupilɛ kpe wa ni. Kɛ o ve a kɔl tambɛi le hei le kanifuule, ndoo heu ba le nyɛ o nyɛ le. Mɛɛ le yɛɛ o toosiaa yɛ niko nyɔɔŋ? Mɛlɛka ndoo yeema mi wanaa cheleŋ bɛɛ tuei yoomoo yeela. Kaalaa nyindu Chɛhowa ni mbo kandu nyɔɔŋ toosiaa.—Sam 36:​9; 1 Chɔŋ 4:​19.

2. Vɛɛ kɔllo wa yɛ Chiisu a maalikɛiya mɛɛ nda che nyɛm Chɛhowa toosiaa woŋ?

² Chiisu fɛŋ Chɛhowa toosiaa le ma tosa wallo diompilɛ. Po ndɔ tasoo hoo o soliŋ kpeku ni le toosiaa maalikɛiyaa cho o miiliɔŋndaŋ niŋnda a “nyɛ o nyɛ fee.” (Kolo. 1:​16) Chiisu wa bɔɔ a kɔl kɛndɛ le wallo diompilɛ nda Finya ndɔ. (Pulɔ. 8:​30) Maalikɛiya bɛɛ wa a kɔl kɛndɛ tau, kanifuule, nda o hɔl Chɛhowa nda Chiisu toosiaa choo choo a lɛŋndeŋ ni. Yɛɛ maalikɛiya ndaa tosa yɛ mɛɛ nda che nyɛm Chɛhowa nda Chiisu wa toosiaa woŋ? Baabuiyo dimi maa “kiilaa Mɛlɛkaa a wa deŋioo a nyaaloo” mɛɛ Chɛhowa toosiaa lɛŋndeŋ. Ma hiau dɔɔ lachi a hei tosaa mɛɛ o wa nyɛm cheleŋndoŋ toosiaa. Nduyɛ mɛɛ o chii niko wanachioo piiliaŋ o mɛɛlulaŋ, ma hiau dɔɔ ba a ndu saŋgalaa. (Choobu 38:​7; Pulɔ. 8:​31) Nyɛm Chɛhowa toosiaa muŋ ndoŋ ŋ kɛ kɛ chɔm maa o nɔ kaalaa a taasioo.—Sam 104:​24; Luomaŋ. 1:​20.

3. A mɛɛ Kɔliŋtiaŋ Tasoo 15:​21, 22 dimi yɛ, yɛɛ sala baŋaa Chiisu wo cho yɛ tosa le ŋwaŋnda chiee?

³ Chɛhowa ndoo yeema mi chuaa ŋwaŋnda chiee ndaa tuei yoomu fafɛɛŋndo yeela o chieeŋ kɛndɛ o toosiaa wo choo. Kɛ mɛɛ Adam nda Ifi kɛɛ Finya nda kaalaa diikɔŋndo, mi  hakioo a piɔmndo huŋ le ŋwaŋnda chiee kpou. (Luomaŋ. 5:​12) Yɛɛ Chɛhowa ndoo tosa yɛ? Mbo chɔm mɛɛ o cho waŋchieeya soli leniŋ yɛ o foofo koŋ choo. (Chɛ. 3:​15) Mi Chɛhowa kɛɛsiaa le mi Po ndɔɔ huŋ baŋa chuauwaa Adam nda Ifi wa o chɛle hakioo niŋ a piɔmndo. Keŋ tosa ni mbo chɛl le mi wana o wana kɛɛsiaa le ndu piɛiyo okoŋ mbo huŋ sɔla yoomu fafɛɛŋndo.—Chɔŋ 3:​16; Luomaŋ. 6:​23; nuawɔ Kɔliŋtiaŋ Tasoo 15:​21, 22.

4. Nyunala kuɛɛ naŋ cho yɛ yaasiaa o buŋgɛi hei niŋ?

⁴ Mi nyunala bɔɔbɔɔ hiŋ naa o kɔl a tiindaŋ fulasɛiniŋndo okɔɔ. Le taamaseliiyo, vɛɛ fulasɛiniŋndo cho yɛ dɔɔ hunɔɔ yɔŋnɔŋ? Baa ŋ loonuŋ niŋ pa wanaa naa kaalaa vi wa te a huŋ miiŋgu pɛ yoomu? O nɛila kuɛɛ niŋ fulasɛiniŋndo cho yɛ naa nyaaloo chuu? Nduyɛ vɛɛ yiyaŋndo o tiindaŋ fulasɛiniŋndo choo mala yɛ naa miŋ nɔ balika melaa le kaala Chɛhowaa, taasi ndɔɔ a biuwɔŋ ndɔɔ? Ŋ yaasiaŋndɔ niko nyunalaŋ ndaŋ la pilɛŋ pilɛŋ.

5. Le yɛɛ naŋ dimi yɛ maa o pɔmpɔmbɔ wanaa vi wa cho hunɔɔ miiŋgu yoomu ni?

⁵ Chɛhowa cho hunɔɔ Po ndɔɔ soliŋ kpeku le wanaa vi wa miŋgioo yoomu o miiliɔŋndaŋ niŋ. Kɛ ŋ nɔla miŋ dimi maa o cho o lepilɛ niŋ kpe le nda cho hunɔɔ miiŋgu yoomu le. Le yɛɛ? Kanifuule, te wanaa vi wa kpou miiŋgu pɛ yoomu o lepilɛ niŋ kpe, naapum waŋnda chieeya kpou nɔ niŋ naa lɔlaa le nduyɛ mi sɔɔŋ wa laasi laasi. Kɛ Chɛhowa tosa sɔɔŋ laasi laasi le. O sina maa le mi kɔl nyulu fafɛɛŋndo sɔlaŋ, mɛɛ mi sɔɔŋ kuɛ kpɛ kpɛ. (1 Kɔliŋ. 14:​33) Teleŋ Chɛhowa wa bɛɛ nyɔɔŋ toosiaa nda Chiisu wo, mbo soliŋ taasi ndɔɔ kpeku nduyɛ o leu le. O pɔmpɔmbɔ o lo kɔlaŋ a nyɔɔŋ toosiaa ni haaa mbo mɛɛlu niko wanachioo toosiaa. Chiisu bɛɛ cho hunɔɔ suliŋndaŋ ndaŋ soliŋ kpeku a teleŋ o cho wa o Masaleŋ choo le wɔsilaŋ waa pilɛ wo. O cho hunɔɔ wallo tosa latulu a  wanaa Amakɛdɔŋ cho mɛi yoomu wa le chieeŋndo bɛɛndiaa le wanaa cho wa fulasɛiniŋndo sɔlaa wa.

6. A mɛɛ Walta Wanaa Chiisuaa 24:​15 dimi yɛ, nɛɛ yaa cho yɛ wa o wanaa cho hunɔɔ fulasɛiniŋndo sɔla wa tɛɛŋ?

⁶ Kɛ i hiou kpou ve, wanaa Amakɛdɔŋ cho mɛi yoomu wa nɔ ma huŋ pɛɛku wanaa cho wa fulasɛiniŋndo sɔlaa wa. A nɔ ma pɛɛku nda a Masale Mɛlɛkaleŋ okɔɔ, nduyɛ a nyɛ Chɛhowa yeema nda ma tosa wo. Le yɛɛ? Kanifuule Baabuiyo dimi maa “wana kɛndɛ ni, wana wɔɔŋ ni” kpou cho miiŋgu yoomu. Mɛɛ wanaa cho miiŋgu yoomu wa a bɔɔbɔɔ wanaa wɔɔŋnda nda cho wa ni. (Nuawɔ Walta Wanaa Chiisuaa 24:​15.) A nɔ ma huŋ tosa siŋgaŋndaŋ tau le ma sɔla tɔnɔɔ o sala soliaŋ Chiisoo niŋ. Wallo pila i cho wa ni le wanaa sina Chɛhowa le wa pɛɛkoo o miiliɔŋndaŋ niŋ a ndu okɔɔ. Baa mɛɛ naŋ pɛɛku hau waŋnda Baabuiyo a pilɛŋ pilɛŋ yɛ naŋ cho wa nda pɛɛkoo a teleŋ koŋ ni? Baa wanaa sɛnɛiya haa cho wa o kundalaŋ niŋ nduyɛ mi nda bɛɛ sɔla pɛɛkoo le ma pɛɛku wanaa cho fulasɛiniŋndo sɔla o nda kɔɔli wa? Ŋ sina wɔ le. Mɛɛ miŋ chum mi teleŋ koŋ fuuluu. Kɛ ŋ sina maa tuupa mi wɔsila waa pilɛ Chiisu cho wa o Masaleŋ choo laŋ la chuu, “sina pɛŋgu waŋnda nɔ niŋ a Mɛlɛka Yaawɛɛ okɔɔ wo o wa niŋ tau tau o chieeŋndo niŋ.” (Aisaya 11:​9) Ŋ wa niŋ bɔɔ a tuandaŋ o wɔsilaŋ ndaŋ bɛŋgu, kɛ a koŋ kpou ŋ cho wa a nyaale!

7. Le yɛɛ kaalaa cho yɛ wa wanaa Mɛlɛkaa tɛɛŋ vellaa velle te a huŋ wa pɛ wanaa cho miiŋgu yoomu wa pɛɛkoo?

⁷ O wɔsila waapilɛ Chiisu cho wa o Masaleŋ choo laŋ bɛŋgu, chuauwaa Chɛhowaa cho wa o lɛŋndeŋ choo wa kpou nɔ ma tosa siŋgaŋndaŋ le ma nɛŋi ndu kɔl. Kaalaa cho nda wa tɛɛŋ vellaa velle. Le hei, a cho wanaa cho wa fulasɛiniŋndo sɔlaa wa malaa o nɛi kaalaa niŋ le mi nda bɛɛ bii yoomu ndaa mɛɛ Chɛhowa yeema yɛ. (1 Pitɛ 3:​8) Wanaa cho haa miiŋgu yoomu wa cho wa a kɔl kɛndɛ le waa a wanaa Chɛhowaa latulu. Kanifuule, nda bɛɛ cho wa ‘hiouwɔɔ lachi a fafalaa le ma siou pioŋɔɔ sɔla.’—Filipi. 2:​12.

8. Le yɛɛ naŋ dimi yɛ maa ŋ cho hunɔɔ wanaa naa kaalaa vi wa loonɔŋ?

⁸ Ŋ nɔla miŋ dimi maa waŋnda cho hunɔɔ wanaa ndaa kaalaa vi wa loonɔŋ te a miiŋgu pɛ yoomu. Sabulaŋ la cho tau le hei dimioo. Le taamaseliiyo, te ŋ yiyaŋ pɛ a fulasɛiniŋnda yɔŋnuŋ niŋndaŋ okɔɔ, wana che pɛ aa dialuŋ sɛnɛiyoŋ Chɛhowa cho hunɔɔ wanaa cho miiŋgu yoomu wa ke ni. O cho tosa ma miiŋgu yoomu mɛɛ mɛɛ nda wa tuupa ma wu. Hɔlaa ndaa, mɛɛ ndaa suaa yɛ a yiyaŋ ndaa cho wa nyɛ pilɛ kpe. Loonuŋ maa mi Chiisu tuu piɔmndo a luaŋ. Nduyɛ, mbo tuu fulasɛiniŋndo a mɛɛ wana tindi naa waŋndo o luaŋ yɛ. (Maa. 9:​18, 24; Chɔŋ 11:​11-13) Te waŋndo tendu pɛ o luaŋ, waŋnda puɛɛnuŋ ndu le. Hɔlaa nduaa a diomnde ndɔleŋ bɛɛ le siŋgaŋ te. Nduyɛ, mɛɛ yiyaŋ ndɔɔ wa a teleŋ o lɔl lo yɛ koni o wa a teleŋ o tiandu wo ni. Tofawɔ taamasi Lasalɔɔ wo. Dialuŋ ndɔŋ wa niŋ siɔɔ mɛɛ palɛi hiou i hiɔɔlu o piɔm ndɔɔ kɔɔli. Kɛ mɛɛ Chiisu miŋgi ndu yoomu, mi yemaa nduaa loonuŋ ndu sakpo nduyɛ, mi Lasalɔɔ bɛɛ loonuŋ nda.—Chɔŋ 11:​38-44; 12:​1, 2.

9. Le yɛɛ i cho yɛ maa wanaa cho fulasɛiniŋndo sɔla wa simnuŋ niŋ walaŋ o lepilɛ niŋ kpe le?

⁹ Chɛhowa mɛi lediom maa wanaa cho wa o masale Kilitileŋ bɛŋgu wa o kɛ kɛ dimi lɛ niŋ maa “nyɛ waa nuaa o cho ndu nɛi le.” (Aisaya 33:​24; Luomaŋ. 6:​7) Lelaŋ, Chɛhowa cho wanaa cho miiŋgu yoomu wa dialuŋ sɛnɛiyo ke nduyɛ ma sɔla kɛndiaa. Kɛ a cho simnɔŋ wanaa walaŋ o lepilɛ niŋ kpe le. Te o wa pɛ ma simnuŋ walaŋ o lepilɛ niŋ kpe, naapum o wa i kala le mi wanaa ndaa kaalaa loonuŋ nda. Wana che pɛ maa o pɔmpɔmbɔ waŋnda chieeya kpou cho simnɔŋ walaŋ o Masale Chiisu leŋ bɛŋgu ni. A teleŋ wɔsila waapilɛ laŋ la cho chuwɔɔ wo  Chiisu cho Finya ndɔ Masaleŋ miŋgi o ba ni. A teleŋ koŋ, Masaleŋ ndeŋ le chii niŋ nyɛ o nyɛ tosa nduyɛ mi waŋchieeya simnuŋ wanaa walaŋ.—1 Kɔliŋ. 15:​24-28; Sɔɔŋ. 20:​1-3.

10. Vɛɛ tiindaŋ fulasɛiniŋndo cho yɛ num piiliaŋ?

¹⁰ Yiyaŋndɔ a mɛɛ kɔllo wa niŋ num yɛ te la huŋ wa pɛ demulaŋndo nya wanaa num aa kaalaa. Baa nyaale cho num wa wo cho pa tosa ma mam ɔɔ ma tusi mɛmɛma kɔl kɛndiaŋ? Baa nyaaloo hoo cho num pa nyindɔɔ le ma soli chondoŋ le Chɛhowa saŋgalaa? O kpeekpei niŋ, tiindaŋ fulasɛiniŋndo cho num nyindɔɔ a teleŋ koŋ ma chɔɔlu Chɛhowa kaala nda Po ndɔɔ.

11. A mɛɛ Sɔɔŋ Chɔɔmaŋndoŋ 20:​12, 15 dimi yɛ, yɛɛ cho yɛ yɔŋnɔŋ a wanaa cho miiŋgu yoomu ma tosa hɛnaŋ Mɛlɛkaa wa?

¹¹ Wanaa cho hunɔɔ miiŋgu yooŋgu wa bɛɛ nɔ ma soliŋ wana chieeyɛi paanduei lekɔɔ nduyɛ ma bii yoomu ndaa a mɛɛ Mɛlɛka yeema yɛ. Yiyaŋndɔ a nyaale nda sɔla niŋ le hei tosaa wo. Wanaa cho siŋgaŋndaŋ ndaŋ tosa wa cho wa yoomu o Kpele Hɛnɛkiɔɔ niŋ lefafɛɛŋ. Kɛ o baa pilɔɔ choo, wanaa cho kɛɛ le laŋ tosaa wa, Mɛlɛka cho nda chɛlɔɔ ma wa o Kpele Hɛnɛkiɔɔ niŋ te.—Aisaya 65:​20; nuawɔ Sɔɔŋ Chɔɔmaŋndoŋ 20:​12, 15.

12. Vɛɛ Chɛhowa cho yɛ wanaa cho wa o chieeŋndo choo wa dɔwɔɔ sala?

¹² O Masale Mɛlɛkaleŋ bɛŋgu, wanaa Mɛlɛkaa kpou cho chɔ maa nyɛ dimiŋ o Pulɔwaa bolle 10:​22 niŋndo cho tonya. O dimi aa: “Te Mɛlɛka Yaawɛɛ o dɔu num sala pɛ, sullo ndu wa mial num ni. Nduyɛ sul num koŋ, o nɔ kɔl tambɛi o kɔl tambɛi kɔɔli le.” Nyina Chɛhowaa cho wanaa Mɛlɛkaa mala ma nɔ suliŋnda kɛndɛlaŋ. O cho tosa ma chua kaala Chiisu laŋ nduyɛ ma simnuŋ wanaa walaŋ. (Chɔŋ 13:​15-17; Ɛfi. 4:​23, 24) Lepaa o lepaa, dialuŋ ndaŋ cho wa hiouwɔɔ lachi a waa kpeŋkpeleŋ. Yoomoo yeela niŋ bɔɔ a teleŋ koŋ! (Choobu 33:​25) Kɛ, vɛɛ yiyaŋndo o tiindaŋ fulasɛiniŋndo choo mala yɛ num suŋ suŋ?

13. Vɛɛ Sam 139:​1-4 chɔm yɛ mɛɛ kpɛ Chɛhowa sina naa yɛ nduyɛ, vɛɛ tiindaŋ fulasɛiniŋndo bɛɛ chɔm yɛ maa Chɛhowa sina naa nyɛkɛndɛi?

¹³ A mɛɛ naŋ yaasiaa suŋ yɛ, a teleŋ fulasɛiniŋndo, Chɛhowa cho hunɔɔ waŋnda miŋgi yoomu mɛɛ mɛɛ nda wa tuupa ma wu. Yiyaŋndɔ a nyɛ keŋ sim ndo. Chɛhowa kaala num bɔɔ. Le hei, o sina yiyaŋ numndo, mɛɛ ŋ suaa yɛ, a mɛɛ ŋ tosa sɔɔŋ yɛ. Nduyɛ o yɔŋ bɛɛ ma vi, o puɛɛnuŋ a num okɔɔ le. Lelaŋ, te teleŋndo fuuluu pɛ le mbo huŋ miŋgi num yoomu, o cho wa suɛi kala le ndu le. O cho loonɔŋ a mɛɛ ŋ wa yɛ, nduyɛ mbo miŋgi num yoomu lende kinɛi. Masaa Deeve ndoo sina maa Chɛhowa nɔ yeemɛi o naa pilɛŋ pilɛŋnda niŋ kpou. (Nuawɔ Sam 139:​1-4.) Te ŋ sina pɛ mɛɛ kpɛ Chɛhowa kaala naa yɛ, vɛɛ kɔllo wa yɛ naa?

14. Vɛɛ kɔllo nɔ yɛ mbo wa naa te ŋ yiyaŋ pɛ a mɛɛ kpɛ Chɛhowa sina naa yɛ okɔɔ?

¹⁴ Te ŋ yiyaŋ pɛ a mɛɛ kpɛ Chɛhowa sina naa yɛ okɔɔ, ŋ nɔ miŋ buulaŋ te. Le yɛɛ? Loonuŋ maa Chɛhowa buulaŋ bɔɔ a naa okɔɔ. O che naa kpou a sɔvɛ nduyɛ o sina kaala kɛndɛla wana o wana nɔ laŋ. Sɔɔŋ cho yɔŋnɔŋndo o yoomu naa niŋndoŋ, o puɛɛnuŋ a muŋ okɔɔ le. Hei cho bɔɔ suɛi kɔl dɛɛniaa bɛndu! Lelaŋ, fɛŋ bɛɛ ŋ nɔ miŋ yiyaŋ maa ŋ cho kpeele le. Ŋ nɔ miŋ nɔ tiindaŋndo maa Chɛhowa cho latulu a naa teleŋ o teleŋ. Nduyɛ mbo nuuviaa nɛilaŋ le naa malaa.—2 Kolo. 16:​9.

15. Vɛɛ tiindaŋ fulasɛiniŋndo chɔm yɛ maa Chɛhowa nɔ taasioo?

¹⁵ Yaŋɔɔle wɔɔŋ wɔɔŋndeŋ pila siooŋii piɔmndo cho ni. Lepum, mi wanaa cho o ba Setana wo bɛŋgu wa wueenuŋ waŋnda a piɔmndo. Ma  tosa hei te a yeema nda pɛ ma pisi chaaŋaa ndaa ɔɔ ma baŋ nda le suɛi wɔɔŋnde tosaa. Kɛ naŋ nɔ siooŋii piɔm te. Kanifuule o yɔŋ bɛɛ mi yaamɔɔwaa naa dii naa, ŋ sina maa Chɛhowa cho naa hunɔɔ miŋgi yoomu. (Sɔɔŋ. 2:​10) Ŋ nɔ tiindaŋndo maa mɛɛ mɛɛ nda kindiŋ a nɔla naa faŋa o kaala Chɛhowaa bɛŋgu le. (Luomaŋ. 8:​35-39) Tiindaŋ fulasɛiniŋ Chɛhowa ke naa hoo wo chɔm kɛsɛ maa o nɔ bɔɔ taasioo! Kanifuule, yaŋɔɔle Setana keleŋa waŋnda tiuba leŋ le cho siooŋii piɔmndo ni. Kɛ tiindaŋndo hoo tosa miŋ sim yi o yɔŋ bɛɛ mi wanaa cho ndu o ba bɛŋgu wa kɔŋgɔlaŋ le naa diyɔɔ.

16. Nyunala kuɛɛ naŋ nɔ yɛ miŋ nyunaŋ nduyɛ, vɛɛ mulilaŋ le nyunalaŋ ndaŋ la mala yɛ num le sinaa mɛɛ kpɛ ŋ tiindaŋ Chɛhowa yɛ?

¹⁶ Te yaamɔɔwaa Chɛhowaa kɔŋgɔlaŋ pɛ le num diyɔɔ, a cho pa tiindaŋndo nɔ o ndu niŋ maa o yɔŋ bɛɛ ma dii num o cho num hunɔɔ miŋgi yoomu? Vɛɛ ŋ looku yɛ ma sina hei suŋ suŋ? Nyunaŋndɔ aa: “Baa kɛɛsiaala ya tosa o sɔɔŋ pɔmbɔŋ choo lepaa o lepaa laŋ la chɔm pa maa I nɔ tiindaŋndo o Chɛhowa niŋ?” (Luku 16:​10) Chɛhowa mɛi lediom maa te ŋ kɛsi pɛ Masale ndɔleŋ nyɛ tase o yoomu naa niŋ, o cho naa ke nyɛm naŋ hau ba woŋ. Lelaŋ, nyunaŋndɔ vɛlɛ aa: “Baa mɛɛ ya cho yoomu nuu biyɔɔ yɛ chɔm pa maa I nɔ tiindaŋndo o hei niŋ?” (Maa. 6:​31-33) Te a chɛl pɛ nyunalaŋ ndaŋ, mɛɛ keŋ chɔm maa a nɔ tiindaŋndo o Chɛhowa niŋ. Nduyɛ o yɔŋ bɛɛ mi tɔɔndaŋndo komal num, nyɛ o nyɛ nɔla mbo hiiluu num te.—Pulɔ. 3:​5, 6.

17. (a) Vɛɛ tiindaŋ fulasɛiniŋndo chɔm yɛ maa Chɛhowa cho wana biuwaŋ? (b) Vɛɛ naŋ chɔm yɛ balika melaa le biuwɔŋ ndɔɔ?

¹⁷ Chɛhowa nɔ paale o kɛɛsiaa le mbo huŋ tɛɛmbuu chieeŋ dɛnɛ wɔɔŋndo hoo wo. (Maa. 24:​36) Mɛɛ mi paaleleŋ le fuuluu malaŋ o tɛɛmbuu ndu. Mi che bɛɛ yeemɛi cho ndu le mbo huŋ miŋgi wanaa vi wa yoomu, kɛ wana biuwaŋndo o cho ni. (Choobu 14:​14, 15) O cho chumndo le mi teleŋ kpeekpei o kɛɛsiaa wo fuuluu le mbo huŋ miŋgi nda yoomu. (Chɔŋ 5:​28) Ŋ nɔ sabula kɛndɛlaŋ tau le balika melaa chɔmndo le mɛɛ Chɛhowa cho wana biuwaŋ yɛ. Yiyaŋndɔ a hei okɔɔ. Biuwɔŋ Chɛhowaa tosa niŋ hau mi wanaa bɔɔbɔɔ “mal yɔŋnda ndalaŋ wɔɔŋndaŋ.” Nduyɛ, naa bɛɛ cho o waŋnda haa tɛɛŋ. (2 Pitɛ 3:​9) Chɛhowa yeema mi wana o wana huŋ sɔla yoomu fafɛɛŋndo. Lelaŋ, ŋ nɔ miŋ chɔm balika melaa le mɛɛ o cho wana biuwaŋ yɛ. Vɛɛ naŋ tosa yɛ hei? Ŋ tosa hei te ŋ nuuviaa pɛ “wanaa [nɔ yeemɛi] le ma sɔla yoomu kpeekpeiyo o nɔ lamɛɛlu le wo wa.” Okoŋ, miŋ mala nda ma kaala Chɛhowa nduyɛ  ma piɛi ndu. (Walta. 13:​48) Te ŋ tosa lende pɛ, nda bɛɛ cho tɔnɔɔ sɔla o biuwɔŋ Chɛhowaa niŋ mɛɛ naŋ cho ndu sɔlaa yɛ.

18. Le yɛɛ naŋ nɔ yɛ miŋ biuŋ waŋnda?

¹⁸ Te wɔsila waa pilɛ laŋ la kanduŋ pɛ, Chɛhowa cho naa wa kɔl le miŋ simnuŋ wanaa walaŋ o lepilɛ niŋ kpe le. O cho biuwɔŋ haaa mi la chuu malaŋ naŋ simnuŋ walaŋ. Haaa mi keŋ huŋ yɔŋnuŋ, Chɛhowa cho o bɛɛndiaŋ lɔɔlɔɔ le naa malɔɔ haki. Lelaŋ, naa bɛɛ nɔ miŋ tofa le sɔɔŋ kɛndɔŋ waŋnda o ŋdial nduyɛ miŋ biuŋ nda. Tofawɔ taamasi ndepilɛnɔ pilɛ. Mi pɔnɔ ndɔ kandu buulaŋndo tau, nduyɛ mi hei tosa mbo kialu kɔlaŋ o bɔŋaŋndaŋ. Mi ndepilɛnɔɔ hoo dimi aa: “Mi hei tɛɛmbuu ya kɔllo tau. Mi sɔɔŋ naŋ tuu le tosaa o yuŋgu naa niŋndoŋ kpou laasiaŋ.” Mi ndepilɛnɔ naa sɔviɔɔ hoo biunuŋ pɔnɔ ndɔ o simul kala kalaa hoo bɛŋgu. Mbo tiindaŋ Chɛhowa nduyɛ o vi ŋdial te. Mbo tual taamasi Chɛhowaa kɔɔli le kɔllo faŋaa o sɔɔŋ wɔɔŋndo choo. Nduyɛ, mbo handu kɔllo o suliŋnda kɛndɛla pɔnɔ ndɔ nɔ laŋ choo. Mbo dimi aa: “Pɔnɔ nuu nɔ suliŋnda kɛndɛlaŋ nduyɛ o cho niŋ batiuwaa sɔlaa o pɔmpɔmbɔ.” Lelaŋ, ŋ nɔ miŋ biunuŋ wanaa cho simultaŋ chɔulabaa o yuŋgu naa niŋ ɔɔ o kunda leKilisiɔŋndo niŋnda.

19. Yɛɛ naŋ nɔ yɛ miŋ kɛɛsiaŋ o kɔl le tosaa?

¹⁹ Mi Chiisu a maalikɛiya duaŋ nyaale tau mɛɛ Mɛlɛka chii chieeŋndo toosiaa o tasela ndɔ. Kɛ yiyaŋndɔ mɛɛ nda wa niŋ a nyaale yɛ te chieeŋndo kpou huŋ wa pɛ o piaa cha a wanaa walaŋnda. Wanaa wa niŋ teleŋ koŋ o chieeŋndo choo wa nɔ niŋ kaalaa le Chɛhowa nduyɛ ma piɛi ndu. Wanaa cho lakɔ wa o Masaleŋ choo a Chiisu latulu wa bɛɛ cho wa a nyaale tau. Kanifuule, a cho chɔ mɛɛ wali nda cho wa tosaa wo chuu niŋ wanaa cho wa o lɛŋndeŋ choo wa tɔnɔɔ yɛ. (Sɔɔŋ. 4:​4, 9-11; 5:​9, 10) Yiyaŋndɔ vɛlɛ a mɛɛ kɔl kɛndɛ bɛndoo wa niŋ o chieeŋndo choo yɛ. Mɛmɛma kɔl tambɛi yaŋ ma cho simnɔŋ mɛmɛma kɔl kɛndiaŋ. Naalaŋ, kɔl tambɛiyo, a piɔmndo kpou cho chuwɔɔ. (Sɔɔŋ. 21:​4) Haaa mi teleŋ koŋ fuuluu, maa kɛɛsiaŋ o kɔl le tolɔɔ taamasi Finya num nɔ kaalaa, taasioo, a biuwɔŋndo wo kɔɔli. Te a tosa lende pɛ, a cho wa a nyaale o yɔŋ bɛɛ mi simultaŋ la komal num. (Chemi. 1:​2-4) Ŋ nɔ bɔɔ balika melaa le mɛɛ Chɛhowa mɛi lediom maa “wanaa vi wa a cho miiŋgu yoomu” yɛ!—Walta. 24:​15.