1. Yisinke ya tumangedere Jehova a site vantu?

NARE-NARE, Jehova yige gelike ga kere ko konauzuni. Nye eyi kapi ya mu guvisire. Age kwato eyi ga hepere. Nye nampili ngoso, Karunga kwa here vantu nawo va hafere eparu. Eharo kwa mu tumangedere a site vantu.—Epis. 36:9; 1 Joh. 4:19.

2. Ngapi omu Jesus novaengeli va lizuvhire apa Jehova ga sitire yisitwa yimwe?

² Pomuhowo, Jehova kwa sitire Mbeli zendi Jesus. Kupitira moMbeli zendi, Jehova kwa sitire “yininke nayinye” kukwatera mo mamiliyona govaengeli. (Koros. 1:16) Jesus kwa hefe pokurugana kumwe noGuhwe. (Yis. 8:30) Vaengeli nawo yipo va kere apa Jehova naMunwendi Jesus va sitire eguru nevhu. Yisinke va rugene? Awo kwa hambererere Karunga apa Jehova naJesus va sitire evhu. Awo kwa twikilire kumuhamberera apa va mwene nayinye eyi ga sitire, kukwatera mo vantu. (Joba 38:7; Yis. 8:31) Yisitwa nayinye eyi kulikida eharo eli ga kara nalyo Jehova nounongo.—Epis. 104:24; Rom. 1:20.

3. Kuliza no-1 Vakolinte 15:21, 22, yisinke ngazi ka sikisa mo nzambo zaJesus zosizoweseso?

³ Jehova kwa harerere vantu va paruke narunye pevhu moParadisa. Nye apa oAdamu naEva va dilire kulimburukwa kwaGuhyawo, nomfa nononzo kwa li hanena mouzuni mudima. (Rom. 5:12) Yisinke ga rugene ko Jehova? Kutunda tupu apa oAdamu naEva va zonene, Jehova kwa uyungire asi nga parura vantu. (Gen. 3:15) Jehova kwa geve Munwendi ngonzambo zosizoweseso yipo vana vaAdamu naEva ngava va zowore mo mononzo nonomfa. Age nga ka gava mwenyo gwanarunye  kwankenye ogu ana kumukarera.—Joh. 3:16; Rom. 6:23; resa 1 Vakolinte 15:21, 22.

4. Mapuro musinke natu ka zogera mosirongwa esi?

⁴ Mokumona asi Jehova nga ka vhumbura vafe, pwa kara mapuro natu vhura kulipura. Pasihonena, ngapi omu evhumbuko ngali ka horoka? Ngatu kava dimburura vantu ava ngava ka vhumbura ndi? Ngapi omu evhumbuko ngali katu retera ruhafo? Ntani nsene tu teda ko kuhamena evhumbuko, yisinke ali tu rongo kuhamena eharo lyaJehova, unongo wendi ntani nelididimiko? Tu zeni tu ka zogere mapuro aga.

5. Morwasinke natu uyungira asi vantu kapi ngava kava vhumbura posiruwo simwe tupu?

⁵ Apa Jehova nga ka vhumbura vantu kupitira mwaMunwendi Jesus, tuna si huguvara asi vantu kapi ngava ka vhumbuka posiruwo simwe tupu. Morwasinke? Morwa nsene yi ka horoka ngoso, ayo ngayi ka reta maudigu. Jehova kapi a rugana yininke monkedi zepiyagano. Age ga yi diva asi yininke ya hepa kugenda monkedi zongwa yipo vantu ngava ka paruke mombili. (1 Kol. 14:33) Jehova kwa likidire unongo nelididimiko apa ga rugene kumwe naJesus va site evhu yipo vantu va parukire po. Komeho, Jesus nga ka likida yikara oyo monomvhura eyovi apa nga ka ruganena kumwe nava ngava ka pita moHarumagedoni, yipo va ka wapaike evhu nanayinye mokukatambura ava ngava ka vhumbura.

6. Kuliza noYirugana 24:15, wolye vamwe ava nga ka vhumbura Jehova ?

⁶ Sininke somulyo po esi ngava ka rugana ava ngava ka pita moHarumagedoni kuna kara mokukaronga ava ngava ka vhumbura kuhamena Uhompa waJehova nonompango dendi. Morwasinke? Morwa sinzi sava ngava ka vhumbura, kuna kara ava azi tumbura  Bibeli asi “vadona.” (Resa Yirugana 24:15.) Awo ngava hepa kukatura po malitjindjo yipo va ka gwanene mo mauwa monzambo zaJesus zosizoweseso. Gazadara ko sirugana esi ngatu ka kara naso sokukaronga mamiliyona govantu ava va dira kudiva Jehova. Ngoso nkenye gumwe nga ka kara nomurongi gwendi ngwendi moomu tuna kuyirugana naina ndi? Ngoso varongwa ava wovape ngava va tuma monombungakriste va ka gwane edeuro yipo ngava ka ronge ava ngava vhumbuka konyima zawo ndi? Kapi tatu diva, twa hepa tupu kundindira ngatu ka yi limonene. Nye nampili ngoso, kehagero lyEpangero lyaJesus lyoNomumvho Eyovi, “sirongo ngasi zura ediwo lyaHOMPA.” (Jes. 11:9) Yosili ose ngatu ka kara noyirugana yoyinzi monomumvho eyovi.

7. Morwasinke vantu vaKarunga ngava ka likidira nkenda apa ngava ka ronga ava ngava ka vhumbura?

⁷ Monomumvho eyovi, vantu navenye vaJehova ngava ka twikira kutura po malitjindjo yipo va ka mu hafese. Navenye ngava ka likida nkenda yipo ngava ka vatere ava ngava ka vhumbura va ka nyokere po magazaro gawo gomadona nokukaparuka kuliza nonompango daJehova. (1 Pet. 3:8) Vantu ava ngava ka vhumbura ngava ka yi dimburura asi vantu vaJehova kwa linunupika ntani kuna kutwikira kutura po marunduruko va hafese Jehova. Eyi nga yi ka va tumangeda va ka lipakerere kumwe nawo yipo va ka karere Jehova.—Fil. 2:12.

8. Morwasinke natu uyungira asi ose ngatu ka dimburura vekoro lyetu novakaume vetu ava ngava ka vhumbura?

⁸ Pwa kara nokonda deyi natu pulira asi ose ngatu ka dimburura vahali vetu ava ngava ka vhumbura. Pasihonena, kuliza novantu ava ga vhumbwire Jehova mosiruwo sanare, eyi kulikida asi vantu ngava kava vhumbura moomu tupu va kere komeho va fe. Diworoka asi Jesus kwa hetakanesere nomfa konompofu, ano evhumbuko kokupinduka konompofu. (Mat. 9:18, 24; Joh. 11:11-13) Apa muntu ava mu pindura monompofu, age kumoneka moomu ka kara komeho a rare. Tu tareni sihonena saRasarusa. Age kwa fire mazuva gane, ano rutu rwendi kwa tamekere kuwora. Nye apa Jesus ga vhumbwire Rasarusa, vampanza vendi va mu dimbwilire ntani Rasarusa nage ga va dimbwilire.—Joh. 11:38-44; 12:1, 2.

9. Morwasinke vantu ngava dilira ku ka va vhumbura nomarutu gokusikilira mo?

⁹ Jehova kwa tumbwidira asi moParadisa kwato ogu nga sivana asi: “Ta vere.” (Jes. 33:24; Rom. 6:7) Eyi kulikida asi vantu ngava ka va vhumbura nomarutu goukanguki wouwa. Nye kapi ngava kara nomarutu gokusikilira mo, konyima tupu zapa ngava va vhumbura. Nsene ngava va vhumbura nomarutu gokusikilira mo, ngano vakaume vawo nekoro kapi ngava va dimburura. Ayo kumoneka asi vantu ngava ka sikilira mo kanunu-kanunu monomumvho eyovi. Kehagero lyonomumvho eyovi, Jesus nga ka gava Uhompa koGuhwe. Posiruwo oso, awo Uhompa waKarunga una sikisa mo nayinye, kukwatera mo kuninka vantu va sikilire mo.—1 Kol. 15:24-28; Ehor. 20:1-3.

10. Ngapi omu evhumbuko ngali ka tu kundama?

¹⁰ Gazara tupu omu ngoka lizuvha pokukalimorora novahali woge hena. Ove ngo ka lira ndi ngo ka zora? Ove ngo ka hafa unene noku ka kuninkisa o ka hamberere Jehova ndi? Tuna si huguvara asi ose ngatu ka hara  unene Jehova naMunwendi morwa uhwi ou wevhumbuko.

11. Kuliza nononkango daJesus da kara mwaJohanesa 5:28, 29, yisinke ngayi ka horokera ava ava limburukwa Karunga?

¹¹ Gazara ruhafo oru ngava ka kara naro ava ngava ka vhumbura apa ngava ka hutura muntu gomukuru-kuru nokukaparuka kuliza nonompango daKarunga. Vantu ava ngava ka tura po malitjindjo gangoso, ngava ka paruka narunye moParadisa. Nye Jehova kapi ngaka pulisira vantu ava ngava dira kutura po marunduruko va twikire kukara moParadisa.—Jes. 65:20; resa Johanesa 5:28, 29.

12. Monkedi musinke omu Jehova nga ka tungika ava ngava ka parukira pevhu?

¹² Vantu navenye vaKarunga ngava ka yi dimburura asi nonkango domoYisewe 10:22 ado usili. Ado kutanta asi: ‘Etungiko lyaHOMPA alyo kungawopeka. Age kapi a li gava li ku retere kukora.’ Kupitira mevatero lyompepo zokupongoka, vantu vaKarunga ngava ka kara noyikara ngwendi yaKristusa ntani ngava ka sikilira mo. (Joh. 13:15-17; Efe. 4:23, 24) Marutu gawo ngaga ka kara goukanguki wouwa nkenye ezuva. Esi ngasi ka kara siruwo soruhafo sili. (Joba 33:25) Nye, mauwa musinke natu gwanena mo nsene tu teda ko kevhumbuko?

13. Kuliza nEpisarome 139:1-4, ngapi omu evhumbuko ngali ka likida asi Jehova ga tu diva?

¹³ Ngwendi moomu tupu tuna yi zogere nare, apa Jehova nga ka vhumbura vantu, age nga ka va vhumbura noyikara yokulifana ngwendi yeeyi va kere nayo komeho va fe. Gazadara ko asi yisinke yina kutanta eyi. Jehova ga tu hara unene, yipo nye age kudiworoka monkedi omu atu gazara, omu atu lizuvhu ntani neyi atu rugana. Yipo nye, apa nga ka vhumbura vantu, age nga ka va vhumbura ngwendi moomu tupu va fene komeho va fe. Hompa Ndafita ga yi dimbwilire asi Jehova ga tu diva nawa natuvenye. (Resa Episarome 139:1-4.) Ngapi atu lizuvhu kweyi twa diva asi Jehova ga tu diva nawa-nawa?

14. Ngapi omu nayi tu kundama nsene tu teda ko asi Jehova ga tu diva nawa-nawa?

¹⁴ Kapisi hepero tu kare nosinka morwa yeeyi twa diva asi Jehova ga tu diva nawa-nawa. Morwasinke? Diworoka asi Jehova kutupakera mbili. Age kututara asi ose mulyo kwendi. Age kudiwoka nayinye eyi twa ligwanekera nayo meparu. Nonkango edi kutuhengagwida sili. Kapisi tu lizuvhe asi nyoselike tuna kara. Jehova ku kara pepi nose nkenye ezuva, age kupapara nompito yipo a tu vatere.—2 Hist. 16:9.

15. Ngapi omu evhumbuko ali likida asi Jehova munongo?

¹⁵ Kutjira nomfa kuna kara siraha simwe sosinene. Vantu ava a pangere Satana, kuruganesa utjirwe owo yipo va sininike wopeke va rugane yininke eyi va diva asi ayo epuko. Nye ose kapi tatu vhuru kutjira. Twa yi diva asi nsene nonkore detu di tu dipaga, Jehova nga ka tu vhumbura. (Ehor. 2:10) Ntani twa yi diva asi kwato eyi yokuvhura kutukondera tu hageke kukarera Jehova. (Rom. 8:35-39) Jehova ga yi likida asi age Karunga gounongo pokutupa ehuguvaro lyevhumbuko. Ehuguvaro olyo kutuvatera tu dire kutjira apa vantu ava hara kutudipaga. Ntani hena, ehuguvaro lyevhumbuko kutupa nonkondo tu twikire kukarera Jehova noulimburukwi.

16. Mapuro musinke novhura kulipura ntani ngapi malimbururo naga ku vatera o dive nsene asi wa huguvara mwaJehova?

¹⁶ Nsene nonkore daJehova dina hara kukudipaga,  ngo huguvara mwendi asi nga ka ku vhumbura ndi? Ngapi omu no yi diva nsene asi wa huguvara mwaJehova? Nkedi zimwe kuna kara pokulipura nyamoge asi: ‘Matokoro aga ani tulisa po nkenye ezuva kulikida asi ame na huguvara mwaJehova ndi?’ (Ruk. 16:10) Epuro limwe eli no lipura kuna kara asi: ‘Monkedi omu ani ruganesa yimaliwa nosiruwo sange kulikida asi ame na huguvara etumbwidiro lyaJehova asi nga pakera nge mbili noyihepwa yange yopanyama nsene ni tura Uhompa wendi muhowo ndi?’ (Mat. 6:31-33) Nsene ono limburura asi nhi komapuro nagenye ogo, ove ngoso kuna kuyilikida asi wa huguvara mwaJehova ntani ono liwapaikire kukapita momahepeko aga ngo ligwanekera nago.—Yis. 3:5, 6.

17. (a) Ngapi omu evhumbuko ali likida asi Jehova ga kara nelididimiko? (b) Ngapi natu pandura Jehova kelididimiko lyendi?

¹⁷ Jehova ga tura po nare siruwo apa nga ya zonagura po uzuni ou woudona. (Mat. 24:36) Age nga yi rugana oyo posiruwo esi ga tura po. Age kuna kundindira nononkondo mokukavhumbura vafe. (Joba 14:14, 15) Nye simpe ga kara nelididimiko. Age kuna kundindira siruwo esi ga tura po, yipo a ka vhumbure vafe. (Joh. 5:28) Twa hepa kupandura Jehova morwa ga kara nelididimiko. Gazadareni ko tupu, morwa Jehova ga kara nelididimiko, vantu wovanzi kukwatera mo nose twa kara nosiruwo ‘sokulitezurura.’ (2 Pet. 3:9) Jehova ana hara vantu wovanzi ngava ka paruke narunye. Yipo nye, tu yi likideni asi ose kuyihafera kweyi Jehova ga kara nelididimiko. Ngapi natu yi rugana? Pokurugana paapa twa hulira tu papare vantu “navenye ava gwa tumbukira mwenyo gwanarunye” ntani nokuvavatera va hare Jehova yipo va mu karere. (Yirug. 13:48) Makura awo ngava gwanena mo uwa melididimiko lyaJehova ngwendi moomu tupu nose atu gwanene mo uwa.

18. Morwasinke twa hepera elididimiko apa atu ruganene kumwe novakwetu?

¹⁸ Jehova nga twikira ngorooro kutugusira po dogoro kehagero lyonomumvho eyovi apa ngatu ka sikilira mo. Yipo nye, twa hepa kukwama sihonena sendi nokudemenena koyikara yoyiwa yovanavazinyetu ntani nokulididimikira. Koneka sihonena samunazinyetu gomukadi ogu ga kere namugara gwendi ogu ga tamekere kukara nosinka sosinene, makura  konyima ta hageke kuza komapongo. Munazinyetu gomukadi kwa tanta asi: “Eyi kwa koresere nge sili unene komutjima, eparu lyetu kwa litjindjire hararasi. Ose kapi ngatu rugana hena yininke kuliza nomu twa yi harerere.” Nye munazinyetu ogu kwa twikilire kulididimikira. Age kwa huguvarere mwaJehova ntani ga twikilire kumukarera. Ngwendi Jehova, age kapi ga demenene komaudigu gamugara gwendi, nye kwa demenene koyikara yoyiwa yamugara gwendi. Munazinyetu gomukadi ogo kwa tanta asi: “Mugara gwange ga kara noyikara yoyiwa ntani age kwa ku rugana paapa ga hulira yipo a nyokere po yinka.” Ayo mulyo tu lididimikire mepata ndi mombungakriste nsene vakwetetu kuna kukondja va funde po maudigu.

19. Yisinke natu tokomena kurugana?

¹⁹ Jesus novaengeli kwa hefe unene apa evhu va li sitire. Nye gazadara ko omu ngava ka hafa unene apa evhu ngali ka zura vantu wokusikilira mo ava va hara Jehova nokumukarera. Gazadara ko ruhafo oru ngava ka kara naro ava ngava ka pangera naJesus, apa ngava ka mona vantu kuna kugwanena mo mauwa moyirugana yawo. (Ehor. 4:4, 9-11; 5:9, 10) Gazadara ko ruhafo oru ngatu ka kara naro apa mauvera nonomfa ngayi ka haga po narunye. (Ehor. 21:4) Ngesi tu tokomeneni kuhonena Guhyetu geharo, gounongo ntani gelididimiko. (Jak. 1:2-4) Nsene tu yi rugana, ose ngatu hafa mwankenye maudigu. Tuna hafa kweyi Jehova ga tumbwidira asi komeho vantu ‘ngava kava vhumbura.’—Yirug. 24:15.