1. Samu na yinki Yehova pesá beto luzingu?

YA vandá na ntangu yina, Yehova vandá kaka yandi mosi. Kasi, yandi vandá ve izole. Yehova vandá ve na nsatu muntu vanda na yandi samu yandi vanda na kilengi. Kasi yandi zolá ti bantu ya nkaka mpe vanda na luzingu mpe tala kilengi ya yawu. Ni luzolo ya yandi natak’ yandi na kuyidika beto.—Nku. 36:9; 1 Yoa. 4:19.

2. Yinki ya salá Yesu na ba-ange ntangu Yehova yidiká bima ya nkaka?

² Ntete-ntete, Yehova yidiká mwana ya yandi Yesu. Yehova sadilá mwana ya yandi na kuyidika “bima nyonso ya nkaka,” kubanda na ba-ange. (Kol. 1:16) Yesu vandá na kilengi mingi ya kusala na Tata ya yandi. (Bin. 8:30) Ba-ange mpe vandá na kilengi. Ba vandá kuna, ntangu Yehova na Yesu yidiká zulu na ntoto. Wa’ faso ba lakisá kilengi ya bawu? Ba “bandá kusala makelele ya kilengi” ntangu Yehova yidiká ntoto, mpe ba kontinyeke kubula maboko ntangu Yehova vandá yidika bima ya nkaka, kilengi yango lutilá ntangu yandi yidiká muntu. (Yobi 38:7; Bin. 8:31, nyv.) Mosi na mosi ya bima yina Yehova yidiká, ke lakisá luzolo mpe mayela ya yandi.—Nku. 104:24; Rom. 1:20.

3. Faso me zonzila 1 Bakorinto 15:21, 22, yinki sakrifise ya Yesu me natina beto?

³ Yehova zola ti bantu zinga ntangu nyonso na zulu ya ntoto yina ke kuma paradis. Kasi ntangu Adam na Eve salá yintu ngolo na Tata ya bawu ya luzolo, disumu mpe lufwa kotá na ntoto nyonso.  (Rom. 5:12) Yinki Yehova salá? Kaka kilumbu yina, Yehova zonzá yinki yandi ke sala samu na kuvuukisa bana Adam. (Kub. 3:15) Yehova pesá mwana ya yandi Yesu faso sakrifise, samu na kubasisa bana ya Adam na boloko ya disumu mpe ya lufwa. Mpe yandi ke pesa luzingu ya ntangu nyonso na bantu nyonso yina ke zolá kusadila yandi.—Yoa. 3:16; Rom. 6:23; tanga 1 Bakorinto 15:21, 22.

4. Na wapi bakestion beto ke kuzwa bareponse na artikle yayi?

⁴ Bakestion mingi lenda kwizila beto na yintu, ntangu beto ke kanisá na promese ya Nzambi ya kuvutula bantu ya kufwa na luzingu. Nge lenda kanisa: ‘Wa’ faso kuvumbuka ya bantu ya kufwa lenda salama? Beto ke lenda kwandi kuzaba dyaka bampangi ya beto ntangu ba ke vutulá bawu na luzingu? Wa’ faso ya ke natina beto kilengi? Mpe yinki ya ke na longá beto na luzolo, mayela, mpe ntima ya yinda ya Yehova?’ Beto zonzila mosi na mosi ya bakestion yayi.

5. Samu na yinki beto lenda zonza ti, bantu nyonso yina kufwá ke vumbuka ve kilumbu mosi?

⁵ Ntangu Yehova ke sadila mwana yandi samu na kuvumbula bamilion ya bantu yina kufwá, beto lenda zonza ti bawu nyonso ke vumbuka ve kilumbu mosi. Samu na yinki? Samu ti, si bantu nyonso yina vumbuka na mbala mosi, muvusu lenda vanda na zulu ya ntoto. Mpe Yehova lenda sala ata fioti ve mambu yina ke nata muvusu. Yandi zaba ti samu bantu vanda na kizunu, mambu zolá salama na ordre. (1 Ko. 14:33) Yehova lakisá ntima ya yinda mpe mayela, ntangu yandi vandá sala na Yesu samu na kuyidika ntoto, samu ya vanda kisika ya mbote samu na bantu. Yesu mpe ke lakisa ntima ya yinda mpe mayela na kati ya bamvula 1 000, ntangu yandi ke sala na ba yina ke vuuka na Armagedon samu na kuyidika ntoto, mpe kuyamba ba yina ke vutuka na luzingu.

6. Faso ke na zonzá Bisalu 24:15, ba nani Yehova ke vumbula na lufwa?

 ⁶ Yina me lutila nyonso, ba yina ke vuuka na Armagedon ke longa ba yina ke vumbuka na lufwa mambu ya Kimfumu ya Nzambi, mpe misiku ya Yehova. Samu na yinki? Samu ti mingi ya ba yina ke vumbuka na lufwa, ke vanda na kati ya grupe yina Biblia ke bokilá “ba yina longoká ve kusala mambu ya mbote.” (Tanga Bisalu 24:15.) Ba zolá sala bachanjema mingi na luzingu ya bawu samu na kuzwa bambote ya sakrifise ya Yesu. Kanisa ntete na kisalu ya nene yina ya ke vanda na kulonga bamilion ya bantu yina na kuzaba mambu ya Yehova. Na ntangu yina, mosi na mosi na bawu ke vanda na muntu yina ke banda kulongoka na yandi, faso beto ke longoká Biblia na bantu bubu yayi? Ba ke tula kwandi bawu na kati ya bimvuka (assemblées) to ba ke pesa bawu formasion, samu bawu mpe, ba longa ba yina ke vumbuka na lufwa na manima ya bawu? Beto vingila samu na kutala. Kasi beto zaba ti avant nsuka ya bamvula 1 000 ya Kimfumu ya Yesu, “ntoto nyonso ke zaba mbote-mbote Yehova.” (Iza. 11:9) Beto ke sala bisalu mingi ya kitoko na kati ya bamvula 1 000 yina!

7. Samu na yinki bisadi ya Nzambi ke lakisa ntima ya kyadi ntangu ba ke longa ba yina ba ke vumbula na lufwa?

⁷ Na kati ya bamvula 1 000 ya Kimfumu ya Yesu, bisadi nyonso ya Yehova ke kontinye kusala bachanjema samu na kusepelisa yandi. Na yina, bawu nyonso zolá lakisa ntima ya kyadi, ntangu ba ke sadisa ba yina me vumbuka na lufwa na kunwana na bifu ya bawu ya yimbi, mpe na kulanda misiku ya Yehova. (1 Pi. 3:8) Ba yina ke vumbuka na lufwa ke tala ti bisadi ya Yehova ke ya kukuluka mpe “ke salá ngolo na kubongisa ndyatulu ya bawu, samu bawu mosi mpe ba vuuka.”—Flp. 2:12.

8. Samu na yinki beto lenda zonza ti beto lenda zaba dyaka bantu ya famiye ya beto to bakamarade ya beto yina ke vumbuka na lufwa?

⁸ Barezon mingi ke na natá beto na kuzonza ti, ba yina ke yamba bantu yina ke vumbuka na lufwa, ke zaba dyaka bampangi ya bawu yina kufwaka. Na kifwani, kutala faso Yehova vumbulá bantu na ntama, beto lenda zonza ti, Yehova ke yidika dyaka bawu faso ba vandá talá, faso ba vandá zonzá, mpe faso ba vandá kanisá avant lufwa ya bawu. Kuzimbana ve, Yesu zonzá ti lufwa ke faso pongi, mpe kuvumbula muntu na lufwa ke faso kuvumbula muntu na pongi. (Mat. 9:18, 24; Yoa. 11:11-13) Ntangu muntu ke vumbuká na pongi, yandi ke talá mpe ke wá kaka faso yandi vandá sala yawu avant yandi kwenda lala, mpe yandi ke vandá kaka na makanisi ya yandi nyonso. Beto zonzila disolo ya Lazare. Bilumbu 4 lutá deja na manima ya lufwa ya yandi, mpe nzutu ya yandi bandá kubola. Mpe ntangu Yesu vumbulak’ yandi, bampangi ya yandi ya kento zabak’ yandi na mbala mosi ntangu ba talak’ yandi. Yandi mpe zimbaná ve bawu.—Yoa. 11:38-44; 12:1, 2.

9. Samu na yinki ba yina ke vumbuka na lufwa ke vumbuka na makanisi mpe nzutu yina ke ntete na disumu?

⁹ Yehova salá promese ti na kati ya paradis ata muntu ke zonza: “Mu ke na belaka.” (Iza. 33:24; Rom. 6:7) Na yawu, ba yina nyonso ba ke vumbula na lufwa, ke vumbuka na sante ya mbote. Kasi nzutu ya bawu ke vanda ntete na disumu. Si ya vandá ve faso yina, bantu ya famiye ya bawu mpe bakamarade ya bawu lenda zaba dyaka ve bawu. Malembe-malembe na kati ya bamvula 1 000 ya Kimfumu ya Yesu, disumu ke manisa na kati ya banzutu ya bantu. Na nsuka ya bamvula 1 000, Yesu ke vutula Kimfumu na Tata ya yandi. Na ntangu yina, Yesu na ba 144 000, ke manisa kusala kisalu nyonso yina Yehova zolá ba sala,  mpe ba ke katula disumu na banzutu ya bantu.—1 Ko. 15:24-28; Luz. 20:1-3.

10. Yinki ya ke na salá nge na ntima, yina nge me zaba ti bantu ya kufwa ke vumbuka?

¹⁰ Kanisa na kilengi yina ya ke sala nge, ntangu nge ke yamba dyaka bampangi ya nge yina nge ke zolaka. Kilengi yina nge ke tala, ke nata nge na kuseka to na kudila? Kilengi yina ke nata nge na kuyimba banzimbu samu na kupesa nkembo na Yehova? Beto lenda ndima ti, nge ke zola dyaka ya kulutila Yehova na mwana ya yandi Yesu, samu na nyonso yina ba me sala samu na beto.

11. Faso Yesu zonzá na Yoane 5:28, 29, yinki ke kumina ba yina nyonso ke landa misiku ya Nzambi?

¹¹ Kanisa na kilengi ke vanda na ba yina nyonso ke vumbuka na lufwa, ntangu ba ke sala bachanjema na luzingu ya bawu, mpe ba ke banda kulanda misiku ya Nzambi. Kaka ba yina ke sala bachanjema na luzingu ya bawu ke zinga ntangu nyonso na paradis. Kasi Yehova ke bika ve, ba yina nyonso ke manga kusala bachanjema na kukontinye kuvanda kaka na paradis, mpe kubebisa kizunu yina ke vanda kuna.—Iza. 65:20; tanga Yoane 5:28, 29.

12. Na wa’ faso Yehova ke pesa bambote na ba yina nyonso ke zinga na ntoto?

¹² Ntangu Kimfumu ya Nzambi ke banda kutwadisa ntoto, bisadi nyonso ya Yehova ke tala ti mambu yina ba soniká na Bingana 10:22 ke ya vrai: “Bambote (Bénédiction) ya Yehova ke kumisá muntu mvwama mpe ya ke bwelá ve mpasi na zulu ya yawu.” Na ngolo ya mpeve ya Yehova, bisadi ya Yehova ke banda kukuma malembe-malembe na nzutu ya kulunga faso Yesu, mpe ba ke sumuka dyaka ve. (Yoa. 13:15-17; Ef. 4:23, 24) Mpe bilumbu nyonso nzutu ya bawu ke banda kukuma kaka ngolo. Mpe ba ke kuma bantu ya mbote. Luzingu ke vanda vrai kitoko! (Yobi 33:25) Samu na yinki kukanisa mbote-mbote na promese ya Yehova ya kuvumbula bantu ya kufwa ke sadisa beto bubu yayi?

13. Wa’ faso Nkunga 139:1-4, ke na lakisá ti Yehova zaba beto mbote-mbote, mpe wa’ faso kuvumbuka ya bantu ya kufwa ke na lakisak’ yawu?

¹³ Faso beto me tala yawu na paragrafe me luta, ntangu Yehova ke vumbulá muntu, yandi ke vumbulak’ yandi na makanisi ya yandi nyonso ya kulunga. Kanisa fioti na yina ya zola zonza. Yehova zola nge mingi, na yina, yandi ke talá mpe ke zimbaná ve mambu nyonso yina nge ke kanisá, yina nge ke zonzá, mpe yina nge ke salaka. Na yawu, si nge kufwa, ya ke ve mpasi na yandi na kuvumbula nge faso nge vandá avant nge kufwa. Mfumu David zonzá ti, Yehova zaba mbote-mbote mosi na mosi na beto. (Tanga Nkunga 139:1-4.) Yinki ya ke na salá nge na ntima, yina nge me zaba ti Yehova zaba beto mbote-mbote?

14. Yinki ya ke na salá beto na ntima ntangu beto ke kanisa na faso Yehova zaba beto?

¹⁴ Ntangu beto ke kanisa na faso Yehova zaba beto, beto lenda vanda ve na boma. Samu na yinki? Kuzimbana ve ti yandi ke kipeke beto mbote-mbote. Yandi ke pesá valere na mosi na mosi ya beto. Yandi ke talá nyonso yina ke kuminá beto na luzingu, mpe nyonso yina ke salá ti beto vanda bantu yina beto kele. Beto ke na kilengi mingi ya kuzaba mambu nyonso yayi! Kukanisa ata fioti ve ti nge ke kaka nge mosi. Baminute nyonso mpe bilumbu nyonso, Yehova ke vanda na beto samu yandi zola kusadisa beto.—2 Ns. 16:9.

15. Wa’ faso kuvumbuka ya bantu ya kufwa ke na lakisa ti Yehova ke na mayela?

¹⁵ Boma ya lufwa ke mutambu mosi ya ngolo. Bantu yina Satan ke kontroleke ke sadilak’ yawu samu na kupuse bantu na kuteka bampangi ya bawu, to na kusala mambu yina ba zaba ti, ya ke  ve mbote. Beto zaba ti, si ba-enemi ya beto kufwa beto, Yehova ke vumbula beto na lufwa. (Luz. 2:10) Beto zaba ti, ata kima lenda kanga beto nzila ya kusadila Yehova. (Rom. 8:35-39) Yehova lakisá ti yandi ke na mayela ya kulutila, ntangu yandi pesá promese ya kuvumbula bantu ya kufwa! Samu na yawu, beto ke ve na boma si bantu yina ke salá luzolo ya Satan zonzá ti, ba ke kufwa beto si beto sala ve yina ba ke na zonzaka. Mpe ya ke na pesá beto kuraje mingi ya kukangama kaka na Yehova.

16. Wapi bakestion nge zolá yufula, mpe wa’ faso bareponse yina nge ke kuzwa ke sadisa nge na kuzaba si nge ke tulá ntima ya nge nyonso na Yehova?

¹⁶ Si ba yina ke yiina Yehova me zonza ti ba ke kufwa nge, nge ke vanda kwandi na konfianse ti Yehova ke vumbula nge na lufwa? Wa’ faso nge lenda zaba yawu? Kima yina nge lenda sala ni kuyufula, ‘Na badesizion ya fioti-fioti yina mu ke baká, mu ke lakisá kwandi ti mu ke na konfianse na Yehova?’ (Luke 16:10) Kestion ya nkaka nge lenda yufulá ni yayi, ‘Faso ya munu ya kusadila ntangu mpe mbongo ya munu, ke na lakisá ti mu ke na konfianse na promese ya Yehova ya kulungisa bansatu ya munu si mu tula Kimfumu ya Nzambi na plase ya ntete?’ (Mat. 6:31-33) Si nge zonza ti nge ke sadilá mambu nyonso yayi, ya me lakisa ti nge ke tulá konfianse ya nge na Yehova, mpe nge ke deja ya kuyidama ntangu bampasi ke talana.—Bin. 3:5, 6.

17. a) Wa’ faso kuvumbuka ya bantu ya kufwa ke na lakisá ti Yehova ke na ntima ya yinda? b) Wa’ faso beto lenda vutula matondo samu na ntima ya yinda ya Yehova?

¹⁷ Yehova zaba deja kilumbu mpe ntangu (heure) yina yandi ke kwiza kufwa yinza ya yimbi yayi. (Mat. 24:36) Ntima ya yandi ke vanda ve nkufi, mpe yandi ke sala ata kima avant kilumbu yina. Yandi ke na nsatu mingi ya kuvumbula bantu ya kufwa, kasi yandi ke na vingilá ntete. (Yobi 14:14, 15) Yandi ke na vingilá ntangu ya mbote ya kuvutula bawu na luzingu. (Yoa. 5:28) Beto ke na barezon ya mbote ya kuzonza mersi na Yehova samu na ntima ya yandi ya yinda. Samu Yehova ke na ntima ya yinda, bantu mingi na beto mosi mpe, ke na ntangu “ya kunyonga masumu ya beto.” (2 Pi. 3:9) Yehova zola kupesa na bantu mingi okazion ya kuzwa luzingu ya ntangu nyonso. Beto lakisa ti beto ke zolá ntima ya yinda ya yandi. Na wa’ faso? Beto sala nyonso na kusosa ba yina ke na “makanisi ya mbote samu na kuzwa luzingu ya ntangu nyonso”, mpe beto sadisa bawu na kuzola Yehova mpe na kusadila yandi. (Bis. 13:48) Na yawu, bawu mpe faso beto, ke kuzwa bambote ya ntima ya yinda ya Yehova.

18. Samu ya yinki beto zolá lakisa ntima ya yinda na bampangi ?

 ¹⁸ Yehova ke vingila tii nsuka ya bamvula 1 000 ya Kimfumu ya Yesu, avant yandi bakila beto faso bantu yina ke ve na masumu. Kasi na ntima mosi bubu yayi, yandi ke lemvokilá masumu ya beto. Na yawu, beto zolá landa kifu ya yandi na kutalá kaka bifu ya mbote ya bampangi, mpe na kulakisá bawu ntima ya yinda. Beto tala ekzample ya mpangi mosi ya kento yina bakala vandá kwiza dyaka ve na balukutakanu, samu yandi vandá na maladi ya yintu. Yandi me zonza: “Ya vandá mpasi mingi na munu. Luzingu ya beto kwizá chanje na mbala mosi, mpe beto vandá lenda dyaka ve kusala mambu nyonso yina beto zolá sala.” Kasi mpangi ya kento yayi na bakala ya yandi, kontinyeke kulakisa ntima ya yinda. Yandi tulá konfianse ya yandi nyonso na Yehova mpe yandi kumá ata fioti ve ya kulemba. Faso Yehova, yandi kontinyeke na kutala kaka bifu ya mbote ya bakala ya yandi. Yandi me zonza: “Bakala ya munu ke na bifu mingi ya mbote, mpe yandi ke na salá bangolo mingi samu na kunwana na maladi ya yandi. Fioti-fioti, yandi ke na beluká.” Ya ke mbote mingi na kulakisa ntima ya yinda, na ba yina ke na kati ya famiye to kimvuka ya beto, mpe na ba yina nyonso ke na nwaná na bamambu ya mpasi!

19. Wapi desizion nge me baka?

¹⁹ Yesu na ba-ange vandá na vrai kilengi ntangu Yehova yidiká ntoto. Kasi, kanisa na kilengi yina ke vanda na bawu ntangu ba ke tala ntoto me fuluka na bantu ya mbote, bantu yina ke sumuka dyaka ve, bantu yina ke zolá Yehova mpe ke sadilak’ yandi. Kanisa na kilengi yina ke vanda na bakristo yina ke kwenda vanda na Yesu na zulu, ntangu ba ke tala bantu ke na sepelá na kisalu yina ba ke na salaka. (Luz. 4:4, 9-11; 5:9, 10) Kanisa mpe, na ntangu yina bantu ke dila dyaka ve samu na bampasi, kasi ke dila samu na kilengi, ntangu maladi, basusi mpe lufwa ke manisa. (Luz. 21:4) Avant mambu nyonso yayi salama, bubu yayi deja baka desizion ya kulanda luzolo, mayela, mpe ntima ya yinda ya Tata ya beto Yehova. Si nge sala yawu, nge ke bumba kilengi ya nge, mpe ata mambu ya mpasi lenda katula nge yawu. (Zaki 1:2-4) Beto ke na pesá mersi mingi na Yehova, samu na promese ya yandi “ya kuvumbula bantu ya kufwa”!—Bis. 24:15.